رواية لا تسألنى من انا

#لاتسالنى_من_انا

.
??روايه بقلم زهور جمال الدين??

.
?الحلقه السابعه ?

.
.
غادة مقعمزة ومقابلها وليد …

-غادة : شنو الموضوع السري
-وليد : اولا نعرفك بنفسى..انا الدكتور وليد صاحب عيادة الزعفران

-غادة : تشرفت بيك
وليد يشبحلها باعجاب …عيونه حارات ماقدرتش حتى تقيم راسها وتشبحله وبالرغم شخصيتها قوية..اول مرة تتلخبط هكى

-وليد : منغير ماتتفاجئ..نبى نسألك عن صديقه ليك
-قامت راسها : منهيا !!؟؟

-وليد : رواسى…رواسى خالد
-تنرفزت غادة ووقفت : انت شن تبى من رواسى
-وليد وقف : بس اهدى شوى وافهمينى

-غادة قعمزت : شنو هى قول
-طلع وليد صورة ليها : هادى هيا والا لا
-خدت غادة الصورة : ايه هيا

-وليد : بوها ايدور فيها
-غادة فرحت : انت متاكد انه بوها

-وليد مبتسم : ايه متاكد
-غادة : باهى وين كان طول السنوات هادى..ياروووحى عليها عييت مادور فيه يانارى
-وليد : الله غالب كان محبوس

-غادة : والله …ياناااارى هدا ليش عطل عليها
-وليد : الراجل يبي بنته ..والدار نكرتها قالو ان ماعندهمش بنت بالاسم هدا

-غادة : مرات معاهم حق ينكرو وجودها عندهم ..لانها هربت منغير علمهم ..وهادى فيها حق عليهم ..لانهم مسؤلين عنها

-وليد : باهى هيا وين توة ..
-غادة : منعرفش
-وليد : انتى مازلتى شاكه فيا

-غادة : لا والله ..لكن بجد والله مانعرف مكانها…خافو علينا من المسؤليه انا وفطومه ..وقررو انهم مايوروناش مكانهم
-وليد : معقولة !!

-غادة: صدقنى اقسم بالله زى مانحكيلك
-وليد : تمام انا مصدقك
-غادة وقفت : اسفه والله تمنيت انى نخدمك …

________________________________

مع الساعه 9 الصبح

فتحت رواسى الباب الخلفى وخشت للممر بيش تمشى لغرفه كركور …
لقت اول غرفه مفتوحه وهيا ديما تشوف فيها مسكرة لما تفوت …
وقف فم الباب وقعدت اتوق بالشوى …
وقف صلاح وراها : فى حاجه ..خيرك اتبيتى على غرفتى
تلفتت رواسى مخلوعه : هدا دارك !!
-صلاح : ايه دارى ..تبى منها حاجه
-رواسى تحشمت : لا سلامتك غير حرت فيها خيرها مفتوحه
-صلاح يضحك : شفتى كيف انا احسن منك ولا درت عياط ولا قلت جايه تفتشى

-رواسى بدلع : هاداكه لو لقيتنى داخل دارك من حقك تتكلم ..لكن انا واقفه فى الممر ماعندكش حجه
-صلاح : اهاا ماشالله ياخوفى تطلعى كنتى تقرى فى القانون وعارفه الحجج

-رواسى : لا ماقريتش قانون ….نستادنك ….

مشت من جنبه وهوا يشبحلها

وصلت قدام غرفه كركور…
ناداها : اسمعى
-رواسى تلفتت : نعم
-صلاح : نغير حوايجى وبنجى نصبح على عبودى
-رواسى بدون اهتمام : براحتك

خش هوا لغرفته وسكر الباب ..

وخشت هيا لغرفة كركور : صباح الخير حبيبي
-صالحه : صباح النور
-رواسى خداته منها : صباحك ورد ياصالحه
-صالحه : جيتى فى وقتك خلى نمشى لسلسبيل اكيدة فاقت

-رواسى : الحاجه ماعجبتهاش صفاء …خيرها قالتلها استريحى من شغلها مع البنوته الصغيرة
-صالحه : صفاء مش زيك ..مايعتمدش عليها تخليلها بنيه صغيرة وتكونى هانيه …امبارح قلنالها غيريلها الحفاظ لقيناها تمزرط فى البنيه وخلاص

-رواسى تضحك : مرات معاها حق الحاجه هيا تعرف مصلحة سلسبيل اكثر
-صالحه : البنيه صحيحه ومرة عندى ومرة عند الحاجه تمشى امورها

-رواسى جاها الفضول : قتلك منسألك علاش سلسبيل تقول للاستاد صلاح عمو…وكركور ايقوله بابا
-صالحه حمقت : وانتى شن علاقتك بى الامور هادى
-رواسى انخلعت من ردت فعلها : لا انا غير سألت بس

طقطق الباب وانفتح …

-صالحه : معش تسألى فى اللى مايعنيكش
-صلاح : صباح الخير
-صالحه : صباح الورد

وتلفتت لرواسى : نستادنكم انا

وطلعت من الباب وخش صلاح …

_______________________________

وليد وغادة قاعدين يحكو مع بعض

-وليد : غير قعمزى شوى

قعمزت غادة عالكرسى

-وليد : انتى فى شن تقري
-غادة : نقرا فى كليه الصيدله
-وليد : كم عمرك

-غادة واطت راسها بحياء: 23 سنه
-وليد : انا دكتور وليد تخصصى باطنه ..وعندى عيادة فيها جميع التخصصات ..وعندى صيدليه صغيرة فى العيادة ممكن نضيفك فيها مع البنات

-غادة : ياحي لين نتخرج
-وليد : لا عادى حتى من توة تقدرى تدربي
-غادة : مش عارفه ..نسأل المشرفه علينا ونرد عليك
-وليد : باهى ممكن تجينى للعيادة …

قامت راسها وشبحتله : قصدى لو عرفتى اى معلومه تقوليهالى
-غادة داسه ضحتها : حاضر
مدلها كرت : هدا عنوان عيادتى

خداته : حاضر
-وليد : انراجيك غدوة
-غادة ضحكت : لما نلاقى معلومه ح نمشى نقولهالك انشاءالله

-وليد ابتسم : حتى منغير معلومه..ممكن اتجى للعيادة
-غادة : حاضر بس مش غدوة ..انا الاسبوع هدا كله صعب نطلع من الدار ..
-وليد : خلاص نستناك زى اليوم باهى
-غادة ضحكت : حاضر ….

وانتهت المقابله ……

وليد طلع وهوا مشغول بيها ….

وهيا ركبت لغرفتها حست انها متاخدة ……

وفى خاطرها : اووووووف شن هالشعور الحلو هدا ….

وقامت الكرت متعه وقعدت تشبحله ……

وفى لحظه ولالها عقلها …قامت الكرت ومزقاته

وفى خاطرها : ماتقعديش تحلمى ياغادة ….هوا وييييين وانتى وين

___________________________________

-صلاح مشى لكركور : صباحووو
والولد يضحك ويقرقر….

-رواسى : قول لبابا صباح الخير كركور هيا ..زى ماعلمتك
-كركور: خييير

-صلاح متفاجأ: بدى ينطق فى الكلمات ..الحمدلله
هاتيه : خداها منها وقعمز عالصالون

صلاح : قول صباح الخير بابا
الولد يشبحله وساكت

-رواسى : مش هكى بالشوى عليه تو يتكلم ..انت خلعته

-صلاح تلفتلها: اسمعى بالله نبيك ديما تقعدى مع عبودى..
بلاش معش نبى نعرف حتى انتى بنت شكون ..ولو تبى نزيدك فى المعاش عادى

-رواسى مدت يدها : هاته…

قاماته فى غمرها ووقفت …

-تلفتت للولد : قول بابا
كركور: بااا با
-رواسى : بعد مانكملو اكل شن نقولو
-كركور: حمو..اله..( الحمدلله )
-رواسى: حنينه شن اسمها
-كركور: طاطيم

-صلاح وقف من الصالون مبهور: الحمدلله اول مرة يستجيب هكى …بارك الله فيك ..

وقام راسها شبحلها : هوا انتى شن كنتى تسألى فى صالحة وقالتلك اسكتى

-رواسى انحرجت ماتبيش تساله هوا حاولت اتغي الموضوع: مزال عندنا هلبا حاجات يابابا

-صلاح : ورونى هى

-رواسى تلفتت لكركور : دير غميضه

حط الولد ايديه على وجهه وحولهم …

وقف صلاح وراها ..جى من جهه اليمين : انا وين

الولد تلفت ايمين …

جي جهه اليسار: انا وين

الولد تلفت ايسار……. وقعد مرة يمشى ايمين ومرة ايسار

وكركور ورواسى يضحكو ….

اتفتح الباب خشت جيهان تشبح فى اللى قاعد ايصير قدامها حمقت …

-جيهان كاتمه غضبها : صباح الخير حبيبي

تلفتلها صلاح باستغراب : صباح الخير ..ماكنتش نحساب انك بتجى
-جيهان? : حبيت انديرهالك مفاجئة …

صلاح مشى جيهتها وصل للباب : باهى تعالى نطلعو برة

-جيهان خلاته جهه الباب ومشت : شويةبس انصبح على عبودى

جت للولد فى غمر رواسى: صباح الخير حبيبي…

وبعدت : اففففف خيره صنته هكى..

وقامت يدها : احنا نعطو فيك فى فلوس بيش تنضفيه مش نجو نبوسوه نلقو هكى صنته …

رواسى قعدت ساكته ومابتش تشبح لصلاح

قربت منها جهان وبهمس: غير نخش الحوش هدا وكان مزال قعدتى فيه

-صلاح : انتى شن تخرفى ..عبودى نضيف وصنته كويسه
..ولعلمك اليوم صالحه هيا اللى غيرتله مش رواسى

-جيهان شبحتلها بفوقيه : وليش تغيرله صالحه ..امالا انتى شن جايبيينك هنايا …

وقربت وجهها منها : ماتنسيش نفسك انتى جايبينك شغاله هنايا ومنظفه وبس

-صلاح قرب منها مسك يدها : تعالى اطلعى برة وحسابك معاى بعدين …

وتلفت لرواسى : حقك عليا امسحيها فى وجهى

-جيهان بعصبيه : وثانى تعتدرلها بدل ماتحاسبها على طولت لسانها

-صلاح : انا صوتها ماسمعتاش ..وينها طولت لسانها اللى بتحاسبها عليها

وشد يدها بالقوة : قلتلك اطلعى

شدت جيهان يدها : ااه حبيبي وجعتنى

خشت الحاجه : شن فى نسمع فى الصوت عالى

وخشت وراها صالحه

تلفتتلها جيهان : ايعيط عليا على خاطر قلت للشغالة صنت عبودى مش حلوة

-صالحه : انا غيرتله عبودى ونضفته كويس

-جيهان : هاااشفتى …قلتلها علاش صالحه اتبدله امالا هيا علاش جايبينها

-الحاجه بهدوء: اول شى رواسى مش شغاله ..ولا انتى اللى جايبتها بيش تحاسبيها ..
وبعتالى صنت عبودى انضف من سمعه هلبا ناس

-جيهان : كل شى الا زعلك يا ماما …

وباست على راسها

-الحاجه : انا ماوجعتينيش بشى …اعتدرى من رواسى وبوسى راسها

-جيهان : لاااا هدا مامزال غير نعتدر من الشغالات …

وتلفتت للحاجه : سامحينى ماما حبيبتى بريستيجى مايسمحليش …

وطلعت …

شبح صلاح لامه وطلع ورا جهان

خشت الحاجه : مادوريهاش يابنيتى

-رواسى صوتها مضغوط : لا لا مش مدورتها ماتخافيش ياحاجه

قربت الحاجه من رواسى وضمتها : والله والله مش تقولى شادتنى على خاطر عبودى ..والله انك بمعزت بنتى توة ..لانى ماشفتش منك العيبه

-رواسى فرحانه وضمت الحاجه ليها : وانتى بمعزت امى اللى عمرى ماشفتها

انتبهت الحاجه للكلمه ..لكن دارت الحولة وماحبتش اتعلق

وطلعت هيا وصالحه وخلتها مع كركور

___________________________________

طلع صلاح ورا جيهان ….

هيا تمشى بسرعه خايفه منه زبطاته متكنطى

وصفاء ومعاد يتفرجو عليهم من بعيد

-صلاح : اوقفى نكلم فيك

وقفت جيهان وتلفتتله تمثل دايرة روحها تتمسكن : خيرك تعيط عليا حبيبي…

-صلاح : اسمعى كانك بديريلى دوشه خلى من توة كل واحد يمشى فى حاله
-جيهان : كل واحد يمشى فى حاله على خاطر شغاله

-صلاح : رواسى مش شغالة …جليسه اطفال …ولعلمك ولدى متجاوب معاها .معناها اصبحت شخص مهم جدا فى الحوش

-جيهان تعيط : مش ولدك ..عبدالرحيم مش ولدك ..
وقامت يدها : بطل وانت عايش الدور وانا نساير فيك

صفاء ومعاد من بعيد سمعو الكلام كله وتفاجئو …

-صلاح يحول فى الدبله من صبعه : ايوووواه ..انتى قاعدة ماوصلتيش وتقوليلى مش ولدك ..امالا لما توصلى شن بديري …

خدى يدها وحط فيها الدبله : اهيا دبلتك …وسلامتك

ومشى لسيارته وركب فيها وهيا واقفه مصدومه

ومعاد وصفاء مصدومين من بعيد

معاد : خيره خوك عصبي

-صفاء: لا والله اوخي هادى..لكن هيا العقرب ديما تطيرله فيه

-معاد : الجمعه بنجيب بوى

-صفاء انخلعت : وعلاش

-معاد : خوك يبي نشجروله الحديقه ..قلتله شغل زى هدا لازم يتعاقد عليه مع بوى

-صفاء: اهاا

-معاد : خلاص اعاطنى موعد الجمعه خاطر عطلته ..وبيش ايورى لبوى الجردينه كلها

______________________________________

فالليل رواسى فى غرفتها بتغير حوايجها وبترجع لكركور

تهدرز صفاء

-صفاء: قلتلك حطلها الدبلة فى يدها ومشى

رواسى فرحت بالخبر وحتى لون وجهها تغير ..لكن دايرة روحها مش مهتمه

-رواسى : مادخلناش فيهم احنا ..يفسخو يتزوجو هدا شى ايخصهم
-صفاء: باهى
-رواسى: شن جوك انتى وعريس الغفله

-صفاء: الله ماتفكرينيش ..محلاه ومحلى كلامه وحبه ليا
-رواسى: انا خاطرى نفهم انتى ليش كادبه عليه وقلتيله انك بنت العيلة هادو

-صفاء: لانه غنى وولد عيله تبينى نقوله انى كنت متربيه فى دار الايتام

-رواسى : صفاء حبيبتى..ديما اشبحى للى اقل منك ..اللى تربت فى حوش اهلها ربايه وسخه ..حاسداتك انتى اللى تربيتى فى دار الايتام ربايه كويسه

-صفاء: تو بتقنعينى انك لما بتحبي بتخبريه انك تربيتى وعشتى فى دار الرعايه

-رواسى تلفتت بتطلع : وليا الفخر انى عشت فيها نضيفه عفيفه ..واللى مابينيش بالماضى متاعى حتى انا مانبيشى

وتلفتتلها : بعدين هوا منين ولد ناس وغنى وهوا عامل متع حدائق ونباتات

-صفاء: لا الشركة نفسها لبوه ..وعنده فيها عمال..وحتى هوا يخدم معاهم ..لكن من لما شافنى استلم الحوش هدا بروحه بس يغير مايبيش حد ثانى يشوفنى

-رواسى : اهاا قلتيلى ايغير …

وقعدو يضحكو

-صفاء: انتى وين ماشيه.. مزال بكرى

-رواسى : ماشيه لغرفه كركور ..منقدرش انخليه بروحه غير توة خليت جنبه حناه تشبح فيه

وطلعت وسكرت الباب

-صفاء ادكرت : حيييه نسيت ماقلتلهاش ان كركور مش ولد صلاح

__________________________________

خشت رواسى من الباب للممر …

تسمع فى الحاجه وصلاح واقفين قدام الديار ويحكو

-الحاجة: ماتوصلش لفسخ الخطوبه ياوليدى..امها كويسه وسيورها تعقل بنتها ..احسن مادرت انك تراجعت عالفسخ

-صلاح : والله كانا ماجتنى للمكتب هيا وامها وقعدت تبكى وتترجا مانردها منها الدبله …تحشمت من امها الحق

وصلت رواسى : السلام عليكم

لقت كركور فى غمر صلاح ….

-رواسى مدت يدها : الممر صقع نخافه ياخد بردة .. خلى ندخله للدار ونرقده موعد نومه …

-صلاح يشبحلها : باهى خلى نرفعولك لسريره

-رواسى : باهى …

خشت الحاجه لغرفتها …ومشى صلاح لدار الولد ورواسى وراه

خش حطه داخل السرير

-رواسى : لا جيبهولى هنايا عالصالون مازال بنغيرله

-صلاح : باهى

وجابه وحطه عالصالون ….

شبحلها : نبهت على جهان وشرطت عليها لا تجى جيهتك ولا تكلمك

رواسى سكتت

-صلاح قرب منها : اللى يزعلك ايزعلنى ..مش عارف خيرنى مش طايق انك تزعلى بكل ..
ممكن عشان انتى مهتمه بعبودى هلبا وقايمه بواجبك

-رواسى شبحتله : هدا من كرم اخلاقك ..لكن انا الحق منبيش انسببلك ربكه فى حياتك ..ولو بنديرلكم مشكلة الافضل انى ننسحب من الحوش هدا

-صلاح : ردى بالك ..ردى بالك تفكرى انك تسيبينا وتطلعى ..

وبعتالى فاق لنفسه : عالاقل على خاطر كركور تعود عليك

-ضحكت : حتى انت بديت تقوله كركور

-صلاح : انتى غيرتى شى كبير فى حياتنا …وكركور اصبح انسان ثانى بعد ماجيتى ..بالله عليك ماتفكرى انك تطلعى من الحوش

-رواسى : حاضر

وتلفتت للولد بتغيرله ..لقت ايديها يرعشو …

-صلاح : تصبحى على خير

-رواسى : تلاقى الخير

وطلع وسكر الباب ..مع ان عنده نيه قويه يقعد معاهم ..بس تحشم …

___________________________

وفات اسبوع ….

خالد يانارى ايمولج ماعرف كيف ايدير ووين يمشى بيش ايدور على بنته …حتى البنيات اللى كان امله فيهم لقاهم مش عارفين مكانها ..والفندى اللى يفتشلهم عالصورة عطاهم موعد بعد يومين ..وهوا قريب ايطير حتى مالصبر نفد

ووليد ايمولج ايراجى فى غادة اتجيه للعيادة وهيا مامشتش ..وهوا كل يوم ايراجى

وصلاح ايمولج يبي يتقرب من رواسى اكثر.. حاس انهت عاجباته هلبا ..وهيا دايرة الحولة خايفه تتعلق بيه ..وخايفه ايصير موقف ثانى بينها وبين خطيبته ..تحاول ماتتلاقاش معاه هلبا …وهيا تصد وتبعد ..وهوا اكثر مايتعلق بيها ويبي يشوفها ويكلمها

لكن عمك وليد طلع فالح ….

وقرر انه هوا يمشى يدور على غادة مدامها مابتش اتجيه

هيا قالتله انها تقرا فى الصيدلة ….

مشى لكليه الصيدله وقعد ايدور بين الطلبه والطالبات لعله يلقاها ….

يدور ويدور ويدور …لين لقاها مقعمزة على كرسى وماسكه اوراق تقرا فيهم …

-وليد : صباح الخير

-غادة تفاجئت بيه قدامها : صباح النور

-وليد : ممكن انقعمز جنبك

حولت غادة شنطتها من الكرسى: اتفضل

قعمز جنبها : خيرك ماجيتيش للعيادة قعدت انراجى فيك

تلفتتله : رواسى اقسم بالله مانعرف مكانها وين ..وعلاش بنجيك

-وليد : انتى خفتى منى

-غادة : وعلاش بنخاف منك ..

-وليد : نجيك بالقدو وبالصراحة ..اقسم بالله مافارقتى خيالى ولا لحظه ..ولا دقيقه …ارجوك اعطينا فرصه نتعارفو

-غادة: انت عارف وين قابلتنى ولا ..فى دار الرعايه ..ورانى لا معروفلى اصل ولا مفصل ..اهلى لوحونى ومايعرفهم حد

عيونها دمعو …ووقفت ….

مسك يدها : اهدى وقعمزى ..ماتخليش زميلاتك ايلاحظونا

-تلفتتله : يا دكتور

-وليد : انا نحبك …الشعور هدا اول مرة نحسه ..اعطينا فرصه للتعارف ماتكريهاش

-غادة : والحب هدا شن نهايته

-وليد : الزواج طبعا

-غادة : وامك وبوك شن بيقولولك

-وليد : امى وبوى اطيب شخصين فى الدنيا …ولما يعرفو ان راحتى معاك مستحيل ايعارضونى

-غادة : نقولك انا تربيت فى الدار واهلى مش معروفين

-وليد : لو تفاهمنا وحبيتينى زى مانحبك امى تمشيلك لعندك فى الدار وتخطبك

-غادة تلفتت الجهه الثانيه : انت تحلم

-وليد : جربينى ومش حتخسري شى

-غادة: بعد نحبك وتسيبنى مش حنخسر شى ..حنخسر حياتى كلها

-وليد : انتى الانسانه اللى ندور فيها ليا زمان …ماتحرمينيش نعيش السعادة معاك

غادة تشبحله وساكته

_______________________________

يوم الجمعه

رواسى دوشت لكركور …وطلعاته من الدوش ..

لقت صلاح مقعمز عالصالون ايراجى فيهم

تحشمت من منضرها قايمه سروالها لركابها ولافه شعرها فوق
بالرغم باينه حلوة بالمرة

-صلاح : صباح الخير

-رواسى متفاجئة : صباح النور

-صلاح : انشالله مفيش ازعاج

-رواسى : لا عادى

حطت الولد عالصالون ولبستله حفاظ وحوايجه الداخليات وهوا نقعمز وراهم ويتفرج …

كملتله …
وعطاته لصلاح : نستادنكم انا توة

-صلاح خداه : خيرك تتهربي منى

-رواسى : لا علاش

-صلاح : ليا اسبوع كل مابنخش نشوف عبودى تطلعى طول ..صدر منى شى يزعجك

-رواسى: لاااا بالعكس معاملتك طيبه ..لكن انا منبيش نزعجكم

-صلاح قرب منها وبهمس : ومن قالك وجودك بيزعجنا

هيا ينارى قريب دابت : لاااا قصدى منبيش

-قص عليها : معش تتهربي باهى…وجودك عمره مايزعجنى ..
بل بالعكس وجودك يسعدنى

-تلفتتله : بصراحة منبيش ندير اى مشكله بينك وبين خطيبتك ..مانبيهاش تكرهنى

-صلاح قرب منها اكثر : انتى زى الملايكه تنحبى … من يقدر يكرهك

-رواسى صوتها يرعش: خلينى براحتى ..انا مستريحه هكى اكثر

-صلاح : لكن انا مش مستريح ..نبى نشوفك ..ونبى نحكى معاك …منبيكش تبعدى عليا

رواسى تلخبطت من كلامه …

-صلاح: عندى نيه نقرب منك اكثر ..ونعرف انتى بنت شكون
…من خوتك …ليش كل مانسألك تنزعجى ماتبينيش نعرف من انتى ..ولا من اهلك

رواسى وجهها تغير ومعرفتش شن ترد

وانفتح الباب خشت الحاجه : باهى اللى لقيتك ياوليدى

-صلاح : خيرك ياااام شن فى

-الحاجه : سلسبيل زى النار ارفعها للعيادة سلم ولدى

-صلاح : خيرها شن صارلها …شن وكلتوها

-الحاجه : فرقت حالها بنيتى والله ماضاقت ختجه من وقت مافاقت
-رواسى: بالك دوشتولها امبارح ولبستوها خفيف

-الحاجه : توة غير ارفعها عاينها البنيه زى النار

-تلفت لرواسى : تمشى معاى

-رواسى : وكركور !!!

-صلاح : يقعد عند صالحه وصفاء ..جهزى نفسك هى

تلفت رواسى للحاجه …

-الحاجه : برى معاه وتو انادى صالحه تقعد مع عبودى

-رواسى : باهى ….

وطلعت مشت لدارها غيرت حوايجها

__________________________________

وبالفعل ركبت معاه فالسيارة وفى حجرها البنيه ..

تلفتلها صلاح وولع السيارة

وهيا ميته من الحشمه اول مرة تركب مع راجل من قدام …وبروحها …

فم باب الفيلا معاد جايب بوه كيف درسو بالسيارة لان صلاح وصاه يبو يزرعو شجر …

نزلو من السيارة الزوز …ويمشو بيخشو للفيلا

طلعت سيارة صلاح ومعاه رواسى

فتح صلاح الروشن

-معاد : صباح الخير استاد صلاح

-صلاح : صباح الخيرات

-معاد : جبت معاى بوى بيش تتفاهمو عالموضوع اللى حكيتلى عليه

بو صلاح يشبح لرواسى وخلاص وهيا مواطيه راسها وتلعب فى البنيه

-صلاح : تشرفت بيكم ..انا توة عندى البنت مريضه بنمشى نعاينها ..شن رايكم اتجونى بعد صلاة الجمعه

-معاد : لا لا خود راحتك مرات تعطل فى المعاينه …

ومدله كرت : اهما ارقام بوى بعد تكمل وتفضى اتصل بيه وتفاهم معاه …

والراجل مصدوم ويشبح لرواسى وخلاص

خدى صلاح الكرت وقراه : مختار عياد

وقام راسه : خلاص متفاهمين …

ويشبح لبو معاد وحاير فيه خيره ساكت

سكر صلاح الروشن وطلع بالسيارة

تلفت معاد لبوه : خيرك يابوى

ماردش عليه …. ومشى من جنبه شوى وقام الموبايل واتصل

” زمان عندهم ارقام فاتورة ”

انفتح الخط : لامين… راسى دايخ يا اوخى كانا نقولك من شفت

لامين : غير قول السلام عليكم …من شفت

-مختار : شفت اختك نجاة قدامى توة !!!!!!!!!!!!!!!

____________________________

تمت ….ويتبع

نحبكم ❤