رواية لا تسألنى من انا
#لاتسألنى_من_انا
.
??بقلم زهور جمال الدين??
.
.
?الحلقه السادسة ?
.
.
بعد ماخشت رواسى وكركور من حديقه الفيلا …
قعد صلاح يتجول ويلف فيها …
وقف قعد يشبح من بعيد يشبح فى بنت وولد واقفين ايهدرزو بكل انسجام ..ماحسوش بيه اصلا
قرب منهم ….
لقى صفاء واقفه عالولد متع شركة العنايه بالجنانات
واقف الولد حاط ماكينه عالعشب ويقص .وهيا لابسه سروال وتيشرت وطاقيه سبور…
وتتكلم معاه …
-قرب منهم صلاح : السلام عليكم
-الشاب اسمه معاد : وعليكم السلام
صفاء تلفتتله ماتعرفاش
-صلاح يشبح لمعاد: من حضرتك
-معاد: انا تبع الشركة متع العناية بالاشجار والاعشاب …
وانت من حضرتك !!؟
-صلاح : حضرتى صاحب الحوش هدا
-تلفت معاد لصفاء: خوك !!؟
-صفاء خشت فة بعضها: ايه خوى
-حسها صلاح انهاكادبه عليه : ايه خوها انا
-معاد فرحان ويزمزك : اهلا بيك يا استاد تشرفنا
-صلاح سلم عليه : صلاح …اسمى صلاح
-وتلفت لصفاء: هيا نخشو للحوش
-صفاء بدت ترقل?: هيا …
مشى صلاح وصفاء ماشيه وراه ..وتلفتت لمعاد دارت باى بيدها …حياها حتى هوا نفس الشى
بعدو عليه شويا ….
-تلفتلها صلاح مبتسم : انتى شن كادبه عليه
-صفاء ?: انا اقسم بالله ماكدبت ..انا نبصر عليه بس
-صلاح : شنو نوع البصارة اللى بصرتيها عليه
-صفاء متحشمه? : قلتله انا بنت الحاجه
انفلق صلاح بالضحك : عطيك الصحه ماخف دمك …انتى شن اسمك !!؟
-صفاء: انا صفاء
-صلاح زبطها : اهاا انتو الخوات الزوز
-صفاء: ايه انا اخت رواسى
-صلاح : امممم اخت رواسى …
-صفاء: فى حاجه ..
-تلفت لمعاد : تحبيه
-صفاء ابتسمت : منعرفش
-صلاح : وهوا
-صفاء انسجمت : ايموووت فيا وبدل ماكان ايجى يوم بس فى اللاسبوع بدى يجى يومين ..ومفكر ايخليهم ثلاثه
-صلاح : ماشالله وهدا كله استفادة لينا احنا ولجرديتنا
-صفاء تضحك : بيش تعرف بس
-صلاح : ماشالله محلاك وماخف دمك ..خيره اختك شاحطه روحها
-صفاء مستغربه : رواسى.. رواسى شاحطه روحها ..من امتى ?
-صلاح: عمومت اتشرفت بيك صديقه …و خودى راحتك نستادنك توة
-صفاء مدت يدها : الشرف ليا يا اعز اصدقائي
قعدت واقفه تشبحله وهوا ماشى للحوش
ورجعت تجرى لمعاد
__________________________
خالد روح فرحان من لقائه مع سلمى
-وليد : يخلف عليها وبارك الله فيها
-خالد : ردتلى الامل ..نحس روحى رجعتلى اليوم ..نوض انجيبو عشى من برة رانى جعان فوق ماتتصور
-وليد : واخيرا تنحى منك هداكة الغشاش…هيا نوض هى
وطلعو مع بعضهم ركبو سيارة وليد ..
-وليد تنحنح : قلتلك والله شن منقولك يا عمى خالد ..انا نعرف واحد هوا صاحب بوى ..عقيد فى الشرطه ..وعنده دراية قوية بالمجرمه وشكالاتهم …
-خالد اهتم : كيف قصدك …
-وليد : قصدى الصورة اللى عندك مدامك عارفها قريبه من شكل المجرم اللى دخل بيتك ..نقدرو نعطوها لى فندى عامر ويزبط لو الشخص هدا مسجل عندهم والا لا
-خالد : عطيك الصحة يادكتور ..امالا بالك نقدرو نفوتو عليه توة
-وليد : ماهو مانعرفش ادا كانا هوا توكة الليله والا لاى…هات الصورة ترفعوها ..واحنا والحظ.. انت قول يااارب
-خالد : يااااارب
خدى مفتاح الحوش من وليد ونزل للحوش جاب الرسمه
ورجع للسيارة وتوكلو للمديريه العامه متع وسط البلاد
__________________________
يوم اللى تكلمت رواسى مع صلاح كان يوم ثلاثاء ..
وفى هداكه اليوم كانت عطلتها …
لانها اسبوع تاخد العطله خميس وبعد عشرة ايام تاخدهم ثلاثاء…
قعمزت مع كركور غيرتله حوايجه وجهزتله العشى بتعشيه وبترقدة مع الثمانيه وبتروح غرفتها ..
وبتستلم مكانها صالحه ….
كملت عشى الولد ..وطلعت
-صالحه : شنو رقدتيه
-رواسى : ايه الحمدلله رقد…
وتسمع فى الضحك فى غرفه الحاجه
-رواسى: شكون مع الحاجه فى غرفتها
-صالحه : صفاء اختك ..ماهو الحاجه تبى تطلب منها تستلم سلسبيل ..
-رواسى: ياودى مندرى تقدرها صفاء
-صالحه : تعالى خشى شوفيهم
-رواسى: لا والله سامحينى بنروح للغرفه تعبانه هلبا
-صالحة: تمام براحتك
وطلعت رواسى للممر …..وفتحت الباب وطلعت لغرفتها
فتحت باب الغرفه وتتفاجأ باللى قدامها
__________________________
فى مكتب مدير دار الرعايه
-مراد : انا الراجل وزعته ..خايف غير من الفرخات الزوز فطومه وغادة
-سالم السكرتير: لازم انخوفوهم
-مراد : اتصرف انت ..انا عارفه الراجل بيوصلهم بيوصلهم
..كانا مش الاسبوع هدا بالتاكيد حيكون الاسبوع الجاى فى الجامعه
-سالم : لكن عن طريق شكون بيوصلهم ..وهوا من قاله انهم صاحبات بنته
-مراد : من العاملات اللى هنايا ..نسيت انهم ايروحو لحياشهم وسهل جدا يتواصل معاهم حتى عن طريق اهلهم
-سالم : معناها الفرخات لازم يتهددو
-مراد : شادهالى يتهددو ..تى هما شن عندهم انهددوهم بيه
-سالم : قرايتهم
-مراد : صح ..نهددوهم اننا نحرموهم من القرايةكانا مامشوش زى ما احنا نبو
-سالم : فطومه اعتبرها من الليله فى جيبك ..لكن غادة شخصيتها قوية وتحب تنشد وتفهم
-مراد : انت تعرفنى لا نحب نختلط بيهم ولا عندى معاهم دوة ..تصرف انت
-سالم : هوا غدوة اكيدة بيدير اى تصرف كيف يوصل لاى بنات يعرفو بنته
-مراد : اكيد
-سالم : معناها المفروض البنات غدوة مايطلعوش من الدار
-مراد : دير رايك.. انا تو نجيبله كم بنت يشهدو قدامه ان مفيش بنت اسمها رواسى هنايا وكانا نا اقتنعش نعرف انا كيف نتصرف بعتالى بطريقتى
-سالم وقف : انا غير خلينى ندير معاهم طريقتى السلميه
..وكانا رفضو بعتالى تغيرو عالتهديد
__________________________
رواسى ماشيه لغرفتها من الممر
فتحت باب الغرفه ….
تتفاحأ بصلاح واقف قدامها فى الغرفه …
وماسك فى يده صور لبنت صغيرة يتفرج عليهم
لما انفتح الباب قام راسه انخلع …
-رواسى باستغراب وعصبيه: انت شن ادير هنايا
-صلاح واثق من نفسه : الحوش هدا حوشى ونخش وين مايعجبنى
-رواسى قامت يدها فى وجهه : انت من تحساب روحك
..خاش غرفة بنات واتفتش فيها ..على شنو ادور
-صلاح تلخبط : انا خشيت هنايا بالصدفه مانحسابهاش غرفتكم
-رواسى : والصور اللى فى يدك منين طلعتهم امالا كانا ما فتشتش
-صلاح باندفاع : لقيتهم هنايا عالطاولة وبعتالى انتى تتهمى فيا بالسرقه ولا شنو
-رواسى مدت صبعها عالصور: الصور هادو انا كنت داستهم تحت السرير..ومافى حد طلعهم .يعنى انت خاش ومدور ومفتش
-صلاح : يعنى انتى بالفعل اتخنبى فيا
-رواسى عيونها دمعو : لا وانت الصادق ..انت اللى اتخنب فيا …اصلا واضح خاش تفتش بلكى تلقى عندنا حاجه مخنوبه انا او اختى ….لكن انا معش ليا قعاد فى البيت هدا بعد الاهانه اللى شفتها بعيونى
صلاح يبي يترجاها ويفهمها انه مش مخنبها لكن مكانته وكرامته مانعينه …
-صلاح : قولى عبودى تعبك وادورى فى اى فرصه انك تهربى
-رواسى وجهت يدها عالباب : لو سمحت اطلع بنلم اغراضى
خشت صفاء..حست ان فى حاجه …
-صفاء : السلام عليكم ..هوا الباين انى جيت فى وقت غير مناسب
-رواسى بعصبيه : لمى حاجاتك بنطلعو من الحوش
-صفاء انخلعت : وين بنمشو
-رواسى : لمى وانتى ساكته
-صلاح : اسمعى انا مانتهددش راهو
تلفتتله رواسى: وانت منو هددك …حتى معاش الشهر سلامتكم فيه …مانبوشى
صلاح حس انه شى قوى فى داخله مايبهاش تطلع من الحوش …
طلع من الغرفه وغمز لصفاء انها تلحقه …وبالفعل طلعت وراه
-صلاح : هديها انتى بمعرفتك ..طيبيلها خاطرها .. هيا والله فهمتنى غلط …انتى اكيدة ليك خاطر عندها
-صفاء: انت غير شن قلتلها بس …نعرفها تتعصب هكى لو حد جرح كرامتها
-صلاح : لقتنى فى الغرفه ..تحسابنى اندور فى حاجه مخنوبه
-صفاء: وانت شن ادير فى الغرفه
-صلاح : كنت اندور على اى ورقه نبى نعرفها بنت شكون
-صفاء: باهى توة كيف الراى انا نعرفها كانها اصرت عالحاجه ماشى ايردها
-صلاح : تعرفى كيف بري نادى امى …
-صفاء?: صح فكرة ..
وخشت تجرى تبى تنادى الحاجه ….
ورجع صلاح خش لغرفه رواسى …
يشبحلها وهيا اترتب فى الغرفه متع وحدة بترحل
-صلاح : حقك عليا ..مش معقولة بنمشى اليوم كله اعتدارات ولا كيف الصبح على خاطر جهان ..وتوة على خاطر لقيتينى فى الغرفه
-رواسى تلفتتله بحمقه ?: ماجابرك شى عالاعتدار …لا بكرى ولا توة ….
خشت صفاء: اهيا الحاجه جايه وراى
-رواسى بغضب: وعلاش مناديتيها …من قالك
خشت الحاجه للغرفه ومعاها صالحه : شنو ماتبينيش نجيك هنايا
-رواسى: لا والله يا حاجه الحوش حوشك
-الحاجه : الحقونى كلكم للصاله لداخل …
-رواسى : لكن انا ….
-قصت عليها الحاجه : سلم بنيتى الحقينى هيا ..
مشت الحاجه ووراها صالحه وبعدها صفاء …
وصلاح قعد واقف يشبح لرواسى واقفه حرجانه تبيش تتحرك ومربعه ايديها ومتلفته الجهه الثانيه
-صلاح قرب منها : صلى عالنبى
تلفتتله رواسى وسكتت
-صلاح : صلى عالنبى
-رواسى : عليه الصلاة والسلام
-صلاح : هيا نمشو لامى ..وحنجبرلك بخاطرك ..ولو ماعجبكش كلامنا امشى ..
رواسى واقفه وساكته
-صلاح : هيا عااد
-رواسى بى تطنفير: باهى حول …
وطلعت من الدار ومشت للصاله .وهوا وراها يضحك ..
__________________________
فى الدار ….
سالم بعت العاملة تنادى غادة وفطومه …
لبسو عباياتهم… وطلعو
لقوه فى صاله الغرف الوسطانيه
-غادة : السلام عليكم عمى سالم
ووراها فطومه سلمت
-سالم : عليكم السلام شنحالكم بنياتى
-فطومه : الحمدلله انشاءالله خير
-سالم : كانا طلبت من بنياتى ايعاونونى الاسبوع هدا كله فى المكتبه متع الدور الاول شن يقولو
-غادة: عيونا ليك يا عمى سالم
-سالم : نبيكم تتفرغو للمكتبه الاسبوع هدا كله ..حتى الكليه توقفوها اسبوع
-فطومه : كيف قصدك بنضموها كلها احنا الاثنين بس
-سالم : لا جايب عمال ..لكن نبى كل شى تحت اشرافكم
-غادة : عن نفسى عادى نقعد الاسبوع هدا كله ..ماعنديش محاضرات مهمه
-فطومه : حتى انا عادى بس ماعدا يوم الثلاثاء عندى محاضرة مهمه
-سالم : عادى ميش مشكل …
ووقف : امالا على بركة الله نبدو من غدوة
__________________________
خالد مقعمز على مكتب .ووليد مقابله
-خالد فرحان : الحمدلله ربي كريم اللى لقينى صاحبك الليله
-وليد : الحمدلله ربي كريم وماينسى حد راهو
جى الرايد صاحب وليد قعمز على مكتبه
-الرايد متلفت لخالد : انا عطيت لمعمل الجنايات الصورة…ويبو اسبوع بيش ايحددو كونه الشخص هدا مطلوب والا لا
-وليد : اطلعونا لو عليه قضايا
-الرايد : لو ملفه مش نضيف وهوا انسان مدان ..حيطلع كل شى عنه
-خالد : معناها توة يبيلك اسبوع ثانى
-الرايد مبتسم : عارفه هلبا لكن بتتحمله معانا يا حاج
-خالد : لا لا عادى..تحملت الهلبا يا بال الشوية
__________________________
خشت رواسى للصاله ووراها صلاح
-الحاجه : خيركم اللطف شن فى
رواسى بتتكلم …
قص عليها صلاح : قبل ماتقولى اى حاجةنبى نعتدرلك
… .صح مش من حقى نخش غرفتك وانتى مش موجودة …
ولو يرضيك اعتدارى وايخليك تقعدى … انا نعتدرلك
رواسى تفاجئت باعتداره ….
وامه عمتك فطيطيم انصدمت بيه مش متعودة عليه يعتدر
-فطيطيم : وانت شن ادير فى غرفتها
-صلاح : ولا حاجه …مانعرفش انها غرفتها اصلا
-رواسى تلفتتله بتهكم : بلحق …. انت عارفها غرفتى ..لكن شاك فينا انا واختى خنابات وخاش اتفتش بلكى خانبين حاجه
-فطيطيم : استغفر الله العظيم …كيف تقولى هكى يا بنتى ..ولدى صلاح مش من اطباعه ايدير هكى …
.
.
وقعدو يتناقشو …يتناقشو ….
وفالاخير لما لقتهم كلهم شادين فيها ..رضت وسكتت
-رواسى : والله على خاطرك انتى يا حاجه
-صلاح يضحك : بلاش منى انا ..عالاقل خودى بخاطر صالحه من بكرى تناقش وقوليلها على خاطرك حتى انتى
-فطيطيم تضحك : خلى البنت فى حالها ياصلاح
وتم النقاش ..وروحو صفاء ورواسى لغرفتهم
والحاجه وصلاح كل حد فيهم خش غرفته
.
.
فى غرفتهم …
رواسى تهدرز على صفاء
– رواسى : انا نبى نعرف كركور ولد منو …ضربنى الفضول
..كيف البنت اتقوله عمو وخوها ايقوله بابا
-صفاء تلفتتلها : لكن صلاح محلاها شخصيته ولا
-رواسى: شنو شكلنا طحنا
-صفاء: تى بكرى شدنةدى نكلم فى معاد ?
-رواسى : انشالله قاعدة تدوى معاه ..مش قلنالك فكينا من المشاكل
-صفاء حطت يدها على قلبها : الحب ..الحب ..هنايا ساكن ..هنايا مطرح مالقلب ايطق
وتلفتتلها : يااااربي تجربيه يارواسى عن قريب
-رواسى حشت راسها فى المخدة: لا نجربه ولا يجربنى
وخيالها كله مرسوم فيه صورة صلاح …
عجبها بشخصيته ..باسلوبه…عجبها انه مايكدبش
وطول جت على بالها خطيبته
.
.
.صلاح راقد فى غرفته …
يتخايل فى رواسى وكيف زعلانه وكيف تكشخ .. وكيف هوا يعتدر
لقى روحه غصبا عنه مبتسم ….
ويكلم فى نفسه : لا لا مستحيل .. معقولة بالسرعه هادى…انا كيف روحت ….
ويحكى فى خاطره : لكن محلاها كلها انوثه ❤
__________________________
.
.
.
.
وفات اسبوع ….
وخالد ايمولج …بلغاته سلمى ان البنات ماعندهمش جامعه الاسبوع هدا ….
وانه قاعدين خدمات للمكتبه ….
وهوا يمولج ….ويمولج
-وليد : غير هدى نفسك ومايصير خاطرك الا طيب
-خالد : كيف بنهدى نفسى والبنيات معش طلعو ..وانا معش فيا صبر نبى نعرف بنتى وين
-وليد : كانا ماطلعوش انا نخشلهم مايصير خاطرك الا طيب
-خالد : كيف
-وليد : عادى نطلب من وحدة منهم مقابله على اساس انى زميل
-خالد : ربحت ياوليدى رانى يعلم الله بحالى
باهى تمام …اهو تو نمشيلهم توة
وبالفعل مشالهم وخدى موعد مع غادة انه زميلها ..
طبعا طلب الزيارة مش تبع الادارة ..لا تبع عاملات الاستعلامات …
ثانى يوم لما ضبحو على غادة… حارت منو من زملائها يعرف انها عايشة فى الدار ….
لبست عباية وخشت للمكتب ….
لقت شاب وسيم مقعمز …
-غادة : السلام عليكم
-وليد مد يده بيصافحها : وعليكم السلام
مدت هيا يدها لابسه فيها قوانتى باعتبار صبعها الزايد متحيش اتوريه …
-غادة : اهلا
مد يده للكرسى اللى مقابله : تفضلى
قعمزت غادة مقبلاته مش قادرة ترفع راسها
وهوا يشبحلها عجباته هلبا ….حيائها وخجلها وصوتها الرقيق
-وليد : اسمى وليد وجايك فى امر سري ومهم
قامت غادة راسها شبحتله …لقاته يشبحلها باعجاب
__________________________
تمت ….ويتبع
وليد تعرف على غادة …..
وطلعت معانا شخصيه معاد ..زعما من بيكون
والمشاعر بين صلاح ورواسى بدت تتحرك
تابعونا مزال هلبا احداث بتصير
نحبكم ❤