رواية لا تسألنى من انا
#لاتسألنى_من_انا
.
??بقلم زهور جمال الدين?
.
?الحلقه الرابعه ?
.
.
وبديت حياة رواسى خارج السجن اللى كانت فيه …
روحت هيا وصفاء لشقه محمود .. باتو
وثانى يوم وتو روحهم …وطقو عالباب فتحتلهم الشغاله
دخلتهم من باب ثانى مش نفس باب امس
باب الشغالين…
-الشغاله : وين شنطه حوايجكم
-صفاء: منحبوش انكثرو اللبس ..كل وحدة عندها لبسه فى شنطه الكتف
“اللى طلعوهم معاهم من الاول من الدار”
دخلتهم الشغالة لدارهم بيش يستريحو …
بعد نص ساعه ….
جتهم وحدة من اللى يشتغلو فى الحوش ..بس تعتبر مهمه وقريبه من الحاجه نقدرو انسموها كبيرة الشغالين …اسمها صالحه
طقت عالغرفه ..فتحت صفاء
-صالحه: وين رواسى
-جت رواسى للباب : ايووة
-صالحه قامت يدها : وقت عملك ابدى
-رواسى بنشاط : حاضر
-صالحه : تعالى وراى ..
وتلفتت لصفاء : انتى بس يا رواسى
وطلعت وراها
واستلمت رواسى عملها
صفاء قعدت فى الغرفه …وهيا طلعت ورا الشغاله رفعتها بيش توريها الطريق من الباب الخلفى
__________________________
فتحت الشغالة الباب الخلفى وخشت للممر
ولفت لممر للجهه اليمين وخشت طول فى كرادورى اول باب مسكر ….
ثانى باب مردود شوى باينه فيه الحاجه مقعمزة على كرسى فى دارها اتسبح
ثالث باب باب الطفل المعاق اللى هيا جايه بتكون الجليسه ليه ….
خشت لقت الولد راقد …..
قعدت صالحه تفتحلها فى الدولاب وتوريلها فى الحفاظات والملابس ….
والبسكويت اللى يحبه الولد ..وورتها باب داخل الغرفه انه حمام داخلى خاص بالطفل بس
– صالحة : طبعا كل شى عليك من تغيير حفاضاته …لفطوره …لغداه …وبالطبع الجلوس معاه
وعلى فكرة هوا يمشى ويطيح ..لازم تمسكيله يده وتمشيه
-رواسى: هوا يتكلم
-صالحه: ينطق فى الحروف بس ..لكن كلمه كاملة لا .. حتى كلمه بابا وماما ماينطقش فيها
-رواسى خايفه شوى من المسؤليه : اهاا
-صالحه: المفارقه انه يفهم فى كل الكلام اللى تقولى فيه ..وحساس ..ويزعل من التكشيخ..لكن مايعرفش ايعاود علاش زعلان او يبكى
-رواسى: ربي يحفظه ويشفيه
-صالحة : حاولى تلعبيه …هوا راهو مش صغير يا نارى
..ونوعا ما يفهم .. غير المرض والاعاقه والمعاملة السيئة من بعض الممرضات اللى كانو معاه خلاه انطوائي.. ويخاف من التعامل مع اى حد غير ناس معينه فى البيت
-رواسى: اهاا
-صالحة: مستر صلاح مهتم هلبا بحالة ولده
-رواسى: مهتم …ومسافر ومخليه !!
-صالحة : هادى امور انتى ماتعرفيهاش …
وقربت منها : وماليكش علاقه تدوى فيها ولا ليك الحق
رواسى تشبحلها وساكته
-صالحه : قولى حاضر
-رواسى : حاضر
-صالحه : تمام نخليك توة لشغلك ..نستادنك
وطلعت ..وخلت رواسى بروحها تتفرج عالغرفه ..وعالعز ..
قعدت ربع ساعه ..والولد فاق ….
اول مافاق بدى ايعيط بطريقه هستيريه
__________________________
محمود مشى لفطومه فى الجامعه
لانهم معش يتلاقو فى الشقه من وقت طلعو البنات منها ..
ويتناقش فيها على موضوع انهم يرجعو يتلاقو فى الشقه
-محمود: حبيبتى انتى شاكه فيا
-فطومه : مستحيل كيف اتقول هكى
-محمود : مش احسن ما انتى توة خايفه وترعشى..اهو نتلاقو فى شقه خوى هوا مسافر وزادوه 4 شهور ثانيات برة
-فطومه : ماهو منطقيا ماتجيش ..شن بتقول عليا انت
-محمود وقف : لو انتى مش واثقه فيا هداكه موضوع ثانى
-شدت يده : غير قعمز ….
وحولتها على طول
-محمود : خلى يدك فى يدى ..شفتى حتى مش قادر انحط ايدى على يدك
-فطومه : باهى خلينى نفكر
-محمود : باهى شن يرضيك ويخليك توثقى فيا ..نمشى نطلبك من مدير الدار
فطومه : ماهو بيقولولك لازم تتخرج قبل
-محمود : نديرو فترة خطوبه
-فطومه : اطلع من احلامك شوية وانزل للارض..انت تحساب روحك بتخطبنى بالساهل
-محمود : وشنو اللى يمنعهم يعطوك ليا
-فطومه : الرفض مش من طرفى ..الرفض من طرف اهلك انت
-محمود : انتى شن تخرفى ..انا اهلى نعطيهم علم على عينى وعلى راسى ..لكن لو رفضوك هدا شى ايخصهم ..انا عطيتك كلمه زى ما انتى عطيتينى كلمه ..الموضوع منتهى بالنسبالى
-فطومه فرحت : لهدرجه تحبنى
-محمود : انا نعرفك من وقت كنتى فالاعدادى ..مربيك على ايدى..وواثق انك ماكلمتيش غيري..نجى انا فالاخير نرخى بيك ..مستحيله
-فطومه فرحانه : ربي مايحرمنى هالصوت يااارب
-محمود : شنو نتلاقو فالشقه ولا شن قلتى
-فطومه : بس على شرط مش كل يوم ..عندى الثلاثاء بس نطلع بكرى
-محمود : باهى حتى يوم فالاسبوع باهى خير من بلاش
وتلفتلها : ووالله ماحتشوفى شى ايزعلك منى…ولو صار وشفتى حقك على رقبتى
-فطومه : تمام يوم الثلاثاء تكمل المحاضرة ونمشى طول للشقهى
-محمود فرحان : وتلاقينى انراجى فيك
__________________________
الولد فاق ..وبدى ايعيط بطريقه هيستيرية
جت رواسى تجرى …
مدت ايديها تبي اتقيمه من السرير …
شافها سكت لانه استغرب فيها…
ورجع ايعيط من جديد…..
مدت رواسى ايديها : حبيبي…اسسس..اسسس
الولد سكت ….
حطت يد تحت راسه ..ويد تحت رجليه وقاماته من السرير
قعمزت عالصالون جنب سريره وحطاته على حجرها ..
قرت فى سرها سورة الفاتحه ونفثت فى وجهه
وحطت يدها على وجهه : صباحك ورد ياحلو
وهوا يشبحلها ماعنداش اى ردت فعل …
مدت يدها تمسحله فى دموعه : خيره الحلو زعلان ..
وهوا نفس الشى ساكت …
نزلاته من حجرها ..وقفاته عالارض
-رواسى: هيا نخشو الحمام …
الولد ماسك يده: حيه عليا ..ماسالتش حتى على اسمك
وهوا يشبلحلها
-رواسى : شنو اناديك زعما
-الولد : كر….كور
-رواسى تضحك: من اليوم بناديك كركور …
مدت يدها: هيا انخشو انديرو دوش
الولد استجاب طول ومشى معاها …
دخلاته للحمام …ودوشتله …ولبساته روب الفوطه …
وطلعاته من الحمام …
لقو الحاجه مقعمزة ….
-فطيطيم : عطيك الصحة يارواسى…
ومدت يدها : تعالة عبودى
جاها يمشى وطاح …
جت رواسى بسرعه مدت يدها وقاماته : صار اسمك عبودى ياشرير
-فطيطيم حارت : شنو هوا كلمك
-رواسى: لا بس انا حرت شن بناديه ..فقالى هوا كر..كور
– فطيطيم : اسمه عبدالرحيم ..على اسم المرحوم جده
-رواسى: ربي يرحمه ويطول فى عمرك وعمره
-فطيطيم: ولدى صلاح روحه فيه ..ومايطيقش فيه حتى حاجه …وكانا قعد يبكى فالليل ..تلاقى صلاح ايمولج تقول مراءة بتجيب ..
رواسى خدت عبودى وقعدت تمسحله فى راسه وجسمه
وتبى اتغيرله حوايجه
-فطيطيم : خلى نطلع انا بلا مانزعجك
-رواسى: لا عادى خليك مفيش ازعاج
-فطيطيم : لا لا خليك براحتك … بنطلع للصاله عشان الفطور
بنراجيك انتى وعبودى افطرى معاى..لانى متعودة عليه يفطر معاى كل يوم
-رواسى : حاضر
وبالفعل طلعت افطيطيم ورواسى قعدت اتبدل للولد
__________________________
بعد نص ساعه ..
كملت رواسى تبديل الولد
ومسكت يده تمشى فيه لين وصلو للصالة
لقت الحاجه تاخد فى دواء الضغط ..
-رواسى: السلام عليكم
-صالحة : وعليكم السلام
والحاجه تشرب فى المية ورا الحبه …
قعمزت رواسى الولد فى كرسى مخصص ليه دايرينهوله يقعمز فيه ويتسكر باحكام بيش مايطيحش منه
-رواسى تساوى فيه عالكرسى: هيا نفطرو كركور
-صالحة باستغراب : منو كركور ?
-رواسى وجهت يدها عالولد : كركور افندى
صالحة شبحت للحاجه
-فطيطيم : مدامه سكتلها وبيخليها تفطره وهوا هادى..خليها تسميه باللى يعجبها
شافت عالحيط هلبا صور ….منهم صورة لشاب حزين …
-رواسى: هدا منو
صالحه قعدت تشبح للحاجه وساكته
-الحاجه : هدا ولدى
-رواسى باستغراب وتمتم : وخيره هكى شكله عمك صلاح ..
وفى خاطرها: مشناه
شرين الهاتف الارضى قص عليهم …ردت صالحه …
وطلعت: مدام افطيطيم يبيك مستر صلاح عالهاتف
قامت رواسى راسها شبحتلها
سيبت الحاجه اللى فى يدها وخست بسرعه لمكتب ولدها بيش اترد عالهاتف
تعلى صوتها وهيا داخل الغرفه …
-فطيطيم : وعلاش ياوليدى التعقيدات هادى كلها انت ليبي والام ليبيه ..هيا ورقه تنازل تكتبوها فى السفارة وتم
وسكتت شوى
وبعدها استرسلت : غير انت ماتغششك روحك سلم اوليدى ..ولدك معاى فى الامان ..والحمدلله حصلناله جليسه
وسكتت شوى
-وتكلمت: ايه من الاعلان اللى انت درته فى الجريدة…انا بنشوفها مبدئيا كيف تعاملها مع حالته ..بالرغم انحس فيها مثقفه وتعرف كيف تتعامل معاه
سكتت وبعتالى : فى امان الله ياوليدى ..كون هانى علينا
وسكرت الخط …وطلعت
قعمزت على طاولة الاكل …
وتلفتت لصالحه : بيزيد ثلاث اسابيع برة..وقالى مرات انصكر شهر
-رواسى انتخصت : هوا مستر صلاح وين مسافر
-صالحة : فى بريطانيا ..فى لندن حاليا
-رواسى مصدومه : ام كركور ليبيه
-الحاجه تلفتتلها : ليبية ابا عن جد ..واهلها ناس حرايميه
..كنهدا ايخلو بنتهم اتلوح صغارها
وناضت من كرسيها …ومشت قعمزت عالصالون
-صالحه: ياحاجه مزال ماكملتيش فطورك
-الحاجه : لا الحمدلله هاتيلى القهوة هنايا
ورواسى تشبحلهم وفى خاطرها : صغارها!!
زعما عندها غير الولد هدا…
وكملت للولد فطوره وهوا يشبحلهم …
__________________________
وفات الشهر
فى السجن ….
عمى خالد دارولهم هوا واللى معاه حفله
خاطر ليهم سنوات طوال فى الحبس
وسلمو على كل الضباط …فى اللى عطاهم رقمه الارضى لو يستحقو حاجه وفى اللى ماعطاهمش
طبعا الدكتور وليد مش من ضمن المدعويين للحفله ..باعتبار ان حبسته عاديه …
وكملو الحفله واطلقو سراحهم …
طلعو من الحبس وقفو تاكسى ..ركبو وليد وخالد
-خالد : خيرك لا حد من خوتك ولا من صغار عمك جوك
-وليد يضحك : تو نوصلو ونحكيلك …
وقعد خالد يتفرج على طرابلس بانبهار..تغيرت فى خلال 18 سنه اللى انحبس فيهم …
وصلو حوش وليد ..فيلا فى السراج …
-خالد : قبل مانخشو الحوش
-وليد تلفتله : شنو
-خالد: توة انت واثق فيا
-وليد فتح الباب وضحك : على وجوها تشرب لبنها ياعمى خالد ..خش خش
وخشو للحوش …قعمزو فى الصالة
وخالد منبهر بالفيلا : الله يبارك ..ماشاء الله
-وليد : انا مفهم الناس والجيران والاقارب كلهم انى مسافر
-خالد : معقولة !!
-وليد : فالقضيه نفسها انا هربت وحكمو عليا غيابى…لما لقيتهم ست شهور مش وقت كبير نهرب على خاطره
-خالد : سلمت نفسك
-وليد : بالزبط …بوى بس عارف بحبستى …ختى امى وخوتى مايعرفوش
-خالد : واكيدة هدا علاش سافر بيها برة
-وليد: بالزبط ..ويكتب فى رسايل ويرفعلها فيهم على اساس منى انا ..وماشى الحال وخلاص
-خالد : ربي يهنيك ..نشهد بالله انك راجل ونص
-وليد : توة شنو بتمشى للرعايه اليوم ولا غدوة
-خالد : وانا شن يصبرنى لغدوة …تووووة ماشيلهم
وبالفعل ناض بيطلع
-وليد : خلى نمشى معاك
-خالد : هى
طلعو خدو تاكسى ومشو لدار الرعايه…
سالو عالمدير قالولهم طالع فى جولة تفتيشيه اليوم ..وغدوة تقدرو تقابلوه
روحو ..وعلى اساس ثانى يوم بيمشى يستلم بنته ..وهوا قريب ايطير من الفرح
__________________________
وفى خلال الشهر اللى فات …
عرفت رواسى ان فالحوش هدا ممنوع الاسئلة …اشتغلى وكولى واشربي وانتى ساكته
وبدى الولد ياخد على رواسى ..ورواسى تاخد عليه
وصفاء شادتها هدرزة مع الشغالات وخلاص
ومرة مرة تستادن من رواسى وتطلع ادير دورة شويا وتروح
اما من الولد انسجم هلبا مع رواسى
وبدت حتى حناه تنادى فيه كركور
وجود رواسى وصفاء معاهم فى الحوش ..دار رونق جديد للعيلة كلها …
خاصة صفاء دارت صحبة مع عمتك فطيطيم ..وتقعمز تقرالها فى الجرايد والمجلات وتتفرج معاها عالتلفزيون وتساير فيها فى كل الامور …
يوم الجمعه فى الليل روح صلاح …
مقعمز عالصالون ماسك فى حجره بنيه عمرها عامين
-فطيطيم : الحمدالله على سلامتك ياوليدى
-صلاح : الله يسلمك يااام ..كيف حال عبودى
-فطيطيم : الحمدلله ياوليدى البنية اللى جتنا يخلف عليها …وليدى منسجم معاها اخر انسجام ..وتغير لا عاد هاداكة العياط ولا هداكه التنتيش ياااربي ليك الحمد
-صلاح : عندى نيه نشبحه
-فطيطيم : هوا راقد توة ..اهو تو انوضها رواسى وخش شوفه
-صلاح : هيا تبات معاه
-فطيطيم : ايه ..الولد معش قادر يبعد عليها دقيقه
-صلاح : خلاص خليه توة نشوفه حتى غدوة ..
-الحاجه : هاتها القمر هادى..بنرقدها معاى فى غرفتى وانا اللى بنهتم بيها مدامها بنيتى صحيحه
-صلاح : لا يااام ح اتعبك تبى تغيير حفاظات وتغيير وفطور وقصه ..مش ساهله
-الحاجه : عندى من يعاونى فيها
-صلاح : منو
-الحاجه : البنت اللى جبناها لكركور معاها اختها قاعدة بلا عمل ..تو نديرلها معاش ونخليها تلهى ب سلسبيل
-صلاح ضحك : منو كركور
-الحاجه تضحك : البنت الجليسه معاه تنادى فيه كركور..بدينا كلنا انادو فيه زيها
-صلاح : ديري رايك يااام
__________________________
.
.
ثانى يوم الصبح …
رواسى فايقه بكرى قبل مالولد الصغير اينوض
تبى ادير قهوتها وتشربها برواء
خشت للمطبخ لقت الشغاله قعدت تهدرز عليها
شورة الشغالة قالتلها على صلاح انه روح امبارح
و توشوش مع الشغالة: قصدك من امبارح امروح
-الشغاله اندونيسيه: اهاا من امبارح …
وسمعو صوت صالحه: مارى …تعالى شوى
-الشغالة: عن ازنك رواسى
-رواسى مستغربه: ازنك معاك اوخيتى
حطت سزوا القهوة عالنار…وعاطيه بالضهر…
خش شاب وسيم ….
-الشاب : صباح الخير
-تلفتتله رواسى : صباح النور
-الشاب: وين مارى
-رواسى: طلعت نادت عليها صالحه
-الشاب: انتى جديدة هنايا
-رواسى حطت الكاشيك وجاته باستهزاء: لا انا قديمه شكلك انت الجديد .. انا المرافقه الخاصه لولدهم الصغير كركور
-الشاب قعمز على طاولة المطبخ وضحك : اهاا انتى جليسه كركور …اممم انا بالفعل جديد هنايا …ممكن اديريلى معاك قهوة …
-رواسى بثاقل: اوووف باهى
زادت اميه عالسزوا ..وزات القهوة ..طابت صبتها فى زوز فناجين ..ومدتله فنجان
-الشاب : شنو انشاء الله مستريحه هنايا فى الحوش مع العيله
-رواسى: الحاجه زى العسل ..وصالحه زى الشرطى…ننصحك لاتسأل هدا منو ولا هدت شكون ..عندهم حساسيه من السؤال
-الشاب : اهاا
-رواسى قعمزت عالكرسى اللى قدامه : انا ماواكل على كبدى وشارب الا ولدهم اللى اسمه صلاح…معقولة من امبارح امروح مايخشش ايشوف ولده
-الشاب: ممكز روح تعبان ..وممكن امه قالتله انك راقدة جنب عبودى فقاللها خليها مسترحه ماحبش ايتعبك
-رواسى: تى انقولك كبده اتقولى خلاك مستريحهة…اشرب بالله قهوتك وبرة لخدمتك …كانه اب زى الناس مايخلى ولده مريض شهر كامل بروحه
-الشاب: اكيدة عنده ضرف
-رواسى: هيا بالسلامه نتلاقو وقت ثانى انشاءالله
رفعت رواسى فنجانها ومشت لغرفه الولد الصغير …فيقاته وبدلتله …
وطق باب الدار
-رواسى: اشكون
-فتحت صالحه الباب وخشت : جهزى كركور ..بعد عشرة دقايق بوه بيجى ويبي يشبحه
-رواسى: حاضر
وفى خاطرها : باهى اللى تفكر …
جهزت الولد وبعد عشرة دقايق طق الباب
خشت الحاجه : صباح الخير
-رواسى : صباح الورد
-الحاجه : ولدى صلاح يستادن يبي يخش
-رواسى: يتفضل
وخش صلاح : السلام عليكم
وادا بيه نفس الشاب اللى طلب منها القهوة فى المطبخ
__________________________
تمت ….ويتبع
نحبكم ❤