رواية لا تسألنى من انا

#لاتسألنى_من_انا

.
??بقلم زهور جمال الدين??

.
?الحلقه الواحدة والعشرون?

.
.
.

صلاح خش للحوش ….

مشى طول لدار صفاء طق عليها

فتحت صفاء واضح انها متكدرة وباكيه

-صفاء/ لقيت رواسى

-صلاح / مالقيتهاش ..لكن لقيت مفاجأة مستحيل تصدقيها

-صفاء/ شنهيا المفاجأة

-صلاح / تعرفت على بو رواسى

-صفاءفرحت / لا لا…معقولة !! وانت كيف عرفته

-صلاح / مش حتصدقى …تعالى نحكيلك كيف تعرفنا

______________________________

.
فى حوش الدكتور وليد

رواسى وبوها يفصل مابيناتهم باب

لاهوا عارفها بنته ..ولا هيا عارفاته بوه

-خالد/ يابنتى افتحى الباب خلى نفهم منك انتى شكون ..

وهيا ساكته وتسمع فيه مع انها خاطرها تفتحله الباب

وتحضنه ليش هيا مش عارفه السبب

-خالد يتكلم بحنيه / انتى عندك اهل .. عندك اخوة وخواتك …

وهيا ساكته …

-خالد/ بوك وين ..اعطينى رقم بوك

-رواسى/ بوى مات ..مااااات

-خالد / لا حول ولا قوةالا بالله..البركه فى وخيينك

-رواسى / ماعنديش خوت

-خالد / انتى خيرك متبريه من اهلك ولا شنو ..اللى نسالك

عليه تقولى ماعندكش

قعدت تسمع فيه وساكته

-خالد تعصب/ مالاخير انتى شن اديري هناياومن جابك ….

انا الدكتور متاكد من اخلاقه

-رواسى انخلعت / لاااا ..رد بالك اضن فيا ضن غلط ..انا

والله بنيه محترمه وماعندى عالطريق الغلط ..انا نعرف

الدكتور واستنجدت بيه ..وخلالى الحوش امبارح وطلع

-خالد تنفس / بارك الله فيه وليد … انا كنت متاكد منه ومن

اخلاقه ..واليوم عرفت انه انسان شهم ..

وخر شوى من الباب / استريحى يابنات وارتاحى ..حتى انا

حنطلع من الحوش ونخليك براحتك

-رواسى منغير ماتشعر / لااااا ماتطلعش وتخلينى

-خالد / انا والله يابنتى مانقدر نقعد فى الحوش وانتى امانه

فيه … لكن انا زيك ماعندى وين نمشى ومستنجد بالدكتور

وقاعد عنده..ولدلك ح نرقد فى المربوعه البرانيه اللى فى

الجنان لين ايجى وليد

” زايدة معاه الدكتور ??”

-رواسى بهدوء / باهى براحتك

وطلع خالد من الحوش كله ومشى لنهايه الجنان عندهم مربوعه برانيه خش فيها وسكر الباب

ورواسى تمولج ..زعما مش صقع عليه برة يانارى شيبانى ..

زعما تغطى ولا قاعد منغير غطا ..وبعتالى ترجع لعقلها انتى

شن دخلك بيه تغطى ولا متغطاش …

_________________________________

ثانى يوم الصبح
.
فى العيادة

الطاهر راقد فى سريره ومعلقيله تغديه ..فى كدمه جهه خده

اليمين …و يادوبك فاتح عيونه ….

مقعمزين مقابلينه عالكراسى بوه واخته غيداء ومعاهم

الدكتور اللى دارله العمليه و زوز ممرضات

-الصادق / مشكور يادكتور … والله بعد كرم ربي معاى ومع

ولدى جميلك ماننساه وعلي راسى من فوق

-الدكتور / الشكر لله وحده يا حاج …وولدك الحق حالته

خطيرة غير مزال عنده خبيزة فى الدنيا بياكلها

-غيداء/ الحمدلله ياربي اللى حفظلى اوخى

-الدكتور / انت كان بتشكر اشكر والدة الدكتور وليد ..

وبنيه صيدلانيه معانا اسمها غادة

-الصادق / قالولى الشباب من لما خشيت .. وبالتاكيد

حنمشيله لمكتبه ونشكره هوا وامه والبنوته اللى معاكم

طبعا الطاهر لون وجهه تغير لما اسمع اسم غادة وانها

صيدلانيه ..

– الطاهر يتكلم بصعوبه / الع.. ششش .. مها

( العيادة شن اسمها )

الصادق مافهمش عليه شن يقول

-الصادق / نعم يا طاهر ..مفهمتكش

-الطاهر يحرك فى شفايفه بصعوبه / غااادة

-الصادق/ تعالى يا غيداء بالك تفهمى انتى منه

-غيداء قربت ودنها من فمه/ شنووو ..والله مافهمتك

…العيادة ..خيرها العيادة

-الدكتور/ ياحاجغدوة احكو معاه زى ماتبو ..توة خلوه بروحه

مانبوشى يجهد نفسه ابدا

-الصادق / صدقت يا دكتور ..خلى نطلع نمشى لمكتب للدكتور وليد

-غيداء/ بابا ..انا بننزل للكفيتيريا متع العيادة تحت

-الصادق / تمام

وطلعو الدكتور ومعاه الممرضات …

-الممرضه توشوش / سبحان الله البنت اللى واقفه تقول الدكتورة غادة الصيدلانيه ولا

-الممرضه / تصدقى حتى انا لاحظتها وسكتت

-الدكتور سمعهم / يخلق من الشبه اربعين

_________________________________

فى حوش محمود …
.
الساعه 11 صباحا

خش محمود للحوش …

-محمود / السلام عليكم

-فايزة طلعت تجرى من المطبخ / الحمدالله على سلامتك ياوليدى…

وبدت تبكى …

– محمود حاير فيها / خيرك يااام ..شن فى انشاءالله خير

-فايزة تبكى / بالك تحسابنى غافله وماعنديش علم

-محمود تلخبط / عندك علم بشنو

-فايزة / تبى تسافر وتسيبنا …كيف اديرها عمله زى

هادى ..واحنا من بينا انا وبوك ..وخواتك من بيهم بعدك

-محمود تلفت للروشن / هلبا ناس سافرو وجتهم القدام ..انا

الحق البلاد هادى ماعاد عندى فيها نيه ولا عندى ليها خاطر

-فايزة / وراس وليدى اللى تبيه انت نديره ..نمشى نخطبهالك

ونجيبهالك عروس

-محمود / تخرفى انتى ..بالك تحسابينى هدا كله على بنت

سيبتنى ومشت

-فايزة / شهادة لله البنت ماسيباتكش ياوليدى ..

-قص عليها / شن تقولى انتى ..شفتيها بعيونك لما طلعت

ولا ..وقالتلى انها ماستريحتش معانا ..خليها بالك اطيح فل

واحد ايريحها ويسعدها ..فطومه تستاهل ياااام

-فايزة / انا اللى قلتلها مانبيكش ..وقلتلها عمك ابراهيم هوا اللى فرضك عليا

-تلفتلها مصدوم /وليش اديري هكى يااام ..حرام عليك البنت

يتيمه وماعندهاش غيري

-فايزة / والله مانبدا الا ماشيتلها وبطيب خاطرى ..نستسمح

منها ونترجاها تولينا

-محمود / قدرك كبير يا امى .. حتى انا مانرضاش انك اتنزلى

روحك هكى على خاطر اى حد فى الدنيا حتى لو كانت فطومه

-فايزة/ باهى انت تعرف مكانهم

-محمود / لا منعرفش ..لكن عرفت اسمه الدكتور الى هما عنده وتو نسال ونوصلهم

-فايزة / تقريبا احلام اختك عندها رقم الارضى متع حوش مريم

-محمود فرحان / احلام…تعالى وينك

وبالفعل جت احلام وعطت لمحمود الرقم واتصل

ردت مريم / الووو

-فايزة / شنحالك ياوخيتى مريم ..

-مريم / من معاى

-فايزة / انا فايزة

-مريم فرحت / اهلين بيك

____________________________________

فى حوش وليد

خالد غسل وجهه فى الحمام البرانى …

ويسمع فى الباب ايشرين…

ورواسى فى دارها فايقه سمعت تشريينه الباب

طلعت من الدار ومشت للصالة اتاوق من ورا الشباك اللى نازل عليه ستار

طلع خالد يفتح فل الباب يلقاه صلاح قدام

رواسى شافاته وطلعت تجرى للدار ترعش مع بعضها ..وتحمد

فى ربي انها ماقالتش اسمها للراجل كنهدا راهو بلغ صلاح

لانها حستهم صحاب هلبا ويسلمو على بعضهم بحرارة

اما خالد ماباش ايخلى صلاح ايخش للحوش ..قاله حتى انا

كيف كنت طالع وبالفعل طلعو وسكرو وراهم الباب

ورواسى قررت انها مستحيل تقعد فيه الحوش لازم تبعد

وتمشى لاخر الدنيا ..لكن شاغلتها صفاء لازم ترفعها معاها

قررت انها تكورج وتكلمها بالتليفون الارضى

قامت التليفون واتصلت ….شرين

-ردت صالحه / الوووو

-رواسى حاطه قدام التليفون فوطه ومغلظه صوتها / انا معاد نبى نكلم صفاء كانها موجودة

-صالحه / معاد متع شركه الجرادين

-رواسى / ايه

-صالحه تضحك / اللطف علينا وخيره صوتك متغير هكى

-رواسى / ها ها ها غير واخد بردة

-صالحه / باهى خليك عالخط شويا واناديها

وبالفعل حطت التليفون ومشت نادت صفاء

طبعا صفاء جت تجرى قريب اطير بالفرحه

-صفاء بصوت رقيق / الووو

-رواسى حولت الفوطه / ردى بالك تنخلعى ولا يبان عليك انا رواسى

-صفاء طول عيونها دمعو / انتى وين يا رواسى ..وين مشيتى

-رواسى / اسسسس مانبيهمش يسمعوك

-صفاء/ انا بروحى الحاجه وصالحه فى الجردينه والله

تعبانات الزوز فى الصغار ..والحاجه وصلاح مشغولين عليك

-رواسى / اسم صلاح معش تدكريه المنافق الكداب هدا

-صفاء/ لااااا ردى بالك …والله قريب يهبل ايدور عليك من

مكان لمكان ..ماتسمعيش كلام الكدابين اللى يبو يفرقوكم

-رواسى / انت سمعته بودانى

-صفاء/ كيف سمعتيه

-رواسى / موضوع طويل ..غير تعالى عندى وتو نحكيهولك

..اصلا انا قررت نمشى لمكان معين وبنرفعك معاى

-صفاء/ مانكدبش عليك يارواسى .. انا من هالحوش هدا

معش بنطلع ..

-رواسى / وتتخلى عليا

-صفاء/ غير انتى وين توة بيش نجيك

وقعدت رواسى توصف لصفاء فى المكان …واتفقو انها تاخد

تاكسى وتكون عندها بعد ساعه
__________________________________

الصادق مقعمز قدام مكتب وليد جنب السكرتير يراجى فيه

لانه قالوله شوى والاجتماع يتم

وبالفعل تم الاجتماع وطلعو الدكاترة …

وطلع وليد لقى عمك الصادق سلم عليه وطاح هداكه يشكر

ويمجد والثانى ايقوله هدا واجبنا

وقعدو واقفين قريب عشرة دقايق مع بعض

ركب الدكتور هيثم جايب معاه طاسه نسكافيه لوليد

-الصادق / انا نبي نشكر السيدة الوالدة جزيل الشكر

..والدكتورة غادة اللى تشتغل معاكم حتى هيا نبى نشكرها

خدى وليد والصادق النسكافيه من الدكتور

-وليد / حنبلغهم تحياتك بادن الله ..انا الوالدة نادرا ماتجى

للعيادة ..والدكتورة غادة اليوم عندها راحة ماجتش للعيادة

– هيثم / الدكتورة غادة موجودة تحت فى الكفيتيريا

وليد حمق لانه قاللها ماتجيش

وتلفت لهيثم / انت شفتها توة

-هيثم / ايه تحت

تلفت وليد للصادق / عموما الف الحمدلله على سلامة ولدكم ..وهدا واجبنا ..نستادنكم

وطلع من جنبهم ماشى للكفيتريا بدير لغادة عركه كيف خالفت كلامه وجت

نزل للكفيتيريا سأل الشاب اللى عالكاشير …

فقاله انها خلصت توة وركبت فوق ..الولد يحسابها غادة…

طلع للدور الاول وهوا قريب يهبل يسال عليها ماحد شافها

فى الصيدلية فتوقع انها روحت ..وقرر يلحقها للحوش

طلع من العيادة وهوا والع ركب سيارته وروح للحوش

_______________________________
.
.
صفاء طلعت للحاجه / بنطلع شويا للمحل ناخد حاجات ناقصينى

-الحاجه / ردى بالك سلم بنتى ومتعطليش

-صفاء/ باهى

وطلعت من الحوش وعارفه روحها بتتأخر..ومع هدا قالت فى

خاطرها نتسبل بأى حاجه بعتالى

لما طلعت من باب الحوش لقت معاد قدامها

-معاد استغرب/ صفاء وين ماشيه

-صفاء تلخبطت / انت شن ادير هنايا

-معاد / جاى بنشوفك انتى

-صفاء/ باهى انا نمشى شوى ومنعطلش

-معاد/ تمشى عينك رجلى على رجلك انتى من امتى عندك صاحبات

-صفاء/ مالاخير انا ماشيه لرواسى

-معاد استغرب / وهيا رواسى وين مش فى الحوش

-صفاء/ لا

-معاد / تى وين مشت

-صفاء/ قصه طويلة

-معاد / تعالى احكيهالى فى التاكسى ..نفوتو شوية على بوى

ناخد ادن شكلنا بنعطلو

-صفاء/ باهى

ووقفو تاكسى وركبو فيه …وصلو قدام شركة بو معاد كانت

هيا حكتله الحكايه كلها

-صفاء/ نراجيك شويا انا فى التاكسى برة انت خود ادن وتعالة

-معاد / هدا مامازال غير تراجينى فى التاكسى ..
وفنص فيها / انزلى

وبالفعل نزلت معاه وخشو للسور متع الشركه ..

فيها زى تريلات ..دخلها تريله وقاللها راجينى هنايا

وطلع سال العامل على بوه فقاله انه فى الجهه الثانيه ..مشاله ايدور فيه

صفاء وهيا مقعمزة فى التريله بدت تسمع فى عركه بين زوز رجاله

-مختار/ توة بس مروح من برة وتتفلسف عليا

-لامين / انا قلتلك راجينى ولا …صدقنى هيا اللى فى حوش

المهندس وانا سألت وحدة من شغالاتهم امس المغرب مروحه

قلتلها فى وحدة اسمعها رواسى هنايا قالتلى ايه جليسه كركور

صفاء سمعت اسم كركور زادت قربت من الحيط الفاصل بين التريلات الزوز

-مختار/ وشنو كركور هدا ..وبعتالى هيا مرته ولا تربيله فى صغاره

-لامين / كركور هدا عيل صغير فى الحوش جايبينها هيا

تربي فيه ..يعنى مربيه بس مش مرت صلاح

-مختار/ ايح علينا عاد ..توة متاكد من هالكلام …ولا ديما

انت الفالح وانت اللى فاهم كل شى

-لامين / انا مانغلطش ..حتى زمان لما بعتت ال اجل ايجيب

فى الاوراق من حوش اختك نجاة قلتلك مزال وفكنا توة

-مختار/ وانا من قالى انهم بيروحو ساعتها وبيتهور خالد وبيتعارك معاه

-لامين / بغلطتك هادى رزيت اختك فى عمرها

-مختار/ القضاء قال راجلها خالد هوا اللة قتلها

-لامين / الكلام هدا قوله لحد ثانى ..انت وانت عارفين ان

الراجل اللى بعتته امت هوا اللة قتلها

-مختار/ يعنى توة بتلبسلى انا الاخطاء اللى صارت فى العيله

كلها وانت المثقف اللى فاهم كل شى وماتغلطش

-لامين / واحنا شن لازنا على الاخطاء الكبيرة اللى زى

هادى..اهى اختك ماتت وراجلها انحبس مؤبد وبنت اختك راحت

-مختار/ راحت منك انت ..ولا هادى ماتدكرهاش

-لامين / الكلام معاك زايد انت ..هيا نستادنك ..ورواسى

معش تمشيلها تو نمشى انا ونتفاهم مع اصحاب الحوش

زطلع وسكر التريلا وراه

وخلى صفاء دايخه مصدومه فى الكلام اللى سمعاته

وتخمم فل خاطرها / معناها بو رواسى محبوس مش مسافر.. ومتهمينه بقتا امهت ظلم ..انا لازم نحط رواسى فى الصورة

وبعد ماسمعت لامين ركب سيارته وطلع

فتحت هيا الباب وطلعت تجرى

_______________________________
.
.
خالد حكى لصلاح على خوال رواسى

-صلاح / مش معقولة ..تصدق انه جى سأل عليها وانا فكرته

ان الدار باعتينه فنكرتها نهائيا وقلتله ماعندناش بنت بالاسم هدا

-خالد / احسن مادرت ..الشكالات هادوو

-صلاح / باهى كيف بدير انت توة

-خالد / لازم نمشيله بالك راهو هوا اللى خاطفها

-صلاح / يجوز …

وبالفعل مشى لشارعهم الاول وسال عليه وقالوله حول من

حوشه ..خدى عنوانه الجديد ومشى يسأل عطوه مكان

خدمته مشوله طول …

لما وصلو قدام بوابة الشركه متع مختار ..شاف صلاح صفاء

طالعه تجرى

-صلاح / صفاء شن ادير هنايا وخيرها طالعه تجرى

-خالد / وقفت تاكسى وركبت

-صلاح / بنلحقها نشوفها وين ماشيه

____________________________________

تمت …ويتبع

نحبكم هلبا ❤