رواية لا تسألنى من انا

#لاتسألنى_من_انا
.??بقلم زهور جمال الدين ??
.

? الحلقه العشرون?

.
.
في المستشفى

وليد وقفت سيارته قدام العياده وخش يجري

لقى البنت واقفه فى الريسبشن

-سألها /وينه الشاب اللى جايباته امى ..وشن صار فيه

-الممرضه /المريض وصل توا وباين حالته خطيره عنده نزيف
داخلي تقريبا

-وليد /
امي وغاده وين

-الممرضه/ الدكتوره غاده والوالده في الممر قدام غرفه العمليات

مشى وليد للممر بسرعه لقى امه واقفه وغادة متكيه عالحيط

غاده شافت وليد مشتله تجري

-غاده/ شفت يا وليد اللى صار … الولد القيناه بين الحياه

والموت الحمد لله جبناه انا وامي للعياده كان هذا راهو توفى

-وليد /الحمد لله درتو طيب اللى انقدتوه خلي نخش شويه

للدكتور للداخل نسأله عن حالته

وبالفعل مشي وليد للدكتور سئله عن حاله المريضه فقاله

انهم وقفوله النزيف الداخلي وداروله عمليه ع الرئة اليمنى

وحالتها توه مستقرة وبعد سته ساعات يستاقض

مشى وليد لامه

-وليد/ ياام مفروض توه تروحو انت وغاده وبعد ايفيق

الشاب ح نكلمكم و نطمنكم عليه

– مريم تلفتت لغادة/ شنو انروحو ونولو غدوة

-غاده /مستحيل يااام ..قبل مانطمنو عليه مستحيل انروح..

-وليد / غادة بلاش عناد روحو وغدوة ارجعو اطمنو عليه

غادة بدت تبكى وبحرارة

وقفت مريم / خيرك اللطف يا غادة شكلك رعشتى

-غادة تبكى / منعرفش خيرنى لكن منقدرش انروح الا وانا

مطمنه عليه ارجوك خلينى يا وليد

-وليد / باهى اقعدى انتى ..

وتلفت لامه / روحى انتى يااام وخليها معاى

-مريم / مستحيل نخلى غادة بروحها هنايا ..اصلا حتى بوك

مهناش اللى بينشغل .. غير ورينى الحمام وينه نغسل وجهى

-غادة/ حتى انا خلى نمشى نحول اللبسه اللى تحت العبايه ضايقتنى

-وليد / تى خيركم دماغاتكم طارت انتو …فطومه فى

الحوش ولا ..تو تنشغل عليكم

-غادة / صح والله … غير تعالى يااام نخشو الحمام وتو

نتصرف انا ونكلمها بالتليفون الارضى

___________________________________

فى حوش صلاح …

الدنيا مقلوبة بالالعاب الناريه …ومن كثر الدوشه ماحد يسمع فى الثانى

وصلاح قالب الحوش على رواسى …يدور فى كل مكان مالقاهاش

وقف فى الجردينه ينادى

-صلاح / صفاء …صفاءءءءء… صفاءءء

-صالحه/ صفاء اينادى فيك صلاح

تلفتت صفاء اشرلها بايده تعالى

مشت صفاء تجرى شاغلينها الالعاب الناريه وراها

-صفاء/ تكلم بسرعه شن تبى بنرجع للعيدميلاد

-صلاح/ وين رواسى

-صفاء متفاجئة / موجودة قبل شوى غيرنا انا وياها ولبسنا وطلعنا

-صلاح قام ايده وبتعصب/ رواسى مهناش فى الحوش اكله من بكرى وانت ندور

-صفاء/ اااه شن تقوووول

وخشت تجرى للحوش تبى نمشى لدارها وصلاح يجرى وراها

خشو للحوش ومنه للممر ومشو يجرو لدار صفاء ورواسى

فتحت صفاء الباب وخشت ووراها صلاح

لقت القفطان اللى كانت لابساته مرمى عالسرير

-صفاء مصدومه / رواسى مغيرة حوايجها

-صلاح حاط يده على راسه و يعيط / تى باهى وين مشت …

-صفاء/ منعرفش

-صلاح طالع من الدار/ اسمعى انا بنطلع اندور عليها انشاءالله غير مابعدتش بس

-صفاء/ خودنى معاك

-صلاح / لا خليك وماتحسسيش حد باى حاجه وكان نشداتك امى تحججى باى شى

وطلع يجرى ….

مشى للقراج ركب سيارته ولعها وطلع …

مشى من الجهه الثانيه …ماشافش سيارة الطاهر وهيا مضروبة

ايدور وايدور وايدور

وشى الشوارع كلها فاضيه

روح للحوش لقى العيد ميلاد تم ..درس سيارته ونزل

_________________________________

فى حوش الصادق

روحت غيداء لقت بوها كيف طالع من الغرفه

-غيداء/ تو هكى ادير يابابا..مفروض مشيت معاى للعيد

ميلاد …مكانك فاضى اخىىىىى

وحطت باكو عالطاولة / جبتلك من التورته والعشى وباقى الحاجات

-الصادق متلخبط / تى غير تورته شنو ..خوك الطاهر ماسافرش

-غيداء/ شنوووو كيف ماسافرش امالا وينه

-الصادق / وانا وين نعلم عليه تليفونه خارج التغطيه… الباين

ان مش كل المكانات فيهم تغطيه

-غيداء/ انت من قالك انه ماسافرش

-الصادق / توة اتصلت بصاحبى اللى يخدم فى المطار وقالى

انه ماجاش للمطار اصلا

-غيداء انشغلت / ماتخافش يابابا بلكى عنده مكان او شغل مشاله واجل سفرته

-الصادق/ معقولة ايدير هكى ويشغلنى ..مش عوايده الطاهر

ولدى لازم ايبلغنى يعرفنى ننشعل

-غيداء / انشاءالله خير ماتفاولش يابابا

_____________________________

.
صلاح خش للحوش…لقى امه وصالحه وصفاء فى الصاله ايراجو فيه

-صلاح واضح تعبان / السلام عليكم

-كلهم / وعليكم السلام

-الحاجه/ وين رواسى ياوليدى

-صلاح حط ايديه على وجهه / مالقيتهاش

-صفاء تبكى / حيه عليا يا غبارتى بالك حد خطفها

-صالحه / بالشوى عليك ياصفاء ماتخافيش ماعندها وين بتمشى

-صلاح / غدوة بنمشى للدار نسأل عليها بالك مشتلهم

-صفاء/ انت ماتعرفهمش هادو صحاب شر ومستحيا ايديرو

الخير فينا خاصه اننا هاربين منهم …

وتلفتت للحاجه / وبعدين رواسى مستحيل ترجعلهم ..

-الحاجه / حتى انا نقول هكى ..رواسى مستحيل تمشى غادى

-صلاح / كلمت بكرى واحد صاحبى عقيد فى الجيش بنرفعه

معاى غدوة ..وانشالله ربك يستر

-صفاء/ قلتلك هادو حرايميه ومستحيل رواسى تمشيلهم

-صلاح متعصب / ماتجننونيش ..اعطونى مكان غير الدار

اندورها فيه وانا مستعد نمشيله توة

-صفاء/ محمود …ممكن مشت لمحمود

-صلاح / مشيت للمحل متاعه ..لقيت بوه كيف بيسكر سالته

عليه قالى انه مش موجود فى طرابلس اصلا ..

-صالحه / معقولةةةةة

-صلاح حط ايديه ورا راسه واتكى التالى / وقالى ان فى

بنت سالت عليه بكرى ..لما قلتله اوصفهالى عرفتها رواسى

-صفاء تبكى/ باهى شن صار ..ومنو ضايقها خلاها تطلع

-صلاح / هدا اللى بيجننى

________________________________

قيس الفجر

-غيداء/ اهو شد الخط يابابا ايضبح تليفون للطاهر

-الصادق مد يده مش قادر يوقف / هاتيه التليفون بسرعه

.
.
غادة مقعمزة عالكرسى فى الممر هيا ومريم …ووليد نادوه الدكاترة مشالهم

فى شنطه غادة بدى صوت تليفون ايشرين

-مريم / خديتى تليفون ياغادة

-غادة باستغراب / لا لا ..

وقامت الشنطه فتختها وطلعت التليفون وادكرت

-غادة / حيييه نسيت ماقلتش عليه لوليد …هدا تليفون الولد

اللى جباه داير حادث وحتى جزدان اوراقه جبته

-مريم / غير ردى توة

-غادة / منين ايردو والله مانعرف

-مريم / رصى البطمه الخضراء فيسع

فتحت غادة التليفون وردت / الوووو

-الصادق صوته مخنوق / انتى منو بابنتى.. هدا رقم ولدى الطاهر ولا

-وقفت غادة / انت شن تقربله

-الصادق / انا بوه

-غادة / يؤسفنى انى نقولك ان ولدك داير حادث ونقلناه للعيادة

-الصادق / اااه حادث

وجت غيداء تجرى قريل تبكى / سن فى يابابا

-الصادق / اللهم انى لا اسألك رد القضاء ولكنى اسألك اللطف

فيه يااارب …غير قوليلى شن صارله يابنتى

-غادة / اطمن حالته توة مستقرة ..وقفوله النزيف الداخلى وداروله عمليه

-الصادق / العيادة وين

-غادة / انا والله مانعرف نوصف ..شوى نعطيك امى توصفلك

-الصادق حاير/ انتى منو…. عندى احساس انى نعرفك ..

-غادة / والله ولدك مانعرفه ..لقيناه طايح فى الطريق

-الصادق / انا مانحكيش على ولدى …انا كأنى نعرفك ..انا

عمك الصادق ..بالك سمعتى اسمى قبل ..انتى بنت شكون

-غادة لقاته شاد فى الموضوع هلبا تعقدت / لا لا مانعرفكش

..اهو معاك امى توصفلك

ومدت التليفون لمريم وهيا ترعش ..ومش عارفه نفسها علاش ترعش

الصادق وغادة كأنهم حسو ببعض

جى وليد لقى امه توصف

-وليد / شكون !!؟؟

-غادة / والد الشاب المصاب اللى جبناه

-وليد بغيرة / وتليفونه شن ايدير عندك

-غادة / لما جبناه جبت التليفون والاوراق لقيتهم فى السيارة

-وليد عاظ سنونه / وانتى شن دخلك فيهم تمسيهم واتجيبيهم

-غادة / وليد خيرك هدا شخص بين الحياة والموت

-وليد / انشاءالله مدفون فقبره انتى ماليكش علاقه بيه

-غادة / باهى خلاص فهمناك

-كملت مريم وصف الطريق / باهى مع السلامه

وتلفتت لولدها / هدا بو المصاب يانارى قال اهو جاى توة

-وليد / باهى نوضو انوصلكم للحوش الوقت متأخر

ماتقدروش تروحو بروحكم

-غادة / مش قلنالك خلينا نقعدو لين …

-قص عليها / قلنا هيا عااد

-مريم / هيا يا بنيتى انروحو وغدوة تو نولو

-وليد / ماعندكم مامولى بيكم ..

وتلفت لغادة/ انتى غدوة ماعندكش توكه ولا ..ماتطلعيش من الحوش

ومشى قدامهم / حطى اوراق الولد فى الاستعلامات

وانراجى فيكم برة فى السيارة بسرعه بنحطكم وبنولى للعيادة

-مريم توشوش لغادة / خيره اللطف

-غادة/ هدا كله على خاطر قلتله تليفون الولد واوراقه فى شنطى

-مريم / فكينا منه يابنيتى ..وليد من لما صغير وهوا حزار

طلعو حطو الاوراق فى الريسبشن وطلعو

بعد نص ساعه وصل الصادق وبنته غيداء وسالو على مكان

الطاهر وين ..قالولهم عالمكان ومشوله طول

وعلى قد ماكلمت غيداء صلاح تبي تقوله على خوها وهوا

شى ايشوف فى مكالماتها وماباش ايرد عليها …لاهى يخمم

فى رواسى زعمك وين تكون …

____________________________________

الصبح مع الساعه 9

مشى صلاح لدار الرعايه ورفع معاه عقيد كبير

خشو من الباب خدو صورة من بطايقهم الشخصيه ودخلوهم

ومشو لعمك مراد عاااد

وبدى يصفق مع بعضه لما شاف رتبه العسكرى اللى خشله

صلاح يحلف ويتوعد كان ماطلعهاش توة

ومراد يحلف ويلقى فى ايديه انها ماجتهمش

-صلاح / نبى اثبات انها مش عندك

-مراد / لحظه بس اهو بعتت للابله سلمى وهيا تجى وتشهد ان رواسى مش عندنا

وبالفعل خشت ابله سلمى وانصدمت انهم يسألو على رواسى

شهدتوقالتلهم انها فى الاكيد ماجتش للدار

وطلع صلاح وهوا يهدد

ضاقت بيه الدنيا وين بيمشى وكيف بيلقاها بس

بعد ماطلعت طوووول اتصلت برقم حوش وليد الارضى لانه

عاطيهولها خالد لو جدت اى مستجدات تبلغه

ومافيش حد رد عليها ..وقعدت شادتها دركت كل ربع ساعه

تتصل على امل انه يرد

___________________________________

.
فى حوش محمود …

انفتح الباب وخش ابراهيم ..لقى بنته احلام فى الصاله

بعصبيه / امك وين

-احلام انخلعت / ماما فى المطبخ

-ابراهيم / ناديها توة بسرعه

خشت احلام تجرى للمطبخ / ماما يبيك بابا

-فايزة / اللطف مش طلع قبل ربع ساعه شن رده

طلعت تجرى للصاله مخلوعه

-فايزة / شن فى انشاءالله خير

-ابراهيم / تعرفى ولدك شنهيا الاوراق اللى ماشى يجيب فيها

-فايزة /شنهيا اللطف علينا

-ابراهيم / ولدك بيهاجر يا فالحة وانتى راقدة على ودانك

-فايزة خبطت صدرها / ياغبارتى من قالك

-ابراهيم ايعيط /بارك الله فى صحابه اللى جو خبرونى وحلفونى مانقولاش

-فايزة تخبط على وجهها / ياحليلى مكسوبى وين بيمشى وبيخلينى

-ابراهيم / تى ماهو هدا كله من فعايلك السودة

وطلع وقربع الباب وراه

وقعمزت فايزة تخبط وتندب على ولدها اللى بيهاجر وبيخليها

-احلام / تبيها ولا تكرهيها يااام ..كله منك حرمتيه من البنت اللى يحبها

-فايزة / غير يقعد والله نمشى نخطبهاله بروحى ..حتى انا

هبال ندير فيه شنو الى بنجيبهاله فيش زايدة عليها تى ماهو

كلهم زى بعض

-احلام / هدا هوا الل قلناهولك يا ماما وانتى شى تجاهلتى

البنت لين خليتيها تطلع بكرامتها

-فايزة تبكى / والله غير ايروح بس ..نركب معاه ونمشيلها

نترجاها تاخده …كل شى ولا وليدى ايضيع منى

_____________________________________

.
خالد روح من السفر هوا وعمك محمد ..

وصلو للمطار و تاكسى حطو محمد هوا الاول وبعتالى نزل خالد فى حوش وليد …

اول ماخش لقى التليفون ايشرين

سكر الباب وخش طول للتليفون رد

ورواسى من ورا باب الدار مسكرة بالمفتاح تسمع فيه وماتبسش ادير صوت

رد خالد / يا اهلا بيك …..موضوع مهم …مايتأجلش لغدوة انا كيف مروح من السفر وتعبان

سكت شوى/ حاضر مسافة الطريق وتلقينى فى الجردينه الل بحداكم

وبالفعل طلع خالد وسكر الباب

ومشت رواسى للحمام غسلت وجهها وخشت للكوجينه لقت

بريوش يابس سخناته وخشت بيه للدار تجرى وسكرت على

روحها الباب بتغير حوايجها وبتطلع من الحوش

وبالفعل بدلت وطلعت للممر مشت للباب الرئيسى ماباش

يفتحلها لقاته مسكر من برة .. لان خالد قبل شوى سكره

فقررت انها ترجع للدار الداخل تراجى وليد لين ايجى
.
.
خدى خالد تاكسى رفعاته لجردينه اللى جنب الدار …لقى سلمى تراجى فيه

-خالد / انشاء الله خير شغلتينى

-سلمى / فى واحد جى يسأل عاى رواسى

-خالد انخلع / منهوا هدا …وشن يكون

-سلمى / منعرفش …

وحط يدها فى شنطتها طلعو ورقه / جبتلك صورة من

بطاقته الشخصيه خديتها من الشباب اللى فى الباب

خدى خالد الورقه ويشبحها يلقى صورة صلاح ينصدم ايجى واقف

-خالد / هدا صلاح …هدا المهندس صلاح منين يعرف بنتى

-سلمى انخلعت / حتى هوا ايدور فيها ضايعه منه ..قصدك انت تعرفه

-خالد / عز المعرفه…لكن منين يعرف بنتى بيش اضيع منه

وتلفتلها/ انتى صحيتى وتو انتصرف انا

وطلع بسرعه من جنبها ركب تاكسى مشى لعيادة وليد يبي يسأله عليه
فقالوله فى العيادة ان وليد مشغول …

فقرر ايروح للحوش ايراجيه لين يفضى ويروح

____________________________________

صلاح لما ضاق بيه الحال حس انه يبي يمشى لحوش الدكتور وليد

درس قدام الحوش ….نزل شرين …

مافى حد ايرد ….

شوى وقفت تاكسى قدام الحوش ونزل منها خالد

مشى يجرى لصلاح شده من رقبته / انت منين تعرفها

رواسى ….منين تعرفها

مولى التاكسى نزل ايحز يبي فلوسه/ صلو عالنبى يا جماعه الخير

-صلاح / انت منين تعرفها رواسى ياعمى خالد

-خالد / بنتى …رواسى اللى كنت تسأل عليها فى الدار بكرى

تكون بنتى

ويضبه صلاح / مش معقولة …مش معقولة ..الحمدلله ياربي

-مولى التاكسى / مدام طلعتو معارف امالا اعطونى حسابى خلى نمشى

مد صلاح لمولى التاكسى خمسه جنيه ومشى

-صلاح / معقولة الدنيا صغيرة هلبا

-خالد / انت منين تعرفها

-صلاح / رواسى كانت عندى فى الحوش ساكنه عند امى وصغارى

-خالد / معقوله …معقوله بنتى كانت معاك وانا نعرفك وعمرى ماخطرلى نسألك

-صلاح / ياريتك حكيتلى قصتك من زمان يا عمى

-خالد / احكيلى عليها …وعلى شكلها وعلى كلامها

-صلاح / شن بنحكيلك عليها ..كل الصفات الحسنه فيها ..وانا

بهالمناسبه نبى نخطبها منك رسمى مدامك بوها

-خالد / انا غير نلقاها بس ونعطيها للى تبيه هيا ..غير وينها

توة وعلاش ضاعت منك

-صلاح / والله مانعرف..لامس كانت عادية جدا ومافيش شى …امبارح فجأة طلعت من الحوش منغير ماتبلغنى

-خالد بدى يبكى / معقولة لما نلقاها اضيع ثانى

-صلاح / مستحيل انخلوها اضيع مننا ثانى انا وياك ياعمى خالد بعد مالقيناها ..اركب معاى نمشو ندورو عليها

____________________________________

وبالفعل ركبو فى السيارة ومشو لفو اليوم كله ….

وحطه قدام الحوش قيس الساعه 9 ونص

والدكتور وليد مزال ماروحش

-صلاح / توة ارقد واستريح مدامك كنت فى سفر زى

ماحكيتلى …وغدوة من الصبح انجيك اندورو عليها ثانى

-خالد / تمام انشاءالله

فتح خالد الباب وخش….

قعمز شوى عل الصالون ….

وخش للمطبخ ….

لاحظ ان الدار المقابله والع ضيها حب يمشى ايسكره

مشى للباب وحط يده عالمقبض لقاها مسكرة

حس ان زى اللى صارت حركه فى الدار متع حد انخلع وجى يجرى للباب

-خالد / من فى هنايا

-رواسى / انت شكون …وين وليد

خالد انصدم / معقولة الدكتور وليد ايجيب فى بنات للحوش

-خالد / انتى منو يابنتى ..وانا نوعدك انى نساعدك

____________________________________

تمت ويتبع

نحبكم ❤