رواية لا تسألنى من انا
#لاتسألنى_من_انا
??بقلم زهور جمال الدين ??
?الحلقه الثانيه عشر ?
.
.
-الحاجه :/توة احنا لازم نتاكدو كانها بنتهم والا لا
-صفاء / وكيف بتتاكدى
-الحاجه /عن طريقكم انتو طبعا ..
-رواسى /ماهو احنا زى ماحكينالك هربنا هروب من الدار
..الحق معش نقدرو نرجعو غادى ونسألو عليها
-صفاء/رواسى خيرك وين دماغك ..نمشولهم للكليه
-صالحه / مفلحك ياصفاء ..معاك حق فى قرايتهم غادى بعيد عن شوشرت العاملات
-صفاء/ بيش تصدقينى لما نقولك انا دكيه
-صالحه : لا مصدقاتك
-رواسى مقعمزة عالصالون وبفرح / معقولة غادة تطلع بنت عز واهلها ساكنين برة
-الحاجه /قولى انشاءالله تطلع بنتهم
-صالحه / لكن المفروض مانعشموهاش لين نتاكدو
-صفاء / صح ..تفرح انها لقت اهلها وفالاخير يطلعو مش هما
-الحاجه / انا متاكدة بنسبه 90% انها بنتهم
-صالحه / وشنو اللى خلاك متاكدة
-الحاجه / نفس الاسم ..نفس المواليد ..نفس الصبع ..معقولة التشابه لهدرجه
-رواسى / امالا خلاص اليوم الامر يقعد سري بيناتنا ..وغدوة نمشى انا وصفاء نجيبوها معانا ونجو
ضربت صالحه ايديها الزوز على بعضهم / عندى فكرة
-تلفتولها كلهم /شنو
-صالحه / نشوفو صور غيداء ..مش هما تؤام ..معناها بتكون تشبهلها عالاقل حتى بنسبه بسيطه على اقل تقدير
-صفاء/ والله ماك عاديه يا صالحه..دماغك هدا ينوزن بالدهب
-صالحه ?/ بش تعرفى بس
-الحاجه /حتى انتى بتدى تتكلمى زيهم يا صالحه?
-صالحه / ???
-رواسى / انتو عندكم صورة لغيداء
-الحاجه / عندنا صور ولدى محمد كلهم ..وهيا معاه فى هلبا صور
وتلفتت لصالحه /بري جيبيهم الصور من الشنطه اللى فوق الدولاب
-صالحه / الشنطه كبيرة والصور هلبا ..مش تجو انتو للدار خير
-الحاجه/ باهى نوضو نخشو للدار هى
__________________________
غادة وفطومه مقعمزات فى الغرفه
-غادة /غير زيدى ادكرى يا فطومه مات ولا ماماتش
-فطومه منهارة / نقولك خليته غارق فى دماياته …
وتخبط على وجهها /حيه عليا محمود مات …حيه عليا انا اللى قتلته
-غادة / باهى غير اسكتى توة بيسمعوك البنات برة والمشرفات ….
وقفت تفكر ….
وبعدين تلفتتلها / شافك حد وانتى نازلة
-فطومه /وين ننعلم انا..كل اللى فى الشارع اكيدة شافونى ..وبعتالى بصماتى فى الشقه كلها
-غادة /وعلاش ماغطيتيش وجهك وانتى طالعه
-فطومه/وين نندرى على روحى وقتها …
وتخبط/ياحليلى على محمود ..ياريتك ماتهورت ودرت هكى
وتعلى صوتها وخيا تعيط : علاش تخلينى نقتلك ..علاااااااش
جتها غادة / ضمى فمك المشرفات بيسمعوك
-فطومه/ زعما يشدونى …زعما بيحبسونى ويقتلونى
-غادة نزلو دموعها / كانا زبطوك بيشدوك امالا لا
-فطومه تخبط على وجهها / ياريت ايشدونى..ياريت يقتلونى ..معش نبى نعيش بعده
-غادة / قلتلك ضمى فمك ..اسمعى انتى كويسه ولا
-فطومه / كيف يعنى
-غادة / يعنى انتى كويسه . سليمه ..مالاخير مامسكش
-فطومه تمسح فدموعها : لا ..لا ماصارش شى بينى وبينه
-غادة / اسمعى يافطومه..انا مستحيل نخليهم يحبسوك
-فطومه تشبحلها / وشن بديري
-غادة / بنهرب انا وياك من الدار…زى ماهربو رواسى وصفاء
?????
__________________________
وليد وخالد روحو للحوش بعد مادارو دورة عالجردينه متع العيادة
خشو للحوش …
خالد خش للحمام طول يغسل فى وجهه
جاب معاه الفوطه اللى فى الحمام ويمسح فى وجهه
-وليد / نبى نعرف علاش تبكى
-خالد يمسح فى وجهه كويس وفى عيونه / لااا وعلاش بنبكى
-وليد /توة احنا بدينا عِشرة يا عمى خالد مش بنعرفك اليوم ..خيرك متكدر وعيونك مدمعات وصاير فيك
– قعمز خالد عالصالون/نقولك الحق
-وليد/قول
-خالد /من لما شفت صاحبك اللى اسمه صلاح وانا قلبي عاصرنى ..تقول عليا شفت رواسى بنتى
-وليد/ انت تعرفه زمان
-خالد / ولا عمرى شفته ..لكن مش عارف علاش حسيت ناحيته بعاطفه قوية
-وليد /صراحة هوا الولد حباب ..وتحسه صادق ومتع خدمه
-خالد/ هدا كله ماليشى علاقه بعواطفى …
وحط يده على صدره / من لما شفته حاجه تحركت فيا هني
” يانارى قلبه حس ببنته”
-وليد/ لكن انت ماقلتليش شن صار معاك فى حكايه تدوير بنتك
-خالد / توة اخر حاجه مشيت لعميد الكليه اللى كانت تقرا فيها بنتى ..وخبرته لو جت تبى اى ورقه ايقوفها ويقوللها بوك ايدور عليك ويتصل بيا طول عطيته رقم العيادة
-وليد / وجيرانكم القدم مامشيتلهمش …
-خالد / والله هاديكا الجهه مانقدر انطبها ..وبعتالى شن عرفها فيهم
-وليد/ فى احتمال ثانى بس ممكن يزعجك
-خالد/ شنهوا
-وليد/ ممكن هيا زابطه لقب خوالها ودورتهم ومشتلهم
-خالد بدى يخمم/ خوالها اا??
.
__________________________
.
.
معاد واقف قدام حوش صلاح يشرين
فتحله عمك جمعه البواب …
يعتبر شيبانى …ويخدم عندهم من لما روحو ليبيا قبل 8 سنين ..من لما كان بوهم حى
-معاد / السلام عليكم
-جمعه/ وعليكم السلام
-معاد : شن حالك يا عمى جمعه
-جمعه / الحمدلله يا معاد ..خيرك جاى اليوم ماعندناش معاكم موعد
-معاد يضحك فى ضحكه صفرا?/ انت خيرك شادها بجديات ديما ياحاج جمعه
-جمعه/ انشاءالله انحجو انا وياك..اختصر شن تبى وراى عمل
-معاد / نبى صفاء
-جمعه / وشن تبى فيها صفاء
-معاد/ اوووف خيرك خاش فى كل شى انت..نبيها فى امر خصوصى
-جمعه/ كانك تلعب بالبنيه ولا بتمشيها هكى ولا هكى راهو مابصيرش معاك طيب..لانهم امانه فى رقبتنا هيا واختها رواسى طول ماهما معانا فى الحوش وفى ضيافتنا
-معاد مستغرب ?/ كيف يعنى فى ضيافتكم مفهمتش ..
وهيا بنتهم
-جمعه / طبعا احنا معتبرينهم الزوز بناويتنا
-معاد /تى كيف معتبرينهم …
-قص عليه جمعه / اووووف علينا عاد ..توة انت شن تبى
-معاد /نبى صفاء دقيقه وحدة بس هنايا منعطلهاش
-جمعه/ باهى قعمز هنايا شوى خلى ننشد الحاجه
خش جمعه بيشوف الحاجه وصفاء …ومعاد بدى يفكر..لعب الفار فى عبه …كيف هيا قالتله بنتهم … وكيف عمك جمعه ايقول معتبرينها زى بنتنا
ويخمم: يا اما الحكايه فيها لبس..والا فيها كدبه …اهى تو تطلع ويبان
__________________________
صفاء والحاجه فى الدار ..
خشت قبلهم صالحه …وقفت عالكرسى
ورواسى خشت تطمن على كركور وسلسبيل مخليه جنبهم ميري الشغالة …لقتهم قاعدين راقدين …
طلعت من دار الصغار وخشت دار الحاجه لقت صالحه كيف منزلة الشنطه
فتحت صالحه الشنطه وطلعت البوم ..
فتحاته وبدت تقلب فيه …لحد ماوصلت صورة واقف فيها محمد وجنبه غيداء حامل ….
البنات جتهم صاعقه وفى صوت واحد : غااادة
-صفاء تهسسترت شدت الالبوم وتشوف / هياااا هيا غادة …..اقسم بالله الا هيا
-رواسى جنبها تفك فى الالبوم منها / ترا ورينى يا صفاء غير حولى يدك ..
وخدت رواسى الالبوم وبدت اتقلب فيه كل مرة اتجي صورة لغيداء
-رواسى/ نسسسسخه …نسخه من بعض
-الحاجه/ الحمدلله يابنياتى .. الحمدلله اللى طلعت البنيه بنت الصادق …
وتلفتت لصالحه / بالرغم والله ماعندى خلوق انكلمه لكن ضرورى نتصلو بيه ونبلغوه ان بنته حيه ولقيناها.
-صفاء/ انتو لعند توة ماقلتوناش شن قصتها وكيف انخطفت
-الحاجه / جدها كان راسمالى كبير..وقبل ثورة 69 كان” بي”
-صفاء?/ ريتى عمتك غادة مايطلع منها جدودها ناس متسمية
-الحاجه / لماقامت الثورة هربو من البلاد وطلعو برة عاشو فى اسبانيا ..وكبر الصادق غادى وتزوج نزيهه بنت خاله بعتوهاله من ليبيا …
-رواسى/ باهى وبعتالى
-الحاجه / جابو ولد اسمه طاهر على اسم جده وبعد 4 سنين حملت مرته بالتويمه ..استاحشت نزيهه اهلها وقالت لراجلها خلى نجيب فى ليبيا
-صالحه / ياريتها ماجت يانارى عليها
-صفاء/ اوووف غير اسكتى ياصالحه خلى نفهمو
-صالحه حطت ايدها على فمها / هه سكتت
-رواسى/ وبعدين شن صار
-الحاجه : وبعدين شنو عاد ..جابت فى ليبيا وانخطفت البنيه منهم رافعينها ايطعمو فيها فى عيادة اطفال..لا السمى قالت ريتها والا والوطا قالت ريتها
-صفاء/ باهى ليش ..ليش خطفوها ..شن السبب
-الحاجه / الله اعلم ..شى ايقولو اعداء جدها ..وشى ايقولو ناس يبو عليهم فلوس من زمان انتقمو منهم ..وفى اللى يقول البنيه راحت اهمال من امها .. الله اعلم الحقيقه وين
انهارو البنات الزوز بالحقيقه .. بدو يبكو ..سخفتهم غادة …وعندهم نيه ايطيرولها اليوم قبل غدوةبيش ايقولولها
-رواسى / باهى توة كيف ايصير يا حاجه ..احنا زى ماحكينالك مانقدروش نمشو للدار..لازم انتى تمشى تقوليلها
-الحاجه / رواسى بنتى الكلام بالعقل وبالرزن ..البنت عندها امالى كانا هما حق اماليها..هما اللى يمشولها ويقولولها ويطالبو بيها
-صفاء/ تى كيف يا حاجه معقولة يعطينا قلبنا نقعدو ساكتين واحنا نعرفو امالى غادة منهما ..مستحيل ..عالاقل ابعتى صالحه
-صالحه : واحنا منقدروش انخشو فى موضوع زى هدا ..زى ماقالتلك الحاجه …
وتلفتت للحاجه / مش بوها بيجى الاسبوع الجاى
-الحاجه?/ لاااا يا حنة قدم سفرته وبيجى بعد غدوة
..ومعاه ولده الطاهر..نسمع فيه اول امس ايكلم فى ولدى صلاح ..ماهو موصيه على اوراق للصغار
-رواسى/ وااااك شن يصبرنا لين ايجى بوها هنايا ..بصراحه انا غدوة نبى نقوللها لازم نبعتولها اى حد
-الحاجه /نقولو لولدى صلاح يمشيلها
-رواسى انخلعت/ لااااا ..انتى عطيتينا الامان يا حاجه انك ماتحكيش حكايتنا لحد
-الحاجه / لااااا ماحبيتها منك يارواسى..شنو ولدى صلاح عدو .. ولا بيقول كيف كانو غادى منخليهمش معانا ..بالعكس انتو بدينو بناتنا مننا وفينا
-رواسى : عالاقل توة على خاطرى ..ماتقوليلاش بالله عليك
-الحاجه / معاناها على صاحبتكم بتصبرو لين ايجى بوها بعد غدوة
-صفاء/ ياااربي جيب الصبر هالثلاثه ايام
-صالحه/ اللى صبرها سنين منغير امالى يصبرها يومين ثانيات
ويسمعو فى صوت جمعه ينادى من الصاله/ يا صالحه
..ياصالحه وينك
طلعتله صالحه وقاللها نادى صفاء يبيها معاد برة
__________________________
.
طلعت صفاء فاتحه شعرها ومتكمه روحها
لقت معاد واقف متكنطى…
-صفاء انشغلت / اهلين معاد .. خيرك فى شى
-معاد / تعرفى منو ينكر فى اصله
-صفاء عيونها دمعو/ خيرك يامعاد
-معاد / لما تنسبى على ناس ثانيه وتقولى انهم اهلك هدا عيب عليك ..هدا اسمه خداع ..انا مصدوم فيك
-صفاء/ والله ماقصدى نخدعك ..الحكايه بدت ببصارة ..وانا راضيه بحكمك عليا ..وكنت عارفه انها حكايه وبتنتهى حتى لو عرفت اهلى شكون
-شدها معاد من كتافها/ باهى ليش لعبتى بمشاعرى ..ليش ..ليش !!!!
سيارة صلاح خشت من البوابه ….
حول معاد ايديه من كتافها ….وطلع بسرعه
صلاح اينادى فيه يبي يقوله على عيادة وليد وانه قاله عليهم .. لكن معاد ماردش وطلع متكنطى مايشبح فى شى ..نسى حتى يقوللها على موضوع بوه وانه شاف بنت اخته هنايا فى الحوش ..هل هيا نفسها ولا البنت الثانيه
__________________________
رواسى خشت لدار الصغار …
وصلاح خش للصالة …طلعت امه من الممر لقاته مقعمز
وصلاح خش للصالة …طلعت امه من الممر لقاته مقعمز
-الحاجه / نبشرك بشارة يا صلاح
-صلاح تلفتلها / انشالله خير يااام
-الحاجه /حوش الصادق نسابات خوك محمد مش عندهم بنت رايحه
-صلاح انتبه: خيرها …لقوها قصدك ولا شنو
-الحاجه / مش هما اللى لقوها …احنا اللى لقيناها يا وليدى
-صلاح مستغرب : احنا شكون يعنى
-الحاجه / انا وصالحه..وناس معرفه
-صلاح / وحوش الصادق عرفو ولا مزال
-الحاجه:مزال ماقلتلهمش ..مشقلتلى انهم بيجو بعد غدوة
-صلاح /ايه قالو انهم بيجو
-الحاجه / خلاص انقولولهم بعد مايوصلو لان الموضوع فيه مسؤليه والمكان اللى فيه البنت مش ساهل ويبي اجراءات
-صلاح تعصب /شنوالحكى بالالغاز هدا يااام ..احكيلى البنت وين ومن دلك على مكانها
-الحاجه / البنت فى دار الرعايه
-صلاح مستغرب/ وشن وصلها غادى
وتلقتلها باستغراب اكثر/ وانتى من قالك على مكانها
-الحاجه/ الحق اللى قالولى امحلفينى ياوليدى ..
-صلاح/ منو هادو اللى محلفينك وتبى ادسى عليا ..فى قولتك مكان البنت مش ساهل وفيه مسؤليه ..وبالك البنت والا الناس اللى قالولك متورطين فى حاجه
-الحاجه/ الناس اللى قالولى ثقه ..وانا واثقه فيهم زى نفسى
-صلاح/ ياااام ماتهبلينيش منهما هادوما اللى عندك فيهم ثقه وانا مانعرفهمش
-الحاجه / يعنى ضرورى تعرفهم منها
-صلاح/طبعا ضرورى نعرفهم منها ..ولازم نعرف شن صيلتهم بالبنت
-الحاجه / باهى تعالى نخشو لدارى
وناضو خشو دار الخاجه
__________________________
فى شقه محمود ….
محمود غارق فى الدم نازل من راسه …
فتح عيونه حس ان راسه ثقيل …
قام يده حطها على راسها وقربها من وجهه …لقاها دم
بدى يتقاعد بالشوى بينوض …ويدكر فى اللى صار اكله
ندم هلبا ….عرف انه ممكن خسر فطومه …
طلع من دار النوم …خش للحمام غسل شعره ..لقى الدم ماجفش وقاعد ينزل …
خش للمطبخ خدى قهوة وحطها على راسه وشدها بالفوطه …
وخش دار خوه غير حوايجه وطلع من الشقه روح لحوشهم
شافاته امه دارت مناحه
-عمتك فايزة /خيره راسك مع من متعارك يا ولد
-محمود متأفف /متعارك مع شباب ..ومايكلمنى حد … غير حولى من قدامى
-فايزة/ غير تعالة جاى انكلملك وسيم ولد خالتك ايجى يرفعك للمستوصف
-محمود /توة كنت فيه وخيطولى غرزتين
-فايزة / مع من متعارك غير قولى ..والله ايجى بوك بعتالى ايشوفك هكى لما يقربعلنا الليله
-محمود / مامتعارك مع حد ..وماتقوليش لبوى
-فايزة/ كيف منقولاش وهوا مرتين يتصل عالارضى ينشد عليك وينك فقدك من الضهر جنازة عمك ابراهيم
-محمود/ شفتها الخيمه وسالت وقالولى عم ابراهيم مات ..والله سخفنى خيره شن قتله
-فايزة / حادث فى السريع يانارى..حتى انا كيف روحت توة ..وبنولى نبات معاهم
-محمود / وعلاش بتباتى معاهم ..غدوة ارجعى
-فايزة / مزال والله عشرة عمرنا والحيط فالخيط
-محمود / عالمهم انا بخش لدارى منرقد للصبح بالله مايطق عليا حد
وخش لداره واتكى على سريره ويخمم كيف بيرقع عملته
__________________________
-صلاح مصدوم / معقولة ……….معقولة رواسى متربيه فى دار الايتام
-الحاجه/ وراس اوليدى البنيه امحلفتنى مانقول لحد رد بالك اتقوللها
-صلاح مصدوم / لا لا اصلا انا مستحيل نجرحها بكلمه
ومشى جهه الباب بيطلع
-الحاجه/ وين ماشى
-صلاح / ماشى لدارى …
وطلع من دار امه خش لداره وهوا مصدوم
الحكايه فيها حب..والحب نهايته الزواج
والزواج يعنى اطفال……وام
يفكر…لين راسه وجعه …وربط الاحداث ببعض …
كيف يسأل فيها على حوشهم وين وهيا ماتبيش اتقول
وكيف يسأل فيها على عمامها وخوالها وهيا ماتبيش اترد
اصطدم بالواقع…….
وعرف السبب ليش هيا تقوله لا تسالنى من انا
لكن قلبه سكناته خلااااص ….
معش فى مجال للتفكير…..وكونها عاشت فى دار الايتام فهدا مش عيب ….
حط راسه عالمخده وهوا مقتنع …..
واخر كلام قرره / انا نبيها ….ونبى نغير حياتى وندخلها فيها
جيهان ماتنفعنيش …انا نبى بنت رزينه وعاقله …
الزوجه ليها دور فى حياة الراجل … .
ولازم تكون هيا عمود البيت ولازم نقدر نعبى عليها
وخاصه انا معاى اطفال ….
جيهان مستحيل تتحملهم ..
وتلفت للجهه الثانيه / القصه مش قصه صغار ومراءة رزينه …انت بجد تحبها يا صلاح …
وحاس بيها انها تبادل فيا فى نفس المشاعر
وتلفت على ضهره / خلاص معناها زى ماهيا قبلاتك بكل ضروفك وبعائلتك ..انت المفروض تقبلها بكل ضروفها ..
ويخمم/ تى هيا حتى لما هربت من الدار جت عندنا وخدمت بشرف ….تاريته الدار فيها بنات ناس ومحترمات ومتربيات …بالرغم عندهم فرصه ايديرو اللى فى روسهم
لكن ياسبحان الباهى والعافن فى كل مكان …
يعنى باختصار البنت اللى تبى روحها رزينه وباهيه تقدر..حتى لو كانت البيئة مش ملائمه
ورقد وهوا مقرر انه يحبها ومستمر فى حبها حتى بعد اللى سمعه
__________________________
ثانى يوم الصبح
فطومه وغادة راكبين تاكسى
-فطومه / غير وين بنمشو توة بس ..
-غادة /اسكتى ..تبينى نسلمك للشرطه بيدى امالا
-فطومه / ماواجعنى شى الا محمود …قلبي بيتقطع رانى
-غادة/ الله غالب نصيبه يموت هكى
وصلو للعيادة …خلصو التاكسى ونزلو ….
فطومه قعدت برة فى الانتظار …وغادة خش لمكتب وليد
حكتله الحكايه كلها
-وليد/ لا حول ولا قوة الا بالله
-غادة/ الله غالب توة هدا اللى صار
-وليد / انتو من قاللكم انه توفى كيف تاكدتو
-غادة / وانا هدا علاش جيتك ..نبيك تمشى لشارعهم وتتاكدلنا ..وانا جبت معاى فطومه ..لو ماماتش انروحو للدار…ولو توفى نخاف عليها حد يتهمها لان بصماتها فى الشقه
-وليد : فى حد يعرف بعلاقتهم
-غادة / هلبا ..ومن ضمنهم صحابه …راهو علاقه سنين
-وليد / باهى راجونى هنايا شويا نمشى نسال ونشوف
-غادة/ باهى
وطلع وليد بسيارته مشى لجهه شارع محمود زى ماوصفتله غادة
لقى خيمه متع وفاة …سأل الشباب فى الشارع الخيمه فى خوش شكون
ردو عليه انها فى حوش عمى ابراهيم
المفارقه ان حتى بو محمود اسمه ابراهيم …
فتأكد ان محمود مات لان خيمه العزى فى حوش ابراهيم
ورجع للعيادة وخبر غادة وهيا خبرت فطومه
وماتمت يانارى اتمولج وتبكى …وغادة اتسكت فبها ماتبيش حد ايلاحظ
ركبهم وليد فى سيارته ورفعهم للاستراحه متعهم فى عين زارة …باعتبار ان فى حوشه معاه خالد …
وقعدو على هالحال ثلاثه ايام ….
غادة تركب مع وليد تمشى للصيدليه وفطومه تقعد فى الاستراحة وحالتها حال العدوين …
__________________________
ثالث يوم …
وصل عمك الصادق من بريطانيا ومعاه ولده الطاهر وغدير بنته
-غيداء/ رفعنى للصغار طول يا صلاح
صلاح كارهها مابيش حتى يتلفتلها
-الطاهر/ شن الموضوع الضرورى اللى تبينا فيه الحاجه يا صلاح
-صلاح / تو توصلو وتعرفو
ووصلو حوش الصادق لحوش الحاجه …
خش الصادق وسلم عليها …..
وغيداء سلمت ومشت طول لدار الصغار رفعتها صالحه
والحاجه تشبحلها باشمئزاز كارهتها حتى هيا
الطاهر مشى ورا اخته يبي ايشوف الصغار …
صلاح ماطابش على خاطره لحقه طول …
لقى غيداء حاضنه ولدها كركور
ورواسى واقفه والطاهر ايسلم عليها ويشبحلها باعجاب
-الطاهر?/ تشرفت بيك
-رواسى متحشمه ومواطيه راسها وتجبد فى ايدها: وانا اكثر
-صلاح / رواسى ??.. تنادى فيك امى
__________________________
تمت ……ويتبع
زعما غيداء شن بتطلب من رواسى الحلقه الجايه
نحبكم ❤