رواية لا تسألنى من انا

#لاتسألنى_من_انا

.
??بقلم زهور جمال الدين ??

.
?الحلقه الحاديه عشر ?

.
.

-الحاجه : نسأل فيك منين عرفتى

رواسى بدت تزرط حست ان الحاجه تكنطت.. ولو بتقوللها

نعرف بتمغصرها وبتقوللها وين شفتيها …

-رواسى : لا انا غير شبهت عليها

-الحاجه حست ان رواسى خافت : يابنيتى ماتخافيش
..خبرينى انتى شفتى بنيه رايحه تشبه لمنيرة

-رواسى : بصراحه ايه …بنيه زمان كانت تسكن جيرانا تشبهلها هلبا …

ووقفت : ومالاخير عندها صبع زايد زى صبع منيرة

-الحاجه بدت تنادى : يا صالحه ..تعالى يا صالحه.. رواسى طلعت تعرف اخت غيداء ..تعالى

-صفاء جت تجرى : قلتى غيداء …اللى نعرفوها احنا اسمها غادة …معناها بيكونو فالاكيد خوات

-جت صالحه : شن تقولى يا حاجه ..كأنى سمعت اسم غيداء

-رواسى : منو غيداء … منيرة عندها بنت غير جهان!!!!!!

-الحاجه: انا مانحكيش على بنت منيرة …انا نحكى على بنت اختها ..

____________________________________

صلاح ماشى فالطريق

قام التليفون ..وضرب رقم ..فتح المايك يشرين

-وليد : الو

-صلاح : اهلا يادكتور

-وليد : اهلين يا باش مهندس….شنو على موعدنا

-صلاح : شفت الموبايل كيف ايكمل فى نص الشغل

-وليد : اى والله ريحنى من هلبا مشاوير

-صلاح : عموما انا اعطينى ربع ساعه انكون عندك

-وليد : انا كيف درست قدام العيادة .. خلاص امالا انراجوك عالقهوة

-صلاح : معاك حد

-وليد :شخص عزيز عليا نبى نعرفك عليه ..وممكن يشتغل معانا

-صلاح : عموما انا اهو قريب نوصل وتو نفهم منك اكثر

_____________________________________

-الحاجه : انتو توة قلتو تعرفوها وتعرفو حتى اسمها ..خيرك

نكرتى يا رواسى شنو خايفه منى

-رواسى تفنص فى صفاء: لا والله ماخايفه منك ..لكن احنا

بالفعل مانعرفوهاش ..سكنو جنبنا فترة ورحلو منعرفوش حتى اراضيهم وين

-صالحه : وين سكنو ..انتو منين اصلا

-صفاء: غير لحظه بس ..منو غيداء وشن قصتها

-صالحه : غيداء اتكون ام الصغار سلسبيل وعبدالرحيم
ومنيرة اتكون خالتها اخت امها

-الحاجه : وهما كلهم فيهم الصبع الزايد وراثى من جدودهم ..منيرة فيها واختها نزيهة فيها وبنتها غيداء نفس الشى

-صفاء: على كلامكم غيداء كانت ماتنفعش ..كيف تزيدو تخالطو اختها …لااا وثانى تخطبى بنتها لولدك الثانى

-الحاجه : واحنا غيداء من عرفنا عليها ..ماهو منيرة ..ولدى سافر لبريطانيا وصت عليه منيرة اختها نزيهه ..

-صالحه : قعد عندهم فى البداية وتعرف على غيداء وتزوجها طول

-صفاء: بردو نفس السؤال ..مدامها سيبت ولدكم وهوا مريض وعطتكم الصغار كيف تخطبى بنت خالتها

-الحاجه : مانحسابش هدا كله بيصير ..عام اللى مرض ولدى كيف خاطبه جيهان فى هداكه الوقت ..مرض المرحوم وجبناه

هنايا ..وقعد خوه ايعانى فيه ..وتوفى وهدا كله منيرة واقفه معاى وقفه اوخيه

-صالحه : اى والله ..وانا نشهد ان منيرة مافيش منها اثنين فى الدنيا

-صفاء: تعاركت مع اختها على خاطرك قصدك

-صالحه : فرقت حالها اختها ..توفت من زمان ..قالو انحصرت على بنتها اللى انخطفت منها

-رواسى مصدومه : قصدكم غادة انخطفت

-الحاجه تلفتتلها : يابنيتى احكيلى وسرك فى بير ..مانقولش حتى سمعت الكلام منك

____________________________________

مختار مقعمز فى المكتب متاعه …ويتكلم فى التليفون

-مختار : اسمع اقسم برب العباد عندك يومين كان ماجيت بنمشى للحوش وبنخش ننشد عليها

-لامين: شن تخرف انت .. بتخش للراجل اتقوله ناديلى مرتك

معاد يسمع فى الصوت قوى من برة …جى يبي يشوف بوه مع من يتعارك …وقف يسمع

-مختار: البنت بنت اختى …بنخش نقوللها انا خالك

-لامين : ومن امأكدلك انها بنت اختك

-مختار: انقولك نجاة مقعمزة

-لامين : يا اخى يخلق من الشبه اربعين ..

-مختار : مش لهدرجه

-لامين : انا قلتلك سته ايام وانروح ..الله غالب هدا شغلى

-مختار وقف : هما يومين بالحساب ..وكانا ماجيتش انا

بنمشيلهم ….تى حتى شغلى وقفته معاهم ..كنت بنكسب من

وراه هاديكه الحسبه على خاطرك وانت لاهى فى مصلحتك

-لامين : ومن قالك وقف شغلك معاه

-مختار : يبي نشجرله الجردينه ..خفت نمشى نتلاقى معاها وما يحصلش طيب

-لامين : خلاص انا بعد غدوة بنروح ..عالاقل نقعد يومين ونروح

-مختار: متفاهمين ..وكان ماجيتش ماتلومش عليا

وانهى المكالمه …..

معاد بعد من فم الباب ..والف فكرة اتجى فى راسه …

ويخمم: زعما منهيا بنت اخته ….مفيش حد وقفنا خدمته الا

المهندس صلاح …..زعما يتكلم على صفاء …

وفرحان : حيه كانا تطلع صفاء بنت عمتى..انا لازم نمشيلها

وانخبرها ..لكن قبلها لازم نفهم الحاجه امها ولا مرت بوها

_____________________________________

وليد وخالد نزلو من السيارة وبيخشو العيادة

-وليد : نبى نعرفك على غادة اللى حكيتلك عليها

خالد وقف من الرهبه

-وليد : خيرك عمى خالد

-خالد : غادة هادى صاحبة راسى بنتى ماهو

-وليد: بالزبط هيا

-خالد : انت خبرتها ان بو رواسى ايدور فيها

-وليد : طبعا قلتلها من هاديكا الفترة لما تعرفت عليها .. وتوة نبى نعرفك عليها

-خالد : لا لا ياوليد ..منبيكش تقوللها انا بو رواسى

-وليد : وعلاش ماعندكش سبب ادرق عليها

-خالد : رهبة الموقف ..والله لحمى كشش مع بعضه…توة

عرفنى عليها عادى ..وبعد وقت كان تبى تقوللها قول

-وليد : باهى زى متحب ..مع ان غادة حبابه .. وحترتاح لاسلوبها

-خالد : معليش خلينى على راحتى

وخشو للممر متع الصيدليه …لقو غادة لامه شعرها فوق بتوكه ونازل على ضهرها .. ولابسه بالطو ابيض .. وتتكلم مع العاملات كيف ايستفو الدواء كويس

-وليد : السلام عليكم

-غادة عيونها ضحكو: وعليكم السلام يادكتور

-وليد : شنو انسجمتى فى الشغل وامورك تمام

-غادة مواطيه راسها ومبتسمه : ايه الحمد لله

-غمزلها وليد : تعالى

طلع وطلعت هيا وراه ..وقفو فى الممر

-وليد : خيرك متحشمه

-غادة : معاى العاملات ماقدرتش

-وليد : نموووت فى الخجلان

-غادة ضحكت بخجل: خلاص عااد احنا فى العيادة

-وليد : فطومه شن حالها توة قاعدة مريضه

-غادة : سلمه النشاد على صاحبتى ..الحمدلله اليوم احسن بهلبا

-وليد : بتشوف محمود اليوم

-غادة : ايه ماشيه بتشوفه .. ماشالله منتبه لكل كلمه نحكيلك فيها ??

-وليد : مدامك تحبيها زى وخيتك ..حتى انا بنعزها زى وخيتى ..وانا اللى بنزوجها لمحمود بيدى

-غادة: كل يوم نكتشف فيك ميزة جديدة ..نتاكد ان ربي يحبنى اللى طيحنى فيك

-وليد مسك يدها : انا اللى ربي يحبنى خلانى نتعرف عليك ..

جبدت غادة يدها خايفه حد ايشوفهم
عالى نبى نعرفك على شخص

-غادة لمت قصتها ورا ودنها : منهوا

-وليد : شيبانى كبير..مهندس زراعى صاحبى

-غادة : هوا شيبانى ..وصحاب انت وياه

-وليد : طبعا شيبانى ..امالا تبينى نعرفك على صحابى الشباب

غادة تضحك ..وصلو لخالد

-وليد : عمى خالد نعرفك على غادة خطيبتى …
وتلفتلها : غادة نعرفك على عمى خالد صديقر

خالد يانارى لفت بيه الدنيا …تخايل بنته طول

-خالد : اهلا بيك يابنتى تشرفنا

وتلفت لولد : تلقانى فى المكتب انا

ومشى خش للمكتب

-غادة : خيره

-وليد : قصته طويله نحكيهالك مرة ثانيه وخلاص

جت البنت متع الريسبشن : يادكتور فى شخص اسمه المهندس صلاح يستادن يبي ايخش لمكتبك

-وليد : طبعا خليه يتفضل

وتلفت لغادة بغيرة : لصيدليتك بسرعه هى

-غادة ضحكت : باهى فى امان الله

-وليد: فى امان الله

ومشت غادة خشت للصيدليه ..ومشى وليد لمكتبه ولحقه صلاح طول

___________________________________

-رواسى : والله هادى قصتنا كلها يا حاجه مادسينا كلمه

-صفاء: وانا عمامى وخوالى نعرفهم ونعرف لقبهم لكن ماحد جى سال عليا بكل

-الحاجه تبكى : يااااروووحى عليكم بنياتى تعالو لحضنى تعالو

ناضو الزوز وحدة قعمزت ايمينها ووحدة ايسارها عالصالون وحطو روسهم على صدرها وضمتهم ليها

-صالحه : ياودى خلاص ..بتخولنا نبكو توة

-الحاجه : وانتى يارواسى بوك وينه

-رواسى قامت راسها : منعرفش ..الاستاد عبدالحميد لما صغيرة ايقولى انه يقرا برة وتو بيروح

-الحاجه : فى حد يطلع يقرا برة ويخلى بنته فى دار الرعايه

-صالحة : انا نقوللكم مدامه غاب سنين اكيدة محبوس

“مدكاها صالحه ?..ريتى مايطلع منها ولا ?”

-الحاجه فنصت فيها : شنو الكلام اللى تقول فيه هدا ياصالحه

-رواسى : لا عادى انا مش زعلانه منها ..لانى حتى انا فكرت فى نفس الموضوع

-الحاجه : وغادة اللى شاكين فيها تكون بنت نزيهه احكولى عليها

-رواسى: عمرها ثلاثه وعشرين سنه

الحاجه تلفتت لصالحه : نفس عمر غدير

-صفاء: كيف اختها ونفس عمرها

-صالحه : لانهم تؤام

_______________________________________

صلاح خش للمكتب : السلام عليكم

وليد واقف مد يده سلم على صلاح : اهلا يا باش مهندس اتفضل

صلاح وخر كرسى وقعمز عليه

-وليد : انعرفك المهندس خالد

صلاح مد يده وسلم عليه : اتشرفنا

خالد مصافح صلاح بيده وماحولهاش ويشبحله ..حس بعاطفه تجاهه تقول قلبه حس بيه

صلاح يجبد فى يده بلطافه …انتبه خالد لنفسه

-وليد : المهندس صلاح مهندس انشاءات زى ماحكيتلك يا عمى خالد وبيديرلى خريطه الغرف الخلفيه للعيادة

وتلفت لصلاح : عمى خالد مهندس زراعى ..ونبيه بعد ماتكملو بنى ايشجرلى المكان كله

-صلاح تلفت لخالد : اهلا بيك يابش مهندس

-خالد بحنيه : قولى ياعمى

-صلاح : وليا الشرف ياعمى خالد

وقعدو ايهدرزو عالبنى والخريطه والتشجير

-خالد : نكدب عليك كانا نقولك انتكمهالك الجردينه متع العيادةكلها

-وليد : ليش بس

-خالد : انت عارف يا دكتور ان ليا فترة مازاولتش المهنه ..صعب عليا فى يوم وليله نستلم عيادة..نشرفلك عليها عادى لكن نصممها لا

-صلاح : انا عندى شركه اتشجر وادير فى جرادين ..تبع زرع يعنى لو تحبو تعاملو معاها

-وليد : شن اسمها الشركه

-صلاح : والله نسيتها ..لكن كرتهم عندة فى السيارة ..فكرنى تو نعطيهولك بعتالى

-وليد : تمام

-صلاح خدى فنجان القهوة فى يده وتلفت لخالد : لكن انت شن اللى منعك من مزاولةمهنتك لين نسيتها ياعمى خالد

-خالد : اييييه ..قصتى طويلة …خليها توة ..لكن اكيد حنحكيهالك فى يوم

صلاح قعد يشبحله ..حس انه وراه قصه كبيرة

__________________________________

فطومه هانم ماشيه لعمك محمود بيش يطمن عليها

فتحت باب الشقه وخشت …

جاها محمود يجرى يبي يحضنها وخايف من ردة فعلها

-محمود : هكى تشغلينى عليك حبيبتى

-فطومه : وراس حبيبي ماقدرت نطلع والله يعلم الله بحالى ايدى مانحسابها اللى ماتت

-محمود : انشالله فيا ولا فيك يا غاليه

-فطومه : بعيد السو عليك حبيبي

قعدو يهدرزو وينشدو عالحال والاحوال …ويحكيلها كيف

انشغل عليها وكيف ايراجى فى رسايلها اللى تبعتله فيهم مع غادة

-فطومه : اول مرة انخش الشقه بعد الضهر?

-محمود : وشن تسبلتى

-فطومه : قلتلهم عندى امتحان عملى وبالدور احتمال نتاخر

-محمود : ربي يحفظلى اللى تكدب على خاطرى ??

-فطومه : بيش تعرف بس قداش نجاهد على خاطرك

-محمود : نوضى انحطو الغدى

-فطومه : طيبت قصدك

-محمود يضحك : لااا محلانى وانا نطيب …شريت غدى جبته معاى

ناضو وحطو غداهم ….

-فطومه : لكن فاتو عليا ايام قريب متت من يدى

-محمود : ترا وريهالى الحبة

-فطومه : توة انت بتاكل ليش اندرهلك فى كبدك

-محمود : انتى ادرهيلى يا مهبولة ..غير وريلى ..

حولو من بحدا طاولة الاكل وقعمزو عالصالون

قامت كمها فوق ماباش يركب الدجاكه كمها ضيق

على نيتها حولت تجاكتها وتورى فيه فى ايدها كيف طالعتلها الحبة

هيا تورى فى الحبه وهوا يشبح لجسمها اول مرة يشبحه …

حط يده على مكان الحبه..وبدى يمس بالشوى بالشوى

ركب لليد فوق وحط يده على صدرها : محلاك

-فطومه حولتله يده بعصبيه : حول خيرك هبلت

حط يده عالوشاح وحولها انفتح شعرها

-فطومه : محمود خيرك هبلت

-محمود : انا راجلك با مهبولة ..حتى كان صار بيناتنا ماصار بناخدك

بعدت من الصالون هربت للممر : محمود ولى لعقلك ماتخسرنيش ..

هيا توخر وهوا ايقدم ..وعيونه على جسمها ..الولد خش فى عالم ثانى معش يدرى على روحه

هجم عليها حضنها …احكم مسك ايديه عليها …

ادف فيه : يا محمود حول …يا محمود راهو نعيط انلم عليك الناس

لما قالتله انلم عليك الناس قامها فى غمره ودخلها دار النوم كانت قريبه من الممر وسكر الباب بالمفتاح

حط يده على بطم سوريته يفتح فيه : بتعيطى بتلمى علينا الناس ..شنو هبلتى يا فطومه

فطومه واقفه جنب السرير من غادى عرفت انه اقوا منها ..ومش حتقدر تقاومه

-فطومه : تربح يا محمود ..تربح خلينى نطلع ..البنت كان ضاع منها شرفها معش تسوا شى

هوا مشى جيهتها نقزت هيا عالسرير هربت من الجهه الثانيه

-محمود : انا نحبك ومعش نقدر انقاومك ..

نقز عالسرير لحقها هربت منه لكن حصل عليها .. ورقدها تحته عالسرير…

وهيا تعيط وتبكى وتخبط فيه : يا محمود لااااا …لااااا

السرير جنبه سهارة قريبه منها …

تمد يدها تاخد هاديكه السهارة وتضربه بيها على راسه يغمى عليه

بعداته من فوقها ….

فتحت الدار بالمفتاح وطلعت ..لبست حجابها وخدت شنطتها وطلعت …وخلاته مغمى عليه

مش عارفه فى الطريق تمشى ولا تجرى ولا شن ادير مش حاسه بنفسها …

وصلت للدار….

خشت بسرعه وجهها مقلوب …لقت غادة كيف واصله ولابسه الملايه بتصلى العصر

خشت فطومه …قعمزت على سريرها وبدت تبكى بالقوة

جتها غادة تجرى حضنتها : خيرك يا فطومه ..خيرك

فطومه : قتلته…قتلته

-غادة ?: منهوا

-فطومه : محمود

___________________________________

تمت ….ويتبع

فى قصتنا محمود ولد كويس ويحب فطومه جديات ..لكن مشهدهم عبرة لكل بنيه تعطى الثقه لشاب وتمشى معاه لاماكن مستخطيه ..مهما تكون ثقتك فيه انشالله خاطبك ..ردى بالك منه ..راهو داخلهم غول اسمه الجنس..كانا ناض عليهم يبدا هوا المسيطر وهما العبيد تحته ..لايعرف هوا ظلمك ولا خانك ولا اى مسمى انتى تبى تقوليه المهم بياخد بياخد ..مايهماش العواقب لحظتها لانه مش هوا صاحب القرار..لا الغول اللى فى داخله هوا صاخب القرار لحظتها ..ولما يفوق ويندم بالطبيعى بيحط الحق عليك ..بيقولك وانتى شن مرفعك معاى
راهو مجتمعنا مجتمع ظالم …ولدلك سلم بنيتى ردى بالك من روحك وخليك ديما واعيه ..بنات الثانوى والجامعه بالدات

واسفه على تاخير الحلقه

نحبكم ❤