رواية قطة حطمة اسوارى

جميع الحقوق محفوظة للكاتبةشيماء نعمان

الحلقة الاولى والبدايه

ثار قديم
هنا عندما ندخل هذا البيت البسيط المكون من عدة طوابق هذا المنزل الذى يعد من المنازل القديمة نسيبا نجد بهذا البيت عائلة الحاج رشدى خليفة رجل بسيط يمتلك احد المحلات التى تبيع الاجهزة الكهربائية بالتقسيط لابناء الحى الذى يسكن فيه فهو رجل نستطيع ان نقول انه رجل ذو اخلاق عالية وربى ابناءه الثلاثة(عمرو)و(سلمى) و(ريم) على مكارم الاخلاق ووصل بهم الى اعلى الشهادات ف(عمرو) يكمل الدكتوراة فى المخ والاعصاب فى احدى الدول الاروبية اما (سلمى)فهى طبيبة بيطرية ولكنها لاتعمل حاليا وتساعد والدها فى امور المحل الصغير اما ريم الصغرى فى كلية التجارة الفرقة الثانية
اما الام (درية) فهى ام مثل امهاتنا السيدة الطيبة الحنونة واحيانا الصارمة فى الاوقات المناسبة
تفتح درية نوافذ المنزل معلنة بداية يوم جديد مختلف فى هذا البيت الذى لم يحدث به احداثا مختلفة من قبل تخرج اليها ريم مستيقظة مبكرا على غير عادتها ولكن لسبب معين
ريم:صباح الفل يا ست الكل
درية:صباح الخير يا ريم ايه اللى حصل صاحية بدرى يعنى
ريم:يعنى اصحى بدرى مش عاجب اصحى متاخر مش عاجب
درية:بطلى لماضة وادخلى فى المفيد خير
ريم:احم احم ماما حبيبتى مصروفى خلص
تشهق درية بصوت عالى:نعم يااختى لحقتى ايه ده لسه النهاردة 20 فى الشهر …….ثم انا المفروض اعمل ايه مفيش فلوس طبعا
ريم:يا ماما والله ما ينفع عايزة اجيب ملازم عشان الامتحانات قربت وعايزة اذاكر
درية:ريم اطلعى من دماغى مفيش ولا مليم طالع من مصروف البيت عندك ابوكى اطلبى منه انا مقدرش
قاطعهم هنا صوت سلمى وهى تخرج من غرفتها نستطيع ان نقول انها القطة فهى صاحبة العيون الفيروزى والشعر الاسود بلون الليل جعلها محط اعجاب كل من يراها مع انه لايوجد فى عائلتها احد بنفس مواصفاتها ولكنها تتخذ عند والدها مكانة مختلفة عن باقى اخواتها فهى الوحيدة التى تعمل معه وتساعده فى مجال عمله مما جعلها ذراعه الايمن فى كل شئ
سلمى:صباح الخير يا بشر مالكم على الصبح
درية:شوفى اختك اللى عايزة بحر فلوس عشان يكفى طلباتها
ريم:يا سلام يا ماما اومال لوكنت بطلب زى اصحابى واخرج واسافر كنتى عملتى ايه
درية:كنت قطمت رقبتك تخرجى وتسافرى فين يا ست ريم اتعدلى احسنلك
سلمى:سيبنا الموضوع الاساسى ودخلنا فى قطم الرقبة فى ايه
ريم:ابدا كل ده عشان بطلب فلوس عشان مصروفى خلص
سلمى:ومصروفك راح فين ده انتى نادر اوى لما بتروحى الكلية فلوسك راحت فين
درية:ما هو ده اللى انا بقوله من الصبح
ريم:يوووه انا اللى غلطانة انى اطلب حاجة منكم
تركتهم غاضبة وعادت لغرفتها فدخلت سلمى خلفها :مالك بقى فى ايه خلاص ياستى هديكى اللى انتى عاوزاه بس متقوليش لماما ماشى
ريم:لايا ستى مش عايزة حاجة كفاية اللى اخدته من ماما
ضحكت سلمى :ياستى معلش ماانتى عارفة ماشية بالورقة والقلم والمصروف لو قصر معاها بابا مش هيسكت……..ها محتاجة كام
ابتسمت ريم:200 جنيه بس يا سوسو
سلمى:نعممممممممم 200 جنيه ليه يا ريم
ريم:خلاص مش عايزة
سلمى:بت انتى انا مش بحب القمص خلاص هديكى وامرى لله
ريم:ربنا يخليكى ليا يا سوسو ياعسل
سلمى:اهو ده اللى باخده منك ……اقوم اغير هدومى عشان انزل المحل …الفلوس عندك فى الدرج خدى اللى انتى عاوزاه
خرجت سلمى من غرفتها وذهبت لتتوضا وتصلى صلاة الصبح ثم افطرت وارتدت ملابسها ونزلت الى والدها دخلت فوجدت مصطفى ذلك الفتى اليتيم الذى يعمل معهم منذ زمن طويل ويسكن فى غرفة عمرو بعدما سافر للخارج وهم يعتبرونه ابنهم الثانى فهو فتى صغير فى الصف السادس الابتدائى توفيت والدته وهو صغير وتركه والده شريدا بلا ماوى ولكن رشدى احضره الى منزله ليتربى وسط ابناؤه
سلمى:صباح الخير يا صاصا
مصطفى:صباح الخير ياابلة سلمى
سلمى:فين بابا
مصطفى:ده راح للتجار
سلمى:وانت قاعد هنا ليه فين المذاكرة مش كفاية انك اخدها منازل ……..عارف يا مصطفى لو مطلعتش الاول زى كل سنة هعمل فيك ايه هعلقك من رجليك فى الشارع ايه رايك
مصطفى:لا والله خلاص انا بذاكر كويس والله عشان اطلع الاول وادخل اعدادى
سلمى:طيب يلاادخل جوه ذاكر شوية ولوحد جه هبقى اندهلك يلا متتلكعش
انقضى وقت ليس بطويل وحضر رشدى الى المحل عابس الوجه ويبدوان الامور لم تجرى على ما يرام
سلمى:حمد لله على السلامة يابابا
رشدى:الله يسلمك يا حبيبتى
سلمى:كنت فين كل ده قلقتنى عليك
القى بجسده المنهك على اقرب كرسى له :كنت بلف على التجار بحاول اخليهم ياجلوا صرف الشيكات اللى عليا
سلمى:ها وعملت ايه
رشدى:والله يا بنتى مش عارف كل واحد فيهم بيتحجج بكام حجة لاالظروف ومش عارف ايه …….يلا ربنا المعين …ها عملتى ايه مع الناس بتاعت الاقساط
سلمى:كلمت ناس كتير وبعت مصطفى لناس تانية وكلهم بيقولوا اخر الشهر اما نشوف
رشدى:ربنا يفرجها من عنده ……..انا طالع استريح شوية خلصى انتى واطلعى عشان نتغدى
سلمى:حاضر يا بابا وراك على طول اهوو
ظلت سلمى تعمل فى دفاتر والدها عسى ان تجد شئ يساعدهم فى تخفيف الديون التى تراكمت فوق رشدى رن هاتفها فوجدت اسم صديقتها (دانية)
سمر:دودو ازيك فينك يا بنتى
دانية:فى الدنيا يااوختى انتى اللى فين بقالى اسبوع لاشفتك ولا سمعت حسك فينك يابنتى
سلمى:ابدا مشغولة والله فى المحل ماانتى عارفة
دانية:ربنا يكون فى عونك بس عايزنك الاسبوع ده ضرورى انتى عارفة الحلفة يوم الخميس الجاى
سلمى:هحاول يا دانية انتى عارفة ان بابا بقى رافض حكاية الفرقة دى
دانية:لالا معلش لحد الحفلة ماتخلص بس مين هيغنى ولا يدرب البنات
سلمى:ربنا يسهل اكلم معاه كده وربنا يهديه
صعدت سلمى الى منزلها وجدت درية تعد الغداء فذهبت لحجرة والدها وجدته ينظر امامه شاردا ولم يشعر بدخولها عليه اقتربت منه وجلست بجواره:بابا…..بابا
رشدى:هااا ايه يا سلمى فى ايه
سلمى:مالك فى ايه سرحان فى ايه
رشدى:فى الدنيا يا بنتى ………هاا كنتى عايزة ايه
سلمى:بصراحة يا بابا دانية كانت عايزانى عشان الحفلة بتاعت الفرقة يوم الخميس وكانت عايزانى يعنى اروح وكده
رشدى:يا سلمى مش قلنا نقفل على موضوع الفرقة ده وكفاية انى سايبك تلعبى اللعبة بتاعت الرجالة اللى بتلعبيها دى اسمها ايه
ضحكت سلمى :اسمها الشيش يا بابا
رشدى:ايوه هى دى
سلمى:بس حضرتك عارف انى بحب اغنى اوى وكمان البنات اللى بدربهم على الايروبكس محتاجينى
رشدى:سلمى :انتى ادرى مصلحتك مدام مفيش راجل بيشوفك وانتى بتتحركى
سلمى:لا طبعا يا بابا بنات وبس وفى اوضة ومقفلولة كمان
رشدى:خلاص يا ستى ويلا بقى انا جعت وامك عملة حلة محشى ايه تهبل
سلمى:بالراحة يا حاج القولون وانا عارفة درية بتزود الشطة والضغط مش ناقص
رشدى:انتى بتفرسينى صح …..يلا يا بت من هنا هاكل يعنى هاكل

فى مكان مختلف واناس مختلفون وتحديدا فى احد مصانع تصنيع اللحوم الكبرى والمعروفة
يجلس شاب فى اواخر العشرينات يتابع عمله باهتمام قاطعه صوت القادم
يامساء الخيرات يا هاشم باشا
هذا الشاب هو هاشم امجد الشرقاوى شاب طموح تخرج من كلية الزراعة اسوة بشقيقه ومثله الاعلى (جاسر ) شقيقه الاكبر والذى يدير مجموعة شركات الشرقاوى فى القاهرة نيابة عن عمه فاروق الشرقاوى فجاسر هو اكبر احفاد عائلة الشرقاوى وهو الرجل الذى يمكن الاعتماد عليه فى كل شئ لذا جعله عمه رئيس مجلس الادارة فى حال غيابه
رفع هاشم راسه ليرى القادم:يا مساء الانوار يا فريد باشا
فريد:انت بتعمل ايه كل ده لسه بتشتغل
هاشم:اعمل ايه اوامر عليا
فريد:اه طبعا رئيس العصابة
ضحك هاشم بشدة:كده هيسمعك
فريد:ايه ده هو انا بخاف ولا ايه ده انا راجل واعجبك اوى
فجاة احس بيد تمسك رقبته التف بحذر وجد خلفه (جاسر) رجل فى منتصف الثلاثينات طويل القامة وجسد رياضى ببشرة قمحية والشعر الاسود الذى يتخطى رقبته وعيون تشبه الصقر فى حدتها وقوتها مما جعله محط انظار الكثير من الفتيات وكل منهم تريده لها ولكنه دائما ما يرى انهم (بنات تافهة)
جاسر:هو مين رئيس العصابة ؟
فريد:مين رئيس العصابة معرفش ……..انت تعرف يا هاشم
ضحك هاشم:انت الادرى مش راجل ومش بتخاف
التف الى جاسر بخوف ثم ضحك وهو يربت على كتفه:ايه يا عم بهزر ايه يعنى
جاسر:اما انت مش اد كلامك بتقوله ليه
فريد:يعنى انا الحق عليا انى برفع من شانك اودام اخوك وفى المصنع
جاسر:وحد قالك انى محتاجك ترفع شانى اودام حد
فريد:اه طبعا احساسى وانا احساسى لايمكن يكدب ابدااااااااا ولا ايه يا هاشم
هاشم:انت هتقولى
رن هاتف جاسر فوجد حبيبته (جودى):ها يا حبيبتى ازيك
جودى:زعلانة منك موت كده مسمعش صوتك من امبارح
جاسر:غصب عنى ماانتى عارفة الشغل وانا مفيش حاجة تمنعنى عنك ابدا ياحبيبتى
جودى:طيب لازم تصلح غلطتك
ضحك جاسر بشدة:طيب ياستى انا مستعد اصلح غلطتى واتجوزك
جودى:بقى كده طب انا مخصماك
جاسر:لالا والله ما اقدر اطلبى الترضية اللى تحبيها
جودى:خلاص لو عايز تصالحنى تيجى حفلة فى النادى يوم الخميس
جاسر:يوووه يا جودى انتى عارفة انى محبش اروح حفلات ولا كلام من ده
جودى:عشان خاطرى يا حبيبى دول هيعجبوك اوى
تنهد بضيق :خلاص يا جودى اللى انتى عاوزاه ياحبيبتى
جودى:حبيبى بموت فيك اوعى تنسى يوم الخميس
جاسر:اوكيه تمام
انهى مكالمته ونظر الى فريد :كنا بنقول ايه؟
فريد:بقول ايه ما تاخدنى معاك الحفلة
جاسر:على اساس انك كريم ابن اختى ……اخدك معايا بمناسبة ايه انا رايح مع خطيبتى ايه دخلك انت بينا هتبقى عزول
فريد”ماشى ياعم الله يسهله وعقبالنا ياررررررب
جاسر:ما هو انا مش هخلص من قرك ده ……..هاشم يلا عشان نروح
فريد:طيب وانا
هاشم:انت خليك ارفع من شاننا فى المصنع ……..باااااى
ظل فريد يحدث نفسه:ارفع شانهم ……ده بيهزر……استنونى انا جاى معاكم
وصل جاسر الى منزله وجد والدته (بهيرة) وهى امراءة حنونة صبورة مع قدرمن الشدة التى استطاعت بها ان تمتلك زمام الامور فى بيتها بعد وفاة زوجها منذ اكثر من خمس سنوات
جاسر:السلام عليكم ورحمة الله وبركاته
بهيرة:وعليكم السلام يا حبيبى حمد لله على السلامة ………اومال فين هاشم
ضحك جاسر:بيكلم الموزة بتاعته
بهيرة:ايه يا بنى موزة وبتاع احنا فيا احنا فى سوق الخضار
ضحك جاسر بشدة:يا ست الكل دى بقى لغة العصر
بهيرة:عصر ايه ومغرب ايه الله يرحم ايام زمان
جاسر:قول للزمان ارجع يا زمان……اومال فين اخواتى الحلوين
بهيرة:حنين فى اوضتها والست سالى لسه مجتش من بره
جاسر:ايه مالها عاملة فيكى ايه بس
بهيرة:انا تعبت منها بجد ربنا يهديها يارب
جاسر:طيب انا هطلع اغير هدومى عشان انا ميت من الجوع
بهيرة:طيب يا حبيبى غير يكون اخواتك وصلوا نتغدى مع بعض كلنا
نعود الى سلمى فقد ذهبت الى اصدقاءها منذ الجامعة فى احد الاماكن الذين سيقيمون به حفلتهم لاول مرة فهم مجموعة من الشباب يتميزون بصوتهم الجميل وحركاتهم الاستعراضية يودوها سويا مع الغناء ويوم الخميس ستقام اول حفلة لهم فى احد النوادى وسلمى كانت تغنى معهم سابقا فى الجامعة ولكن والدها رفض بعد ذلك ولكن بعد الحاحها وافق ان تكون معهم فى بدايتهم حتى تتم حفلتهم بنجاح وخصوصا انها تدرب الفتيات فقط على الاستعراض بما انها لاعبة ايروبكس من الدرجة الاولى بجوار مهارتها فى رياضة الشيش التى تعتبر من الرياضة النادرة فى مصر ولكنها احبتها وعشقت لعبها
ذهبت بصحبة دانية الى مقر الفرقة ورحبوا بها كثيرا ما عدا خلود التى كانت تعتقد ان سلمى ستاخذ منها حبيبها (على )والتى تعتقد انه يحب سلمى رغم انها لا تهتم به الا من خلال الزمالة فقط
جمعت سلمى الفتيات فى غرفة مغلقة لتدريبهم على الاستعراض الذى سوف يقام غدا الخميس توقفت خلود فجاة
انا تعبت كده كفاية
سلمى:مش هينفع يا خلود ياريت نكمل مفيش وقت وانتى عارفة انا بكون هنا فى مواعيد معينة مش عايزة اضيع وقت
خلود:وانا مالى محدش قالك تعالى
دانية:ايه يا خلود فى ايه مالك ومالها
خلود:ايه ياست دانية هى عشان صحبتك بتدافعى عنها
سلمى:كلنا اصحاب يا خلود وانا مش عارفة انتى واخدة منى الموقف العدائى ده ليه
خلود:اشمعنى يعنى هيكون ليه لتكونى ضرتى ولا حاجة
دانية:لالا انتى زودتيها اوى
اشارت لها سلمى بالصمت:على فكرة يا خلود انا مش ضرتك ولا حاجة بالعكس عمرنا اصحاب واخوات من ايام الجامعة بس الظاهر انك نسيتى
اشارت للفتيات :يلا يا بنات نكمل واللى مش عاوز يكمل يقعد ساكت
…………………..
رن هاتف جاسر وهو يجلس فى مكتب والده يراجع بعض الاوراق فوجد رقم (هانى) ابن عمه حامد
جاسر:ازيك يا هانى اخبارك ايه
هانى:انا تمام انت اللى مش بتسال علينا ليه
جاسر:مشغول والله يا هانى ماانت عارف
هانى :الله يكون فى العون بس عندى ليك خبر بمليون جنيه
جاسر بلهفة:هااا عرفت طريقه
هانى :طبعا وعرفت كل حاجة عنه وعرفت ان عليه ديون هتدخله السجن
لمعت عينا جاسر:على ايدى ان شاء الله بقولك ايه تعالى نتكلم وتفهمنى كل حاجة بالراحة كده
………………..
بعد حوالى ساعة كان هانى موجود فى بيت عمه امجد لمقابلة جاسر استقبلته بهيرة بوجه مقتضب
هانى:ازيك ياطنط وحشانى والله
بهيرة:اهلا يا هانى ازيك وازى ماما وبابا
هانى :بيسلموا على حضرتك اومال فين جاسر
بهيرة:جوه فى اوضة المكتب ادخله
هانى:عن اذنك
فتح باب المكتب وجد جاسر يجلس على مكتبه :حبيبى ياابن عمى
ازال جاسر نظارته الطبيةمن فوق عينيه:تعالى يا هانى
هانى:ازيك يا جاسورة فينك ياراجل بقالك زمان مطنشنا يعنى ومش بتسال
جاسر:ماانت عارف الشغل والله واخد كل وقتى …..وحضرتك وسى حازم ضاربين الدنيا طناش
.المهم انت عامل ايه وازى عمى ومرات عمى
هانى:كلهم تمام وجاسمين بتسلم عليك
جاسر بعدم اهتمام:الله يسلمها ……قولى وصلت لايه
هانى:مستعجل اوى كده
جاسر:هانى ريحنى انا مش ناقص تعب اعصاب
هانى:شوف يا سيدى الباشا بعد ماابوك مات فتح محل ادوات كهربائية بالتقسيط فى الحتة اللى ساكن فيها بس ايه بقى محدش بيسدد وطبعا الديون اتراكمت عليه وهو عليه ديون لاصحاب المحلات بحوالى200,000جنيه ويا الدفع ياالحبس وبيلف على الناس عشان تصبر عليه كمان سنة
جاسر:وهو معاد صرف الشيكات امتى
هانى:شهر واحد والناس تطلب فلوسها بس ممكن يوافقوا ويستنوا عليه
جاسر:مش هيحصل
هانى:ناوى على ايه
التف بكرسيه امام صورة والده :ناوى اوديه فى ستين داهية واخليه يموت بحسرته زى ما قتل ابويا انا هخليه يتمنى الموت ولا يطولوش
جاسر:بقولك ايه عايزك توصل للتجار دول وتجبهم المصنع
هانى:ليه ……….ناوى على ايه فهمنى
جاسر:ولا حاجة بدل ما ديونه تكون ليهم هما تبقى ليا انا وساعتها اعرف الاعبه كويس واخليه يبوس ايدى قبل رجلى عشان ميدخلش السجن
هانى بخبث:معرفش انك داهية كده ياجاسر
جاسر:ولا داهية ولا حاجة ……..كفاية …..كفاية انى اشوف ابويا اودامى مقتول وسايح فى دمه واللى قتله عايش متهنى بالدنيا بس خلاص كلها شوية ويشوف العذاب على ايدى الوان
هانى :عندك حق انا لو مكانك عمرى مااسيبه وكفاية ان عمى الله يرحمه نطق اسمه قبل ما يموت يعنى هو بس نفسى اعرف طلع منها ازاى
جاسر:اثبت انه مكنش موجود وقتها فى المنصورة ساعة الحادثة
هانى:اه طبعا اشترى شهادات الناس بالفلوس عشان يشهدوا انه كان موجود هنا
جاسر:هو عمل اللى عمله وانا هعمل اللى جاى وبكره نشوف انا ولا انت يا رشدى خليفة

يتبع