أحببت عدوي
الحلــقة 2
درست دينا سيارتها ونزل رواد من التاكسي
كانت دينا متأنقه ولابسه بدلة تيور اخر موديل من ماركة مشهورررة
رواد كان متأنق لكن بسيط جدا بس شخصيته الحلوة والركازة غالبة علي لبسه
خش رواد قبل دينا لان دينا وهي واصلة من الباب نست الملف في السيارة فرجعت للسيارة واما رواد خش ووصل لمكتب الاستعلامات وسأل الموظفة
رواد/ السلام عليكم اني رواد عز العرب جاي متقدم للشغل رسلتكم علي الموقع والايميل وقلتوا لي نجي اليوم ونقدم السي فسي متاعي
الموظفة/ اها اي أستاذ رواد تفضل اجلس ارتاح شوي بس لان الاستاذ حسان عنده ميتينق (اجتماع)
رواد/ اوكي ماشي ومشي رواد وقعمز وطلعه فونه وفتح الفيس بوك وقعد يقلب في الاخبار
وصلت دينا طبعا بشوية عليها خايفة كعبهاوهي تتمشي شافت رواد وقالت في خاطرها
دينا / ياااي ياربي شن جابه هذا اف يا يلا ما علينا
وقفت وسألت الاستعلامات وقالولها الي قالولوه لرواد بزبط
مشيت دينا وقعمزت جنب رواد وهي رافعه خشمها عليه وهو يعجبني ولا كأنا في مخلوق جنبه مقعمز
فاتت حوالي ساعة وهما الزوز يستنوا في السيد حسان مش يدير معاهم مقابلة ويقدموا سيرتهم الذاتية وبعد انتظار طويل جت السكريتيرة الخاصة وقالت
أمل/ من فيكم رواد ؟
رواد/ اني رواد شن إن شاء الله خير
امل/ تفضل السيد حسان يبي يقابلك
رواد/ اوكي شكرا لحضرتك
هني دينا بلا إرادة تكلمت وقتلها
دينا/ العفو يا انسة واني شن ميبيش يقابلني
امل/والله منعرفش قالي يبي يقابل السيد رواد وانتي منعرفش
دينا/ اها به اوكي ايني وي شكرا
ناض رواد وفي خاطره يبي يضحك وينفلق بالضحك علي دينا
خش رواد وقابل الاستاذ حسان وحقيقة انبهر حسان بسيرة الذاتية لرواد وشخصيته وأسلوبه في الحديث وقاله
حسان/ الحق لينا أكثر من سنة وحني ندوروا في شخص يكون بمواصفاتك وخبرتك الحق مالقيتش
رواد/ شكرا هذا شرف ليا الحق يا سيد حسان اني الظروف الي جبرتني نقبل بوظيفة مدرس وانت شفت خبرتي وشهاداتي يعني شغل مدرس في مدرسة مش لايق بيا
السيد حسان/ صحيح عندك حق بس الظروف والعيشة الصعبة والالتزمات تجبر الشخص انه يشتغل اي شيء وينتظر الفرصة الكبيرة ويغتنمها
رواد/ كلامك صح واني هذا الي كنت نستني فيه الشغل ضمن مجموعة المتحدة القابضة شرف ليا وشرف كبير إن شاء الله لو صار نصيب وبديت نشتغل معاكم نكون عند حسن ظنكم
السيد حسان /أكيد معنديش شك وتقدر تقول لحد الآن انت المرشح الاول والوحيد للمنصب بس مزال منقدرش أنأكد لك
رواد/ علاش يا أستاذ تو من شوي حضرتك اشدت فيا وفي خبرتي
السيد حسان/ شوف يا رواد بطبعي منحبش نظلم الناس في بنت متقدمة معاك ولازم ندير معاها مقابلة مش نشوفها وانت تعرف اني صاحب شركة ونبي الشخص الي يكون قد مسؤلية وينفعني ويطور من شركتي
رواد /اها ان شاء الله الخير والخيرة فيما يختاره الله وتوا سمحني عطلتك وعطلت الانسة لي تنتظر فيك وأكيد اعصابها متنشنا
طلع رواد وهو يدعي انه يصير من اشغل لان حيغير من حياته 180 درجة
خشت دينا وكلها ثقة وتسحاب مصارش من رواد لان بينها وبين نفسها قالت لو قبلوه مفيش داعي يطلب مقابلتي لكن أكيد مقبلوشي
دينا / السلام عليكم
السيد حسان /وعليك السلام تفضلي
قعمزت دينا وبدت تحكي علي نفسها وخبرتها وخلاها حسان تحكي وبعد ربع ساعة قاللها
حسان/ انسة دينا تو أكيد انتي متأكدة اني ح نقبلك وانك اصبحتي عضوافي الشركة
دينا/ اي تقدر تقول عندي ثقة بنسبة 99% انك رح تقبلني
السيد حسان/ انسة دينا الثقة الزايدة تولي غرور صح ولا
دينا/ كل شخص متأكدة من قدراته يا سيد حسان واني خريجة اكسفورد والرابعة علي دفعتي يعني مش شي ساهل
السيد حسان/ صحيح لكن نحب نقولك انه الرد حيجيك بعد أسبوع لان السيد رواد الي كأن قبلك سيرته الذاتية وخبرته لا تقل اهمية عن حضرتك واني قتله اني كنت راح نقبله وانه المرشح الاول والوحيد لكن لاني منحبش نظلم اي حد محبيتش نعطيه قراري لين نقابل حضرتك
دينا / وبعد ماقبلتني شن هو قرار حضرتك
السيد حسان/ قراري حيجيك بعد أسبوع وبالكثير 10ايام الموضوع مش ساهل زي ما انتي تفكري الموضوع مهم وهلبا لاني نبيش نتسرع ونتخد قرار يكون مش في مصلحة شركتي
وتوا مقابلة انتهت وتقدري تتفضلي
دينا / اوكي شكرا لحضرتك وانك عطيتني من وقتك
طلعت دينا ونزلت في الاسنسير ولبست نظراتها وطلعت مفتاح سيارتها من الشنطة وفتحتها وركبت وكانت في داخلها بتموت شن بدير اتصلت برؤياء
طووووووووط طووط
دينا /الو رورو وينك يا عمري؟
رؤياء / هلا دندون شن صار اكيد قبلوك وتبي تعزميني؟
دينا/ لا مقبلونيش مزال الرد بعد اسبوع لكن اكيد ح ناخد الشغل بس قولي فاضية نبي نشوفك
رؤياء/ اي فاضية نص ساعة ونجيك وين نتلاقو؟
دينا /كازا بلانكا كوفي شوب
رؤياء/اوكي خلاص اسبقيني نص ساعة ونكون عندك
ومشت دينا ووصلت للكافي وبعد نص ساعة جت رؤياء سلموا ع بعض وهني دينا بدت تحكي لرؤياء شن صار
دينا/اخ تعرفي هذاك الولد الي في مول يومها
رؤياء/ من هو منعرفش فكريني
دينا/ خيرك متاع الكاميرا الي خداها مني
رؤياء/اه هداكا الجقل الشخصية اي خيره
دينا/ جقل وشخصية اسكتي تراه مشناه وقداش ماشايف روحه
رؤياء / الي موصلش في العنب قال قارص المهم خيره شن في
دينا/ عنب شنو وقارص شنو حسني من الفاظك حسستني مقعمزة مع نينا المهم شفته اليوم
رؤياء / وين ؟ حي وكيف
دينا/ في شركة طلع مقدم علي الشغل معاي
رؤياء /حي مش معقولة لالا به شن صار بينكم
دينا/ شي خش قبلي وقابل المدير وبعده خشيت اني في الاول نسحابه مقبلوشي بعدين المدير قالي لا الرد بعد اسبوع والحق كان بيقبل رواد بس ميحبش يظلم الناس وقال يشوفني قبل
رؤياء / اها رواد صاراسمه حلو
دينا/ وواه منك تو من كلامي كله مركزتيش الا في رواد واسمه المهم شن تشربي
رؤياء/ هوت شوكليت وانتي؟
دينا /ناخد زيك
قارسون بليس 2 هوت شوكليت
وشربوا البنات الهوت شوكليت وهدرزوا شويا وروحوا
بعد أسبوع الوضع عند رواد
الساعة 8 الصبح كان رواد راقد يرن فونه
من المتصل برواد وشن بقرر السيد حسان نعرفوا الحلقة 3