أحببت عدوي
الحلقة 13
وخشت دينا تبكي لحد مـا رن تلفونها في الأول تسحابه رواد مبتش تنوض وترد بس بعدين سمعت صوت رؤياء الي خلتلها رساله صوتيه وبمجرد ما سمعت صوت رؤياء وهي تقولها دودي شن جوك مع الحب ناضت تبكي ومشت طول وخدت فونها وردت علي رؤياء
دينا/ وهي تبكي يارؤياء اخ يا رؤياء طلع كذاب خاين غشاش وهمني
رؤياء/ دينا حبيبتي خيرك شن فيك ؟ قولي وبطلي بكي
دينا/ بنموت يارؤياء محرها صعبة صعبة يارؤياء
رؤياء/ شن في ؟اهدي واحكيلي
دينا/ رواد رواد
رؤياء/ خيره مريض ولا شن فيه؟
دينا/ إنشاء الله يموت هالخاين الغشاش
رؤياء/ دينا وحق ربي معاد عرفت نجمع اهدي وقوليلي شن في؟
دينا/به اليوم كان الجو كله حلو وحسيته احلي يوم في حياتي
رؤياء/ به وتوا خيرك؟
دينا/اسمعيني شن نقول ومتقصيش عليا
رؤياء/ حاضر به اهدي واحكي واحدة واحدة واكيد حنلقوا حل لمشكلة
دينا/ مافيش حل لكن حنحكيلك هذا زي ماقتلك الصبح نضت ومشيت للمؤتمر وكان جو حلو بعد مروحنا رواد قالي ارتاحي والعشية نطلعوا طبعا اني فرحت وصار الي خططنالها ارتحنا وفي العشية بدلت وجاني بعد مجهزت نفسي تخايلي لبستي معجباتاش وحمق وقالي غيري ها والا مافيش طلوع
رؤياء/تبصري بجديات وعلاش؟
دينا/ اصبري خل نكملك قالي منقدرش نخليك تنزلي وانتي لابسة هكي ويشوفوك الناس معاي شن بيقولوا اني مسؤل منك
رؤياء/ اها به كملي
دينا/ اي قالي انتي جايا معاي ومش عارف شنو وانتي فاتنة ومش لازم تلبسي هكي ودوة هيا اني في الاول حمقت وقتله انت مدخلكش فيا وفي لبسي حاولت نستفزه بالك لعلى وعسي يقولي اني نحبك لكن رده صدمني قالي / مستحيل تنزلي باللبس هو واني معاك ياهانم اني رجل #شرقي تعرفي شن معناها #شرقــي يعني بنت تكون زميلتي ولا صديقة ولا حتي عربية زي نخلي واحد أجنبي يقعد يشبحلها من فوق للواطى شن تحسابيني مش راجل
رؤياء/ حي عليا ووك مستفز صار علي خاطر رجولته به كملي
دينا/ اي لكن نعجبك اني شن قتله تسحابي سكتت لا قتله يعني علي خاطر غروروك ال#شرقي انت متبيش نطلع معاك واني لابسة هكي
رؤياء / به شن كان رده؟
دينا/ رد رد خلاني نزيد نحبه ونموت فيه وياريته غير صح كله كذب في كذب وقعدت تبكي بألم وحسرة
رؤياء/ خلاص حبيبتي امسحي دموعك
دينا/ تاعبة يا روري ياريتني جنبك ومرمية في حضنك تعرفي قرب مني ومسك يدي بقوة عصرها قريب كسرها لكن كانت علي قلبي زي العسل قالي منتخيلش اي حد يشوفك ويفكر فيك تفكير مش مزبوط منتحملش الدم يركب لرأسي حسسني انه حبيبي خطيبي زوجي خوي بوي خايف علي سمعتي وشرفي
رؤياء/ يااااي يا دودي والله يحبك به كملي
دينا/ معاش تقولي يحبك كان تعرفي الباقي خلي نكملك اسكتي المهم مشينا للجردينة وهدرزنا وشرالي ايس كريم وجو تمام مشت لتواليت جيت نلاقاه يكلم في حبيبته ويقولها استحشتك ونحبك ودوة هيا
رؤياء/ بالك اخته ولا امه؟
دينا/ ماهو مشكلة اني فكرت زيك بس سألته قالي يوسف صاحبي تعرفي دنيا صغرت بيا وكرهت نفسي كيف حبيته وصدقت انه يحبي ومهتم بيا وخايف خلاص معاش عرفت شن ندير قتله بنروح والي صار اول موصلت خشيت لدار وانتي اتصلتي مش قادرة حتي نسمع صوته توا علي ماقد اني نحبه علي قد مااني كارهاته
رؤياء/ دينا متفكريش ومتتصرفيش تصرف تندمي عليه حاول تفهمي الموضوع قبل
دينا/ لا منبيش الحمد لله ربي فضحه قبل مانزيد نحبه أكثر واكثر المهم فشيت قلبي وجت مكالمتك في الوقت الي اني محتاجاتك فيه
رؤياء/ اني ديما معاك يا عمري توا ارقدي ومتفكري في شي
دينا/حنحاول اني نرقد غدوة نتلاقوا تعالي خوديني من مطار توا نبعتلك تفاصيل وموعد طيارة في مسج
رؤياء/ اوكي متفكري في شي وارقدي
وسكرت دينا من رؤياء وحاولت ترقد بس كانت صورة رواد وصوته وكلمته نحبك للبنت الي اتصلت بيه في كل غمضة عين تجي علي بال دينا وبعد صراع مع عقلها وقلبها رقدت دينا
أما رواد كان يفكر فيها وخيرها تغيرت فجأة وشن السبب
تاني يوم ناض رواد ومشي لحجرة دينا طقطق الباب فتحتله
موظفة/ صباح الخير أستاذ اي خدمة؟
رواد/ النزيلة التي في الغرفة أين هي ؟
الموطف/ لا أعلم سيدي الغرفة فارغة والنزيلة خرجت منها ويمكنك الأستفسار عند الأستعلامات
رواد/ شكرا جزيلا لك
نزل رواد وهو حامق علي خايف علي مش عارف شن يدير ويفكر بينه وبين نفسه
يارب توا هذه مجنونه شن ندير معاها وين مشت كيف هكي بي عقلها ولا هبلت
رواد/ صباح الخير نزيلة في غرفة 540 اين هي؟
موظف/ اها الأنسة دينا
رواد/ اجل اين هي ؟
موظف/ اليوم قد سلمت المفتاح وطلبت سيارة اجرة ورحلت
رواد/ مااااذا رحلت ! الي اين ؟ الم تخبرك
موظف/ لا يا سيدي لم تخبرنا
روا/ حسنا اتصل بي مكتب السيارات واسألهم الي اين اخدها السائق
موظف/ حاضر سيدي ارتح قليلا وبعد 10 دقايق سأخبرك
رواد/ عشرة ماذا الان اتصل بيهم
موظف/ قام سماعة التليفون واتصل بيهم وقالوله/ سيدي ذهبت الي المطار
رواد/ الحمد لله مطلعتش مهبولة حسنا أريد أن أنهي الإجراءت وأغلق حسابي الان
وتم رواد الإجراءت وخدي تاكسي ومشي للمطار وطول طريق يفكر في هالمجنونة والعملة الي دارتها
ووصل رواد للمطار وقعد يدور فيها ياكبدي مطار مش حاجة صغيرة مش يلقاها وبعد تدوير وتعب لقاها
رواد/ حامق انتي شن غبية ولا عبيطة ولا متفكرش كيف ؟اتمي اجراءت وتمشي للمطار بروحك ردددددددددددي عليـــــــــا
دينا/ هي انت هي في من تحساب روحك تكلم احترم نفسك
رواد/ دينا اعرفي شن تقولي قبل
دينا/ اني نعرف شن نقول شن قالولك عليا بيبي ولا بالك صدقت انك حبيبي وقالتها الكلمة وكانها سكين في قلبها ولا تسحاب روحك وصي عليا لا يا باشا اصحى علي روحك انت مديري وبس
شكرناك علي موقفك البطولي قدام سومر لكن متعيشش الدور وتسوء فيها
رواد/ دينا اسكتي خير انتي عارفة شن تقولي ؟
دينا/ استغفر الله قاعد يسأل فيا شن قالولك مهبولة ولا فاقدة الوعي اي عارفة شن نقول انت مديري وبس وأكثر من هكي لا حتي صديق انت مش صديق والي يرحم والديك فكني منك وخلي هالسفرة تفوت علي خير
رواد/ ماشي يادينا زي ماتبي اني مديرك وبس واسف لو تخطيت حدودي وحاولت نكون صديق أو ولا نقولك خليني ساكت
ومشي رواد ودينا انهارت بالبكي وطاحت علي الكرسي وقعدت تبكي الكلام الي قالته من برة قلبها وكانت تحاول انها تجرح بيه نفسها اكثر من رواد اي نفسها لإنها حبت شخص في نظرها يخون في البنت الي تحبه الي سمعاته يكلم فيها وهي ميحبهاش وكذب عليها وحسسها بشي كذب
اما رواد فكان مصدوم ومش مستوعب ان دينا الي حبها تقوله هكي وهو المسكين الي كان مقرر بس يرجعوا حيمشي ويخطبها لانه تأكد من ان دينا تحبه لكن بعد الي قالته حس روحه انه كان عايش في وهم والأحرف من هكي حس بانها خدعاته مش تسافر وتستفيد من مؤتمر مع انه كان يقدر يقولها متسافرش بس هو فرح بهالسفرة الي جمعت بينهم
وبعد ساعات