رواية نصف البدر بقلم / د. إيلاف أحمد
بقلم / د. إيلاف أحمد
الفصـل التاسع والاخيييربدور فتحت عينها لقت نفسها مربطة في كرسي وخشمها مقفول بشريط لاصق وقاعدة في غرفة كلها مقصات وسكاكين ومشارط ، بقت تتأمل في الغرفة مخلوعة عيونها كبااار وقلبها عايز يقيف من الخوف ، جا داخل عليها بدر ومعاه الولدين الوجيهيين ، وبقى يعاين ليها من فوق لي تحت وإبتسامة خبيثة مرسومة على وشو …. بدوور حبيبتي صح النووم كان نفسي تقابلي أمي أسي لكن ما مشكلة حتقابليها عند ربنا ان شاء الله هههههه
أحمد بعد سمع خبر وفاة أمه ما صدق وقال للدكتور بهجمة ….لا إنت كذاب أمي ما ماتت و جرى على غرفتها شال الغطاء عن وشها وبقى يعاين ليها ويبكي …. أمي أصحي أنا أحمد ولدك حبيبك ، ولدك الكنتي بتتمني ترجعي تشوفيه واقف على رجلينه، ولدك العمرو ما برفض ليك طلب قومي وأنا بعمل ليك الإنتي عايزاه ، مسك يدها وبربت بيده التانية على خدها يحاول يصحيها بس من غير فايدة …. أمي أمي عليك الله قومي أمي قومي شوفيني في النهاية كورك بأعلى صوتو أمييييي وقعد في الواطة وبقى يبكي ودخل في حالة هستريا ،محمد وبراءة جروا عليه رفعوهو وبقو يواسوا ويصبروا فيه….الدوام لله وده حال الدنيا ،حضن محمد وقال ليه….. يحليل أمي يا محمد يا حليل أمي الما اتهنت بشوفتي، يحليل أمي الكنت مستني أتعالج عشان أفرحها وأقدر أحضنها، براءة واقفة متأثرة بالموقف ودموعها جارية… ربنا يرحمها ويغفر ليها ويصبركم يا أحمد
لمن وصل البيت لقى باب الشارع مفتوح استغرب شوية بس حزنه على أمو خلاه ما يفكر بالموضوع كتير، دخل شايل جثمان أمو على يده ودموعه جارية ما وقفت ، وفجأة اتذكر لمن حبس بدور في البيت وطلع، بقى ينادي يا بدوور يا بدوور ولف الغرف كلها مافي زول ، محمد بقى ينادي ويفتش معاه….. يا أحمد انت متأكد إنها كانت في البيت…. بقول ليك أنا بنفسي قفلت عليها الباب بالمفتاح وطلعت (اتذكر فجأة إنه الباب كان فاتح لمن رجع)…..في شنو مالك بتعاين للباب كدة…. شكلها البت دي هربت…. معقولة تكون هربت؟ كدي جرب اتصل عليها
بدور بهناك يادابها عرفت حقيقة بدر ونيته الشريرة وحست نفسها واقعة في ورطة كبيرة صعب إنها تتخلص منها ومافي زول ينقذها…. بدر: كنتي متخيلة إني حبيتك وعايز أتزوجك هههههه يا مسكينة أنا مستحيل أرضى وحدة زيك تكون أم أولادي خفيفة ومغرورة ومتعجرفة ولبسها كاسي عاري بايعة لحمها للماشي والجاي يتفرج عليها، إنت الزيك لعبة يلعبوا بيها ويرموها لكن مستحيل واحد يعاين ليك كزوجة وأم لأولاده، كلمات بدر وقعت زي السكين على بدور وحست إنه ربنا بنتقم منها بعد العملتو في صحبتها و ندمت شديد على الكانت بتعملو بس بعد فوات الأوان وما قادرة ترد عليه بسبب اللصاق القافل خشمها بقت تحاول تصرخ أمممم أمممم،….بدر: عايزة تقولي شنو حبيبتي وشال اللصاق عنها…. إنت زاتك طلعت واحد حقير وتافه وأنا غلطانة إني جريت وراك من الأول أنا ما قادرة أصدق إني اتخدعت فيك و طلعت بالبشاعة دي، ياخي على الأقل احترم علامة الصلاة الفي جبهتك دي…..علامة صلاة؟ ههههههه يا بت دي ضربة من بت في وحدة من العمليات…. يا ريتني لو صدقت براءة لمن قالت لي أبعد عنك اااخ يا صحبتي يا ريتني لو مت قبل ما اعمل فيك كدة وبقت تبكي وتبكي…. عملتي شنو؟ بدور أنطقي عملتي شنو في براءة، ماسكها من كتافينها وبهزها وهي ساكتة وبتبكي….. بس ما تقولي الحصل كان من ألاعيبك بدور اتكلمي قولي انه براءة عملت كدة فعلا وانتي ما كذبتي علي؟ انتي عارفة إنتي عملتي شنو انتي دمرتي حياتي يا حقيرة وكف بأقوى ما عنده لمن خدها حمر….. الله ينتقم منك يا شيخة انتي انسانة قذرة وتستاهلي البحصل ليك ده وانا ما ح أرحمك الليلة ، في اللحظة دي تلفونها ضرب في جيبها، بدر بسرعة طلع التلفون عايز يقفل الخط بس بدور لزتو برجلها والتلفون وقع في الواطة والخط فتح، بقت تكورك ألحقوني أنا مخطووفة أنا مخطوفة يا أحمد، بدر قام سريع قفل الخط ورجع ليها اللصاق، أسكتي يا حيوانة اسكتي الليلة نهايتك حتكون على يدي
أحمد بعد سمع كلام بدور اترعب وبقى يقول ألو ألو بدور انت وين والخط قفل، محمد واقف جنبه….خير يا أحمد بدور مالها… بدور اتخطفت يا محمد أنا لازم ألحقها، عايز يمشي محمد ثبته… استنى انت ماشي وين انت عارف العنوان…. لا بس لازم أتصرف… أنا جايي معاك…. لا إنت خليك هنا الناس حتجي تعزي وأنا بجيب بدور و أجي…. طيب عندي ليك فكرة
أحمد سمع كلام محمد ومشى على أقرب مركز شرطة وبلغ عن حالة خطف بدور ، وبواسطة رقم تلفون بدور قدروا يعرفوا الموقع واتحركوا عليه
بدر والمعاه في اللحظة دي كانوا بحضروا في غرفة العمليات وبدور مرعوووبة وما قادرة تصرخ وحست إنها خلاص لحظات وحتغادر الدنيا ،فكوها من الكرسي ورفعوها في السرير ،وأثناء ما واحد من الشباب بيسحب السم من الفتيل بالحقنة عشان يقتلوها جا أحمد داخل ومعاه واحد من الضباط موجه المسدس عليهم ، واحد من الشباب جا من ورة أحمد والضابط ومن غير ما ينتبهوا ضرب الضابط في ظهرو والمسدس وقع ،طوالي بدر رفعو وضرب أحمد في كتفو اليمين ونط من الشباك الوراه ، أحمد والضابط بقوا يتقاتلوا مع الشابين وبدور بتبكي وتصررخ و هي بتشوف الضرب والدموم وصعبان عليها أخوها اللي إتأذى للمرة التانية بسببها
أحمد كورك ليها ….يا بدووور أجري أطلعي حتلقي الضباط واقفين برة كلميهم يقتحموا وكان بينزف كتيير من أثر الضربة، بدور طوالي جرت بس البيت كبير شديد وهي بتجري في الجنينة طالعة على الشارع بدر مسكها وهو بقول ليها انتي شيطانة انتي ما لازم تعيشي و انا ح أنتقم لي براءة، طعنها بالحقنة ووقعت في نفس اللحظة
بدور راقدة في الغرفة اللي جنب غرفة أحمد ويادوب بتحاول تفتح عيونها وبتهلوس أحمد لااااا أحمد أخوي خلوهو ، بقى يربت في خدها ويحاول يصحيها ….بدور بدور أصحي أحمد حيكون كويس إن شاء الله، فتحت عيونها تعاين في الغرفة ما مصدقة إنها لسة حية… محمد؟ أحمد أخوي وين أحمد حصل ليه شنو أنا لازم أشوف أخوي، عايزة تقوم من السرير هداها…. أهدي إنتي بس أحمد حيبقى كويس هو بس فاقد الوعي لكن حيتحسن إن شاء الله….لا أنا ما بقدر أقعد لازم أشوفه فكت الدريب من يدها ومشت عاينت ليه من ورة القزاز وهو بين الحياة والموت ودموعها بقت تجري…. يا حبيبي يا أخوي كل الحصل ليك ده كان بسببي أنا، أنا ظلمتك كتيير معاي انت ما تستاهل البحصل ليك ده يا ريتني لو كنت مكانك, محمد واقف جمبها ومتأثر…. ما تخافي يا بدور أحمد ما حيحصل ليه شي انت ادعي ليه بس…. ربنا يشفيك ويقومك لينا بالسلامه وفجأة اتذكرت أمها
أمي أمي يا محمد حصل ليها شنو وبقت كيف؟ …. محمد العبرة خنقتو ونزل راسو… أتكلم يا محمد قول أمي مالها… البركة فيكم يا بدور خالتو الله يرحمها، نططت عيونها مخلوعة أمي أنا ماتت لا إنت أكيد بتكذب قول إنك بتكذب وأمي ما ماتت يا محمد،
محمد ساكت منزل راسو ويقشقش دموعو…. عليك الله قول إنك بتكذب… بدور ما كدة أدعي ليها ده حال الدنيا…. أمي لاااا وجات واقعة
بدور فاقت وبقت تبكي وتبكي وتلطم في روحها وبتقول يحليلك يا أمي أنا السبب أنا السبب أنا السبب وااااي يا أمي السبتيني ومشيتي خليتيني لي منو ….. بدور ما تقولي كدة ده قضاء ربنا وبعدين عندي ليك خبر حلو أحمد طلعوهو من الإنعاش الدكاترة قالوا حالته استقرت وحيبقى كويس ان شاء الله، جرت دخلت عليه ومسكت يده وباستها…. يحليل أمي يا أحمد إنت البقيت لي من الدنيا دي الله يخليك لي يا أخوي أنا يادوب عرفت قيمتك، أحمد بقى يحاول يفتح في عيونه لقى بدور جنبه ماسكة يده….. ألف سلامة عليك حبيبي سامحني يا أحمد أنا غلطت في حقك كتيير أنا ما عايزة حاجة من الدنيا دي غير إنك تسامحني، أحمد طوالي قبل راسه على الحيطة من بدور
بدور اتأكدت إنه أحمد مستحيل يسامحها بعد العملته فيهو، قامت من جنبه وقالت لمحمد مادام اتطمنت على أحمد أنا عايزة أمشي البيت أكيد الناس بكونوا مستنيني عشان يعزوني.
وصلت البيت لقت براءة قاعدة من بين الحضور جرت عليها حضنتها وبتبكي… يحليل أمي يا براءة خلتني ومشت،
براءة كانت متأثرة بس زعلها من بدور خلاها ترد عليها ببرود وكظمت غضبها …. البركة فيكم يا بدور شدي حيلك ربنا يرحمها و يصبركم…. عليك الله سامحيني يا براءة أنا غلطت في حقك إنتي حذرتيني من الزول داك وندمت إني ما صدقتك….. ما مشكلة يا بدور ده ما وقتو اسي…. أنا ما بقى لي زول من الدنيا دي غيرك يا براءة عليك الله خليك معاي…. معليش يا بدور البيناتنا انتهى وربنا حيكون معاك، ومشت وخلت بدور غرقانة في دموعها وبتبكي مقهورة
بعد يومين أحمد بقى كويس وطلع من المستشفى ورفعوا الفراش، بدور قالت أحمد مستحيل يسامحني وأنا بقى ما لي مكان في البيت ولملمت هدومها وحاجاتها وهي طالعة قابلت أحمد واقف جمب الباب قصادها بعاين ليها،
بدور وهي بتبكي… سامحني يا أحمد أنا عارفة إنك ما طايق تشوف خلقتي ومعاك حق عشان كدة أنا ح أقعد في داخلية أشوف وشك بخير، عايزة تبوس يده سحبها وما رد عليها ولا بكلمة، بدور طلعت من البيت وهي مقهورة بتبكي ومشت قعدت في الداخليه وبقت وحيدة مافي زول سائل عنها لا أم لا أخ لا صحبة لا حبيب.
بعد مرور 5 ساعات
وصلت الجامعة مشت المكتبة لقت مخضرم قاعد يقرا كالعادة، قعدت في الكرسي القدامه هو أول ما شافها قام…. مخضرم استنى…. نعم خير…. لو سمحت عايزة اتكلم معاك… أعتقد إنه الكلام انتهى من زمان…. أنا عارفة إني غلطت في حقك كتير وبتمنى إنك تسامحني وتعفي لي صدقني أنا اتغيرت يا مخضرم وندمانة شديييد على العملتو فيك، وبقت تبكي وتبكي متأثرة، مخضرم قلبو حن وحس إنها بالجد اتغيرت من شكل لبسها واسلوبها…. طيب أهدي وأقعدي ارتاحي المسامح كريم وأنا سامحتك لله والرسول، بعد هدت شوية… طمني عليك انت اخبارك شنو…. أنا تمام الحمد لله خطوبتي كانت الاسبوع الفات….خطوبتك؟…. أيوة مالك مستغربة، بدور سرحت بعييد وعرفت إنه حلمها وأملها ضاع للمرة التانية….. سرحتي وين؟…. ها؟ لا ما سرحت مبروك وربنا يتم ليك على خير…. الله يبارك فيك يا بدور وعموما بقولها ليك للمرة الثانية لو احتجتي أي مساعدة أنا موجود وح أكون ليك زي أخوك واحد ….تسلم يا مخضرم ويا ريت تسلم على خالتو وتعتذر لي منها وأنا ح أتكلم معاها بنفسي مرة تانية ، مشت منه وهي زعلانة ومحطمة عشان فقدت الإنسان الكان بحبها و بقدرها وبعمل المستحيل عشان يرضيها.
أحمد كان مرة مرة بتصل لي براءة يتطمن عليها وشكلو كدة بدا يحبها ويحاول يتقرب منها،و في نفس الوقت العايز يتصل بمحمد عشان يتقابلوا ويصارحه بمشاعره ناحية براءة، محمد اتصل عليه…. كيفك يا أحمد أنا عايز أقابلك عايزك في موضوع مهم شديد….سبحان الله اسي كنت ح اتصل عليك انا كمان عايزك في موضوع مهم، بعد اتقابلوا…. محمد: اها احكي لي شنو الموضوع المهم، أحمد: لا إنت الضربت أول وحتحكي أول….طيب يا سيدي أنا قررت أخطب وعايزك تساعدني…. بالجد؟ ألف مبروك حبيبي دي منو المحظوظة دي…. متذكر صحبة بدور ديك القابلناها في المستشفى وحكيت لي عنها….براءة؟؟!!…..الله
أحمد كان لازم يسكت ويتنازل عن براءة لصحبه بعد كل العمله معاه، وهو قبل كدة قال ليه إنه مدين ليه بحياته، وبراءة كانت حياته الما اتهنى بيها بعد فقد الأمل في إنها تبقى من نصيبه
يلا بدور بعد انتهت محاضراتها طلعت لقت أحمد مستنيها جمب باب الجامعة فرحت شديييد…. أحمد؟، أحمد مبهور بعاين ليها من فوق لي تحت ما مصدق إنه المحجبة المحتشمة المحترمة دي بدور أخته …. إزيك يا بدور…. عايشة الحمد لله انت كيفك…. ما كويس محتاج ليك ومشتاق ليك شدييد صدقيني البيت ما ليه طعم من غيرك إنتي روح البيت يا بدور، بدور طبعا ما مصدقة عيونها واذانها فرحت شديييد وجرت حضنت أخوها….يا حبيبي ربنا يخليك لي يا أحمد وأوعدك إني ح أكون جنبك وما ح أخذلك فيني تاني وانتهت اللحظة بالمصالحة بين الأخوين ودموع الفرح
بعد مرور 6شهور…
مخضرم اتخرج واتزوج بت خالته الكان خاطبها
بدر والمعاه بعد المرمطة من نيابة لي نيابة ثبتت عليهم التهمة بتجارة الأعضاء البشرية وحكم عليهم بالسجن المؤبد مع الشغل والتنفيذ.
محمد وبراءة اتزوجوا وعاشوا أجمل أيام حياتهم
أحمد وبدور بقوا قريبين من بعض وسمنة على عسل،أحمد من دون الأيام الليلة رجع مبسوووط… يا بدوور يا بت….. نعم يا أحمد …. عندي ليك خبر حلوو…. خير؟خبر شنو ده…. جاكي عريس…..عريس؟ده منو….. واحد من معارفي كدة شافك وعجبتيه هو زول وجيه و مغترب ومرتاح…. قاطعتوا لالا أنا ما بهمني ده كلو أهم حاجة *أخلاقه* وبس….في دي ما تشيلي هم هو زول كويس شديد وأنا بعرفو وأزيدك عاجباني أخته كمان…..ههههه لو على كدة يبقى على بركة الله
أحمد وبدور اتزوجوا الاثنين في يوم واحد وكان يوم لا ينسى??
بعداك بدور جابت بت زي القمر بتشبها شدييد سمتها فاطمة على أمها وأحمد جابو ليه ولد سماه إبراهيم على اسم والده الله يرحمهم
وعاش الجميع بسعادة وهناء ??
انتهى….
نصف البدر رواية من نسج الخيال ومن وحي الواقع تحدثت عن الجوهر والمظاهر الخادعة والتي انتشرت بشكل كبير جدا في عصرنا الحاضر باسلوب قصصي بسيط وشيق حاولت أن اثبت من خلالها أن الجمال الحقيقي يكمن في الجوهر والأخلاق الحسنة وليس في الهيئة أو المظهر ، كثير منا قد يحكم على شخص معين فقط من خلال شكله الظاهري دون أن يلتفت إلى أصله و معدنه وللأسف كل من ركضوا وراء المظاهر كانت نهايتهم الندم والحسرة ، لا تغتروا كثيرا بالمظاهر فالكفن أبيض ومخيف والكعبة سوداء وجميلة وتذكروا مهما كان البدر جميل وأبيض ومبهر يظل جانب منه أسود وشديد الظلمة،
سؤال لكل واحد أو وحدة ممكن تفكروا ترتبطوا ببت أو ولد زي بدور أو بدر ؟ بجمالهم وجاذبيتهم وطبعا بأخلاقهم؟، أكيد الأغلبية العظمى حيقولوا لا ، ليه لأنه الجوهر والأخلاق الحسنة تظل أقوى وأجمل من أي جمال خارجي مزيف،والربع الباقي حيقولوا أيوة بحكم إني ح أحاول أغيره واصنع منو زول تاني والحنك ده ويا نجح زي ما براءة غيرت بدر يا فشل زي أخونا مخضرم
، أحيانا بكون الحب دوامة أو سحر بخلينا نتشد ونجري ورة الزول البنحبه من غير أي مقاومة زي كأنه غمامة سوداء بتعمي عيونا من إنه نعرف الشخص ده كويس ونفضل نجري وراء الأوهام وفي النهاية نصل لي سراب وتكون عاقبتها الندم والتحسر ،عشان كده يا أختي ويا أخوي قبل ما تحكم على أي زول حاول إنك تعرفو كويس وتعرف جوهرو قبل ما الفاس تقع في الراس وتكون العواقب وخيمة، وانت ياخوي اتقي الله في بنات الناس وما تنسى إنه البت البتلعب بيها دي، هي عندها أخ وأب وقريبا زوج وما تنسى انك اخ وحتكون في يوم من الأيام زوج وأب وكما تدين تدان وربنا ما بيظلم زول ،صاحب أختك وحاول قرب منها هي محتاجة ليك خليك جنبها قبل ما تحتاج لزول تاني وتندم بعدين، وانتي يا اختي أوعك تضايقي من تصرفات وأوامر أخوك عليك هو في النهاية بحبك وخايف عليك وعايز مصلحتك وصدقيني مافي زول أحن عليك من أخوك ولو ما عرفتي قيمته أسي أكيد حيجي يوم وتندمي لأنه مافي زول ممكن يعوضك عن حنان أخوك ، وقبل ما ترفضي العريس الجاك لمجرد إنو شين يا ريت تعرفي أصله ومعدنه وأخلاقه أول مش يمكن يطلع أحسن بمية مرة من الوجيه المستنياه؟، وما تفتكري إنه بلبسك الضيق الشاذ وشعرك الظاهر وخفتك إنه العرسان حيجروا وراك بالعكس إنتي كدة بتبيعي نفسك لليسوى واللي ما يسوى يتفرج عليك وتكوني فريسة ساهلة للذئاب البشرية ينهشوا فيها والبقرب منك بيكون عايز يلعب بيك ويرميك ما أكتر لأنه أكيد مافي ولد حيرضى إنه أم أولاده تكون بالهيئة دي وإلا يكون عايز يخرب بيته وحياته ، خليك تقيلة ورزينة ومحتشمة وراقية في تعاملك وشوفي الفرق في احترامك لنفسك قبل احترام الناس ليك،
احسنوا دائما اختيار اصدقاءكم لأن المرء يقاس بمن يصاحب وصاحبك يا بقى ليك ظهر وسند ويا بقى ليك خيبة ومصيبة وقعت نفسك فيها وحيطة مايلة بتتكي عليها ، ختوا كلامي ده حلقة في اذانكم وخليكم دايما متذكرين قول علي رضي الله عنه
?ليس الجمال بأثواب تزيننا ….. إنما الجمال جمال العلم والأدب?
ربنا يوفقنا جميعا لما يحبه ويرضاه وأسأل الله العظيم أن تكون عظة وعبرة ونصيحة لكل من يحتاجها، كانت تلك أولى محاولاتي في كتابة الرواية أتمنى من قلبي أن تكون نالت إعجابكم وحازت على رضاكم وحققت منها الغاية المرجوة.
أستودعكم بكل الحب ولا أقول وداعا ولكن إلى اللقاء في رواية أخرى ان شاء الله
والسلام عليكم ورحمة الله وبركاته
أختكم في الله :
إيلاف أحمد عبد الرحيم ?