رواية نصف البدر بقلم / د. إيلاف أحمد
بقلم / د. إيلاف أحمد
الفصــل السادسمحمد لمن جا داخل وشاف صحبه واقف على رجلينه، رمى الكيس من يده من غير ما يحس وجرى حضن صحبه زي الشافع الرايح من أمه ولقاها بعد سنين، حضنو ودموعو جارية مطر ما عايزة تقيف من الفرحة وبقول ليه أخيرا يا أحمد أخيرا يا أخوي قدرت أحضنك أنا ما مصدق حاسي نفسي بحلم ،أنا كان عندي يقين إنه رب العالمين ما حيخذلنا وكنت متأكد إنه اليوم ده حيجي، أحمد قدر يتحرك ويقيف بس لسة ما بقدر يتكلم كويس فكاه من حضنو عاين في عيون محمد وعيونو مليانة دموع وقال ليه بحروف متقطعة ش ك را
محمد حضنو تاني وقال ليه ما تشكرني يا أخوي أنا كنت مستني اليوم ده بفارغ الصبر والحمد لله رب العالمين استجاب لدعواتنا وبقيت كويس وإن شاء الله شوية شوية حتقدر تتكلم كمان وترجع أحسن من الأول
بدور دخلت البيت لقت مخضرم قاعد مستنيها…. مخضرم؟ إنت بتعمل شنو هنا….. أمها ردت عليها، مخضرم جايي يطلب يدك يا بدور…. أنا مش أديتك ردي امبارح جايي تاني مالك…. أنا جيت عشان أثبت ليك إني بالجد عايزك وما بقدر استغنى عنك…. بس أنا قلت ليك ما عايزاك وما عندي ليك شي البجيبك تاني شنو، وطوالي دخلت على غرفتها وقفلت الباب…. والله أنا بعتذر ليك بالنيابة عنها يا ولدي بدور اصلا طبعها كدة ما بتحب زول يجبرها على حاجة….. انا ما جابرها يا خالة وح اديها وقتها تفكر ومستعد أستناها العمر كلو بس هي تديني اشارة…. والله يا ولدي ما عارفة أقول ليك شنو بس أنا ح أتكلم معاها وان شاء الله اقدر اقنعها…. تسلمي يا خالة
مخضرم طلع وفاطمة دخلت تتكلم مع بدور….. اسي في داعي تحرجيني كدة قدام الولد وتمشي…. والله يا أمي هو الأحرج نفسه لمن جا بيتنا امبارح فتح معاي الموضوع ده وقلت ليه ما عندي ليك شي البجيبو تاني شنو….. والله شكلو الولد بالجد عايزك وشاريكي اديه فرصة كدي وادرسيه كويس…. أدرس شنو يا أمي إنت ترضي لي بتك واحد زي ده أخدر وقصير ومدردم وعلي العليه اسمو مخضرم ههههه بالغتي معاي غايتو…. على كيفك يا بتي وهو اداك وقت عشان تفكري وقال حيستناك بس لازم تختي في بالك إنه الشكل والاسم ابدا ما مهمين واهم حاجة الأخلاق….خلي يستنى لمن يموت أنا ما ح أعرس غير زول واحد بس …. اقعدي استني لي في سي بدر بتاعك ده لمن تبوري أحسن ليك ده زول مضمون ودق بابك بدل تجري ورة سراب…. ما ح أبور يا أمي وحتشوفي
يلا براءةأول ما وصلت الداخلية لقت بدر واقف مستنيها…. إنت تاني؟ أنا قلت ليك شنو امبارح….. ياخ انت مالك شديدة كدة انتي امبارح نسيتي تلفونك في الطربيزة وانا جيت أرجعو ليك، لمن شافت تلفونها فرحت شديييد قربت تزغرد بس مسكت نفسها قدام بدر…. شكرا ليك ما بتقصر بس أنا لسة عند كلمتي لو سمحت أبعد مني أنا ما مستعدة أخسر صحبتي عشانك…. طيب على راحتك يا براءةوأوعدك ما ح أفتح معاك الموضوع ده تاني، وطوالي دور عربيتو ومشى
تاني يوم الصباح وزي كل يوم بدور وبراءةإتلاقوا في الموقف، بس بدور قاصدة المرة دي تطلع متأخرة عشان تحنك بدر يوصلها وأول ما وصلوا الموقف اتصلت عليه…. ألو كيفك بدر معليش لو قريب تجي توصلنا لو مافيها تعب ليك لأنه طلعنا متأخرين الليلة وما لاقين مواصلات، بدر غمضة عين ووصل لعندها وطبعا عشان براءةما عشانها، بدور قالت لبراءة…. شفتي كيف جاني طاير طيارة أظنو مشتاق يشوفني زي ما أنا مشتاقة ليه، براءةساكتة ما اتكلمت ولا ردت عليها، ركبوا ووصلهم لحدي باب الجامعة وقال ليهم بعد تطلعوا اتصلي علي عايزك في موضوع مهم و مشى.
بدور طوالي ختت في بالها إنه أخيرا حيصارحها بمشاعرو الليله وحيكلمها وبقت مستنية اليوم بتين ينتهي عشان تقابلو، يلا أول ما دخلوا الجامعة مشوا على استراحة البنات، براءةدخلت الحمام وبدور واقفة في المرايا تظبط بدرتها ومكياجها، بعد شوية سمعت بتين بتونسوا مع بعض…. مش الكامري السوداء دي هي نفسها الكانت واقفة قدام داخليتنا امبارح…. اي هي زاتها مستحيل اغلط فيها بالذات الولد القرض النزل منها واتكلم مع براءة…. يا بختها الشقية دي لمت فيه وين زي ده حتى شفتو مد ليها تلفون شكلو جايبو ليها هدية….. والليلة كمان جاييها لحدي الجامعة غايتو الله يدينا زول زي ده
بدور بعد سمعت كلام البتين ديل جا في راسها مية استفهام وبقت تسأل وتتساءل …. البخلي بدر يمشي لبراءةفي الداخلية شنو ؟ وقصة التلفون دي شنو ؟ معقولة يكون الراجل الرد علي ده بدر أنا أصلا قلت الصوت ده ما غريب علي؟ معقولة يكون بتقابلوا من وراي؟ أنا لازم أتأكد من الموضوع ده ،طلعت تلفونها واتصلت في رقم براءةسمعت تلفون براءةبيضرب في الشنطة ،فتحت الشنطة ولقتو تلفونها زاتو ما واحد جديد، طيب لييه كذبت علي وقالت تلفونها اتسرق؟ أكيد في حاجة غلط وأنا لازم أعرف الحاصل .
أول ما براءةطلعت من الحمام لقت بدور شايلة تلفونها وبتعاين للشاشة رافعة حاجبها زي المستغربة حست إنه بدور شاكة في الموضوع وارتبكت …. بدور؟ تلفوني ضرب ولا شنو …. بدور رفعت راسها وابتسمت زي الما حصل شي …. آي سمعتو بضرب في شنطتك طلعتو بس ما قلتي لي لميتي فيه وين مش قلتي اول امبارح اتسرق؟ …. براءةاتوترت من سؤال بدور واتذكرت لمن بدر رجعو ليها وبقت تتمتم ….ها؟ للللا أأأنا بس ششكلي ممما فتشت الشنطة كويس …. أيواا لا تمام يا زولة مبرووك …..الله يبارك فيك …. بس مادام كان في الشنطة ده منو الراجل الرد علي ، براءةنططت عيونها عرفت إنه ده بدر…. فففي وواحد رررد عععليك؟…. اي وطوالي قفل الخط في وشي…. براءةبلعت ريقها من الخوف…. يكككون ببس تتداخل ففي الششبكة ولا حاجة…..احتمال برضو
بدور عمرها ما شافت براءةمرتبكة و متوترة وبتتمتم بالطريقة دي وقالت في نفسها أكيد في حاجة ما طبيعية و ح أعرفها
بدور ماشة وبتفكر وتفكر و أول ما دخلوا القاعة صرخت اتفاجأت بحاجات بتقع فوق راسها وفي وشها واصوات الناس وهم بقولوا ليها سوبراااايز، فتحت عيونها القاعة كلها بقت تغني بصوت واحد هابي بيرث دي تو يوو سنة حلوة يا بدوور، بدور اتذكرت إنه الليلة عيد ميلادها فرحت شديييد وختت يدها في خشمها ما مصدقة، بعد شوية شافت مخضرم جايي عليها وشايل تورتة وورد أحمر ومعاها هدية خاتم وقال ليها كل سنة وانت طيبة يا أحلى بدور في الدنيا…. ابتسمت ابتسامة عريييضة كدة….. وانت طيب يا مخضرم انت العملت كل ده؟ ….. مخضرم كل ما يشوف ابتسامة بدور وغمازاتها يجن جنونو ويتشقلب كيانو شال نفس من جووة وختاو…. أيوة عملت كل ده عشان خاطر الابتسامة الحلوة دي…..بس من وين عرفت عيد ميلادي…..يا ستي من حسابك في الفيس تمام كدة……. بالجد يسلموو كتيير أنا ما عارفة اتشكرك كيف…. لو عايزة فعلا تشكريني خلينا نطلع الليلة بعد الجامعة نحتفل سوا….بدور اتذكرت انه بدر جاييها الليلة،معليش بس أنا الليلة عندي مشوار مهم ما بقدر خليها مرة تانية…. تمام على راحتك أهم حاجة إنك تكوني مبسوطة
بعد ما قطعوا التورتة واحتفلوا بدور طلعت مبسووطة ومعنوياتها مرتفعة وفرحتها ح تكتمل لمن تشوف بدر الليلة ويوصلها لحدي البيت، وفعلا أول ما انتهى اليوم اتصلت عليه وفورا جا عشان يوصلهم، بدور بقت تحكي لبدر كل الحصل معاها الليلة عشان يعرف إنه الليلة عيد ميلادها ويجيب ليها هدية بس لاحظت إنها هي بس البتتكلم وتتكلم وهو ساكت ما متفاعل معاها وطول الوقت كان بعاين لبراءةبمراية العربية القدام، قدر ما حاولت تطنش وتتجاهل بس نظراته الدائمة خلتها تشك بالجد في الموضوع وإنه في حاجة بيناتهم…. أها ما قلت لي شنو الموضوع المهم العايزني فيه…… ما ينفع أسي بعدين ان شاء الله بتصل عليك أكلمك بيه، كالعاده وصلوا براءةلداخليتها أول وبرضو بدور لاحظت إنه بدر سرح فيها و تابعها لمن دخلت، لكزته في كتفو نط والتفت عليها…. سرحت وين؟ ….. لا ولا شي…. إنت في حاجة بينك وبين براءة …. ايواا ده الموضوع الكنت عايزك فيه…. موضوع شنو؟ ….. انا بصراحة عجبتني براءةشديد وعايز اتقدم ليها وعايزك تمهدي لي الموضوع، بدور انصدمت ونططت عيونها…. قلت شنو؟…. زي ما سمعتي…. طيب كيف ووين وبتين….. وحكى ليها الحصل كلووو،أها حتساعديني ولا لا؟… أكيد ح أساعدك بس أديني فرصة أفكر في طريقة أقنعها…. تمام طيب تسلمي
دخلت البيت زعلانة ومكشرة ومتضايقة بعد ما كانت مبسوطة بعيد ميلادها، قفلت باب غرفتها عليها وبقت تتكلم مع نفسها بعد عرفت كل الأجوبة على أسألتها…. ما أنا يا براءةتستغفليني وتستغلي طلعتي مع مخضرم عشان تقابلي بدر من وراي….ما أنا البتطعنيني في ظهري وتشلبي حبيبي مني….. ما أنا الممكن أصدق إنه هو الجاري وراك وإنت الرافضاه … عشان كدة أتاريكي بتقولي لي ما ارتحت ليه وأبعدي منه عشان عايزة تخطفيه ليك متخيلاني هبلة وعويرة وحلات تلفوني اتسرق وتداخل في الشبكة كمان هههههه، كنت متخيلاك مسكينة وبريئة لكن طلعتي خبيثة وشيطانة ووسخة… بس أنا بعرف أتعامل مع الزيك كيف أصبري وحتشووفي
أحمد يوم بعد يوم كان بتحسن أكتر من اللي قبله ويحاول يتكلم شوية شوية لحدي ما شفي تماما ولسانه انطلق ورجع أحسن من الأول، محمد الفرحة ما سايعاه واليوم كلو صباح ومساء بتونس مع صحبه من غير ما يزهج أو يمل …. ياخي اشتقت لي صوتك ولي ونستك شدييييد…..تصدق أنا زاتي اشتقت لي صوتي حاسي نفسي عايز أتكلم وأتكلم من غير ما أقيف …… هههههه أتكلم يا أخوي وأنا مستعد أسمعك للصباح ….. عايز أقول ليك كلمة حق يا محمد بالجد أنا ما عارف أشكرك كيف أنا مدين ليك بحياتي لأنه الزمن ده مافي زول بيعمل العملتو معاي ده ….. يا ود يا أهبل في زول بشكر أخوهو بعدين أنا اصلا ما عملت كدة عشانك ….عشان منو طيب؟ …..عشاني أنا يا سيدي لأنه صوتك الشين ده وونستك وحشوني شديد وحسيت نفسي ما قادر أصبر أكتر من كدة …… هههههه الله يخليك لي وما يحرمني منك يا رب ….. ولا منك حبيبي يلا من بكرة عايزين نطلع نتفسح نشوف البلد دي …لا يا محمد نجي مرة تانية نتفسح أنا لازم أرجع السودان سريع أشوف الحاصل مع بدور أختي شنو تصرفاتها في الفترة الأخيرة ما كانت عاجباني ولازم ألحقها قبل ما تضيع …..خلاص اللي تشوفو أنا ح أحجز على أقرب طيارة للرجعة.
يلا بدور قررت تسكت وما تجيب سيرة لي براءةنهائي وفي نفس الوقت تصبر بدر بكلمتين لحدي ما تنفذ خطتها اتقابلوا في الموقف عادي زي كل يوم ومشوا الجامعة سوا وبدور اخر ونسة وظرافة زي كأنوا ما حاصل شي، بس في نص المحاضرة كدة استأذنت وطلعت على غير عادتها
اتصلت بواحد وجا قابلها، راجل شكلو مخيف ومريب كدة، طويل وعريض ومعضل عنده اثار جرحة معلمة في وشو ولابس نظارة شمسية غايتو يشبه البودي قارد البجيبوهم في التلفزيون، بدور وقفت اتكلمت معاه مسااافة كدة…. خلاص اتفقنا؟….حااضر اتفقنا انت تامري أمر يا ست البنات، طلعت من مطبقتها قروش أدتها ليه وقالت ليه الباقي بعد ما العملية تتم، ورجعت محاضرتها.
المحاضرة انتهت وطلعوا الاثنين سوا، بدور قالت لبراءة…. معليش حبيبة أنا الليلة ماشة لعمتو ضروري لأنها عملت عملية وما ح أقدر أمشي معاك…. حمد لله على سلامتها ما مشكلة يا بدور أنا بقيت أعرف الطريق كويس…. الله يسلمك طمنيني عليك لمن تصلي…. حاضر
أول ما مشت منها اتصلت على الزول الغريب داك…. الفريسة في الطريق نفذ، وقفلت الخط…. أنا ح أوريك يا براءة عشان تاني تعرفي تلعبي مع منو أنا لازم أديك درس عشان ما تغلطي معاي تاني، بدر حقي أنا بس وما حيكون لغيري.
براءةأول ما طلعت من باب الجامعة لقت شافع صغير بيبكي وشايل ورقة في يدو…. مالك بتبكي حبيبي…. أنا كنت لافي مع بابا في السوق وفجأة اتلفت ما لقيتو ما عارف مشى وين…. مسحت ليه دموعو…. طيب ما تبكي إنت ما حافظ رقم بابا كم….. ما حافظو لكن بيتنا في الحتة دي، ومد ليها الورقة…. طيب تمام الحتة دي قريبة من هنا وأنا بعرفها كويس أرح أنا ح أوديك، ساقتو من يدو ومشوا على العنوان الفي الورقة …. غايتو على حسب العنوان المكتوب هدا ليه البيت خلينا ندخل ونتأكد، أول ما لمست الجرس حق الباب اتكهربت ووقعت
في اللحظة دي أحمد ومحمد وصلوا السودان….. حمد لله على السلامة….. الله يسلمك أكيد حتمشي طوالي عشان تبشر خالتو صح…. لا أمي ح أمشي ليها بعدين أنا بتهمني بدور في اللحظة دي أكتر من أي زول انت ودي الشنط لي بيتك وانا ح الحقك بعدين، وطوالي ركب تاكسي على جامعة بدور.
لمن وصل الجامعة بقى يتلفت شاف بدور واقفة في حتة مضارية ورة الشجر كدة، بتتكلم مع زول غريب ، هو نفسو الزول المعضل داك وبعد شوية طلعت مطبقتها ادتو باقي القروش في ظرف ، أحمد قال في نفسو يا ربي ده منو ومن بتين بدور بتعرف الأشكال دي والظرف ده فيه شنو، بعد شوية الراجل مشى وبدور مشت وراه بمسافة و طلعوا ركبوا تاكسي، أحمد طبعا متابعهم وأول ما ركبوا هو كمان ركب تاكسي ولحقهم
إلي اللقاء ..