رواية نصف البدر بقلم / د. إيلاف أحمد
بقلم / د. إيلاف أحمد
الفصـل الرابعوريني سريع بتعرف الزول ده من وين….. ما بوريك الا اقعد معاك وتسمعي كلامي العايز اقولو، بدور سكتت مسافة وقالت في نفسها شكلو ده الخيط الحيوصلني لبدر انا ما لازم اضيع الفرصة دي، تعاملها اتغير تماما مع مخضرم وردت بصوت واطي…. طيب معليش انا عندي محاضرة اسي بعد تنتهي قابلني في الكفتيريا عن اذنك، مخضرم اتبسط شديييد لانه خطته نجحت واخيرا حيقعد مع بدور ويتكلم معاها
محمد بعد صرخته ديك طوالي نزل من السرير وجري على العربية وعلى بيت أحمد، وصل سلم على خالة فاطمة ودخل على غرفة أحمد…. صباح الخير على الغالييين، أحمد فرح شديد لمن شاف محمد وابتسم، عندي ليك مفاجأة حلوة، مديري في الشغل اداني اجازة شهر وقلت بدل اقضيها هنا احسن اخدك ونسافر الاردن نغير جو وتكمل علاجك رايك شنو؟، أحمد رفع حاجبو مستغرب…..ههههه عارفك ح تسألني اشمعنا الاردن، انا اصلا كان نفسي نمشي مصر بس مصر الايامات دي كلها انقلابات ومشاكل وعندي صحبي اردني معاي في الشغل نصحني شديييد ببلده وقال حيوريني الفنادق والاماكن السياحية هناك ، أحمد ابتسم وهز راسو يعني موافق، بعد شوية اتذكر امو وعاين ناحية الباب…ما تشيل هم انا ح اقنع امك عندي فكرة حلوة وان شاء الله حتنجح.
نرجع لي مخضرم القاعد في الكفتيريا منتظر بدور وبفكر يقول ليها شنو لانه اصلا ما بعرف الزول ده واول مرة يشوفو ، كل العملو انه شاف بدور لمن نزلت من العربية بقى يتأمل في شكل العربية لقى شعار شركة زين عرف انه دي عربية الشغل والزول ده شغال في شركة اتصالات و اثناء ما بدور بتتكلم مع براءةلقط الاسم و الف اسم الابو براه، مخضرم لقى انه ده الحل الوحيد عشان يقدر يقنع بدور تقعد وتتكلم معاه بس المشكلة حيقول ليها شنو لمن تقابلو
محمد في اللحظة دي برضو كان بفكر يقول شنو لي ام أحمد عشان تقتنع يسوق أحمد معاه ويسافروا….. السلام عليكم خالة فاطمة انا عايز اتكلم معاك في موضوع…. خير يا محمد يا ولدي موضوع شنو…. مديري في الشغل اداني اجازة شهر وح اكون قاعد فاضي ما عندي شي عشان كده عايز اخد اذنك أحمد يقعد معاي الشهر ده يغير جو حبة ويونسني…. انا ما عندي مشكلة بس أحمد رأيه شنو… كلمت أحمد وفرح شديد بالفكرة دي…. انا ما ح اتطمن اخلي أحمد مع زول غير معاك خلي بالك منه… اتطمني يا خالة أحمد في عيوني الاثنين…. الله يطمن قلبك ويفتحها عليك يا رب… اميين، محمد فرح شدييد وطوالي جرى على صحبو يبشروا ويجهز معاه اغراض السفر
نمشي لبدور الخلصت محاضرتها ومشت لقت مخضرم مستنيها في الكافتيريا….هااي…. هلا ببدر البدور من قبيل مستنيك…. عاين انا تعبانة وعايزة ارجع البيت سريع، وريني بتعرف بدر من وين… سلامتك من التعب ومن كل شر اشربي حاجة بالاول،…اسمعني انا ما جاية اتونس وريني بس اللماك ببدر شنو…. يا ستي بدر ده صاحب اخوي الكبير كان شغال معاه وطوالي بجينا في البيت…. ايوااا بس تمام معناها بتعرف مكان شغله, طلعت دفتر وقلم من شنطتها… يلا عايزاك تديني العنوان سرييع… وريني اول انتي عايزة منو شنو…. دي حاجة ما تخصك…. صدقيني المكان بعيد ما حتعرفي… انت مالك ومالي انا بصل بي طريقتي….مخضرم من غير ما يشعر قال ليها اقول ليك حاجة خلاص انا الح اوديك… خلاص اتفقنا بكرة نتقابل ونمشي ، شالت شنطتها ومشت من غير ما تسمع ولا كلمة زيادة، وصاحبنا قاعد في حتته مبهوت يلطم في نفسه ولسان حاله بقول ده شنو العملتو ده يا مخضرم اسي حتتصرف كيف مع الورطة الوقعت فيها نفسك دي
بدور وبراءةطلعوا من الجامعة ماشين على البيت، لمن وصلوا باب الجامعة لقوا نفس الكامري السوداء النزلتهم واقفة منتظراهم، بدور مخلوعة… بدر!!!
ازيك يا بدور….اهلا يا بدر بخيير الحمد لله… وانا راجع من الشغل قلت اغشاكم اوصلكم معاي بما انه طريقنا واحد…. تسلم كتيير ما بتقصر، براءةقالت.. طيب انا استأذن ماشة مشوار ، بدر طوالي نط وقال ليها لالا مشوار شنو تركبي معانا وانا ح اوديكم محل ما عايزين ، ركبوا معاه وبدور قلبها بنطط من الفرحة وبتقول في سرها الولد طلع مدشدش فيني زي ما أنا مدشدشة فيه وشكلو ببادلني نفس المشاعر، وصل براءةلحدي الداخلية وبدور لحدي بيتها ومع انها حنستو عشان يدخل البيت بس رفض واتعذر بشغله ووعدها يجي مرة تانية
محمد ساعد أحمد في ترتيب ملابسه واغراضه حقت السفر وبعد ما خلصوا سلموا على فاطمة وودعوها وطلعوا ، وهم عايزين يركبوا العربية لمحوا بدور نازلة من عربية بدر، أحمد لمن شافها عيونه حمرت ونفسه قام زي كأنوا كان سنة بيجري وعروق يده ظهرت من الغضب والزعل، محمد بقى يهدي فيه… اهدا يا أحمد انا ح اتكلم معاها، بدور نزلت من العربية شافت أحمد بعاين ليها ومحمد جايي عليها اتوترت وارتبكت… ازيك يا بدور… اهلا محمد ….ممكن اعرف ده منو النزلتي من عربيتو ده….معليش انت ما اخوي ودي حاجة ما تخصك….طيب انتي شايفة اخوك حالته كيف وانا هديتو وقلت ليه ح اتكلم معاها….. خلي يجي يتكلم معاي هو لييه يرسلك….. وريني يتكلم معاك كيف وانت عارفة حالتو….والله هو العملها في روحه مافي زول كان ضربو على يده عشان يسوق العربية بسرعة…. بدور ما تنسي انه الحصل ليه ده بسببك انت عشان عارضتيه وما سمعتي كلمته، بدور اتذكرت يوم الحادث لمن اصرت تمشي حفلة صحبتها ومع انه أحمد رفض لانه عارف البيت داك كلو اولاد وسكر وكلام فاضي بس برضو استغفلته وطلعت من وراه ولمن عرف ساق عربيته بأقصى سرعة عشان يرجعها وكان معصب وغضبان وحصل الحصل….. انا حرة ما عملت حاجة غلط وامي كانت عارفة بس هو زول احمق وعنيد…. بدور اخوك بعمل كدة عشان بخاف عليك وانت اخته الوحيدة وما ليكم غير بعض…. انا زولة كبيرة وواعية وما محتاجة زول يخاف علي… على راحتك طيب انا ح اخد اخوك عشان يقعد معاي شهر كامل ما عايزة تودعيه…بدور عاينت لأخوها من فوق لتحت، احسن زاتو ناخد راحتنا في البيت ده شوية وقبلت وشها ومشت….محمد صفق بيدينه الاثنين متحير في اسلوبها وقساوة قلبها وقال لا حول ولا قوة إلا بالله الله يهديك يا بدور،ومشى لي صحبه حاول يهديه بكلمتين ودور العربية ومشوا
بدور دخلت البيت باست امها في خدها اليمين والشمال…. يا أمي انا مبسووووطة…. ان شاء الله دايما يا بتي خير مالك مبسوطة…. ما حتصدقي الليلة منو الوداني الجامعة ورجعني…. اها قولي منوو….بدر يا أمي… بدر منو كمان يا بت… بدر الضربني بالعربية يا أمي… سجمي ده لميتي فيه وين كمان، وحكت ليها الحصل كلووو
أثناء ما بدور بتحكي لأمها تلفونها ضرب عاينت في الشاشة لقت (زولي❤)…. ههههه عملتيه طوالي زولك غايتو انتي، بدور خجلت واتبسمت وفورا ردت… ألو اهليين بدر بخيير الحمد لله كيفك انت، أيوة قاعدين، تمام تشرف في أي وقت،قفلت الخط والابتسامة من الشرق للغرب… وااي قال جايي علينا يا امي انا ماشة الحق اجهز…..ههههههه الله يهديك يا بدور، يحليلك يا أحمد يا ولدي اسي كان عملت جية بدر موضوع
بدر بهناك راقد في سريرو سرحان من ما جا داخل من برة، سارح بعيييد يفكر في الجمال والرقة والهدوء والبراءة والأدب العمرو ما شافهم في بت زي براءة
بدر زول ملتزم ما بنفعوا معاه نوع البنات الفاكات الزي بدور ،بس لمن شاف براءةبتحفظها وهدوءها وبراءتها وحجابها لفتت نظره وطوالي دخلت قلبه ، بس من جهة تانية مافي زول حيقدر يوصلو لبراءة غير بدور ، لبس أحلى ما عنده ورش العطر بتاعو وطلع
بدور بهناك مستنية حبيبها بفارغ الصبر ، لبست واتجيهت وكالعادة لابسة فستان نهاري ضييق مبين كل تقاسيم جسمها وبخرت البيت وقعدت مستنياه على أحر من الجمر، ولمن وصل بدر عملوا معاه الواجب على أكمله ، فاطمة بتتونس معاه وبدور خفة ورشاقة شديدة ماشة وجاية تشيل الحلاوة تجيب البارد تشيل البارد تجيب الشاي والجاتوه ،حتى إنهم عزموه يتعشى معاهم بس رفض واعتذر… ما قلت لي يا بدر يا ولدي كنت وين الأيام الفاتو إتصلت عليك كتيير قلنا نسأل منك ما بترد …. يسأل منك الخير يا خالة والله انا بعتذر منكم كان عندي سفرية كدة تبع الشغل ونسيت تلفوني في البيت ،بدور طوالي ردت عليه …. وكنت بتتواصل مع أهلك بشنو طيب …. عندي تلفون تاني كنت بتصل عليهم بيه …. انت ساكن وين بالضبط ….ساكن في المنشية مع أمي وأبوي …. ما عندك أخوات يعني …. لا أنا ولد واحد وشغال في شركة زين للاتصالات عشان اصرف على أمي وأبوي، بدور سرحت في اللحظة دي واتذكرت كلام مخضرم وعرفت انه كان صادق وما كذب عليها
بعد كملوا ونستهم، بدر سلم عليهم وطلع…. ما شاء الله والكمال لله الولد طلع خلقة وأخلاق وظرافة وأناقة ولباقة…. مش كدة عليك الله ادعي يبقى نسيبك يا أمي…..ههههه الله يديك الفي بالك يا بدور….. اميييين
نمشي لي أحمد ومحمد الخلصوا إجراءات السفر وحجزوا على أقرب طيارة، ولمن وصلوا أول حاجة عملها محمد انه ساق أحمد على أكبر مستشفى هناك، وعادوا كل الفحوصات والتحاليل بس المرة دي النتيجة كانت إيجابية جدا والدكتور بشرهم بإنه الزي حالة أحمد كتار والإمكانيات متوفرة وكلهم اتعالجوا و الحمد لله، و طلب منهم المباشرة بالعلاج فورا وحدد ليهم يوم للعملية
بدور الصباح قابلت براءةفي الموقف كالعادة، وطول الطريق بقوا يتونسوا وحكت ليها الحصل امبارح كلوو….. لكن الولد طلع بالجد مكسر فيك وداك الجامعة ورجعك وجاك لحدي البيت…. ههههه انا زااااتي مدشدشة فيه للدين بس ما بقدر اصارحو بمشاعري الا يصارحني هو أول….. أكيد ما حيقدر يصبر وحيصارحك ويتقدم ليك في أقرب وقت…. ربنا يسمع منك يا براءةبس قبل ما يصارحني أنا لازم أعرف أي شي عنه ومخضرم هو الخيط اللي حيوصلني ليه…. ان شاء الله ربنا يفرح قلبك ويجمعك بيه ونفرح بيك يا صحبتي، تصدقي حتى أساميكم لايقة لي بعض بدر وبدور ههههه، بدور خجلت واتبسمت…. تسلمي حبيبة جمعا يارب
لمن وصلوا الجامعة بدور طوالي سألت من مخضرم وقالوا ليها دايما بكون قاعد في المكتبة يذاكر ….و بعد ما خلصت محاضرتها مشت قابلته بابتسامة مشرقة (بتاعة مصالح)… هااي كيفك مخضرم، مخضرم لمن يشوف غمازات بدور و ابتسامتها بحس الدنيا ضحكت في وشو وقلبه بنشرح كدة…. أهلا بست البنات…. مش اتواعدنا الليلة نمشي مكان شغل بدر، مخضرم سرح واتذكر الوعد الوعدو ليها بس ما عرف يقول ليها شنو بقى يتمتم… امم ها؟ اي لا…. انت شكلك كذبت علي وزعلتني منك شديد…. كلو ولا زعلك يا جمييل خلاص ح اوديك، بدور فرحت لمن مسكتو من يدو وطلعوا ومخضرم ما عارف يعمل شنو ولا يمشي وين كل العارفو انه مبسوط شدييد عشان ماسك بدور من يدها وقاعدين جمب بعض يتونسوا في المواصلات
بدر في الأثناء دي وصل جمب باب الجامعة عشان يشوف حبيبة القلب ويوصلهم زي امبارح، ومن حسن حظو إنه بدور الليلة مافيشة ولمح براءةراجعة على البيت براها، براءةأول ما شافت العربية عرفت إنه ده بدر بس طنشت وعملت رايحة، بدر بقى يضرب بوري العربية تييت تيت لمن التفتت عليه
يا ربي حيحصل شنو بين بدر وبراءةوحيصارحها بمشاعرو ولا لا؟ ومخضرم حيودي بدور وين ؟؟ وعملية أحمد حتنجح ولا لا؟
إلي اللقاء ..