رواية نصف البدر بقلم / د. إيلاف أحمد

نصـف البدر
بقلم / د. إيلاف أحمد
الفصـل السابعبدور راكبة في التاكسي اتصلت ببدر وعملت فيها بتبكي …. ألو بدر يمكن ما تصدقني بس أنا اتصدمت صدمة العمر في صحبتي ،براءةيا بدر طلعت بتبيع جسمها للذئاب ينهشوا فيها ، أنا ما كنت عايزة أكلمك بس إنت زي أخوي ولازم تعرف الحاجة دي قبل ما الفاس تقع في الراس ، ولو ما مصدقني أنا ح أديك العنوان عشان تتأكد ، وقفلت الخط .

وصلت العنوان ودخلت البيت لقت براءةمرمية على الأرض ، غيرت ليها ملابسها بملابس نوم ورفعتها في السرير وكلمت واحد من الرجال يرقد جمبها ، لحدي ما ظبطت الوضع بدر طار طيارة وجا لعندها ، أحمد طبعا دمه بيغلي محروق واقف يراقب البيت من بعيد وما قادر يدخل لانه شايف راجلين واقفين قدام الباب، وما عايز يقتحم حتى يتأكد من الموضوع ويفهم الحاصل ، شاف بدور طلعت تاني من البيت قابلت بدر ودخلوا سوا ، لمن شاف عربية بدر اتذكر لمن شاف بدور وهي بتنزل من نفس العربية لمن كان مشلول ، وما قادر يصدق عيونه إنه بدور ممكن تكون رخيصة للدرجة دي وبتقابل اولاد من وراهم .

يلا بدور قابلت بدر ودموع التماسيح جارية من عيونها وبتتنهد ، ماسكاه من يده وهي بتقول ليه أسس اسس وبتمشي براحة براحة ، فتحت ليه باب الغرفة بدر نطط عيونو مصدووم باللي شايفو ريحة العطور مختلطة بريحة خمور واضواء الغرفة الخافتة والموسيقى الرومانسية الشغالة والأهم من ده كلو براءةراقدة جنب الراجل بملابس النوم، الصدمة كانت كبيرة عليه ما قدر يتحمل الموقف طوالي طلع من الغرفة وبدور جرتو من يده وطلعوا من باب البيت البي ورة قعدوا في مصطبة كدة تحت ضل الشجر بدر قاعد مصدوم وبدور تقشقش دميعاتها تصبر فيه وفي نفس الوقت تحرش فيه…… صدقني أنا مصدومة زيي زيك كدة وما صدقت لمن كلموني، ما كنت متخيلة براءةالبريئة الشريفة يطلع منها ده كلو، أتاريها عشان كدة كانت بعد مرات بتقول لي ماشة لخالتي وتزوغ وانا واثقة فيها ما كنت بسألها ولا بشك فيها، بعد شوية مسكت يده وقالت ليه انت بس ما تزعل نفسك، وحدة حقيرة زي دي ما بتستاهل الواحد يزعل عليها، انت زول طيب وقلبك أبيض ما بستاهل زولة زي دي، المفروض الصدمة دي تخليك تتعظ وتفتح عيونك كويس وتحسن اختيارك عشان ما تقع الوقعة دي تاني وأنا ح أكون جمبك بقلبي وعقلي وكل حاجة إنت بس أسمح لي أساعدك وأقيف معاك، بدور بتتكلم وتتكلم وبدر العبرة خانقاه ما قال ولا كلمة، والمدة طالت وأحمد واقف برة ما قدر يصبر وقال أنا لازم أوقف المهزلة دي، طيب يا بدور بعد كل العملناه معاك تعملي فينا كدة، تفضحينا وتنزلي راسنا في الواطة، أنا ما ح أرحمك الليلة.

من حسن حظو إنه الراجلين الجنب الباب تعبوا من الوقفة وقعدوا شالتهم نومة، بخفة فتح باب البيت، بقى يتأمل في البيت و يمشي على أطراف رجلينه عشان ما يعمل صوت، سمع صوت موسيقى جاية من غرفة كدة، مشى عليها وقال شكلهم راقدين هنا، وعلى غفلة وبدون سابق إنذار اقتحم الغرفة و دفع الباب بأقوى ما عنده.
أحمد دخل الغرفة لقى بت ممدة في السرير بتنزف كان متخيل إنها بدور ،لمن قرب عليها وشافها اتصدم وبقى يسأل نفسه دي منو يا ربي ،وبدور أختي مشت وين ،بقى يحاول يصحي في البت عشان يسألها من أخته بس براءةفاقدة الوعي وما عايزة تصحى ، فكاها ولف الغرف الفي البيت كلها وهو بنادي يا بدووور يا بدووور ، لمن ما لقى زول رجع للبت وقال أنا لازم أسعفها قبل ما تموت شالها وطلع وهو بقول حتهربي مني وين يا بدور خليني ألم فيك ح أعلمك الأدب وأربيك من أول وجديد ، أشر وركب تاكسي على أقرب مستشفى .

بدور بهناك لسة نايمة في العسل ومبسوووطة بتتونس مع حبيب القلب ….اها قلت لي رايك شنو؟….. في شنو يا بدور …..انا من قبيل بقول في شنو في إنك تديني فرصة أقيف معاك ونقرب من بعض وأوعدك إني ح أعوضك عن كل الجروح السببتها ليك الحقيرة دي ….. الناس في شنو وانتي في شنو يا بدور كدي عليك الله خليني ما شايفة حالتي كيف ، وقام من جمبها ومشى من غير ما يسمع ولا كلمة زيادة ، بدور بقت تتكلم مع نفسها …..يخرب بيتك حتى وانت زعلان وبتبكي زي القمر أوديك وين أنا بس ،كويس يا بدر أعمل فيها زعلان وتقيل اسي بس لو ما جبتك ما يبقى اسمي بدور، قامت من مكانها دخلت البيت جوة مبسوطة وتدندن عشان خطتها نجحت ، دخلت الغرفة بقت تتلفت الغرفة فاضية مافيها زول…. سجمي البت دي مشت وين وبقت تكورك يا برااااءة يا براااااءة بس مافي زول برد، بدور قلبها بقى يدق بسرعة من الخوف خافت من تكون براءةطلعت وبلغت ليها الشرطة، وأثناء ما هي واقفة بتفكر جا داخل واحد من الرجال الكانوا واقفين برة ونفسو قايم، يا انسة أنا شفت راجل شال البت القبضناها وركب تاكسي ومشى حاولنا نلحقو بس ما قدرنا…. يا أغبياء انتوا بهايم انا موقفاكم لشنو كيف تسمحوا لي واحد يدخل ويطلع كدة منو الراجل ده….. احنا غلطانين وجد اسفين ما انتبهنا لملامح الراجل شالتنا نومة ولمن صحينا كان ركب التاكسي ومشى. …. الله ياخدكم يا أغبياء يا ربي مشيتي وين يا براءةوده منو الراجل ده

أحمد في اللحظة دي وصل المستشفى والدكتور قال ليه إنها فقدت الوعي نتيجة صعقة كهربائية وتعرضت لعملية اغتصاب لكن حتبقى كويسة ان شاء الله، شكر الدكتور ودخل الغرفة لقى براءةبتحاول تفتح عيونها، مشى وقف جمبها ولمن فتحت عيونها بقت تعاين فيه مخلووعة وعايزة تقوم من السرير بس ثبتها مكانها وبقى يهدي فيها…… أنا وين وانت منو….. طيب ارتاحي وحتعرفي كل حاجة…. لا ما عايزة ارتاح عليك الله ما تأذيني أنا وحده مسكينة….. صدقيني أنا ما ح أأذيك وأنا الجبتك لهنا بس عايزة أسألك سؤال واحد بتعرفي بدور من وين…. بدور؟ بدور دي صحبتي في الجامعة مالها ….. طيب الوداك انت وبدور البيت المشبوه داك شنو…. ياتو بيت؟ فجأة اتذكرت اخر حاجة لمن كانت مع الشافع وحكت ليه الحصل، بس وتاني ما عارفة الجابني هنا شنو وبدور ما كانت معاي هي حصلت ليها حاجة؟….. لا كويسة ده مجرد سؤال

فجأة كدة سرح وبقى يفكر ويحاول يربط المواضيع…..بس ما وريتني انت منو والجابني هنا شنو…. ها؟ أنا أخو(ما كمل الكلمة) يا ستي اعتبريني فاعل خير وجرس الباب حق البيت داك كان فيه ماس كهربائي وانت اتكهربتي ووقعتي وأنا جبتك لهنا….. شكرا ليك كتير ما قصرت …. العفو ما عملت إلا الواجب

تاني سرح بعيييد وقال لنفسو البت قالت بدور ما كانت معاها معناها اتكهربت قبل كدة وما شافت بدور لمن جات، بعدين هي قالت لقت الشافع جمب باب الجامعة وأداها الورقة الفيها عنوان البيت يعني ما كانت بتعرفو ومشت صدفة وحصل الحصل بس بدور كانت بتعرف عنوان البيت داك كوييس، بس المحيرني قصة الراجل المعضل والظرف داك شنو وصاحب الكامري داك منو، و بدور فجأة اختفت وين أنا شفتها بعيني داخلة البيت، معناها السر كلو في بتاع الكامري داك وأنا لازم أفهم الحاصل

بدور بهناك برضو محتارة وبتفكر وتسأل روحها ده منو الراجل الشال براءةومشى، وهي متأكدة إنه مافي زول بعرف البيت ده غيرها، حتى لو في زول بعرف البيت شنو البخليه يدخل لجوة إلا لو شاكي في حاجة، معناها ده زول مراقبني و لاحقني من الجامعة وشافني لمن دخلت البيت بس ده منو يا ربي، أيواااااا بس لقيتو مافي غيرو مافي زول مجنون غيرو ممكن يراقبني ويمشي وراي ، الليلة ليلتك سودا وأنا ح أوريك
براءةلاحظت إنه أحمد طول الوقت سرحان وبالو مشغول بفكر زي في حاجة محيراه …. معليش يا أخو انت في حاجة محيراك …. أولا انا اسمي احمد وثانيا في سؤال كدة محيرني شديد و شاغل بالي ….. طيب يا أحمد أقدر أساعدك بشنو على الأقل أرد ليك الدين في انك ساعدتني وجبتني لهنا …. انتي بتعرفي واحد سايق عربية كامري سوداء مظللة …. كامري سوداء؟ وطوالي جا بدر في بالها ، أيوة بعرفو بس لييه بتسأل منو …. يلا لو عايزة تساعديني بالجد لو سمحتي أحكي لي أي حاجة بتعرفيها عنو وعلاقتو شنو ببدور ، براءةبلعت ريقها اترددت كدة وبعدين قررت تحكي ليه

يلا بدور بهناك جرت ركبت تاكسي وفورا رجعت الجامعة ، دخلت مشت المكتبة تفتش مخضرم ما لقتو ، سألت أصحابو قالوا ما عارفينو وين ، وهي طالعة لقت الحاجة البتبيع الاسكريم قاعدة و فارشة حاجاتها قامت مشت عليها …. عايني أسمعي هنا ولدك مشى وين …. مخضرم مشى مشوار يا بتي خير في حاجة …. انا ما بتك ولا حاجة مشوار شنو ده ….قال ماشى يزور صحبو في المستشفى ،بدور اتأكدت إنه مخضرم هو الكان مراقبها واخد براءة للمستشفى وخافت إنه يمسكها عليها ذلة عشان توافق عليه وما يفضحها في الجامعة…. مشى مستشفى شنو ؟…. ما عارفة والله قال لي مستشفى وخلاص وريني انت عايزاه في شنو وانا بكلمو…. دي حاجة ما تخصك ، بدور مشت معصبة وهي بتقول طيب يا مخضرم اصبر لي إن ما وريتك، ام مخضرم كانت بتستحمل دايما اهانات بدور وتصبر عليها عشان خاطر ولدها وما كانت بتكلمو بأي حاجة سكتت وقالت لنفسها…. الله يستر عليك يا ولدي دايراك في شنو البت دي يا ربي

براءةبعد حكت لي أحمد كل البتعرفو عن بدر وإنه ما كان ببادل بدور نفس المشاعر وعاملها مجرد كبري عشان يصل ليها بس بدور بتحبه وكانت مصرة إنها تقنعه، أحمد كان بسمع في براءةبكل تركيز ويحاول يربط الأحداث مع بعضها…. طيب كانت عارفة إنه عايزك وما عايزها؟…. لا انا ما كلمتها عشان ما تفهمني غلط لكن حذرتها منو وما سمعت كلامي، بس ما وريتني انت بتعرف بدور من وين ولييه عايز تعرف ده كلو عنها….. بس في احتمال برضو انه هو الكلمها يا ستي أنا أحمد أخو بدور الكبير… بدور ما عندها غير أخو واحد ومشلول….. أيوة كنت مشلول بس اتعالجت الحمد لله والكلام ده بيني وبينك حتى بدور ما تعرف، براءةنططت عيونها وبقت تعرق ما مصدقة انها قالت الاسرار دي كلها عن بدور لأخوها وهي عارفة إنه أحمق وعصبي زي ما قالت ليها، أحمد بقى يهديها ويطبطب عليها…. ما تخافي بدور اختي وانا بخاف عليها و عايز اساعدها ما أكتر وما ح أقول إنه انتي كلمتيني

أحمد تاني سرح بعيييد وبقى يقلبها في مخه و قال في سره، بدور وأنا عارفها لمن تخت حاجة في بالها بتعمل اي شي عشان تصل ليها ولمن عرفت إنه بدر عايز براءةقررت إنها تصغرها في عينه وتمسحها من راسه عشان يعاين ليها هي، معناها هي العملت كل الفيلم ده واتفقت مع المعضل داك وادتو قروش عشان يوقع براءةومشت للبيت عشان تتأكد من نجاح خطتها وفي نفس الوقت كلمت بدر يجي و يشوف بعينه عشان يصدقها بعدين هربت……اااخ يا بدور يا اختي ما اتوقعتك خبيثة للدرجة دي يا خسارة تربيتنا طلعتي شيطانة كبيرة واحنا ما عارفين لكن انا ما ح أخليك وح اربيك من اول وجديد

نمشي لي بدر الرجع من البيت داك وهو زعلان ومصدوم ومتأثر، وصل البيت جرى على خزانة مطبولة من زمن فتحها وشال أقرب قزازة عرقي مسح التراب منها وبقى يشرب ويشرب فيها من غير ما يقيف زي كأنه كان محروم فترة طوييلة ورجع ليها، بعد شوية بقى يتكلم براه ويهلوس…. براءةيا براءةانتي كنتي حب حياتي الوحيد وما اتوقعتك تطلعي زي الباقيات العرفتهم، أنا حاولت أتغير عشانك بس طلعتي واطية وما بتستاهلي، لكن بعد كدة خلاص أنا ح أرجع لي بدر القديم ولي حياتي القديمة وشغلي القديم وفجأة وقع وغرق في النوم

يا ربي قاصد شنو ببدر القديم وكان شغال شنو وكيف كانت حياتو القديمة؟؟ وبدور كيف حتواجه مخضرم؟؟ وأحمد كيف حيواجه أختو؟

إلي اللقاء ..

error: