رواية نصف البدر بقلم / د. إيلاف أحمد
بقلم / د. إيلاف أحمد
الفصـل الثـالثالليلة تاني يوم لي بدور في الجامعة ، لبست وقشرت كالعادة وبقت تعاين روحها ماشة وجاية قدام المراية ،عاجباها روحها شديييد ومقتنعة انه مافي بت بحلاتها .وصلت الموقف وقابلت براءة هناك وركبوا سوا ، داخلية براءة طلعت قريبة من بيت بدور ،اتفقوا كل يوم يتلاقوا هنا ويمشوا مع بعض وطول الطريق فضلوا يتونسوا ويتبادلوا الشمارات …. اها ما وريتيني طبقتي فكرتي القلتها ليك ولا لا …. طبقتها بس اتخيلي الولد عامل فيها تقيل ورايح ما رد علي … طيب ما يمكن عندو ظروف ولا حاجة منعتو يرد …. اساسا انا حاسة انه الزول ده وراه سر ولازم اعرفو …. وريني هو يستاهل التعب ده يعني …. وااااي انتي ما شفتيه قرررضة نار منقد بس انا مافي زول دشدشني وطلع عيني زيو كدة ….. ههههههه ربنا يديك الفي بالك يختي …. اميين وياك حبيبة
بدور طقطقت للكمساري ونزلوا الجامعة ، وهناك أول ما دخلوا لقت مخضرم مستنيها على احر من الجمر واول ما شافها مشى ناحيتها ، براءة نكزت بدور واتكلمت معاها بصوت واطي …يا بدور عايني مش ده الولد الاتشاكلتي معاه امبارح شكلو جايي علينا….بدور عاينت بطرف عينها ،اسسس اي هو امشي سريع واعملي رايحة، خطواتهم بقت تتسارع بس مخضرم جرى وراهم لحقهم وناداها … يا بدور يا بدور استني لو سمحتي، التفتت عاينت ليه ورافعة حاجبها… نعم خير … ممكن أتكلم معاك… ما عندي كلام مع واحد زيك…. بس انا عندي كلام كتيير عايز اقولو…. قول كلامك هنا وخلصني انا ما فاضية، عاين لي براءة ورجع عاين ليها…انا عايزك في كلمتين على انفراد ممكن، بدور عاينت لبراءة وقالت ليه قول العندك مافي زول غريب هنا، براءة شعرت بالاحراج….طيب عن اذنكم يا جماعة عندي شيت ماشة اصورو… عايزة تقبل تمشي بدور مسكتها من يدها… استني يا براءة انا جاية معاك، معليش يا اخ انا ما عندي استعداد اسمعك ومافاضية ليك، اعتبر نفسك قلت كلامك العايز تقولو واختاني ،جرت براءة من يدها ومشوا،
مخضرم وقف في مكانو وما اتحرك وقال لي نفسه ( طيب على راحتك يا بدور، خليتك اسي بس لو ما غيرتك وبقيتي من نصيبي ما يبقى اسمي مخضرم)
يا بدور كان لازم تسمعيه عايز يقول ليك شنو يمكن يكون كلام مهم….يا بت كلام مهم شنو ده زول كيسه فاضي وما عندو موضوع ما تشتغلي بيه كتير…. ما عارفة بس أنا في رايي كان تسمعيه انت ما خسرانة شي…. انت ناسية العملو فيني امبارح ما بسمعو ولا ح اسمعو اصلا انا ما عندي ليه شي وما فاضية للاشكال دي، وأثناء ماهم ماشين وبتكلموا بدور لمحت الحاجة البتبيع الاسكريم بتفرش في حاجاتها، وقفت مسافة عاينت ليها من فوق لي تحت وابتسمت ومشت قاصدة انها تزلها وتستحقرها، بس الحجة على قد حالها ما اشتغلت بيها وكملت شغلها
نمشي لي أحمد ومحمد الاصر وعمل مع نفسه تحدي انه حيعالج صحبه وكان عندو يقين قوي انه حيتعالج ويتحسن، محمد مشى لي أحمد في البيت واتكلم مع امه… بصراحة يا خالة انا حاسي انه أحمد بقى كئيب ومكشر طول الوقت وما بيضحك ويفرفش زي زمان…. معاك حق والله يا محمد حتى انا لاحظت ليه بقى ما بيحب يتلم معانا كتير… ايوة عشان كدة انا قررت تاني اجيه كل يوم ونطلع نتفسح ونغير جو عشان اغير ليه نفسياته شوية وانا سألته واتبسط شديييد من الفكرة دي… تسلم يامحمد يا اصيل انا عارفاك ما بتقصر وربنا يفرح قلبك زي ما فرحت قلبي وقلب أحمد بس احنا ما عايزين تعبك والله…. مافي تعب يا خالة أحمد ده اخوي واحنا متربيين مع بعض وما بستكتر فيه حاجة ابدا…. يديك العافية يا ولدي وان شاء الله نفرح بيك يوم عرسك يا قادر يا كريم…تسلمي يا خالة وعرس أحمد كمان يا رب ، وطوالي جرى على أحمد في غرفتو يبشرو وساقو وطلعو على المستشفى ، محمد عاجب فاطمة شديد من زمان بسبب ادبو واخلاقو ونفسها يبقى راجل بتها مع انه محمد نهائي ما فكر في بدور وخاتيها زي اخته، وبدور متطلعة شديييد ما بيعجبها العجب ولا الصيام في رجب
بعد ما طلعوا، فاطمة حست بفراغ وزهج ما لاقية زول تتونس معاه، شالت تلفونها وبقت تقلب فيه من الفيس بوك للواتس اب للانستغرام، فاطمة اصلها زولة متفتحة ومودرن وعندها كل حسابات السوشيال ميديا، أثناء ما هي بتقلب في التلفون خشت على سجل المكالمات ولقت في مكالمة صادرة لزول الحادث (مسمياه كدة طبعا ههههه)، استغربت وسألت نفسها،…..اجييي انا بتين ضربت للزول ده المكالمة دي امبارح وانا من امبارح ما جيت ناح
ية التلفون اصلا، سرحت تفكر وفجأة اتذكرت لمن كانت بدور بتمشي وتجي على التلفون…. ايواااا اتاريك عشان كدة حايمة حولين التلفون امبارح قال ارقامي اتمسحت قال ههههههه ما علي انا يا بدور، بس انا لازم اعرف البخليها تتضرب ليه شنو وعايزة منو شنو فاطمة كانت مستنية بدور ترجع من الجامعة عشان تسألها وتعرف الحاصل،
بدور يومها الدراسي انتهى، ومستنية بتين ترجع البيت عشان تتمدد في السرير بعد اليوم الطويل ده، طلعت في السلم جارية جري واول ما وصلت البيت وفتحت الباب لقت امها واقفة في وشها!!!
خيير يا أمي مالك واقفة كدة ….. احكي لي سرييع شنو القاعد يحصل من وراي …. منو القال في حاجة بتحصل من وراك ،فتحت تلفونها وورتها المكالمة …. ضاربة للولد ده مالك وعايزة منو شنو ، بدور نططت عيونها … ها؟ ولد منو انا ما ضربت لي زول يمكن انتي الضربت ليه بالغلط ، فاطمة جرت بدور من يدها قعدتها وقعدت جمبها …. حركاتك دي ما علي انا ،انتي عارفاني بفهمك من نظرات عيونك واصلا انا من امبارح ملاحظة ليك ماشية وجاية على التلفون بس عملت رايحة ومشيت كذبتك ، بدور حست انها اتكشفت ابتسمت كده ونزلت راسها خجلانة …. ايوااا معناها كلامي صح وفي حاجة بينك وبينه ….. حاجة شنو يا أمي انا ح افهمك الحاصل وحكت ليها الحصل
انا مما شفتك في المستشفى سرحتي ومشيتي بعيييد عرفت في إن بس كنت عايزاها تجي منك وتحكي لي براك …. يا أمي اصلا ما حصلت حاجة تتحكي انا بس كنت عايزة اعزم الولد في بيتنا هو في النهاية ما قصر معاي قلت نعمل معاه الواجب بس طلع تقيل وشايف روحه ….طيب عشان خاطرك المرة دي انا ح الاضرب ليه واعزمو بنفسي بس بيني وبينك وريني بالجد كدة هو عجبك ؟، بدور خجلت واتكشمت ونزلت عيونها وراسها ووشها حمر واكتفت بانها تبتسم وتهز رأسها….. ههههههه اول مرة اشوفك بالحالة دي واخييرا وقعتي يا بت بدور، شالت تلفونها وفورا ضربت ليه تننن تننن، مافي زول برد حاولت تاني وبرضو جرس مافي رد، بدور تاني جاها احباط… شفتي يا أمي قلت ليك شكلو ما عنده لي شي….يا بت احتمال عندو ظروف ولا حاجة… صحبتي برضو قالت لي كدة بس ظروف شنو البتخليه ما يجي ولا يتصل ولا يرسل حتى … خبر الليلة بفلوس بكرة يبقى ببلاش ما تستعجلي وتحكمي على الولد ظلم، أن شاء الله عاجلا أم اجلا حتعرفي قصتو شنو بس اوعديني انك ما حتكذبي علي تاني وما حتخبي عن حاجة… حاضر يا امي بوعدك
خلونا نمشي لي أحمد ومحمد الوصلوا المستشفى وعملوا الاشعة والفحوصات الطلبها الدكتور، شالوا النتيجة ودخلوا على الدكتور….خير يا دكتور طمنا النتيجة طلعت كيف، مسك النتيجة وقعد يعاين فيها مسااافة…. خير ان شاء الله نتيجة الفحوصات والاشعة طلعت نضيفة، ما تخافو الموضوع ما خطير ومشكلتك بسيطة ان شاء الله بس لازم تلتزم بالادوية والعلاج الطبيعي وحتتحسن ان شاء الله، محمد فرح شدييييد وعاين لي أحمد لقى عيونو مليانة دموع من الفرح… الف حمد وشكر ليك يا رب الله يطمنك يا دكتور وجزاك الله كل خير، وجزاك يا اخ محمد بس معليش محتاج تخلي لي رقم تلفونك عشان نكون على تواصل… جدا جدا يا دكتور اتفضل 09
أحمد رجع البيت مبسوووط ومعنوياته مرتفعة شدييد وحاسي انه قريبا ان شاء الله حلمو حيتحقق و حيتحسن ويرجع زي ما كان، محمد بعد ما وصل أحمد رجع على بيته فرحاان ومبسوط عشان صحبه حيتعالج وفي اللحظة دي تلفونو ضرب من رقم غريب…. الو السلام عليكم…. وعليكم السلام والرحمة… انت محمد الطيب…. نعم منو معاي….معاك دكتور ياسر المسؤول عن حالة أحمد…. اهلا يا دكتور خير في حاجة… بصراحة يا اخ محمد ما خير، بناءا على نتيجة الفحوصات الجاتني أحمد عندو تلف في الاعصاب وصعب شديد انه يرجع يتحسن، محمد العبرة خنقتو… طيب يا دكتور انت مش طمنتنا قبيل وقلت بالعلاج الطبيعي والادوية حيتعالج…. انا بصراحة كذبت عليكم وما قلت الحقيقة عشان أحمد ما يجيه احباط ومعنوياته تتدمر وكدة حنزيد الطين بلة بس طلبت في النهاية اخد رقمك عشان اوريك الحقيقة وتكون على علم بالحاصل….يعني يا دكتور مافي امل خالص… والله الامل ضعيف بس احنا بنعمل العلينا والباقي على رب العالمين…. والنعم بالله طيب يا دكتور شكرا ليك وجزاك الله خير، محمد قفل الخط ودموعو جارية مطر حزنا على صحبو، قعد في الكرسي وخت يده في راسه يفكر يعمل شنو في المصيبة دي
يا بدوور يا بت اصحي الساعة 9الليلة ما ماشة الجامعة ولا شنو ،بدور صحت مخلوعة عاينت في ساعة التلفون شكلها نست تظبط المنبه بالليل وشالتها نومة لقت5 مكالمات من براءةصحبتها ،وطوالي اتصلت عليها …. وين انت يا بت انا من الصباح بضرب ليك ما بتردي…معليش شالتني نومة وما سمعت التلفون انتي مشيتي الجامعة؟ …. لا لسة في الداخلية عارفاني ما بمشي براي وما بعرف زول هناك غيرك …..ههههه غايتو انت خلاص يا منقة نتقابل في الموقف بعد ساعة كدة ، قفلت الخط وجري على الحمام استحمت ولبست وقشرت واتظبطت وطلعت .
وصلت الموقف واتقابلوا هي وبراءةزي ما متواعدين ، واثناء ما هم واقفين منتظرين المواصلات ،عربية كامري سوداء مظللة اخر موديل وقفت قدامهم ، فتح شباك العربية …. بدور؟ ، بدور نزلت راسها عاينت من الشباك لقت زولها داك زااااتو، اتخلعت ونططت عيونها …. ايوة انا بدور ، نزل من العربية لابس نفس جلابيته البيضاء ديك والطاقية المشغولة بالدهبي ، نضيف وأنيق ووجيييه وريحة عطرو الساحرة فاحت ، ومشى ناحيتها يسلم عليها
الظاهر تأخير بدور الليلة كان لخيير عشان خلاها تقابل فارس احلامها البتفتش فيه من زماان ، بدور قلبها بقى يدق بسرعة وبقت تتكبكب وتتخجل…. كيف حالك…. بخير الحمد لله…. انت كيفك امي حاولت تتصل عليك كتير بس ما كنت بترد…. معليش دي قصة طوييلة بحكيها ليكم بعدين ما عرفتينا…. دي براءةصحبتي معاي في نفس الجامعة…. اهلا براءةاتشرفنا شكلكم ماشين على الجامعة…. ايوة الليلة من دون الايام متأخرين واسي ما لاقين مواصلات… خلاص تمام ما مشكلة انا ح أوصلكم، براءةعايزة ترفض وتتعذر لكن بدور نكزتها… تسلم كتيير يا…. بدر… جد شكرا يا اخ بدر بس احنا ما عايزين نتعبك…. لا مافي تعب اصلا في نفس طريقي، بدور طوالي جرت ركبت قدام وبراءةركبت ورة.
نمشي نشوف حصل شنو مع محمد الليلة قاعد في سريره زعلان وحيران ما عارف يعمل شنو وكيف حيواصل في علاج صحبو وهو عارف انه الامل ضعيف جدا بس في نفس الوقت ما حيقدر يكلمو بالحقيقة عشان ما يدمر معنوياته، فكر وفكر وقال انا ما لازم استسلم واكيد في حل، أحمد لازم يتعالج ويبقى كويس حتى لو وصلت لدرجة إني اسفرو برة، اكيد برة الإمكانيات احسن من هنا وحيكون في أمل، بس المشكلة كيف اقدر اقنعو بموضوع السفر، وحتى لو اقتنع اقول شنو لي أمه عشان ما تحس بالموضوع،
لحدي ما محمد يصل لي حل خلونا نمشي لي بدور النزلت من عربية بدر ملخبطة ومبسوطة ما قادرة توصف شعورها من الفرحة بعد ما وصلهم لحدي باب الجامعة وشال رقمها ومشى على شغلو، براءةطبعا لسة ما فاهمة الحاصل شنو وده منو… تعالي أسألك ده منو يا بدور…. يختي ده بدر السماحة بدر السرور بدر الهنا واخييييرا عرفت اسمو…..الله الله براحة علينا ما كدة بس ما تقولي لي ده هو… ياهو زاااتو السرق قلبي وشل تفكيري عليك الله ما يستاهل…. ههههه الصراحة الولد كسااار بس برضو ما لدرجة يوقعك بالطريقة دي…. صحبتك ما بتقع الا وهي واقفة والولد ده كان ما جبتو ما يبقى اسمي بدور
وهم داخلين على الجامعة وبتونسوا، شافت مخضرم واقف في وشها….اففف انت تاني انا مش قلت ليك اختاني…. انا لازم اتكلم معاك في موضوع…. قلت ليك انا ما عندي كلام مع واحد زيك وكان ما زحيت من طريقي اسي ح انادي لي حرس الجامعة واقول انك اتحرشت بي، بعد ما مشت كم خطوة كدة لي قدام…. انا بعرف الزول النزلتي من عربيتو ده منو، بدور فجأة وقفت مستغربة بعديها طنشت عايزة تمشي… اسمو بدر عبد الرحمن وشغال في شركة اتصالات، بدور تاني وقفت وقبلت عليه
نرجع لي محمد اللي حس انه عقلو حيتشل من التفكير، من امبارح قاعد منعزل في غرفة براه لا اكل لا شرب من الزعل على صاحب عمرو، قاعد قعدة وحدة من لمن جا من المستشفى خاتي يدو في راسو وبفكر يعمل شنو، وفجأة صرخ بأعلى صوته….لقيتهااااااا
إلي اللقاء ..