رواية احببت متزوج(حقيقية)

أحـبـبت_مـتـزوج❤”حـقيـقـية”
بـقلمـي✍أيــات صالـح?
الـبـارت..(4).
____________
لايـك قـبـل مـا تقـرا/تقـري❤?
__________
نضت فتحت الـباب لقـيته راجـل طـويل وعريض هلباااا قعدت نشوفله فوق وني سارحة فيه لعند ما فوقني صوت خوي وراي
محمد:غرااامم?
تلفتت لقيت الغضب واضح ع وجهه ع طول جريت لداري وني خايفة هلبااا من خوي
فتحت الباب بالشوية شفت ايمين ايسار مالقيت حد
مشيت ع اطراف صوابعي للمطبخ
سمعت صوت خوي وراي وعرفت انه محمد!غمضت عيوني وعضيت شواربي من الخوف”
تلفتت لقيته يشوفلي
محمد:مرة تانية معاش تفتحي الباب انتي
انا:حاضر
كان الخوف واضح عليا
جي محمد قرب عليا وخداني لـصدره
محمد:يا كلبة خيرك خايفة عارفك مش قصدك خلاص
انا:خفتك تفهم غلط
محمد:تي ني واثق فيك راه وعارفك مش بتاع الدوة الفاضية
انا:يخليك ليا
محمد:وليا اسمعي نبيك توتي عشي سمح الولـد قاعد بايت اليوم
انا:تمـام
طلع محمد وني قعدت نجهز في العشي درتلهم مبطن وشربة وسلاطة جزر وبيبسي?
نظفت المطبخ وناديت ع محمد رفع العشي
__________
يوسف:اوووف محلاه العشي سلم ايدياتها الوالدة
محمد:صحتين حبيبي الوالدة مرضت من البحر?اختي داراته
يوسف:مشالله الحق
اتكى يوسف ع جنب وقعد يتفكر في ملامح غرام بالتوتة والبراء اللي كانت ع وجهها!
يوسف:تي يراجل افتح مباراة هيا
محمد:هي هي
قعدو يلعبو بعدين محمد استأذن ودخل الحمام”يكـرم الـقـاريء”
قعدت نستنى في محمد يجيب سفرة العشـي ماجابهاش مشيت ناحية المربوعة طقيت الباب مارد حد قلت اكيدة طلعو
فتحت الباب وكنت لابسة وشاح طبعا
وخديت السفرة ويوسف كان يعدل في الريسيفر من ورا الطاولة وتلفتت نلقى صاحبه وراي?
انا:ااا انت هه ه هني?
يوسف:خيرك تقول شفتي جن
انا:اسفة كنتش نحسابك انت هني
وكيف بنطلع ناداني
يوسف:غرام!
تلفتت:كيف عرفت اسمي?
يوسف:خوك ينادي فيك امبكري
انا:تفضل نعم?
يوسف:مرتبطة?
شفتله انصدمت من سؤاله ماحبيتش نرد طلعت للمطبخ ع طول
—
دخلت لداري وني تعبانة بعد ما غسلت الماعين ونظفت المطبخ
حطيت راسـي ع المخدة ورقدت
*
يوسف:تي خيرك،ساعتين في الحمام?
محمد:الدنيا عطلت شن ندير
يوسف:هههههههههههه
محمد:واطي يراا
يوسف:حبيبي بنقولك ع موضوع
محمد:احكي
يوسف:الحق ني نبي نتزوج
محمد:حلو
يوسف:وني رايد اختك بالحلال الحق ما نلقى خير منكم نسايب
محمد:والله شن بنقولك نشاور العيلة،ونقولك في النهاية الرأي رأي البنية
يوسف:ع خير ملا
——-
سمعت فوني يرن وني كيف ناعسني النوم فتحته ورديت
انا(بنعاس):الو
فوزي:محلاااها السمحة وهيا نعسانة
انا:ههه حبيبي مرتك مش جنبك?
فوزي:تمرقدت
انا:حرام عاش تحكي هكي
فوزي:من جدك انتي بدل ما تغاري?
انا:واثقة فيك وعارفاتك تحبني ني اصلا
فوزي:يعيني ع الثقة ني
انا:ملا شنو
فوزي:اسمعي ني بنطلقها راه
انا:فوزي
فوزي:قلب فوزي
انا:خايفة نكون سبب خراب بيت ونتعاقب عليه
فوزي:انتي خربتيش بيت بيتي ما كانش مبني اساسا عشان تخربيه ني انجبرت ان نتزوجها وحرمو قلبي انه يحب ويعيش زي الغير فهمتي ني من قبل ما نحبهاش وكنت نعطي فيها حقوقها الزوجية ع الفراش بدون نية اصلا!!!!
كنت متخير بين رضا الوالدين ولا نحب
اخترت رضا الوالدين?بس خلاص تواا بعد ما حبيتك معاش نشوف في شي غيرك اصلا!!!
انا:نحبك فوزي نبيك تقعد معاي ديما في فرحي وحزني نبيك تشاركني حياتي نبيك ونحبك وقلبي ماعمره نبض لـ غيرك!
فوزي:انتي عارفة ان من اول يوم شفت فيه عيونك حبيتك وحبيت كل شي فيك نبيك تكوني حلالي اليوم قـبل غدوا
انا:يا جبر خاطري
فوزي:هيا حبيبي نني توا ارتاحي نحكو الصبح
انا:اممبه تصبح ع خير ياقلبي
فوزي:وانتي مـن اهـلي?
– – – –
احـيانـا نحـن نحـب اشخـاص فـي وقـت متـأخر بـس همـا الاشـخـاص الـصح”?
__________
نضـت الصـبح?
دخـلت الحمام”يكـرم الـقـاريء” غسلت وجهي وتوضيت وفرشيت سنوني وطلعت صليت
مشطت شعري شفت فوني لقيت مسج مكتوب فيع غزل حب من فوزي❤?رديت عليه وطلعت لقيتهم ع سفرة الفطور قعمزت معاهم
انا:صباحوو
الكل:صباح الفل
بابا:اي عصام كان طلع عرسك توا خير
عصام:حتني قلت هكي تمام كلـم بوها واتفق انت وياه
باابا:تمام
محمد:بخصوص العرس عندي ليكم موضوع
بابا:احكي
محمد:تعرفوه صاحبي يوسف جاني،امس
لما قال اسمه رفعت عيوني ع طول وخفت،شوي حسيت الموضوع متعلق بيا!
بابا:خيره?
محمد:طلب يد غرام مني امس
طلب يد غرام مني امس
طلب يد غرام مني امس
قعدت مصدومة ني وع طول صورة فوزي وكلامه امس كله في لحظة جي بين عيوني
بابا:وشن رديت عليه?
محمد:قتله ان الرأي راي البنية ونشوف ونقولك
بابا:قوله يجي
انا شفتله والدموع في عيوني
انا:بس ني مانبيشي
بابا:يا محمد اتصل بيه وقوله يحددو يوم ويجو
محمد:يابوي البنت ماتبيش
بابا:علاش?
انا:نبي نكمل قرايتي قبل
بابا:به بس عيب نرفضوه هكي خليه،يجي القبل وديري،مقابلة شرعية بعدين نقولولهم رفضنا
ارتحت نوعا ما”
انا:اهاا تمام هكي بس لازم المقابلة?
بابا:مرات هو يبي ماهو.
انا:امممم تمام
كملنا فطور مشي بابا لشغله وعصام كذلك واحمد لثانويته وني ركبت نلبس عشان نمشي للجامعة
لبست سروال جينز وبلوزة لتحت الركبة موف وفيها زي الاسود ووشاح اسود وسبيركو اسود
وطلعت
ماما:من بيوصلك?
انا:محمد يستنى فيا
ماما:تمام
ركبت السيارة مع محمد وصلني للجامعة ومشي هو لكليته
لقيت صاحبتي غفران تستنى فياا
انا:اهلا غفرونة
غفران:اهلين،شنج البحر?
انا:يهههبل
غفران:حلووو
انا:اي
غفران:اي?شن طيحتيش واحد
كنت بنحكيلها ع فوزي بس ترددت
انا:تعرفيني عنديش فيه الجو هذا?✋
غفران:باردة تعالي هي المحاضرة بدت
دخلنا للمحاضرة وكملنا
انا:اوووف شن مزالناا
غفران:محاضرة وحدة بس تعالي نشربو قهوة بعدين نخشو
انا:تعالي هي
مشينا للكافتيريا خدينا قهوة وقعمزنا
غفران:تعرفي ياغرام بنقولك شي خليه بيننا
انا:احكي
غفران:حبيبي اللي قتلك عليه خوك عصام?
انا:كييييف?
غفران:اي خيرك
انا:وكيف خبيتي عليا
غفران:هو قالي تحكيش بس اليوم بنحكيلك عشان نبي نفهم شي?
انا:شنو?
غفران:خوك عصام متغير هلبااا معاي صاير معاه شي?
كنت نبي نحكيلهااا ان خوي خاطب ويضحك عليك بس ترددت وخفت عليهااا يصيرلهااا شي?
انا:اا اهااا لالا غير هو الايام هذي تعبان
غفران:طمنتيني يا حماتي?
انا:ههههه
عقلي مش معاها بكل قعد مع عصام معقولة يضحك ع بنات الناس?مش خايف ع اخته
انا:هيا نوضو للمحاضرة
غفران:قالو الدكتور الاول استقال جابو واحد غيره
انا:اهاا به هي
غفران:هيا هي
دخلنا لـلمحاضرة استنينا لين دخل الدكتور
انا:?
#يتبع