تائهة بين دوائر الانتقام

عدت الايام اخو محمود رجع وبلغه (ان اهل والدته اصروا انهم تقعد معاهم لحد ما عدتها تخلص وطبعا نورا فضلت معاها )… ورجعوا سارة واسلام ومحمود رجعوا عند ابراهيم .. محمد اتحسن كتير مع سارة ومعاملته بقت افضل وخالد بقى يومه هو وسارة سوا دايما , خروجه وسهره قل كتير وده خلى ابراهيم يشك في خالد وقربه من سارة …..وبدأ العام الدراسي بدون اي مضايقات من ماجد او اتصالات او اي احداث مريبة ……
ابراهيم : يعني ايه يا سارة مش عايزة تروحي المدرسة ؟؟ يا بنتي انتي عارفه اخر مرة خرجتي فيها من البيت امتي من ساعة مشكلتك مع شهد . هتفضلي عايشة جوه البيت ؟!
سارة : يا عمو انا لوخرجت ممكن اشوف ماجد وانا عايزة ابعد عنه خالص وبعدين انا ممكن اقضي السنة دي في البيت واروح علي الامتحانات
سيف : بس ده مش حل … بصي انا هوديكي وهجيبك وهفضل معاكي ماتقلقيش..
اسلام : بس انا متفق مع سارة وجودها في البيت امان اكتر ..
محمود : ده علي اساس انه لما خطفها المرة الاولي مكانش من البيت … لا يا سارة لازم تروحي ..

سارة : ارجوكم ماتضغطوش عليا اخد بس اجازة شهر كده لحد ما اقدر .. مش عايزة اشوف نظرات الشفقة في عيون الناس او خوفهم مني .. مش عايزة اشوف حد بيكرهني ومستعدة اقعد في البيت عمري كله عشان ابعد عن كل ده …
سيف : واضح انك لازم تكثفي جلساتك مع دكتور يحيي ..
سارة بضيق : تاني جلسات ؟!!
سيف وبيضايقها وبيلعب لها حواجبه : اه يا مجنونة … خلاص نسيبها شوية وبعدين تبقي تنزل ..
ابراهيم : خلاص ماشي .. بقولك يا سوسو حودة كان بيقول انك بتعملي قهوة حلوة صحيح الكلام ده ..
سارة بضحك : اه والله يا عمو انا بعمل قهوة رهيبة
ابراهيم : لا انا عايز اشوف تحريري .. طقم قهوة لينا بقي كلنا ..
خالد وبيحط رجل علي رجل : وانا النسكافيه بتاعي ..
سارة ضربته في رجله : قوم اعمله لنفسك انا عملت بتاع الصبح …
خالد وقف وبان فرق الطول بينهم الفظيع حيث ان سارة قصيرة اوي بالنسبه له : يا نعم احنا متفقين انا يوم وانتي يوم … مسكها من هدومها زي المقبوض عليهم… انجري قدامي هتعمليه يعني هتعمليه .. يلا
سارة : برئ يا بيه والله ..
ضحكوا كلهم ومشيوا سارة وخالد علي المطبخ …
التفت ابراهيم لسيف وقال بجدية : يا سيف انت عرفت ايه اللي حصل ؟؟ وازاي سارة اتخطفت ؟؟
سيف : اه .. حصل انه وقت ما اتخطفت سارة كان الكاميرا رصدت قبل الخطف محمد وخالد كل شوية طالعين خارجين من البيت … وشوية طلع معاهم بنت عمهم شهد ومشيوا الثلاثة بعربية سوداء وللاسف العربية كانت بدون نمر ومش ليها اي ملامح نقدر نوصلها …
محمد : انا ؟!! انا فاكر كويس في اليوم ده ماخرجتش من البيت اصلا ولا كمان خالد ..
سيف : ايوة ما ده اللي عرفناه بردو .. وبعد فحص الفيديوهات من الخبراء بتوعنا اكدوا ان ده نوع من التخفي وهي عمل اقنعة تشبه شكل اشخاص معينه بحيث انه يتنكر في شخصية تانية مش مشكوك في امرها يعني اثنين من العصابة دي اتنكروا باشكالكم انت وخالد بحيث وجودكم طبيعي مع سارة وطبعا محدش هيستغرب وجودكم مع سارة اللي غالبا كانوا منكرينها في شكل شهد عشان بردو خروج سارة من البيت هنشك فيه …. ده شغل عصابات ومش معروف اوي … لان صعب عمل الاقنعة دي اوي ..
اسلام : يا نهاار ابيض .. ده ايه التفكير ده ؟؟ بس ليه وعايز من سارة ايه ؟!
سيف : التفكير ده طبيعي علي الناس دي .. وفي الاغلب الاسلوب ده مش هيستخدموه تاني ..اما عايز من سارة ايه ؟ انا كنت بتمني ان الاقي اجابة السؤال ده عندكم .. ومحدش يقولي حب .. اختك دي اعذرني يعني مفيهاش حاجة تتحب ..
محمود بضحك : حرام عليك والله هي غلبانه …
سارة بضيق وسمعت الكلام الي اتقال عليها : هي مين دي اللي مفيهاش حاجة تتحب ؟!!
سيف : ما ترد يا محمود دي مجنونة وممكن تضربك .. بص سيف لساره : انا مقولتش حاجة ده محمود…
خالد بضحك : او تعضك
سارة : يااااه علي قلبك الاسود انت لسه فاكر
خالد : يا بنتي ده انتي غلبتي مصاصين الدماء عضتك علمت في ايدي اسبوع
سارة بضحك : انت اللي بدات .. واللي بيلعب مع القطة تخربشه …
خالد : واللي يلعب مع خالد عارفه بيحصله ايه ؟!!
سارة : معرفش ومش عايزة اعرف ..هروح اشوف القهوة بدل ما تفور … ومشيت سارة ..
,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,
عدى شهر من الدراسة وسارة مازالت مش عايزة تنزل وحاولوا يقنوعها بانها تروح المدرسة وكانت رافضة بشدة .. اتصل ابراهيم بيحيي وقاله انه لازم يقنعها تخرج من البيت اصلا …
في بيت ابراهيم بليل قاعدين بيتفرجوا علي التلفزيون ..رن تليفون البيت …..
خالد : الو ..
يحيي : الو .. انا دكتور يحيي ..
خاالد : اهلا بحضرتك انا خالد ..
يحيي : ازيك يا خالد .. سارة عندك ؟
خالد : الحمدلله .. اه اكيد هي بتروح فين يعني ؟؟ ثواني هناديها ….
سارة : الو ايوة يا دكتور ؟
يحيي : ازيك يا سارة .. بقولك مش هقدر اجي النهاردة ممكن تيجي انتي ؟
سارة بتردد : انا … لالالا .. بلاش انا اخرج .. هستني حضرتك وقت تاني .
يحيي : لا معلش في موضوع ضروري محتاج اتكلم معاكي فيه ..مستنيكي النهاردة .. وقفل الخط قبل ما ترد …
سارة : الو … الو … قفلت التليفون … بس انا مش عايزة اخرج بقي اوووووووووف
مرة واحدة سارة اتضربت علي قفاها … سارة : ااااااااه .. بتبص بغيظ معتقدة انه خالد لقت اسلام
اسلام : انا قلت كام مرة بلاش كلمة اوووف دي ؟
سارة : كتير … اسلام دكتور يحيي عايزني اروحله عشان مش هيقدر يجيي وانا مش عايزة انزل ..
اسلام :مش بمزاجك يلا البسي هوصلك ..
سارة : هو ليه مش بتسمعوا كلامي انا زهقت بقي … ومشيت تضرب برجلها علي الارض بغيظ ..
جهزت سارة ولبست بردو بنطلون اسود وبلوزة سوداء وطرحة سوداء …
خالد : مش كفاية علي الاسود عدي اكتر من 3 شهور ..
سارة : لا مش كفاية .. يلا بينا يا اسلام …
محمد وخرج من اوضته وبيلبس ساعته : استنوا هوصلكم بعربيتي بلاش مواصلات ..
اسلام : مش عايزين نتعبك ..
محمد : لا تعب ولا حاجة يلا ..
نزلوا الثلاثة ومحمد راح يجيب العربية واسلام وسارة واقفين قدام البيت مستنينه
,,,,,,,,,,,,,,,,,,,,,,,,,,,,,,,,,,,,,,
في نفس الشارع عربية سوداء بشابيك سوداء مش باين اي حد جواها ..
من داخل العربية ….شخص بيتكلم في التليفون …
الشخص: ايوة يا فندم .. واخيرا واقفة هي واخوها قدام الباب
ماجد : ماشي … النهاردة تكون عندي
.الشخص : حاضر يا فندم …
,,,,,,,,,,,,,,,,,,,,,,,,,,,,,,,,,,,,,,,,,,,,,,
جه محمد واسلام ركب جنب محمد وسارة رايحة تركب الباب مش راضي يفتح
محمد وفتح الشباك اللي عند باب سارة : سارة لفي اركبي الناحية الثانية الباب ده بيعلق …
لفت سارة وبتفتح الباب وفي اقل من لحظة جت العربية السوداء واتفتح بابها وسحبها حد جوه العربية وجريت العربية بسرعة جنونية وسارة صرخت صرخة شديدة اللي وقفت لما العربية مشيت…. محمد واسلام مش قادرين يستوعبوا اللي حصل … محمد بسرعة شديدة قفل الباب اللي وراه وشغل العربية وطلع يجري وراهم لقي عربية تانية سوداء بردو شبابيكها سوداء وبتمشي في نفس طريق العربية الاولي …
شخص في العربية الثانية بيتكلم في التليفون : ايوة يا سيف باشا … اخدوها في لحظة واحنا ماشيين وراهم اهو ومتابعينهم
سيف( من مكتبه ) : مش عايزهم يبعدوا عن عنيكم لحظة … ابعتوا لي مكانكم بالظبط دقايق وهكون معاكم … لو زاغوا منكم ناهيتكم علي ايدي
الشخص : حاضر يا فندم ….
,,,,,,,,,,,,,,,,,,,,,,,,,,,,,,,,,,,,,,,,
في عربية محمد … اتصل سيف علي اسلام
اسلام : ايوة يا سيف الحقني سارة اتخطفت تاني
سيف : اسلام حالا انت ومحمد خدوا بعضكم وروحوا البيت حالا وبدون مناقشة … انا عارف ومتابعينهم … يلا روح حالا
اسلام باستسلام : سيف ارجوك رجعهالي
سيف : ان شاء الله .. وقفل الخط
سيف بيقول لزميله (آسر): يلا بينا نلحق نوصل …
آسر: انت عارف لو سيادة اللواء عرف الخطة بتاعتك دي والله ليرفدك فيها … انا مش عارف انت ازاي جالك قلب تعمل كده …
سيف : كان لازم اعمل كده ….لازم اخد بثاري والنار اللي جوايا دي تهدي …
زميله : تضيع بنت زي دي عشان ثارك .. انت خلاص اتجننت يا سيف .. اكيد اتجننت
سيف وبيركب عربيته : يلا بس مش وقته الكلام ده …وطلع بعربيته بسرعة شديدة…عرف مكان سارة من رجالته وبقت مطاردة بين ثلاث عربيات (العربية الاولي اللي سارة فيها .. الثانية رجالة سيف … الثالثة سيف وآسر )
من داخل العربية الاولي ..
الشخص 1 : وبعدين بقي مش عارف ازوغ منهم اعمل ايه ؟
الشخص 2 : يبقي هنفذ الخطة الثانية … يلا …
شوية وفتحوا الباب ورموا سارة من الباب … ووقفوا سيف ورجالته لما شافوا سارة مرمية عالطريق … جري عليها سيف وبيشيلها من الارض : سارة انتي كو….. ايه ده مين دي ؟ اه يا ولاد ****؟
البنت اللي اترمت من العربية مكانتش سارة وبدأ سيف يضرب فيها بعنف : انطقي انتي مين ؟؟ وفين سارة ؟
آسر بيسحب البنت من ايده : بس يا سيف هي مش عارفه اصلا تتكلم … انطقي يا بت انتي مين ؟
لسه البنت هتتكلم فجأة وقعت والدم ملى جسمها وماتت ولاحظوا ان في طلقة جت في قلبها ومش عارفين مصدرها…. وقف سيف وبكل عصبية وبيضرب في عربيته بشده لدرجة ان ايده نزفت ….
آسر بمعاتبه : لتاني مرة ضيعت بسنت من ايدك يا سيف …
سيف بغضب : بس بس بس .. قسما بالله لتكون نهايتك علي ايدي يا ماجد الكلب …
توقعاتكم ايه ؟؟