تائهة بين دوائر الانتقام

الفصل الخامس عشر
سيف : كمال باشا استاذ احمد فعلا كان كاتب في وصية خاصة مع محاميه ان اولاده يبقي ابراهيم وصي عليهم لو حصله حاجة ودي انا شفتها بنفسي لما روحت للمحامي بتاع استاذ احمد عشان اعرف منه تفاصيل عن القضية ..
كمال بزعيق : يعني ايه ؟؟ ازاي احمد يعمل كده ؟ هو احنا روحنا فين ؟
ابراهيم بهدوء : استاذ كمال مفيش داعي للعصبية احنا اهلهم بردو … انا اسف مضطر انفذ وصية اخويا عن اذنك …
مشي ابراهيم وخالد عشان ياخدوا اسلام وسارة ومحمود يعيشوا معاهم
خرج اسلام مع خالد وهو علي كرسي عشان رجله المكسورة ووقتها ابراهيم كان مع محمود في اوضته
ابراهيم : يا بني اسمعني هم خلاص هيقعدوا معايا ومش ده موضوع نقاشنا . اللي بتكلم فيه انك تيجي تقعد معانا فترة عشان سارة تتعود علي وجودك بعد الفترة دي ارجع بيتك .. وبعدين انت مش هتهاجر وتسيب اهلك ده اللي بينا عمارتين
محمود : بس يا عمي انا كده هتقل عليكم وبعدين انا مش ابن اخوك حضرتك مش ملزم بيا ..
ابراهيم : احمد كان معتبرك زي ابنه وانا ملزم بيكم كلكم … ده غير ان الحاج حسين مش هيعارض وجودك جنب اخواتك ولا ايه يا حاج حسين ؟
حسين : لا طبعا ..ابراهيم عنده حق يا بني اختكم محتجاكم وخاصة انت , اسلام لسه صغير بردو خليك معاهم واحنا بينا خطوتين
محمود باستسلام : حاضر يلا بينا
وخرج محمود مع ابراهيم لبيته
في اوضة سارة كان وضعها كالمغيبة لا اسمع لا اري لا اتكلم
خلصت امينة لبست سارة هدومها وجمعت حاجتها وجه ابراهيم اخدها وهي ماشية معاه زي التايهة
وصلوا البيت عند ابراهيم ومعاهم كمال وامينة
سهير : اهلا وسهلا نورتونا وشرفتونا
( سهير زوجة ابراهيم في اوائل الخمسينيات بس مهتمة بنفسها جدا عندها شركتها الخاصة بس هي متواضعه جدا وروحها جميلة )
امينة : اهلا بيكي يا بنتي
سهير بحزن : البقاء لله شدي حيلك
امينة : ونعم بالله ..
اخدت سهير سارة من ايديها وقالت لها بحنية : اهلا بيكي يا حبيبتي نورتينا . بس ايه الحلاوة دي انتي زي القمر ما شاء الله .. تعالي اما ادخلك اوضتك
مشيت معاها سارة وهي لسه بنفس حالتها … ساعد خالد اسلام ودخلوا اوضة خالد اللي كانت عبارة عن سريرين صغيرين ودولابين ومكتب
خالد بابتسامة : نورتيني يا برنس دي اوضتي المتواضعة هنقعد سوا فيها
اسلام بشبه ابتسامة : شكرا
خالد بهزار : لا فك كده ده احنا اصحاب وجيران وطلعنا ولاد عم وهنعيش في بيت واحد وفي الاخر شكرا بس
اسلام : المفترض اعمل ايه ؟
خالد بضحك : تقدم فروض الولاء والطاعه طبعا
اسلام وبيرفع حاجبه : يابني انت بتستغل كسر رجلي انت نسيت اني كنت بخليك تجري الشارع كله تهرب مني
خالد : لالالا سوري انا اسف تعالي اساعدك تنام علي السرير
(خالد اصغر من اسلام بسنة ضحوك بيحب يهزر كتير بتاع بنات و فاشل تعليميا طويل ورفيع وواخد باله من نفسه اوي )
استاذن كمال وامينة ومشيوا وابراهيم اخد محمود اوضة واحده من بناته اللي مش موجودين وقاله : دي اوضتك من النهارده واتمني انها تبقي علطول
محمود بابتسامة جانبية : متشكر
ابراهيم : هروح اشوف سهير حضرت الغدا ولا لسه .. ارتاح شوية . عن اذنك
دخل ابراهيم لسهير وبصوت منخفض : سهير محمد فين ؟
سهير : عند عمه فوق ليه ؟
ابراهيم بحدة : هو ايه اللي ليه يعني ولاد عمه جايين وهو مش موجود دي قلة ذوق
( ابراهيم واخواته عايشين في بيت واحد كل اخ او اخت ليه دور منفصل )
سهير : قاعد مع المحروسة شوية لما اخلص الغدا هرن عليه
ابراهيم : لا انا طالع له
طلع ابراهيم عند اخوه شاكر خبط علي الباب وفتحت له بنت شاكر شهد
شهد : ازيك يا عمو ..
ابراهيم : ازيك يا شوشو .. بابا موجود ؟
شهد : اه يا عمو اتفضل
(شهد بنت شاكر الكبيرة عندها 13 سنة بنت عادية بس محمد ابن ابراهيم بيحبها جدا وهم في حكم المخطوبين )
شاكر : هيما ازيك يا حبيبي … تعالي اتفضل
ابراهيم : الحمدلله بخير ..
بيبص ابراهيم لمحمد بحده وساله : ممكن افهم انت مانزلتش تستقبل ولاد عمك ليه ؟
محمد بعدم اهتمام : ممكن عشان رافض وجودهم مثلا ؟!!
شاكر بجدية : علي فكرة يا ابراهيم محدش من اخواتك موافق علي وجودهم وسطنا انت بتتحدانا كلنا يعني
ابراهيم بانفعال : هترموا ولاد اخوكم في الشارع انتوا جايبين القسوة دي منين ؟؟ انتوا بتعيدوا الكلام ده تاني ؟؟
شاكر بهدوء :لا تاني ولا تالت .. اهدي بس احنا مش هنرميهم هيقعدوا في شقتهم بتاعت احمد ومعاش ابوهم واحنا هنجمع لهم مبلغ كل اول شهر ويعيشوا منه واهم معانا في نفس الشارع هنقدر نتابعهم … لكن تجيب لنا جلابة المصايب دي هنا لحد البيت اهو ده اللي لا ممكن يحصل ابدا
ابراهيم وقف وبانفعال شديد : اولا بقي سارة مش جلابة مصايب ومش هسمح تقول عليها كده
ثانيا بقي انا قاعد في بيتي واولاد احمد معايا واللي مش عاجبه يخبط راسه في الحيط ومش هسيبهم وده اخر كلام عندي وياريت تبلغ اخواتك … يلا يا محمد قوم معايا
محمد بضيق : حاضر
في بيت ابراهيم …
دخلت سارة اوضتها ونامت وراحت في النوم
تاني يوم صحيت سارة علي صوت قران عالي اوي قامت تدور علي مصدر بصت من الشباك وفجاة لقت ……
استنوني الفصل القادم
error: