روايه قوة انثي

قوة_انثى الحلقه9

التاكسي:توا وين؟
يقين:طرابلس?
التاكسي:بس الاجره تكلف ره
يقين:لا عادي تاخد حقك
التاكسي :تماام

وائل:وين الكلبه هادي عطلت مجتش
وفاء:اتصل بي راجلها
وائل:تي معادش عندي وجه نقابله بي عملت اختي كيف تطلق بس وهيا عارف المنطقه هادي معندهاش بنات يطلقو والله غير توصل رح تشوف كيف نعيشها في جحيم
وفاء:في سرها…اي والله خلي تجي تعبت من الطبخ وشغل الحوش

محمد:تي اهدا ياراجل
ياسين:معقوله انا تجيني فرخه زي هادي ادير فياااا هكي وحده كلبه وزباله
محمد:زعما اديرها وتفضحك
ياسين:اففف النماذج هاذي توقع منهم اي شي

✨روايات بنووتة الشيخ✨

امنه:عموري
عمر:نعم
امنه:خيرك ليك فتره نشوف فيك مش تمام شنو صاير معاك
عمر:تنهد….اااااه يا امي ضلمت انسان وانشاء الله يسامحني
امنه:منو وليدي احكيلي
عمر:ياريت والله …المهم انا نايض بنرقد تبي شي
امنه:العصر بيذن علاش بترقد؟
عمر:تاعب من التمرين
امنه:به تريح سلم ولدي

ترن ترن ترن
فجريه:الوو
شريفه:استاذه فجريه؟
فجريه:اي منو
شريفه؛انا ام ياسين نبي نخبرك فايز راجلي وافق علي طلبك رح تجي تاخذي الفلوس مقابل انك تربي الولد عندك او اطيحي الجنين ميهمنيش المهم تباعدو من علينا
فجريه:موافقه
شريفه:خليني نحدد ميعاد ونكلمك
فجريه:تمام

يقين:وصلت طرابلس مع المغرب وانا مش مصدقه روحي حطني التاكسي قدام الفندق وجي عامل اخذ شنطتي وانا وقفت قدام الريسبشن

الموضف:اهلين فيك
يقين:اهلين…ياربي شنو بنقوله
الموضف:تفضلي اختي
يقين:ن ن نبي غرفه
الموضف:جوزيه ولا فرديه ؟
يقين:فرديه ..نبيها افخم غرفه عندكم
الموضف:اوكي معناها في الجناح الملكي …ممكن بطاقتك الشخصيه وجواز سفرك؟
يقين:حمدت ربي الف مره اني جبت معاي اوراقي كلها…تفضل
الموضف:قغد يكتب وردها الاوراق…تفضلي مفتاح غرفتك خلي العامل يوصلك ويجيبلك شناطيك
يقين:تسلم اااا مم م مكن سؤال
الموضف:تفضلي
يقين:تتعاملو مع تكاسي؟
الموضف:اي لو تبي تاكسي في اي وقت خبريني
يقين:اوكي نبي واحد بكرا مع الساعه 1الضهر
الموضف :حااضر
يقين:شكرااا…وطلعت مع العامل وانا مش مصدقه رووحي بنطير من الفرح خشيت لي الدار وصكرت الباب وقعدت ننقز ع السرير زي الهبله من الفرح الدار كانت خياااااال وفي فواكه وشكلاطه وكل شي حلووو والاثاث يجلط قعمزت نتفرج علي الحوايج والحجات يلي شريتهم والتالفون يلي مش مصدقه انه عندي عمري محصلت حتا بيله وتوا شاده في يدي ايفون ??المهم طلعت بيجامه خفيفه وحوايج داخليه وخشيت دوشت بي اميه سخووونه وطلعت قعمزت نجفف في شعري

ترن ترن ترن
يقين:رديت علي تالفون الغرفه …الوو
الموضف:اهلين انسه يقين
يقين:هلا بيك
الموضف:حضرتك نحبي تتعشي لوطه او في غرفتك
يقين:ااء م في غرفتي يكون احسن
الموضف:تمام …وصكر

يقين:قعدت نضحك ع روحي منسحابش حتا العشي منهم هههههه شويه وطق الباب خش العامل وكان العشي مكرونة الباشاميل وبوريكات تركيا ومشروب عبيت بطني ونقول هكي نضربها نومه

✨روايات بنووتة الشيخ✨

وائل:تي كيف همي تخليها تطلع في تاكسي وين البنت???
معتز:اقلب وجهك انا لاعاد نبي نشوف اختك ولا نسمع سيرتها عيله زباله …طووط طووط
وفاء:غير هدي بالك
وائل:الساعه12ومجتش وين مشت بسسس

ثاني يوم:-
يقين:فتحت عيوني بكل فرح?غسلت وجهي وصليت ولبست سروال جينز ازرق وبلوزه بيضه مع وشاح وردي وسبيدرو وردي ونزلت لي مطعم الفندق
الجرسون:صباح الخير
يقين:صباح النور
الجرسون:تفضلي
يقين:مدلي كتاب وانا مش فاهمه شي?لين قريت كلمة القائمه وقعدت نشوف في وجبات الفطور….لالا مشكور بس جيبلي بريوش وعصير برتقال
الجرسون:حاضر
يقين:فطرت وكملت وقعدت مقعمزه نتصفح في تالفوني نبي نتعود عليه لين جت الساعه 1

يقين:لو سمحت التاكسي جاهز؟
الموضف:في انتضار حضرتك
يقين:تسلم …وطلعت

التاكسي:وين استاذه
يقين:نبي اقرب مركز تجميل في الجها هادي
التاكسي:تمام
يقين:نزلت للمزين نضفت وجهي وحواجبي ودرت دوره ع روحي كلي وبعدها مشيت محلات الذهب بعته كله جابلي 30الف (لان الذهب وقتها غالي وفي منطقتنا الراجل ضروري يدير هلبا ذهب للمرا يعني زوز تواكم و6حدايد و5خواتم تقال وهكي )روحت بي الفلوس في شنطة كتف وانا خايفه بنموت عليهم خطمت ع المحلات زدت شريت حوايج وحجات تنضيف عاد اختكم جمل وطاح في باسطي??ورجعت للفندق

فجريه:اهو جيتكم
فايز:تفضلي هادا الشيك زي مطلبتي
فجريه:خدت الشيك
فايز:لاكن مزال نشوف وجهك وعزة الله رح تشوفي شي عمرك مشفتيه
فجريه:به…وطلعت

عمر:مقعمز في قهوا
ياسين:جبد كرسي وقعمز جنبه
عمر:ناض بس شده ياسين
ياسين:غير قعمز يا راجل خلي نهدرزو كلمتين
عمر:اي نحي يدك …وانبح شنو تبي
ياسين:خلاص عمر علاش مكبر القصه انت البنت قاعده برا لوح عليها شوي فلوس ادير بيهم عمليه وتمت
عمر:مستحيل ننسا كيف ضحكت عليا ياتافه وكيف ابتزيتني والبنت تزوجت وربي سترعليها وبعد من قدامي احسن ما نفسدلك وجهك
ياسين:تزوجت???
عمر:دف ياسين وطلع
ياسين:قعمز من الصدمه …هاذي كيف تتزوج الحمااااره اففففف ضاعت عليا الززح

✨روايات بنووتة الشيخ✨

يقين:رجعت للفندق وقعدت نفكر به ثاني خطوه في حياتي شنو رح تكوون؟؟!نقعد في طرابلس ؟مرات خوتي يلقوني وانا مستحيل نعيش حياة الذل والمعاناة مره تانيه …قعمز علي الكنبه وفتحت تالفوني حاولت ندير ايميل علي الفيسبوك ومشت اموري قعدت لا الليل وانا نخش ونطلع فيه لين تعلمته وفهمته مشت اموري تمام نضت صليت العشي ودعيت ربي يثبتني علي قوتي هاذي ونقدر نكمل حياتي ع الاقل بشوية كرامه بس لبست ونزلت نتعشا ونبي نتفرج علي الناس …

عاصم:جديات بتسافر مع بوي؟
عمر:اي المانيا قال
عاصم:وامي منو بيقعد معاها
عمر:وانت شنو قاعد ادير ياقلب الماما
عاصم:الزفت خليني نمشي انا
عمر:اقعد المره هادي ورح نديرو سفره مع بعض مره تانيه
عاصم:??

ترن ترن ترن
عمر:الوو
ولاء:حبيبي شنو جو
عمر:تمام ياقلبي انتي شن حالك وكيف امك توا
ولاء:بخير تسلم عليك
عمر:الله يسلمها
ولاء:شنو خلاص صار منها سفرة المانيا
عمر:اي حبي صار
ولاء:به كويس?عندي كم محل غادي تو نديرلك تاق عليهم ع الانستا نوصيك ع حجات جيبهم
عمر:به ?انا توا بنصكر بنهدرز مع بوي شويه
ولاء:اوكي تمام
عمر:سلام….مرات نحس في ولاء ماديه وميهما شي غير الفلوس يعني كان وحده تانيه راهو وصاني دير بالي ع روحي قتلي رح نستاحشك بس شي شي

يقين:لو سمحت
الموضف:تفضلي
يقين:سامحني كترت عليك طلبات اليوم?
الموضف:هههههه ولا يهمك تؤمري
يقين:نبيك تحجزلي طياره تقدر؟
الموضف:اي اكيد علي وين تونس؟
يقين:لا الاردن?
الموضف:خليك لحضات….وقعد يتكلم في التالفون
يقين؛ربي يستر اول مره نسافر بروحي يااااا ب قويني بس
الموضف:فيه رحلتين وحده بكرا الساعه10والثانيه السبت الجاي
يقين:احجزلي تبع بكر
الموضف:بي اسم منو؟
يقين:يقين الهاشمي
الموضف:تمام

يقين:ركبت لي غرفتي نوتي في الشناطي وحجاتي يلي رح نرفعهم نبي نبدا حياة جديده وننسا كل شي عشته هنايا بعدها سرحت بي تفكيري …لو انا تراجعت بي جوازي من معتز وتجوزت الولد يلي قاعده منعرفش اسمه ..ياترا كيف رح تكون حياتي؟؟!تمنيت نتلاقا معاه مره تانيه نحكيله شن صار معاي بس الله غالب

ثاني يوم:-
يقين:مايضه ناشطه من الساعه 9فطرت ولبست سروال اسود مع بلوزه بيج ووشاح بيج فيه ورد اسود وسبيدرو بيج وشنطه بيضه ونزلت دفعت حق الاقامه وهووووب ع المطار …طبعا تأكدت من الاوراق متعي الف مره شهادة ميلاد بطاقه شخصيه جواز سفر وشهادتي تبع اللوغات

امنه:تمشو وتجو بسلامه متعطلوش
عمر:انشاء الله ياغاليه ديري بالك علي امك يا عاصم
عاصم:به?
حميد :يالله تركناكم بخير
امنه:ربي معاكم اول متوصلو كلموني
حميد:انشاء الله

✨روايات بنووتة الشيخ✨

فجريه:طبعا مش عارفه وين تحط فرحتها بي الفلوس ودعاء اكتر واكتر

في المطار:
عمر:مقعمز في صالة الانتضار
يقين:مقعمزه ومش فاهما راسي من رجليا بس دفعت وعطوني تذكره وقعمزت مديت وجهي
لمار:انتي ع وين طيارتك
يقين:الاردن
لمار:اهااا وانا كمان انتي اردنيه
يقين:لا ليبيه
لمار:ليش رايحه الردن شغل؟
يقين:اي اي
لمار:الله يوفقك
يقين:شكرا بس عندي طلب
لمار:تفضلي
يقين:انا اول مره نسافر بروحي لو تساعدني وتقولي امتا نركبو الطياره وكيف نتعامل ؟
لمار:اوكي انتي بس خليك معي وانا بفرجيك
يقين:شكرااا
لمار:ولوو

عمر:سرحت شويه وقعدت نتكلم مع روحي ….الشي يلي نحس بيه توا تأنيب ضمير؟بس هيا تزوجت وامورها تمام ؟معقوله تفكيري فيها هادا كله لاني غلطت فيها بس؟؟!!افففف راسي بيتفجر
حميد:عمر عمر
عمر:نعم
حميد:تي وينك ساعه نحكي معاك
عمر:سرحت شوي
حميد:شكلها الطياره مطوله نوض جيبلي قهوه
عمر:اوكي …وناض

لمار:يلا عاد النداء الاول لي الطياره تعالي معاي
يقين:تمام….وناضو

عمر:واقف يستنا في القهوا وفجأه يلمح يقين من بعيد….يتبع