رواية نصف البدر بقلم / د. إيلاف أحمد
بقلم / د. إيلاف أحمد
الفصـل الخامس
بدر؟…. إزيك يا براءة…. بدور الليلة ما جات…. أنا أصلا جايي عشانك ما عشان بدور، براءة رفعت حاجبها مستغربة…. وجايي عشاني لشنو…. طيب أركبي معاي وانا ح أوريك….. معليش ما بركب مع زول غريب وقبلت وشها عايزة تمشي…. أنا عايزك في موضوع يخص بدور، براءةطوالي ختت في بالها إنه ح يتقدم لبدور وعايز مساعدتها قبلت تاني عاينت ليه…. موضوع شنو ده…. قلت ليك أركبي معاي وانا ح اكلمك، في النهاية أخيرا وافقت وركبت معاهبدور ومخضرم في اللحظة دي اخر ونسة في المواصلات، بدور زهجت خلاص عايزة تصل ومخضرم الدنيا ما سايعاه من الفرحة والضحكة دي ما فارقت وشه ولا عارف يمشي وين ولا عاين ناحية الطريق حتى ،عرف أي حاجة عن بدور حكت ليه عن أمها وابوها واخوها وساكنة وين حتى المدرسة قرت وين والونسة كملت والكلام خلص…. معقولة نكون لسة ما وصلنا…. أصبري انا قلت ليك المكان بعييد، بعد شوية عاين ناحية الشباك وبقى يتلفت يمين وشمال…. ااااخ انا اظني فته المحطة…. اها وبعديين… والله بصراحة يا بدور أنا ما متذكر المكان بالضبط وين انا طولت ما جيت الحتات دي….. طيب والحل؟…. الحل إنه نرجع البيت ولمن اسأل أخوي واعرف المكان كويس تاني نجي…. يعني وديتني مشوار قدر ده على الفاضي الليلة ما حنرجع الا نصل المكان واسي تتصل لأخوك يوصف ليك
أحمد بهناك يادوب طلع من العملية والدكتور بشر محمد بإنها نجحت مية في المية وبالاستمرار بالادوية والعلاج الطبيعي ان شاء الله حيتحسن ويرجع أحسن من الأول، محمد لمن سمع الخبر نزلت منه دموع الفرح وفضل يشكر ربنا ويحمده وجرى على صحبو يتطمن عليه… أحمد ياداب البنج فك منو وفتح عيونه يتأمل في الغرفة ولقى محمد قاعد جمبو ماسك يده…. ألف حمد لله على سلامتك حبيبي الدكتور طمني عليك وقال العملية نجحت وحتتحسن ان شاء الله، أحمد أخد نفس عمييق وابتسم ابتسامة بسيطة كدة وتاني رجع نام
نرجع لي مخضرم الحس إنه بدور اكتشفت كذبو وختتو قدام الأمر الواقع، بدور مفتحة شديدة وما وقع ليها حنك مخضرم إنه نسى المكان عشان كدة طلبت منو يتصل قدامها لأخوهو يوصف ليه، بس مخضرم برضو ما هين غير بسرعة اسم رقم تلفونو القديم واتصل فيه وطبعا حيجي مقفول، حتى إنه أدى التلفون لي بدور عشان تحاول وبرضو لقتو مقفول، بعد ما حاولوا واستنوا كتيير من غير فايدة….اها اقتنعتي؟؟…. أيوة خلاص…. انا اسف عشان اخدتك المشوار ده كلو من غير فايدة بس ح اصلح غلطي وأوصلك لحدي البيت… لا ما بيحتاج أنا بعرف طريقي للبيت…. المغرب قرب يأذن والواطة حتضلم ما ح اخليك ترجعي براك
بدر في الوقت ده أخد براءةعلى كفتيريا قريب داخليتها عشان ياخد راحته في الكلام ….. اها ما قلت لي شنو الموضوع البخص بدور….. أنا بصراحة بتشكر بدور من كل قلبي عشان عرفتني على زولة زيك…. برضو ما فاهمة الموضوع شنوو؟!…… الموضوع إني أعجبت بيك شديد من أول مرة شفتك فيها وعايزك على سنة الله ورسوله رايك شنوو؟؟
براءةفتحت عيونها كبااار ما مصدقة الكلام البتقال قدامها …. انت عارف انت بتقول في شنو …. ايوة يا براءةانا بكامل قواي العقلية وجااادي عايزك انتي اديني اشارة بس …. طيب وبدور ؟ …. بدور مين والناس نايمين انا الزي بدور ما بنفعوا معاي انا عايز وحدة تصوني وتحفظ بيتي وتربي اولادي احسن تربية واكيد ما ح القى أحسن منك …. والله انت زول مافيك عيب بس معليش يا بدر بدور صحبتي وما بقدر اخونها …. تخونيها كيف يعني انا عايزك على سنة الله ورسوله ما عملت حاجة غلط …. لا ما كدة بسسس….بس شنو قولي ….. بصراحة كدة بدور خاتة عينها عليك وبتتمناك من السماء وبتتمنى اليوم اللي تتقدم ليها فيه وأنا ما بقدر أطعنها في ظهرها وأوافق عليك كدة أنا ح أخسرها ….هههههه بدور دي وحدة خفيفة وكان ولد سلم عليها ساي حتخت عينها عليه ….. أنا ما بسمح ليك تغلط في صحبتي أكتر من كدة ، قامت و شالت شنطتها عايزة تمشي مسكها من يدها …. عموما انا اسف يا ستي وح اديك وقت تفكري فيه بس خليني اوصلك على الأقل…. ما دام الأسف وما عايزة أفكر اعتبر الموضوع منتهي من اللحظة دي و ما عايزاك توصلني أنا بعرف طريق البيت براي.
يلا مخضرم وبدور ركبوا المواصلات راجعين على البيت وفي طريق الرجعة مخضرم قرر يتشجع ويصارح بدور بمشاعره…. يا بدور أنا عايز أعترف ليك بحاجة…. حاجة شنو كمان…. أنا بصراحة لا بعرف بدر بتاعك ده ولا شي أنا حتى ما عندي اخو من اساسو وانا عملت الفيلم ده كلو عشان اقدر اقعد واتكلم معاك…. نعم؟ إنت بتكذب لو ما عايز توديني مكان شغله تاني اديني العنوان وانا بمشي براي…. لا والله ما بكذب ودي الحقيقة وحكى ليها كيف عرف اسم بدر ومكان شغله….. أيواا كنت بتشتغلني يعني وريني استفدت شنو اسي….استفدت شنو؟ أنا عمري ما كنت مبسوط زي يوم الليلة ده…. قصدك شنو؟…. قصدي إنه إنت البترسمي الضحكة على وشي، كل يوم بنتظر الصباح بفارغ الصبر عشان المح عيونك الحلوين وابتسامتك الساحرة، صدقيني لمن أشوفك بحس قلبي نط من مكانو وصدري انشرح، بحس إنه الفرحة ما سايعاني وإنه الزمن وقف عند اللحظة دي، مخضرم فاتح قلبه وبعبر عن الجواه وبدور مستغربة بتعاين ليه وكلامه ما هز فيها شعرة وحدة، هو يتكلم ويتكلم وهي بس ساكتة ما قالت ولا كلمة….. انت ما ناوية تقولي حاجة… حاجة زي شنو…. ردي على كلامي ده مثلا…. أسمعني هنا أنا زولة مرتبطة وبالصريح الواضح كدة ما عندي ليك أي شي عشان كده وفر وقتك وشوف غيري أحسن ليك، وطوالي طقطقت للكمساري ونزلت كملت طريقها براها، مخضرم قاعد في حتته مجروح من كلام بدور مع إنه كان متوقع ردة فعلها دي بس لسة عند وعدو لي نفسو إنه ح يغيرها وتبقى من نصيبو.
واحمد بهناك طوالي باشر بالعلاج الطبيعي والأدوية الوصفها ليه الدكتور، ومع إنه التمارين كانت قاسية جدا عليه وكان بتألم ألم شديد بس عزيمته وإصراره بتديه قوة وطاقة عشان يقدر يواصل علاجه، كان حتى لمن يرجع البيت يتمرن براه يحاول يقيف وقبل ما يستعدل يقع وتاني يقيف ويقع، طول الليل بكون محمد نايم وهو بتمرن من غير تعب أو ملل، ويوم بعد يوم كان بتحسن أكتر من اللي قبله
نرجع لي براءةالعرفت بدر على حقيقته وكلامه عن بدور نرفزها وزعلها شديد ، طوالي قامت وشالت شنطتها من غير ما تلتفت ولا تسمع أي كلمة تانية، حتى إنها ما انتبهت لي موبايلها النستو في الطربيزة ومشت
بدور طبعا أول ما وصلت البيت جري طلعت تلفونها و رمت شنطتها وطوالي اتصلت على براءةعشان تحكي ليها الشمار، بدر بهناك سرحان يفكر يعمل شنو عشان يقنع براءةوفجأة يسمع نغمة التلفون ، عرف إنه دي براءةنست تلفونها و من غير ما يلاحظ للاسم طوالي فتح الخط… ألو
بدر كان متخيل إنه براءةالاتصلت على تلفونها تسأل منو وطبعا مع ضوء الشمس والشاشة بتكون مضلمة رد من غير ما يلاحظ للاسم …ألو…. أهليين برويتي كيفك …. معليش براءةما موجودة منو معاي …. أنا بدور إنت منو ، بدر طوالي قفل الخط وبدور قالت الصوت ده أنا بعرفو ما غريب علي ده منو يا ربي ، حاولت مرتين تلاتة ترجع تاني بس بدر ما رد ، في النهاية قالت الصباح بسألها وبحكي ليها الشمار
براءةبعد وصلت الداخلية اكتشفت انه تلفونها مافيش وطبعا اتصلت فيه من تلفون زميلتها ، التلفون ضرب تاني وبدر بهناك شافو رقم غريب قال يمكن دي بدور اتصلت من رقم تاني ورفض يرد، يلا براءةبتحاول وتحاول في النهاية قنعت وقالت يكون وقع ولا اتسرق
الصباح طبعا كالعادة إتقابلوا في الموقف وبقوا يتشمشروا في المواصلات وبدور حكت لي براءةكل الكلام القالوا ليها مخضرم وإنه المشوار طلع فشنك ومخضرم عمل كده عشان يقدر يتكلم معاها وهي بتتكلم دخلت يدها في الشنطة عشان تدفع قروش المواصلات ،لقت ورقة مطبقة ولمن فتحتها لقت مكتوب فيها بالخط العريض (بحبك يا بدور ) وتحته بخط صغير ( مخضرم ) ….. هههههه عليك الله شوفي الزول الفارغ ده قال بحبك قال حباك برص ان شاء الله….حرام عليك يا بدور طيب ما تديه فرصة يمكن يكون بحبك بالجد …. فرصة شنو يا بت أنا اللي الأولاد كلهم بتمنوا رضاي في النهاية أحب لي واحد اسمو مخضرم جنيت ولا شنو…. صدقيني الشكل والاسم ما كل حاجة وأهم حاجة الأخلاق ولو بحبك من قلبو أكيد حيسعدك و حتكوني أسعد وحدة…. يا بت ما تسمعي الكلام الفارغ ده الشكل والوجاهة أهم شي في سعادة أكتر من لمن تصبحي وتمسي على القمر، الناس بشوفوا القمر بالليل بس وانت من الصباح بتشوفيه تصبحي على بياضه وتمسي على سكسوكته ويبهرك طوله وارتفاعه وعرضه ياخ الوجاهة دي معنوياتك ساااي بتكون مرتفعة….. ههههه براحة براحة علينا بتوصفي في بدر ولا شنو، بدور أخدت نفس عميييق وختتو….هو في زي بدر ولا سماحة بدر غايتو ما غلط السماو بدر، ده بدوور مش بدر واحد، لكن انت ما قلتي لي جادعة تلفونك وين امبارح اتصلت عليك رد لي راجل وقفل الخط ضربت تاني مافي زول رد
براءةفي اللحظة دي سرحت بعيييد واتذكرت إنه بدور مخدوعة في الزول ده وإنه ما عنده ليها شي وبستغلها بس عشان يصل ليها هي و بقت تسأل نفسها يا ربي أكلمها ولا لا؟…. يا بت سرحتي وين…. ها؟ لا ما سرحت بسمع فيك، تلفوني امبارح اتسرق مني وشكلو الرد عليك ده الراجل اللم فيه…… ههههه غايتو انتي مبالغة يعني افكك يوم واحد ترجعي براك يقوموا يسرقوا تلفونك يا زولة كفارة بتعوض….. ان شاء الله بس إنت يا بدور إتأكدتي من مشاعر الزول ده تجاهك؟ …. يا بت قولي بسم الله مش إنت القلتي لي امبارح شكلو مكسر فيك من لمن وداك ورجعك وجاك البيت……. اي لكن برضو ده ما اثبات ولازم يصارحك عديل وبصراحة كدة إنتي صحبتي وبخاف عليك والزول ده انا ما ارتحت ليه بحسو غامض كدة عشان كده انا شايفة انك احسن تتجنبيه بقدر الإمكان …… ده كلام شنو يا بت اليسمعك امبارح ما يسمعك الليلة زي ما قلتي امبارح اكيد ما حيقدر يصبر وحيصارحني ويتقدم لي في أقرب وقت بعدين أتجنبو كيف أنا ما صدقت لميت فيه ويا هو يا بلاش، براءةعارفة إنه بدور عنيدة شديد ومافي فايدة في الكلام معاها وقررت إنها تسكت وتشوف نهايتها أحسن من تكلما وتفهما غلط وتحصل مشكلة
وصلوا الجامعة وبدور لاحظت إنه مخضرم ما جا الليلة الجامعة على غير عادتو مع إنه زول مجتهد شديد وما بغيب أبدا، بس مخضرم بهناك عامل مفاجأة لي بدور
يلا بعد اليوم انتهى ومحاضراتهم خلصت طلعوا وكل زول رجع على بيتو، وبراءةاول ما رجعت الداخلية لقت بدر مستنيها جمب الباب
نمشي لي أحمد المواصل في تمارينه وفي العلاج الطبيعي والأدوية وكلو إصرار وعزيمة إنه حيتحسن ويرجع زي مكان، ومحمد أصلو ما مقصر معاه دايما واقف معاه بساعده وبدعمه وبدعي ليه، يلا محمد الليلة طلع زي كل يوم يجيب الفطور عشان يفطروا هو وصحبو وأول ما جا داخل لقى أحمد قايم من كرسيه المتحرك وواقف على رجلينه
شنو حيكون شعور محمد وردة فعله؟ وحيحصل شنو تاني بين بدر وبراءةوبدور حتكتشفهم ولا لا؟؟ وشنو المفاجأة المحضرها مخضرم لي بدور؟؟
إلي اللقاء ..