رواية حب من طرف واحد

(حقيقيه)✔?

الحلقه(2)

بسمه:محسيتش بروحي كيف نضت وانا مستنده ع الحيط وطلعت من المربوعه وتيم ينادي فيااا بس مش قادره نرد عليه مش قادره نشوفله كملت مشي لين وصلت الصاله ونشوف عماتي وصغارهم كل واحد يحدف في كلمه ..شنو يبي منك العريس…مستعجل هههههه الله الله ع الحب ….نسمع فيهم وانا حاسه الدنيا ادور بيا ادور ادور ومعش نعلم بشي

سلسبيل:بسمممممه??
سميره:وووه عليا بنيتي …وناضو العيله كلها يحالو يفيقوها ويلي تجيب اميه ويلي تجيب صنه بس بدوون اي فايده

سلسبيل:ادهمممم يا ادهمممم يا ادمم اي حد ردو عليااااا وينكم
ادم:خيرك تعيطي زي البقره
سلسبيل:بسرعه ولع السياره بسمه داخت ومناضتش
ادم:خيرها سومه??
سلسبيل:بسررعه قتلك

ادهم:اخد مفاتيح السياره وطلع بسرعه تلاقه مع تيم برا يهدرز في التالفون

تيم:وين طالع؟
ادم:خليك مع العيله انا رافع بسمه المستشفى
تيم:خيرها؟!
ادم:قالو داخت ومعادش ناضت
تيم:بب به دير بالك ?
ادم:انشاء الله

ع الخط_________
نهى:منو دايخ؟
تيم:بسمه
نهى:وشن عرفني بسمه منو هادي؟!
تيم:يلي كنا نهدرزو عليها قبل شوي
نهى:اهاا الف سلامه عليها حبيبي
تيم:خلاص توا صكري بنخش مع الرجاله انا
نهى:دير بالك ع روحك
تيم:انشاء الله

سلسبيل:لبست عبايه لي بسمه وطلعوها من وراء الحوش بيدون ميعلم مصطفى(عمها)لان لو عرف بسمه صار فيها شي مش معروف شنو ممكن يصيرله المهم مشت مع بسمه سلسبيل واختها بيلسان وباقي العيله قعدو في الحوش وطبعا زي ماقلنا الحوش زحمممه وعزومه كبيره بمناسبة تخرج تيم

✨روايات بنووتة الشيخ✨

تيم:خش للمربوعه وقعمز مع الرجاله يساير فيهم وهوا يفكر ويلوم في روحه انه كان السبب

ادم:خاااايف عليها بيموت طول الطريق لان ادم وادهم عندهم بسمه بدنيا كلها هيا يلي تفهم فيهم وتهدرز معاهم وضملهم في اسرارهم وفلوسهم وكل شي

في المستشفى:-

دخلو بسمه لي الطورائ ع طول كشف عليها الدكتور وعلقولها التغديه

ادم:شنو صار شنو فيها
الدكتور:مفيش حاجه خطيره انهيار عصبي بس الحمد الله ع الخفيف عطيناها مهدئ تكمل كيسة التغذيه وتقدرو تروحو بيها
ادم:بارك الله فيك
سلسبيل:نقدر نشوفها
الدكتور:اها تقدري

سلسبيل:خشت لي بسمه وكانت بسمه فاتحه عيونها
بيلسان:بسومه خيرك
بسمه:حضنت اختها ولاول مره تبكي بشكل هادا …تعرفو الخيبه؟كسرة الخاطر لما تجيك من انسان تحبه ومتقدرش تكرها لما تبكي تبكي تبكي من قللللللبك ودموعك تحسهم سخااااان لدرجة يحرقو في وجهك لما تبدي تبكي بشكل مش طبيعي والكل يسأل علاش خيرها شنو فيها وانتي تبي تقولي شن يوجع فيك بس مش قادره توصليلهم كمية الوجع يلي تحسي بيه ؟؟هكي صار معاي انا نبكي ونعيططططططططط وبيلسان تحضن فيا وسلسبيل حاطه يديها ع وجها وخايفه علي بسمه مش عارفه كيف تتصرف وادم سمع عياط بسمه جاها يجري وقعد زي المهبول يحضن فيها ويسأل فيها خيرك خيرك خيرك؟بس مفيش جواب بكت وعيطت لدرجة جو الدكاتره بسرعه يسحابو صايرلها شي بس ع قد مكشفو عليها مشافوش اي حاجه غلط في جسمها اكيد لان جرح القلب مينشافش تحسه بس?قعدت نبكي لين فرغت يلي في قلبي كللللله وهديت قعدت زي المسطوله فاشله وبس ومش قادره حتا نتكلم

✨روايات بنووتة الشيخ✨

سلسبيل:هيا سومه نروحو
بسمه:عيونها ذاااابله من كثر البكي وساكته وبس
بيلسان:اسنديها معاي نلبسوها عبايتها
ادم:نستنا فيكم برا
سلسبيل:تمام

ترن ترن ترن
ادم:ايوا امي
سميره:ها شنو صار في سومه طمني?
ادم:لالا امورها تمام اهو بنروحو بيها
سميره:به شنو قالولكم
ادم:امي تو نروح ونفهمكم توا عندي مكالمه صكري
سميره:به نستنو فيكم
ادم:هااا
ادهم:تي خيرك مقتليش الزح وين انتم
ادم:اهو مروحين بيها مديرش العار غادي
ادهم:به شنو قالولكم
ادم:نجوكم بعدين ساهل
ادهم:متعطلش هي
ادم:تمام

سلسبيل وبيلسان ركبو بسمه لي السياره :—-
ادم:بسمه خيرك تكلمي
بسمه:بصعووووبه …ولاشي تاعبه
ادم:تنهد…اسمعو بسمه صاير معاها شي ومتبيش تحكي توا لان الانهيار العصبي ميجيش الا من صدمه المهم نبيكم متحكو شي قلو ان عندها هبوط وتم
سلسبيل:اي يكون احسن
بيلسان:تشوف لي بسمه وكانت متحسررره ع اختها وتبي تعرف خيرها

حميد(عم تيم):مشاء الله الله يبارك انشاء الله تولي احسن دكتور في البلاد
تيم:منور عمي
مصطفى:اي زي بوه احم احم
حميد:ههههههه واحسن منك انشاء الله
سلطان(خال تيم):اي تو عاد نبو نفرحو بيه قدااااش لينا خاطرنا في عرس
مصطفى:اكيد قريب انشاء الله حتا العروس واتيه
حميد:حتا العروس دكتوره مشاء الله عيلة دكاتره??
مصطفى:صلي ع النبي ياراجل العين حق
حميد:اللهم صلي عليه ..اي ياراجل كان بناخذ بلعين راهو قداش ليا واخدك
تيم:هما يهدرزو وانا نفكر كيف بنطلع من الورطه يلي دبسني فيها بوووي وشنو رح يكون ردها؟؟

سميره:الحمد الله علي سلامتك بنتي
بسمه:تمشي بشويه ووجها ذاااابل …الله يسلمك
حليمه:بعيد السو خذيناك بعين شكلنا

بي صوت وااطي بكل
دانيا:طح سعدها ع شنو بياخذوها بلعين بس
هديل:يمكن ع خاطر واخذه تيم لا اكتر
بتول:بالله متزيدينيش من بكري مقعمزه ع نار انا شفته مبكري برا وووووه عليااا زي الغزال مولي احله من قبل بي هلبااااا
دانيا:نبي ليله بس معاه?
هديل:اسكتي ياصايعه ?

فدوى(مرت عم بسمه):خشي استريحي حبيبتي
مبروكه:اي ارفعيها دارها سلسبيل
سلسبيل:انشاء الله …وركبت بسمه لي دارها رقدت ع السرير بدون متحكي ولا حرف

كملو العزومه وحطو العشي تعشو وشربو الشاهي بلحلاوات وقبل ميروحو وكل وحده يجيها راجلها تركب تسلم ع بسمه وتتحمدلها ع السلامه وتروح

روحو كللللهم والحوش ولا هادي وخش مصطفى وتيم قعمزو في الصالون مصطفى لاحض غياب بسمه:-
مصطفى:وين بسمه؟
تيم:زمط ريقه
سميره:سومه مرضت شويه فوق في دارها
مصطفى:خيرهااا??
سميره:هبوط قالو
مصطفى:ديما نتكلم انا نقولها كولي كويس لاكن هيا مش معدله عل روحها ديمااا ضمان وفي المطبخ وبس خلي نمشي نشوفها …وناض

سميره:شنو صاير مع بنت عمكم؟
ادم:قعد يشوف لي تيم
سميره:نكلم فيكم
سلسبيل:تشوف لي تيم…الواضح انها تعرضت لي صدمه لان جاها انهيار عصبي
سميره:تيم تعاله في المربوعه نبيك
تيم:ناض وهوا قارن حواجبه

بسمه:مقعمزه في سريري ومش قادره نشد دموعي يلي زي البحر ع خذي فجأه نشوف عمي ..عمي الراجل الطيب يلي ضحكته عندي بدنيا عيونها يلي فيهم الطيب كله ونضراته يلي نحب اناشيه بيهم والشيب يلي مغطي راسه زايده هيبه❤️

مصطفى:بسمة عمري خيرهاا
بسمه:ضحكت..تعبت شوي بس
مصطفى:حضنها…وانتي في حمايتي مش مسموح ليك التعب بككككل ولا الحزن ولا البكي
بسمه:ربي يخليك ليا احلا اب وعم في الدنيا كللللها
مصطفى:وانتي اعقل واهدا بنت شفتها في حياتي توا الشاطره رح تنزل مع بوها وتتعشا
بسمه:والله مخاطري
مصطفى:لالالا ترضي بوك ميتعشاش ولا ياخذ دواء السكر ترضي؟
بسمه:اكيد لا
مصطفى:به هيا انزلي معاي
بسمه:من عيوني

✨روايات بنووتة الشيخ✨

سميره:شنو صار؟خيرك معاها
تيم:منو هيا
سميره:شنو قلت للبنت
تيم:اااااه امي قعمزي نبي ندوي معاك
سميره:قعمزت …شنو فيه ؟
تيم:انا طول عمري متحمل وغاصبيني ع شي منبيشي نبي نتزوج وحده نحبهاااا مش وحده منحسش بي ولا حاجه اتجاهها
سميره:حطت يديها ع وجها….ينهاري الاحرف كيييف انت شنو تقووول البنت مخليها تستناك 7سنين ومهتمه بي لبسك ماكلتك نضافت دارك وكل شي تبيه اديرلك فيه توا جاي تقول منبيهاش
تيم:اني مطلبتش منها اديرلي شي ولا تستناني بوي هوا السبب في كل شي انا نحب وحده تعرفت عليها في المانيا دكتورت صيدله نبيها بي اي طريقه رح ناخذها
سميره:ياحي عليا حييييي انت تبي تقتل بوك ولا شنو والله بوك لو يسمع ها الكلام سكره يرتفع وينجلط
تيم:مستعد ناخذها لاكن رح نجيب عليها ضره لو تتحمل باهي متبيش تتحمل ترقد ماعندي مانديرلها
سميره:طلعت وهيا ترعش ومش عارفه كيف تتصرف

✨روايات بنووتة الشيخ✨

ادم:الله الله ع الدلع يوكل فيها بي يده
سلسبيل:??
مصطفى:عين الحاسود فيها عود
ادهم:رد بالك تشوفك امي كنهادا بسمه تبات في الشارع اليوم
كلهم:هههههههههه
سميره:تبي توضح ان مفي شي …..سمعت كلمت امي شنو تقولو عليا
تيم:ركب وهوا يخبط وقربع باب داره
مصطفى:خيره هادا
بسمه:?
سميره:شي تاعب بس من حوست اليوم

ترن ترن ترن
سلسبيل:سومه تالفونك
بسمه:خذت التالفون وبعدت من جنبهم….الو
بلقيس(صاحبتها):نقدر نفهم وينك يادراه من بكري نتصل مفيش رد
بسمه:قاعده يابلقيس?
بلقيس:خيرك شنو صاير معاك?
بسمه:بعد 7سنين وانا نراجي فيه ونحبه كل يوم اكتر من يلي بعده طلع ميبينيش ومكبد ع وحده تانيه
بلقيس:بلا تسهويك ياهمي فكينا من البصاره هيا
بسمه:ياريتها بصاره والله ياريت وربي ندفع عمري كله وتطلع بصاره …وبدت تبكي
بلقيس:حي عليا طلعتي تحكي جديات ?
بسمه:تبكي..
بلقيس:سومه اهدي وافتحي واتس فهميني
بسمه:خليني نركب داري قبل
بلقيس:نستنا فيك

بسمه:انا بنرقد تصبحو ع خير
مصطفى:وانتي من اهل الخير
ادهم:متبيش تلعبي معاي شوط بوبجي
بسمه:لا والله تاعبه
مصطفى:تو تنفعكم ها اللعبه العافنه تعيطو ع طول حسكم زي المهبله
بسمه:ركبت بي دارها يلي كانت مقابله دار تيم ….خشيت بي داري بدلة حوايجي واذكرت ان شحني عند ادهم طلعت من الدار وقابلني تيم طالع من داره…يتبع