رواية الدنيا دوارة

الحلقة 5
.
ركبت للشقة ومتقدرتش نشد دموعي وقعدت نبكي وماحسيتش بالوقت رجع عماد لقاني بحوايجي وعيوني منفخات وحالتي حالة
عماد.. غزل خيرك شن فيه……. حبيبي من زعلك شن صار.
وانا نبكي
عماد.. تي قولي خير مانفصل
جيت بنتكلم ماقدرتش حسيت ان صارلي تراكمات المدة اللي فاتت نسمع وندس وتوا نفجرت
لمادشافني مش قادرة نحكي حظني وقعدت مشوار لين هديت
عماد.. احكيلي توا
انا.. عماد انا معش نقدر معش نقدر نسمع ونسكت نبي حل
عماد.. شن سمعتي
انا.. تفتفيت نسون المهم نبي حل
عماد.. شن تبي انا جاهز
انا.. غدوا ترفعني نشوف وضعي ولا نمشوا نسافروا
عماد.. خيرك جنيتي انت
انا.. علاش
عماد.. نرفعك عادي بس مش كأنك مكبرتها لينا سنة بس متزوجين م؛ 10
انا..انا مليت من التلقيح والكلام المسموم
عماد.. ماهو مشينا لاكثر من دكتور ونفس الكلام
انا.. غدوا نمشوا ثاني ولو ماصارش نسافروا
عماد.. يصير خير
حسيته مش مهتم مش عارفة علاش
نضت بدلت حوايجي وهو كان في الصالة شاد فونه
ماعدلتش قلت اكيد ضغط شغل خشيت درت عشاء خفيف وناديته وكان مبوزم
انا.. حبيبي خيرك شن فيه
عماد.. شي مشاكل شغل
انا.. باهي مايحقليش نعرفها
عماد بصوت عالي.. شن تحقيق هو ماليكش علاقة
انا.. ?
وجيت بنوض شد ايدي
عماد.. آسف مش قصدي
مارديتش عليه جبدت ايدي وحسيت روحي بننفجر اتصلت بغالية ماتردش وسهى مسافرة مافيش الا منى
منى.. الو
انا.. اهلين منى
منى.. غزولة كيفك
انا.. مش كويسة?
منى.. خيرك شن فيه
حكيتلها كل شي على عمتي وهي تدعي عليها
منى.. ارزيك فيها عزوز هالفقر يامولاي
انا.. عيب عندها اولاد مزال يبوها
منى.. ولا يهمك حبيبتي فوتيها المهم انت وراجلك متفاهمين
انا.. متغير عليا اليوم مش عارفة خيره
منى.. خيره
انا.. نعرفش جوه مش كويس
منى.. اها مادوريشي توا يجيك بروحك
انا.. مرات شغله مش كويس
منى.. المهم انت مزال مافيه شي مافيش بيبي في الطريق
انا.. لا والله? مالا علاش عمتي تاكل في كبدي ليل نهار
منى.. مزال صغيرة العمر قدامك
انا.. ربي يرزقني
منى.. ان شاء الله
انا.. معليشي حبي ضايقت بمشاكلي
منى.. سكري فمك احنى خوات اي وقت تحتاجيني تلقيني عندك
انا.. باهي شن رايك تجيني
منى.. لالالالا
انا.. خيرك اللطف
منى.. لا ماهو نغلي على عزوزتك خايفة نجيك نشوفها ننصبها معاها
انا.. ??? باهي تصبحي على خير
.
الصبح
نضت الساعة 8 لقيت عماد طالع غريبة قبل مستحيل يطلع قبل 11 اتصلت بيه ماردش بعدها بعثلي مسج
عماد.. صباح الخير حبي عندي شغل مستعجل مادورينيش.
قريت المسج ومشيت درت كابتشينو شربته وانا مش مرتاحة حاسة شي مش مريحني تعوذت من الشيطان ومشيت لهيت روحي سيقت الحوش ونكته كله
.
امنية ويوسف
.
عالنت
يوسف.. تعرفي اول مرة نحكي مع بنت هكي
امنية.. هههههه بنصدق يعني انك ماعمركش حكيت مع بنات
يوسف.. لا حكيت وهلبا نت ونقال بس اول مرة نحكي مع بنت؛ بصدق و ونكون واضح وعفوي معاها
امنية فرحت.. تصدق حتى انا
يوسف.. اها
امنية.. بس غريبة ماقلتش نبي نشوفك او نبي فونك
يوسف.. وعلاش بنطلب هكي
امنية.. مش عارفة بس كل الشباب هكي
يوسق.. شن مجربة هلبا شكلك
امنية وجعتها روحها هلبا وحست انها رخيصة عنده?
امنية.. لا ابدا
يوسف.. بما ان بديناها صراحة نكملها معاك انا مستحيل نطلب رقم بنت او نشوفها الا اذا في مشروع ارتباط بينا وانا وانت بينا صداقة فيسبوكية بس
امنية.. اممممم اي
يوسف.. زعلتي
امنية.. وعلاش بنزعل يعني شن نحبك مثلا
يوسف.. مرات
امنية.. لا ياوثق بس نسألك سؤال عفوي اعتبره او فضول
يوسف.. باهي
امنية.. علاش مافكرتش تاخذ وحدة من النت
يوسف.. مستحيل
امنية.. ليش عادي هلبا هكي
يوسف.. ناقص انا ناخذ وحدة حكت معاي نت
امنية.. وضح
يوسف.. ببساطة مش مستعد ناخذ وحدة زي ماكلمتني تكلم غيري ماعنديش ثقة واصلا اي بنت محترمة تستنى نصيبها لين يجي مش تمشي تهدرز وتضيع وقت
نهارت احلام امنية ومعش قدرت تسيطر على روحها
امنية.. قصدك انا مش محترمة
يوسف.. انا ماقلتش هكي
امنية.. لا قلت وكمل كلامك بكل راحة
يوسف.. نغم فوتيه الموضوع
امنية.. انا آسفة بس مايشرفنيش نحكي مع واحد شايفني صايعة معقولة رغم هدرزتي معاك ماشفت فيا شي غير هكي ياخسارة يايوسف ياخسارة
يوسف.. نغم انت صديقة بس شن يهمك رايي فيك
امنية.. لا يهمني انت شايفني صايعة ولا
يوسف.. انا شكيت فيك لان الحساب جديد وكل مانفتح نلقاك اونلاين الله اعلم كم واحد تحكي معاه بس انا مايهمنيش هذا كله
?????امنية… تصدق اني نادمة على كل لحظة فكرت فيك نادمة على كل وقتي اللي ضيعته وانا نحلم بيك
يوسف.. شن تقولي
امنية.. الحساب الجديد اللي تحكي عليه فتحته على خاطرك ماكانش عندي الجرئة نقولك في وجهك انت اول حب في حياتي في عمري لا حبيت ولافكرت نحب الا لما شفتك طول الوقت فاتحة اون لاين لاني نستنى فيك تفتح تكلمني بالثانية نستنى في حروفك مش لان نحكي مع شباب ياخسارة حبي فيك يايوسف كل هذا مافكرتش فيه مافكرتش البنت اللي تنازلت على مبادئها على خاطر حبت وغيرت نظام حياتها كيف ماتحب مافكرتش كل هذا يكون بدافع الحب وكلامي معاك كله كان في حدود الاحترام وفي الأخير نطلع مش محترمة
يوسف.. قصدك انت تعرفيني
امنية.. اسفة على كل شي سلام
بلوووووووووووك
تم الغاء الحساب
يوسف.. حس بشعور غريب استغرب ان في بنت تحبه من غير علمه وهو فسد كل شي قعد يفكر كيف بيعرف البنت هاذي خصوصا انها لغت حسابها من الفيس
امنية خشت في حالة هيستيرية بكت من اعماقها كسرة الخاطر صااااااااعبة خاصة من اللي نحبوه
.
عماد وطارق في المحل
.
طارق.. ماتقوليش شن قصة هاللابتوب كل مانجي وانت مضبطه
عماد.. لا عادي
وشوي وجت نفس البنت اللي قعد عماد يشوفلها يومها وطيعا يومها روحت بالابتوب ورجعاته لان ماخدمش كويس
البنت.. صباح الخير
عماد وطارق.. صباح النور
البنت.. شن جاعز الابتوب
عماد.. اي جاهز بس شوفيه هنا حتى لو ماحبيتيش شي نغيره
البنت.. اوكييي
البنت جميلة وتدلع على عامر بطريقة مغرية وكانت لابسة بنطلون جينز سمائي وبلوزة سودا قصيرة ونص شعرها يرا وتحط في مكياج
طارق كان يراقب في عماد???
البنت.. اممممم باهي نبي نغير الويندوز نبي اخر اصدار ممكن
عماد مسخسخ.. اي ممكن بس صاعب راه يمكن ماتتأقلميش معاه
البنت.. لا بعدين نجيك وانت علمني لو مايزعجكش
عماد.. تفضلي المحل محلك في اي وقت
البنت.. بس كم من مرة نجي نلقى المحل مسكر وانا بسراحة حوشي بعيد
عماد.. نعطيك رقمي امتا مابتشرفينا كلميني
البنت…. امَمممم تمام
وكتبلها عماد الرقم وهي خداته
البنت.. نخللي اللاب عندك وتوا نرجعله تكون انت نزلت الويندوز
عماد.. اللي يريحك
البنت.. اوك بااااي
عماد?
طارق.. نشهد بالله انك ماتستحي ولا اتحشم
عماد.. خيرك
طارق.. عندك مراة وقاعد تفنص واطيح
عماد.. لا انت يتهيألك
طارق.. هذا فوته على مرتك مش عليا انا شاب زيني زيك راه واللي ادير فيه فاهمه
عماد.. مافيش مشكلة كان غيرت شوي
طارق.. انت ياعماد تقول هكي واحنا نقولوا يحب مرته وينضرب بيهم المثل حرام عليك تخرب حوشك على بنت زي هاذي
عماد.. شن نخرب حوشي مرتي نحبها بس محتاج شوي تغيير روتين
طارق.. وترضى هي ادير نفس الشي
عماد.. ? شن تخرف
طارق.. شفت كيف عصبت راه اللي ادير فيه بيخرب حوشك
وطلع طارق روح وهو فاصل من عماد
.
انا فرغت اعصابي في الحوش خليته يلمع لمع و فشلت بس تذكرت عماذ بيروح وهو تعبان مانقدرش نخليه من غير غدا قاومت روحي ومشيت درت داوود باشا مع رز وقليت معاها باطاطا وزوز سلايط ودخلت دوشت وغيرت لبست قفطان كتافه طايحات قصير لونه وردي ودرت شعري ذيل حسان وساويت وجهي وجهزت السفرة
عماد في الطريق كان مروح وهو داخله غيض مش مفهوم حاس بتأنيب الضمير بس مش قادر يمنع نفسه كان يتمنى يلقى غلطة حتى يفرغ غله وركب وفتح الباب
انا لما سمعت الباب نفتح نحيت المبخرة ومشيتله بسته
انا.. اهلين حبيبي
عماد كان جحيمة ونحطت في مية
انا.. استاحشتك هلبا هكي تطلع من غير مانشوفك
عماد.. حسيت بروحي قداش حقير معقولة عندي مراة زيها ونفكر في غيرها قعدت نشوف لعيونها زدت حسيت بحقارتي بعدتها ودخلت للدار
انا.. خيرك حبيبي
عماد.. غزل اطلعي وخليني شوي
ماحبيتش حركته معقولة هكي يعاملني وانا اللي متعبة روحي على خاطره مشيت عالصالون وشادة بكيتي مامبيش نبكي
عماد.. حاس بشي يخنق فيا علاش ياغزل تقتلي فيا بطيبتك والله مانستاهلك انا لازم ندير حل للموضوع خلاص مستحيل نعطي وجه للبنت اللي تجي للمحل للزم نحافظ على حوشي طلعت بنشوفها لقيتها عالصالون ووجها احمر عارفها غاصتها في قلبها مشيت حظنتها
انا.. اوب ماحظني نزلو دموعي
عماد.. اسسسسس انا حقير وواطي اللي عندي عسل زيك ونزعل فيها
انا.. لا حاشاك بس انت متغير
عماذ.. شغل يا روحي
انا.. لا مش شغل انت معش تحبني زي قبل
عماد.. شن تقولي انت
انا.. انا حاسة بيك بس نبي منك وعد
عماد.. لو في يوم حسيت انك معش تحبني او شفت لغيري نبيك تقولي
عماد.. كلامها قهرني خش وسط قلبي
.. غزل جنيتي
انا.. لا ماجنيتش بس اوعدني
عماد.. ماقدرتش نوعدها.. نوضي ونحي الوسواس من عليك هي تعالي نشم في ريحة حلوة
مشيت معاه نتغدوا وسبحان الله تغير جوه وقلب عماد الرومنسي والحساس
.
عمتي وعامر وعمي
.
عمتي.. شن رايك ياحاج نديروا فضانية وبيان مع بعض
عمي.. عامر قداش مزالك في الحوش
عامر.. زواق والأثاث حكم كله جاهز لان حجزته
عمي.. يعني 3 اسابيع اتم
عامر.. اي
عمي.. خلاص معناها العرس بعد شهر بالزبط والاسبوع الجاي زي ماقالت امك نديروا بيان وفضانية ولا فاتحة
عمتي.. لو لولولولولولوولولولوللولييييييي
.
امنية
كانت في دارها تبكي من ساعات لان نكسرت كسرت عمرها اول مرة تحب واللي تحبه واخذ عليها فكرة انها مش محترمة وصايعة
.
يوسف وولد عمه وليد
يوسف.. ويلوووو نبي خدمة
وليد.. ادلل
يوسف.. في اكاونت عالفيس نبي نعرف من صاحبه
وليد.. تم اعطيني اسمه
يوسف.. لكن ممكن صاحبه دايرله الغاء تنشيط
وليد.. هكي صعب لو فتحه صاحبه قبل 14 يوم قولي طول توا نجيبلك اسمه
يوسف.. نجك
وليد.. بضميرك مش لبنت
يوسف.. بدينا في القصقصة
.
انا وعماد
جونا راق
عماد.. هي البسي
انا.. وين
عماد.. مش تبي تمشي لدكتورة
انا.. حبيبي ربي يخليك ليا اي ثواني نكون جاهزة
لبست بسرعة البرق ومشينا للدكتورة طلبوا عليا تحاليل حللنا ومشينا ادهورنا ساعة ورجعنا
في الانتظار
عماد.. متأكدة انها كويسة
انا.. اي كلهم يشكروا فيها
الممرضة تفضلوا دوركم
كنا اخر وحدين
الدكتورة.. كم ليكم متزوجين
انا.. سنة
الدكتورة.. اها تمام حللتي
انا.. اي من ساعة
جت الممرضة معاها النتيجة
الدكتورة بدت تضحك???
انا.. شن في
الدكتورة.. مبروك يامدام انت حامل