رواية الدنيا دوارة

الحلقة 4
.
عمتي في خاطرها كان بنقول محسدية مش حايصدقني
.. قالت بتقولك عليها غير صارت قصة امس
عامر.. اها باهي تمام كان هكي نمشوا نشوفوها
وطلع عامر
عمتي.. امنية يا امنية
امنية.. نعم
عمتي.. اركبي نادي غزل قولها نبيك ضروري
امنية.. باهي
.
كنت انا قاعدة في حظن عماد عالصالون ونهدرزوا ونتفرجوا وجونا ?
طق الباب
عماد.. من زعما
انا.. برا افتح بايخة انا بنفتح هكي
كنت لابسة بيجاما حرير شورت قصير هلبا وطرف متاعها
دخلت للدار وفتح عماد
امنية.. غزل وين
عماد.. داخل علاش
امنية.. امي تبيها ضروري توا
عماد.. باهي توا نقوللها
ونزلت امتية وهو جاني للدار
عماد.. عليك قصة ماتبيش اتم تبيك امي تحت
انا.. ماقالتش علاش
عماد.. لا قالت تبيك ضروري اكيد تبيك اطيبي ولا بيجيها حد
انا.. لالا لو هكي راه قالت اكيد شي ثاني خللي نغير وننزل
لبست قفطان طويل مخصر لونه بيج وفيع ورد وردي ووشاح وردي ونزلت
لقيت عمتي تستنى فيا
انا.. السلام عليكم
عمتي.. وعليكم السلام كيف حالك
انا.. الحمد لله ?
عمتي.. مهما يصير بينا نقعدوا عي وحدة وانت زي بنيتي
انا?ربي يستر… اي اكيد
عمتي.. المهم عمورة وليدي بنخطبله ونبيك تمشي معاي
انا.. منو
عمتي.. رحمة اخت صاحبتك
انا? أولي عليك ياعامر.. متأكدة من خيارك
عمتي.. اي بنية سمحة عجبتني وانت كان سألك عامر قوليله عاجباتك
قررت ان مش حاندخل اولا حرام نقطع نصيب البنت وثانيا يدبروا روسهم لو بنتكلم بنطلع محسدية
انا.. باهي على بركة الله
عمتي.. خلاص خوذي منهم موعد الخميس العصر نمشو نشوفوهم ونتعرفوا عليهم ومنها عمورة يشوفها ربي يكتبها ليه كان هاكا تبرد كبيدتي كنينة زيها ترفع الراس
انا??.. تبي شي عمتي انا بنركب
عمتي.. سلامتك
وجيت بنركب نادتني امنية
امنية.. غزل ماتزعليش من ماما هكي طبعها بس حنينة وتحبك
انا.. لا مازعلتش
امنية.. باهي بعدين بنجي نشرب عندك طويسة قهوة درت غريبة نبيك تذوقيها
(مفلحك يا امنية) ???
انا.. تمام نستنى فيك
ركبت لقيت مادو راقد وانا متجاميش نوم قعدت نخمم شن ندير شن ندير درت خبزة خضرة يحبها عماد وفي نفس الوقت نحاول نلهي نفسي نبيش نفكر في كلام عمتي يلا زي امي ومشيت فتحت تلفزيون ورقدت وانا ماندريش على روحي
لين حسيت بحاجة تخربش في رقبتي فتحت عيوني لقيت مادو
انا.. خلعتني
عماد.. خيرك راقدة هنا
انا.. ماحسيتش بروحي
عماد.. شن تبي امي
انا.. تبي تخطب اخت صاحبتي لعامر
عماد.. مليح بكل وكويسة البنت
انا.. بصراحة ماتصلحش بيه
عماد.. كيف
انا.. عامر يبي بنت هادية وطيبة ومتواضعة ورحمة مدلعة وصغيرة وطبعها صاعب بس امك ميتة فيها ومش شايفة غيرها
عماد.. والحل
انا.. انا مش حانتدخل بنمشي معاها وخلاص وانت حاول تفهم عامر ان يحكي معاها كويس مرات ينسجموا مع بعض
عماد.. ياستي ربي يهني المهم مافيش قهيوة
انا.. فيه بس نستنى في امنية تبي تشرب قهوتها معانا
عماد.. باهي بسرعة بري جهزي السفرة توا نكلمها
مشيت حطيت شاهي وقهوة وخبزة الخضرة وعندي شوي حلو طلعته لان عماد عنده سفرة القهوة العشية مقدسة وشوي وجت امنية نسمع فيها تهدرز هي وياه وجبت قهيوتنا وشربناها
دخل عماد للدار وناداني
انا.. نعم
عماد.. بودي نقولك ماديريش عشاء بس جايتني النية في مقلوبة رز سورية من يدياتك
وباس ايدي
انا.. من عيوني تؤمر أمر?
عماد??♥️
وطلع
امنية.. غزول شن رايك في غريبتي
انا.. قنينة ماشاءالله
امنية.. تصدقي اللي جايني جايني في المطبخ شادتها طبخ
انا.. حلو بس ماتخليهاش اتنسيك قرايتك
امنية.. لالا هي شهور بس ونتخرج
قعدنا نحكوا للمغرب جت بتروح
امنية.. بنمشي ندير مرفوسة بابا جاي خاطره فيها
انا.. انا بندير مئلوبة خوك جاي خاطره فيها والغدا مادرناش اليوم
امنية.. نيال عماد بيك فيه اللي بالشهر تقعد ماتحطش طنجرة على غاز
انا.. زي ما انا مانحبش يقصر معاي وموفرلي كل شي حتى مانبيش نقصر معاه
وطلعت روحت واستغربت في تصرفاتها متغيرة على قبل صح ماصارش بيني وبينها شي قبل بس كانت ماتعدلش عليا وديما لاهيا في روحها بس ولا تندري على لون دولاب المطبخ
مشيت درت المئلوبة وروح عماد وتعشينا وجونا حلو
.
اتصلت بمنى وعطيتها موعد
.
منى ورحمة
منى.. رحممممممة مبروووووك مبرووووووك صار اللي نبيه
رحمة.. علاش شن فيه
منى.. توا كلمتني غزل قالت الخميس بيجوا يشوفوك لعامر
رحمة???.. ياااااااااااي الفال ليك حبيبتي
منى.. من فمك لباب السماء
تعالي نكتبوا شن ناقصنا حتى نطلعوا عيلة راقية قدامهم
رحمة.. اي اي هي
.
كان مزال على مشيتنا لحوش منى 6 ايام
.
عماد.. غزولتي
انا.. عيونها
عماد.. دخيل عيونك انا
انا.. ? اضحك لما تتكلم سوري
عماد.. وليش بقى
انا.. لانو ياحبيبي ياعمري انت هاد الحكي مابيصير مين ماكان يحكيه لانو بيطلع بيفلج بالضحك
عماد.. عاللي يديرلك في الجو
انا.. ? تصدق قداااش خاطري نرجع لسوريا
عماد.. حرب كان مش حرب فيها رزه رفعتك
انا.. ربي يحقن الدم
عماد.. توا في حوشكم قاعدين عالوضع الليبي او السوري
انا.. لا الوضع الليبي في الماكلة قاعدين مرة هكي ومرة هكي
عماد.. ??? خلاص نبي كبة غدوا
انا.. لا ياروح قلبي غدوا نبي نطلع مليت من حبسة الحوش
عماد.. اصلا كفكر فيها حتى انا
.
يوم الخميس
من الصبح مش متريحة وحاجة غامة عليا تعوذت من الشيطان ونزلت للعيلة قلت نشوف وضعهم لقيت عمتي عند الجيران وامنية تتفرج على قناة سميرة وجنبها عامر عالفون وعمي طالع
انا.. صباح الخير
…. صباح النور
عامر.. عاش من شافك
انا.. تعيش وتشوف
امنية.. قبل بنتصل بيك عازمتكم عالغداء عندنا انت وعماد
عامر.. منيوة سلم وخيتي ديريلي ساندويتش دحي جعان
امنية.. بسم الله مش كيف فطرنا
عامر.. الله اكبر في عيونك حاسدتني نوضي بسرعة
انا.. توا ندير انا كان مش فاضية
عامر.. تحشمي على وجهك يافرخة
امنية.. باهي يافجعان ياجازورا
مشت وانا جيت بنلحقها وقفني عامر
عامر.. غزل بنسألك
انا.. على رحمة ولا?
عامر.. يس يس شن وضعها
انا.. بصراحة انت زي وخيي ومانودلك الا الخير بس ماتستعجلش كلمها وشوفها
عامر.. قصدي انت عاجباتك
انا.. مانعرفش هذا الشي نصيب مانقدرش نجزم فيه
عامر.. حيرتيني
انا.. زي ماقتلك ماتستعجلش وفكر واستخير
جت امنية.. خود تسمسم
عامر.. تسمسميه بروحك انا طالع متغدي عالبحر تشاو يافرخة??
امنية.. قصدي نسب توا ولا كيف
انا.. ????
امنية.. هاك خوديه
انا.. لا ياحلوة انا بنحافظ عاى رشاقتي
قعدنا نهدرزوا لين جت عمتي وكانت فرحانة بيا واستغربت الحق
عمتي.. بنيتي اقعدي تغدي هنا
امنية.. اي قلتلها من بكري نبيها تذوق تطيبي
قعدت جنب عمتي نهدرز عليها
انا.. عمي وين
عمتي.. اليوم عنده خدمة هلبا مرات يروح العصر
انا.. اها نمشي نجهز مع امنية السفرة
لقيتها مطيبة كسكسي بالبصلة وبطاطا مقلية وفلفل
انا.. الله الله شن الفلاحة هاذي
امنية.. المنظر حلو ان شاء الله حتى الطعم حبو
انا.. لا واضح بنة وصنة
استغربت الحق شن سر التغيير المفاجئ اللي جاها
.
نجو لأمنية
طبعا اغلب البنات لما يحبوا من طرف واحد يخشوا بحسابات وهمية لحبايبهم
يوسف قبل الصداقة وبدت هي بالحكي معاه
.. من معاي
امنية.. انا نغم
يوسف.. تشرفت بيك كم عمرك
امنية.. وبيك اكثر 22
يوسف.. العمر كله
واستمرت الهدرزة وهاذي مقطفات
يوسف.. مرتبطة
امنية.. لا
يوسف.. ربي يرزقك باللي تتمنيه
امنية.. ان شاء الله وانت
يوسف.. لا بس كش مطول
امنية.. كيف
يوسف.. ندور في بنت حلال
امنية.. اها باهي شن مواصفاتك بالك نحصلك
يوسف.. ? نبيها حمرا جراية ماتكلش الشعير
امتية?
يوسف.. نبصر نبيها بنت عيلة وناس وتكون محترمة وحلوة
امنية.. اهاااا ربي يرزقك
. الخلاصة
امنية.. اللي يقول يوسف نحبه اديره لدرجة انها بدت تغير في طريقة لبسها وحبه زاد في قلبها وبدت تعشقه عشق بس يوسف حتى باسم مستعار مادورهاش ولافكر فيها معتبرها صديقة بس
.
العصر
تغدينا وركبنا عماد رقد وانا دخلت دوشت ولبست قفطان مغربي بسيط ونازك لونه عنابي وسشورت شعري وقمته فوق ودرت مكياج حلو ونوضت عماد
عماد.. شو هالحلاوة يابت
انا.. مصري على سوري ?
عماد.. شن رايك تقعدي ?
انا.. عيونك
عماد.. باه علاش منوضتني
انا.. نبيك تشوفني حلوة او لا
عماد.. اديري العار
حدفته بالشنطة وجيت بنمشي شدني وطيحني عليه وبدا يغني
عماد.. جمالك جمال جمالك جمال مش عادي
انا.. ابعد ابعد زعلت
عماد.. توا نرضيك
انا دفيته بقوة.. ملح?
عماد.. باهي ياغزل نحسبلك فيهم
لبست عبايتي وخماري.. من بكري يتصلوا بيك طارق وعلي نوض شوفهم ونزلت
لقيتهم جاهزين ورافعين كل خير
رفعنا عامر وكان مبسوط وعمتي طايرة بالفرح
وصلنا واستقبلتنا عمتي رقية امهم ومنى كانت حكم هي العروس لابسة بلوزة حمرا وقونة ستريت سودا وفاتحة شعرها والحق استغربت انا وامنية وعمتي ????.. ياريت عندي ولد ثالث كنت مانروح الا بيكم الزوز لكن ماتندروش عالنصيب بالك يجيب ثاني
منى?
انا?? فهمت قصدها تبي تجيبها عليا ضرة غم عليا النفس وقريب متت بس قعدت نكابر استأذنت من منى نبي نمشي للمطبخ
منى.. خيرك غزل
انا.. الله يسامحها عمتي مصرة تجرحني
منى.. ماتعدليش عليها عزوز مخرفة ربي يخليك انت وعماد لبعض
انا.. عارفتها
منى صاحبتي من سنين ونرتاح لما نفشلها قلبي
انا.. والله مخنوقة ونبي نهدرز نسقس انت وسهى
منى.. اكيد حبيبتي تعالي نرجعوا توا عزوز الشر تنتخص
انا?
دخلنا ولقينا العروس مصدرة جنب عمتي سلمت عليها وهي من روس صوابعها زمتطها قلت يلا توا تتغير
قعدنا وظيفونا ظيافة نازكة كل شي مرتب وكل ثانية تفوت عمتي تزيد اطيح في غرامهم اكثر
امنية طول الوقت وهي دردشة عالماسنجر مع حبيب القلب
بعدين مشت رحمة بتشوف عامر
.
عامر قاعد مع عادل خوهم ودخلت رحمة لابسة عباية على اساس زي القفطان والوشاح داب ماحطاته بس كانت طرف
عامر????
رحمة ?
ومالحقوش يحكوا كلمتين لان اللصقة عادل ماباش يتوكل ويخليهم من اير عمرها وفي شنو تقرا وبس والسلام
واحنا بنروحوا منى ورحمة يسلموا على عمتي بالأحضان وركبنا في السيارة
عمتي.. شنوا ياعمورة
عامر.. الحق تبارك الرحمن عليها عجبتني لكن الدراه خوها تسمر حتى رقمها ماخذيتاش
عمتي.. غزل جيبيله رقمها اليوم
انا?
عمتي.. خلاص توا نديروا فضانية ونتموا فيها هذا وين السعد بيجيني وبنقول درت كنينة سمحة وتجيبلي احفاد يملوا علينا
الحوش
انا????
امنية وعامر?☹️?
عمتي???