رواية الدنيا دوارة

الحلقة 3
.
الصبح
خشت عمتي للمربوعة لقت عماد راقدو ناض عليها جنونها جت في الدروج وبدت تعيط.
عمتي.. ياللي ماتتحشمي على وجهك يابلا رباية ياقليلة الاصل
.
انا كنت نايضة كيف طلعت من الحمام سمعتها خذيت عبايتي ووشاحي ونزلت نجري
عماد في عز النوم جاء واقف وطلعت العيلة كلها الا عمي كان طالع لو قاعد كانت مستحيل تتكلم
انا وقفت في نص الدروج وهي مستمرة
عمتي.. يافانص ياللي ماتستحي راقدة ومتهنية ومهججة وليدي تحت
انا.. شن فيه بالزبط
عماد.. يامي اسكتي بالله عليك الجيران تسمع
عمتي.. خللي تسمع وتشوف الخايبة مرتك مهججاتك اكيد نكدت عليك عطيها ماينكد عليها
عماد.. لا انت فاهمة غلط
عمتي.. اسكت مادافعش عليها فوق عقمها وعيبها تنكد عليك
انا معش قدرت نتحمل دخلت للشقة ونهرت بكاء ومش فاهمة شي
عمتي.. امشي لزها لاماليها
عماد.. شن لعب هو
عامر.. عيب يام البنت ماشفنا منها الا كل خير
امنية.. عماد اركبلها شوفها
عماد.. للعلم يام انا رقدت تحت لان روحت موخر وناسي مفاتيحي في الحوش متبيتش نقربع
(كذاب) بس مالقاش مبرر ثاني
وركب عماد
امنية.. ان شاء الله غير ماتمشيش لاماليها
عمتي.. تمشي ودرة
عامر.. حرام عليك يامي
عمتي.. اكيد ساحرتكم في خبزة الطاجين انا بس ماكليتش منها اول ما جتنا
?
.
ركب عماد لقاني نبكي في الدار جاء حظني وانا زدت بكاء
عماد.. خلاص اسسسس خلاص غزل امسحيها في وجهي
انا.. علاش بس شن درت انا
عماد.. انا الغالط رقدت تحت وهي تحسابنا متعاركين
انا.. وعلاش راقد تحت ولا ماعندكش حوش
عماد.. نسيت المفاتيح
انا عرفته يكذب حطيت ايدي في جيبه وطلعتهم
عماد?.. غزل انا
انا.. خلاص عماد ارفعني لحوش بوي
عماد.. غزل بالله عليك لا
انا.. يا ارفعني يانكلم خوتي يجوني
عماد.. حبيبتي خليني نفهمك
انا.. عماد خلاص ولا كلمة لو بتزيد كلمة والله ماعاد نرجعلك ارفعني نقعد يومين ونرجع
عماد ? عرفتها سكرت راسها خلاص.. تمام
وطلعت للصالة مش عارف شن الحل في العيشة هاذي نبي ناخذها ونهج ونعيشوا بروحنا
.
انا لبست وخذيت شنطة حطيت فيها حوايج وطلعت
انا.. هيا
عماد مشى من غير ولا حرف
نزلنا
وتلاقينا مع عمي
عمي.. خير شن صاير خيرك بنيتي علاش الشنطة
انا.. مافي شي ياعمي
عماد.. اسأل امي
عمي عرف ان عمتي دايرتلي دعكة مدندنة عصب ودخل يجري واحنا مشينا في السيارة ولا حرف لين وصلنا قبل ماننزلوا عماد شد ايدي
عماد.. ماتسكريش فونك لو نلقاه مسكر او ماترديش والله لما نجيك ونرفعك بالسيف
جبدت ايدي ونزلت خذيت شنطتي
لقيت بابا وماما يفطروا ويوسف الحمد لله مش موجود
اول ماشفت ماما مشيتلها حظنتها وقعدت نبكي لان من يومي مش متعودة حد يكشخ عليا او يقولي كلام جارح
ماما.. اس الله عليك خيرك غزل شن فيه
بابا.. قعد ساكت وتكنطى
.
عمي طبعا دارلهم نهار اغبر اسود حلف على عمتي تجيني العصر وترجعني
.
عماد قعد يدور بالسيارة وهو زعلان وبعدين مشى فتح المحل
.
حكيت لماما كل شي الا ان عماد كذب عالمفتاح وقعدت مضايقة للعصر كنت راقدة جتني ماما
ماما.. غزل غزل بنيتي نوضي عزوزتك وبنتها هنا
فتحت عيوني وماستغربتش جيتها لان اكيد عمي غبرها عليها مشيت غسلت وجهي وطلعت سلمت عليا فوق من النفس وامنية عادية
عمتي.. خلاص ياغزل سوء تفاهم وتم وتوا ارجعي معاي احنا عيلة وحدة
انا.. جيتك على عيني وراسي بس سامحيني ياعمتي نبي نقعد ايام هنا ونروح
عمتي.. كيف لا مانقدرش نروح بلاك
انا.. كلمت عماد قال باهي يومين 3 ونروح
عمتي لوت فمها مش عاجبها ضيفناها وقعدت تستنى في عامر
وامنية معروف علاش جاية اول ماسمعت باب الحوش نفتح ناضت على اساس بتجيني للمطبخ ولحظها كان محمد خوي تلاقت معاه في الباب وهو يتحشم مشى من غير ولاكلمة وجت جنبي
تستنى في يوسف بس جتها خيبة امل ماروحش
جاهم عامر قبل المغرب وروحوا
.
عماد جاه طارق للمحل
عماد.. قريب نحرق ونفجرها باللي فيها
طارق.. انت علاش مادخلتش للشقة
عماد.. كنت زعلان منها ومانبيش نتلاقى معاها
طارق.. نصيحة مهما تتعاركوا رد بالك تبات برا فراشك مش برا شقتك
عماد.. والحل توا
طارق.. الحل عندك تبيها او لا
عماد.. شن تقول انت نبيها ومانبيش غيرها
طارق.. خلاص امالا اجري على روحك ونظم حياتك
.
في الليل دارلي يوسف قصة هو ومحمد وبألف حكمة قنعتهم مايكلموش عماد
قعدت بروحي نفكر فيه ومستاحشاته وزعلانة منه لين اتصل ورديت
عماد.. استاحشتك
انا.. شن تبي
عماد.. نبيك معاي
انا.. غيره لان بنسكر
عماد.. ماتخلينيش نعيط توا ونجي نروح بيك ندير العار
انا.. لا ساد عار الصبح
عماد.. زولتي حبيبي
لما قالي هكي ضعفت وبدين نبكي
عماد.. حبيبي خيرك… نقولك اهو جايك انا مايناسبنيش هكي
انا?.. لا ماتجيش
عماد.. تي قولي خيرك الهم مانحبش نشوفك ولا نسمع تبكي
انا.. علاش كذبت
عماد?
انا.. علاش ماركبتش رقدت فوق
عماد.. لاني كنت زعلان منك
انا.. علاش شن درت تبيني نلز الناس
عماد.. ياروحي انت هاملتيني هلبا خاطري يوم نطلعوا ندهوروا فيه بروحنا نقعد انا وياك بس يوم بروحنا خاطري نروح من مكان نلقاك تستني فيا بس ومتفرغتلي غزل انا وانت مانلحقوش حتى ندوو كلمتين بروحنا
انا.. تحساب انا مانبيش هكي بس قولي شن بندير ترا لو درت العكس انت اول واحد حتقول امي وبوي وهكي
عماد.. عارف امي مكثرة بس ياغزل حسي بيا انا راجل نحب الاستقلال والراحة نحبك جنبي ديما نحب من يهتم بيا وبس مانبيش نرجع نلقاك تجري فوق ولوطا
انا.. كله عادي يفوت بس تعزرني اني عقيمة هاذي حااااارة ياعماد
عماد.. شن ندير باهي
انا.. عماد.. سكر بنرقد
عماد.. هذا اللي نحكي فيه
انا.. شن تبيني نقول موضوعنا ماليشي حل غير نطلعوا نسكنوا بعيد وهذا مستحيل
سكر في وجهي
.
عماد.. تنرفزت من الوضع ومن كلامها هو صح بس انا مانحبش المشاكل مشيت روحت للحوش ولقيت امي فايقة تستنى فيا
امي.. وعليكم السلام
انا.. شن فيه
امي.. وليدي خيرك مهموم قولي
انا.. شن بنقول تبيني نقول ان من حد تزوجت وسكنت فوقكم ماتريحتش
امي.. عيب وليدي
انا.. شن عيب ترضي بنتك عزوزتها اديرلها نفس الشي تنزللها من صباحات ربي واطيب الغداء واضم وتقعد بش ادير العشاء وتهني عالعيلة َفي نفس الوقت كان لقيتي حاجة في حوشها تحارفي نهارها
امي?
عماد.. جاوبي ترضي وكله كوم وتعزيرك فيها لانها ماجابتش كوم ثاني
امي.. انا معش دخلي بيكم ولا عاد نبيها ادير غداء ولا عشاء توا نزوج عامر وبلا جميلتك
ركب عماد فوق ورقد طول
عمتي ندمت و عرفت روحها غالطة وزودتها بس ماتبيش تعترف
.
فاتوت يومين وسي السيد معش كلمني ومعش جاني بكل وانا ناضت عليا كرامتي فوته مرة وحدة وخذيت فترة نقاها عند اهلي
.
عماد.. حسيت اني تعودت على غيابها ومعش دورتها بس بوي الصبح حلفلي اليوم مانبات في الحوش الا وهي معاي قلت المغرب نمشيلها
.
جت اختي غاليا وصغارها تغدوا وبعد الغداء فتحنا للصغار تلفزيون وقعدت انا ويها حكيتلها كل شي
انا.. وهذا هو اللي صار
غالية.. غزل انت غالطة
انا.. شن تقولي
غالية.. اي غالطة مفروض حوشك وراجلك خط احمر مش مستعدة تزيدي شي على حسابه وفيك طبع خايب مانحباش فيك من احنا صغار تحبي ترضي الكل وماتحبيش من يزعل منك هذا مستحيل ارضاء الناس غاية لا تدرك
انا.. باهي هاذو اهله شن نعفنها معاهم نطلع مش بنت أصل
غالية.. لا لكن عادي ساعدي مرة مرة عزوزتك كذابة صحتها خير حتى مني وبنتها كبيرة مش ملزومة انت وقت الحاجة بس غيره شدي حوشك وبري شوي شوفي وضعهم وتم مش راقدة رقاد عندهم عنده الحق راجلك يفد
حسيت كلامها صح لان انا نعرف عماد زي العيل الصغير يحب من يهتم بيه ورومنسي ويحب الطلوع والمفاجأت ٠مايحبش الارتباط بشي
انا.. باهي هو معش كلمني ولا دورني
غالية.. غبية ماتعطيشي فرصة يتعود بقلتك بري كلميه وروحي وألهي بيه وبروحك واجري على عمرك ديري عيل
مشيت بعثت رسالة لعماد طز في كرامتي على حاجة تافهه
بعثتله
. زعلانة منك حبيبي.
عماد
قريت المسج وفرحت بيه بعثتلها
جهزي روحك جايك توا
ومشيت للسيارة
.
انا.. جاي توا
غالية.. قوليله لا خللي ندور عليك دورة
انا.. لالا يزعل بعدين هو على سبلة
مشيت نجري جهزت حوايجي ودارلي رنة ونزلت
سلمت على اهلي وطلعت ركبت في السيارة
انا.. استاحشتك مع ان زعلانة منك
عماد.. مش زي شوقي وزعلي منك
ومشينا رجعنا للحوش تحت كان الحوش مسكر ركبنا وقعدنا عالصالون
عماد كان يشوفلي بس وانا ساكتة ومبتسمة صح واجعني خاطري بس مانبيش نزيد الطين بلة
انا.. استناني شوي وراجعة
مشيت للدار دوشت بسرعة ولبست روب اسود قصير وناعم وجففت شعري وفتحته كان واصل لنهاية ضهري ودرت مكياج خفيف وبخيت بارفان وناديته
دخل عماد وقعد مبلم فيا ليا مدة معش دلعت روحي ودعلته
عماد.. شن الحلاوة هاذي
انا.. من يومي حلوة
عماد.. صح ودليل حبي ليك كل يوم يكبر…. زولتي انا
وقاطعته حطيت ايدي على فمه
انا.. اسسسسسسس الدار هاذي لما ندخلوها لازم انحوا زعلنا وعتابنا لازم تكون انت ليا وانا ليك وبس
وسهرنا سهرة حلوة رجعتنا لأيام عسلنا للفجر صلينا ورقدنا
.
الصبح ناض عماد قبلي ودار فطور وقهوة وجاء بينوضني قعد يبوس فيا لين نضت
انا.. احلى صباح مر عليا
عماد.. وانا أحلى ليلة عشتها
انا.. ربي يخليك ليا حبيبي
عماد.. حبيبك داير فطور تعالي
انا.. لا مستحيلة اللي انا نسمع فيه اكيد نحلم انا? كملت جميلك وجبته عالسرير
عماد.. ياحب عمري هذا كذب تلفزيون توا نوضي هي
نضت صليت ركعتين قبل الظهر ومشينا نفطروا وجونا عسل
.
عند العيلة
.
عمتي شادة عماد تزن عليه
عامر.. باهي يامي انا ماقلتش لا بس قلت لغزل ادورلي
عمتي.. اعوذ بالله من هالسيرة المهم البنت اخت صاحبتها
عامر.. صاحبة غزل
عمتي.. اي بنية وكان تشوفها ياعمورة زين وطول وجسم واسلوب وسماحة ربي يكتبها كنينتي
عامر.. خيرها ماقالتليش عليها
يتبع