احببتك من دون علمك

الحلقة الخامسة …

من رواية : احببتك دون علمك

………………

صفاء : اسفة ياولدي مفروض وقفتها عند حدها من البداية

صقر : ولا يهمك ياغالية صالحي خالتي اكيد زعلانه
منك ..

مهما كان في الاخير بنتها

صفاء : ان شاءالله خير
اختي مش رح تزعل مني لان الغلط من بنتها
من البداية ..

صقر : انتي تعرفي اكثر مني ..

ينادي بصوت عالي ..

شدي ياشدي

شدي : ميته خوف
نعم

صقر : بصوت اعلي ..

تعالي جاي يابنت …

شدي : بدت دمع تخاف من قصر لما يعصب …
بخوف ..
جيت نعم

صقر : حضنها شكرا لان بسبب عملتك لي زي وجهك ريحتني من مشكلة كبيرة

بحدة واخرلك مرة تصوريني
وديري لقطاتك الطفولية شد خشمها واضح

شدي : ابتسمت من بين دموعها
ماشي حاضر واضح

الخوف يعيش
???

….

عند منار وامها سهام

منار : مامي بجد بنت خالتي زودتها
مش معقولة الحقارة توصل لدرجة هادي

سهام : ولله ماني عارفه كيف الحل معها البنت هادي
بجد زوتها فوق الازم

منار : ربي يهدي
ولله وجعتني خالتي ..

سهام : المهم عدت علي خير
وبعدين يابنت خيرك مش حاطة ميكب
اكثر خيرا خفيف هلبا

منار : بملل امي نحبه خفيف مانحبش الاوفر
هلبا اني بنت مش مدام ..

سهام : قلبت عيونها
حسابنا في الحوش وشكلك اصلا مش حاطة برفان من اساسا ..

منار : بضيق
ان شاءالله تعدي علي خير

سهام : سمعتك للعلم
لكن مش وقت المشاكل توا

منار : صمتتتت

نزلت شدي وامها يهدرزو ويضحكوا

منار قعدت تشوف بحزن لي بساطة خالتها في تعاملها مع بنتهاوكيف انها قريبة من بنتها وتهتم لي كلام بنتها وتحترم فيه ..

علي عكس امها كليا ..

حاسة روحها فاقدة للحنان

حاسة انها وحيدة حياتها مبنية علي الموضي واللبس والطلعات محتاجة اخت تواسيها ام تسمعلها تهتم لي تفاصيل حياتها ..

بس لاسف امها مش حاسة بيها
حاسة بالحنان مع غير امها وبوها

????

___________________

عند رواسي …

رواسي : يابقرة انتي
مش عارفه علاش اني حاسة امي تتصرف معاي بطريقة غريبة ..

اماني : بعباطة
ممكن تفهميني ياأخت لاني بصراحه مش فاهمه قصدك

رواسي : اممم به شوفي امي كم مرة تحدف في كلام
غير مباشر ان في حد متقدملي او شيء من هكي

اماني : لا وللهي فوقي ياماما احساسك هذا شكلة بيوديك في دهية ..

سادك اوهام يابنت شكلك هبلتي ..

طبعا اماني تعرف بالموضوع
??

رواسي : تففف علي وجهك تصدقي
حتي اني عرفت لمن نحكي
تأشر بتقزز ولي منو
للعقربة هادي ..

اماني : صوتك عالي راهو
وشفتك

هههههه ولله انك هبلة حق

رواسي : من دارها
دخلكش فيا بري لي راجلك يستني فيك

اماني : هههههه
اليوم بايته معاك ماشي زردة نور العين

رواسي : تحلمي انك ترقدي جنبي
يالعقربة ..

اماني : صدقتيها ههههه
يامريضة تصبحي على خير بنمشي لي راجلي
سلام ???

رواسي : هههههه
وانتي من اهلو يالحب …

شدت فونها وتتصل بشدي ..

______________

فات الوقت بسرعة
وسهام وبنتها منار روحوا ..

صفاء تعبت اليوم كان بجد يوم مرهق
خشت لي دارها بترتاح
???

شدي : بملل
امممم الفيلم هذا شكلة حلو
خلي نتفرج عليه ومنها يفوت الوقت ..

صقر : نايض من النوم يتكسل وحالته حالة

_ علي شنو تتفرجي يابنت ..

شدي : صحه النومة كان كملت نومتك خير
ولله كيف فتحت علي فيلم شكلة حلو

صقر : ولله شبعت نوم الحق قولت نكسد معاك
لو سمحتي يعني ..

شدي : تفضل اصلا حتي لو قولت لا
رح تكسد معاي غصب شن الجديد يعني

صقر : حدفها بالمخدة بتاع الكنب
قولي باهي واسكتي وانتي ضروري تعلقي ..

شدي : هههه ايييي
ياوحش خزو عليك

صقر : شن خزو بتاعك هادي
تبي اريش شعرك يابنت ولا كيف

شدي : بليز الا شعري لا
ههههخ

صقر : قعمز ..
خلاص معنها هني روحك هي

علي صوت ?

ترن ترن ترن

شدي من يتصل بيا توا
غريبة ..

شافت المتصل بلهفة

شدي : الووو يالحب

صقر قام حاجب وفي خاطرة
اكبر كذابة اخخخ البنات لي يقدركم بس
???

رواسي : شن جوك ياعسل
تصدقي استحشتك

شدي : اي ولله حتي اني استحشتك
وفتحت المايك وترقص في حواجبها …

صقر عقد حواجبة من لقطة
اخته الغبية

رواسي : ادكرت يامعفنه
قوليلي يازفته علاش امس ..
قعدتي متشمته فيا لما صقروه شافني

شدي : ههههخ سوري مش قصدي
بس بصدق شن رايك في خوي طرف صح

وقعدت تشوف لي صقر بخبث
???

رواسي : سكري فمك يابقرة
وربي متت احراج

شدي : تشوف لي خوها وتغمزله ..

ههههه تستاهلي رواسي بجد خليك صريحه شن رايك في خوي كاوجهة نظرك يعني طرف ولالا ..

رواسي : امممم
بصراحه يعني خوك واضح عليه محترم ماشاء الله
وغير هكي بجد مش طرف وبس صاروخ يابنت
هههخخخخ بديت نتغزل شكلي ..

نبصر نبصر …

تنهدت بعمق اسمعي بنقولك علي سر
انتي تعرفي ماندس عليك في شيء

شدي : خافت وجاية بتسكر المايك
خوها صقر شد يدها

صقر فنص فيها ..

شدي قعدت تشوف بمعني خصوصيات
بس هوا منعها تسكر المايك

وطبعا الكلام بين صقر وشدي
بالعين ..
???

رواسي : وينك يالزفت
شكلي نتكلم بروحي …

شدي : باستسلام معاك معاك
حبي شكلة التغطية هربت

رواسي : امممم به اسمعي من الاخير بديت نفكر في خوك هلبا …

شن يعني هذا الشي ..

شدي : كيف يعني تفكري فيه هلبا
وضحيلي ..

رواسي :
قصدي كيف بنحكيلك يعني بديت نتخيل فيه كل مانغمض عيوني معدش عرفت كيف ندير والمشكلة
خايفة نكون مش طبيعية قولت انتي الوحيدة لي رح تقوليلي شن قاعد يصير معاي ..

شدي : بخجل من خوها ..

نقولك الصراحة بدون زعل ..

رواسي : ياريت بجد لاني هبلت ياشدووو
نبي نعرف شن قاعد يصير معاي لان بجد بننجن

شدي : في تفسير واحد بس
هذا يعني انك تحبي خوي صقر يارواسي

صقر : قريب يطير من الفرحه
السعادة لا توصف

رواسي : تبصري لالالا
اني لا يمكن نحب اكيد وهم ورح يمشي
شدووو ساعديني يازفت وكيف الحل توا

شدي : عندي ليك الحل المناسب

رواسي : وشن الحل يعني
بليز ساعديني ??

شدي : اسمعي توا الوقت تأخر
واول مانفضي رح نقولك شن الحل تمام حبي

رواسي : بستسلام
تمام حبي تصبحي علي خير

شدي : صقر شن التصرفات هادي
بجد نحرجت مع عرفت كيف نتصرف
وبعدين افرح العروس تحبك طلعت
ههههه

صقر : مش معها نهائي

شدي : صقرررررر

صقر : مطنشها ويحط في لحيته وبفكر

شدي تقنطت ناضت وخلاته
???

______________

رواسي حطت راسها علي المخدة وتفكر في كلام شدي ..

قعدت تفكر هل بجد اني حبيت صقر
والا مجرد اعجاب …

وياربي كيف قدرت ننسي حب محمد بسرعة هادي
قعدت تفكر لقت روحها مش متوجعة من فكرة
ان محمد سيبها حست بروحها مرتاحه
عكس قبل كانت تتوجع تتمزق من الداخل

حمدت ربي وشكراته …

ورقدت ..

___________________

مروان يكلم في منار علي الفون ..

مروان : حبيبتي طلعي لي في قلبك احكيلي شن مزعلك اكيد في شيء اني حاس بيك مش مرتاحه
في حد مزعل الحلو

منار : نهارت بكي …
بجد يامروان حاسة بالوحدة امي مش حاسة بيا
ماعندي من يحس بيا ولا بي مشاعري
همهم الوحيد المال والمظاهر
?

مروان : متزعليش روحك ياقلبي
امك اكيد رح تفيق علي نفسها مع الوقت

منار : قصدك بعد فوات الاوان
بعد لا تخسرني مروان اني نتعدب

مروان :
ان شاءالله مايصير الا كل خير
وبعدين تعالي جاي هوا اني شن ندير معقولة اني مش كافيك تبي شريك يشركني فيك يامعفنه

منار : ههههههه
ولله ضحتني رغم وجعي شريك شنو يامهبول

مروان : ههههه ريتي كيف ضحكتك
وبعدين بجد اني انسان غيور ونغار عليك من كل شيء ياروحي …

منار : ههههه اووو
حبوبي طلع غيور هلبا بالعكس كافيني بس نحتاج اهلي في وقت فراغي ياريت تفهم عليا

مروان : اني فاهم عليك
ورح نفضي روحي علي شانك ياقلبي
انتي لي تهميني في كل حياتي ورح نهتم بيك زي بنتي الصغنطوطه وزوجتي وصديقتي وكل شيء

منار : فرحت ..

حبت اهتمامه بيها خوفه عليها
يهتم لي ابسط تفاصيلها يحب يسمع كلامها
ويعطي فيها رائيه وياخد في ذوقها وعطيها حريتها في كل شيء حب صافي خالي من المصالح …

هذا الحب الصادق
???

_________________

شدي : ?
وينا هذا خيره تأخر وماكلمنيش
ياربي ???

حطت فونها عام ورقدت وهيا تفكر فيه
…

عند محمد وسهام …

محمد : ممكن كلمتين يالغالية

سهام : ممكن نفضل اكيد

محمد : اممم ولله شن بنقولك
البنت لي قبل قتلك نبيها

سهام : وشن جيب سيرتها الزفت هادي
و بعدين راك خاطب ياروحي بنت خالتك
ولا تحب ندكرك.

محمد : لالا ياغالية شكلك فهمتي
قصدي غلط

سهام : بحدة
منا شن قصدك ياولد بطني

محمد : باندفاع
تبي الحق ..
البنت شفتها بالصدفة وكانت مش صلعة
زي ماقولتي انتي

سهام : تكدب امك ياولد معقولة تكدبني
واني بالعمر هذا

وبعدين من قال انها مش لابسة بروكة
هاااا

محمد : قعد يفكر لقي كلام امه صح

اسف يالغاليه نوعدك معدش نتكلم في الموضوع هذا تاني وحقك عليا لو زعلتي ..

سهام : ياريت يعني
لان بجد رح نزعل منك …

محمد : باس راس امه زعلك مايهون يالغالية
وهي تصبحي على خير

ومشي علي حالة ورقد من كثرة التفكير ونسي يكلم شدي ..

____________________

صقر : حدف روحه علي المخدة
رح نكلم امي تمشي تخطبهالي خلاص معدش عندي صبر ..

ورقد وهوا يفكر فيها …

شن بصير تابعوني

هل صقر رح يعرف رواسي شن تكون بنسبة لي محمد

رواسي كيف بتكون ردت فعلها لما تعرف محمد خطيب اعز صديقة علي قلبها ..

شدي شن ردت فعلها
وهل رح ترضي تكمل مع محمد

منار كيف بصير فيها

خليكم معاي

نبي تفاعل ومشكورين ..

الكاتبة : ÉMåñ Ålbåshå