احببتك من دون علمك

الحلقة : 4 ..

من رواية : احببتك دون علمك ..

____________

في مكان تاني

عند منار بنت سمية ..

ياربي علاش امي تعامل فيا المعامله الزفته هادي
كل يلي يهما الفلوس والمظاهر …

مع ان كنا علي بابك ياكريم لولا الله ثم خالتي لا كنا
و لاشي …

والكارثة اهني ان خالتي متواضعه علي الاخير عكس امي كليا ..

اخخخخ يارب يغير حالك ياامي وخلاص ماعندي مانقول ..

وكان نقولها اني نحب شخص حالته المادية متوسطة
ولله ثم ولله الما تدفني حياة اني وياه ..

حطت يدها علي وجها اذكرت كيف تعرفت عليه
وقعدت تبتسم زي البلهاء ..

نرجع للخلف شوية ..

يوم مشو لي حوش اهل رواسي شافت مروان كيف يبصر مع خوته ..

وكيف نعجبت بيه علي الاخير طول وجمال
البنت عقلها طار ..

خفت اعجابها وخجلها وروحت مع امها …

اما عمك مروان قعدت متنح حتي كلمة لا
????

ايمن : بخبث
انت يااهبل خيرك سكتت في نص الكلام وقعدت يلعب في حواجبة بمعني كاشفك يابطل
???

مروان : تنحنح وقعد يكمل في كلامه ..
لكن عقله مزال شغال من ناحية البنت المجهولة
لي خدت عقلاتو ..

وفاتت الايام والثنائي مزال يفكرو في بعض

يوم من الايام منار قررت تطلع مع صديقاتها تتمشي علي الكورنيش ..

منار : اخي ياعليك ياعافنه اني تستخسري فيا طرف شوكولاته ودارت وجها الطفولي ..

هديل : هههههخ ولله القصة مش هكي بس اني سكري من امتي شفت وجهك اهبط ??

منار : يازباله شن قصدك

قطعت عليهم الكلام منال ..

منال : هههخخ صح كلامك ياهدول ..

منار : رقتلها منهم
وبخبث حبت تلعب بااعصابهم ..

ماشي منورين عليها

وخفت في مشيتها وتضرب في كثف شخص
اسفه مش مزال ماكملتش جملتها وقف الكلام في حلقها معدش عرفت شن تقول ..

مروان : متنح ااا ااا

هديل : منار من هذا

منار : حرك في يدها بعباطه
وثوتر ااا اااا

هديل : قامت حاجب اي به

منار : نزلت راسها بخجل
لان مروان بياكلها بنظاراتها

منال : بتهور : لا يكون هذا نفس الشخص لي واخد عقلك ..

منار : فنصت عيونها بصدمة من كلام صاحبها الغبية ..

هديل : بتهور وتسرع
هوا اقسم بالله ورتني صورته لا يكون تكلمي فيه ومتحشمه منا هااا ..

منار : تتمني الارض تنفتح وتبلعها العبيطات فضحوها وقدامه زيادة ..

مروان : معدش قدر يشد نفسه نفلق بضحك
ههههههههههه

منار : قريب تبكي ولما ضحك قامت عيونها لي معبيات دموع وشردت في ضحكته كيف تهبل وضاعت فيها هوا شاف نظارتها قام حاجبه هيا خلاص سخنت رجليها ومنعت تمشي بلا هدف ومش معدله علي حد فيهم اهم شيء تهرب من نظاراته وكلام صاحبتها لي فضحوها قدامه ..

مروان : قال لي صاحبتها شوية ونجوكم خلوني معاها شوية كانت رح تحكيلكم لكن انتم حشمتوها
وابتسم علي محبوبته وقعد يمشي خلفها …

منار : تتكلم وتحرك في يدها تقول بتخش دعكة

حقيرات زفتات ولله فضحوني ياربي خلاص
قريب بنموت من الحشم معدش عندي وجه نقابل
بية شدت وجها وقعدت تعيط وتضرب في رجلها علي الارض …

مروان : خلفها يسمع فيها كيف اتمتم ويبتسم علي حركاتها الطفوليه ..

منار : دهشت من المشي وحركاتها المهبولة وقعمزت حست بي حد قعمز جنبها …

بس معطتش اية اهتمام ..

مروان : مقعمز جنبها ويتفرج علي معشوقته
ويبتسم واخيرا قرر يتكلم ..

للعلم حتي اني معجب بيك ومن اول نظرة
ولان مش مصدق اني شفتك قدامي ..

منار : شافت جنبها لاقته مروان طبست راسها تحت
وقعدت تبرر …

بخجل اسفة بجد صديقاتي مبالغين بعض الشيء ووجها واضح احمر مع بعضه

مروان : هههه حسيت حتي اني خليك منهم توا اهم شي عندي انتي اني ..

منار : ابتسمت بخجل ..

مروان : حب خجلها ..
انتي مرتبطه في حد في حياتك …

منار : هزت راسها بمعني لا

مروان : فرح ممكن فونك شوي

منار : مدتهوله ..

مروان : كتب رقمه وسجل اسمه معشوقك
ودار رنه لي نفسة ..

منار : …

وشدوها هدرزة مع بعض ..

فاقت من شرودها علي صوت امها ..

منار : نعم مامي

سمية : وتي روحك بنمشو لي حوش خالتك

منار : فرحت اوكي مامي ..

سمية : بسرعه يابنت لان نبي نمشو بكري وروحوا بكري

منار : تمام ربع ساعه بالكثير

طلعت سمية بعتت مسج لي مروان انها بتطلع
هادي عادة فيها …

…………………

عند مروان ..

مقعمز مع صاحبه الشباب وخوته ..

وصله المسج ابتسم وبعتلها مسج
وسكر فونه
???

اوكي حبيبتي غيري جوك في حفظ الله ..

و بعدين
شدها هدرزة مع الشباب تاني ..

مروان : انسان طموح دكتور اسنان ..
حالته اهله المادية متوسطة اما هوا معتمد علي نفسه من صغره وحالته حكم ممتازة ..

انيق لي ابعد حد وجنتل وغير انه طرفوش
وجوه عسلللل ..

……………………..…..

عند شدي لبست فستان سكري لي فوق الركبة بشوي
مرسوم علي الجسم بطريقة حلوة فيه فتحه من الصدر بسيطة وحطت ميكب خفيف مع كسسواري بيسط وحطت الامسات الاخيرة من البرفيون وعطت بوسة لي مريتها ونزلت لي تحت …

شدي : هااا مامي شن رايك

صفاء : الله يبارك عسل يابنتي يارب نشوفك عروس

شدي : اميييي خلاص خجلتيني

صفاء : ههههه ياعليك بنت ..

شدي : قعمزت تاكل في فواكه مع
امها وتهدرز معها

……………………..…

عند رواسي غسلت وجها ولبست توته برمودة
وشده شعرها بشداده بطريقة عشوائية ..
وحطت لامسات بيتية ومشت قعمزت مع العيلة
وشدتها هدرزة …

حست امها تشوفلها نظرات غريبة بس ماحطت شيء في راسها ..

……………………

عند صقر ..

روح وحدف نفسه علي السرير وغمض عيونه
وقعد يسترجع في جميع ذاكرته وذكر اول مرة
شافها فيها …

صقر : شدي اعطني تليفونك شوية مش عارف وين حدفت تلفوني ..

شدي : مدتهوله ..

صقر : اتصل ولقي فونه ..
بس لفت نظرة خلفية فون اخته شاف بنت في قمة الجمال عرف انها رواسي لي ديما تحكي عليها

وتاني مرة شافها لما وصل اخته لي الجامعة
زاد اعجابه فيها اكثر واكثر …

وسأل عليها اكثر من مرة وكان الرد ان البنت تبارك الرحمن …

والباقي تعرفوا ???

……………………..………….

فتحت الشغاله الباب وكانت سمية ومنار

استقبلتهم صفاء وشدي ..

بعد السلام والسؤال ..

البنات خدو جنب وشدوها هدرزة مع بعض
والخوات نفس الشيء ..

واحتمال تجي الخاله الثالته مع بنتها ..

منار : حكت لي شدي علي كل شيء صار معها

وشدي : فرحتلها علي الاخير بس في نفس الوقت خافت من ردة فعل خالتها لو تعرف بالشي هذا ..

علي خشت بنت خالتهم المغرورة زي امها (سهام)

احلام : هاااي صبايا اني جيت

منار : ياكرهي لانسانه هادي

شدي : كتمت ضحكتها وعليكم السلام

احلام : طنتشهم وقعمزت معاهم ..
كيف اخباركم ..

شدي : بخير ونعمه ..

احلام : منا وين صقوري مش مبين

شدي : قامت حاجب علاش تسألي وبعدين شن صقوري بتاعك هادي احترمي نفسك اسمه صقر

احلام : اغتاضت قريب تتفجر ..
بمكر ? توا نوريك ياشدووو يازفت
تلفتت وسألت خالتها خالتو منا
وين صقر مش مبين

صفاء : مش عاجبها السؤال
راقد في داره علاش تبي في حاجة

احلام : نحرجت لالا الحق نسأل علية
واااممم نوم العوافي ..

قعدت شوية مع البنات وستاذنت لي الحمام

منار : البنت هادي وراها مصيبه اني حاسة

شدي : نفس احساسك شن رايك انتبعوها ..

منار : فكرة ولله ..

عند احلام ساوت روحها في المرايا وحطت نص البرفان وحطت روج صارخ ومشت تتمايل لي غرفت صقر ..

شدي : هادي شكلها حق راسمه علي مصيبة

منار : تبعيها واسكتي لا تفضحينا .

شدي : اوكي ..

صقر : مغمض عيونه ضربت في خشمة ريحة برفان قوية علي الاخير ..

شدي : منار افتحي الكاميرا علي الفيديوا خلي ندلوها بيه الوسخه هادي ….

منار : ولله فكرة هخخخخ

شدي : صوري يازفته وسكري فمك ..

وفعلا بدو يصورو ..

صقر : استغرب فتح عيونه شاف بنت خالته واقفة قدامه
وتشوفله بنظرات خبث

احلام : هاي صقوري شن اخبارك ياروحي

صقر : تقنطي منها شن اديري اهني ومن سمحلك تخشي لي داري واما روحك لي تحكي عليها ..

احلام : امممم علاش مكش حاس بيا اني نحبك ونبيك ياصقر حس بيا حرام عليك ..

صقر : اما حب واما كلام فارغ ..

خليها في بالك لو تكوني اخر بنت في العالم مستحيل نفكر نتزوج وحدة زيك ترمي في نفسها
علي لي يجي ..

احلام : جرحها كلامه في الصميم ..
علاش تتكلم معاي هكي حرام عليك اني عندي مشاعر ونحس ..

صقر : لو حافظة نفسك راهو مش هذا حالك
وللعلم اني نبي غيرك ورح نتزوجها فااا نحي افكارك السادجه من راسك واخرلك مرة نشوفك في داري
واضح كلامي ويلا توا الباب يفوت جمل ..

احلام : بخبث جبته لي روحك ياعمري
الزواج رح تتزوجني غصب …

بدت تمسح في روجها بيدها لبزت وجها بيه
ومزقت شوي من لبسها وبدت تعيط بصوت عالي

الحقوني الحقوني ..

كله تحت نظر منار شدي يلي مصدومين

النسون من الخلعه جوو يجرو ..
وشافو المنظر نخلعوو ..

صقر : مخلوع من لي قاعد يصير قدامه

صفاء : جت ضربت احلام كف

احلام : مصدومه بس كملت تمثيلها ..
خالتي ولدك حاول وقعدت تبكي من الصميم
?????

صفاء : اطلعي برا حوشي ولدي ونعرف ربايتي مستحيل يديرها

سمية : مخلوعه ..

صقر : شاف لي امه بمعني ولله مادرت حاجه

صفاء : طمناته براسها بمعني نعرف ياولدي..

سهام : بدت تعيط بنتي حرام عليكم معقولة هكي ياصفاء معقولة هكي اديرو في وحيدتي ..

صفاء : اني ولدي ونعرفه شنو …
بنتك كله تمتيل في تمتيل وللعلم عندي علم ان بنتك تحدف في روحها علي ولدي بس اني ساكته لعيونك بس لي اهني وبس متوقعتش النذاله توصل لي هادي الدرجة

سمية : بس يا صفاء الشيطان شاطر

صفاء : كيف بتتكلم قطعت عليها منار

منار : ماما خالتو اني وشدي شفنا كل شيء
وصورنا حتي

الكل شافولهم بمعني وين الفيديوا

شدي ومنار : فتحوا الفيديوا ..

والكل حاله صمت وصدمة من لي شافوا

سهام : قعدت تضرب في بنتها الله يحشم حالك زي ماحشمتيني قدام خواتي نوضي الله يرفعك ..

واعتذرت من خواتها وصقر وروحت بي بنتها لي سودتلها وجها قدام اهلها ..

……………..

عند رواسي ولت فكر هلبا في صقر وتسرح فيه
بس مع هذا خايفة انها تحب انسان ماتعرف عليه
شي الا ان هوا اخ صديقتها ..

……………………..….

نبي تفاعل …

وينكم ياهووو تفاعلو معاي
????

شن بيصر تابعوني ..

الكاتبة : Eman Albasha