احببتك من دون علمك

الحلقة 🙁 1)

من رواية : احببتك من دون علمك

تحت عنوان :

المواجع والظنون ..

________________________

علي الفون …

رواسي : ههههه
يعني خلاص قررت تجي تخطب
واووو مش مصدقة ياروحي ..

محمد : لا صدقي حبيبتي واخيرا بعد خمسة سنوات واخيرا قدرت نقنع امي ..

رواسي : بالله قولي متاكد ان امك راضيه بي علاقتنا
رد بالك تزعلها ياحمودة هيا الغلي كله راهو …

محمد : تقدري تقولي اية بعض الشي مقتنعة انتي تعرفيها طبعها صعب شوية بس طيوبة ..

رواسي : هههه تضحك من القلب
واخيرا رضت عليا تعرف ولله حبيتها امك
مع انها صعبة شوي بس مع هذا حبيتها
??? ?

محمد : فرحان لي فرحتها يارب دوم المحبة ..
هههه واخيرا رضت ولله ..

رواسي : تعرف ياحميدة احلي شعور لما تحب شخص من قلبك ويكون عند حسن ضنك تحس نفسك اطير فوق من الفرحة ..

محمد : ولله حق كلامك ياغاليتي تعرفي حبيبتي يارب نكون عند حسن ضنك ونتمنى من ربي يجمع بينا بالحلال ..

رواسي : ان شاء الله يارب ..
???????

ماقتليش حددة امتي رح يعني تجوا للعيله
تفرك في يدها بطريقه متوترة ..

مع انها علي الفون تتكلم
???

محمد : بعد يومين ان شاءالله ..

قصدي انتي كلمي العيله وبلغيهم ان رح نجو ولو مايساعدكمش بعد يومين شوفي لي يساعدكم …

رواسي : ان شاءالله ..

بعد مرور يومين ….

ام رواسي ونسون خوتها قايمين بالواجب ..

رواسي بنت وحده وعندها خمسة خوت شباب زوز متزوجين والباقى مزال مش متزوجين ..

نضمت رواسي روحها ولبست لبس راقي ماشي مع جسمها المنحوت ..

وكانت في قمة الروعه ميكب خفيف طالع مع شكلها الملائكي بس مع هذا في شيء مخرب عليها ان شعرها خفيف بشكل كبير وممكن الشي هذا مسببلها نقص في شخصيتها من دون وشاح ..

ومتوتره بشكل كبير ….

وصلوا اهل محمد ..
الكل رحب بيهم وكانت الضيافه افضل ما يكون
وكان كل شيء في قمة الذوق ..

بس مع هذا ام محمد مش عاجبها شيء وقتلها الفضول تبي تشوف البنت لي ولدها ممكن يتخلي علي الحوش علي خاطرها ..

ام محمد سمية ..

تتكلم بتعالي وتكبر ان شاءالله لو ربي كاتب النصيب رح يكونوا لي بعض ..

علي عكس بنتها منار ..
طيوبة ومتوضعه عكس امها كليا ..

بس اخت سمية سناء شايفه روحها احرف من اختها
تشوف بلقطات تعالي وخلاص حتي الكلام ماتتكلمش من كثرة النفخ ..

الكاتبة : ياريتك تتفجري نكرهم الناس هادي ?

ام رواسي فاطمة ..
طيبه فوق الازم ..

ان شاءالله يارب اهم شي هما يكونوا راضين ويبوا بعض هذا اهم شي عندي ..

سمية : اية اية ..
ماشي اني توا نستاذنكم عندي مشوار مهم

طبعا نسون خوتها مش عاجبهم اسلوب سمية
ولا طريقة كلامها يعني متكبرة بشكل كبير ..

اماني مرت خو رواسي ..

ايناس مرت خوها حتي هيا ..

اماني : تفضلي خودي راحتك ..

ايناس : اذنك معك ان شاءالله ..

كلموها بنفس الاسلوب ..
ونفس النظرات ..

رواسي : مضايقة من طريقة تعامل ام محمد مع اهلها
وحستها زي الاهانه انها تتكلم معاهم بطريقة هادي ..

بعد لا طلعوا الضيوف ..

اماني : حاسة بي احساس رواسي ..

حطت يدها علي كتف رواسي متزعليش روحك
مكش مجبروه تتحملي ناس لزجه بطريقة هادي ..

رواسي : تشوف لي تحت حالة صمت ..

واضح انه منهارة ???

اماني : عارفه انك تحبي وماترضي فيه شيء
بس فكري بطريقة تفكير مجتمعنا اني اختك مش مرت خوك شوفي ..

اذا كان الام مش حابة كنتها يعني الكنه رح تعيش متنكده وغير هكي نهايتها طلاق ..

راسي : اضايقت اكثر واكثر ..

اماني : بس مع هذا شوفي شن رح يرد عليك محمد اذا كان حق يبيك ويحبك حب صادق رح يدير المستحيل علي خاطرك ..

ولو دار المستحيل انتي ممكن تتحملي علي خاطر عيونه قصدي اني عطيتك كل الاحتمالات لي رح تصير باش تعرفي روحك شن رح تختاري لان الخيار هذا مصير لي حياتك القدام ..

رواسي : صح كلامك بس بصراحه مش عارفه كيف نتصرف ..

اماني : شوفي عقلك ثم قلبك ..
شوفي للمستقبل مش للحاضر ..

رواسي : ماشي رح نفكر ..
هي نستاذك توا نحس في روحي تعبانه علي الاخير ..

خشت لي دارها بدلت ملابسها وتكت تفكر
في كلام اماني ..

وقررت تختار قلبها اهم شي عندها متخسرش حبها
وممكن تتحمل اية شي علي خاطر عيونه ..
لان حب خمسة سنوات مش علي الفاضي ..

اتصلت بي محمد ..
اطمنت عليه وهدرزة معاه شوية ..

محمد استاذن منها وسكر الخط
لان امه روحت ونادت عليه ..

فات الوقت وراسي غارقه مع العيله ..
بعتت مسج لي محمد توا نكلمك لما الحوش يفضي
استغربت مافيش ولا رد علي المسج ..

الحوش فضي والكل روح لي حوشة ..

رواسي : اتكت علي سريرها …
وقررت تتصل بي محمد ..

الرقم المطلوب مقفل ?
استغربت غريبه اول مرة يسكر فونه ..

فات الليل كامل ومافيش اية اخبار علي محمد
ورواسي مارقدتش وهيا تفكير ..

هل صاير معاه شيء والا تخلي عليها
معدش عارفه شن لي صاير ..

كل شوية تشوف للفون ..

ياربي يكون صاير معاه شيء
يارب مايخيب ضني …..

اني عارفه مستحيل يخيب ضني فيه اني نحبه
وهوا يحبني هوا قالي كل العالم يتخلي عليك الا اني مستحيل نتخلي عليك ..

عند محمد ..

متكي وحاط يده علي راسة ويبكي …

نرجع للخلف شوية ..

محمد : حبيبتي شعرك لي وين طولة

رواسي : توترت ..
علاش تسأل قصدي اني السؤال هذا منحباش ..

محمد : فضول تعرفي احلي شيء نحبه ونموت فيه الشعر الطويل ..

رواسي : حالت صمت ..
اي اي ماقتليش وغيرت الموضوع …

………..

فاق من شرودة وشرد مرة تانية ..

محمد علي الفون …

محمد : شوية حبيبتي امي تنادي عليا ..
شكلها كيف روحت ثواني ياعيوني نشوفها ونجيك ..

رواسي : اوكي تمام خود راحتك
وخلي بعدين لما نفضي نكلمك علي راحتي ..

محمد : ماشي حبيبتي هي سلام

رواسي : سلام ..

محمد : ياهلا ومرحبا بزين ….

سمية : اما زين تحكي عليه انت خليت فيها زين اصلا هكي تحشمني بحدا اختي …

محمد : بستغراب
علاش نحشمك شن صاير

سمية : بغضب
اني سميه بنت سعد يشوفولي بتعالي
ويتكلموا معاي بقلة ادب هادي نهايتي ننهان
ياولد بطني

محمد : معاش من يهينك ياغالية ..

سمية : لا ولله هانوني ونص ..
ولا ياريته هكي ماكنتش نعلم بان ذوقك منحط لي درجه هادي ..

محمد : منحط ❕❕

سمية : اية منحط مختارلي بنت صلعه من غير شعر
وتقولي نحبها شن منطري بحدا اهلي ناسي اني ..

محمد : صلعه شنو لي تحكي عليها ..

سمية : اقسم بالله الا صلعه في شعرتين بس يمكن
في راسها ..

محمد : مصدوم صدمة عمره
مش مصدق بس هادي امه علاش بتكدب عليه ..

سمية : اسمع ياولد يااني ياهيا …

ناس بطريقة هادي متشرفنيش انها تكون من توبي
ولو خترتها هيا اعرف روحك محروم من الارث ورح نتبري منك ليوم الدين ….

محمد : مزال مصدوم ناض وهوا ساكت ..

سمية : ابتسمت ابتسامه انتصاريه ..
واخيرا وصلت لي مبتغاي حطت رجل علي رجل وتشرب من الكافي بكل روقان ..

نرجع للواقع ..

محمد : فوق من انها كدبت عليا ومحكتليش علي عيب من عيوبها واني كنت صريح معها في كل شيء
علاش هدمتي حبنا بكدبك عليا وتعرفي اكره شيء عندي الكدب ..

وغير هكي هنتوا امي ..
ولله ماتجيبها ولادة لي تهين امي ..

نزلت دمعه من عينه ..
رح ننساك يارواسي ..

فتحه فونه لقي اكثر من مسج
حدفهم من دون لا يقراهم ودارلها بلوك
من كل مكان بعت مسج وكسر الشفرة ..

ورقد …

…….

عند رواسي ..

سمعت صوت المسج ..
فتحاته وكانت الصدمة اهني …

هما كلمتين ..
يلي بيناتنا اعتبري انتهي ..
بمعني مافيش نصيب ومعاش لي يهين امي يامحترمين ..

اني رح نفوت الموضوع علي خاطر العشرة لي بينا حتي لو كانت علاقتنا مبنية علي كذب وعدم ثقة وفهمك كفاية ..

لو تحاولي تتصلي بيا رح تشوفي شيء مش رح يعجبك اعتبري تهديد لو تحبي وانتي جربي وشوفي ..

رواسي : هذا شن قاعد يقول لا يكون ..
يعني خاب ضني ..

اني مش رح نذل نفسي اكثر من هكي
هوا الخسران ….

وفجاءة نهارت وبدت تبكي …
نعرف انه سيبني لاني بشعة لاني صلعه
مقدرش نصارحه حاولة بس مش بيدي
لكن رح نتغير مش علي شان حد علي شان نفسي
مسحت دموعها بطريقة طفولية ..
???

فاتت الايام والايام …
رواسي لا زالت حبيسة لي دارها علي نفس الحالة
ليها شهر والكل يحاول يغير جوها بس لاسف نفس الحالة الصدمة كانت كبيرة بنسبة ليها ..

اماني : خبطت الدار ..

رواسي : منوو

اماني : فتحت الباب ..
دخلت ربع راسها ممكن ندخل مع ضحكه عبيطه ..

رواسي : ممكن تفضلي حبيبتي ..

اماني : خيرا الحلو مش عاجبني جوه

رواسي :بأبتسامة
شوية ارهاق بس

اماني : امممم به اني عندي ليك سبرايز حلو
ورح يعجبك ..

رواسي : يلي هوا ..

اماني : ايناس خشي هي

ايناس : تاترا اني جيت
خشت بسفرة معبية مقرمشات ..
وحجات خفيفة ..

رواسي : بصراحه مخاطري في شيء النية متسدة
يابنات

ايناس : هذا غصبا عنك وفيش نقاش هيا هيا
تتكلم بطريقة مرحية ..

رواسي : ان شاءالله خير

اماني : غدوا رح نطلعوا عزمينك علي حتت مطعم انما ايييييي خيااال ..

رواسي : ولله يابنات مخاطري في حاجه
نفسي متسدة عارفه انكم حاسين بيا وتبو تغيرولي
جوي لكن لكل شيء ياخد وقته هيا فترة وتعدي ..

ايناس : تكسريش بخاطري ..

اني كنت فرحانه وسعيدة انك رح تطلعي معاي
وانتي تقوليلي لكل شيء وقته ..

اماني : وحق ربي ماني ماشية لن تمشي معنا
واني حلفت وخاطري نمشي لو تبي تحرميني ارفضي

رواسي : ماشي زي ماتحبوا ..
خلاص غدوا رح نمشوا وابتسمت وفرحانه ان ربي رزقها بنسون خوت الله يبارك عليهم ..

فات اليوم علي رواسي زي ايام الشهر لي فات ..

يوم جديد ..

لبست رواسي وحطت شوية مبك اب
طبعا رواسي قمة في الجمال ..

لون عيونها بندقي فاتح مع نسيج رمادي
رموش كثيفه عيون مرسومات رسم ..
بشرتها برونزي فاتح وزنها معبية شوية (57 )..
طولها حلو وماشي مع وزنها جسمها منحوت نحث …

لكن المشكله الوحيدة شعرها ?

حطت اخر لماستها وطلعت كالعادة
تحفه …

علي خشت ايناس ..

ايناس : جيتي وش جابك حبيبي
تغني الاخت ديما جوها رايق ..

هااا شن واتي الحلو ..

رواسي : واتية ياطقة ..
روقان علي الصبح ?

ايناس : بهبل
– باش تعرفي بس

رواسي : منا الهبله التانية وينها

اماني : حاطه يدها علي خصرها كنت نسمع فيك راهوا لكن لعيون الجمال هذا كله رح نفوتها ..

رواسي : اسفتيني (يمعني خجلتيني) يابنت

اماني : مش عليك ياحولة نحكي علي سلفتي
العسولة ..

ايناس : بدت تنفخ في ريشها

رواسي : الله يثبت العقل
يلا يلا خلي نمشوا لا تصير كوارث ..

طبعا اماني تسوق في سيارة بس ايناس تخاف
و رواسي تفكر انها تتعلم القيادة ..

رواسي : سلمت علي امها وطلعت ..
طبعا ام رواسي مابتش تمشي معاهم ..

اماني : رواسي قبل المطعم عندنا مشوار وبعدين
نمشوا للمطعم اوكي

رواسي : اوكي حبي خودي راحتك

ايناس : بدت تهدرز وجوها جميل ..

وصلوا للمكان المنشود ..

رواسي : بستغراب
علاش جاين لمركز التجميل …

ايناس : مش عارفه غير انزلي وانتي ساكته
توا

اماني : دارت روحها ما سمعت شيء
وكملت طريقها سبقتهم ..

……………

ايناس : ها شن صار

اماني : تعالوا هي ..

رواسي : شن قاعد يصير يابنات مش فاهمه شيء
فهموني ..

ايناس : شافت لي اماني ..
تبي الحق احني مش عاجبنا لي قاعد يصير معاك
وانتي كل يوم تدبلي قدام عيونا وحني مش رح نرضوا بشي هذا شي ..

رواسي : شن دخل الكلام هذا في المركز

اماني : تعالي توا تعرفي شن صاير ..

رواسي : قعدت تشوف لهم بمعني مش رح نجي

اماني : لو توثقي فيا تعالي

رواسي : استسلمت لي امر الواقع
وجت معاهم خشت لدكتوره العناية بالشعر ..

اماني : السلام عليكم

د. نور : وعليكم السلام ..
اكيد انتم لي كلمتوني علي خاطر رواسي صح

اماني : بزبط ..

د.نور : ممكن رواسي تنحي الوشاح شوية

رواسي : فنصت عيونها علاش انحي وشاحي

د.نور : اني دكتورة نور تخصصي معالجة تساقط الشعر وتلفه ورح ارجعك زي الاول واحسن باذن الله

رواسي : ماشي …
نحت الوشاح …

د.نور : اني رح نطلب منك بعض الفحوصات الازمه
ورح نعطيك بعدها العلاج لي يمشي معاك ..

رواسي : اوك ماشي ..

دارت الفحوصات في نفس العيادة
وطلعت النتيجه ..

د.نور : انتي رح تحتاجي لي جلسات علاجية لمدة سته شهور عندك ضعف حاد في بصيلة الشعر ..

ورح نعطيك كريمات كل يوم تستخدميهم ..
بشكل منتظم ..

رواسي : ان شاءالله ..

د.نور : وان شاء الله رح ترجعي احسن من الاول

رواسي : طلعت هيا والبنات من المشفي ..

اماني : حضنت رواسي ..
وهادي اول خطوة رح ترجعلك ثقتك بنفسك
احسن من الاول يارب تكون عجباتك السبرايز

ايناس : هيا يابنات جعاااانه

رواسي : مسحت دموعها يابنات ربي مايحرمني منكم يارب ..

ايناس : عيب عليك انتي اختي يابقرة

رواسي : هههه ولله وانتم خواتي صح ربي مارزقني بي خوات بس ربي عوضني بيكم ..

تعالوا جاي كيف هوا مركز خاص وانتم مادفعتوش فلوس ..

ايناس : ولله شن بنقولك هذا المركز صح خاص بس فاتح جديد ..

واول عشرة زبائن رح يتكلف بيهم المركز كاهدية لي الاستفتاحية وانتي من ضمن 10 ..

رواسي : الحمدلله يارب ..
دعتها من قلبها ..

في المطعم ..
كل وحدة طلبت طلبها ..
شدوها هدرزة واكل وضحك ..
وجي الوقت لي كملوا في اكلهم ..
وخلصوا الحساب ..

بس كانت الصدمة لي رواسي …
محمد مقعمز علي طاولة وشاد يد بنت وواضح انه يراضي فيها ويتغزل ..

رواسي : طلعت طيارة من المطعم ..

اماني : خيرها المجنونه هادي ..

ايناس : كانت منتبها للموقف من الاول ..
وحكت لي اماني شن صاير

اماني : ياعليك حالة وخلاص كيف الحل توا

ايناس : اعمل نفسك مش فاهم
ونحاولوا نغيروا جوها اوكي

اماني : اوكي ..

طول الطريق وهما يحاولوا يغيرو جو رواسي
بس رواسي مش معاهم نهائي ..

________________________

شن بصير تابعوني

رواسي شن بصير فيها
هل حالتها رح تتحسن ولا بتخش في حالة اكتئاب
حادة . .

محمد شن ردة فعله لما يكتشف الحقيقه

الكاتبة :
ÉMåñ Ålbåshå