رواية ضحايا للكاتبة زهور جمال الدين

#ضحايا

بقلم زهور جمال الدين⚘
?الحلقه السابعه ?

–

الحفله تمت ..
فاطمه لمت باقى حاجاتها متع الحفله …
معاها ناهد بنت اختها .. وامل بنت خوها .. والسيارات ايراجو فيهم برة .. والبنات متع خدمه الصالة يطلعو فى باقى العشى والعصير والحاجات … صغار عمامهم وصغار خوت فاطمه واقفين يركبو فاللى بيروحو .. ماعدا معتز ولد اختها قالو تعارك مع امه كيف بتحضر العرس وسافر لى تونس….ركبو للسيارات وروحو … وفاطمه تبكى والدموع مابوش يكفو… على فراق بنتها …
وصلو للحوش ونزلو
-عبدالسلام / خيرك يا فاطمه
-عمتك عزيزة/ هبال نساوين …عطت بنتها غير هيا
-مراد / جبتولنا مالعشى ولا لا
-عزيزة / وخيرك مامشيتش مع بنت خوك
-مراد/ ماهو مشى خالد ساد
-عزيزة / لا لا مامشاش خالد .. مفيدة ركبت مع جعفر
-فاطمه ماشيه جهه حوشها / خالد قال مدامه خوتها الزوز ماشيين علاش ماشى غير نكثرو فى السيارات
-مراد / تى غير وين خاشه ..هاتو العشى
-فاطمه تضحك / توة باللهى طامع فيا يا مراد ماعندى عظم صحيح .. تو يحطولكم البنات
-ناهد من ورا كوفينو السيارة / تو نحطلكم انا عمى مراد
-مراد / سقدى قبل مايجى جعفر….هداكه ياكل الاخضر واليابس
-عزيزة بعكازها ماشيه لى حوش عبدالسلام/ ارفعو لى بوكم
-عبدالسلام / اكيد يااام

__________________________________________

–

فى شقه يارا

النساوين خلو يارا ونزلو ..لقو جعفر وقيس واقفين مع شاهين وخوته …ستادن قيس وسقدهم شاهين وروحو … وركب من الدروج …
كل مايركب درجه يغط عليه النفس اكثر .. توقع عركه قويه بتصير فالحوش الليله … لكن لازم يركب ويخش شقته
فتح الباب وخش…. يلاقى يارا واقفه فالوسط وهيا بي برنوسها ….
صكر الباب .. انخلعت هيا وتلفتتله …
وقفو الزوز ويشبحو لبعض …
مشى شاهين خطوات … خدي شنطتها … فتحها .. طاحو منها فلوس متع النحيلة اللى عطوهالها فالحفله …
نزل قام الفلوس .. وحطهم عالطاولة ….
طلع تليفونها … بيفتحه لقى فيه رقم سري ….
مدهولها / ممكن تفتحيه …
يارا خافت من الموقف..مهما يكون هدا راجلها توة … خدات التليفون منه وفتحاته …ومدتهوله ….
خداه …فتح لوحه الارقام ضرب رقم … شرين تليفونه
مدلها تليفونها / هدا رقمى .. ديريله حفظ
-مدت يدها بتاخده بانت الحنه .. ركز شاهين فيها .. عجباته
خدت التليفون بسرعه.. وهيا ساكته
تلفت بيطلع …. مشى خطوتين .. وتلفتلها
-شاهين / اسمعى …هدا حوشك .. وكل حاجه فيه ملك ليك انتى .. الثلاجة معبيه … لو استحقيتى اى شى كلمينى ..ولو ماتبيش تكلمينى ابعتى رساله …
وتلفت …
-يارا / بتطلع ….
-شاهين / ايه
-يارا / خليك
تلفتلها .. قعد يشبحلها
-يارا/ قصدى شن بتقول عليا الناس.. طالع من اول ليله
-شاهين/ هدا اللى هامك … الناس
تلفتت للجهه الثانيه واضح عليها مضايقه
-شاهين/ متخافيش.. الصبح تلقينى هنايا قبل مايجو خواتى
..الدور الاول فيه الورشه متعى اللى نصلح فيها فالسيارات
…داير فيها دار نضيفه بي سريرها مرة مرة نرقد فيها …
-يارا/ ماهم بيشبحوك نازل من الدروج
-شاهين مشى لباب الحوش وفتحه ووجه ايده/ الدروج هدا تنزلى منه يطلع للشارع طول .. والباب المقابل هدا تفتحيه تلاقى دروج ينزل لى للورشه
يارا سكتت… لانها لو قالتله اقعد بتبدا تبان كأنها مهتمه بيه وماتبيشى ينزل …سكتت لانها بالفعل مستبيعه .. ومش فارق معاها وين يرقد
شبحلها شاهين..وفتح الباب وطلع وصكره وراه ونزل

_______________________________________

_

ثانى يوم الصبح

فاقت يارا من النوم …..

لابسه قفطان نوم قطنى .. وغاسلة مكياجها .. شرين تليفونها
.. كلمتها حماتها الفة قالتلها بتجيها ..
-الفى / صباح الخير حبيبتى
-يارا / صباح النور
-الفى/ اهو بنجوك انا ومجيدة مرت خوى ..منجيبولك الفطور
-يارا/ علاش اتعبو فى ارواحكم .. عادى الثلاجة معبيه .. ماشاءالله فيها كل شى
-الفى/ لا عاد .. هادى اسبارنا .. ومن حقك علينا الفطور والغدى ليوم اسبوعك اندخلوك على اهلك وبعدها زى مايعجبك تبى معانا باهى ..تبى تاكلى بروحك عادى
-يارا/ انشاءالله خير
-الفى/ شاهين فاق
-يارا انتبهت/ شاهين!!… اهاا فاق …
-الفى/ يتصل بيه عزيز خوى مايردش
-يارا/ هوا مشغول فى الدوش
-الفى/ امالا تعرفى كيف .. نزيد ساعه ثانيه ونجيك باهى
-يارا/ تمام
-الفى/ مع السلامه
وصكرت الخط

__________________________________________

–

يارا معش عرفت كيف تتصرف … باهى اللى عطاها رقمه قبل ماينزل امبارح … خدت تليفونها واتصلت بيه … يضبح ومايردش… عاودت …عاودت … وهوا شى ..والبنيه قريب بتجى …
قررت انها تنزله …
لكن شناطيها وحوايجها مزال ماجابوهمش خوتها …
لبست البرنوس الخارجى .. ولماته على يديها … وفتحت الباب حطت قدامه كرسى بيش مايتسكرش .. وفتحت الباب المقابل ونزلت منه للورشه

صنه زيوت حالة .. حطت يدها على خشمها ونزلت …
لقت زى الكراسان قعدت تمشى عليه … تشبح فى الدار فى نهايه المكان … خشت … وقفت قدام الباب …وقلبها يطق يطق يطق … فتحت الباب وخشت ..
تلقاه راقد عالسرير فى شورط قصير .. ومش لابس شى من فوق … ويشخر فى سابع حلمه ..وجنبه طفايه معبيه بالسباسى شوره طول الليل يخمم ويدخن …. وبدى تليفونه يشرين ..
المتصل / وردة مدار
وفى خاطرها / وردة .. من وردة هادى اللى متصلة فى يوم صباحيتهم على صبح ربي
سكت التليفون …
-يارا / اسمع …. اسمع …
وهوا راقد ….
حطت يدها على كتفه وتهز فيه / اسمع …. اسمع
-شاهين من نومه/ ايوووه
-يارا/ ياراجل نوض خواتك بيجونا توة …
شاهين فتح عيونه وفاق .. ويشبحلها فالنضرة الاولى والله مازبطها شكون ??
-غطى جسمه بالغطا / صباح الخير
نست البرنوس … وهوا يشوف فى ايديها والحنه …عجباته
-يارا شافاته لمت البرنوس عليها / نوض ياسرك نوم ..اختك الفى اتصلت وقالت بتجى هيا ومرت خوك
-شاهين يشبح لى ايديها وجسمها / يتفضلو مرحبتين بيهم
-تلفتت يارا بتطلع / قلت ادب …
مشت وصلت لى نص الكراسان… وتلفتتله لقاته حط راسه ثانى بيرقد … رجعت للغرفه
-يارا/ مش نكلم فيك
-فتح عيونه / خيرك خلعتينى
-بدت تتكلم عادى لكن هوا يشوف فيها رقه/ ليش خلعتك .. والله ماقصدى .. هيا نوض
-يشبحلها ورياقته سايله/ باهى تو نوض …وتيلى حوايجى تو نجى
-يارا / مانقدرش نخليك ونركب .. نخاف ترقد .. هيا نوض استرنا قدام الناس
-شاهين حس بصوتها رقيق والحال يعلم بيه ربي/ باهى اركبى تو نجى …
-يارا / لا منراجيك لين تنوض ونركبو مع بعض
شاهين حس انه ضعف قدامها وقدام صوتها وبينوض وبيهجم عليها ماهيا الا مرته فالاخير…لكن شد نفسه بالسيف
-يارا / هيا نوض عاااااد
-قص عليها بي عيطه قويه/ قلتلك اركبى … والمكان هدا معش تنزليله باااهى
-رعشت مع بعضها / باهى … باهى تو نركب…
وتلفتت بتمشى وتجى طايحة …
وقف شاهين يجرى … مشالها قامها من يديها …
بعد ماوقفت .. فكت ايديها منه / حول ايدك …
وتلفتت بتطلع … قعد واقف حسها زعلت هلبا … مشت للدروج .. وركبت تجرى للحوش … حولت الكرسى وصكرت الباب … ومشت لى دارها صكرتها بالمفتاح وقعمزت تبكى ..

__________________________________________

_

ركب شاهين فتح الباب بالمفتاح … وخش … مشى لى دار النوم بيفتحها لقاها مصكرة
-شاهين / يارا
وكانت اول مرة يناديها بي اسمها
وهيا فالدار تمسح فدموعها وساكته
-طق عالباب/ يارا … افتحى …
-تمسح فدموعها وقربت من الباب/ نبدل فى حوايجى
-شاهين/ شويا بس ناخد حاجاتى ونمشى للدوش
-وقفت ورا الباب وواضح صوتها باكى/ شنهماحاجاتك
-شاهين/ نبى باكو دخان جديد…. والمشط متاعى والفوطه ..
سكت شوى/ والكريمه .. البهايم حطوهم هنايا امبارح
-يارا / خش للحمام توة … وبعدين تعالة خودهم
-شاهين/ منطلع فى فوطه راهو
-يارا سكتت حساته مقزز/ براحتك

خش شاهين دوش ..وطلع فى فوطه…وهيا فى الصالة ..
مشى لى دار النوم .. ومشت هيا تجرى للدوش …
طلعت فى قفطان قطن طويل وكمامه نص .. خشت لى دار النوم وصكرت الباب وراها ..وهوا فى المطبخ يدير فى قهوة

شوى وبدى يسمع فى صوت السشوار …
فتح الباب/ تبى قهوة
-يارا/ لا شكرا مانشربش فيها
-شاهين/ مش عارف كيف الناس تعيش بلا قهوة
شبحتله وسكتت … وكملت سشوار شعرها ….
طق الباب وخشت الفى ومرت خوها .. زغرتو … وطلع شاهين … قعدو مع يارا عشرة دقايق ..ورجع ركب هوا ثانى للحوش …
خش دار نص … وطلع / انا فى الورشه …خودى راحتك
-يارا/ امتى نمشى لى اهلك
-شاهين/ تو نكلمك بالتليفون نقولك
-يارا/ باهى

__________________________________________

–

مشت يارا لى شيابينها … دربكو وغنو … وعمتك الخامسه تشبحلها فى شبحات مش ولابد …ماتبيهاش عينى عينك
وردة بنت عمهم وامها مشو لى تونس ماحضروش العرس
حتى الصبح لما كلماته من غادى
وجو اهل يارا وجابولها حوايجها وحاجاتها اللى شاريتهملها امها ….
.
.
.
وفات اسبوع ….
الاحتكاك بين شاهين ويارا مش هلبا … هوا راقد فى الغرفه متع الورشه وهيا راقدة فى حوشها ..بالرغم قعدو يجيبولهل فالفطور حماتها وسلفاتها .. لكن مشى الامر عادى يمودلها فى فطورها من قدام الباب لانها تقوللهم ان شاهين راقد
.
.
.
يوم اسبوعها داخلوها على اهلها ….
رفعت معاها الخير كله … سقيطه وخضرة وهدايا للعيلة كلها
مشو معاها عزوزتها وسلفاتها وحماواتها .. وخوته الزوز لان خالد عزمهم …
خشت سلمت على امها وخالتها ونساوين عمامها .. وبعدها جوها خوتها وعمامها …سلمو عليها …
خشت فى البدلة الكبيرة …حماواتها جابولها مزينه لبستها
من المغرب شاهين طلع من المربوعه وخلى خوته … حس ان المكان مش ليه ..كلها تمثيليه وقاعد ايأدى فى دوره بي اتقان

فى صالة حوش عبدالسلام
-عزيزة تهمس لى كنتها / خيركم ماسقيتوش يامفيدة
-مفيدة / قالو العريس مهناش
-عزيزة تهمس/ يارا … يارا
-تلفتتلها/ نعم ياحناى
-عزيزة/ كلمى راجلك ايجى .. ماسقوش العشى يراجو فيه
شرين تليفون يارا ..شافت لقاته قيس يتصل
-ردت/ ايووه
-قيس/ وينه شاهين ..من بكرى نتصل بيه ميردش
-يارا / اهو تو نشوفه
صكرت الخط … وفتحت تليفونها بيش تكلمه طلعتلها رساله .. فتحتها لقتها من شاهين” انا طلعت تعشو صحتين
..اعتدريلى منهم ..وانتى امتى ماتبى تروحى كلمينى”
طلعت اسمه .. واتصلت …
رد عليها من ثانى تشريينه / الو
-يارا تهمس/ وين مشيت
-شاهين / انا بعيد شويا …
-يارا/ كيف بعيد شوى والعشى مطيبينه على دمتك…تعالة تعشى
-شاهين/ الحاضر يهنى….هوينا امى وخوتى غادى يمشى الحال
-يارا تعصبت/ لا مايمشيش .. تعالة توة تعشى عند اهلى
..بالله عليك استرنى …
شاهين سمع الكلمه تأثر/ باهى اهو جاى
-يارا/ بعد كم توصل
-شاهين / ممكن ثلث ساعه
-يارا/ باهى صحيت …
وصكرت الخط
-شاهين / معش تشكرينى …
لقى الخط تسكر…. ولع سيارته واتجه لى حوش نساباته …
تعشى وروح … ما كلمهاش …لانها قاللها كلمينى لما بتروحى
اما هيا …ولا على بالها .. ولا خطر عليها تكلمه ولا تقوله روحت ولا قاعد …ولا شى
وهوا خش للدار خدى التوته متعه .. وفتح دولابها لقى حوايجها قاعدات فى شناطى ماعلقتهمش … غصها وسكت ..فهم انها ناويه على نيه لكن فاتها

________________________________________

.
.
.
.
بعد اسبوع

مع الساعه 8 ونص ليلا

يارا فى دارها … وك العادة شاهين فى الورشه تحت …
تليفون يارا شرين …شافت لقاته عمها خالد
-يارا/ اهلين عمى
-خالد صوته مستعجل/ وين شاهين … نبيه ضرورى توة نتصل بيه مايردش
-يارا بتتسبل / تليفونه فالصالة مخليه وهوا واقف على واحد
-خالد/ وراس بنت خوى اطلعيله توة و كلميه..قوليله يرد عليا ضرورى ..الامر هام هلبا ..اهو جايكم فالطريق انا
-يارا / حاضر عمى ..متخافش حنقوله توة يرد عليك
نزلت يارا من سريرها طلعت العبايه ولبستها وحطت حجابها
وخدت مفتاح الحوش وطلعت وسكراته وراها ومشت للباب اللى ينزل للورشه …فتحاته ونازلة منه
تسمع فى شاهين يدوى .. والصوت صوت وحدة معاه..
ااه وحدة !!!
نزلت تتسحب بالشوى وتسمع فيهم
-شاهين / يا وردة المكان هدا مش لايق بيك
-وردة/ اى مكان فيه انت يليق بيا يا شاهين .. انشاءالله اقل من الورشه هادى
-يارا/ ???
-وردة/ انا رضيت انك تتزوج لانى نبيك … نحبك … ومانبي الا رضاك … وانت عارف الشى هدا
نزلت يارا درجتين …
تلفت شاهين / ياوردة هدا غلط
وشبح يارا واقفه فالدروج ….
مشالها شاهين يجرى… وركبت هيا تجرى من الدروج …
مخلوعه من المنظر اللى شافاته …

___________________________________________

–

يارا تجرى فالدروج

خشت للحوش وبيتصكر وراها الباب شده شاهين بيده وخش وراها شدها من يدها
-تلفتتله ووجها اسود / هادى شكون اللى لابد انت وياها فى الورشه
-شاهين عيونه حمر / منغير تلميحات زايده .. هادى وردة بنت عمى
-يارا/ ايه ايه…وردة اللى متصلة بيك يوم صباحك وتشرين من الساعه 8 ونص تبى تتطمن…توووة انا فهمت ليش كشخت عليا يومتها وقلتلى معش تنزلى لوطا
-شاهين / انتى شن تخرفى .. بتقعدى تردى عليا كلمه بكلمه ولا كيف
-يارا/ طبعا ماتبينيش نكثر دوة عالورشه …لانها مكان مواعيدك الغراميه
-شاهين/ مواعيد شنو ..نقولك بنت عمى
-يارا/ وانت الحرام متعود ادير فيه حتى مع بنات عمك … اللى شرفك من شرفهم
بيهجم عليها انضربت رجله فالطاولة …ومشت هيا تجرى هربت لى دار النوم خشت وصكرتها وراها بالمفتاح
-شاهين دف الطاولة ولحقها يجرى يخبط عالباب/ افتحى يابنت الكلب .. افتحى انتى الطيب ماينفعش معاك
-يارا/ مانيش بنت كلب… بوى اشرف من عشرة زيك
-شاهين يخبط بالقوة/ افتحى ياوسخة .. الليله ليلتك حرفه .. تو نوريك كيف شكله المتعود عالحرام
-يارا ترعش/ امالا شن تفسر وجود بنت معاك والورشه مصكرة عليكم …
-شاهين يخبط/ افتحى الباب وفمك صكريه .. خير مانكصره الباب .. افتحى يا وقحة يلى ماكش متربيه.. بتربينى انتى اليوم …..ويخبط / افتحىىىى
-يارا من ورا الباب ترعش/ متربيه اكثر من البنات اللى يجوك اللى ماعندهمش شرف زى البنت اللى لوطا ..ولعلمك انا متربيه اكثر من النمادج اللى تعرفهم انت يا واطى ..
-شاهين/ البنت اللى لوطا فالورشه شريفه … وتكون بنت عمى …وشرفها من شرفى
صوتها يرعش بتبكى/ شريفه بنت ابو حاتم شن ادير فى ورشه راجل متزوج ..
وبدت تبكى/ راجل خاين … ملوح مرته فالحوش وداير على حل شعره فى ورشته
شاهين رنت فى ودنه كلمت مرته … ولقى نفسه يضعف مع دموعها ….
-شاهين مغمض عيونه وبهدوء / باهى افتحى ..

يارا تبكى / لا مش فاتحة … تضربنى
-شاهين / انا مانضربش فى نساوين .. افتحى نحكو بهدوء
…نفهمك على بنت عمى ….
-قربت من الباب/ لاتهمنى انت … ولا تهمنى بنت عمك..
تتهنو …
-شاهين/ يعنى ننزلها …
-يارا تبكى / انشاءالله تموتو الزوز
-شاهين يضحك/ باهى انا عادى ادعى عليا ..لكن البنت حرام تدعى عليها يانارى تبى تعيش
-يارا تمسح فى دموعها / وادافع عليها ثانى
-بعد من الباب/ اسمعى .. سواء صدقتى ولا ماصدقتيش .. وردة هادى بنت عمى….وبنت عمى وبس…ولو عندى فيها نيه ولا خاطر .. مش مستنى ادن منك
-يارا قربت من الباب بى غل/ انشاءالله تموت انت وياها
-شاهين / غير كان بترتاحى انشاءالله
ويسمع فى صوت خالد من تحت ينادى/ شاهين … يا شاهين
-شاهين قرب من باب الدار/ انا طالع عمك ينادى
وطلع شاهين لى خالد

__________________________________________
.
.
.
_

واستمر الحال كما هوا عليه … يارا من يومها معش شافت وردة … ولا سألت الفى عليها ….
اما الخامسه بدت تستلطف فى يارا … حستها ناشطه ونضيفه …وهيا تموت فالنضافه …
وكل يوم تتغدى معاهم … مرات اطيب هيا ومرات الفى
ويبعتو لى شاعين فى غداه للورشه … ومرات يجى لى حوش امه يناكش يارا شوى ..
وبدت تمشى لى اهلها يوم الخميس القايلة تروح فالليل
يوصل فيها شاهين ويجيها يروح بيها …
الامر بدى عندها طبيعى … مسألة روتين وخلاص ..
.
.

الجمعه بيضمو المخزن …
خشو يارا والفى واصيلة والسلفات … بيضمو المخزن ضمه باهيه … مالاول يارا قالولها انتى مازلتى جديدة مفيش داعى .. لكن هيا شدت فالموضوع .. وخشت ضمت معاهم
.
.
بعد ساعه …
الفى راكبه عالسلوم …. وترد فالماعين
-الفى/ اصيلة .. ترا مديلى الليايين ….
-اصيله قامتهم / اهما…
خدتهم الفى ويجو طايحين على يارا … من شدة الضربه طاحت داخت
الرجالة سمعو العياط … مشو يجرو … يلقوها طايحة
خش شاهين يجرى / خيرها يارا
-اصيله / طاحو عليها الليايين
قامها بين يديه وطلع يجرى ….لقى سيارة عزيز قدامه ركبها فيها … وكلهم تلمدو
-شاهين باستعجال/ هات المفتاح ياعزيز
-عزيز طلعه من جيبه وحدفه / اهوا … غير خيرها المراةة
-مجيدة سلفتها/ لحظه نلبس جلابيتى ونمشى معاك
-شاهين ركب فى مكان السواق / الحقونى تشوفو فيها مغمى عليها
سلفاتها وراها يهمسو/ غبارة كانا ماتكون المراة حامل

وطلع شاهين بالسيارة يجرى …. مشى بيها للمستشفى العام

___________________________________________

–

وصل للمستشفى ودخلوها منه الممرضات لما لقوها مغمى عليها …
وصلو خوته ونساوينهم واصيله ممكن بعد ثلث ساعه
وقعدو قريب ساعه يراجو
بعدها قالولهم فاقت … وطبعا طلبو راجلها
-الدكتور/ احنا درنالها جهاز الترا ساون قبل الصورة …خفنا انها تكون حامل والصورة مش كويسه ليها
-شاهين / شن طلع فالصورة
-الدكتور ضحك / يعنى انت متاكد انها مش حامل
-شاهين/ ماعتقدش
-الدكتور/ كم ليكم شهر متزوجين
-شاهين استغرب / ليش
-الدكتور/ خوى … زوجتك عندها كدمه فالرحم… او دم متجمد …
-شاهين / لكن هيا عمرها ماشكت يا دكتور
-الدكتور/ الكدمه متكونه من مدة 3 الى 6 شهور … نتيجة اجهاض …
-شاهين حل فمه مخلوع / اجهااااض
-الدكتور/ اجهاض من دون رسكامينتو تنضيف …قعدت لين تكونلها الدم على هيئة نتوء..ممكن صار رمى منغير ماتزبطوه انتو
-شاهين/ ماندكرش الحق
-الدكتور/ ع العموم ..زوجتك كانت حامل قبل شهور واجهضت
-شاهين / زيد اتاكد يادكتور
-الدكتور/ طبعا متاكد ان هدا الرحم كان فيه جنين قبل شهور …زى مانشبح فيك قدامى ..
شاهين يشبح للدكتور ومصدوم …..الحكايه وسعت وكبرت هلبا من توقعاته… حمل …معقولة يارا حملت منت … باهى ليش ماقالتش …شنو اللى خلاها ادس الموضوع
وفى خاطره / مستحيل … ليش ماقتليش ….ليش ماقالتش انها حملت …………… وطاح

_________________________________________

تمت …… ويتبع

نحبكم ❤