رواية ضحايا للكاتبة زهور جمال الدين
#ضحايا
بقلم زهور جمال الدين⚘
?الحلقه الثالثه ?
فى معمل التحاليل ….
-يارا/ التحليل يطلع بعد كم ساعه
-الدكتورة عيونها عالكمبيوتر/ توة شوى مايعطلش..كان تبى قعمزى راجى.. وكانك مشغولة ابعتى جوزك ياخده
-يارا/ ماوراياش حاجه ااقعد استنى
بعد نص ساعه طلعت الدكتورة / عطيات .. عطيات
-ركزت يارا ان هدا اسمها / ايووة يادكتورة
-الدكتورة / مبروك حامل !!!!
يارا قعدت مقعمزة مصدومه .. دماغها ستك .. عيونها مفتوحات .. حست انها كبرت عشرين عام لقدام .. عندها مسؤليه … لانها حصلت فى فضيحة .. كيف بداويها
-الدكتورة ورا الكمبيوتر/ اختى … اختى …
-وحدة مقعمزة / نعم
-الدكتورة/ نكلم فى المصريه اللى جنبك .. اختى تحليلك طلع
وقفت يارا معش تحكمت فى دموعها ومشت للدكتورة اللى ورا المكتب
-الدكتورة حطت الورقه ع المكتب زى اللى شكت فيها/ خيرك تبكى ياماما
-يارا تداركت الامر/ بقالى خمس سنين متجوزة وماحصلش حمل… فتصدمت دلوقتى
-الدكتورة استريحت وابتسمت / ااااه … امالا الفين مبروك
وقامت الورقه مدتها لى يارا/ اهوا تحليلك .. وربي يوصلك بالسالم
خدت يارا التحليل ومروحه فالطريق واتمتم/ ياغبارتى السودة والله خوى قيس لما يقتلنى .. ياربي ارحمنى وخزد امانتك .. يااااارب نموت قبل مانفضخ بوى وامى بين الناس
لبدت من جنب الحوش وخشت من الباب الخارجى .. وضلت للمطبخ حولت النقاب والعبايه ودستهم فى الدولاب ..
طلعت تليفونها دارت تشريينه لى ناهد .. جتها تجرى
-ناهد تهمس/ تلاقيتو
-يارا ماشيه للباب/ لا لا طلع كداب
-ناهد/ تعالى خيرك باكيه .. هدا كله على ولد
يارا بدت تبكى بالشهق …
-ناهد حضنتها / ياحليلى على وخيتى … شكلك تحبيه
يارا تبكى وماتكلمتش…تسمح فدموعها وخلاص
-ناهد/ اركبى لى دارى طول اغسلى وجهك وانزلى .. عندنا سميرة مرت خالى انور
-يارا ماشيه للدروج/ والله ماعندى ليها جهد …فكينى من تلكليكها
-تاهد/ لاااا ردى بالك ماتنزليش ..امك من بكرى تقولى ناديها وانا نقوللها فالدوش
-يارا/ باهى تو نجى … نغسل وجهى ونرتاح شوى
__________________________
_
فى تركبا فالمستشفى
شاهين فاتح عيونه …..يشبح فى ضى فوقه ..
-فتحى صاحبه/ الحمدالله على سلامتك ياشاهين
-شاهين مش قادر يفتح عيونه / انا وين .. وشنو اللى صار
-فتحى/ دارو تفجير فى المعسكر اللى كنتو فيه فى طريق المطار .. طلعو مفخخين سيارتين فى الساحة القداميه
-شاهين/ والجماعه اللى معاى كلهم .. وسامى وحميد شنو صار فيهم
-فتحى/ عبدالحميد راقد فى الدار اللى جنبك
-شاهين/ وسامى
-فتحى واطى راسه?/ مندريش عليه الحق
-شاهين/ قولى يافتحى.. سامى صارتله حاجه
بدو الاجهزة توووت توووت … جت الممرضه فتحت الباب تتكلم بالتركى كأنه قصدها اطلع
-فتحى طبس على شاهين/ انت غير الهى فر روحك يا رايس.. وباقى الشباب اللى عنده عمر تو راهو عاش
-الممرضه واقفه قدام فتحى وتكلم فيه تبيه يطلع
-فتحى/ قبل غدوة الصبح بنسافرو بيكم لى المانيه .. لكن بكرى جت رسالة ان الطيارة اليوم ..وانشاءالله ربك يستر
__________________________
–
فى الحمام
يارا واقفه قدام المراية وتبكى ….
وتكلم فى نفسها/ ياحليلى كانا يسمع بيا خوى قيس ..ولا عمى مراد … والله لما يدفنونى بالحياة .. كيف ندير يا ربي .. نقتل روحى ونموت كافرة ولا كيف ندير
فتحت مية الدوش .. وخشت للبانيو بي حوايجها .. صبت عليها الميه وهيا تبكى ….حطت ايديها على بطنها … وتبكى
طلعت من البانيو حولت حوايجها .. وخدت الفوطه مسحت جسمها ..
وفتحت الباب تنادى / ناهد … نااااهد
-ناهد من الصالة متلفته للدروج فوق / نعم
-يارا/ تعالى
ركبت ناهد ..
-يارا من ورا باب الحمام / مديلى حاجه نلبسها
-ناهد/ لفى عليك الفوطه واطلعى .. اهو واقفتلك انا
-يارا/ باهى
وبالغعل لفت الفوطه وطلعت ..مشت للدار … رقدت فى سرير ناهد … وهيا تبكى عالعملة اللى صارتلها
-ناهد/ مازلتى تبكى..تى فوتيه ..ونوضى انزلى لى مرت خالك
-يارا/ انا لا فى باب الهدرزة ولا التقعميز ومسايرة الناس
-ناهد/ لكن امك
-يارا / صكرى عليا الباب واطلعى
بالفعل طلعت ناهد من الدار وصكرت الباب وراها
حطت يارا ايدها على بطنها وتحرك فيها / ياريت بالحلل يا وليدى ..ياريتنى امك حق .. لكن بوك انسان واطى وكلب .. ومايستاهلكش
وتخمم/ لازمايطيح اليوم قبل غدوة.. ومستحيل نقول لى حد… اللى صارلى جريمه … والشى اللى بنديره جريمه اكبر.. ياااااربي سامحنى … رانى مظلومه ..
فتحت الغوغل ادور فى خلطات اينزلو فى الجنين
__________________________
–
نفس اليوم فى العشيه…
شاهين مغمض عيونه … وفى باله هاديكا البنيه اللى لقاها فى الحوش… قلبه يوجع فيه من شدة الندم ع العملة اللى دارهالها
ويخمم فى خاطره/ الباين اسمها يارا .. زعما كيف صار فيها .. ياريتنى ماخليتها تطلع… زعما قالت لى خوتها فى كلب اغتصبنى … وخدى شرفكم …
نزلت دمعه من عينه اليمين/ يااااربي مانلقاها فى خواتى..ولا بنات خوتى ياااارربى سامحنى ..
مسح الدمعه / لكن توة شن ينفع الندم .. كل شى صار بسرعه
صوت تليفون يشرين جنبه .. فتح عيونه بالشوى … لقى تليفون ع الكوميدينو اللى جنب سريرة …خدى التليفون وفتح الخط
-شاهين بصعوبه/ الو
-الفه/ شاهين اوخى … الحمدالله على سلامتك ياغالى .. ياريته فيا ولا فيك
-شاهين/ اهلين اولفه …كيف حالك بنتى .. وكيف حال امى والعويلة كلها
-الفه / قاعد تقولى بنتى … ربي يحفظك ليا وينوضك بالسالم يابوى الثانى
صوت امها جنبها تبى تاخد التليفون
-الفه/ اهيا امى تبى تكلمك يا اوخى ..خلى نمشى انا انادى جلال وعزيز فيسع يبو يطمنو عليك حتى هما …
-شاهين/ باهى
-الفه/ هاك يمى
-خدت عمتك الخامسه التليفون وبدت تزغرط/ ياروروروى .. للحمدالله انك حى يا اوليدى .. والله مانى مصدقه … اللهم لك الحمد والشكر
-شاهين مبتسم/ بالشويا عليك يااام … غير خلينى نقولك شن حالك وكيف حال صحتك …
-الخامسه/ الحمدلله يا اوليدى فى خيار الخير مدامنى تاكدت انك حى وعينك قاعدة فى الدنيا
-شاهين/ شنو تحسابينى موتت يام
-الخامسه/ ماك صاحب خير وديما تساعد فى الناس… عاد معسكر كامل مايطلعه منه حد غيرك انت و13 شخص ثانيين
-شاهين / اااه … شن تقولى كلهم ماتو
-الخامسه ضربت خدها / قصدك ماقالولكش… ياوالله عملة
-شاهين / سامى شن صار فيه يمى بالله عليك ما ادسى عليا ..حميد قالولى عليه
-الخامسه/ مدامه قالولك على حميد صاحبك معناها ما نبيش نكدب عليك فى سامى …. سامى توفا من اول يوم ودفنوه .. وحميد بيروحو بيه غير بعد غدوة قال خوك جلال مالقوش طيارة .. والدفينه بعدها بيوم
-شاهين / ااه … الدفينه … دفينه منو حميد فى الغرفه اللى جنبى
-الخامسه/ ماهو توفا بكرى قبل العصر يانارى
-شاهين/ لا حول ولا قوة الا بالله
خشو الفه وجلال للدار اللى فيها امهم …
-الخامسه/ ماتغشش روحك يا اوليدى عمرهم تم
-جلال/ شن لبزتى يااااام … ليش قولتيله
وحط السماعة فى ودنه / شن حالك يا شاهين
-شاهين يبكى/ ليش ماقلتوليش على صحابى يا جلال
-جلال/ انا كنت فى غيبوبه يا اوخى .. اليوم بس كيف فقت
غير امتى بنقولولك بس
-شاهين/ انا لله وانا اليه لراجعون
الفه تبكى متأثرة على شاهين كيف يبكى على صحابه .. وعزيز خوهم مقعمز ع الصالون ومتأثر
-جلال/ عزيز غدوة بيجيك بيش يمشى معاك لى المانيا
-شاهين/ لا لا لا …عارفه مشغول ومرته مريضه … بيجى بيزونى هنايا ويروح باهى اما يمشى معاى لا
جلال تلفت لى عزيز / قالك ماتمشيش معاى لى المانيه
عزيز وقف / هات التليفون هات
وخدى عزيز كلم شاهين… واصر انه يمشى معاه المانيا .. لكن شاهين رفض لان عزيز عنده عائلة وشغل ومسؤليه
-شاهين/ انتم غير هنونى على امى والفه .. كأنكم مشيتو معاى
-عزيز/ ومن بيبدلك غادى ويهتم بيك
-شاهين / احنا ماشى معانا طاقم كامل .. يعنى غير بتعطل روحك انت بس
( جلال وعزيز خوت شاهين .. اصغر منه الزوز .. جلال م 80 .. وعزيز 81 ..شاهين فايت موضوع الزواج لكن خوته يبو … خلاهم يبنو حوش مكون من دورين فوق بعضهم قدام حوش امهم فى قطعتهم وتزوجو فيها ..اخته اصيلة متزوجه
والفة صغيرة العيلة والمدلله قاعدة معاهم فالحوش تقرا فى القانون )
__________________________
–
فى حوش فتحيه …
يارا خممت بينها وبين نفسها .. انها لو بتشرب اى شى بيش تتخلص من اللى فى بطنها .. لازم تكون فى حوشهم .. خاطر ممكن تصيرلها اى مضاعفات وتنفضح القصه …ولدلك لازم تنحصر داخل حوشهم ….
طلعت يارا من الدار ونازلة من الدروج … لقت امها وخوها قيس مقعمزين مع بعضهم عالصالون يهدرزو .. خافت من قيس تلفتت بترجع
-قيس/ يارا … تعالى خيرك
تلفتت رجعت للدروج نزلت .. مشت جنب امها وخوها
-يارا / قلت بالك واحد من صغار خالتى هنايا
-قيس/ هاك لابسه حجابك .. حتى كانا لقيتى واحد منهم عادى.. وبعتالى انتى خيرك وجهك مقلوب
-حطت يارا ايديها على خدودها/ اهااا.. وين .. لا ماخيرنى شى …
وتلفتت لى امها/ غير الصراحة اضايقت .. والحرب وقفت كان نروحو لى حوشنا خير
-قيس/ خيرك … حد ضايقك …
( يقصد ولاد خالته )
-يارا/ لا والله … الحق والله مانشوفو فيهم … لكن هوا هداكة الواحد مايرتاح الا فى حوشه
-قيس تلفت لى امه / شفتى ياام .. حتى يارا مضايقه .. قلتلك الناس ولت لى حياشها .. خلاص الضرب وقف
-يارا قعمزت / خلى نروحو ياام تربحى .. تعبنا واحنا برة حوشنا .. حتى حناى عزيزة اضايقت
-فاطمه / توة اتكلمو فيا انا تقول الراى رائي فالحوش.. كلمو بوكم كان قال باهى نمشو
-قيس تلفت لى يارا/ كلميه انتى .. ديما ياخد فى رايك
-يارا/ باهى .. خلى نمشى نجيب التليفون
وتلفتت ركبت من الدروج
قيس يشبحلها وهيا راكبه من الدروج/ بنتك فيها حاجه ….
زمان لما نقوللها بوى ياخد فى رايك انتى بس تبدا فرحانه وقريب ترقص
-فاطمه/ ياوليدى ديما وانت تكبر فالامور.. انا معاهم والله مافى حد ضايقها ولا تعاركت مع بنات خالتها
-وقف وقرب من الدروج / انا اكثر واحد مركز فالحوش..
-تلفت لى امه / ونعرفكم كلكم من وجوهكم ونضرة عينكم
فاطمه ساكته وتشبحله
-قيس/ الليله بادن الله لازم نباتو فى حوشنا
( شك ان واحد من ولاد خالتها ضايقها)
نزلت يارا لى نص الدروج/ قاللكم بوى وتو روحكم
-فاطمه / باهى لمدى حوايجك وانزلى هى
وقيس يشبح لى يارا .. وهيا ملاحظاته لكن ماتبيش تحط عينها فى عينه
__________________________
–
فى الصالة .. فاطمه لابسه جلابيتها وشاربتها .. ويارا لابسه عبايتها واطلع فى الشناطى للباب
-فتحية/ غير كانا ضايقكم حد قوليلى ….
-فاطمه/غير منو بيضايقنا بس يا وخيتى …لكن هوا هداكة حتى عبدالسلام قال الحرب وقفت ومفيش داعى للطلوع من حوشنا
-فتحيه/ باهى غير بري انتى والاولاد شوفى .. وخلى يارا وعمتى عزيزة وعمى صالح هنايا .. كانا لقيتو الجو بدى باهى عالرئيسى تعالولهم
-عزيزة/ والله عمك صالح قريب ايطير ليه ايام .. غير انا نسكت فيه
-ليلى/ والله كنتو مونسينا
-فاطمه / اجعل لمة الخير هادى فى فرحك بنية اختى
-ليلى/ ربي يحفظك ياخالتى
-خشت يارا / يااام قالك بوى هيا …
ومشت لى حناها شدت يدها / هيا حناى نطلعك
وتلفتت للدروج/ هيا يا ناهد طلعنا راهو
-فتحية/ شنو بتمشى معاكم
-فاطمه / خلى تعاون يارا فى ردان الحوايج
-نزلت ناهد تجرى / اهو جيت هي ..
وطلعو العويله روحو لى حوشهم
__________________________
–
فى المطار …
شاهين مقعمزينه فى كرسى متحرك … فى صالة الانتضار
ومعاه باقى الجرحى … وشباب يكملولهم فى اوراقهم
وشاهين يخمم فى البنت شن صار فيها … يخمم فى صحابه اللى ماتو … حالته النفسيه زى الزفت …
يحكو الشباب جنبه عن الاخبار فى ليبيا ويهدرزو ع اللى خنب واللى دار ميليشا على حسابه ويدكرو فى اسامى كلها يعرفها … معقولة خانو العهد!؟… معقولة ليبيا اللى كانو يحلمو بيها كيف بيبنوها اصبحت نهب ودولارات وسرقه بس
ومش قادر يرد ع الشباب اللى يحكو اولا لانه تعبان .. ثانيا لانه مش مصدق … حس نفسه كان مُغيب .. ولا فيسع فى شهر الناس تغيرت نفسياتهم …
( الله عليك يا ليبيا ..مافيكش حد باهى الا انا وهالكمشه متابعات اللى يقرولى ??)
جماعه الطيارة الالمانيه نادو عليهم … دخلوهم لداخل …
وتسهلت الامور …. وركبو … وسافرو …
وخلى هالمسكينه وراه تعانى فى همها ….لكن طلعت البنت شاطرة وما حكت لى حد ع العملة اللى صايرتلها .. يقولك المراة فى بعض المواقف ترجل… وهدا اللى صار مع يارا بنت ال 18 عام
__________________________
–
فى دار يارا ….
-ناهد/ انتى شكلك بتستبردى .. اتكى تو نكملهم انا
-يارا / لا لا عادى اهو تو نكملو مع بعضنا
-ناهد / الحرب هادى ماخلت حد فى حاله .. ضلمت هلبا ناس
-يارا / كاتب ربي… من يوم صارت الدنيا ربي كتب هالايامات على ليبيا … غير انشاءالله تكمل على خير
-ناهد/ انا ماوجعنى شى غير هالمغتصبات اللى يقولو عليهم
-يارا بدت تقلب فى عيونها/ مغتصبات شنو
-ناهد اطبق فى الحوايج وتحط فالدولاب/ مغتصبات من هالحرب هادى ….
تلفتت لى يارا / لكن قالك كلهم تزوجو .. يتعاركو عليهم عراك
-يارا وجهها عرق/ وليش يتعاركو عليهم
-ناهد/ قالو كل حد يبي ياخد الاجر فى الستر…
-يارا بترجع من الكلام اللى سمعاته لانها مرت بنفس التجربه / ربي يستر على كل وليه
-ناهد / اشبح حق ولا اشاعه… لكن فى من بعض الناس يعتبر فى الاغتصاب عار .. ويوصل انه يقتل بنته على خاطر الفضيحة …
وقفت يارا خدت بلوزة بتعلقها
-ناهد/ المدة اللى فاتت يحكو على وحدة اغتصبوها … قالو خوها واعر قتلها ..وماباش حتى يديرلها عزى.. ويحكو على وحدة انتحرت
يارا معش تحملت … طاحت مغمى عليها
__________________________
_
بعد اسبوع ….
يارا خاشه عالغوغل تقرا فى خلطات لى اجهاض الجنين
ماخلت ماغلت … ماخلت ماشربت … تبيش تنقز من السرير لانها خايفه ادوخ ويرفعوها للمستشفى وتنفضح
تخمم فى خاطرها/ ياحليلى وهوا العيل لاااصق يبش يطيح
كيف ندير ياربي … بعد شهور بطنى بتبان .. كيف بندير .. قيس يشبحلى وشاك فيا متغيرة …ياغبارتى كيف ندير
كملت ادير فى خلطات وتشرب ..حبوب متقدرش تطلع تشريهم لان خوتها ح يزبطوها .. وماعندهاش حد ثقه توصيه يجيبهملها.. وحتى كانا عندها مستحيل تقدر تطلع من الحوش وتاخدهم …خوتها واعرين … معش عندها حل غير التخميم وهيا حالها كل يوم فى النازل … مخلوعه ماعاد فيها قطرة دم … وكل ماتشد فيها امها ان يرفعوها تعاين ترفض .. وتتحجج بانها متأثرة على وضع البلاد وهدا اللى مرضها …
ديما تحاول انها تتحاشى خوها قيس .. عارفاته دكى ويزبط
الوقت يفوت … والجنين بيبدا يكبر ..كيف بدير
وصلت لدرجه اليأس .. بدت تفكر فى الانتحار … معش عندها حل ثانى …. انتحرت لانها متخطيه او التبست .. سبب حلو لى وفاتها …خير من قتلها خوها بيش يرد شرفه
عندهم شجرة كبيرة فى جنانهم من تالى ..كل يوم تطلع من البلكونه تتفرج عليها وتبكى … لانها خلاص قررت الانتحار ك قرار نهائي لان الجنين عالق ومش ناوى يطيح
__________________________
–
بعد خمسه ايام …
توفى ولد خالة بوها فى منطقه خارج طرابلس … ولازم يمشو طبعا ويباتو … وبما انهم يخافو على يارا من الطريق
قررو انهم يخلوها فى حوش خالتها فتحيه
يارا لقت ان الوقت مناسب للى فى راسها وتبى اتنفده …
خشت للمخزن وجابت حبل متع تعليق الخرفان فى العيد ..وحطاته فى مكان معين فى الجنان الخلفى … وطلعت كرسى المطبخ وحطاته حتى هوا فى الجنان
وصلها قيس لى حوش خالتها بالسيارة … وركب بوه وامه وحناه وجده وخوه جعفر … ومشى بيهم خارج طرابلس لى حوش الوفاة
فالليل ….
يارا تبكى فى بكى مش عادى … وناهد فى قولت خيرك يابنت متغيرة … ويارا تقوللها فى نفس العدر.. كلمت واحد عالفيس وطلع يزلبح فيا .. وبالرغم ناهد ماتصدقش فيها لكن تسكت وخلاص …
ناهد بتخش للدوش ادوش … لقتها يارا فرصه ادير مافى بالها … خلت ناهد تخش الدوش ونزلت خاتلت خالتها ومشت تجرى للجنان الخلفى خشت منه لى حوشهم …
خدت الحبل وهيا تبكى بحرقه … ربطاته كوووويس فى مكان التعليق اللى دايره بوها فى العرف المتين … وداراته دائرة بيش تحط فيه رقبتها … وجابت الكرسى وقفت عليه
وحطت الحبل فى رقبتها
وتمتم/ ياااااربي سامحنى رانى مظلومه … واللى دارلى هالعملة مانيش مسامحاته لا فى دنيتى ولا فى اخرتى ….. اشهد ان لا اله الا الله واشهد ان محمد رسول الله
__________________________
تمت ….. ويتبع
نحبككككككم ❤