رواية ضحايا للكاتبة زهور جمال الدين
#ضحايا
بقلم زهور جمال الدين ⚘
?الحلقة الاولى ?
سنه 86 شهر الطير سابقا
فى المدرسه الثانويه بنات
-منيرة/ انا سلامتكم.. قالو امريكا بدير غارة على ليبيا ..
و خوى عبدالسلام قال منطلعو من طرابلس الليله
-صباح زميلتها / والامتحانات كيف بديرى فيهم .. رانا شهادة.. ولو فاتك الامتحان حتقعدى اعادة.. انتى عارفه ان اللى عنده اكثر من زوز مواد مايخشش الدور الثانى
-منيرة/منقدرش نقوللهم اقعدو على خاطرى.. مرت خوى عبدالسلام حامل وفى شهرها ..وامى ترعش عليها .. وتبو الحق كلنا خايفين يصيرلها زى مايصير فى حملها الاول…. هدا رابع حمل .. واول مرة توصل للتاسع.. وخوى قال الكلام اكيد وامريكا بتضربنا ولعلمكم اكثر سكان طرابلس بيطلعو للبوسكو
-سعاد/اللهم اجعل كيدهم فى نحرهم … وبالنسبه لى مرت خوك ربي ينوضها على خير .. وتجيبلكم بيبي زى القمر…هما ساكنين فوقكم ولا
-منيرة /ايه..خوى عبدالسلام فوقنا فالدور الثانى.. ربي ينوضها على خير بس انا خاطرى فى بنيه
-صباح/ العزايز يحبو الاولاد اكثر
-سعاد/ ياودى بنيه احلى بهلبا.. اديريلها توكات وتبدا هادوكا الجدوق والضحك والجرى ..
-منيرة / ربي يستر ليبيا وخلاص
__________________________
_
فى مكاتب التسجيل المدنى
-محمد/ مرات غير اشاعات وخلاص
-سعيد/ لا لا قالو حتى تاتشر تكلمت وقالو بنضربو ..وحتى مجلس الامن اجتمع .. وللعلم راهو عطوهم يوم محدد واماكن محددة بيضربوها
-صديق/ تى ماهو يعلنو عليه اليوم ونطلعو فيه هوا بس.. انا الحاج شاد فيا يبي نطلعو من طرابلس
-عبدالسلام/ حتى انا بنطلع
-سعيد/ تتكلم جديات
-عبدالسلام/ والله زى مانحكيلك .. الحاج والحاجه خايفين.. وعندى العيلة مريضه .. صعب نقعد بيهم
-محمد/ وخوتك التوامه كيف بيديرو فى الامتحانات .. ماهم شهادة
-عبدالسلام / تو معقولة البلاد فى الحالة هادى ويفكرو فى امتحانات وغيره .. بالتاكيد حتى المدرسه ح توقف مش معقولة يستمرو
-سعيد/ ربي يهدى البلاد ويستر العباد
__________________________
–
بالفعل طلع عبدالسلام بي عويلته وعويله بوه فى سيارتين .. هوا يسوق فى سيارة معاه مرته وبوه وامه واخته ايمان .. وخوه خالد فى سيارة .. معاه خوته مراد وخواته منيرة وامال….
فى سيارة عبدالسلام
-بوه الحاج صالح/ انت ليش جيت من هنايا يا عبسلام.. طريقنا الاصليه اقرب
-عبدالسلام/ يابوى من لما طلعنا وانت تعارك … من بكرى فهمتك وقلتلك ان الطريق الثانيه مصكرة لانها تمر من المعسكر ف مصكرينها… اهو الطريق الثانيه تو نلفو من الجبل خير ..حتى كانها بعيدة لكن المهم مافيهاش حد يوقفنا
-الحاج صالح/ مفروض فوتت من غادى رانى كلمتهم انا وفوتونا
-الحاجه عزيزة امهم / تو ياحاج بيفوتوك انت من دون الناس.. شنو القدافى ولا خوه
-صالح/ بتصكرى فمك انتى ولا ندورلك بي عكازى
عبدالسلام مقعمز من قدام وزوجته فاطمه وراه … مدت يدها وعصرت راجلها من كتفه حس بيها ..شافلها من المرايه لقى وجهها اسود …
-عبدالسلام/ يمى شوفى فاطمه خيرها
-عزيزة / خيرك يا فطومه …
-فاطمه/ اممممممم ( متحشمه من شيبانيها)
-عزيزة/ انزل لى اول مستوصف يا عبدالسلام
-عبدالسلام / اهو خشينا للرحيبات ….تو نوقف ع المستشفى
وبالفعل لما وصل الرحيبات طول خش للمستوصف
خوه خالد وراه/ خيره خوك ماشى مالطريق هادى
-مراد/ والله مندرى عليه
-امال/ بالك فاطمه مرت خوى تعبت
-خالد/ ايه هيا .. لانه ماشى جهه طريق المستوصف
-مراد/ الرحيبات مش منطقتنا ولا نعرفو فيها حد كيف يدخل مرته هنايا
-منيرة/ المجيبه ماليهاش وقت بيش يختار المنطقه
-مراد/ ضمى فمك انتى ماحد طلب رايك
__________________________
_
فاطمه دارولها تحويل فى الاسعاف للمستشفى العام فى المناطق اللى جنب الرحيبات … يجهزو فى الاسعاف بيطلعوها …لكن هيا حالتها خلاااااص .. وكاتب ربي الولد يطلع فى المستوصف … ولدوها الممرضات … وعزوزتها وحماواتها مقعمزات برة يراجو… وعبدالسلام يلاجى غادى وجاى .. 4 صغار يموتو فى الشهر الرابع..اول مرة مرته توصل للتاسع ….
جابت فاطمه وليد … وفى نفس اليوم المغرب طلعوها … وروحو لى بلادهم …عندهم حوش غادى …
فاطمه ترضع فى ولدها فى الدار .. وامهم وبوهم والبنات والاولاد مقعمزين كلهم فى الصالة …
-عزيزة / شن بتسميه يا عبدالسلام
-مراد/ خالد ولدك سماه من امس
-عزيزة/ وشن سميته ياخالد
خالد يضحك
-ايمان/ سماه الرحيبي
-صالح/ ايييييه كانا يطلع زى الرحيبات.. الحشمه والادب والصلاة
-عزيزة/ صحابك عاد
-منيرة/ لا بالحقة شن بتسموه
-عبدالسلام / انا سميته صالح من امس
-عمك صالح/ لااااا والله ماصارت ياولدى… اسمى قديم .. سمى هالاسامى الجديدة
-امال/ وخيره اسمك يابوى.. قنين
فاطمه فى الدار تسمع فيهم ومبتسمه
-صالح/ اسمى لا منغير ماتفكرو …لكن كانا ماعندكمش اسم نسميهولكم انا
-عزيزة/ خلاص سميه انت
-صالح/ نسميهولكم قيس
-امال/ محلاااااه الاسم
-مراد/ اختى امال ماعرفناش باش نشدوك الاسم اللى يقولوه طول تقولى قنين
كلهم يضحكو
-عزيزة/ سمايته نازلة معاه وليدى ..غير نهدرزو
__________________________
_
ثانى يوم ضربت امريكا وبريطانيا ليبيا .. ايامات الناس تغنى غارة غارة طفو الضى???
بعد 4 سنين ..سنه 90جابت فاطمه ولد … وسموه جعفر
.
.
.
.
.
وفى عام 1993 … جابت فاطمه بنيه … سموها عماتها يارا
وكانت المدللة .. وفرحة عماتها …
فى نفس العام تزوجو عماتها منيرة وامال مع بعضهم فى عرس واحد .. وكانت ايمان متزوجه ليها ثلاث سنين وعندها بنت ….اما خالد ومراد مازالو شباب مش متزوجين
عبدالسلام ايدين عمك صالح ورجليه …وفاطمه يدين عمتم عزيزة ورجليها … صالح مايدير شى الا بشيرة ولده
…وعزيزة عندها كنتها فاطمه هيا العوالة والكل فالكل
قيس عمره 10 سنوات داير صحبه مع عمامه برغم فارق السن بينهم…. اللى بيطلع سيارة من القراج يجرى هوا واللى بيمشى للمحل يركب هوا الاول جنبه…وبوه فرحان بى هالعلاقه بيناتهم ..لدرجه انه بدى يبات معاهم فى المربوعه تحت .. ومعش يبات فوق فى حوشهم…اما جعفر كان صغير وقاعد مع اهله
قيس طالع واعر زى خاله انور… كلامه شويا .. وابتسامته يشوفوها فى العام مرة …الطبيعه تطلع مع الشاب من صغره
عبدالسلام هوا الامر الناهى فالحوش…بدى يخمم لى خوته لازم يتزوجو ياسرهم ..لكن وين بيسكنو .. همم منا .. ومنا
-عبدالسلام / يابوى احنا لازم نحولو لى طريق المطار
-صالح/ كيف.. وحوشنا هنايا نسكروه
-عبدالسلام / لو قعد مانقدروش نديرو راى .. لازم نبيعوه ونشرو ارض ونبنو
-صالح/ مزال والله… نسيب السراج ونمشى لى اخر ليبيا
( زمان طريق المطار الناس دايرتها بعيدة وتزرد فيها من بعدها ?… مش زى توة بدت وسط البلاد )
طبعا عبدالسلام هوا الكبير واللى بيقوله بيمشى …باع حوش السراج وشرط عالشارى انه يطلع بعد عام …يحسبله الشهور كلها اجار…وشرى ارض فى طريق المطار جيهه حوش عديله محمود …..وبدى فى البنى …
بنى حوش لى بوه .. ودار لى خوته كل واحد فيلا صغيرة ..
ماباش يبنى الحياش فوق بعض…لانها سكنتهم الدائمه
بعد عامين تزوجو الاولاد … ودارلهم خوهم عرس مطنطن
__________________________
.
.
.
.
بعد 18 عام ….سنه 2011
يارا كبرت … واحلوت بدت آنسه … عمرها 18 سنه ..تقرا ثالثه ثانوى
هداكه الشعر الطويل .. وهاديكا العيون والضحكه الحلوة
خوها قيس عمره 25 سن واعر لاسلام ولا كلام …بل بالعكس مش مخليها تتنفس ..ولا تشبح عينها هكى ولا هكى
اما جعفر عمره 21 سنه .. يقرا فى كليه الصيدلة ..ويحب بنت تقرا معاه وقريب يتخرج …
فى الواسعايه وسط الحياش
-مراد/ يا قيس لازم تبدا تبنى فوق حوش بوك… هوا هداكه راهو
-خالد يضحك وفى حجره بنته سارة/ لا لا .. خلى يزيد عشرة سنين ثانيه … تكبر سارة بنتى تبدا فى 14 عام نعطيهاله .. الرحيبي نبيه نسيبى انا بس
-مراد/ مصح وجهك قيس زى بوها .. ماقلتش حتى انا على بنتى سيرين اللى خاشه صف الثانى ??
-قيس مبتسم/ ربي يحفظهم ويكبرهم على طاعته
-خالد/ قالو البلاد متحركه… وفى شهر 2 بتقوم ثورة
-قيس / ياودى ماضنى.. الليبيين شعب طيب.. ومايديروش حاجع زى هكى
-مراد/ لا والله الدوة رسمى .. قالو 17 فبراير اول مضاهرة
-قيس/ لا مضاهرة ولا غيره .. تعرفونى المشاكل مانحبهاش
يارا تنادى من قدام باب حوشهم / قييييس… قيس
-قيس وقف وتلفتلها/ نقصى صوتك .. اهو جاى
-يارا خافت/ باهى
وخشت للحوش ….
مشى قيس للحوش … خش عيونه حمر
-قيس/ شن قلت لى عمك انتى .. مش قلت صوتك معش يطلع
-يارا خايفه/ امى تبيك …هيا اللى قالتلى نادى عليه
-قيس تلفت لى امه بهدوء/ نعم ياام
-فاطمه تخيط فى سروال عبدالسلام/ ارفع اختك لى حوش خالتك .. جايين ناس لى ليلى يخطبو
-قيس/ ليلى جايينها ناس وبنتك شن دخلها
-فاطمه / ماهو بتعاون ناهد بنت خالتها فى المدان .. خالتك فتحية كلمتها كنهدا والله مانبعتها
-قيس/ وانتى علاش ماكش ماشيه
-فاطمه/ ماهو كان نادتنى بتقعد فى المناقد من باقى خالاتك ..ومن حماواتها…قصتها كلها هلبين ..ومانادت حد
-قيس/ باهى اطلعى تو نحطك
فرحت يارا وخشت تجرى تلبس فى عبايتها
__________________________
_
فى حوش فتحية خالتهم
-ناهد/ يارا فيسع رشى الكاكاو فوق النسكافيه فيسع
-يارا/ تى باهى يادراه عندى زوز ايدين بس
من الممر معتز ينادى/ ناهد … ناهد
-يارا تشبح لى ناهد / اطلعى فيسع شديه مش لابسه حجابى
-ناهد/ باهى ياهمى منكم انتو الزوز
وتلفتت للباب/ نعم يامعتز… اقعد غادى…
طلعت شويا وخشت …
-ناهد/ يبي يسلم عليك
-يارا وجهها متغير/ لايسلم عليا لا نسلم عليه
معتز من ورا الباب/ يارا .. البسى حجابك لانى بنخش راهو
-يارا تخبط فى خدودها/ حيه عليا كان يحو قيس ولا جعفر توة …والله لما يقتلونى …
( يارا تعتبر مش صغيرة تقرا .. ثالثه ثانوى .. يعنى تعرف مصلحتها .. المشكلة انها مش بالعه معتز ولد خالتها وهوا بيموت عليها )
-ناهد طلعت/ خلاص تحشم امشى ..البنت خايفه من خوتها
__________________________
–
وفات شهر …..
وبالفعل صارت ثورة فبراير … بنغازى وقفت القرايه لان الضروف فيها كانت صعبه الشهور الاولى….لكن طرابس استمرت فى القرايه ….
دارت يارا امتحاناتها .. وطلعت النتيجه … ناجحة وبامتياز
-فاطمه/ مبروك عليك ..سلم بنيتى ديما مفرحتنى
-عمتك عزيزة مدتلها خمسه جنيه/ هاك نحيلتك .. مبروك عليك يابنيتى
-يارا فرحانه/ الله يبارك فيك يا حناى
-عبدالسلام/ وراس بنتى لولا الظروف رانى درتلك عشى كبير وجبتلك فيه الزكرة
-قيس/ عشى كبير لى بنيه يابوى
-عبدالسلام/ والله ماعندى فرق بينكم الثلاثه سواء ولاد ولا بنات .. وزى مادرتلك انت وخوك عشى نديرلها ..انتم مش خير منها
-خش عمها خالد ومرته / ايييييه كبيرة الزردة .. قالو امتياز مش حتى جيد جدا
-نطت يارا / عمىىى
وحضنها / الف مبروك على بنتى
-يارا فرحانه / الله يبارك فيك ياعمى
وجى مراد ومرته … وعماتها اتصلو … والفرحة كبيرة
وبدت يارا تحلم بالبالطو الابيض .. متع الدكتورات .. لان حلمها من لما صغيرة تكون دكتورة نساء وولادة
__________________________
.
.
.
شهر 8 طيحو القدافى … وخشت المليشيات او الثوار لى طرابلس … وتكونت مليشيات و معسكرات …وكل معسكر او ميليشا سمو روحهم اسم .. وكل معسكر فيه قائد ميدانى
-العقيد سالم/ وين شاهين
-الولد متع الباب/ شاهييين .. تعال يبيك سيدى العقيد
جى شاهين طقطق ع الباب ..وخش
-شاهين/ السلام عليكم سيدى
-العقيد سالم/ يا اهلا بالتريس .. تفضل قعمز
-شاهين / اهلا بيك
-العقيد سالم/ بنخشلك فالموضوع طول..
-شاهين/ تفضل
-سالم/ انت ماكش غابى ان الحرب ماتمتش.. وعندك علم ان فى بعض من المناطق مازالت مؤيدة .. والمجلس بيدير فيها قرار
-شاهين/ اهاا.. عندى علم طبعا
-سالم/ خلاص احنا قاعدين نجهزو فى نفسنا توة .. ونديرو فى دوائر .. وكل دائرة يمسكها قائد وتقعد محصنه مكان معين
-شاهين/ انا من ايدك هادى لى ايدك هادى ..تعرفنى راجل ومانوليش.. ومفيش جبهه الا وكنت انا اول واحد فيها
-سالم يتنحنح/ انت بتشد جهه طريق المطار
-شاهين وقف/ وشنو فيها طريق المطار بيش نشدها انا
-سالم/ قعمز
-شاهين/ لكن انا نبى نمشى للجبهه .. حتى ك ثائر .. منبيش نكون قائد
-سالم / قعمز
قعمز شاهين وهوا عيونه حمر …
-سالم/ طريق المطار مدخل طرابلس.. لو التف علينا العدو من الخلف نكون مطمن ان عندى ناس رزينا وتعرف كيف تتصرف فى بوابه طريق المطار اللى هيا مدخل طرابلس
-شاهين قام كلاشنه / لكن انا متعود على اهوا .. متعود نقاتل بي يدى..مش متعود نقعد لابد فى مكان ونراجى فى رحمه ربي
-سالم/ قلتلك مانتهانش بالمكان الا لو كنت فيه انت
-شاهين/ لكن انا
-سالم/ هدا امر .. نفد
-شاهين وقف/ انا قاعد نترجا فيك …
-قص عليه/ نفد ……
سكت شاهين شوى .. وبعدها غمض عيونه/ حاضر
-سالم/ اختار اللى يعجبك من المعسكر بيش يكونو معاك .. اضافه لى جماعتنا اللى غادى
-شاهين/ تمام سيدى
-سالم/ ربي معاكم
__________________________
–
شهر 10 ….
ليبيا خشت بعضها ثانى … قامت الحرب بي قرار على منطقه معينه ….
وشاهين قعد فى طريق المطار
-سامى صاحبه/ ياراجل ضوقه الدنيا صقع .. عالاقل يدفيك شوى
-شاهين/ مستحيل نشرب سكير ..ولا نحطه فى فمى
شرين تليفون سامى .. فتح الخط طول
-سامى اتكى عالصالون وحط يده اليسار ورا راسه/ اهلين ياعمرى … ستاحشتك هلبا نراجى غير امتى نشوفك ..خيرك بتصكرى انتى توة بس اتصلتى .. خوك .. باهى حتى انا نحبك … وتلفتت للجهه الثانيه يبيش شاهين يشوفه ..وقعد يبعتلها فى بوسات فى التليفون ?????… وصكر الخط
-شاهين يضحك/ شنو هادى ضحيه جديدة
-سامى حط يده على قلبه/ هادى الكبيدة.. هادى مايجى زيها حد …
-شاهين يحرك فالكرسى من ورا المكتب/ صار الموضوع جديات قتلى.. امالا هاك تبعتلها فى بوسات ?
-سامى/ انقولك حبيبتى ياراجل ..
-شاهين/ لكن زمان تقول البنات للتسليه بس
-سامى/ الا هادى …وتحساب مابينى وبينها شى …بالعكس والبنيه شيطانه ووين مانقوللها هيا تمشى معاى
-شاهين / وبتاخدها
-سامى/ تى حبببتى هادى شن تقول… تعرف لما نحطها على صدرى … ااااه
-شاهين يضحك / بالله فوت الموضوع لانى مش ناقص
-سامى/ امالا لما ناخد منها بوسات … اسكت ساكت
-شاهين وقف/ انت الباين عليك هايم.. وانا كلمتين ايخلو ليلتى ليله .. ولدلك فوت الموضوع
وقعدو يضحكو
الاسلكى بدى يعطى فى اشارة ..
-رد شاهين/ ايووووه تحدث
-الرائد/ ثلاث اشخاص هاربين تسللو عندكم .. خشو للحياش فى الجهه اليمين
-شاهين/ تمام …فهمت
-الرائد/ من غير شوشرة..
-شاهين/ علم … وينفد
وصكر اللاسلكى
__________________________
تمت…… ويتبع
نحبكم ❤