رواية ضحايا للكاتبة زهور جمال الدين
#ضحايا
بقلم زهور جمال الدين⚘
?الحلقه الحاديه عشر ?
_
كملو يارا وشاهين عشاهم … خدو الكيكه متع العيد ميلاد… وطلعو روحو للفندق … والحقيقه كانت سعيدة … حست انه كويس معاها ويبي رضاها …
طلعو من المطعم وروحو للفندق …خدو الاسانسير وركبو للدور السابع ….
ماشيين فالممر بيخشو غرفتهم
حد وراهم نادى/ شاهين
لما تلفتو لقوها وردة
-شاهين انصدم / وردة
يارا مالاول مازبطتهاش لان شايفتها مرة بس .. لكن لما شاهين نطق اسمها عرفتها
-وردة/ اهلين كيف الحال ..
-شاهين مزال واقف/ الحمدلله …. امتى جيتى
-وردة / وصلنا العشيه انا وامى.. بنجو من الاسبوع اللى فات لكن راجيتها لين كملت عرس ولد اختها
-شاهين/ ااه .. الحمدالله على سلامتك .. وينها مرت عمى
-وردة غمزت / وصلها خلى تاخد راحتها .. وبعتالى تعالة سلم على امى براحتك
-شاهين مسك يد يارا / تعالى نسلمو على مرت عمى
يارا واقفه ماتبيش تمشيلهم …
-شاهين ضغط على يدها بحنان / هيا
مشت معاه يارا …
-وردة نشبح لى شاهين?/ تفضل
وتشبح لى يارا/ ?
خش شاهين للغرفه / اهلين عمتى ساسيه
-ساسيه/ اهلين شاهين .. شوف الصدفه .. انت معانا فى نفس الفندق
-شاهين/ صدفه حلوة …
تلفت لى يارا / تعالى سلمى
-مدت يارا يدها / اهلا يا عمتى …
-جبدتها ساسيه سلمت عليها بالوجه / اهلا بنيتى
هدرزو على ساسيه شوى .. ووردة مقعمزة عالكرسى بعيد ماحولتش عيونها من على شاهين .. ويارا ماحولتش عيونها من على وردة
-ساسيه/ شنو هالاكياس .. كنتو فالسوق
فتح شاهين الكيس / لا اليوم عيدميلاد يارا .. درناه فى المطعم .. خلى ندوقكم من الكيكه ..
وردة فتحت عيونها قريب ماتت
بعد خمسه دقايق
-شاهين / توة نستادنك ياعمتى …
-ساسيه/ ادنكم معاكم …ربي يحفظكم انشاءالله
-يارا / مع السلامه
وردة تسقد فيهم للباب/ غدوة نبيك فى موضوع يا شاهين
-شاهين منغير مايتلفتلها / انشاءالله
فتح باب الدار وخشو هوا ويارا
__________________________
_
فى الغرفه
يارا حولت وشاحها بي عصبيه … وحدفاته عالسرير …
وشاهين اتكى على سريره وفتح الفيس فى تليفونه
خشت يارا للحمام توضت وطلعت وهيا تنطفر .. وشاعيت يشبحلها وساكت …. صلت … ومشت للممر اللى فيه الدولاب خدت حوايجها وخشت للحمام غيرت حوايجها
وطلعت تحول فى اليرغان متع السرير بعصبيه
-شاهين / وين الكيكه
-يارا منغير ماتشبحله / ماك عطيتها لى مرت عمك بكرى
-شاهين / هما طرفين عطيتها واحد وخليت الثانى ..هاتيه
مشت يارا للاكياس تفتح فيهم بعصبيه .. طلعت باكو الكيكه مشت حطاته على سرير شاهين ..وتلقتت بتمشى لى سريرها
-شاهين/ تعالى
-تلفتتله / نعم
-شاهين / هاتى كاشيك ولا شوكه.. شنو بناكلها بصبعى !!
مشت للقجر طلعت منه كاشيك صغير وجابتهوله
-شاهين / خيرك
تلفتتله وكأنها نافورة وانفتحت.. كأنها تراجى فيه يسألها
-يارا/ انا نتزلبحش … انا مانضحكش والضحك عليه
-شاهين / ومنو زلبحك
-يارا/ بنت عمك شن ادير هنايا… منو قاللها احنا فى الفندق هدا
-شاهين حاير خيرها اعصابها لى هالدرجه/ وانا وين نعرف من قاللها
-يارا/ اكيدة حضرت جنابك … امالا منين بتعرف
-شاهين حول الغطا وقعمز عالسري / انا راجل.. ومانخافش من حد الا ربي..لو انا قلتلها عالفندق رانى قلتلك مش حنخاف
-يارا صوتها مغصوص وبتبكى / يعنى انت عندك عادى وجودها معانا فى نفس الفندق
-شاهين/ لا ….. مش عادى…
-يارا/ خلاص امالا نطلعو من الفندق
-شاهين / كيف يعنى نقعد انقل من فندق لى فندق ولا كيف
-يارا/ زى ماطلعنا من الفندق الاول نطلعو من الفندق الثانى
-شاهين / يارا….. انتى غايرة منها
-يارا انتبهت لى نفسها / وعلاش بنغير يابابا… لا تهمنى انت ولا تهمنى هيا …
-شاهين / مدامك مش غايرة يعنى خلاص مفيش داعى لى تغيير الفندق… ومدامه مشاعرك مانجرحتش يعنى تمام
-يارا/ انت المهم تعاندنى
-شاهين/ توة انا نعاند فيك … عمرى ماوسعت بالى ماحد زى ماوسعته معاك…
-يارا/ خلاص معناها نطلعو من الفندق
-شاهين/ انا دافع مقدم .. ومزال اسبوع ثانى..مش حيردولى القيمه ..ليش تمشى عليا
-يارا/ وخيرها مشت عليك فالفندق الاول
-شاهين / لانى مضطر .. ماعنديش خيار الا انى نطلع بعد الفضيحه اللى صارت
-يارا/ قصدك انا متع فضايح
-شاهين/ اوووووه علينا عاد….انتى المهم تبى تتعاركى وخلاص
-يارا/ خلاص معناها نطلعو مدامك ماتبيش مشاكل وعراك
طق الباب متع الغرفه ….
__________________________
_
طقطق باب الغرفه
-شاهين / منو زعما
-يارا/ مش عارفه …
وقف شاهين مشى جهه الباب … فتح يلقاها وردة
-وردة / خيركم اللطف … صوتكم واصل لى اخر الممر
-شاهين / مافى شى نهدرزو وخلاص
-وردة/ تى كيف تهدرزو وامى نخلعت من الاصوات
يارا تسمع فيها من داخل قريب بتموت …
حولت التيشرت اللى لابساته وقعدت فى كانتيرا داخليه
-تنادى بدلع / شاهين … حبيبى .. منو عالباب
شاهين انصدم من دلعها وكلمه حبيبي .. معرفش ايرد ..
ووردة بدى لون وجهها يتغير
-يارا/ حبيبي… شكون
-شاهين / وردة بنت عمى
طلعت يارا وهيا فاتحه شعرها ولابسه كانتيرا نص الصدر برة .. اتكت على كتف شاهين وتشبح لى وردة بابتسامه ساخرة
-يارا/ اهلا وردة
-وردة وجهها الوان/ سمعت صوت عراكم …شوى جيت قلت نطق عليكم قبل ما يسمعكم حد
-ضحكت يارا ضحكت دلع / انا كنت ندلع عليه مش نتعارك معاه …
-وردة / لكن احنا سمعنا صوت عراك
ياودى شاهين قريب يدوخ .. شن هالجمال .. وهالجسم الناعم .. هما الزوز يتناقرو وهوا يشبح لى تقاسيم جسم يارا… ماتقولش بنت 19… جسمها كله ناضج ومعبى ..
خدت يارا يد شاهين وحطتها على كتفها وحضناته عالجنب وتضحك / تو احنا كنا نتعاركو حبيبي
-شاهين عرق/ هيا تصبحى على خير ياوردة
-وردة تشبحله وبتبكى ?/ ليلتك سعيدة
-يارا / اهو تو نصكره انا الباب
خش شاهين …
وردت ياراالباب وشبحت لى وردة / هوا صحيح كنا نتعاركو
ونزلت سير كانتيرتها اليمين / لكن عراكنا انا وياه احلى عراك
.. ياحنه هوا يبي يبوسنى وانا ندلع ومانبيش
-وردة/ لعنه الله عليك
وتلفتت بتمشى
-يارا/ لعنه الله عاللى تخش بين الراجل ومرته
تلفتت وردة بترجعلها لكن يارا صكرت الباب …وخشت
__________________________
–
خشت يار للغرفه …
لكن شاهين اعصابه محروقات ….
-شاهين / مشهد تمثيلى حلو … تو هادى لقطه اديريها
..تسلبي حوايجك .. وبعدين احنا ليبيين عيب عندنا كلمه حبيبي قدام الناس .. وانتى شديتيها معش طلقتيها
-يارا تلبس فى تيشيرتها / امالا نخليها تاخدك منى
وخيم صمت عالمكان … يارا شبحت لى شاهين لقاته يشبحلها …
-يارا صوتها يرعش/ قصدى مهما يكون انا زوجتك ومانبيش وحدة زى هادى تضحك عليا
وقف شاهين وجى وراها يبي يحضنها مش قادر .. وهيا ترعش
-شاهين/ تعرفى ان جسمك خرافى … راااائع ومغرى
-يارا عاطيه بالضهر / انا درت هكى بيش مانخليها تتشمت فينا .. وتقول هادو يتعاركو
-شاهين خداها من يدها ولفتها ليه/ لكن هدا مايمنعش انك حلوة .. وجسمك حلو .. وكلامك حلو ..وكلك على بعضك تنحبي
يارا يديها يرعشو ..وجسمها كله يرعش …لكن حاسه انها تبى تقعد بين ايديه .. وانها تبى تسمع كلامه الحلو .. لكن عقلها الباطن تغلب عالموقف وخلاها ترتهب وترعش
-يارا/ لو سمحت .. خلينى نرقد ..مانبيش تتعاود الكرة وندير فضيحة ثانيه زى يومها
-شاهين تدارك الامر وخاف من عملة قدام بنت عمه وامها / باهى ارقدى.. ومايصير خاطرك الا طيب
-شبحتله وهيا ترعش/ يعنى منطلعو من الفندق
-شاهين / غدوة عندنا مراجعه عند الدكتورة .. لو قررتلك العمليه نديروها ونروحو للفندق نباتو ليله ونروحو ليبيا
-يارا/ ولو ماقررتش العمليه
-شاهين مغمض عيونه / نطلعو …
-يارا / باهى تمام
وتلفتت تساوى فى اليرغان بترقد … وهوا واقف وراها ومش قادر يبعد عنها خطوة ..
تلفتتله / منرقد
-شاهين / منقولك حاجه قبل ماترقدى
-يارا واقفه قريبه عليه/ قول
-شاهين / انا مستحيل نخونك …وبعد خديتك ..معش تعبى عينى مراة ثانيه … لا وردة ولا غيرها
يارا ساكته ومواطيه راسها تبيش تشبحله … وهوا يشبحلها ويشبح لى جسمها .. صدرها وايديها .. بالرغم انهم مغطيات بالتيشرت
-شاهين/ ارقدى .. نوم العوافى ..وكل عام وانتى بالف خير
-يارا/ باهى …
رقدت فى سريرها وعطاته بالضهر .. وهيا فى قمه السعادة
وهوا بات ليله حرفه ?
__________________________
_
ثانى يوم …
فتحت يارا عيونها .. لقت شاهين فايق قبلها ومقعمز شاد الفيس ويتفرج
-يارا/ صباح الخير
-شاهين / صباح الورد
-قعمزت عالسرير/ تصدق جيعانه
-شاهين/ باهى نوضى نفطرك فى احلى مطعم
-يارا/ لا عادى نفطرو هنايا فالمطعم .. فطورهم حلو
-شاهين / والله انا ننصحك نطلعو برة .. وانتى براحتك
-يارا نزلت من السرير ولبست الشبشب/ ليش يعنى مفهمتكش
-شاهين/ وردة بنت عمى وامها يفطرو لوطا فالمطعم
-يارا وجهها ولى احمر/ وانت من قالك
-شاهين / هيا منزله فالفيس انها تتناول الفطور فالمطعم
-يارا/ وهيا الفيس متاعها كيف يطلعلك
-شاهين / ماهو احنا اصدقاء عالفيس
-يارا منغير ماتحس بنفسها / احدفها اضافتها …احدفتها توة
-شاهين / باهى غير خشى اغسلى وجهك وصلى
-يارا/ احدفها .. اهو قلتلك راهو
شاهين يضحك …. ويارا خشت للحمام
صلت ولبست وطلعو من الفندق ركبو للسيارة ومشو لى مطعم .. ومنه للعيادة
__________________________
_
فى العيادة
مقعمزين يارا وشاهين جنب بعضهم يراجو فالدور .. وكل واحد منهم ساكت ويخمم
-يارا تخمم فى خاطرها / انشاءالله تموتى ياوردة .. لاحقتنا الواطيه بيش تنكد علينا .. توة كيف بنعرف كانا هوا حدفها ولا لا
-شاهين يخمم / كل حركاتها تقول انها غايرة .. والغيرة دليل الحب …محلاها ومحلى غيرتها … وجايه تكلم فى وردة زعميتا كنا غارقين مع بعض ???…
ابتسم لين قريب يضحك
-يارا تخمم / هوا عاجبه ..طبعا يا حنه شهريار وكل النساوين
تجرى وراه .. طبعا بيفرح وحدة معاه فالدار ووحدة فالدار اللى مقابلاته …
-شاهين يخمم / انت تحبها ياشاهين ولا شنو … اول مرة تحب فى حياتك .. اول مرة تحس ان مشاعرك متحركات مع بنت …. هيا صراحة تنحب…رقيقه وقنينه وتسمع فالكلام
…انا لازم نلاقى طريقه كيف نحول منها الرهبه .. هيا معاها حق تخاف منى .. الموقف اللى صار معانا مش شويا .. لكن انا وراها وراها ومش ح نسيبها …لين تبدا ام صغارى
-يارا تخمم/ هوا الحق كويس.. ومايزعلش فيا .. والله راجل ثانى كان طلقنى عالعملة اللى درتهاله فالفندق الاول .. والحق هوا كويس والف بنت تتمناه ……..الا انا
طلعت الممرضه / يارا عبدالسلام
-شاهين / ايووه …
تلفتلها / نوضى
وبالفعل خشو للدكتورة … لقت حالتها احسن بالمضاد ومفيش داعى تكمل الكورس… كتبتلها ورقه لى غرفه العمليات انها تركب فوق .. وبعد ساعه عمليتها
__________________________
–
ركبت يارا للدور الثانى …
اعطاهم شاهين ورقه التحويل متع العمليه ..ودارولها دخول ورقدوها فى الغرفه …
-يارا/ بتروح للفندق
-شاهين/ يعنى بنروح وبنخليك
-يارا/ زعما يبيتونى هنايا الليله
-شاهين / لو بيتوك نبات معاك هنايا…. استريحتى
-يارا خدتها الكرامه / اسمع مش تقول غايرة عليا .. والله ماتهمونى .. لكن مهما يكون الاحترام كويس
-شاهين مبتسم / منهموكش لدرجه طلعتى فى كانتيرا تغيضى فيها
-يارا / من حقى نغيضها …
خشت الدكتورة / هااا مستعدة يا يارا للعمليه
-يارا ترعش/ مستعدة ايه
-الدكتورة/ تمام ..انتى الحالة الاولى ..ح يجهزوكى دلوقتى وتخشى غرفه العمليات
-شاهين / تمام يا دكتورة ..
طلعت الدكتورة وخشت الممرضه جايبه العدة متع الكنيولا والحاجات ..
يارا ماتحملتش المنضر قعدت ترعش وتبكى
شاهين شاد يديها / يارا …خلاص معش ترعشى ..متخافيش انا معاك
-يارا/ ماتسيبنيش
-شاهين / مستحيل نسيبك … توكلى على بركه الله خشى للعمليه .. وحتطلعى تلقينى نراجى فيك
-الممرضه تضحك / انتى فاكرة نفسك حتموتى ولا ايه.. متخافيش..كلها نص ساعه وتطلعى
-يارا/ سامحنى على اى كلمه بايخه قلتهالك .. وقول لى اهلى يسامحونى
-شاهين لقاها فرصه / انتى اللى سامحنى عالغلطه اللى ارتكبتها فى حقك …. قوليلى سامحتك بيش نرتاح
-الممرضه/ ياخويا انت حتعوم على عموها .. نص ساعه واجبهالك هنا …
فكت السرير وطلعت يارا من الغرفه …
__________________________
_
الممرضه رافعه يارا لى غرفه العمليات
السرير يمشى ويارا ترن فى ودانها كلمه شاهين ..سامحينى عالغلطه اللى ارتكبتها فى حقك …
وصلو غرفه العمليات .. جى دكتور التخدير … مدت يارا يدها بيش بيخدرها …
اتمتم فى خاطرها / مسامحاتك … وانشاءالله ربي يسامحك
وتخمم/ مسامحاتك لانك عاملتنى كويس.. فوق مما نستاهل
خدروها … ودارتلها الدكتورة العمليه … وطلعوها للغرفه
هيا فايقه من البنج … لكن مازالت مش عالمزبوط
شاهين مقعمز يراجى فيها .. لكن هيا ماحستش بيه
-شاهين / يارا … الحمدالله على سلامتك
-يارا حكم فايقه لكن مش اوى / امى … يااااام … يمى …
سكت شوى … وبعدها / شاهين …. ياشاهين …
يانارى هوا قريب نقز من الفرحة انها تنطق فى اسمه … مش زى المرة الاولى …
-شاهين / انا جنبك ….جنبك يا حبيبتى …
وركب على حاشيه السرير … ضمها ليه .. وهيا ترعش من البنج …
يارا اتمتم / شاهين …شاهين
وهوا ضامها ليه / ياروح شاهين .. ياقلب شاهين
خشت الممرضه لقاته قايمها فى حضنه من نصها الفوقى
-الممرضه/ خليها متسطحها بيش تفيق عالصح …
-نزلها شاهين / باهى حاضر
__________________________
–
نفس الليله …
فالليل روح بيها للغرفه متع الفندق ….
-شاهين / شنو تحسى فى نفسك كويسه
-يارا / نبى الحمام ..
-شاهين / حاضر
وقف قامها بين ايديه.. دخلها للحمام …
-يارا / نبى انر.. ج .. ع
-شاهين/ تعالى للحوض .. اهو حاطين كيسه
فتح الكيس وحطه عالحوض .. ولقت وجهها لاحوض .. ماهناك ترجيع ..حاجه صفرا وكشاكيش متع البنج
قامها ورجعها لسريرها ..
ويارا تتوجع / ااه …اااه
-شاهين / سلامتك من الاه…ياريتها فيا ولا فيك
-يارا/ نبى الحمام
وقف ثانى وقامها بين ايديه ورفعها للحمام ..وجهت ايدها عالمرحاض … وقفها نزللها السروال ..
حطت يدها على يده / لاااا
-شاهين / متخافيش… خيرك
حوللت هيا الميطانطى وقعمزت عالمرخاض .. وتوضت ووقف لبسها حوايجها منغير مايشوف جزء من جسمها لان التيشرت نازل ومغطى
ردها لسريرها….
رقدت يارا عالسرير/ يا يمى وينك … تعالى شوفى بنتك شن صاير فيها
-شاهين ماسك يدها / انا زوجك وامك واختك مستحيل نتخلى عليك …
الغريبه انها ماسكه يده بقوة …ماحولتهاش.. ولا سحبتها من يده …
-يارا/ بن .. رجع
-مشى يجرى جاب كيسه/ رجعى هنايا مفيش داعى نرفعك للحمام …
الليل كله وهوا يمولج بيها ومارقدش …
__________________________
_
فالصبح ….
يارا فتحت عيونها .. لقت شاهين جسمه عالارض وراسه متكيه على سريرها …
حطت يدها على شعره … بلمسه حنان منها …
حس بيها فاق وفتح عيونه بدت ايدها ترعش…
حست ان رهبتها ماكانش موجوده لما هوا راقد … معناها الرهبة اللى فيها خوف… خوف منه هوا …
-شاهين / صباح الخير
-يارا / صباح النور
-شاهين / كيف حالك اليوم
-يارا / الحمدلله احسن.. والالم خف
-شاهين/ بالمضاد الحيوي ح يلتئم الجرح .. يومين بس ويخف الالم
وقف … تلفت بيخش الحمام …
قبل مايمشى قام التليفون وطلب فطورهم فوق
غسل وجهه وصلى … ومشى للحمام بل الفوطه .. وجابها لى يارا ..
-شاهين / نمسحلك وجهك واطرافك
-يارا / لا بنوض للحمام …
قاعدت راسها شوى جتها دوخه …
قرب منها شاهين / مزال لين تاكلى بيش صحتك تبدا احسن وتقدرى تنوضى ..
قرب منها.. قعمز على سريرها وهيا راقدة .. ومد يده بدى يمسحلها فى وجهها … وخدى يدها اليمين يمسح فيها ..
حط يده على صوابعها ويمسح فيهم بالواحد.. حس برغبه كبيرة فيها … لكن شد نفسه… يبيش يخلعها ولاويتها تعيط والعمليه تنقض..
-يارا تشبحله / ليش تعامل فيا هكى بالطيبه هادى
-شبحلها بحنان / لانى نحبك
طول بدو يديها يرعشو
-شاهين/ خيرك اهدى .. ماطلبتش منك تبادلينى الشعور هدا
انتى سألتينى وانا منحبش نكدب
-بدت تبكى/ توة جاى تقول فالكلام هدا … توة بعد دمرتلى حياتى
-شاهين / وينها حياتك اللى ادمرت ..هاك فى مصر تدهورى وتعالجى ..خير من هلبا ناس
-يارا تبكى/ ليش تنوض عليا فالمواجع عارفنى مريضه والكلام هدا مش وقته
-شاهين / مواجع شنو وحياتك اللى ادمرت شنو…الكلام هدا تقوليه لى شخص دار عملته وهرب ..لكن انا رجعت وصلحتها
وتزوجنا .. وانتى مرتى قدام الله والناس كلها
-يارا تشبحله / لكن انا ماخترتكش… انا مغصوبه عليك
-شاهين / تى ماهو حتى انا ماخترتكش.. ومغصوب عليك
-يارا/ ومن غصبك
-شاهين / الموقف اللى درته لنفسى ولى بنت الناس
-يارا/ الكلام هدا معش يخش ودانى بكل ولا نفهمه
-شاهين / يابنت الناس كبريها تكبر .. صغريها تصغر …
صح احنا انغصبنا على بعض .. لكن نشهد بالله انك عجبتينى .. وعجبنى كلامك وتصرفاتك وقناعاتك .. ولو تقبلى بيا زوج حنكون لك نعم الزوج اللى يحب واللى يتمنى رضاك
-يارا / انا زوجتك بالفعل ..سواء قبلت بيك او ماقبلتش
-شاهين / وينها زوجتى … انتى تحسابى الزواج فاتحه … لااااا راك فاهمه غلط … الزواج اساسه التفاهم فى الحوار بين الزوج والزوجه .. واساسه ان حضن الراجل مايكونش فاضى .. تكون زوجته ماليته .. وكانا تحملتك العام هدا بتصرفك هدا وصدك ليا و بعدك عليا مش ح نتحملك السنه اللى بعدها
-يارا تلفتت للجهه الثانيه / انا ماقلتلكش اقعد معاى ..تزوج وخود راحتك
-شاهين / لكن انا حبيتك انتى .. ونبيك انتى
-يارا قاعدة متلفته للجهه الثانيه/ وانا مانبيكش
-شاهين / تبى تتزوجى حد ثانى
-يارا/ انا ماقلتش هكى …لكن مستحيل نتقبلك بالرضا بعد اعتديت عليا بالغصب
شاهين وقف/يابنت الناس انا اللى فى خاطرى قلتهولك .. وحكيتلك على مشاعرى تجاهك …لو قبلتى بيها حتخلينى اسعد انسان فالدنيا .. ولو ماقبلتيش حيكون ضميري مرتاح سترت موضوعنا وعالجتك …يعنى توة تقدرى اديري صغار وعويله …وانا بهكى ضميرى مرتاح … ولو معش تبينى تقدرى تطلبى الطلاق .. وح تاخديه …بالرغم حنعطيهولك وقلبي مجروح
طق الباب … وصل الفطور … حط الفطور وفطرها بايديه
وهيا قلبها يرقص مالفرح انها يحبها هيا ومايحبش غيرها
لكن شن بدير فى كرامتها اللى مش مخليتلها طريق للتفاهم والمسامحه بيناتهم
__________________________
–
ثالث يوم مشت يارا للمراجعه .. وقالتها الدكتورة حالتك تمام وتقدرى تروحى … ومحاولات وردة كلها بائت بالفشل .. لان شاهين ماطلعش من الغرفه بكل .. حابس على يارا وخلاص..
طلباته عنده اوامر ..فطور غدى عشى يركب فوق للغرفه
معش عاودلها حكايه انه يبيها … عاطيها مساحه بيش تفكر
حجزو تداكر وروحو ليبيا … ماقالوش على حكايه العمليه بكل …
-عمتك الخامسه / الاسبوع اللى فات خش خناب لى حوشك
وزبطه خوك جلال .. لكن هرب قبل مايشده
-يارا/ معقولة
-الفى/ لكن قال جلال مافيش شى ناقص فالحوش
-الخامسه / شكله كيف خاش بيخنب…
شرين تليفون يارا … شافت لقت امها تتصل …
-يارا / انا فى حوش عمتى … ايه تعالو حتى هنايا
شاهين يشبحلها … يبيش يطلع ويبعد عليها حتى دقيقه
تعود على وجودها فى جنبه
صكرت يارا التليفون …
-الخامسه / هادى امك
-يارا / ايه امى .. قالت بتجى هيا وحناى
-الخامسه/ نوضى روحى لى حوشك ..وكانا جت تو نلحقكم
-يارا/ باهى على راحتك ياعمتى
-الخامسه/ تو نقول حتى لى سلفاتك ايجو غادى
-يارا وقفت / مرحبتين بيك وبيهم …
وقف وخدت شنطه يدها .. وتلفتت لى شاهين
-شاهين / نستادنكم توا
وطلعو مشو لى حوشهم
__________________________
_
فالحوش ….
خشت يارا دار نومها … وخش شاهين وراها …
عاطيه بالضهر تحول فى حجابها …
جى من وراها وحضنها .. وهيا مامانعتش …بالرغم ترعش مع بعضها
-شاهين / الحمدلله على سلامتك
-يارا/ الله يسلمك
-شاهين / منستاحشك بعتالى لما بيجوك اهلك
-يارا/ شاهين لو سمحت
مد يديها الزوز قامها بين ايديه ورقدها على سريرها
-شاهين / نحبك
-هيا بدت تفرفش/ حوووول ….قلتلك حول
وقف شاهين مخلوع/ بالشوى امى تسمعك
-يارا تلهث وحاطه يديها على قلبها / خلاص اطلع…اطلع
طلع شاهين وجو اهل يارا … وباتت عندها امها ..وحناها وعزوزتها ….
وثانى يوم روحو
وفات اسبوع كامل وشاهين يحاول معاها … وهيا شى .. ماتقابل فيه الا بالصد والرد …
معش يبات فى الورشه … بدى يبات فى حوشه فوق …لكن فى الصالة…..
__________________________
_
بعد اسبوع ….
فالضهر .. يارا ماسكه سكين اللحم وتقص فى اللحمات بدير الغدى ..
شرين باب الحوش … غسلت يدها وطلعت ….
لقاته خوها قيس ….
خش يحكيلها على الفى وانه يبي يخطبها … ف يبي يعرف رايها فيها …
هدرز عندها قريب ساعه … وشكرتها يارا هلبا وقالتله توكل
روح قيس ورجعت يارا للمطبخ … وخش شاهين …
-شاهين / يارا ….. يارا
يارا فالمطبخ/ انا فالمطبخ …
خش لقاها لابسه سروال لاصق وتيشرت قصير …
-شاهين / السلام عليكم
-يارا/ عليكم السلام ..
-شاعين / جبت حوت نبيك اديرلنا بيه كسكسى
طلعت من المطبخ لانه ريسبشن ضيق …
ووقفت عالرخامه متع المطبخ من جهه الصالون وهوا طلع وراها …
-تلفتتله ماسكه فى ايديها اللحم / معناها نرد اللحم للفريز .. خسارة طلعته من الصبح فالميه قبل مندير رشته كسكاس
وتلفتت حطت اللحمات عالرخامه
قرب منها شاهين وضمها من الخلف / سلم مرتى اللى لاهيه بيا واتنزل فاللحم بكرى
-يارا/ باهى حول شوى منطلع نغسل ايديا
-قرب منها اكثر / لا مش حنحول ..
-يارا حست بي جسمه لاصق عليها هلبا وبدت ترعش/ حول نقولك
-شاهين ضمها معش خلاها تتحرك / لا .. نبيش نطلع .. انا نحبك يابنت ليش اديري هكى
وقرب من رقبتها يبوس فيها بي لدة …
بدت ترعش مع بعضها وهيا تفك فى نفسها منها خشت فى عالم ثانى وعياط بيش تفك نفسها وهوا شىىىىى
قامها فوق ولفتها ليه ولصق جسمها على جسمه / لى امتى بتقعدى هكى …انا زوجك وعندى فيك حق ..
ادف فيه / يا شاهين حول …. حوووووول ايديك
تفرفش وتحرك فى ايديها تبيه ايسيبها لحد ما جت ايدها السكين … تاخد وتضرب شاهين فى جنبه …
-شاهين / اااااه
ويجى طايح على ضهره …
طاحت يارا على ركابها / شاااهين…. شااااهين …
مسكها من كتفها وقربها لى فمه بيش تسمعه/ قققوولى الخنننننناب خش ……… وهوا اللى ضضضضضربنى وهرب
وطاح راسه للخلف ….
-يارا تعيط باعلى صوت / شااااااهين ….شااهين
جو سلافها يجرو لما سمعو العياط
__________________________
تمت ….. ويتبع
اليوم الحلقه طويلة ..وكلها على شاهين ويارا …. انسجمت ???
الحلقه الجايه هيا الاخيرة ….غدوة طبعا
نحبككككم ❤