رواية ضحايا للكاتبة زهور جمال الدين
#ضحايا
بقلم زهور جمال الدين ⚘
?الحلقه العاشرة?
فى الطريق
قيس ماشى للشيل بيعبي بنزينه … قام التليفون واتصل بي الفى يحكى معاها لان الطابور طويل
التليفون يشيرن وماحد رد … استغرب ماردتش .. قام التليفون بيعاود الرقم خافها تهزا عليه .. بعدين مقدرش يقاوم …عاود اتصل بي رقمها مفيش رد …ولعت فيه نار.. غريبه تليفونها ديما فى جيبها ….
قعد عشرة دقايق وعاود اتصل مرة ثانيه … انفتح الخط فرح قيس انها ردت
-قيس/ اهلين الفى
-الفى/ اهلا تهانى كيف الحال
-قيس/ منو تهانى .. انا قيس
-الفى/ كيف حال امك ياهنيوة انشاءالله بخير
زبط قيس ان واحد من خوتها جنبها … وماعجباش الشى اللى صار… فصكر الخط … وهيا ماعودتش
طابور البنزينه يمشى وهوة يخمم/ معقولة عقابها ينادونى باسم بنت … انا قيس اللى طول عمرى صعب ونحكى كلمتين الثالثه مانحكيهاش يطلعونى بنيه
السيارة واقفه ويخمم/ هيا مش غالطه .. بالتاكيد واحد من خوتها جنبها …انت الغالط يا قيس .. عقابها شاد بنت وتكلم فيها بالدرقه على اهلها …من امتى انت تتصرف هكى.. ترضاها لى اختك تلقاها شادة تليفون وتهدرز بالدرقه …
افرض واحد من خوتها زبط انى انا المتصل ..شن بيكون موقفى توة قدامهم
حط راسه عالكرسى/ لا والله … مامرضاهاش .
شرين تليفونه لقاها هيا المتصلةة… مالاول ماكنش ناوى يرد عليها نهائي… لكن قلبه ماطاوعاش ورد
-الفى/ الو وو
-قيس/ اهلين
-الفى/ سامحنى جلال كان واقف جنبى وانت قعدت اتعاود .. اضطريت انرد عليك كأنك وحدة من صديقاتى
-قيس/ حصل خير
-الفى/ انشاءالله غير ماضايقتش
-قيس/ لا لا …. وعلاش بنضايق … نستادنك توة وصلت بومبه البنزينه
-الفى اضايقت / باهى براحتك
وصكرت الخط …حارت فيه خيره …
بعد عشرة دقايق عاودت اتصلت ماردش …
شرين تليفونه لقاها امه تتصل … فتح الخط … وخشت الفى انتضار وصكرت
-فاطمه / انت وين توة
-قيس/ مش بعيد
-فاطمه / نبيك فى موضوع
-قيس/ حتى انا نبيك فى موضوع
خشت الفى انتضار مرة ثانيه … ووين تلقيها عاد .. النار شاعله فيها مالاول وزادت
-فاطمه / خلاص انراجى فيك فالحوش
وصكرو الخط …. عاودت اتصلت الفى ثانى …
بعتلها مسج ” مشغول شوى اول مانفضى تو نكلمك ”
طبعا هيا وين تلقيها ..تخمم / مشغول غير عليا انا ..ماهو توة كان يحكى فالتليفون …
وهوا كان مقرر مستحيل ايكلمها الا مايكون مربط معاها رسمى
__________________________
_
يارا لبست عبايتها ونزلت هيا وشاهين مع جماعه الامن لوطا
فى مكتب التحقيق متع الفندق
-يارا/ لااااا خوى .. هدا زوجى
شاهين مقعمز عالكرسى اللى قدامها ويشبحلها
-الضابط / احنا سمعنا صويت .. والناس اتلمت ..لو عايزة تعملى محضر انا تحت امرك
-يارا/ نقولك زوجى … وانا ماشفتاش فالظلام … نحسابه خناب ف عيطت .. وهدا اللى صار
-الضابط / يعنى ايه خناب
-تلفتله شاهين/ حرامى
-الضابط شبحله / يعنى نقفل المحضر
-شاهين?/ اسألها لو مش عايزة تشكى صكره المحضر
الضابط شبحلها اشرت بي راسها ان لا
-الضابط/ اتقفل المحضر فى ساعته وتاريخه
وشبحلهم / احنا متأسفين على سوء التفاهم اللى حصل وتقدرو تتفضلو بعد ماتوقعو عالمحضر
-شاهين شبحلها / وقعى
-شبحتله بي خوف / حاضر
خدت المحضر وقعت وهيا مقعمزة … وخداه هوا وقع
مدلها مفتاح السيارة
-شاهين عيونه حمر/ اركبي فى السيارة
-يارا خايفه / باهى
بالفعل طلعت وركبت فى السيارة .. ومشى هوا للريسبشن
دار تشيك آوت … ركب لملها حوايجها ونزلهم الولد متع الشناطى.. وطلعهم للسيارة .. فتح شاهين كوفينو السيارة وحط الشنط … وصكره
وقعمز فى مكان السواق …
-يارا/ قصدك بنروحو ليبيا
شبحله وهوا كاظم غيضه .. يبيش يعيط عليها
__________________________
–
فى حوش عبدالسلام …
مقعمزين خالد ومرته وعبدالسلاندم ومرته وامهم
-فاطمه / غير وين بنكلمها يا خالد .. والله من يوم اللى سافرت مايمعت صوتها
-خالد / انتى ماقلتيش …لو قلتيلى راهو اتصلتلك بيها
-فاطمه / انت تعرفنا النت يرفعو فيه الاولاد معاهم .. ماعندناش طول اليوم …وهما سلامتهم يروحو فالليل
-مفيدة/ باهى علاش ماتكلميهاش بعد يروحو الاولاد
-فاطمه / ياوخيتى مانقدرش ..الراجل برانى … ونتصل بيهم عقاب االيل بايخه
-خالد/ ترا نوضى يا مفيدة جيبيلى الماى فاى من الحوش .. خلى نكلمموا ابدا اشاهين .. ومنه نكلمو يارا
-مفييدة وقفت / هى شووووية بس
وطلعت … مشت للحوش جابت الماى فاى ورجعت لى حوش سلفها
-فاطمه / والله ستاحشتها .. ليا ايام عليها
-مفيدة تهمسلها / هى فكينا بالله يا فاطمه .. ينبدو كلنا نبكو راهو خاطر كلنا ستاحشناها
ضررب خالد ماسنجر شاهين بدى يشرين
-خاالد / اهو يشرين .. هى اسكتو كلكم خلى نتكلمو معاهم بالواحد
__________________________
يارا وشاهين فى السيارة …. ياراقريب تموت من الخوف والحشمه من العملة اللى صارتلها … وهوا يسوق وساكت
-يارا/ بنروحو
شاهين ساكت وماردش عليها..متعود يكشخ ويعيط واللى تحته يقولو حاضر …. اول مرة يكتم غضبه ..دارتله فضيحة فى الفندق … واكيدة الفندق فيه ليبيين .. .ومع هدا وغصها وسكت …
شرين الماسنجر فى تليفونه .. شاف المتصل لقاه خالد .. دار تليفونه صامت وحطه عالفودرة ..
يارا شافت صورة عمها خالد فى الاتصال …
بصوت واطى/ هدا عمى .. اكيدة امى تبى تكلمنى
-شاهين منغيرمايشبحلها / ردى
خدت يارا تليفون شاهين وردت على عمها .. لما فتحت الخط الصوت انفتح فى سبيكر السيارة لان التليفون مربوط بي البلوثوث …
-خالد/ السلام عليكم
-يارا/ اهلين عمى كيف الحال
-خالد/ اهلين اهلين بنت خوى الباهيه .. شن حالك يارا وشنو اخباركم
-يارا/ الحمدلله عمى شن حالك وحال العويلة وبوى وامى وخوتى وحوش جدى
-خالد يضحك/ غير بالشوى بالشوى تو يكلموك كلهم بالواحد غير عطينى شاهين نسلم عليه
-يارا/ شاهين يسوق
-خالد / ايح ايح …شنو قصدكم شريتو سيارة غادى
-شاهين منغير مايبتسم/ شن حالك ياخالد
-خالد/ اهلا شاهين كيف حالكم وشنو اخباركم
-شاهين / الحمدلله كيف حالكم انتو
-خالد / فى خيار الخير .. توة كنت نقول لى يارا شريتو سيارة غادى ولا اجرتو
-شاهين / لا لا ايجار .. تعرفنى منحبش التاكسيات
-خالد / المهم اخبارك باهيه واموركم تمام
-شاهين / الحمدلله … اهو فاطمه جنبى تبى بنتها
-شاهين/ اهيا معاها
شاهين دارها بي خبث وماباش يصكر المايك?
__________________________
_
فى حوش الخامسه
الفى تخمم … كيف قيس مايردش عليها .. غريبه ..الايام اللى فاتو حكم طول الوقت مع بعضهم عالهاتف .. شنو اللى صار وخلاه يتغير
فتحت عمتك الخامسه الباب وخشت/ ترا ديريلنا شاهى يا الفى …
الفى انتبهت لى امها / حاضر يااام
وخشت للمطبخ وتخمم / مرتين نخش عليه انتضار.. زعما يكلم فى بنت ….
خدت سكريه السكر وفتحتها وتحط فالسكر فالبراد/ لا لا .. ماضنيتش هكى نوعه .. نحس فيه مايكلمش فى بنات …
صكرت السكريه / اهو يكلم فيا وانا بنت .. شن معنى يعنى
اووووف راسى داخ من للتخميم
باب الحوش يطقطق …
الخامسه/ الفى تعالى افتحى الباب
طلعت الفى تفتح فى الباب…لقتها وردة بنت عمها
-الفى تسلم بي حرارة / اهلين .. اهلين وردة كيف حالك
-وردة/ اهلين الفى شنحالك وشنحال مرت عمى
-الفى/ الحمدلله كويسه … تفضلى
خشت الفى سلمت على مرت عمها … الفى كانت ماسكة تليفونها .. حطاته عالطاولة الجانبيه جنبها .. وقعدت تهدرز على الفى …
-وردة / ماشاءالله العرسان مشو للمغرب
-الفى/ سبحان الله ياوردة .. تعجبنى فيك شخصيتك القوية وكيف فايته كل المواضيع
-وردة / فاهمه عليك … وكله نصيبات
-الخامسه / مغرب شنوو… خيركك ماقلتيليش خوك بيمشى غادى
-الفى/ لا لا .. شاهين قاعد فى مصر .. مامشاش للمغرب
-وردة انصدمت / نحسابهم مشو للمغرب
-الفى/ لا لا… امس الضهر كلمت شاهين قاعد فى مصر.. وكانت معاه يارا حتى هيا كلمتنى قالو كانو يزورو فى مرت واحد صاحب شاهين
-وردة / اهاا
وفى خاطرها / الفى يا منافقه تضربي هنايا وهنايا
-الفى/ خلى نجيب الشاهى اكيدة طاب
الفى ناضت مشت للمطبخ .. وتليفونها بدى يشرين غير هيا دايراته صامت … على سطح الشاشه يطلع الاسم والرقم
-وردة تشبح فى الاسم والرقم ومش مستوعبه / قيس.. منو قيس …زعما الفى تكلم فى خو يارا … هدا علاش تزمزكلها ..
طلعت تليفونها وسجلت رقم قيس ..
__________________________
_
فى سيارة شاهين …
الصوت طالع من المايك يسمعو فيه يارا وشاهين
-يارا/ اهلين يااام
-فاطمه / اهلين بنيتى كيف حالك وحال راجلك
-يارا / الحمدلله .. كيف حال بوى وخوتى وحناى وجدى
-فاطمه / الحمدلله باهيين .. شنو ادهورتو
وبدت يارا تحكى لى امها كيف كيف ساكنه فى فندق وطلعت وادهورت ومشو لى صحابهم فالمستشفى
( وهيا فالحقيقه مادهورتش ?)
-فاطمه / قتلك
-يارا / نعم يااام
-فاطمه / سلم بنيتى هنيني…ردى بالك اديري لى راجلك مشاكل .. رانى حلمت بيك حلم مش باهى
شاهين تلفت لى يارا شبحلها
-يارا / انشالله خير
وانقطع الخط بيناتهم ……
والسيارة تمشى .. وهما الزوز ساكتين …
-يارا انتخصت / اسمع .. انا عارفه ان اللى صار غلط .. لكن صار غصبا عنى .. مادرتاش بقصد
شاهين ساكت وماردش عليها
-يارا/ والتجاهل عيب .. لما حد يكلمك رد عليه
خش شاهين يمين ودرس السيارة قدام فندق ونزل ..
قعد ممكن نص ساعه وهيا فالسيارة …
جى ومعاه واحد ماسك عربه..
فتح شاهين الباب من جيهتها / انزلى
نزلت يارا … وخدى الشاب الشنط متعهم ودخلها للفندق ..
وخشو يارا وشاهين مشو طول للاسانسير .. وركبو للدور السابع … خشو للغرفه لقوها زوجيه سرير واحد ..
__________________________
_
فى حوش فاطمه …
خش قيس لقى امه وبوه مقعمزين ….
-قيس/ السلام عليكم
-فاطمه وعبدالسلام / عليكم السلام …
-فاطمه / كانا قدمت ربع ساعه بس كنا نكلمو فى يارا
-قيس/ شنحالها
-فاطمه / الحمدلله فى خيار الخير
شرين تليفون عبدالسلام…
-عبدالسلام/ اهو الراجل وصل
-قيس/ منهوا
-عبدالسلام وقف/ راجل بيصلحلى سيارتى
طلع من الباب…
-فاطمه / خيرك ياقيس قلتلى نبيك
-قيس/ حتى انتى قلتيلى نبيك ..قولى انتى قبل
-فاطمه / انا نبى نقولك على ناهد بنت خالتك ..جايها سلف اختها ليلى …وخالتك حكتلى ..قالتلى بالك عندك نيه فيها ..وانا عارفتها تبينى نقولك انت .. البنيه تبيك ياوليدى
-قيس/ مبروك عليها وربي يهنيها
-فاطمه/ غير زيد خمم شوى
-قيس/ مخمم من زمان .. ونفس الراى فوتى الموضوع
-فاطمه / على راحتك
-قيس/ امالا خلى نقولك انا عالموضوع اللى نبيك فيه
-فاطمه / قول شنو
-قيس/ نبى نخطب
-فاطمه / هدا اليوم الباهى ياوليدى… خلاص معناها نفس الموضوع
-قيس/ انا بنخطب لكن مش بنت اختك
-فاطمه / امالا منو بتخطب
-قيس/ الفى اخت شاهين
-فاطمه / حماة يارا .. والله البنيه كويسه مش خاطيه.. لكن خلى نشاور بوك قبل .. وبعدين لين تروح اختك وراجلها ونكلمها تنشد البنيه
-قيس/ وهيا امتى بتروح
-فاطمه / والله مانى عارفه
-قيس/ انتى غير قولى لى بوى وشاوريه .. وبعتالى ساهل…
-فاطمه / هوا هدا
__________________________
–
فى الفندق
يارا وشاهين خشو للغرفه لقوها سرير واحد …قعدت ساكته تبيش تزيد ادير مشاكل … حطت شنطتها عالكوميدينو … وخشت للحمام … قعدت شوى وطلعت لقاته مبعد السراير عن بعض….
الحكايه ليل وهما تعبانين … كل واحد منهم رقد فى سريره
التلفزيون مفتوح على قناة مصريه.. جايبه فيلم
فى الفيلم الزوج يقول لى زوجته / كل واحد مننا نايم فى اوضه .. معنى كدة .. لما تلاقينى نايم مع وحدة ماتبيقيش تعمليها خناقه وتلمى علينا الجيران
تلفتت يارا خدت الريموت وغيرت القناة … خدى شاهين تليفونه وفتحه يقلب فى الفيس
-يارا / بتقعد هكى هلبا
-تلفتلها / كيف يعنى هكى… كانا عالدوة احنا مالاول مانتكلموش هلبا .. كل حد فى حاله
-يارا?/ باهى
شاهين حسها اضايقت …
-شبحلها / تعرفى امتى نفوت الموضوع ويبدا عندى كأن لم يكن …
يارا شبحتله تبى تعرف
-حط يده على صدره / لما ترقدى هنايا …تتحول الرهبه منك
-يارا مخلوعه/ ااه
-شاهين/ لازم تتحول منك الرهبه .. ومش حتتحول الا هكى
-يارا / انت تحلم
-تلفت لى تليفونه / براحتك
تلفتت للجهه الثانيه وغمت راسها بالغطا ….
حول تليفونه وتلفتلها يشبحلها … هيا فالحقيقه مسخفاته ..
حس انها صغيرة عالالم اللى هيا فيه … خاطره يمشى يحضنها بس خايف من رده فعلها … قلبه رق .. فى نضره مهما ادير فيه شويا ك ردة فعل للشى اللى داره
يبي يكلمها معرفش شن يقول …قعد يخمم ….
-شاهين/ تبى تفتحى فيس بوك
-يارا متلفته للجهه الثانيه/ عادى
-شاهين / باهى شوى …
دار خروج من بروفايله .. وفتح بروفايل جديد
-شاهين / شن نكتب اسمك
-قعمزت عالسرير وتلفتتله / يارا .. يعنى شن بتكتب
-شاهين / شن بنكتبلك اسمك عالفيس.. اكيدة لا
-يارا / امالا كيف
(زمان المرا ادير اسم مستعار ?.. نادر ماتلقى مدام كاتبه اسمها الحقيقي)
-شاهين / المرا تكتب ام كدا … بنت او ولد
-يارا/ لكن انا ماعنديش صغار
-شاهين / معناها نديرلك كنيه .. مثلا وردة الربيع .. او السماء الصافيه … او …
-يارا/ سمينى المتفائلة خير
-شاهين ابتسم / باهى حلو ..
وكتبه فى خانه الاسم واللقب
-شاهين / امتى تاريخ ميلادك
-يارا/ نعطيك حقيقي ولا مستعار
-شاهين يضحك/ لا هدا عادى
يارا بدت تضحك … وشاهين فى قمه السعادة انها مبتسمه وسعيدة
-يارا/ يوم 12/ 4/ 1993
-تلفتلها/ معقولةةةة… عيد ميلادك بعد ثلاثه ايام
-يارا ?/ ايه
-شاهين/ كل عام وانتى بالف خير ..يبدا عمرك 19 سنه
-يارا/ ايه .. قريب نطق العشرين
-شاهين/ عالخير انشاءالله
كمللها تجهيز بروفايلها عالفيس .. وبعت اضافاات منها ليه ولى خواته ونساوين خوته وخوتها …
وبدت الرسايل توصل ” من معاى!؟”
يبعتلهم انها يارا …
-شاهين / هاتى تليفونك
نزلت من السرير واقفه فى جنبه عطاته تليفونها فتحلها نت الفندق .. ونزل برنامج الفيس وفتحلها صفحتها فى تليفونه
وقعمزت عالكوميدينو اللى بيناتهم وقعدت تتفرج عالفيس وعالصفحات اللى ينزلولها …
وقف …
تلفتتله/ اسفه عالموقف اللى صار
-شاهين/ حصل خير
-يارا/ تصبح على خير
-شاهين / نوضى من 8 بيش نفطرو تحت ونمشو للعيادة
-يارا/ باهى
__________________________
_
ثانى يوم
فاقو بكرى ومشو للعيادة … قعدو يراجو فالدور …
رقمهم 3 ….
خشو للدكتورة ودارتلها الجهاز ..وشافت الكدمه …وطمنتهم انها تصير .. ومش لدرجه ازالة الرحم … محتاجه مضاد حيوي تاخده فالوريد … اما ترقد عندهم فالعيادة او تجى مرتين يصربوهولها الممرضات مع التغديه لمدة ساعه
شاهين رفض دخولها للعيادة والتزم بي انه يجيبها ..
وبعد ماتكمل المضاد لمدة اسبوع .. لازم ايجيبها ادير منضار
بيش يفتتولها الدم ….
روحو للفندق … تعبانين … رقدو طول … والعشى طلعو تعشو …
يارا حست انه حنين عليها.. وموسع باله معاها هلبا .. بدت تكلم فيه كويس.. معش ترد بالنرفزة … هدت شوى … .. وهوا معش متحمل بعدها لحظه .. كان لاقى يدسها فى جيبه ومايشوفها حد …
الحب واضح عليه وكل الناس ملاحظاته الا هيا ….
__________________________
_
بعده بيومين ….
عيد ميلاد يارا …. اتفق مع مطعم انه يديرلها عيد ميلاد مفاجئة مع الساعه 6 …
مقعمزين فالغرفه كل واحد فاتح تليفونه … ويتصفح فى الفيس ….
يارا وجعها خاطرها انه مادكرش عيد ميلادها …
وتتكلم فى خاطرها / تى انتى لا تعدلى عليه ولا تكلمى فيه كيف بيدكر عيدميلادك ….
خشت على بروفايله … طلعت صورته الشخصيه تتفرج عليها …
وفى خاطرها / ليش تعامل فيا كويس .. ندمان على غلطك … اى بنت فمكانى ماتسامحكش …
طلعت من بروفايله وصكرت تليفونها وحطاته عالكوميدينو
ومتكيه تخمم/ الزواج تصليح غلطه … هوا الحمدلله ماخلاكش تنفضحى .. ستر عالموضوع … يعنى توة حتى كانا نطلق يبدا عادى لانى كنت متزوجه
وانتبهت/ نطلق … نهار احرش
-شاهين / هيا جهزى نفسك والبسى منطلعو
-تلفتتله/ اليبرة مازال وقتها
-شاهين / نطلعو ناكلو حاجه ونمشو بعدها للعيادة
-يارا / امممم باهى
وقفت مشت للحمام … توضت وصلت العصر … وخدت حوايجها .. خشت للحمام لبستهم …
نول شاهين بيمشى للحمام …لما مشى من السرير بيوصل للحمام فات عالسكماجه اللى واقفه عليها يارا .. المكان كانةضيق… بيفوت لصق جسمه فى جسمها … هيا رعشت مع بعصها …الموقف ماخداش زوز ثوانى … لكن اثر فى شاهين هلبا … حس انه يبي زوجته …لكن خايف اديرله هداكه العياط متع يومها …
اما هيا ايديها يرعشو مع بعضهم …لكن سكتت مابتش ادير شوشرة…
وهوا خش للحمام دوش بي ميه مصقعه …
ولبسو وطلعو ….
وصلو للمطعم …متع العيد ميلاد …
نزل من السيارة قام تليفونه واتصل … كمل وصكر الخط
شبحلها من الروشن / هيا انزلى
-يارا تشبح لى نفسها فى المرايه لقت الحجاب مساوى … نزلت … وخشو للمطعم … قعمزو على طاولة فالوسط لقوها فاضيه … هما قعمزو والضى انطفى وظلم المطعم
-يارا مقعمزة عالكرسى متفاجئة / شن فى ..خيره المكان ظلم
-شاهين / مش عارف شوره الضى هرب?
-يارا/ بلا جو هوا يهرب فى مصر ..هيا نروحو
-شاهين / اصبري يفتحو الضى ونطلعو … نخاف تعثري فالسجاد
انفتح الضى وبدت موسيقى تضرب هابى بيرث داى تو يو
والعاملين كلهم واقفين صفين على طاولتهم ويصفقو
.والناس فالطاولات كلهم منسجمين ومبتسمين ويشبحولهم وفى منهم من يصفق معاهم
يارا تشبخ متفاجئة ….
زوز بنات جايبين عربه من الباب الجانبي .. عليها تورته دورين وميش والع … وشموع …
والعاملين يغنولها … وهيا تشبحله ومبتسمه …
تم الميش وطفت الشمعه ….
-شاهين / كل عام وانتى بخير
-يارا مبتسمه/ شكرا
عطى شاهين تليفونه لى واحد من العاملين يبيه يصور اللقطات … غنولها العاملين وعطوها الموس قصت التورته ..وهيا فى قمه السعادة اول مرة تشوف الدلع هدا …ارتخت معاه شوى
خدى التليفون .. وبعت الصور للماسنجر متاعها .. وخدى تليفونها ونزل الصور والكل شاف وعلق
شاهين طلب من المطعم يقصو التورته ويدوقو كل الموجودين… ولفولهم قطعتين فى صحن بيش يروحو بيهم
جابولهم العشى الفاخر… تعشو … وعطاها خاتم دهب هديه
العامل/ اصوركو ..
-عطاها شاهين التليفون ثانى / صورنا
شاهين ماد الخاتم لى يارا والعامل صورهم …
-العامل/ طلعو ولبسهولها …
طلعها شاهين ولبسهولها… وهيا مش مضايفه بالعكس سعيدة
-العامل/ بصو لبعض اصوركو
شبح شاهين لى يارا … وهيا شبحتلها …
هوا نضرته حارة … ماقدرتش تخلى عينها فى عينه… حولت عيونها …
-العامل/ اصوركو كمان
-شاهين / لا صحيت ..هات التليفون
خدى التليفون وطلع فلوس عطاهمله
كملو عشاهم … خدو الكيكه … وطلعو روحو للفندق … والحقيقه كانت سعيدة … حست انه كويس معاها ويبي رضاها …
طلعو من المطعم وروحو للفندق …خدو الاسانسير وركبو للدور السابع ….
ماشيين فالممر بيخشو غرفتهم
حد وراهم نادى/ شاهين
لما تلفتو لقوها وردة
__________________________
تمت … ويتبع
الحلقه الجايه بيروحو ليبيا … نشوفو شن بيصير بين شاعين ويارا فى حوشهم
نحبكم ❤