رواية ضحايا للكاتبة زهور جمال الدين

#ضحايا

بقلم زهور جمال الدين ⚘
?الحلقه السادسه ?

–

طلع قيس وخشت فاطمه للمطبخ … ومشت يارا بخطوات ثقيلة للمربوعه …وين مامقعمز شاهين ..حطت يدها على مقبض الباب بيش تفتحه وتخش…
بالفعل خشت يارا للمربوعه … مواطيه راسها عاالارض
…مالحقتش تشبح العريس …اما شاهين انصدم ..البنت ضاعفه النص…هاديكا البنت بلحمتها .. لكن هادى زى العود
اما الشكل هيا …نفس الملامح
خشت وهيا ترعش .. والصوت هارب منها … قالت السلام عليكم .. لكن الصوت مخنوق ماطلعتش منها …
مشت طوووووول قعمزت عا الكنبه اللى مقابلة الصالون اللى مقعمز عليه هوا …وبيناتم طاولة كبيرة ….
شاهين/ السلام عليكم
-يارا مواطيه راسها فالوطا ومش قادرة تقيمه/ ع.. ي كم السلا…

_________________________________________

قيس طلع قدام الباب …

يخمم فى خاطره / تو انت داير فى اختك حالة وتبى تعطيها .. غلط اللى درته .. البنت حالتها النفسيه مالاول زفته يابال توة وانت تعيط وتكشخ ..
يشبح للباب الخارجى/ لكن الولد كويس سبحان الله طيب ويخش الخاطر ..ومع هدا غلط انى نغصب اختى ونزعلها منى …

يتفرج على السيارات تمشى خارج الصور والباب مفتوح/ لكن انا ماغصبتهاش ..قلتلها شوفيه بس … وفالاخير كان رفضت ماعندى مابندير .. حتى بوى يوقف معاها ومانقدرش نعانده
سكت شوى/ تعرف كيف ياقيس … بعد ما تطلع يارا من المربوعه .. نخليها قيس الساعتين … وبعدها نكلم الولد نقوله مفيش نصيب .. هكى اسلم راى

سرين وسارة بنات عمامه يلعبو مع بعض
-سارة / عمو قيش.. تعالة خططنا النقيزة
-قيس يضحك/ عمو وانتى بوك يبي يعطيك ليا
-سرين/ هيا تعالة معش وقت
-وقف قيس مشالهم / شنو وراك شركه امالا ياسيرين مستعجلة
-سرين/ لااا نبى نغلبها ونربح
-سارة / انا اللى منربح
-قيس خدى العود ويخطط/ شن رايكم منديرلكم جائزة واللى بتربح منعطيها جنيه
-سيرين تنقز/ ههييه هييه
-جعفر خاش من البوابه/ والله ماكم عاديات انتو الزوز
-قيس/ والله ماتتحشم وين كنت
-جعفر/ حصلت صيدليه بنبدا نخدم فيها .. قعدت مع الدكتور ورانى الاسعار
وشبح للحوش/ الراجل جى
-قيس/ هوينا فى المربوعه مقعمز رؤيه شرعيه
-جعفر تلفت للباب / امالا انا سلامتكم
-قيس/تى وين ماشى .. مش عارف عندنا ضيف
-جعفر/ انت وزير الداخليه والخارجيه فالحوش .. وكلامك هوا الماشى وعلاش قاعد انا ??
وتلفت ماشى بيطلع
-قيس/ تى تعالة يا امسخ .. عاون حتى شويا
-جعفر/ فالليل احكيلى شن صار يا رحيبي .. تشاو
-قيس/ والله ماتحشم

__________________________________________

–

فى المربوعه ….

يارا لا قامت راسها ولا شافاته .. حتى صوته مازبطاتاش
وقف من مكانه .. ولف من الطاولة … وهيا جسمها كله يرعش .. ملصقه كفوفها على بعضهم .. ويرعشو ..وصاير فيها
قعمز عالصالون اللى جنب الكنبه اللى قاعدة عليها … ومجهز نفسه ومنتبه لى اى ردت فعل اديرها بعد تزبطه
-شاهين / عرفتينى
-يارا متلخبطه/ لو سمحت خوى ارجع قعمز مكانك ..لو يخش خوى قيس مش حيرضى بوجودك عالكرسى هدا
-شاهين/ خوى??!!… انتى عرفتينى ولا لا
-مواطيه راسها / ومنو انت
-شاهين/ قيمى راسك واشبحيلى وانتى تعرفى انا منو
-قامت راسها بالشوى وبخجل وشبحتله .. زى اللى زبطاته
-يارا قايمه صبعها/ انت …انت ….
وحطت يداها الزوز على ودانها مصدومه وتشبحله.. ومنغير ماتحس بنفسها وقفت هجمت عليه و بدت تضرب فيه
-يارا/ يا واطى يا حيوان دمرتلى حياتى.. وتبينى ناخدك
..والله كان تكون اخر واحد فالدنيا
مسك يديها الزوز بي يد وحدة ..وحط يده الثانيه على فمها بيش يسكتها …نفضت جسمها بتهرب…وقف مسكها من ضهرها وقامها و يده مصكرتلها فمها
تخبط فى راسها وفى جسمه .. وتنتفض وتفك فى ايديها … وهوا بي جسمه زى العملاق جنبها ?..مسكلها يديها الزوز بيده ..
كان قوى واحكم مسكتها … فرفشت تحته وهيا تضرب فيها برجليها… لحد ماتعبت واعصابها انهارو وفشلت …
-شاهين/ صكرى فمك امك وخوك بيسمعوك
تنفض فى جسمها منه …. عصرها باحكام/ بننزلك عالصالون تعيطى نوريك
قعمزها عالصالون الفردى بحدر
-شاهين مفنص فيها ويعض فلسانه ويشبحلها / اقسم بالله نسمع صوتك مانبدا الا دافنك توة هنايا
-يارا منهارة ومش قادرة حتى تقيم يديها من العياط المكتوم ومن مسكه القوى ليها / ياواطى …يامش متربي .. انشاءالله تلقاه فخواتك
-قرب منها ومسك دقنها/ بتصكرى فمك ولا كيف ..احنا شن وصلنا لى هالمواصيل غير عياطك..
وقف مشى خطوتين وتلفتلها/ ليلتها لما لقيتك قلتلك صكرى فمك لانى بنخليك فحالك وبنطلع ….وانتى تعيطى طالقه لسانك…زعميتا تلمى عليا فالناس بديريلى فضيحة..واليوم هاك تعاودى فى نفس العملة .. نفس الشى
-يارا بدوخ/ لعلمك مش حتهرب من عقاب ربي.. ح يحطك فالنار..حتتحاسب عليها عملتك
نزل على ركابه قدام رجليها / اسمعى…خليك عاقلة وافهمينى
… انا صاحب العملة .. وانا اللى جاى بنصلحها

-يارا تبكى بحرقه / شن بتصلح ..انا حياتى ضاعت خلاص .. اللى قدامك جسد بس…. الروح ماتت من ليلتها
-شاهين/ اسمعى..سواء وافقتى او رفضتى ..انا جاى بنسترك
… عارف روحى غالط .. وعارف ربي بيحطنى فالنار..
لكن بس خلينى نصلحلك حياتك ..تعرفى انا تشبثت بالحياة وقعدت حى على خاطرك .. على خاطر نصلحلك حياتك
-يارا / لكن انت عدوى … تعرف العدو فى نضر اى شخص عاقل جزاءه الموت … يعنى انا لازم ننتقم منك ونقتلك
-شاهين/ تتزوجى وتنسترى .. وبعدين بتقتلينى بتحرقينى هدا موضوع نتفاهمو فيه بعتالى
-يارا/ توة جاى داير روحك بطل وجاى بتنقدنى .. ماك هربت وخليتنى زمان …افرض سمعو بيا خوتى شن كان رح يصير… بيقتلونى ولا … يعنى الموت كان ح يكون جزائي وانا مادرت شى …… .. وبدت تبكى
شد ايديها وثبتها فى الكرسى/ قلتلك ضمى فمك ..خوك قريب بيجى …
وقف … ساوى حوايجه / اسمعى انا جيتك من الباب .. بيش نستر الموضوع ….
-يارا/ توة بتستره
-شاهين بعصبيه/ خلينى نكمل … جيتك وخطبتك ..يعنى ضميري راضى ..سواء وافقتى او رفضتى
-يارا تبكى/ ضميرك .. انت ضميرك ميت .. انت عبارة عن حيوان يمشى …ربي ميز الانسان بالعقل…لكن انت..حيوان والحيوان خير منك ..رانى عنيت ايام سود ..ماتدريش عليا شن صارلى..وين كنت وقتها..توة ضميرك ناض عليك ووجعك
-شاهين/ مش ح نرد عليك توة ..انتى اعصابك تعبانه.. وكانك عالمعاناة كلنا عانينا.. وانتى ماتعرفيش ضرفى ووين كنت انا
-يارا/ ومنو اللى خلى اعصابي تعبانه وقتلنى وانا حيه .. وبعتالى مهما يكون المكان اللى كنت فيه..لو عندك ضمير كنت رجعت لى نفس المكان وصلحت غلطك
-شاهين يعيط / قلنالك انا جاى توة نصلح غلطى …
مشى قعمز فالصالون اللى جنبها/ لعلمك تنتى ماعندكش خيارات غير انك توافقى عليا…لامتى بترفضى العرسان
…حتى لو رفضتى 99 راجل… الميه بيوافق عليه بوك
…ولدلك ارحمى نفسك واسترى على روحك
يارا ساكته وتشبحله ….
-شاهين/ صدقينى هدا الحل الوحيد .. ولازم تفهمى انى ولد ناس وبيتيه..كنهدا راهو قعدتى تلونى فى وجهك بروحك
وممكن توصلى حتى للانتحار
-شبحتله/ انتحار ? …
-شاهين / وافقى .. ومش حتندمى..بالعكس حتفرحى ان مشكلتك انحلت
-وقفت/ انا توة خلاص عرفتك ..وجزاك عندى الموت .. وناويه نقتلك زى ماقتلتنى وضيعتلى حياتى ..كيف بتأمنلى وبتسكن معاى فى نفس الحوش
-شاهين/ لعلمك انا امآمنلك هلبا…بس ننصحك خلى نتزوجو وتنسترى .. وبعتالى اقتلينى ولا سامحينى …كله براحتك
-يارا/ لكن انا نحب ولد خالتى ..منقدرش ناخدك و نقعد معاك
-شاهين/ حتى انا نحب بنت عمى ومانقدرش ناخدك و نقعد معاك .. ف ماتشرطيش عليا
-يارا/ لا بنشرط عليك .. لانك انت فالاكيد بطلقنى ثانى يوم
بعد تقرا عليا الفاتحة …هدا لو وافقت وتزوجتك
-شاهين/ قلتلك ماعندكش خيار ثانى غير انك تاخدينى … وافضلك وافقى مادامنى جيتك .. خير مانهرب ماعاد تلقى كيف اداوى مصيبتك
-يارا/ يعنى لو تزوجنا بطلقنى ولا مش ح طلقنى
-شاهين/ ماتشرطيش عليا ..انا راجل ورائي من دماغى مرات نطلقك ومرات انخليك … وبعدين مرات حتى تترملى قبل ماتطلقى .. مش متحلفه انك بتقتلينى
-يارا تلفتت ومشت للباب/ غدوة انردو عليك …..
-شاهين مشى وقف قدامها / قايمه خشمك وغدوة بتردى ..
احمدى ربى واشكرى فضله انى جيتك
شبحتله وسكتت … وفاتتاته بتطلع من الباب …بقدر ماهيا زعلانه بقدر ماهيا سعيدة … هيا نفسها مش عارفه ليش عندها غبطه من الفرح.. بالك على خاطر ان مشكلتها بتنستر
الله اعلم ….
طلعت من الباب/ يااام نادى قيس

_________________________________________

–

خش قيس للمربوعه … لقى شاهين واقف …
-قيس/ السلام عليكم
-شاهين/ توة نستادنكم ونخليكم براحتكم ..لكن ناديلى امك نسلم عليها
-قيس خطر عليه بوه خاف شوى .. وبعدين ارتخى/ امى اسمها فاطمه ..اهو تو اناديها
طلع قيس لى امه فالمطبخ
-قيس/ ياام الولد يبي يسلم عليك
-فاطمه/ حاشانى ياوليدى.. بوك يعاركنى ولا حاجه
-قيس/ لا مايقول شى .. شاهين زى ولدك
-فاطمه / خلى نساوى حجابى
ساوت فاطمه حجابها .. ومشت ورا ولدها خشو للمربوعه
-شاهين/ اهلا عمتى فاطمه
-فاطمه متحشمه/ اهلا وليدى شنحالك
-شاهين/ تشرفت بيكم ياعمتى.. وكانا صار نصيب ماتشوفو منى الا كل خير
-فاطمه / نصيبات ياوليدى

وتمت المقابله وطلع شاهين يسقد فيه قيس .. وقفو قدام السيارة …
-شاهين/ انا هوا هداكه الكلام راهو .. عجبنى الموضوع …. شوف اختك وردو عليا وكانا وافقت انجيب العويلة الاسبوع الجاى
-قيس انحرج عارف اخته بترفض/ انشاءالله خير .. عطينى يومين ونرد عليك …
-شاهين/ عالخير انشاءالله
وركب سيارته السنتافى …وطلع من بوابه الحياش

__________________________________________

–

خش قيس للصالةة…

-قيس/ ياام وين يارا
-فاطمه مقعمز عالصالون وفاتحه التلفزيون/ فى دارها

-قيس/ شن رايك فى الراجل يمى
-فاطمه / مش تحسه كبير شوى على اختك
-قيس/ مش عارف .. لكن ماحسيتش انه كبير هلبا
-فاطمه / اوخيتك مازالت صغيرة ومدلعه … ومندرى تتفاهم معاه -قيس/ البنت بنتكم وديرو رايكم
-فاطمه / الراى لاول والاخير ليها هيا .. خلى تقول وربي يقدم اللى فبه الخير
-قيس/ خلى نخشلها نشوف شن دارت
مشى جهه الممر متع الديار..

_________________________________________

–

يارا فى دارها مقعمزة تخمم/ انا ليش ماقلتلاش انى حملت ..
مفروض قلتله وحس بالمعاناة اللى عانيتها وقتها .. وانى تحملت المسؤليه بروحى لما هرب هوا

قامت وشاحها بتعلقه

وقف قيس قدام دار يارا وطق ع الباب
-قيس/ يارا …
-يارا من الدار/ خش يا قيس
فتح الباب وخش .. لقى خشمها احمر .. واضح مسحت دموعها على خاطر خوها
خش وقعمز عالكرسى قدام سريرها
-قيس/ خيرك تبكى
-يارا صوتها مخنوق وفاتحة دولابها تعلق فى الوشاح / لا لا وعلاش منبكى
-قيس/ تو نرد عليها غدوة ونقوله مافيش نصيب ..معش تبكى فوتى الموضوع
-يارا متلفته للدولاب..غمضت عيونها / لكن انا موافقه
-قيس وقف/ ااه .. موافقه
تلفتتله/ ايه موافقه ..حسيته الولد كويس
-قيس قرب منها / امالا ليش تبكى
-يارا/ ممكن من رهبة الموقف بس .. لكن انا ستريحت والولد حسيته كويس
-قيس فرح/ الولد بالفعل كويس.. وزيدى صلى استخارة ..
وكانا ارتحتى بعد غدوة تو نرد عليه ونقوله اختى وافقت
-يارا/ باهى زى ماتحب
-قيس/ يامهبولة انا مستحيل نعطيك بالغصب عنك …انتى اختى الوحيدة اللى يهمنى تكون راضيه وفرحانه
-يارا/ ربي يحفظك ليا اوخى

شاهين طلع دكى هلبا انه خش للحوش عن طريق قيس .. لان ديما الولد الكبير فالحوش رائيه مؤثر

__________________________________________

–

قولو قيس كلم شاهين وقاله انهم موافقين … ومشى شاهين لى امه وخبرها بي خطبته لى اخت صاحبه
-الخامسه/ ياحليلى ياوليدى …كيف درتلى هكى .. وبنت عمك شن بنقولولها
-شاهين/ قصدك بنت عمى انا خاطبها منغير مانحس بي روحى ولا كيف
-الخامسه/ مش خاطبها يا اوليدى… لكن البنيه تبيك وعاجبتنى وعاجبه خواتك
-شاهين/ اللى بناخدها لازم تعجبنى انا .. مش تعجب امى وخواتى وهوا هداكه
-الخامسه/ انا والله مانقدر نحشم روحى مع حوش عمك ونمشى معاك لى ناس ..شوف خواتك يمشو معاك
-شاهين يعيط/ انتى خيرك خايفه منهم حوش عمى .. شادين عليك دلة ولا شنو
-الخامسه/ مش هكى يا اوليدى…لكن البنت عاملة عليك وتوجع يانارى
-شاهين/ توة بتمشى معاى ولا كيف
-الخامسه تتجمط/ غير خلى نقول لى خواتك وخوتك وبعتالى ساهل
-شاهين/ تى منو خواتى وخوتى .. شن دخلهم هما … انا نبيك انتى تمشى للناس
-الخامسه تترجى/ ياوليدى والله مانقدر.. مرت عمك مريضه .. والبنيه طامعه فينا ..غير كيف ندير بس
قام شاهين تليفونه / يام تعرفينى انا انسان واضح وماعنديش عاللف والدوران …….
ضرب الخط اتصلى بي وردة بنت عمى وفتح المايك
…ممكن تشررينه وحدة وانفتح الخط طول
-شاهين/ الو
-وردة بنت عمه فرحانه/ اهلين شاهين
وعمتك الخامسه تشبحله
-شاهين/ ياوردة .. من زمان متكلمين مع بعض.. وقلتلك انا مانبيش نتزوج .. وحتى كانا تزوجت مناخد وحدة خارج العيلة …صح ولا
-وردة مخلوعه / وشن مناسبته الكلام هدا
-شاهين / الاولة مالاخيرة ..انا بنخطب اخت صاحبى .. وامى ماتبيش تمشى معاى على خاطرك
الخامسه حاطه ايديها على خدودها متحشمه
ورده سكتت … معش تكلمت
-شاهين / الووو
-ورده صوتها مخنوق/ مبروك عليك ولد عمى .. وينها عمتى الخامسه اعطيهالى تو انا نكلمها ..كيف ماتمشيش معاك نهارى
-شاهين مد التليفون لى امه/ هااك ياام
الخامسه مابتش تاخد التليفون …
-وردة/ غير افتح المايك
-شاهين/ مفتوح
-وردة/ نهارى يا عمتى بري مع اوليدك .. وانشاءالله مبروك عليكم
-صكر شاهين المايك وحط التليفون فى ودنه / الله يبارك فيك بنت عمى ..والعقبالك
وصكر الخط
-الخامسه/ ليه عليك ياوليدى تكسر بي خاطر البنيه ..تو تاخدك بالعشم
-شاهين/ انتى فاهمه العشم غلط راهو…هداكة كانا انا ضاحلها ومعشمها سيورها تاخدنى بيه.. لكن انا لا عشمتها ولا بينى وبينها شى
-الخامسه/ لكن البنيه
-قص عليها/ بتمشى معاى توة ولا كيف
-الخامسه/ باهى غير كلم اصيلة تجينى وبعتالى ساهل

_________________________________________

–

سمعت اصيلة … وسمعو خوته … والكل كان رافض ..
وردة دايرة علاقه طيبه مع الجميع .. تبى توصل لى شاهين بأى طريقه …
والكل استغرب من موافقتها..وزعلو منه كيف كسر بخاطرها
وكلمها بيش تعطى الادن لى امه تمشى تخطبله …
الفه فرحت لى فرح شاهين .. مايهمهاش منو العروس بنت عمها اللى تحبها ولا بنت ثانيه .. المهم البنت اللى راضى عليها شاهين ويبيها …

رد قيس على شاهين وقاله تفضلو جيبو العيلة …
فاطمه خبرت اختها فتحيه انها عطت يارا .. ناهد لامت انها اخر من يعلم .. ومعتز ولد خالتها دار مشاكل وتنقريز ..قاللهم عبدالسلام انشدو البنيه كانا قالت نبى حوش خالتى نعطيها لهم …كلفو جعفر بالموضوع ..وسأل يارا ورفضت …زعلت خالتهم فتحيه ونقرزت …المهم صارت شوشرة .. ويارا بعتت لى معتز مع اخته ناهد ..قالتله انه هوا عارف انها عمرها مافكرت فيه … ولا فى يوم حتوافق عليه …

كملو موضوع شاهين …بعت امه تخطب .. مشت الخامسه وبنتها اصيلة واختها سالمه …ياودى عمتك الخامسه واضح عليها ماتبيش ..لكن فاطمه غصتها وسكتت…

فاطمه حضرت عزوزتها عمتك عزيزة ..وسلفاتها.. وجارتهم منى عزوز كبيرة… واختها فتحيه ..حضرت ورضت بعد مامشالها عبدالسلام وفاطمه ورضوها
العوالات مرت عمها مراد وليلى بنت خالتها …
وناهد مع يارا فى دارها … لبست وسشورت شعرها وطلعت سلمت عليهم
اصيلة عجبتها البنت هلبا .. ولو انها واضح انها فالعمر صغيرة على خوها …
-اصيلة/ فيش تقري
-يارا بهدوء/ كيف طالعه من ثالثه ثانوى
-اصيلة/ وخيرك ماخشيتيش الجامعه
-فاطمه / مابتش.. خافت من هالمواضيع والخطف اللى صاير فالبلاد
-الخامسه/ صار بلا شهادة
-عزيزة/ والمراة شن بدير بيها الشهادة.. هيا تربي وهوا اللى يصرف
-الخامسه/ احنا كناين عيلتنا كلهم مدرسات ودكتورات
-عزيزة/ احنا ماعندناش حوش تصرف عليه مراة.. الراجل هوا يخدم ويجرى ويصرف على صغاره .. احنا عيلتنا تريس
-الخامسه/ حتى احنا تريسنا هوا اللى يصرف .. المهم انهم كلهم خريجات
-اصيلة حست امها بتتعارك مع العزوز?/الفايدة فى الهنا .. الباقى المراة فالحوش خير عالاقل تلهى بي حوشها وصغارها

فى الفضانيه

بعت شاهين خاله وزوز جيرانهم وثلاثه صغار عم بوه المرحوم …دارلهم عبدالسلام غدى ونادى حتى هوا خوته واهله وجيرانه …
عطوهم يارا … وشرط عليهم عبدالسلام حوش بروحها .. وبالفعل شاهين عنده شقه فوق الورشه متعه .. مقابله حوش امه …. اتفاهمو واتفقو ان العرس بعد شهر من اليوم
.
.
.
عمتك فاطمه ماعندها غير يارا …تبى اديرلها عرس دندانى
صالة على مستوى…وزمزامات ..وحتى الزفه اجرتها بيش ادخل بنتها ….
عطاهم شاهين شرطها 7 الاف … وبعتلها مع اخته اصيلة الفين بيش تكمل باقى حاجاتها
وهيا ماتبننت شى … لا شرت ارواب ولا حوايج حوش قنينات ولا شى … مافيش فى قلبها الا حقد عالشخص اللى هتك عرضها… وموقفها طبيعى… اى بنت فالدنيا بتكره الشخص اللى اغتصبها … وكانا فى يدها موت تطلقها عليه
.
.
وصل العرس ….ودار عبدالسلام غدى يوم القفه الصبح
والعشيه قرو الفاتحه …وتسمت يارا على شاهين …
وثانى يوم الحفله …خوتها يجرو ويكلمو فالحجوزات
وخشت يارا للصالة… وهيا ماحاسه بفرحه ولا شى.. اهو عرس وخلاص …
تمت الحفله .. وخشو اصيلة والفه خوات شاهين طلعوها
لانه رفض انه يخش هوا يطلعها …
وصلوها خواته قدام الغرفه متع تصوير العرسان …
-الفه/ المصورة تراجى فيكم فالغرفه بيش تصورو مع بعض
-شاهين ماشبحلهاش اصلا / مفيش داعى
-اصيلة/ كيف مفيش داعى ياوخى
-شاهين/ لبسيها البرنوس …
ويارا مافقصتش حتى كلمه … ساكته وخلاص
لبسوها البرنوس …وخداها من يدها … وطلعها …
خواته وراه بالعبايات … ركبو مع خوتهم …
ومشى معاها قيس وجعفر ونساوين عمامهم و خالتهم وليلى بنتها …
وخلو فاطمه تبكى على بنتها اللى فارقتها ….
فالطريق شاهين يسوق بسرعه وساكت .. وهيا وجهها مغطى بالبرنوس وساكته
وصلو لى حوش امالى العريس … نزلوها للخيمه …
سلمت عليها عزوزتها …وركبوها للسيارة .. ولف بيها شاهين من الباب الخارجى … وسيارة خوتها وراهم …
مشت مفيدة مرت عمها خالد نزلتها من السيارة …
وتشبح لى قيس/ نركبو ..
قيس اشرلها بمعنى مش عارف …
-اصيلة/ تفضلو اركبو شوفو حوش بنتكم …
ركبو يارا والفريق كله وراها??
نساوين عمامها وخالتها وبنتها … ركبو من دروج خارجى للدور الثانى … وصلوها لشقتها … خشو شبحوها …عجبتهم
.. مانقصة شى … صالون فالوسط وريسبشن على جنب فيه مطبخ .. وزوز ديار .. وحدة فيها موبيليا والثانيه فيها جلسه ارابيسك … ومتكمه بالتحف ….
وخلوها وطلعو ….سقدهم شاهين … وركب من الدروج …
يلاقى يارا واقفه فالوسط وهيا بي برنوسها
صكر الباب .. انخلعت هيا وتلفتتله …
وقفو الزوز ويشبحو لبعض

_______________________________________

تمت ……ويتبع

شن بيصير الحلقة الجاية بين وردة وشاهين ويارا ..ومعتز زعما بيسكت …الليله انزللكم السابعه …
وسامحونى امبارح النوم سلطان ??….فتحت عيونى 5 الفجر

ن ح ب ك م …هلباااا❤❤