رواية ضحايا للكاتبة زهور جمال الدين

#ضحايا

بقلم زهور جمال الدين⚘
?الحلقه الخامسة?

شاهين بعت لاصفر واستقصاله وجابله الثابته …

-شاهين/ تعرف كيف…دورو وانشدو …واى واحد اسمه خالد فى هاديكة الجهه قيموه … وتو نعرف انا كيف نطلعها
-لاصفر/ انا ماعنديش الصلاحيه نقيم اى حد ..كلم باقيرا وهوا يتصرف ويبعت قوة متع تفتيش
-شاهين قام تليفونه / باهى انت صحيت ..والكلام يموت بيناتنا
شاهين يحكى فالتليفون / هاا باقيرا كيف الحال
-باقيرا/ اهلين ياعرفى …شن حالك اليوم
-شاهين / الحمدلله كويس ..
-باقيرا / اؤمرنى يافندى
-شاهين/ تو بنبعتلك الاصفر توة … بيوريك مكان معين .. عندى فار فالجهه نبى نشده
-باقيرا/ عطينا اسمه واوصافه والليله يبات تحت رجليك
-شاهين/ المشكله ماعنديش اسمه … لكن عندى اسم عمه يقولوله خالد
-باقيرا/ باهى انت كيف تبى توة يا راس
-شاهين/ نبى اى واحد اسمه خالد فى الجهه اللى بيقولك عليها الاصفر اطبوه … وماحد يعرف مكانه وين .. وبعد ماتلمدهم كلهم تو نقولك انا شن ادير
-باقيرا/ تم الكلام ياعرفى
-شاهين / ومات بيناتنا
-باقيرا/ عيب عاد يافندى…خيرك سابق
-شاهين / امالا متفاهمين

___________________________________________

–

اليوم اللى بعده ….

دايرين بوابه قدام مدخل المنطقه … وزوز يفتشو فى الرخصه متع اى حد خاش بسيارته …وعندهم امر ان اى حد اسمه خالد يقيموه ….

وجى عمك خالد خو عبدالسلام يلوى من غادى ?…
وقفاته البوابه / ترا وراقك ..
مدهملهم … شافوهم لقو اسمه خالد صالح
-المليشياوى/ اوقف غادى ترا
مشى خالد عاليمين ودرس … جوه ثلاث نفار بسلاحهم …
نزلوه .. وحطوه فى البوكس ورفعوه لى مكاتبهم .. وكانو قبله رافعين 5 انفار اسمهم خالد وهوا السادس

.
.
فى حوشه الدنيا زحمه ويمولجو .. ماعرفوشى وين ولا فى ا نقطه …. كل واحد شاد تليفون ويتصل
.
.

باقيرا اتصل بي شاهين
-شاهين / هاا شن صار
-باقيرا / درنا زى ماقلت انت بالزبط … عطيناهم اوراق وقلنالهم يكتبو اسامى عائلاتهم كلها وخوتهم وصغارهم
-شاهين / باهى هانى جايك
-باقيرا / غير كان نعرف اسم الشاب اللى تبيه يا عرفى نجيبهولك لحد عندك
( شاهين ماقالش انه يدور فى بنت ..لانه خاف عليها )
-شاهين/ لا لا تو نجى ..الامر ضرورى
-باقيرا/ ياودى عارفينك عندك ناس وزحمه تو نبعتلك الاوراق اللى مكتوب فيهم اسامى العائلات .. لو لقيت طلبك تعالى
-شاهين / تم …اهو بنبعتلك لاصفر توة
-باقيرا/ تمام نراجى فيه
.
.
.
وبعت لاصفر … ومقعمز مع الناس جثه بس …يراجى فى الاسامى …هل حصل على عمها ولا مزال
خش لاصفر يضحك …
-شاهين / شن صار
-لاصفر مدله ورقه / هاك شوف بنفسك
خداها شاهين فتحها لقى الشخص كاتب ان اسمه خالد .. واسم زوجته كدا وعمرها وصغاره كدا واعمارهم … لحد ماوصل فى خوته
اخى عبدالسلام عمره كدا اسم زوجته كدا وعمرها ..وصغاره الاولاد كدا .. وبنته اسمها يارا وعمرها 18 سنه
-شاهين فى خاطره / هيا هادى …البنت متع هداكه اليوم صغيره مش كبيرة…احتمال 90 % انها تكون هيا

وقف شاهين
-لاصفر/ وين ياعرفى
-شاهين / نبى نشوف الصور اللى فى تليفونه …ارفعنى
وبالفعل ستادن من الجماعه اللى فالمربوعه .. وطلع ركب مع لاصفر ورفعه لى مكاتب المعسكر … اعطوه تليفون خالد مفتوح من الرمز السري .. فتح الاستوديو …يقلب فالصور ويشوف بالصورة …………..لحد ماجت صورتها ….
رعش مع بعضه …هياااا هياااا ايه هياااا …
طلع من المكتب/ ياباقيرا
-جاه باقيرا / نعم عرفى
-شاهين / جيب صاحب التليفون هدا ..والباقى خليهم يروحو
-باقيرا/ تم ياعرفى

________________________________________

–

شاهين مقعمز عالمكتب…

جابوله خالد مكبلين ايديه بالحديد ….
وقف شاهين يعارك / علاش هكى مربطيله ايديه …افتح الخديد ….
(طبعا شاهين هدا كله تمثيل يبي يضرب صحبه مع خالد)
-جى الحاجب يحول فالحديد/ هنا قالولى يا سيدى
-شاهين / حولهم بسرعه ..
حوا الولدالحديد وطلع
-شاهين / انشاءالله غير تسامحنا بس
-خالد مبهور/ الحمدلله ياليبيا مزال فيك الخير
-شاهين / كلمت اهلك
-خالد يشبح لى ايديه كيف رايحات حمر/ وين بنكلمهم وهما خدو مني التليفون اول ما جابونى
-خدى شاهين تليفون خالد ومدهوله / هاك كلم اهلك
-خدى خالد التليفون وكلم قيس ولد خوه ..وطمنه ان الدولة هيا اللى شاداته مش مليشيا …
وفى نفس اليوم طلقه وخلاه يروح ..لان مافيش اى قضيه عليه
____________________________________________

–

طبعا خالد اعجب بي شاهين وكيف عنده نفود …وحسه ان نوعه يوقف مع الضعيف …
خدو ارقام بعضهم .. خالد فرحان قريب بيطير انه بدى يعرف شخص فوق فوق … واى حد ولده معش يلقوه لما يقصده يطلعهولهم عند منو ….
وهدا كله شاهين يدير فيه بيش يخش لى حوش يارا من الباب
لانه نوى يطلح غلطه بالزواج منها .. حتى لو بتكرهه وبتنمتى موته المهم انه يستر عليها فالدنيا …وفالاخره انشاءالله ربي يغفر

من شاهين تعرف على قيس ولد خوه … شاهين واصل فالبلاد واى حد يتمنى يصاحبه

بالرغم ان شاهين قاعد مارجعش للخدمه …لكن عنده كلمه
ولما خالد يطلبه بيش يتلاقو يمشو للقهوة .. ويهدرزو وبدو حتى يسهرو مع بعض … هدا كله فى غضون شهر

_________________________________________

_

يوم 12/4 سنه 2012 …

شاهين وخالد مقعمزين فى القهوة يهدرزو
-شاهين / والله انا مانى فى بابه غير امى شادة وادورلى تبينى نتزوج
-خالد/ الزواج شر لابد منه …وانت توة ولا بعدين بتتزوج ..
ماهو خود كلام الحاجه بيش ربي يباركلك
-شاهين/ انا مانعرفش بنات … وهيا ادورلى ومالقتليش …
تلفتله / بالك عند حد مناسب للزواج
-خالد/ والله شن منقولك … عندى اخت مرتى كيف متخرجه … كان تبى نكلمهم
-شاهين/ لا لا لا …كان بدورلى نبي حد من عيلتك انت .. مش من نساباتك
-خالد / ماعنديش الحق
-شاهين/ قيس ولد خوك اللى يجى معاك مرة مرة ماعنداش خوات
-خالد / عنده وخيه وحدة .. لكن صغيرة عليك …كيف متخرجه من الثانوى
-شاهين خدى نفس من الارقيلة / قداش عمرها
-خالد/ عمرها 18 عام
-شاهين/ خلاص هيا هادى .. هدا العمر اللى ندور فيه…وانا نخطب فيها منك حتى منغير مانعرفها
-خالد/ ياشاهين المشكلة مش فيا انا … المشكلة فى بوها ولا مايعطيها
-شاهين/ مبدئيا نديرو مقابله..واللى فيها الخير يأتى بها الله
-خالد/نقول لى بوها …وانشاءالله خير
-شاهين/ لا قول لى خوها قيس هوا الاول

وبالفعل بلغ خالد قيس ولد خوه على خطوبه شاهين لى اخته … قيس فرح بالموضوع .. لانه عرف شاهين وحسه مش شويا … هدا غير انه حسه رجال ويعتمد عليه

________________________________________

–

فى حوش عبدالسلام

مقعمزين خالد ومراد وقيس وعبدالسلام يتناقشو

-عبدالسلام / انت صكر فمك .. ولما يتكلمو الكبار تسكت
-خالد/ هادى اخته .. ومن حقه يحكم ويقول رايه
-عبدالسلام/ اخته مازالت صغيرة وبتقرا … كيف يلوحها لى اول واحد يجينا
-قيس/ تو انا بنلوح اختى يا بوى
-خالد / الولد كويس .. وشفته كيف طلعنى من مكان مانحلمش نطلع منه
-عبدالسلام / وانا هدا اللى مخوفنى .. بالنسبه ليا اى حد يخدم مع المليشيات مستحيل اناسبه
-قيس/ يابوى الراجل ميكانيكى ايطلح فى السيارت …غير هوا عنده معارف فيهم
-عبدالسلام / لكن اختك صغيرة .. مانعملش عليها تفتح حوش
-خالد / وانت لما جبت فاطمه قداش كان عمرها …17 عام ماهو .. وفتحتلك حوش ودارتلك عيله
-عبدالسلام /ياناس زمان يختلفو على توة .. زمان حتى صغيرة تلقيها عقلها كبير…لكن بنات توة واخدات عالدلع ومايعفوش يقلو حتى دحيه
تلفت لى مراد / تكلم يا مراد صح كلامى ولالا ..
-مراد / الحق ولا ولد عمه .. الولد مايتفوتش ولا ينرفض .. وانا والله لو عندى بنت مانفوته من يدى
-خالد / هاا شن رايك فى هالكلام
-عبدالسلام / شاورو البنت وجدها .. كانا وافقت وجدها وافق اعطوها ..
-خالد فرح / عالخير انشاءالله

________________________________________

–

فى دار يارا

يارا مقعمزة على سريرها وتبكى .. وعمها خالد مقعمز من تركينه وقيس من تركينا
-خالد/ غير علاش تبكى توة بس…انتى خشى للمقابله وكانا الولد ماعجبكش انا نوقف معاك وانرده
-يارا/ يا عمى انا مازلت صغيرة على اى مسؤليه .. تربحو مانبيش نتزوج
-قيس عيونه حمر/ وانتى خير عمك تبمى وتشلهقى .. شكلك متفاهمه مع واحد
يارا تبكى بحرقه …وخوها مش عارف اللى فى قلبها
-خالد/ مش هكى الكلام يا رحيبي…بالشوى .. وعيب الكلام اللى قلته لى اختك
-قيس/ امالا فى بنت ماتفرحش كانا جاها عريس…الا اللى متفاهمه وعاطيه كلمه .. تى شوفها كيف بتموت بالبكى
-خالد / كانها متفاهمه مع حد نعطوها ليه …منغير مشاكل ولا بكى
-قيس ماد يده ويعارك / تى اقسم بالله نكصرلها رقبتها كانا نسمع بي موضوع هكى ولا هكى
-يارا تبكى / ياعمى والله مانكلم فى حد
-قيس/ امالا خلاص تخشى للمقابله ..والراجل عاجبنى انا وعمك .. شن تبى ثانى
-خالد / غير شويا بس منسئلها سؤال
-شبحتله يارا بخوف/ نعم عمى
-خالد/ انا عندى علم ان ولد خالتك عنده نيه يخطبك …ف لو انتى عندك نيه فى حوش خالتك بنت خوى انا نوقف معاك ونفوته موضوع صاحبه
ضرب قيس يده عالحيط بغضب/ تو هدا كلام
-خالد/ اسكت انت
-يارا/ حوش خالتى ماعمرى انتبهت لى حد فيهم ولا يخطرو عليا
شبحلها قيس شبحه رضا … وجى قعمز جنبها عالسرير
-شبحلها / اسمعى .. مش تشوفى فيا نعيط ونخبط .. انتى فالاخير اختى .. ماتهمنى الا سعادتك
-خالد / صحة ليك ولد خوى …
وشبح لى يارا / انتى خشى للمقابله ..وكان ماعجبكش الموضوع فوتيه
-شبحت لى قيس/ باهى
-قيس/ مش حنقولو قدام حوش خالتى ..لان ح يديرولنا شوشرة … وانتى ماتقوليش لى ناهد
-يارا/ حاضر

_________________________________________

–

حددو المقابله يوم الاثنين …

شاهين لبس سروال ادجين وسوريه بيضا وجاكيت ازرق مخطط…. وقعمز يخمم كيف بدير البنت …
خشت امه / ماشاءالله وليدى متكم ربي يحفظك انشوفك عريس انشاءالله
-عمتك الخامسه/ بادن الله ياوليدى .. سماح بنت عمك تراجى فينا نمشولها اليوم قبل غدوة
– طلع كندرته من الدرج ويلبس فيها/ انا مش قلتلك فوتيه الموضوع هدا يااام
-الخامسه/ البنيه بتموت عليك وعلينا ..وياما من عرسان رفضتهم على خاطرك
-شاهين/ ماحد قاللها ترفضهم يااام
طلع من الدار وامه وراه
-الخامسه / انتى وين ماشى
-شاهين/ ماشى لى واحد صاحبى تو انروح ونحكيلك

طلع ركب سيارته ومشى لى طريق المطار …وقف فى نص الطريق ويخمم … شن بيكون ردت فعلها لما بتشوفه

_________________________________________

–

فى دار يارا

-فاطمه / تو معقولة بتخشى للولد وانتى عيونك منفخات هكى … غير كان نعرف شن يبكى فيك
-يارا/ وجعتنى منك لا تكلمتى ولا قولتى بنتى صغيرة
-فاطمه / يابنيتى انا ماعنديش راى مع بوك … ولا عندى راي مع جدك وعمامك ..
-يارا / ربي يستر
-فاطمه / نوضى البسى سلم بنتى ماتغشيش خوك ..الولد قريب يوصل
-يارا / باهى

طلعت فاطمه وخلت يارا بتلبس حوايجها
وقفت عالمرايه وتشبح لى نفسها وتراجع فى الكلام اللى جهزاته بيش تقولهوله وتخليه هوا اللى يرفض… خاطر لو قالت الموضوع ماعجبنيش عارفه خوها بيشد فى الموضع .. خاطر راكبه الشك انها تكلم فى حد

تشبح للمرايه / انا نحب واحد .. وعاهدته … ومشى للجبهه.. وماروحش…مفقود …مش عارفينه حى ولا ميت .. بالله عليك يا وخى ارفض انت وقول بنتكم ماعجبتنيش
وقعمزت عالسرير تبكى/ ياحليلى كانا خوى قيس شد فالموضوع وخديته …وهاديكا الليله ايبان كل شى .. يااااربي زى ماسترتنى فى هاديكة الليله وخليت العرف ايطيح بيا .. يااااربي استرنى اليوم وخلى الولد يرفض

طق باب الدار …

فتح قيس الباب / الولد وصل ..وتى روحك
-يارا/ حاضر
-قيس/ البسى حجابك ااه
-يارا/ اكيد

ومشى قيس للمربوعه …قعمز مع شاهين هوا وخالد ومراد ..عبدالسلام ماحبش يحضر فى مقابله بنته

بعد نص ساعه
-خالد/ امالا نستادنكم انا عندى موعد مهم
-قيس/ ادنك معاك عمى
-مراد وقف/ خودنى معاك حتى انا
وتلفتلهم / انشاءالله معرفه خير استاد شاهين
-شاهين ابتسم / انشاءالله

طلعو خالد ومراد….

وقف قيس/ خلى انادى البنيه
-شاهين / خود راحتك …

طلع قيس للصالة / يااام .. يااام
-فاطمه من المطبخ / نادى يارا
شاهين فالمربوعه سمع اسم يارا قلبه طق
-فاطمه/ هيا هى

وخشت فاطمه … ونادت يارا اللى واضح عليها باكيه
-قيس شاف وجهها مقلوب / شن قلت انا
-فاطمه / عادى يا وليدى مافيها شى .. قول جتها رهبه وقعدت تبكى
-قيس/ انا لا نقول ولا نفتى …
تلفت لى يارا / انا طالع فم الباب بنقعمز … بري انتى افتحى الباب وخشى وسلمى عالولد باحترام
يارا استريحت شوى لما قاللها منطلع قدام باب الحوش البرانى …بيش تاخد راحتها فى للحكى والترجى

طلع قيس وخشت فاطمه للمطبخ … ومشت يارا بخطوات ثقيلة للمربوعه …وين مامقعمز شاهين

حطت يدها على مقبض الباب بيش تفتحه وتخش

________________________________________

تمت …. ويتبع

توقعاتكم كيف بيكون اللقاء?

نحبكم ❤