رواية ضحايا للكاتبة زهور جمال الدين
بقلم زهور جمال الدين⚘
?الحلقه الثالثه عشر?
والاخيرة
_
واطلقو شاهين ويارا …
الكل مصدومين .. من العيلتين …يارا مصدومه لكن مرتاحه …
يارا/ يابوى هدا نصيب .. وكاتب من ربي
-عبدالسلام / هدا ولد كلب ..وانا مالاول ماكنتش نبى نعطيك ليه لكن كله من خوك وعمامك
قيس مقعمز مافقصش كلمه … يخمم هوا والفى وقصتهم كيف بيصير فيهم .. حتى لو اقنع خوتها انهم يعطوهاله بعد اللى صار .. كيف بيقنع امه وبوه.. انهم يمشو يخطبوله بنت ناس طلقولهم بنتهم …
-جعفر / هوا كلمنى قالى الحوش تحت امركم تعالو خودو منه اللى تبوه
-فاطمه تبكى / شن ينفع رزق الدنيا بعد ماطاح القدر
-عبدالسلام / لا حوش لا حياش .. برة جيبلها دبشها بس .. والحاجات اللى رفعتهم .. مانبو منه حتى حاجه ..
-فاطمه تكلم فى عبدالسلام/ الحمدلله خوها مزال مادارش الصور اللى بينا وبينه .. تاخد دارها وهوا يزيد دويرة ثانيه من غادى …
-عبدالسلام / هوا هدا الكلام …
وتلفت لى جعفر/ اسمع .. غدوة الصبح تمشى لحوش اختك تجيب منه حوايجها كلهم …
قيس ساكت .. ماعارف يسب نسيبه عاللى داره فى اخته .. ولا يسكت لانه وقت بيطلب من اهله يسمحوله يناسبه حيعتبروه مرتد ?.. وماعنداش طارقه .. اما عمك عبدالسلام جاته اقواز .. معقولة الشخص اللى عبي عينه واعجب بيه واعتبره راجل يدير هكى فى بنته … ومستغرب فى يارا .. كيف ساكته ومش قالبه الدنيا .. مازالت عروس خمسه شهور بس فعدت معاه ..
حناها مرضت عليها قريب ماتت .. يوم جاب قيس ورقه الطلاق من المحكمه
اما يارا كأنها انولدت من جديد ..اليوم حست انها انتصرت عليه .. وحست انها رمت حمل من على كتافها .. سيباته وهيا متاكدة انه يبيها .. قمه النشوى فى الانتقام منه … على اساس انها هيا راضيه وموافقه عالطلاق .. بل سعيدة بيه .. واعتبرت ورقه الطلاق كأنها شهادة ميلادها الجديدة
__________________________
–
فى حوش الخامسه
-عزيز / اقسم بالله ماتجى راجل ولا تكساب درة رجوليه .. مراة اللى شافتها عينى حرام عليك تطلق .. انت ماعندكش نحوة .. ماعندكش مروة.. حتى كانك اكبر منى وعيب نقولك هكى .. لكن حرام عليك بنت الناس
شاهين ساكت ويشبح للباب يبيش يشبحله ويصدمو ببعض
-اصيلة / ياوخى حالات الطلاق تقعد حتى بالسته شهور فى المحكمه بيش الزوج والزوجه يراجعو نفسهم بالك يوخرو عالمصيبه اللى بيديروها فى ارواحهم .. وانت مشيت تجرى طلقت وبعتت الورقه ليه عليك هكى
-الخامسه / ماتقولش عنده ام يدير منها راس مال ويشاورها
… لا شاورنى لما خداها .. ولا شاورنى لما طلقها .. والله كان البنت خاطيه ماندورها .. لكن البنيه باهيه وماشفناش منها حاجه شر .. ليه هكى اطلق مرتك واتصكر حوشك
-اصيلة / اقسم بالله طول ما انت مريض برة مانضت من سجادة الصلاة وهيا تصلى وتدعى لى ربي انه يخليك ويطول فى عمرك
-جلال متعصب/ تى ماهو رد علينا .. حيوط احنا نكلمو فيك ولا شنو ..عمرنا ماسمعنا بي صرع يخليك تقتل الشخص اللى قدامك .. نعرف الصرح صاحبه يتشنج ويعيط ويطيح ..
ماسمعناش بيه تجيه قوة ويقتل حتى القتل
-عزيز / شن قلت نمشو نجيبوها ولا لا
-وقف شاهين / كملتو
-الخامسه / ياوليدى خوتك يبوك ويبو مصلحتك ..وواجعهم حالك …
-شاهين / عيالى طلقتها .. والسبب قلته قدام الناس كلها بيش ماحد يجيب سيرة البنت بالعاطل .. موضوعى انتهى ولو سمحتو ماحد يدخل فيه ولا يدير اى تصرف ..
وتلفت طلع من الباب ………… والفى فى الدار تسمع فى الكلام كله وتبكى … هدوكا العيون منفخات وهداكا الخشم زى البطاطا .. كان عندها امل الحكايه تتصلح لما سمعت خوتها يبو يكلموه يمشو هما يردوها .. لكن فيسع ما انتهى الامل هدا قبل شوى لما شاهين رفض ان اى حد يدخل فى هالموضوع …
اللى يشوف الفى تبكى يحسابها على خاطر يارا وجعتها
..بينما هيا تبكى على رويحتها يانارى .. كل شوى تقيم التليفون تتصل بي قيس .. لما يرد عليها تقعد تبكى وخلاص.. لا هوا يتكلم ولا هيا .. الزوز مصدومين
طلع شاهين للجنان برة .. بيمشى للجراج متعه … لقى وردة كيف مدرسه وبتنزل ..وعيونها قلوب.. ملشبحلهاش وكمل طريقه ماشى للجراج تحت حوشه …
-وردة ?/ شاهين
شاهين تلفتلها وهوا ساكت
-وردة / واخيرا
-شاهين / اسمعى يابنت عمى ..طلاقى مايغيرش شى من علاقتى بيك زمان وتوة ..انتى كنتى اختى ..وحتقعدى اختى
-وردة/ شفت نيتى كيف قويه فيها …خلتها تطلق خطافه الرجالة هادى … ماتخليش نيتى تاخد فيك حتى انت وتصيرلك حاجه مش كويسه
-شاهين حزين/ خودى زى مايعجبك …معش تفرق معاى
وخلاها واقفه فى الجنان ومشى للجراج
__________________________
.
.
.
.
فاتو شهرين ….
يارا دايرة لى شاهين بلوك من كل الجيهات .. رقمها والفايبر والفيس .. وكل مكان .. زعلانه منه …بالرغم انها فرحت هلبا بالطلاق فى البدايه …
ومع انها زعلانه منه ماحاولتش حتى التفكير انها تكلمه .. موضوع وتم من حياتها .. ردت اعتبارها وخلاص كل حد مشى فى طريقه
اما شاهين …ندمان عالطلاق .. على زعلان منها انها رضت طول تطلق .. وزعلان انه شاف السعادة فى عينها وقت موضوع الطلاق ..شاد الورشه متعه وخلاص .. شاد سيارات مكسد عليهم ويطلح .. وكل مرة يخمم فى حاجه تزعله فى موضوعهم .. ومرات يدكر مواقفهم فى مصر ويبتسم منغير مايحس…
اما الفى وقيس طاير فيهم يانارى …
-قيس/ باهى حبيبتى معش تبكى .. يارا قالتلى نكلم جلال ..متفهم ويقدر يفصل فى الموضوع
-الفى تبكى / ياريتهم ماطلقو .. ولا صارت هالعملة هادى كلها
-قيس/ باهى معش تبكى
-الفى / حتى لو جلال اقتنع وحاول مع امى وخوتى .. كيف بتقنع امك بموضوعنا .. وكيف بتقنع بوك
-قيس/ امى خليها علي يارا … هيا واقفه معانا .. وحتحاول اتكلم حتى بوى .. اللى صار بينها وبين شاهين نصيب
-الفى / ربي يعطينى نص هدوئك .. انا فيا نار ماتبيش تطفى من يوم طلاق اختك وخوى
-قيس/ فى حاجه اسمها نصيب .. لو ليا نصيب فيك حتكونى عندى وفى حوشى .. لو ماليناش نصيب فى بعض مستحيل نتزوجو
-الفى تبكى / لااا ماتقولش هكى .. ياااربى نكون من نصيبك
-قيس/ ياااارب .. خلاص انا غدوة منمشى لى خوك جلال .. وقولى يااارب
-الفى / يااارب
__________________________
_
ثانى يوم
مشى قيس لى جلال فى العمل متعه .. وكلمه على اخته..
وفهمه انه يبي يضمن رايهم هما قبل .. بيش يكلم بوه وامه عليها .. وحكاله انهم طيبين فى البدايه حيديرو ردت فعل وبعدها ح يوافقو طول …. وكان اسلوب جلال كويس لانه يعرف قيس من زمان ويعرف معدنه …..وطمنه انه حيقول لى امه وخوته ..وحيوقف معاهم قد مايقدر …
بالفعل جلال حكى لى امه على موضوع قيس .. نقرزت فى البدايه انهم مش ح يخلو بنتها ترتاح ..لانهم مطلقيلهم بنتهم
لكن فالاخير ارتخت خاصه لما قاللها ان الفى موافقه ومتحملة مسؤلية قرارها …
-الخامسه تعلى فى صوتها تسمع فى بنتها فى الدار/ ديرو اللى تبوه .. لكن اقسم بالله تجينى وتقول دارولى وفعلولى مانى مدورتها .. رانا راديلهم بنتهم مطلقه بعد ماخديناها بي خمسه شهور .. الحكايه مش ساهلة ..
الفى تسمع وهيا فى قمه السعادة فى دارها ..حست ان فى امل من الموضوع…..مزال راى عزيز وشاهين بس فى الموضوع …
لكن هيهات … شاهين لما سمع بالموضوع صكره من جدوره
الفى ماتقدرش ادافع على موضوعها .. لانها رقت الازرق لما سألها جلال تعرفه ولا لا .. دارت روحها ماتعرفاش وتفاجئت بي خطبته ليها ووافت طول
قد ماقنع فيه جلال .. وبعتله قيس ناس يكلموه يغير رايه .. وهوا شى رافض الموضوع تماما … وكلم اخته وقاللها انسى الموضوع … وفى باله ان الفى ماتعرفش قيس اصلا .. وتحججلها ان ممكن الولد قلبه اسود وحب ينتقم لى اخته يارا فى زواجته منها …
__________________________
–
فى الجنان …
وردة خشت بي سيارتها ودرستها .. بدل ماتخش لى حوش عمها.. خشت لى ورشه شاهين من الخلف
-وردة / شاهين .. شاهين
-جاها شاهين متعصب/ شن جايبك هنايا .. عندى رجالة فى الورشه
-وردة / غير باهى ماتعيطش.. نبيك فى موضوع مهم توة توة
-شاهين / باهى امشى لى حوش امى واهو تو نجيك
وردة / باهى
لما طلعت مامشتش لى حوش الخامسه .. فتحت سيارتها وركبت فيها …
وتخمم/ ريتيها اللفعه ولا .. باعته خوها يلعب بي دماغ الفى بيش تولى هيا لى مكانها فى الحوش هدا…والله كانا
مادخلتش العيلتين فى بعضهم ماعاد نتسمى وردة
…الموضوع لازم يتفركش اليوم…
تشبح لى حوش شاهين / ورحمه بوى ماهك خاشاته مرة ثانيه … بالدور ياشباب . وانا دورى وصل
طق مرش السيارة …انخلعت وتلفتت لقاته شاهين ..فتحت الباب ونزلت ..
-شاهين / مش قلتلك امشى للحوش
-وردة / هما كلمتين وبنمشى
-ربع يديه على صدره/ تفضلى
-وردة / تعرفنى نحبك .. ومنحبش من يضحك عليك…
لعلمك ان اللى اسمه قيس يكلم فى الفى من زمان
وكانك مش مصدقنى برة شوف تليفونها
-شاهين عيونه حمر/ شن تخرفى انتى
-فتحت باب السيارة / اللى سمعته
ركبت فى مكانها ولعت السيارة ومشت .. وخلت شاهين يهوج ويموج .. ومشى لى حوش امه … فتح الباب
ويعيط / الفى …. الفى
طلعت الخامسه من الكوجينه مخلوعه / خيرك ياوليدى
-فتحت الفى باب الدار ترعش / نعممم
-شاهين / هاتى تليفونك
-الفى ترعش / تليفونى مش مشحون
-شاهين مفنص عيونه / هاتى التليفون وهاتى الشحن والرقم السري
-الفى ترعش باللى فيها / باهى برة تو نشحنه شوى ونجيبهولك
( تبى تنظفه ?)
-مشى شاهين لى باب دارها / حولى
وخش للدار لقى التليفون عالكوميدينو .. خداه ..
مدهولها / افتحى الرقم السري
-الفى تبكى / انت شن بدير بيه .. علاش تبيه …
-شاهين يعيط / افتحى تليفونك نقولك
-الخامسه / يابنيتى اعطيهوله خيرك انتى
-شاهين اتاكد ان كلام وردة حق / قلتلك افتحيهولى التليفون
-الفى تمسح فى دموعها / خليهولى شوى وتو نجيبهولك
-شاهين يبي يتهجم عليها وامه شاداته / صار حق ..انتى تكلمى فيه ولد الحرام
-الخامسه واقفه قدام ولدها وشادته من من كتافه / غير بالشوى ياوليدى خلى نفهمو .. منهوا اللى تكلمى فيه يابنت
-الفى/ مانكلم فى حد انا ..
يحدف شاهين التليفون عالحيط يكصره / انا تستغفلينى با مسخه انتى وياه …
وطلع من الحوش وقربع الباب وراه
-الخامسه/ منهوا اللى تكلمى فيه يابنيتى .. ليه عليك هكى اديريلى قدام خوتك
-الفى / وين تليفونك يااام تربحى بسرعه
-الخامسه / وين نندرى عليه العازى..
طلعت الفى للصالة ادور فى تليفون امها … ويفتح شاهين الباب بالقوة .. خشت الفى تجرى لى دارها هربت …
-شاهين / اسمعى يااام .. موضوع قيس يتصكر نهائي من اليوم .. العيلة هادى معش نبى اناسبها … وطلع وخلى الفى تبكى
__________________________
_
فى حوش عبدالسلام …
يارا طبعا واقفه مع خوها فى موضوع زواجه …وقنعت امها .. ومقعمزين يناقشو فى بوها .. وقيس يسمع من داره ..
متحشم مش قادر يناقش بوه معاهم …
كلمه من يارا وكلمه من فاطمه ومعاهم حناهم عزيزة .. خلت عبدالسلام يلين …
-عزيزة / احنا شن عندنا فيه ..ياخدها ودبر راسه هوا وياها
-فاطمه / تربح ياراجل ماتكسرش بي خاطر ولدك .. مدامه قالك نبى بنت فلان وطايب خاطره خلاص برة خودهاله..
وربي دار النسوة فى البنى ادم بيش يعيش ويفووت
-عبدالسلام / كسرتولى راسى وانتم تنقرزو .. خلاص قولوله يكلم الناس وبري اخطبيهاله انتى وحناه
قيس وين تلقيه …قريب يطير من الفرحة مايقدرش يعاند بوه لان
شرين تليفون قيس لقاه رقم الخامسه… يعرفه لان الفى مرات تشرين منه ..
-قيس/ الو
-الفى/ قيس..خوى شاهين عرف باللى ييناتنا كله
قعدت تحكيله عاللى صار كله .. وعلى قد ماعصرو دماغهم يبو يزبطو من حكاله مازبطوش .. بعد ساعه حكت معاها يارا وفهمت منها اللى صار …
..
.
.
يارا سخفها خوها .. وكانت تبى ادير اى شى بيش تساعده
خممت وتكمت..لقت مافيش خير من المواجهه خدت
تليفونها … فتحت الفيس …لغت حضر اكاونت شاهين
وبعتتله رسالة ” لو سمحت رد عليا ”
شاهين لاهى يخدم فى الورشه ..ومش فاضى بالفيس ..
ماشافش الرسالة ….
ثانى يوم فالليل متكى فى سريره ..وخاطره عليه يارا .. زعما شن دارت فى هالشهور اللى مرو
قام تليفونه فتح النت .. وصلاته رساله من يارا … قلبه انتفض …مش مصدق انها هيا .. رد طول ” اهلا”
هيا مصكرة نت …قعد فاتح تليفونه يراجى فيها انتى تفتح وترد
بعد ساعه فتحت يارا نت وتلاقى رد شاهين ..قلبها بدى يطق يطق .. لكن كان لازم تحكى معاه ..
فتحت الرساله ” السلام عليكم ” ..
رد هوا على طول ” وعليكم السلام ”
-هيا” لو سمحت نبيك فى موضوع ”
-هوا قلبه ينعصر” غير قولى كيف حالك ”
-يارا” كيف حالك ”
-هوا مالاول كتب ” مش باهى” بعتالى مسحها وكتب ” الحمدلله.. كيف حالك انتى ”
-هيا ” بخير الحمدلله .. نبى نكلمك فى موضوع ”
-هوا كتبلها ” ستاحشتك ” وبعدين مسحها وكتب ” اؤمرؤنى ”
-هيا ” اسمع .. انا اول مرة نشوف خوى قيس فرحان بالطريقه هادى .. ليش تحرم فيه من فرحته .. ليش تخليه يكرهك بعد ماكان يحبك ”
-شاهين زبط انها بتحكى على موشوع الفى ” الكلام بالعقل..
وفى حاجات قلتها خير”
-هيا” ديما ندعى فى قلبي ونقول .. ياااربي لو كاتبلى فرحة بنشوفها فى حياتى ..خودها منى وحطها فى قلب خوى قيس ”
-شاهين ” انتى تكلمى فيا على موضوع قيس والفى ”
-يارا ” انا مش نكلم فيك .. انا قاعدة نترجى .. وافق واعطيهاله ..حتى بوى اقتنع يمشيلكم ويخطبها ..ليش توقف انت فى طريقهم ”
يشبح فى الرسايل وساكت .. ضرب الاتصال .. صكرت هيا عليه ..
-شاهين ” سيورهم يتزوجو وينسو ”
-يارا” سألتك بالله ماتوقف فى طريقهم… خليها جميلة منك”
-شاهين ” بوك شن رايه”
-يارا “بوى مالاول كان رافض..بعدين لما لقى ان هدا اختياره وافق وقاله براحتك”
-شاهين ” انا بعد غدوة مسافر .. قولى لى بوك يجى لى جلال يخطبها منه ”
-يارا ” ليش بتسافر ”
بعد ما بعتت الرسالة / واااك ياريتنى مابعتها ..شن دخلى فيه انشاءالله يمشى لى جهنم
-شاهين ” طالع غدوة الصبح ماشى لى تونس منقعد فيها اسبوعين منستلم قطع غيار ”
-يارا” تمشى وتجى بالسلامه .. ولو ممكن انت اللى تقول لى امك انك وافقت.. لان مانقدرش نقول لى قيس انى كلمتك”
-شاهين ” حاضر”
-يارا” مع السلامه ”
-شاهين ” خيرك بتسكرى ” ..” الو ” .. ” يارا ردى”
وهيا مشت للحضر بيش تحضره من جديد .. لقت انها ماتقدرش تعاود الحضر الا بعد 72 ساعه .. اى بعد ثلاث ايام
__________________________
–
ثانى يوم
-الفى / الحمد لله ياربي .. انا اسعد انسانه فى الدنيا توة
-قيس/ وانا سعيد اكثر منك .. توة كلمنى جلال وقالى تفضلو فى اى وقت
-الفى/ وامتى بتجونا
-قيس/ اكيدة الاسبوع هدا قبل ما يغير خوك رايه
-الفى / شاهين مشى لى تونس من الصبح ..
-قيس/ ربى يرده بالسلامه
كملو مكالمتهم .. وحكى قيس لى يارا اللى صار ..فرحتله وباركتله ..وحكى لى امه
-قيس واضح عليه فرحان / انتى غير كلميه ياام .. وقوليله ان الجماعه وافقو ..ونقدرو نمشولهم فى اى وقت
-فاطمه / ياوليدى ليش نكلم فيه بالتليفون .. شويا ثانيه ايروح ونحكيله
-قيس/ باهى براحتك .. خلى نمشى لى عمى خالد نقوله ..
تلفت لى امه / وانتى بري قولى لى حناى
ومشى طلع من الحوش
-فاطمه / اول مرة نشوف قيس هكى .. يااااربي كمل على وليدى فرحته
__________________________
–
مع المغرب …
يارا متكيه فى سريرها وشادة كتاب متع تفسير ايات قرآنيه و تقرا فيه ..وصلت تليفونها رسالة ماسنجر … سمعتها .. خدت التليفون وفتحاته .. لقتها رساله من شاهين
-يارا فى خاطرها / اييييه علينا عاد
لكن ماقدرتش تقاوم نفسها فى انها تفتحها وتقرا شن كاتبلها
فتحت الرسالة وقرتها ” شن صار معاكم”
-يارا ” اسأل اهلك تو يقولولك ”
-شاهين” مش انتى اللى توصتيلهم ..نبى نفهم منك انتى ”
-يارا” اسمع بالك تحسابنى منشدها معاك هدرزة ..الفيس مانع الحضر قبل 72 ساعه .. منراجيهم يتمو ونرد الحضر ”
-شاهين” يعنى خديتى مصلحتك وباى باى ”
-يارا” افهمها كيف ماتفهمها ”
-شاهين ” ستبردت مالطريق..عظامى حالة مش قادر نتحرك”
صكرت تليفونها وحطاته عالكومودينو / انشاءالله تموت
وفتحت الكتاب تقرا فيه .. لكن قاعد شاغلها انه مريض ..
وفى خاطرها تخمم/ حتى لو كان جار ولا حد من الشارع قالل مريض حنقوله دير ودير.. فمابالك هدا دار فى خوى جميل …
ياودى البنت عندها نيه تكلمه غير تكابر.. خدت تليفونها فتحاته .. خشت عالرسايل وكتبتله رساله
-يارا” اطبخ زعتر ودير فيه شوية عسل واشربه ”
-شاهين شبح رسالتها فرح “مش قادر نتحرك”
-يارا” من ماشى معاك.. قوله يطبخهولك”
-شاهين” انا بروحى ”
-يارا/” باهى نوض اطلع جيب زعتر ”
-شاهين/ ” تو نمشى توة .. لكن بالله عليك ماتسكرى بيش تقوليلى كيف نديره”
-يارا/ “طبعا مش حنسكر”
شاهين فرح بي جملتها الاخيرة .. طلع بالسيارة جاب بندول متع بردة ومضاد وزعتر وروح ..
فتح تليفونه وكلمها / ” جبت الزعتر .. وينك”
ماردتش عليه لانها سكرت نت ….ومشت لى امها
__________________________
–
بعد ساعه …
كملت يارا اماعين العشى ..وخشت لى دارها ….مشت تجرى للتليفون .. خداته واتكت فى سريرها …
وقبل ماتفتح التليفون تخمم/ خيرك ملهوفه .. ليك فترة ناسياته ومش مفكرة حتى تكلميه .. معقولة محادثه ادير فيك هكى …
وسرحت بخيالها تدكر كيف دارلها عيد ميلادها فى مصر ..
كيف هدالها الخاتم .. وكيف قاللها نحبك … فاقت من السرحان لقت مفسها مبتسمه …
فتحت التليفون وبعتتله رساله / “الو ”
-شاهين /” اهلا”
-يارا / “حط سزوا متع قهوة عالنار .. خليها تغلى ورش فيها الزعتر يطبخ شوى .. حليه بالعسل واشربه”
-شاهين/ “باهى”
-يارا/ “خود ليم وزيت زيتون وادهن جسمك … وارقد ”
-شاهين / “باهى ”
-يارا / ” خيرك مريض هلبا ”
-شاهين/” ايه هلبا ”
-يارا/ ” باهى نوض اغلى الزعتر واشربه ”
-شاهين/ ” وغلاوتك عندى ماقادر ”
يارا تشبح لي كلمه غلاوتك عندى ومبتسمه …
وتخمم/ تو يهزا عليا ويقول ماصدقت …
وبتسكر تليفونها .. رجعت تخمم/ حرام هوا مريض لازم نسايره
-بعتت رسالة/” نضتت ولا مزال”
-شاهين / ” مش قادر”
-يارا/ ” هيا عاااد ”
-شاهين / ” حاضر على خاطرك ”
ناض وحط السزوا عالنار وهيا معاه عالماسنجر لحد ماشربه ورقد
__________________________
_
ثانى يوم
طول الوقت اضم وتعول وتهدرز على امها وحناها .. لكن العقل مع شاهين .. فى نفسها تراجى فى رسالته وفى قلبها تكابر وزعميتا ماتخممش فيه…
تغسل فى اماعين الغدى وتخمم/ مفروض انتى قلتيله كيف حالك اليوم … ااه نقوله كيف حالك .. مستحيل نديرها ونكلمه .. اصلا ال 72 ساعة اكيدة تمو ..مفروض نرد الحضر انا ..
صكرت الميه ومسحت ايديها وتخمم/ لكن خيره مابعتش رسالة .. غريبه .. بالك زاد مرض اكثر ..
خشت لى دارها تشبح فى الماسنجر لقاته مقفل من 17 ساعه …
هيا صح مستغربه .. لكن كرامتها ماتعطيهاش ادن انها تبعتله رسالة مهما كانت ضروفه
.
.
فالليل ….
يارا مقعمزة تخمم انه غريبه ماكلمهاش… كأنها من زمان تراجى فى رسالة منه .. مشاعرها كلهم متحركات .. لكن صبعها مش مطاوعها تكتبله رسالة ..
تليفونها ضوى .. وصوت رسالة وصلت… خدت تليفونها بسرعه فتحاته .. لقتها رساله من شاهين” انا فى المركز”
يارا انخلعت/ ” خيرك علاش ”
-شاهين / “تعاركت انا وواحد على خاطر فلوس وجابونا المركز ”
-يارا/ ” كيف تتعارك فى بلاد الناس”
-شاهين/” امالا نخليهم يضحكو عليا ”
-يارا/ ” لاااا يحبسوك خير”
-شاهين / ” ماتوصلش للحبس ..يراجى فى واحد بيجيبله فلوس بيعطيهملى”
-يارا/ ” باهى رد بالك ”
-شاهين/ ” خايفه عليا?”
-يارا / ” اكيدة لا ?”
-شاهين / ” لكن انا نخاف عليك اكثر من روحى ..انا نحبك يابنت ”
يارا قرت الرسالة صكرت التليفون طول..حست انها رخيصه
وان من كلمه مشتله تجرى
وهوا وراها يبعت فى الرسايل الو الو وهيا مصكرة نت
__________________________
_
فالليل الساعه 2
فتحت نت .. لقت كوووم رسايل منه .. يحكى على احساسه بالندم تجاهها
” يارا انتى الشى الوحيد الحلو فى حياتى ..خلينا نرجعو لى بعضنا انا مانقدرش نعيش منغيرك”
” تدكرى فى ايامات مصر … كنت نتمناهم مايتموش ”
ورسايل من هالكلام .. لكن يارا لما قرتهم ماحستش بالسعادة … بالعكس ناضو عليها كل المواجع …
كتبتله رساله ” اما حقارة بعد هكى ماريتش ..تقتل القتيل وتمشى فى جنازته “… حدفت رسايله ودارتله حضر
وصكرت تليفونها وتعاتب فى نفسها / ماهو انتى اللى رديتى عليه وطمعتيه… احسن خليه هكى يتعدب .. بعد اليوم مستحيل مزال انرد عليه ..
__________________________
_
بعد ثلاثه ايام …
فتحيه خالتهم جت لى اختها فاطمه تخطب فى يارا لى ولدها مؤيد
-فاطمه / لكن بنتى مطلقه وولدك عزرى
-فتحيه / هدا رايه وهوا يبيها .. يتحمل مسؤليه نفسه ..قالى نبيها جيتك نخطب
فاطمه فرحانه .. مهما يكون بنتها مطلقه وجاها النصيب
-فتحيه / شاورى بنتك وعبدالسلام وردو عليا بيش نقول لى مبوه يجى يخطب
-فاطمه / تم الكلام ..عطينى يومين نشوف عبدالسلام وقيس ونرد عليك ..
فى نفس اليوم فاطمه خبرت عبدالسلام بي خطوبة ولد اختها لى بنتها .. قريب مات بالفرحه
-عبدالسلام/ شنو ممنشدو عالولد واحنا مربيينه ..ردى عليهم طول قوليلهم يتفصلو ..
-فاطمه / مش ننشدو البنيه قبل
-عبدالسلام / اكيدة بتوافق ..معقولة يجيها النصيب وترفض
..خاصه انه عزرى
-فاطمه / واحنا وين ندرو مرات توافق ومرات لا
-عبدالسلام / قلتلك ردى عليهم وقوليلهم موافقين..والبنت لاتشاوريها ولا تقوليلها .. انا اللى نعرف مصلحتها وين .. ياسر من الماخدة الاولة اللى جابتنا لتالى
بوها خايفها ترفض ولد خالتها وهوا معتبره فرصه
.
.
فى نفس اليوم فالليل
-فاطمه / بوك هوا اللى قالى ردى عليهم
-قيس/ تى كيف تردى عليهم منغير ماتسأليها
-فاطمه/ لكن انا مارديتش .. كيف نعطى بنتى منغير مانشاورها..وانت عارف انى مانقدرش نقوللها وبوك منبه عليا
-قيس/ اطلعى منها انتى .. وتو نقوله سمعت من برة
-فاطمه / باهى
-قيس/ هيا يارا وين..صوتها مهناش
-فاطمه / فى حوش جدها
-قيس/ تو نكلمها ونقوللها تروح
وبالفعل كلمها ..وروحت .. وحكالها على ولد خالتها
-يارا تبكى / من قاللكم انى نبى نتزوج توة
-قيس/ منغير بكى وتفتفيت ..انتى تبيه وموافقه ولا لا
-يارا / طبعا لا
-قيس/ خلاص تو نتصرف انا .. خلى نفووت غدوة بوى بيمشى لى اهل الفى نبيش نتعارك معاه ..وبعد غدوة عندى كلام
-يارا / سلم اوخيى اللى ديما واقف معاى
وطلع قيس وخلاها ….
مشت لى تليفونها فتحت الماسنجر.. حولت حضر شاهين ..
وفتحت الانبوكس تكتبله
-يارا / ” شاهين ”
-بالصدفه هوا فاتح نت ” ياعيون شاهين ”
-عيونها مدمعات ” امتى بتروح ”
-شاهين /” انا فى البوابه توة .. خيرك فى حاجه ”
-يارا/ “لا لا مافى شى ”
-شاهين /” حبيبتى قولى خيرك ”
-يارا / ” حبيبتك !!.. انت كداب وعمرك ماحبيتنى .. لو صح كنت تحبنى ماكنتش اصلا طلقتنى .. لكن انت النفاق يجرى فى دمك .. وانا نكرهكككك”
شاهين يتصل وهيا تصكر عليه ….
-انشغل عليها / “حبيبتى ردى”
-يارا /” انت واحد كداب .. وبعتنى .. لانك خايف انى نديرلك اى شى زى ضربه الموس”
-شاهين/ ” صح انا طلقتك لانى خايف .. لكن خايف عليك مش خايف منك .. انا راجل ومستحيل كنت نقدر نتحمل زوجتى وحبيبتى معاى فى نفس الحوش وكل واحد مننا راقد فى غرفه”
-يارا/” كلكم هكى .. كدابين .. هدا موضوعكم الوحيد اللى تتحججو بيه.”
-شاهين / ” نحبك ”
-يارا / “وانا منحبكش”
-شاهين /” باهى ماتبيش تحكيلى خيرك”
-يارا / “لا”
استمرو يحكو مع بعض .. شاهين فهم انها مضايقه ومحتاجه انها تحكى معاه … رد عليها وسايرها وتكلم معاها بالرغم ان كلامها جارح ليه
__________________________
_
ثانى يوم
شاهين وصل الفجر .. خش حوشه ورقد .. خوته لما شافو سيارته عرفوه روح .. لكن خافو من مرواحته لانه اليوم فضانيه الفى ..
المغرب جوهم حوش عمك عبدالسلام .. جاب معاه خوته وبوه وجيرانه وصغار عمه .. وجلال حتى هوا نادى اقاربه وجيرانه ..مدولهم حوش عمتك الخامسة اللى فيه النصيب
وخطب عبدالسلام البنية لى ولده وعطاهاله خوها جلال ..
قبل مايمدو العشى بشوى …
خش شاهين/ السلام عليكم ياتريس
الكل / وعليكم السلام
ماعدا عمك عبدللسلام ماردش عليه وقبل وجهه للجهه الثانيه
خش شاهين سلم عليهم بالواحد ..حتى عمك عبدالسلام سلم عليه بنص عين .. يبيش حتى يشبحله ..
قعمز شاهين مع خالد .. وقعدو يهدرزو لين جابولهم العشى وتعشو وشربو طاسه شاهى خضراء وروحو …
طلعو شاهين وجلال يسقدو فيهم …
-شاهين / زى ماوصيتك يا خالد
-خالد / كون هانى ..
وعبدالسلام يشبح لى خالد قريب بيموت يبيشى يدوى معاه
قيس وين تلقيه عااد .. اسعد يوم فى حياته
-قيس فرحان / مبروك علينا حبيبتى
-الفى / الله يبارك فيك .. تصدق مش قادرة ندس فرحتى قدام خوتى لين تحشمت
-قيس/ انا منطلع من الحوش توة بوى قريب يوصل ..تى والله منضري يحشم حتى من عيونى يضحكو
-الفى / باهى غير سكر توة صوت ختى وصلو فالليل نحكو
صكرو الخط .. وطلع قيس من الحوش .. وخشو بعده سيارات عبدالسلام وخوته …
دخلو بوهم لى حوشه … وعبدالسلام تلفت بيخش حوشه
-خالد/ عبدالسلام .. نبيك فى موضوع
-تلفتله / تعالى الحقنى للمربوعه …
خش معاه خالد … وطلع بعد ربع ساعه …
عبدالسلام فى الصالة هوا وفاطمه مقعمزين تسأل فيه شن شرطو وشن قالو .. وهوا يحكيلها
-عبدالسلام / قتلك
-فاطمه / شنو
-عبدالسلام / شوره خالد كلمه شاهين يبي يرد يارا … لكن انا قلتله قوله طلبك مرفوض والبنت عطيناها لى ولد خالتها …
-فاطمه / لمن عطيتها
-عبدالسلام شبحلها / عطيناها لى ولد اختك ..اهو قلتلك ردى عليهم
-فاطمه تلكلك / مااا.. ماهو خوها قيس
-قص عليها / قيييس …خيره قيس
-فاطمه ترعش/ ماهو قيس شاورها وقالتله انها ماتبيش..
-عبدالسلام نط فيها/ ومن قاله ولدك اللى مخربلى الدنيا كلها
-فاطمه / شوره الولد قاله …
-عبدالسلام / اسمعى .. انا قلتلك ردى عالناس ..وقوليلهم عطيناكم ..
طلع عبدالسلام للجنان برة دار فراش واتكى … وخشت فاطمه لى دار بنتها وحكتلها عالللى صار
-يارا/ مانبيشى ولد اختك ..كان نقتل روحى ماناخداش
-فاطمه/ سلم بنيتى نعرفك عاقله وتسمعى فى كلام بوك
-يارا/ هدا زواج وعيشه وصغار.. كيف نسمع كلام بوى..نبيع روحى ولا كيف
-فاطمه /باهى على خاطرى .. غير سايريه ووافقى وبعتالى ساهل
-يارا/ هوا شن مخطر عليه فاتح الموضوع هدا توة فى هالليل
-فاطمه / شوره شاهين كلم عمك خالد يبي يردك ..لكن بوك قاله قوله بنتى عاطيها لى ولد خالتها
-يارا ظلمت قدامها / ليش تقولوله هكى .. ليش
__________________________
_
فى دار يارا
اتكت على سريرها وهيا تبكى .. وتخمم زعما شن قال شاهين لما قالوله ..
تليفونه شرين .. شافت لقتها عمتى الخامسه تتصل…
فتحت الخط لقاته شاهين يعيط/ حولى ام تليفونى من الحضر … تووووة
-يارا / خيرك تعيط
-شاهين / ساعه وانا نتصل بيك وانتى دايرتنى عالمشغول
-يارا / باهى معش تعيط
-شاهين / حولى الحضر تووووة
-يارا /تى باهى
صكرت منه الخط .. وخشت تليفونها حولت الحضر من ارقام شاهين الزوز … وطول هوا اتصل
-ردت عليه / الووو
-صوته زى الغول / منهوا اللى واخدك
-يارا / شاهين ..هدى نفسك وتكلم بالشوى ماتعيطش .. خيرك رعشتنى
-هدى شاهين نفسه وغمض عيونه لما سمع اسمه فى صوتها / انتى تبيه
-يارا / لا
-شاهين / قولى لى خالتك من غدوة تنساها .. لما نوصى عليه يدخلوه الحبوس اللى تحت الارض
-يارا / لااااا .. بالله عليك
-شاهين / خيرك تعيطى .. انتى تحبيه ولا شنو
-يارا / لا نحبه ولا حتى يخطرلى .. لكن احنا مالنا وماله .. انا رفضته .. لانى مستحيل نتزوجه
-شاهين / يارا ليش اديرى فيا هكى .. ليش العداب هدا … يابنت الناس انا نحبك ونبيك ….
يارا تسمع فيه وساكته.. لا موافقه ولا رافضه
-شاهين/ حبيبتى .. انا متاكد انك تحبيبنى زى ما انا نحبك
.. غلطت وصلحت غلطى .. دللتك ..حبيتك .. شن تبى ثانى
ليش انا من دون الناس ربي كاتب عليا الشقا
قعدو الزوز ساكتين ..قريب خمسه دقايق … يسمعو فى نفس بعض وخلاص ..
-شاهين / انا خطبتك من عمك
-يارا / قالولى
-شاهين / باهى شنو رايك
-يارا / منعرفش
-شاهين / ارجعى لى حوشك ونوريه .. وانا نوعدك ماندير شى يزعجك ..نعيشك اميرة ..
يارا ساكته وتسمع فيه وهوا يحكى عاللى فى قلبه ..ويتوعد انه يعيشها فى اجمل حياة ..
-يارا / خلينى نفكر ونرد عليك
-شاهين / كم يوم
-يارا/ منعرفش
-شاهين / غدوة ردى عليا
-يارا/ خليها بعد غدوة ..
-شاهين / نراجى فيك على احر من الجمر
__________________________
_
يومين وشاهين يمولج يراجى فى يارا ترد عليه .. وهيا تصلى فى استخارة .. يبعت فى رسايل عالماسنجر عالتليفون وهيا تقرا ومبتسمه بس ماتردش عليه …
اما موضوع مؤيد ولد خالتها وقف فيه قيس .. قال لى بوه حتى انا البنت اختى ونعرف مصلحتها ..مدامها ماتبيش مستحيل نعطيهاله .. نقرز عمك عبدالسلام هلبا لكن ولده غلبه …
من بعد غدوة …
من الساعه عشرة الصبح شاهين يتصل بي يارا يبي يشوف رايها وجوابها .. وهيا تشوف فى الرقم وماتبيش ترد …
استمر فى الاتصال بين الوقت والوقت …..
صلت اخر استخارة مع المغرب … ولما اتصل ردت عليه
-شاهين / ليش هكى دايرة فيا ..من الصبح نتصل وماترديش
-يارا بي دلع/ انا حرة ندير فيك اللى نبيه
-شاهين / انا ملكك انتى وبس وديري اللى يريحك المهم تكونى راضيه
يارا ساكته وتسمع فيه
-شاهين / هاا بشري … شن رايك
-يارا بي حشمه / فى شنو
-شاهين / فى موضوعنا طبعا .. موضوع زواجنا ..شن قلتى
-يارا/ موافقه
-شاهين فرحان / هدا الراى الصح ..هدا اجمل يوم فى حياتى .. انتى روحى ..وح تنورى حياتى .. ووالله من اليوم مستحيلة حنزعلك
-يارا / حتى انا غلطت هلبا لما ماتمردت ومارضيتش بي نصيبى .. اللى صار بينى وبينك نصيب وكاتب من الله .. وزواجنا نصيب وكاتب من الله ..لكن انا ما رضيتش وعاندت ربي …
-شاهين / تفكيرك حلو.. وكلامك احلى … والنضوج واضح فى كلامك .. بس منسئلك تحبينى ولا لا
-يارا / اكيدة نحبك ..وانت عارف الحاجه هادى
-شاهين / وانا نموووت فيك يا زوجتى ويا حبيبتى ..اسمعى
اهو بنجيب الشيخ توة وبنجيكم
-يارا / توة .. غير اصبر شوى
-شاهين/ صبرت شهور.. معش قادر نتحمل اكثر ..الليله لازم تباتى فى حوشى
-يارا / الليله !!.. امتى بتقول لى اهلك وامتى ..
-قص عليها / نقوللهم لما تكونى فى يدى ونخش انا وياك حوش امى
بالفعل شاهين جاب شيخ اللى يقرا فى الفاتحه معاه وزوز اصحابه شهود ومشى لى حوش عمك عبدالسلام …
الكل تفاجأ بي تصرفه .. عمامها وخوها .. والكل ..
تكلم شاهين وخطبها من بوها .. طبعا خالد وقيس فرخانين ويبوه يرجع نسيبهم …اما عبدالسلام رفض.. وشد فالموضوع
.. ولما ناقشوه قاللهم ان بنته مش موافقه ومايبيش يغصب عليها …
طلب الشيخ انه يسمع راى البنت .. الكل تفاجئو ان يارا موافقه …
عبدالسلام لما لقى بنته موافقه وطايب على خاطرها وافق
وقري الشيخ فاتحة شاهين ويارا
__________________________
_
ساوت يارا نفسها ونضفت يديها ورجليها وجسمها كله بي فيت… ودوشت ونزل شعرها زى الحرير.. دارت بودرة ولبست جلابيه كريمه ووشاح وطلعت مع شاهين ..سلمت على يد بوها ومشت ..
شاهين هوا اللى اصر ان الموضوع يتم بسرعه ..قبل مايسمع حد وتصير قصه ..كلفتهم تكلفيت فيسع فيسع ?
ركبت يارا مع شاهين … مسك يدها ولع السيارة ومشوو
شرين تليفون قيس ..لقاه رقم غريب … فتح الخط ورد
-قيس/ الو
-المتصل/ السلام عليكم
-قيس لقاه صوت بنت/ ايوووه من معاى
-المتصل/ انا وردة بنت عم شاهين
( خنبت الرقم من تليفون الفى وبتستفيد بيه توة ?)
-قيس/ مانعرفكش ..لكن اهلا وسهلا بيك
-وردة / منقولك كلام ..لكن لازم تحلفلى انه يقعد بينى وبينك
-قيس/ عليك الامان …تفضلى قولى
-وردة / نبى نقولك ان شاهين قاعد يمسخ فى سمعت اختك .. ويقول لقيتها دايرة ودايرة فى مصر ..وقال لقيتها مع واحد فى مطعم لما مشو لى مصر هدا علاش طلقتها
-قيس/ معقولة شاهين يقول على مرتك هكى..ياودى مانيش مصدق
-وردة / قصدك اللى كانت مرته ..
-قيس/ ماهو اللى انتى ماتعرفيشى ان قبل شوى شاهين قري فاتحته على يارا وروح بيها.. يا كدابه يا واطيه ..اقسم بالله كانك قدامى رانى فسدتلك وجهك
-وردة عيطت / اااااه … ردها … نهار احرش عليه وعلى راسه الخاين ..
-قيس/ صكرى يا مسخه خير مانزبط عنوانك ونجى نربيك مدام اهلك ماعرفوش يربوك
__________________________
–
روح شاهين بي يارا لى حوش امه هوا الاول .. لما الخامسه شافت يارا خشت للحوش رعشت مع بعضها ..ماعرفتش هدا حلم ولا علم ..
جوها سلفاتها وسلافها وحماواتها سلمو عليها وهللو وكبرو فرحانين بي رجعتها لى حوشها
-جلال / العشى عليا انشاءالله
-عزيز / وانا وين مشيت.. توة نمشو نجيبو اللحم والنساوين ايديرو العشى
-شاهين / غدوة جمعه نتغدو مع بعضنا انشاءالله .. اليوم خلوها لانها جت فجأة
-جلال يحلف / والله ماصارت نديرولكم عشى وبعتالى روحو
-عزيز ينخص فى جلال/ خلاص بلا حلف..قالك غدوة خلاص خليها غدوة
-جلال ضحك / باهى على كيفهم
قعدو العرسان شوى وبعتالى خداها وروحو لى حوشهم
.
.
وصلو لى شقتهم ..
خشت يارا للحوش .. لقاته حايس حالةة
-يارا / خيره الحوش هكى حايس
-شاهين حضنها من الخلف / لان مولاته ماكانتش فيه
-يارا ترعش/ شااهين.. بالشوى
-شاهين حضنها هلبا من الخلف وقرب وجهه من وجهها / لا ياماما.. زمان كان بشروطك انتى..لكن توة بشروطى انا
-تلفتته يارا وهيا فى حضنه/ اشرط زى مايعجبك
-شاهين يشبحلها بي رغبه / اول شرط نومى بيكون معاك فى دار النوم … وعلى سرير واحد
-يارا تضحك / وثانى شرط
-شاهين / نبى عشر صغار
-يارا بدلع/ وثالث شرط ..
رخاها ووقف قدامها / اسمعى انا مش نتحمل دلع اكثر من هكى راهو ..
وقامها بين ايديه ودخلها دار النوم
__________________________
–
بعد اربع سنوات
-يارا حامل فى التاسع / حمودى … حمودى
-محمد ولدها جاها يجرى / نعم ماما
-يارا / شن قالك بابا
-محمد / قالى قول لى ماما دير قهوة
-يارا / من معاه
-محمد / معاه بو ملاك بنت عمتى وردة
-يارا/ وردة ورانا ورانا …كانا مش هيا راجلها
فتح شاهين الباب / حبيبتى …
-يارا داهشه / ايوووة …
-شاهين خداها من يدها وقعمزها / حبيبتى قلتلك معش تتحركى ولا
-يارا / ماهو حمودى قالى قالك بابا ديري قهوة
-شاهين / تى ماهو نبى هاللصقه يمشى .. لما قلتله نديرو قهوة قالى لا والله مستعجل ?
-يارا/ نمشو الليله لى حوش خوى قيس ولا لا
-شاهين / لا لا حبى نبيك تستريحى .. الدكتورة منعت عليك الحركه بكل الايام هادى
-حطت يدها على بطنها / شوفه كيف يرفس
-جى ولدها حمودى يجرى حط يده على بطنها / ترا
وبدو الثلاثه يضحكو
__________________________
تمت
القصه حقيقيه ..وابطالها حقيقيين وعايشين فى الجنوب حاليا .. عشان شغل شاهين
قصه الاغتصاب حقيقيه .. وقصه الطلاق حقيقيه ..وفالاخير رجعتله لكن بطريقه حلوة ..وعاشو فى ثبات ونبات
نحبكككككم ❤