حطيتك في عيوني
??للكاتبه زهور جمال الدين ??
???الحلقه السابعة ?? ?
خدت مباهر التليفون من يد سرور وسكرت المايك وحطت التليفون فودنها
-منصور: نحبك ..ومنقدرش نسمع صوت دموعك
وهيا تبكى
-منصور: مديريش هكى وانتى عارفه انتى شنو بالنسبه ليا..
غير قوليلى بس شنو اللى واجعك ..
انفجرت مباهر بالبكى وبدت تعيط عليه
-مباهر: لانى سمعتك وانت تخون ..
سمعت صوت البنت اللى كانت معاك .. لو مهما تحلف انا سمعت بودانى
وسكرت الخط
منصور انصدم بالكلام اللى سمعه..
ويناقش فى نفسه
منو اللى كادب عليها !؟
بس هيا قالتلى سمعت بودانى
شنو سمعت.. وامتى .. احنا مبارح سهرانين مع بعضنا للفجر..
عاود على رقم سرور..
مفيش رد ..
قعد يعاود مكالمه واثنين وثلاثه
ومباهر مانعه سرور من الرد ..
بعت رساله …”مباهر ردى ولا والله توة ندير تصرف ميعجبكش”
-سرور: يامباهر خلينا نردو عليه نفهمو منه
-مباهر تبكى: قلتلك لا ..مش حنكلمه
-سرور: خلينى انا نكلمه ونفهم منه
كلماته سرور..
رد من اول تشريينه
-منصور: وين مباهر
-سرور: مباهر تعبانه.. خليها توة ترتاح وغدوة كلمها
-منصور يعيط معش فيه عقل : عطيهالى قلتلك
-تلفتت سرور لمباهر: ياوخيتى شوره عصبي ..ردى عليه الولد يغلى
خافت مباهر.. وخدت منها التليفون
-مباهر تبكى : الو
-منصور صوته مخنوق : هكى اديري فيا
-مباهر عيونها معبيات دموع وخشمها كله خناين من البكى??: توة بديت انا اللى غالطه
-منصور: انا نخونك يا مباهر.. انا روحى بين ايدك ..
كيف تفكرى انى ممكن نخونك
-مباهر تعيط: سمعتك بودانى
-منصور: اهدى وادوى بالشوى .. امتى سمعتينى.. اما يوم
-مباهر: اليوم الصبح
-منصور : انا اليوم من الحوش للورشه .. وكلمتك لقيت رقمك مشغول ..انتى امتى سمعتينى
-مباهر تبكى: ايه سمعتك
-منصور يتكلم باعصاب وبصوت عالى : وقفى بكى وفهمينى
انتى الساعه كم سمعتينى وكيف سمعتينى
-مباهر: الصبح مع الساعه 11.. كانت معاك وحدة وتقولك فى كلام مش مزبوط وتضحكو
-منصور: شنهوا الكلام اللى مش مزبوط ادوى
-مباهرمسكرة عيونها وتعيط: هيا تقولك وجعنى وانت تقوللها تحملى
وبدت تبكى …وادكر منصور اخته ?
-منصور: استغفر الله العظيم.. استغفر الله العظيم ..
تى هاديكا اختى النهار لحرف حاطه وجها فالبخار وانا شادلها الفوطه ..
وهيا تقول عالبخار وجعها
-مباهر : مستحيل نصدقك
-منصور: اسكتى ومنسمعش منك ولا حرف ..اسمعى بس …
خدى تليفونه الثانى واتصل باخته سلمى وفتح المايك
-سلمى : ايوة منصور
-منصور : امتى طلعت انا اليوم من الحوش
-سلمى: غير قول السلام عليكم
-منصور: متزيدينيش على مابيا حتى انتى جاوبينى..
-سلمى: طلعت الساعه 11 ونص من الحوش
-منصور : وشن صار قبل مانطلع
-سلمى: منصورشغلتنى فى حاجه
-منصور يعيط : جاوبينى شن صار
انخلعو سلمى من جهه ومباهر من جهه ثانيه ?
-سلمى : ماصار شى .. شديتلى الفوطه لما درت البخار وخلاص
-منصور: وشنو اللى وجعك
-سلمى: بخار السزوا قريب حرقلى وجهى وجعنى
-منصور: باهى صحيتى يا سلمى .. تو نروح فالليل
وسكر الخط …
رجع للخط الثانى
حط التليفون فى ودنه …
-منصور: صدقتى ولا قاعدة متبيش تصدقى
-مباهر: منصور انااا
-قص عليها منصور بعصبيه : سألتك مصدقة الكلام ولا مش مصدقة وتبى نزيد نثبتلك
-مباهر: لا مصدقه
-منصور: اوكى تم
وسكر الخط
عاودت مباهر تحسابه الخط انفصل …لقت رقمه مقفل
عاودت على رقمه الثانى مقفل
__________________________
نورى مقعمز فالمكتب متاعه ويفكر
زعما حتى هيا تفكر فيا .. وانا فى بالها .. ولا غير انا نخرط …
حط يده على شعره..
ويتكلم مع نفسه .. توة بالشيبات هادو منو بيشبحلك يا شيبانى …
” حقه انا موصفتلكمش نورى..طوله 1.75 متر ??.. ووزنه قريب 85 كيلو..
عنده عضلات ولكن معنداش كرش ..عمره 36 سنه ..
عنده شيب فى شعره عالجنب اليمين واليسار.. وداير فايف فى وجهه وعيونه سود وكبار …
ولبسه ديما انيق.. جماعه الخارجيه ديما مهتمين بنفسهم..شعره ناعم وعنده قصه عاليسار? ”
وهوا يفكر فيها ..
خش عليه موضف معاه: بدى الاجتماع استاد نورى
-نورى: نحسابكم اجلتوه توة الوقت متأخر حتى العصر ادن من بكرى
-الموضف: منعرفش الحق شوفهم انت يا استاد
قبل ماينوض دار فى خاطره انه لازم يحسم المسأله اليومين هادو ويعرفها منو
_________________
مباهر عاد وين تلقيها …
رجعتلها الروح من جديد
قعدت تشبح لسرور وتضحك ..وتحضن فيها زى العبيطه ??..
فرحانه ان منصور طلع مش خاين
-سرور: توة نبى نفهم هدا منو وشن قصته
-مباهر رقدت على سريرها: هدا روحى ونور عيونى
-سرور: باهى وين آرائك القديمة تبيه دقن و معنداش شخصيه .. وتبى تحكمى فيه وبطلقيه
مباهر تضحك
-سرور: المهم ارآئك القديمه كلها مفيشى راهو .. الولد شخصية وعضلات ..تى حيه عالطرف منين حصلتيه
“ونسيت موصفتلكمش منصور .. يا حنه .. طوله 1.80..وزنه 70 كيلو ضعيف?..
شعره اسود وناعم وغزير..وعيونه سود .. شخصيته حلوة .. وجميل ..ويبان منضره واعر وصعب ”
-مباهر: منحسابش روحى نتعلق بشخص هكى
-سرور: شفتى من زمان نقولك الحب حلو
-مباهر: يهبل مش غير حلو بس
-سرور: لكن خوى خالد يحبك النم
-مباهر: سورى مفيش نصيب بنتنا مرتبطه ??
وبدو يضحكو
انفتح باب الدار …
-اكرام : مفيش نصيب مع منو ..نشم فى ريحه خطوبه
-سرور: كروومه من اما ريح طحتى
-اكرام شبحت مباهر نخلعت : خيرك مباهر اللطف ..من عاطيك طريحه ??
-مباهر: خشى تو نحكيلك..
-سرور :من جابك
-اكرام: جابتنى ماما ماهو تطلع عادى قبل المغرب
وانتو وينكم سرور معش بينتو انتى وخالتى
-سرور: ماهو جيناكم يوم اللى روح جدى وحنينه .. واول امس ماما تغدت عندكم..
-اكرام : اهاا والله ماندرى عليها تصدقى انوض العصر من النوم
وقعدو يهدرزو وحكتلهم مباهر على منصور وكيف يحبو بعضهم بالسر ليهم اسابيع
-اكرام تضحك : باهى والطلاق و وانك تبى تعيشي براحتك والعبط هداكه كله شنو
-مباهر: انا توة ماشيفه شى فعيونى غير منصور …
والله يابنات لى امس وانا نفكر ومقتنعه بشروطى
-اكرام: وتوة
-مباهر : بعد قصه اليوم ..عرفت مقدار حبى ليه ..وانى معش نقدر نعيش منغيره
-سرور: لكن فى كلمه سامحينى بنقولهالك يا مباهر
-مباهر: بتقولى يشتغل فى ورشه صح ولا
-سرور: لا عادى جدا خيرهم جماعه الورش احسن ناس.. عمى عبد المولى عنده ورشه ونحبوه ومحترم جدا
-مباهر : امالا شنو
-سرور : بتقدرى تستحملى حالته المادية ..انتى عايشه فى مستوى معين
-مباهر: اللى نعرفه انى توة انى نحبه ونبى نعيش معاه
-اكرام: لكن آخر سَمعه فالفيس .. مباهر حبت وتبى تتزوج?? ..
-مباهر قامت يديها وتضحك: ااامين يا ربي
وضحكو الثلاثه …
ادن المغرب
-اكرام: حيه ماما معش تقدر تجينى
واتصلت بخالتها خولة قالتها تجى تروح بيها هيا وسرور
__________________
-هنادى : حيه عليك مقواك
-اميرة : امالا انا يضحك عليا ونخليه يتهنا .. غير رتبتى اللى قلتلك عليه كله ولا
-هنادى: رتبت طبعا .. لكن مع من حصلتيه
-اميرة : مع فيفي
-هنادى : المهم انا اسمى مايطلعش فالخط
-اميرة : عيب عاد …
وقعدو يضحكو ويهدرز ..
وبعد نص ساعه ..اميرة جاها تليفون ..ردت
-اميرة: واحلى فيفي فالدنيا ..سلمهالى الغزالة ..
خلاص توة شفرتك كسريها ..
وسكرية البروفايل اللى فتحتيه عالفيس ..وفوتى عليا بعتالى خودى باقى حسابك
وسكرت الخط …
-هنادى: شنو بشرينى
-اميرة: تمت العمليه بنجاح
-هنادى : مايجيبوها الا نسوانها
_______________
خولة وصلت قدام حوش مباهر..
قامت التليفون اتصلت ب اكرام قالتلها هيا اطلعو
نزلو اكرام وسرور …
سلمو على خالتهم وركبو معاها …
ولعت السيارة ومشت ..
بعد ما مشو
وصل نورى ووقف سيارتة ونزل ..
درس السيارة قدام الحوش ..لانه ناوى يطلع
البنات مع خولة فالسيارة
-سرور: حيه نسيت نضاراتى الشمسيات فى حوش مباهر
-خولة : غدوة خوديها
-سرور: وراس خويلة لازم ناخدها توة منقدرش نطلع من غيرها غدوة
-خولة : وااااك ..باهى عندك دقيقه
ودارت بالسيارة رجعت لحوش مباهر
وصلت
درست سيارتها ورا سيارة نورى
نزلو البنات الزوز .. يطقطقو بسرعه مستعجلين..
فتحلهم نورى الباب ..خشو يجرو
هوا كيف بيسكر الباب ..
حس انه شاف حد يعرفه
رجع فتح الباب وطلع ..
وقف فالروشن اللى جنب روشن خولة وقعد يشبحلها
زبطها ..
واخيرا لقاها
تلفتت خولة ?: انت
-نورى مبتسم: ايه انا
نزلت خولة من سيارتها .. طولها 1.65.. وزنها 55..
لابسة سروال اسود وبلوزة بيج وجاكيت اسود وحجاب ..
دار هوا عالسيارة ووقف جيهتها
قعد يشبحلها ..وهيا تشبحله
نورى عنده نوع منوالرومنسيه فى تصرفاته
والباين ان خولة احرف منه ..
قطعت خولة صمت النضرات
-خولة : انت تسكن هنايا
-نورى : هدا حوشنا
-خولة: بنات اختى توة خشو الحوش هدا
-نورى: انتى خالت اكرام
-خولة : وسرور حتى هيا بنت اختى
-نورى: انا نورى خو مباهر
-خولة : تشرفت بيك ..وانا خولة
-نورى وانا تشرفت بيك
طلعو البنات يجرو ركبو للسيارة …
-خولة: نستادنك توة البنات جو
-نورى: فى امان الله …
وتلفتت خولة ..بتفتح سيارتها
ونورى حس انه لازم يكون جرئ اكثر من هكى
-نورى: هوا شن بنقولك
-خولة: ايوه
-نورى: ممكن ناخد رقمك
-خولة متحشمه: ايه عادى
-نورى مدلها تليفونه : اكتبيلى الرقم
وكتبتهوله.. وركبت طول سيارتها ومشت
____________________
مباهر فرحانه .. على سعيدة.. على خايفه من منصور
وخشت حولتله الحضر من الفيس والفايبر
وتتصل على رقمه مقفل
وطول الليل وهيا تبعت فى رسايل عالفيس ..
وعالتليفون
الفيس مش مفتوح.. والتليفون مقفل..
ومباهر راكبه فيها نار
ومع هدا هيا سعيدة.. المهم مطلعش خاينها
ثانى يوم ..مفيش رد عالفيس والتليفون مقفل ..
تكلم فى سرور واكرام .. يهدو فيها ويمتصو فى غضبها
ويقولولها سيوره يهدا ويفتح رقمه ..
-مباهر: ستاحشته
-سرور: تحملى حتى انتى عملتك كبيرة
-مباهر : توة ياناس انا اللى طلعت غالطه
-سرور : ايه لانك مفروض سالتيه ..مش طول ترخى بيه وتفوتيه
-مباهر: نبى نمشيله معش قادرة على فراقه اكثر من هكى
-سرور: فكك مرات يقولك كيف تجينى ..
منصور يقرا فى رسايلها ومستاحشها هلبا .. لكن يبي يأدبها بيش معش تشك فيه
كل رسائل الفيس يقرا فيهم من على سطح التليفون ..
وميبيش يدير seen بيش مايوجعهاش خاطرها لانه ميبيش يرد عليها
حس انه معش قادر على فراقها .. لكن يشد فى نفسه بالسيف..
بيش هالموقف معش يتكرر
________________
الصبح فاقت
قررت انه تمشي للورشه.. وياقاتل ويا مقتول??
غيرت ملابس النوم …
ولبست سروال تجين وبلوزة حمرا وجيبوطى اسود ..
وخشت دار امها .. فتحت دولابها وخدت منه وشاح
لانها قررت من هدا اللحظه تسمع كلامه
لبست الحجاب…ولعت السيارة ومشت
وقفت قدام الورشه ..
واتصلت بيه .. تليفونه مقفل
فتحت باب السيارة ونزلت…
وقفت قدام باب الورشه ونادت عليه
-مباهر : منسور
منصور قام راسه يديه كلهم رايحات سود من الزيوت ..وسرواله كله اسود
تفاجأ ..بوجودها فالورشه
وتفاجأ ..كيف شافها لابسه الحجاب
جاها يجرى …
عيونه حمر وهوا يعيط : اركبى السيارة اهو جايك
-مباهر: باهى باهى اهو مشيت
ومشت تجرى لسيارتها
غسل منصور يديه وغير تيشيرته وسرواله ومشالها لسيارتها
هيا عارفاته بعيط عليها
اول ماوصل جنب الروشن
شبحتله مباهر
وقالته: نحبك
منصور قعد يشبحلها وسكت ..ونسى كل العياط اللى كان ناوى يعيطه عليها بسبب جيتها للورشه
_________________________
زعما منصور يمشى الامور ويسامحها
واميرة شن ادبر لسراج
نورى واخيرا حصل رقم خولة
غدوة نكملو الحلقة
نحبكم❤