حطيتك في عيوني
??للكاتبه زهور جمال الدين ??
???الحلقه السادسة ?? ?
روح منصور وفتح الفيس
-منصور: مساء الورد
-مباهر: مساء الفل ?
-منصور: ستاحشتك
-مباهر: تتزوجنى
منصور شبح الرساله…… انصدم ??
-مباهر: خيرك سكتت
-منصور : تفاجئت بالسؤال
-مباهر: ممكن نشوفك غدوة فى اى مكان عام
-منصور: اكيد
-مباهر: خلاص نسأل صحباتى
وين اهدا مكان ممكن نتلاقو فيه ومافيشى مشاكل ..ونكلمك
-منصور: تم متفاهمين
-مباهر: باهى توة تصبح على خير
-منصور: خيرك مستعجلة
-مباهر: هوا هداكه .. ليلتك سعيدة
وسكرت الوايلس ..
مباهر تحشمت منه .. لانها مش حاجه عادية ان بنت تطلب من ولد يتزوجها ..
لان مرات يشك فيها موضوع ثانى ..مثلا انها مش بنت وتبى تلصق الموضوع فيه ..
مع انه منصور مفكرش هكى نهائيا
رقدت.. والصباح رباح
__________________
نفس الليله ..
سراج يتكلم فالتليفون
-اميرة : شنو صارحتها بفسخ الخطوبة
-سراج: ومنقالك نبى نفسخ منها انا
-اميرة: انت تلعب ببنات الناس ولا كيف.. انا مش بنت بسببك من مزال بياخدنى
-سراج: ااه توة فهمت.. قصدك هوا كمين .. قلتيلى خود راحتك ودير شن تبى بيش تلصقى روحك فيا
-اميرة : مش انت صاحب العمله
-سراج: انا قلتلك خاطب وقالتيلى عادى خود راحتك..
وانا ماوعدتكش بنسيب خطيبتى وناخدك
-اميرة: انا مش ساهل الضحك عليا يا سراج
-سراج : اعلى مافى خيلك اركبيه
وسكر تليفونه …
-اميرة: بااااهى يا سراج .. تو تشبح اللى اديره اميرة
_____________
ثانى يوم ..
الصبح الساعه 9
-اكرام : ماما خالتى خولة وحنينه وجدى امتى بيوصلو
-نورا : بيوصلو بعتالى الضهر
-اكرام : ستاحشتها خالتى ..الحمدلله انهم بيستقرو هنايا
-نورا : تى هما اللى قعدوهم فى بنغازى سنتين بس ..لين كملت خالتك الماجستير واهم رجعو ..
-اكرام: حتى فى وفاة بابا جو يومين بس وروحو
-نورا : ربي يجيبهم بالسلامه
وفتحت اكرام تليفونها كلمت مباهر
-مباهر: الو
-اكرام: متقولليليش مشفتيش الرساله
-مباهر : لا شفتها بعد الفجر.. لكن انا منقدرش انجيك عندى طلعه مهمه..فبعتلك الحاجات مع خوى نورى
-اكرام: يا همى نورى خوك يروح الساعه 3 من العمل
-مباهر: لا اكدت عليه ان قبل الساعه 12 يكونو عندك
-اكرام: باهى تم
________________
مباهر كلمت منصور الساعه 9 ونص …
-منصور شاف رقمها فرح : اهلين مباهر
-مباهر : اهلين منسور كيف الحال
-منصور: حالى باهى غير كان تنادينى منصور?
وقعدو يضحكو الزوز
-مباهر: انا سئلت وقالولى احسن مكان نتلاقو فى الينور متع حى الاندلس
وقعدت توصفله فالمكان ..ودارو موعدهم الساعه 11 تماما …
خشت مباهر دوشت
وطلعت سشورت شعرها ودارت مكياج خفيف… وطلعت الساعه 10 ونص ..مشت للموعد
ومنصور روح للحوش ودوش من صنت الزيوت ولبس وطلع مشى للموعد
وصل منصور هوا الاول … وخش للمطعم وقعد يراجى
وصلت مباهر الساعه 11 وعشرة ..كلماته قاللها انه هوا فالدور الثانى ..
ركبت مباهر لابسه نضاراتها …
وفى خاطرها مصممه انها مش حتعترض على اى شرط حيشرطه …
لانها فكرت انه عام تتحمله زى ما تتحمله وكل حد بيمشى فى حاله
لكن نست ان مهما دبر العبد .. تدبير الله هوا اللى بيصير …
المهم
خشت للمطعم
الدورالاول معبى بالناس
..ركبت للدور الثانى
فاضى شوى
لانه صبح فيه طاولة وحدة بس فيه بنت وشاب
وطاولة ثانية مقعمز فيها منصور
لما شافها منصور وقف ..
حياها وفرح بيها ..وقعمزت هيا عالكرسى
حولت نضاراتها
وحطتهم عالطاولة
-مباهر: عطلت عليك ..
-منصور: عطلتى هلبااااا.. رانى قريب نوصل للاربعين
-مباهر : لااا ماشالله مازلت شباب
-منصور بدون مقدمات : ليش طلبتى منى الزواج
-مباهر: لانى حسيت باهتمامك بيا
-منصور: حسيتى باهتمامى بس
مباهر واطت راسها لان تعبيرات عيونه ادل على حاجات اكبر من احاسيسها
وقف الولد اللى يشتغل فالمطعم: شن تحبو تاخدو
-منصور بابتسامه : شن تبي مباهر
-مباهر : نسكافيه و كريب بس متكترش الشوكلاته
-الشاب : اوكى ..وحضرتك
-منصور: جيبلى قهوة مزبوطة
الشاب كتب الطلبات ومشى
-منصور : شن كنا نقولو
-مباهر : نسيت
-منصور: كنا نقولوحسيتى باهتمامى بس .. وماحسيتيش بانك ملكتينى
-مباهر: خودنى بالشوى عليا..انا منعرفش ندوى هكى زيك
-قص عليها منصور: نحبك
-مباهر قريب داخت: منسووور
-منصور: ايه نحبك .. وكل الناس لاحظت انى نحب .. الا انتى
-مباهر: احنا جايين نتكلمو فى موضوع ثانى
-منصور : ماهو هوا نفس الموضوع ولا تحسابي روحك انتى بس جريئة
مباهر فرحانه وسعيدة بكل كلمه يقول فيها ..
لكن ماتقدرش ترد عليه وتبادله نفس الكلمات
-منصور بهدوء : انا مش حنضغط عليك.. بالرغم حاس ان هالشى متبادل بينا
-مباهر: باهى كيف تبى توة
-منصور: نبيك لكن الظرف فى حكم المستحيل
-مباهر: كيف
-منصور: اولا معنديش وين نسكن
على اساس يطلعو خوتى ونسكنو انا وخوى فمكانهم ..
لكن هما مزال ماداروش حياش
-مباهر: انأجرو
-منصور: وبترضى انتى..ولو انتى رضيتى اهلك حيرضو
-مباهر: والله انا منبيش نبين نفسى انى رامية روحى عليك
-منصور : ليش تقولى هكى
-مباهر: حسيتك ادير فى سبل
-منصور : لا والله والايجار مش عيب ..لكن قلت ممكن اهلك يعترضو
-مباهر: واهلى اى حاجه موافقه عليها انا هما حيوافقو عليها طول
-منصور : لو تنحل مشكلة السكن معناها مفيش اى مشكله
-مباهر: لكن انا عندى شروط
-منصور: وحتى انا عندى شروط
_________________________
الساعه 11 ونص
سراج قاعد متكى فمكانه كيف فايق من النوم
يكلم فى ايمان .. واميرة تخش عليه انتظار
-ايمان: من بكرى وانا نسمع فالانتظار يخش على تليفونك ..منو يكلم فيك
-سراج: هادو صحابى يعاسكو فيا زابطينى انتظار معناها نكلم فيك
ايمان قعدت تضحك ..
وكملو المكالمه وقعدو يهدرزو
اميرة مغتاضه .. وقريب تموت انه لعب بيها
“هوا يانارى ملعبش بيها وكل شى كان بارادتها ..وهوا موعدها بشى ..غير احنا البنات كانا حطينا حد فى راسنا خلاص ”
قامت اميرة التليفون واتصلت
-اميرة: اهلين هنادى
-هنادى: هلا ميرو كيف الحال
-اميرة: تمام الحمدلله .. نبيك فى موضوع ضرورى ..مسالة حياة او موت
-هنادى : تم العشيه نجيك
_____________________
منصور : خلاص قولى شروطك وانا نقول شروطى ..
-مباهر: اول شرط تحترمنى وتعاملنى كويس
-منصور: اول شرط تصونى شرفى وتخلصى ليا ..
-مباهر: بس لو متفاهمناش نطلقو منغير شوشرة
-منصور: اووف شن جاب سيرة الموضوع هدا توة .. احنا الطلاق معندناش فى عيلتنا راهو
-مباهر: لااااا اللى اوله شرط اخره سلامه ..
لو حسيت روحى مش مرتاحه ومش سعيدة حنطلب الطلاق وانت ماتعبنيش ولا تبهدلنى
-منصور: نقولك مستحيل الشى هدا يصير ومع هدا حنوعدك .. حاضر اللى تبيه انتى يصير
-مباهر: ولو درنا صغار حيقعدو معاى فى جميع الاحوال
-منصور: حسيتك متشائمه ولا .. معقولة هادى شروطك
-مباهر: انا الافضل عارفاته بيصير وشايفاته فعيونك توة ..
لكن انا نبى نضمن حياتى لو صار الاسوأ
-منصور: مباهر انا نحبك ..واللى يحب مستحيل يرضا السو للى يحبه
مباهر تلخبطت ومعرفتش ترد عليه
-مباهر: منصور اناااا
-منصور: منبيكش تقولى شى …
اسمعى يابنت الناس انا كان ماحسيت انك تحبينى زى منحبك صعب نرتبطو
-مباهر: منسور بالشوى عليا انت عمرك ما قلتلى كلام زى هدا لما نحكو مع بعض
-منصور: لكن اكيدة انك حسيتى بيه
مباهر مواطيه راسها لوطا وبتموت مالحشمه وحايرة فى روحها خيرها هكى متحشمه مع ان نوعها عينها صحيحه
مد منصور يده على وجهها وقامه فوق ..
-منصور: تصدقى انا توة تاكدت انك عمرك مادرتى علاقه
-مباهر: والله ماعمرى جربت
-منصور: نحبك
هما الزوز عايشين فى عالم ثانى من النضرات لبعضهم
وكمية الاحاسيس اللى عاشوها فاللحظات هادى …
-منصور: مباهر خلينا نتعرفو على بعضنا اكثر .. ونعرفو اطباع بعض …
منبيكش تاخدى خطوة وتندمى عليها
-مباهر : اهو احنا فيها احكيلى على طبعك
وقعد منصور يحكى لمباهر على طبعه انه صعب …
-منصور: نبيك تتحجى
-مباهر: موافقه
-منصور: تنقصى طلوع ومشاوير
-مباهر: موافقه
-منصور: واهم شرط عندى انك تحبى اهلى ..وبوى وامى خط احمر
-مباهر: بوك وامك نحطهم فوق راسى
شبحتله وابتسمت : وانت وين بتحطنى
-منصور: انا حطيتك فعيونى وسكرت عليهم مستحيل انخليك اطيحى ولا تطلعى منهم
______________________
الساعه 12 الا ربع
وصل نورى قدام حوش اكرام
لقى الباب الخارجى مفتوح .. فتحه وخش
لقى البواب متعهم واقف فى نهايه الجنان .. نادى عليه ..
عطاه كيسه وقاله اعطيها لاكرام ..وخش البواب للحوش ينادى على اكرام
قدام باب الحوش وقفت سيارة تاكسى فيها جد وجدة اكرام وخالتها خولة
نزل سواق التاكسى فتح الكوفينو ونزل الشنط …
ولفت خولة وقفت قدام الكوفينو
-خولة: الشناطى الصغار شخصيات وتو انزلهم انا ..
بس بالله تلقى واحد فالباب ناديهولى ” قصدها عالبواب”
مشى السواق قدام الباب تلاقى هوا ونورى كيف طالع ..قاله الانسه تبيك
مشى نورى قدام الكوفينو ..لقى بنت زى القمر حاطه راسه فى شنطت يدها ترا شن ادور..
ومنغير ماتتلفتله اشرتله بيدها ..دخل الشنط
نورى استغرب من تصرفها وضحك ..زبطها غالطه ..فتح سكه الشناطى ودخلهم للحوش ..
وطلع القاها قدام السيارة
-نورى: اى اوامر ثانية
-خولة: اوامر شنو
-نورى يضحك : مش قلتيلى دخل الشنط ..هوينا دخلتهم
خولة تشبحله ومستغربه ..شاب شخصيه وهدوء وجمال
وبعدين فاقت على نفسها ..
-خولة : اسفه سامحنى
-نورى : عادى حصل خير
عجباته البنت ?ويبي يطول فالدوة معرفش كيف
-نورى : الباين كيف مروحين من السفر
-خولة : كيف وصلنا من بنغازى
-نورى: وبنغازى تبى الشنط هادى كلها
-خولة : كنا مقيمين وتوة روحنا نهائى
-نورى: اهاا حمدالله على سلامتكم
-خولة : الله يسلمك
-نورى : عموما انشالله معرفت خير ونورتو طرابلس
-خولة : معليش سامحنى بس طلب صغير
-نورى فرح: اؤمرى
-خولة : ممكن تنزل معاى بوى من السيارة .. لانه تعب من السفر ورجليه انتفخو
-نورى : حاضر من عيونى
فتحت خوله باب السواق من قدام
ومدت يدها لبوها بيش ينزل ..
وشداته هيا من جهه ونورى من جهه دخلوه للجنان وقعمزوه عالكرسى
وطلعت خولة نزلت امها ..
امها شادة صحتها شوى وخشت بيها للجنان وقعمزتها عالكرسى وطلعت
-خولة: صحيت الله يبارك فيك
-نورى يشبحلها باعجاب: ربي يبارك فيك انتى ويعطيك خيرهم وبرهم
-خولة: مع السلامه
-نورى: مع السلامه
ومشى نورى ركب فالسيارة ولعها وطلع ..
ووجه خولة وابتسامتها ميبيش يفارق خياله
وقعد يلوم فى نفسه لا سالها هيا منو ..
ولا شن اسمها .. ولا شن تقرب لاكرام ..
معرفش عليها ولا حاجه
______________
وفاتت ايام .. مباهر ومنصور شادينها مكالمات وبس
-منصور: لامتى بتقعدى هكى
-مباهر : كيف
-منصور: كل مانقولك نحبك تسكتى
مباهر كل مشاعرها متحركه مع منصور.. لكن نوعها متحكيش اللى فخاطرها
ومشكلتها ان دايرة موضوع الزواج لعبه .. وتحاول قدر الامكان ان رجلها متزلقش وتحبه
وفى يوم ..
منصور جاته اخته سلمى وقالتله ان السوسه توجع فيها ..
وقالولها لازم تبخر سنها على زعتر فى الميه
فطلبت منه انه يشد الفوطه اللى بديرها بيش ماتهربش من البخار..
لانها لازم تحط الفوطه على راسها وتغم بيها السزوا اللى عالنار
حطت سلمى راسها مقابل البخار وشد منصور الفوطه
البخار كان حار على وجهها ومنصور شادها بالقوة بيش ماتهربش ..وبدو يضحكو
ايده ضغطت عالتليفون منغير ميحس ..
وانضرب اخر اتصال بالخطا .. وكان رقم مباهر
مباهر مقعمزة فالصاله ..شرين تليفونها لقاته منصور المتصل ردت طول
-مباهر: الوو
مفيش اجابه .. تسمع غير فالضحك ..
منصور ومعاه وحدة … وتسمع فى كلمت يا منصور لا ..يا منصور حول وجعنى معش تحملت ..
ومنصور يقوللها تحملى شوية بس اهو كملنا
??????
سكرت مباهر الخط .. قريب اغمى عليها .. قريب داخت ..
منو اللى مع منصور .. وشن يديرو …
ركبت فيها نار.. وركبت لدارها تجرى.. وبدت
تبكى ..وتبكى ..
مقتنعه ان الموضوع فيه خونه ..ومحرها الخونه
خشت للفيس وللفايبر ..دارتله حضر من كل مكان …
___________________
طلع منصور للورشه ..وقبل ميخش كلم مباهر كيف مابدى متعود
يتصل بمباهر يطلعله مشغول .. يعاودلها مشغول
بدى يبعت فى رسايل ..
“مباهر ردى تليفونك مشغول من بكرى ”
مفيش رد منها …
زبطت انه دايرة رقمه عالمشغول
فتح الفيس لقاها دايرتله حضر فالماسنجر
الفايبر نفس الشى
منصور قريب يطير قريب يهبل
مباهر فى عالم ثانى .. تبكى ومكتئبة ..
حست انها تحبه وانها تغير عليه..
والغيرة موووت للبنت لما تسمع حبيبها مع وحدة ثانية
منصور يبعتلها فى رسايل
” مباهر حبيبي ردى خيرك شن فى”
وهيا تقرا فالرسايل وتبكى
حتى خدمته سيبها ومعنداش فيها نيه ..
روح للحوش .. خدى رقم امه ..اتصل برقمها مفيش رد منها …
كيف يدير مسكين .. معش زبط
ولع سيارته ومشى وقف قدام حوشها
قعد واقف بعيد …
عرف ان وقفته غلط ..ولغ سيارته ومشى
ادكر سرور صاحبتها ..
وقف جهه حوش سرور ..يراقب فالباب يراجى فيها تطلع …
وبالفعل نص ساعه ..وطلعت سرور
نزل منصور من سيارته ومشالها ..
كلمها .. استغربت هيا
-منصور: معليش اختى ممكن شوى من وقتك
-سرور: تفضل من حضرتك
-منصور: انا ندور فى مباهر..مسكرة تليفونها ..وانا نبيها ضرورى
-سرور: ومن حضرتك وشن تبى من مباهر
-منصور: انتى غير قوليلها منصور يدور فيك …
ونعطيك رقمى وراس وخيتى طمنينى عليها وخيرها شن صاير معاها ..
سرور حست انه موضوع علاقه وحب الولد متشحتف ووجه اسود ..
لكن قعدت حايرة ان مباهر مديرش فى علاقات ..
سخفها عطاته رقمها ع اساس انها تشوف مباهر وترد عليه
-سرور: حاضر تو نكلمك ونقولك
ولعت سرور سيارتها ومشت لحوش مباهر
ومنصور فى جرتها حتى هوا وقف فى شارع مباهر.. وقلبه يغلى عليها
فتحت وردة الباب سلمت على سرور .. وقالتلها مباهر فى دارها .. ركبت سرور لدار مباهر
طقت الباب
-مباهر: قلتلك منبيش نتغدا يا ماما
-سرور: افتحى انا سرور
فتحت مباهر الباب .. واضح وجهها انها باكيه…
خشو للدار ..وقفت مباهر عالمراية تشبح فى وجهها متبيش يبان عليها شى
وقفت وراها سرور وحطت يدها على كتفها
-سرور: مدامك تحبى ليش ادسى
-مباهر: انتى على شنو تحكى يا سرور
-سرور: منصور وقف عليا..الولد بيهبل يبي يعرف كانا صاير معاك حاجه
تلفتت مباهر لسرور حضنتها وقعدت تبكى ..
-مباهر: يخون يا سرور ياريتنى ماحبيته
-مباهر: ياريتنى ماحبيته .. الحب صعب ..والخونه اصعب
-سرور: لقيتيه يخون
-مباهر: سمعته بودانى
-سرور: بس مش باين عليه شخصية ..ومايبانش فرخ
-مباهر: كلهم هكى يورو فى روحهم شخصية وطيبيين .. لكن فالحقيقه هما عبارة عن ادياب
-سرور: بس هوا يراجى منى فى اتصال على احر من الجمر..
واقف لوطا فى شارعكم هوا توة
-مباهر: متكلميشى خليه هكى
-سرور: هوا مشغول عليك مفكر ان صاير معاك موضوع ..خلينى بس نطمنه ان مفيك شى
-مباهر: قلتلك لا
شرين تليفون سرور .. منصور معش جاه صبر يراجى
-سرور: هوا يتصل وراس رورو خلينى نرد عليه
سكتت مباهر ورقدت على سريرها وحطت المخدة على وجهها
ردت سرور على منصور ..
-منصور: وين مباهر
-سرور: هيا كويسة وماصاير معاها شى
-منصور: عطينى نكلمها وراس وخيتى
تلفتت سرور لمباهر: يبي يكلمك
اشرتلها مباهر ان لااا متبيش ترد عليه
-سرور: توة متقدرش تتكلم هيا.. وانا مضطرة نسكر المكالمه
-منصور: وراس وخيتى متسكرى الخط وتخلينى هكى فى دوامه ..
افتحى المايك نبى نكلمها
وفتحت سرور المايك وقرباته من مباهر
بدى منصور يتكلم .. مباهر.. حبيبي
مباهر سمعت صوته وبدت تبكى ..
-منصور: مباهر ردى عليا رانى فى نار..شن فى بس قوليلى شن صار
خدت مباهر التليفون من يد سرور وسكرت المايك وحطت التليفون فودنها
-منصور: نحبك ..ومنقدرش نسمع صوت دموعك
وهيا تبكى
-منصور: مديريش هكى وانتى عارفه انتى شنو بالنسبه ليا.. غير قوليلى بس شنو اللى واجعك ..احكيلى
انفجرت مباهر بالبكى وبدت تعيط عليه
-مباهر: لانى سمعتك وانت تخون .. سمعت صوت البنت اللى كانت معاك .. لو مهما تحلف انا سمعت بودانى
وسكرت الخط
الحكايه تشكبنت ..
ومن حفر حفرة لاخيه وقع فيها
مباهر حفرت لمنصور بيش يحبها وتستغله وتتزوجه وتحمل منه ..
لكن هيا طاحت فى نفس الحفرة ..وممكن بدت هيا تحبه اكثر ماهوا يحبها
__________________
زعما شن بيصير فيهم..
و نورى? حب من اول نضرة ..كيف بيجيب اسمها وشن تكون لاكرام
واميرة شنو اللى قاعدة ادبر فيه لسراج
دهشت ???
نحبكم ❤