حطيتك في عيوني
#حطيتك_فعيوني
??للكاتبه زهور جمال الدين ??
???الحلقه الثالثة?? ?
مباهر: منسور نوض..منسور
نوض وصلنى كيف قادر ترقد انا صنت الزيوت قلبتلى راسى
-منصور ناض قعمز: اولا انا قلتلك اسمى منصور مش منسور.. ثانيا انا مرقدتش غمضه لتوة
ثالثا وهدا الاهم ..الزيوت نشم فيه رواح متع ماركه
-مباهر: مابعدها اللى بتاخدك
ومشت وهيا اتمتم: قال يا غاليه قال.. تو ادوخ الغاليه من صنتك كل ليلة
ركبت فالسيارة ..وناض منصور غسل وجهه بالمية
وفتح الباب وقعمز على طرف الكرسى وولع السيارة
وشبحلها : تعرفى انك هكى احلى بالف مرة منغير مكياج
-مباهر: وهدا شن نعتبره? انت تعاكس فيا مثلا?
-منصور: وعلاش بناشبك يا حسرة
-مباهر: وخيرنى شن ناقصنى ?
-منصور: مش انتى النوع اللى يعجبنى .. فمتصدقيش نفسك ..
“مباهر صارلها زى اللى يحساب روحه دار قول ..فرح .. قاله الحكم تسلل والقول مينحسبش??”
-مباهر: والله .. وكيف البنت اللى تعجب حضرت جنابك
-منصور: تعجبنى البنت المحتشمه الخجولة المتحجبة..
لكن اللى عينها صحيحه متعجبنيش
اعتبرت مباهر ان الكلام عليها… ووجعها الكلام
سكتو الزوز… السيارة سخنت ..
نزل منصور فتح الباب متعها
وقاللها حولى شوى خلى انزل الكرسى بيش ميشوفك حد ..
بعد نطلعو من الورشه ونبعدو شوى قيميه
ساوى منصور الكرسى ومشى فتح السرانتى متع
الورشة وطلع السيارة وسكر السرانتى ومشى
__________________________
وصلو قدام حوش سرور
اتصلت مباهر بسرور .. بيش تفتحلها الباب
-سرور: اصبري شوى اهو نازلة
سكرت الخط
تلفتت مباهر ل منصور: عموما بغض النضر عن رائيك فيا … شكرا على كل شى
-منصور متلفت للطريق: عفوا هدا واجبى ..
وتلفتلها ..نوصيك حاجه وحدة بس
ردى بالك تحكى اللى صار هدا لحد فالدنيا.. راهو بياتك معاى فالورشة اطيح فيها رقاب..
ولو مهما حلفتى ميصدقك حد انك طلعتى من الورشه شريفه
مباهر قعدت تشبحله حست ان الكلام اكبر من استيعابها .. لكن فهمت انه لاااااازم يقعد سر
-مباهر : صح كلامك هدا سر بينى وبينك
-منصور : بينى وبينك رسول الله ..ومن اليوم لا عاد نبى نعرفك ولا عاد نبيك تعرفينى..
وعليك امان الله فاللى صار مايطلع منى
-مباهر: نسالك اخر سؤال.. انت بلحقه تتكلم بكرى..
لما قلتلى مفروض تشد عصات مكنسه وتضربنى
-منصور: لا انا قلتلك نكسرها عليك..وكنت نتكلم بجد
انفتح باب الحوش متع سرور ..
نزلت مباهر من السيارة .. وخشت للباب ..
ولع منصور سيارته ومشى ..
____________________
خشت مباهر للحوش …
اضبطتها سرور وقعدو يبكو الزوز
مباهر من الليله اللى قبلها وهيا كاتمه قهرتها فى قلبها عالموقف اللى صار
لما شافت سرور خلاص انهارت وبدت تبكى ..
شدتها سرور من يدها وركبتها طول للدور الثانى خايفه خوها خالد يسمعهم
ركبو فوق
خشو لدار سرور
وبدو يبكو الزوز .. مباهر ترعش باللى فيها ..
لكن لما خشت حوش سرور جى قدامها شريط
احداث الليله الماضيه كلها .. وقداش كانت ليله قاسيه عليها
شربتها سرور امية وغسلتلها وجهها
ونوضتها غيرت حوايجها ولبست الحوايج اللى جت فيهم العشيه
-سرور: مباهر انتى وخيتى .. ووالله ماقصدى نسيبك ونمشى
-مباهر تبكى : بالعكس درتو عين العقل
رقدت مباهر فى سرير سرور ..
وقعدت تبكى بحرارة .. متخيلة لو الموضوع وصل خوتها كيف بيصير فيها ..
وبعتالى ادكرت? …
-مباهر : سرور ترا مديلى شنطى بنفتح الفيس نشوف غبارة كان ماحد صورنا منغير مانشوفوه
-سرور: غير احكيلى كيف صار معاك قبل
-مباهر: ماصار شى قعد نبكيلهم وقلتلهم خوتى ميندروش عليا انى فالحفله ..
شوى ضابط صاحب خير كتب محضر بالكدب زعميتا نورى جى استلمنى ..
وجابونى بسيارتهم قدام حوشكم انا قعد ننعت فيهم
-سرور: الحمد الله ربي لطف وماشافك حد يعرفك
-مباهر : الحمد لله .. غير هاتى الشنطه مناخد تليفونى
جابت سرورالشنطه وعطتهالها …
فتحت مباهر الشنطه ملقتش تليفونها ..
-مباهر: حيه عليا شوره التليفون طاح منى
-سرور : فتشى كويس
-مباهر : فتشت مهناش…
وادكرت منصور.. عرفت ان التليفون طاح فى سيارته …
خدت تليفون سرور واتصلت برقمها …
ونست انها دايرة تليفونها سايلنت
_____________________
منصور وصل قدام حوشهم ..
نزل من السيارة وسكرها ..
وبدى تليفون مباهر يشرين ماشافاش وراه ..ولانه سايلنت مش داير صوت
خش من الباب لقى خوه مراد كيف يوتى فى روحه بيطلع للعمل ..صبح عليه..
ولقاه داير نسكافيه وكيكه ..
فطر معاه …
وطلع مراد من الحوش ..
وهوا طالع شاف حاجه اضوى فى سيارة منصور
رجع فتح مراد باب الحوش وخش
-مراد: منصور فى حاجه اضوى فى سيارتك
طلع منصور للسارع وفتح السيارة لقى تليفون طايح ويضوى بس ..منغير تشريين ..
عرفه تليفون مباهر ..
شاف المتصل لقاه سرور ..
وادكر انها قالتله اسم صاحبتها سرور ..
كيف بيرد تسكرت المكالمه ..
حط التليفون فى جيبه وسكر السيارة وخش للحوش
خش للمربوعه لانه يرقد فيها هوا وخوه مراد..
لقى مكان مراد قاعد زى ماهوا .. من التعب رقد فيه
منغير مايغير حوايجه ..
وحط تليفونه فالشحن .. وطلع تليفون مباهر من جيبه وحطه جنبه
ضوى التليفون مرة ثانيه ..وصلت رساله ..انكتبت على سطح الشاشه ..
“رد انا مباهر ”
فى خاطره قعد حاير …من مباهر.. وشن الاسم الغريب هدا اول مرة يسمعه
ادكر انه ماسألهاش على اسمها لهده اللحظه ..
حتى لما دار التعهد مشى عطى بيانات نورى لان الولد معرفه ..
وماشافش المحضر ولا شاف المكتوب فيه …
وحتى لما كلم صاحبه عليها فالمكافحه اشرله عليها والولد زبط اسمها
شرين التليفون مرة ثانية .. رقم سرور
رد عليها …
طلعت مباهر للممر لانها متبيش سرور تسمعها..لانه وصاها انه سر
-مباهر : الو منسور انا مباهر
-منصور: عفوا من مباهر
-مباهر: خيرك العفو فيسع نسيتنى انا اللى كنت معاك توة ووصلتنى لحوش سرور
-منصور : تعرفى انى توة بس لاحظت انى مسالتكش على اسمك
-مباهر: ياحنه ليك الشرف واسمى مباهر
منصورحس ان المكالمه بتنقلب لبصارة فمحبش يخش معاها فى حوارات بصارة ..
-منصور : التليفون اهو عندى ..تعالى للورشه خودية
مباهر: تبى تتخلص منى و تقولى رسول الله بينى وبينك ?..
لكن ربي قياد احوال العفاريت ??
واهو حصلت فيا مرة ثانية
-منصور يبيش يطول معاها: ديري رايك تبى نجيبهولك او تبى انتى تجى تاخديه باهى …سلام
-مباهر مستغربه من رده : سلام
وتغطى منصور ورقد
__________________
الساعه 8 صباحا
-مباهر: بنقعد عندك اليوم
-سرور : اقعدى عادى .. خير ماتلاحظك امك وجهك رايح منفخ حالة
وطقطق الباب بالقوة انخلعو الزوز ونطت سرور فتحت الباب
-خالد : اتصلت بيا امى توة .. راجل خالتى توفا
-سرور: وووه يانارى على اكرام
-مباهر: الله يرحمه .. يانااارى
-خالد : مباهر انتى هنايا ..وسلم عليها
“خالد خو سرور يحبها وهيا مش عاطيته وجه”
-سرور: باهى كيف يصير توة
-خالد : انا بنمشى توة وانتى كان بتمشى معاى هيا ..
وتلفت لمباهر : ولو تبى تمشى معانا حتى مباهر… مش اكرام صاحبتك ولا
-مباهر: لا انا حطونى فالحوش ..تو نمشى انا وماما للجنازة
-خالد : باهى هيا انزلو توة
بعد ماطلع خالد ..
مباهر تلفتت لسرور وقالتلها خلى حوايج الحفله
وحاجاتى كلهم هنايا منقدرش انروح بيهم توة
ونزلو ركبو مع خالد وفاتو على حوش مباهر هيا الاولى بيش يحطوها ويمشو لحوش خالتهم ..
فالطريق مباهر كلمت امها ..نوضتها من النوم و قالتها افتحيلى الباب
وصلو قدام الحوش…
فتحت وردة الباب ..
لقت وجه مباهر منفخ بالبكى نخلعت
-وردة: خيرك بنيتى ..خيره وجهك منفخ هكى
-مباهر: بو اكرام صاحبتى ..راجل خالت سرور توفا .. ووجعنى الحق بكيت عليه
وخشو للجنان ..
لقت خوها نورى يسخن في سيارته…
شافها وسالها خيرك ..ردت عليه بنفس الكلام لكن نورى مقتنعش بكلامها …
ركبت مباهر لدارها …
نورى خلى سيارته تسخن و لحقها ..
طقطق على دارها
-مباهر : خشى ماما
-فتح نورى الباب وخش: انا نورى
-مباهر : اهلين نورى خش تفضل
وقف قدام مباهر وساكت
مباهر تلخبطت
-نورى: مباهر انا بوك مش خوك بس ولا
-مباهر عيونها دمعو: ايه انت فى مكان بابا
-نورى: معناها بنتى بتقولى الحق..
خيره ووجهك اسود ومنفخ وباكية عمرى ماشفتك بالمنضر هدا
وبدت مباهر تبكى ..تقولى نافورة وفتحتيها
-نورى حضنها: احكى مباهر شن فى
هيا عندها نية تحكيله واللى يصير يصير
لكن ادكرت انه منصور وصاها .. وسكتت
-مباهر: والله وجعنى بو اكرام
-نورى: باهى مشيها توة وجعك بو اكرام..
لكن لما تحكى حتلقينى نسمعلك ..
انا خوك وبوك .. نمضغك ومانرميكش ..ادكريها الكلمه هادى كووويس
وطلع وسكر الباب ..
_________________
ومشت مباهر وامها حضرو جنازة بو اكرام ..
وقعدو يصبرو فيها ..اكرام قريب تهبل
وام اكرام مش باين عليها انها متأثرة هلبا ..
“ام اكرام..اسمها نورا تشتغل محامية ..
صغيرة م 75..عندها اكرام م 95 وزو اولاد م 96و 97..
مكنتش متفاهمه مع راجلها بكل ..وتوة الله يرحمه”
ولادها كانو مسافرين مع الكشافه لمدينه غدامس .. ولما قالولهم على بوهم روحو طول
وقعدت مباهر لليل مع صاحبتها ..وروحت
الساعه 12 اتصلت برقمها من رقم امها ..
شرين مرتين وما حد رد
المرة الثالثه رد منصور..
-مباهر: الو خيرك متردش
-منصور: كنت مع جماعتى ..وتوة بس ركبت للسيارة وشفت التليفون يضوى فيها
-مباهر: باهى نبى تليفونى
-منصور : تعالى للورشه غدوة خوديه
-مباهر: لا انا منقدرش نمشى قدام الورشه جيبهولى انت
-منصور: وانا منقدرش نجيك للحوش
-مباهر: ومن قالك تعالالى للحوش.. نديرو مكان نتلاقو فيه ومدهولى وبرة على حالك
-منصور: باهى وين تبى
-مباهر: تلقانى فى شارع ابن بطوطه فالسياحيه
-منصور : تم مع الساعه 12 الضهر تلقينى انراجى فيك غادى
-مباهر: اتفقنا
-منصور: باهى تصبحى على خير
وسكر الخط ??
مباهر تفاجئت بتسكير الخط ..
ممكن مش متعودة ان ولد هوا اللى ينهى المكالمه معاها..
ديما هيا اللى تتعدر وتنهى فالمكالمات
-مباهر متفاجئة: مصحه سكر فى وجهى قليل الادب
________________
ثانى يوم الضهر..
تكمت مباهر ولبست على سنجت عشرة …وخدت تليفون امها تسبلت ان تليفونها مفيشى شحن .. وطلعت
وصلت طريق غوط الشعال خدت ايمين بيش تخش لشارع ابن بطوطه ..
درست سيارتها ..ملقتش منصور..
منصور عطله زبون يبي سيارته قعد يكمله فيها بسرعه ..
وغسل يديه وبدل وركب سيارته مشى بيش يعطيها تليفونها
مباهر مقعمزة فى سيارتها ومدرسه عاليمين فاتحه روشن السيارة و تراجى فيه يوصل ..
قامت تليفون امها واتصلت بيه .. ماباش يرد لان لقى رقم امها هوا المتصل خاف يديرلها مشكله
فزبطاته خاف يرد على رقم امها ..فقالت نبعتله رساله انى مباهر …
نزلت راسها تكتب فى رساله
جى شاب وقف على روشن سيارتها..
-الشاب: الحلو فى من يراجى
حطت مباهر يدها على زر تسكير الروشن ماباش يركب لانه السيارة مطفيه
تلفتت مباهر جهت مكان المفتاح تبى تولع السيارة …
وتسمع خبطه …
قامت راسها
لقت الخبطه جت فى ضهر الشاب
لما تلفت لقى منصور وراه عطاه ضربه على ضهره
-الشاب: انت شكون
-منصور: انا ولد جيرانها وزى خوها ..تفضل شن تبى من اختى
مد يده الشاب عطى لمنصور بونية على وجهه ..
ومد منصور يده ورد البونيه لوجه الشاب
صارت عركه وعياط والشاب ومنصور شدو فرقابى بعضهم
تلفت منصور لمباهر
وكلمها بالعياط : مايجى من وراك الا المشاكل ..ولعى سيارتك وروحى ..توووة
مباهر رعشت باللى فيها من عياطه ولعت سيارتها وطلعت جرى روحت
وخلت منصور وراها خاش فى دعكه وضرب
والتليفون قعد عنده وماخدتاش ثانى
____________________
يتبع ???