حطيتك في عيوني

#حطيتك_فعيوني

??للكاتبه زهور جمال الدين ??

???الحلقه الخامسة ?? ?

فتحت تليفونها .. خشت للفيس

لقت ادد .. فتحت بتشوف شكون

لقت مكتوب بالانجلش .. منصور صالح ..

تفاجئت .. انصدمت

خشت عالاكاونت .. لقت صورت منصور

وقف على طولها : حيه اكاونت منسور

وقبلت الاضافه طول

منصور حتى هوا مقعمز عالفيس

جاه اشعار ان مباهر قبلت الاضافه

خش على صفحتها وبعتلها رساله

“مباهر”

ويشبح فها تكتب ..

قلبه بدى يدق .. ويراجى يبي يقرا شن كتبت

______________________

سراج بعد مطلع ركب سيارته ..

شرين تليفونه ..

-سراج: اهلين اميرة

-اميرة : اهلين حبى وين مش باين

-سراج : اهو قاعد غير مشغول شوى حبى

-اميرة : ستاحشتك راهو

-سراج: وانا بنموت ونشوفك

-اميرة : حتى انا ستاحشتك هلبا ..غدوة دور ماما بتبات مع اميمه ..شنو نتلاقو ولا كيف

-سراج: لا لا فكينا من حوشكم.. المرة اللى فاتت انحبست فى دارك قريب للفجر بش قدرت نهرب .. بوك قعد راقد فالصاله

-اميرة: اللى يسمعك يقول بايت مخلوع..وانت بايت معاى ليله عسل

خشت ايمان خطيبته انتظار

-سراج : سكرى توة اميرة ..ايمان خطيبتى خاشه انتظار

-اميرة تضحك : باهى سلملى عليها

فتح سراج مكالمه ايمان

-سراج: ايوة حبى

-ايمان: وينك اليوم حبيبى مش بتجى للجامعه

-سراج: والله قعدت راقد والتليفون ماشرينش الفياق وتعرفينى نومى ثقيل

-ايمان: ماهو من كثر ماتفكر فيا ومستاحشنى

-سراج: والله نحبك ..لكن الله غالب

-ايمان تتكلم بحزن : سراج راهو قلت اهتمامك بيا بتخليك تخسرنى

-سراج يعيط: تى خيرك ترعشى فى امى .. ادوي فى حاجه

-ايمان: وصلنى كلام ولو تاكدت منه اقسم بالله ماعاد شايفلى وجه

-سراج يعيط: تى هادو بنات الحرام يلعبو بيك.. ايمان حبيبتى متخليش الشك يخش بيناتنا

-ايمان متكنطيه : باهى باى توة

وسكرت الخط ..وخلت سراج مخلوع

“سراج ديما عنده مغامرات مع بنات ويخون فيها ..و هيا برغم جمالها والف من يتمنى ترد عليه ومع هدا تكلم فيه من ثانى ثانوى وعمرها ما خاناته ..على قد ماجربها لقاها محترمه وبنت ناس ..فخطبها بيش مضيعش منه ”

___________________

منصور مقعمز عالفيس ويشوف فيها تكتب …

وصلت الرساله

مكتوب ” من معاى ”

-منصور كتبلها: انا منسور… وكتبتلك منسور بيش تزبطينى

-مباهر: اهلين منصور شنو اخبارك

“طبعا هيا تنطق فيه منسور..لكن تكتب فى اسمه منصور ??

-منصور: الحمدلله شنو اخبارك انتى

-مباهر: كيف عرفت بروفايلى

-منصور: نقلب فالفيس جى اسمك قدامى اصدقاء تريد ان تضيفهم

“الكداب وهوا يديه قريب دابو وهوا يدور عليها ?

وسالته عالكدمات اللى فى وجهه فقاللها انهم اختفو

وقعدو يهدرزو طول الليل ماحسوش بالوقت كيف فات

مباهر نعست ..شبحت للوقت لقاته الساعه 3 الفجر

-مباهر: سامحنى سهرتك

-منصور: تعرفى محسيتش بالوقت معاك

-مباهر: باهى نخليك ترقد غدوة اكيد عندك خدمه

-منصور: قبل منسكرو نبى نقولك حاجه لانى متعودتش نكدب

مباهر: قول

-منصور: تبى الحق انا اللى دورت على صفحتك فالفيس مش هيا طلعت قدامى

-مباهر:??? وعلاش ادور على صفحتى

-منصور: الحق نبى انتأسفلك

-مباهر: على شنو

-منصور: عالكلام اللى قلتهولك اخر مرة تلاقينا

-مباهر: لا عادى مش مشكله حصل خير

-منصور : قولى انك سامحتينى

-مباهر : والله مسامحتك من كل قلبى

-منصور : يسلم قلبك

-مباهر: قاعد عندك نية تربينى وتضربني بعصاة المكنسة??

-منصور: بصراحه عصاة مكنسه وضرب لا ..لكن الحق مزال عندى نية نربيك

-مباهر: قصدك انا مش متربيه

-منصور: لا متربيه .. لكن عندى نية نربيك على طريقتى

-مباهر: اوكى اتفقنا

-منصور: اتفقنا على شنو

-مباهر: على انك تربينى

-منصور: وتسمعى كلامى

-مباهر : اوووف متبداش تتشرط عاد .. مبدئيا قلتلك موافقه لكن ماتتشرطش عليا ??

وماصارش من النوم ..قعدو يهدرزو رسايل للساعة 5 ..

وهوا يحكيلها عالحجاب من ناحية الدين ..ومن ناحية ان البلاد معش اطمن

______________

قعدو ايام بنفس الطريقه ..

كل ليله الساعه 12 فالليل يروح منصور من جماعته يفتح الفيس يلقاها تستنى فيه ..

يقعدو يهدرزو رسايل للساعه 3..

وفالوقت اللى تقعد تراجى فيه مباهر فى منصور ..

تشغل فى نفسها بالتعليقات على صفحات وقروبات وتقرا قصص ومشاكل لين منصور يفتح

وفى يوم

لقت منشور منزلة راجل يبي اعضاء القروب يديروله حل ..
انه طلق مرته ..وهوا قاعد يبيها ويبى يردها …

خشت مباهر تقرا فالتعليقات..

لقتهم يكدبو فيه ..قالوله توة انت طلقتها وجاى توة تقول انك تحبها كيف هادى

قعد صاحب المنشور يرد عالتعليقات قاللهم انه مطلقهاش بفمه ..
قال انه حالف عليها بالطلاق لو قصت شعرها لعند كتافها تكون مطلقه ..
فلما روحت لحوش بوها خدت المقص وقصت شعرها لكتافها ..وبهكى صارت مطلقه منى ..

مباهر قعدت فاتحه عيونها وهيا تقرا ..

اهياا الفكرة جتها لعندها…. بعد تتزوج وتحمل ..سهل جدا انها تطلق ..

تزلبح الراجل انه يحلف عليها بالطلاق على موضوع معين ..وبعد تاخد مرادها وتحمل اديره ..وبهكى تكون اطلقت ….

-مباهر: واااااو ???..واخيرا لقيت الفكرة ?

فتح منصور وقعدو يهدرزو ..واستمرو على المنوال هدا كل ليله

ومنصور كل يوم يزيد اعجابه بمباهر..

وتتغير فكرته عليها .. وزاد تعلقه بيها للحد اللى بدت شاغله كل تفكيره ليل نهار

وتحولت الحكاية عنده حب ومشاعر ناحيتها

لكن عمره ما كلمها فالموضوع هدا ولا جبلها سيرة عن حبه ليها

_______________

بعد اسبوعين ..

مباهر فاتحه الفيس تراجى فى منصور زى كل ليله

فتح منصور كلمها رسايل

-منصور: ستاحشتك

-مباهر تحشمت وبعتاله ملصق: ??

-منصور: بجد ستاحشت

-مباهر : باهى

-منصور: شنو باهى

-مباهر: منعرفش

-منصور: شنو اللى متعرفيشى

-مباهر : صراحه منعرفش نرد على حد يقولى هكى

-منصور: تبى تقوليلى انك عمرك ماحبيتى ولا درتى علاقه ولا حد قالك استاحشتك

-مباهر: صدق ولا كدب عمرى ماحبيت ولا درت علاقة

-منصور: باهى

-مباهر: شنو باهى

-منصور بعتلها ملصق :??

وقعدو يهدرزو قريب للساعه 3

-مباهر: برة ارقد توة سهرتك

-منصور: تعرفى اليوم علاش ستاحشتك اليوم

-مباهر: علاش

-منصور : لان معنديش رقمك ..قعدت نراجى فالليل يجى بيش نحكى معاك ..

-مباهر: اهاا

-منصور: شنو اهاا..معنى كلامى نبى رقمك ..ممكن??

-مباهر: اكيد ممكن ..

وكتبتله رقمها المدار …

خداه منصور وكتبلها ارقامه الزوز ليبيانا ومدار

-مباهر: خلى نعطيك حتى انا رقمى ليبيانا ..

وكتبتهوله

منصور مرقدش للصبح .. يفكر فيها ..مشاعره كلها متحركه ..

حس بالحب تجاهها ..وتأكد ان الاعجاب تحول حب ..

__________________

ثانى يوم الصبح ..

فتحت مباهر عيونها الساعه 10 الصبح ..

قامت التليفون بتشوف الساعه ..لقت مسج واصلها على رقمها من منصور

” صباحك ورد ”

ضحكت وفتحت عالرسايل وكتبتله رساله

منصور مقعمز يغسل فى طرف ويشحم فيه بالزيت .. سمع صوت المسج لما وصل

ناض غسل يده وفتح المسجات لقاه من مباهر

قراه

“تخاف نتعود عالورد كل صبح”

كتبلها مسج

“انتى الورد نفسه ..مش غلط انك تتعود علي نفسك ”

حطت مباهر تليفونها عالكومودينو

ورجعت غمضت عيونها وقعدت تفكر

تكلم فى نفسها
شن فى يا رورو..شن القصه .. مسجات وسهر ومكالمات وصباح الورد

انتى من امتى تعطى فى وجه لشاب…

ولا تنسجمى …

غمضت عيونها وقعدت تفكر …

فكرت فالزواج وفى شروطها ..

وفى ضغط خوها سراج عليها فحكايت الزواج

وفى انها تبى تعيش حرة لكن تبى بيبي

منصور قعد شاد تليفونه ويفكر…

وين ماشى يا منصور ..وين تبى تحط رجلك ..

البنت دلوعه هلبا.. واهلها حالتهم فوق الريح ..

اللى تتمناه تلقاه …

وانت يادوبك الورشة ومعاش الدولة ..

اللى زى هادى تحلم بيها بس ..لكن مستحيل يجيبها القدر بجنبك عالواقع

مباهر تفكر فى منصور ..وفى طريقه اهتمامه بيها ..

لمعت فى دماغها الفكرة

تكلم فى نفسها

المواصفات اللى تبيها فيه يا مباهر..حالته المادية عادية ..

صاحب ورشه معناها معنداش ناس فوق ممكن يوقفو معاه لما ناخد معاى العيل اللى بنجيبه

افكار تمشى وتجى على راسها

وتكلم فى نفسها

خلاص 25 سنه عمر مناسب انى نتزوج ونجيب عيل نربيه زى مانبى ..
ونعيش زى مانبى منغير ضغوطات من اى حد

وتفكر

لو جبت ولد احتمال نطلع نسكن بروحى انا وياه لما يطق عمره 10 او 12 سنه

وااااو ???? عجبتها الفكرة…

منصور قعد مقعمز جنب تليفونه وهايم ..

يتخايل فيها.. ويفكر فيها …هيا جميلة هلبا وجدابة

ويكلم فى نفسه .. البنت معتبراتك صديق ..

مستحيل اديرك فى بالها او تحبك …

شافت حالتك وزابطه عليك كل شى .. هيا فوق وانت وين يا حسرة

لكن هوا فى وادى .. وهيا فى وادى ثانى

هوا يفكر فى تفكير ونية

وهيا تفكر فى تفكير ونية ثانية

العامل يكلم فى منصور : ايه يا معلم

استاقظ منصور على روحه و ناض رجع لخدمته

________________

ناضت مباهر دوشت ونزلت الدور الاول لقت مافيه حد

خشت للمطبخ

دارت فطور وقهوة .. وقعدت مقعمزة عالطاولة وتفكر

وتفكر

وتفكر

وتحلل فالامور وتقيس فيها

قريب جاها توحد

روحت امها وطيبت الغدا وقعمزو تغدو وهيا سرحانه وتفكر

وجى الليل ..

وقعمزت كالعادة تراجى فى منصور

تفكر فى موضوع انه منصور انسب شخص للقرار
اللى متخداته على موضوع الزواج

وحكم اتخدت القرار ..

روح منصور وفتح الفيس

-منصور: مساء الورد

-مباهر: مساء الفل ?

-منصور: ستاحشتك

-مباهر: تتزوجنى

منصور شبح الرساله…… انصدم ??

معقول .. معقول الانسانه اللى تتمني فيها فالحلم بس ..

معقوله تطلع حتى هيا تتمناك

ورجع يقرا فالرساله من جديد

__________________

مباهر كانت عندها جراءة كبيرة

زعما منصور فرح بالطلب ..ولا لا

نحبكم

error: