حطيتك في عيوني
#حطيتك_فعيوني
??للكاتبه زهور جمال الدين ??
???الحلقه الرابعة ?? ?
تلفت منصور لمباهر
وكلمها بالعياط : مايجى من وراك الا المشاكل ..ولعى سيارتك وروحى ..توووة
مباهر رعشت باللى فيها من عياطه ولعت سيارتها وطلعت جرى روحت
وخلت منصور وراها خاش فى دعكه وضرب
والتليفون قعد عنده وماخدتاش ثانى
وصلت للحوش لقت امها مزال مروحتش من المدرسه ..
خشت دارها وقعدت تفكر مشغولة زعما شن صار فى منصور
____________________
الناس حزت العركه
وروح منصور للورشه متعه وجهه مضروب ..
عنده كدمه تحت عينه اليمين .. وفمه مجروح ونازل منه دم
وصل للورشه ..العامل اللى يخدم عنده انخلع ..
جابله امية وقعد منصور يغسل فى وجهه ..
ويسال فيه خيره ..
فقاله انه كان يحز فى عركه وانضرب
مباهر قعدت مشغولة ..واتصلت بيه على رقمها
مفيش رد لانه مشاف التليفون
قعدت تعاود اكثر من مرة …
وهوا ميردش ….
شحن التليفون متاعها اللى عنده تم …وتسكر
قعدت تتصل يطلعلها الرقم خارج التغطية
ركبت فيها نار..
وقررت تمشي تطمن عليه بنفسها ..
نزلت ولعت سيارتها ومشت للورشه
__________________
منصور ياكل فى بعضه .. قلبه دم على مباهر والاستهتار اللى هيا عايشه فيه
وصلت مباهر شارع الورشه
وقفت قدامها ..
لقت العامل واقف ..قالتله ضبحلى على منصور
مشى العامل قاله فى بنت اضبح عليك برة
عرفها هيا ..
طلعلها زى الغولة ..
وقف قدام باب الورشه عيونه حمر شبحها فالسيارة
مشالها ..
مباهر شافاته لقت وجهه مضروب ..
-فتحت باب السيارة ونزلت : منسور شن صارلك
يجيها يجرى يشدها من يدها ويفتح باب السيارة ويركبها فيها …
وشد الروشن بيديه الزوز وبدى يعيط عليها
-منصور : تى والله ماك متربيه ..واهلك ماربوك ومايدرو عليك وين ربي حاطك
-مباهر: خيرك هكى تكلم فيا
-منصور شد شعرها: لانك مطلوقه زى شعرك المطلوق هدا ..
وين خوتك مخليينك طالعه هكى فالشارع
-مباهر تبكى: احترم نفسك وماتجيبش سيرت خوتى
-منصور: سلميلى عليهم وقوليلهم اشحطو دقونكم .. وشدو الصايعه اختكم
مباهر سمعت الكلمه وحطت يديها الزوز على وجهها وبدت تبكى
منصور قعد يشبحلها ..وحس انه كثر عليها
“طالع من عركه وصب غضبه كله فيها ”
قامت مباهر راسها : جيبلى تليفونى
مشى منصور فتح سيارته وجابلها تليفونها
مدهولها …
خداته منه..
-مباهر: عموما سامحنى عاللى صدر منى .. وانشالله معرفت خير ..
لبست نضاراتها وعيونها معبيات دموع ..ومشت
منصور قعد واقف فمكانه ويتفرج عالسيارة وهيا ماشيه ..
حس انه روحه مشت مع السيارة
ممكن لانه حس بشوية ندم عالكلام اللى قاله
وصلت مباهر لحوشهم خشت دارها بكت لانه جرح احساسها..
نادتها امها للغدى مبتش تنزل ورقدت للمغرب
ناضت من النوم ..
فتحت الفيس وتقلب فى الصفحات بالك نازل خبر عالحفله اللى نشدو فيها
_________________
فالليل روح منصور للحوش ..
ماخاطراش يتعشى .. متأثر من الموقف اللى صار مع مباهر ..
شافاته امه انخلعت ..قاللها صارت عركه قدام الورشه وقعدت نحز وانضربنا كلنا ..
وخش للدار الدخلانيه …طفى الضى ورقد طول
___________________
بعد اسبوع …
مباهر مزالت متأثرة بالموقف اللى صارلها مع منصور
مقعمزة فى دارها هيا وسرور ودارين واكرام
صاحباتها بايتين عندها ..
-سرور: هيا عاد مباهر واكرام فكوها شوى خيركم هكى بديتو دراهات
-دارين : اكرام زعلانه على بوها ..وانتى يا مباهر خيرك
-مباهر بكل هدوء : مافى شى غير قاعدة مكتئبة من قصه العيد ميلاد
ضحكو كلهم …
-دارين: تى ماهو حتى انا نشديت معاكم خيرنى مش مكتئبة زيك ???
-مباهر : ماهو انتى قلبك ميت
ورجعو يضحكو ثانى
“هما هكى لما يتلاقو ويباتو مع بعضهم الليله كلها تمشى ضحك”
-سرور: لا بجد انتى متغيرة هلبا يا مباهر..
حتى الزواج غيرتى رايك فيه ..
اللى زمان تقولى مستحيل ..وتوة قررتى تتزوجى
-مباهر ابتسمت : نتزوج لكن بشروطى وحياتك
-اكرام : خالد ولد خالتى بيموت فيك ..تزوجيه
-مباهر : خالد مفيشى المواصفات اللى نبيها انا
-سرور: وخوى خالد شن ناقصه يا حنه
-مباهر: انا مقلتش ناقصه شى.. انا قلت مفيشى المواصفات اللى انا نبيها .
-دارين : باهى اسكتو كلكم.. نبو نضحكو .. بنفتح تليفونى وبنسجل ..
انا المديعه وبندير لقاء مع مباهر .
وشدت مشطه السشوار ودارت روحها مديعه ..
وفتحت التسجيل متع التليفون وحطاته قدام فم مباهر
زعميتا ادير معاها فى لقاء
-دارين: الاخت مباهر شن مواصفات زوج المستقبل
-مباهر تضحك: احم احم.. انا مباهر نورى.. مواصفاتى لفارس احلامى ..اول حاجه انه يكون دقن
وطاحو يضحكو ..
-دارين تضحك : وعلاش لازم يكون دقن اختى مباهر
-مباهر: لانى نبى نحمل منه ونطلقه..وبعد ماناخد ولدى منبيشى يقولى ولدى ونبى نشوفه
-دارين: فهمينا اكثر اخت مباهر
-مباهر: احم احم قصدى نبيه ماعنداش ضهر ولا يقدر يقولى نبى ولدى ..نبيه ضعيف وماعنداش واسطهو
-دارين: راقد ريح قصدك
-مباهر : ايوووه صدقتى
وطاحو يضحكو ثانى ..
-دارين شادة تليفونها وتسجل : وكيف حتضمنى انه حيطلقك اختى مباهر
-مباهر: والله نبهتينى للنقطه هادى يا احلى مديعه.. لازم ندير دابر نخليه يطلقنى فالاكيد
قعدو يضحكو
-سرور: وشنهوا الدابر اللى بديريه
-مباهر تضحك: اللقاء الجاى نكون فكرت ونقوللكم ..
وقعدو يضحكو طول الليل ..ونزلو طيبو بيتزا .. ورقدو
ثانى يوم ناضو الصبح ..
مباهر خطر عليها منصور .. وكيف يومين صارو مابيناتهم كلها احداث واكشن ..
وتدكرت كلامه الاخير اللى قاله ليها
____________________
فالليل منصور متكى فالمربوعه
ويفكر فى مباهر .. نادم عالكلام اللى قالهولها ..
يخمم فى خاطره ..
توة اسبوع فات .. زعما قاعدة واخدة على خاطرها
ياريتنى عطيتها التليفون وقلتلها بري وخلاص..
ولا هالكلام السامط اللى قلتهولها
بس لو نعرف مكانها راهو مشيت صالحتها وطيبتلها خاطرها ..
لكن هوا مانعرف عليها شى الا اسمها ..
حتى التليفون رديتهولها
ويرجع يخمم .. اكيدة زعلانه هلبا .. كنهدا راهو جت قدام الورشه
طقطق باب المربوعه …
خشت اخته سلمى جايبتله نص بالبطاطا وطاسة عصير
“هو انا معرفتكمش على عيله منصور ..
هوا ساكن فى حى شعبى عادى ..
بوه وامه حيين ..عمتك مريم وعمك صالح..
وعنده ثلاثه خوت ولاد ..
عليوة م 73 متزوج وعنده زوز ولاد وبنت.. وايمن م 75متزوج وعنده بنت ..
عليوة وايمن بانيين شقتين متقابلات فوق بوهم وساكنيين فيهم …
ومراد م 83اصغر منه عزرى .. منصور م 77 رقم 3 فالاولاد ..
وعندهم زوز بنات ليلى م85 متزوجه وعندها بنت وولد.. وسلمى م 87 ارمله راجلها توفى فالاحداث متع 2011 وخلاها عروسة ”
قعمزت سلمى جنب منصور
-سلمى: منصور خيرك نحس فيك متغير الايام هادى
تلفتلها منصور وبدون مقدمات
-منصور: لو ضاع منك شخص و تبى ادوريه.. كيف اديري
-سلمى تضحك: منو ضاع منك
-منصور: بلا جو غمزات عاد .. عامل نبيه يخدم معاى ومعش لقيته نبى ندور عليه
-سلمى : باهى يا حنه قول عامل ..
-منصور: كيف ندوره
-سلمى: دور عليه فالفيس..
مفيش حد توة معنداش اكاونت ..حتى اللى كيف مولود دايريله اهله في??
-منصور: وكيف بندوره ..منفهمش فيه هلبا انا الفيس
-سلمى فتحت تليفونها..وفتحت صفحه الفيس..
ورتله السيرش من فوق ..وقالتله هنايا تكتب الاسم بالعربي او بالاجنبى وحتلقاها انشالله …قصدى تلقاه العامل انشالله ??
-منصور ضحك: باهى صحيتى
وطلعت سلمى ..
شد منصور تليفونه ..وفتح صفحته فالفيس .. وبدى يدور ..
يتكلم فى خاطره .. هيا اسمها مميز مفروض يطلع معاى طول ..
” وبدى عمك منصور يبحث عليها .. ابحث ابحث يا بشار??”
كتب بالاجنبى مباهر..
طلعله اكاونت اسمه مباهر نورى مكتوب بالاجنبى ..
زبط انها هيا ..لانه ادكر اسم خوها نورى
فرح انه لقاه وبعتلها اضافه
____________________
فى حوش مباهر..
-سراج: وعلاش متاخديشي
-مباهر: منبيش نتزوج انت مدخلكش فيا
-وردة: نقصو صواتكم ..يا سراج مش هكى الاخ يكلم اخته على موضوع زواج
-سراج: هدا خامس واحد يكلمنى عليها .. منغير اللى مكلمين نورى
خش نورى من باب الحوش ..سمع اسمه
-نورى : خيره نورى .. وخيره اصواتكم طالعة
-وردة: نفس القصه بين مباهر وسراج
-نورى: قصه شنو
-سراج: خو امجد صاحبى كلمنى عليها ..
وجيت قلتلها عليه ونراجى فيها تفكر..كلمتها اليوم نبى الرد ..
قالتلى الهانم ماقلتلكش بنفكر..ومن يومها قلتلك انا رافضه …
توة شن منضري قدام صاحبى اللى قلتله قالت بنفكر
-نورى : قوله اختى فكرت ورفضت
-سراج: يانورى دلعك ليها هدا هوا اللى بيهلكها
وتلفت سراج لمباهر: انتى علاش متبيش تتزوجى
-نورى: صح انتى ليش الرفض هدا كله للزواج
-سراج: انا الفار بدى يلعب فى عبى ..اصرارها الكبير على رفض الزواج وراه حاجه
-مباهر : احترم نفسك شنهيا الحاجه
-سراج: والله اسالى نفسك بنت مصرة ماتبيش تتزوج علاش .. بالك خايفه من حاجه تنكشف
-وردة : تحشم يا سراج مش هكى الكلام
-مباهر مصدومه : خيرك سكتت يا نورى .. حتى انت رايك هكى
-نورى ساكت ويتكلم برزن : انا نشك فى روحى ومنشكش فيك يا رورو ..
ومش مستعد حتى نرد عليه
-سراج : باهى اسئلها انت ليش متبيش تتزوج
-نورى تلفتلها : انتى ليش متبيش تتزوجى
-مباهر: فى عويلة عاجبتنى ونبى ناخد فيهم
“طبعا بمعنى انها تكلم فى واحد .. لكن البنت الليبيه صعب تجى فى وجه خوتها وتقوللها نكلم فى واحد”
-سراج حامق وقف : نقتلك كان تطلعى تكلمى فى واحد
-مشت مباهر تجرى قعمزت جنب نورى: منكلم فى حد والله مانكلم
-سراج: امالا منو العيلة اللى عاجبينك هادو
-نورى : باهى كلام طيب .. والعيلة هادو حتى انتى عاجبتيهم
-مباهر : ايه
-نورى : احنا نعرفوهم
-مباهر : لا
-طلع سراج ماشى للباب ويتمتم : وهيا من مقواها عليا غيرك انت يا نورى ..
اهو تو نشوفوهم شن شكلهم العيلة هادو
-ناضت وردة خشت للمطبخ : تعبتونى وبتجننونى
-نورى يشبح لمباهر يضحك : لما بتكدبى اعرفى كيف تكدبى ..
انا الوحيد اللى يزبطك من عيونك لما تبدى تكدبى
-مباهر تضحك: تى ماهو خوك والع قلت ندور اى فيلم نديره
-نورى: لكن هدا مايمنعش ان سراج معاه حق
-مباهر: وحضرت جنابك امتى ناوى تتزوج
-نورى : لما نحب ❤
-مباهر: وانت امتى بتحب يا حسرة وانت لا تتعرف ولا تكلم فى حد ..
عمرى ماشفتك شاد تليفونك على تركينه ولا عمرى خشيت عليك انتضار??
جت وردة جايبه لنورى العشى
وقفت مباهر ركبت للدور الثانى خشت دارها .. فتحت تليفونها .. خشت للفيس
لقت ادد .. فتحت بتشوف شكون
لقت مكتوب بالانجلش .. منصور صالح ..
تفاجئت .. انصدمت
خشت عالاكاونت .. لقت صورت منصور
وقف على طولها : حيه اكاونت منسور
وقبلت الاضافه طول
______________________
منصور دور على اكاونت مباهر ولقاه
ومباهر لقت الاضافه وقبلتها
ونورى ميبيش يتزوج الا بعد مايحب
نحبكم ❤