حبيبتي بكماء

الحلقة السابعة
الكاتبةوعدالخضر

(( حبيبتي_بكماء ))

ثاني يوم

ع سفرة الفطور قعمزت مُنية في كرسيها ومالقت محمد موجود

قعدت تاكل بـ شرود

مُنية :
“معقولة كذب عليا وانتقل لـ شقته وخلاني معقوله يديرها ”

قطع تفكيرها بصوته العميق

محمد : صباح الخير

رفعت راسها

الكل : صباح النور

جبد كرسيه المجاور لـ كرسي مُنية وقعمز

سعاد : وليدي انصبلك شاهي ولا قهوة ؟

اشرت بمعنى : وين كنت

محمد بصوت واطي

محمد : توا بعدين نقولك

هزت راسها بـ رضى

سعاد : محمد

انتبهلها

محمد : اها قهوة قهوة

ابتسمت سعاد وسكبتله القهوة ومدتله الفنجان شكرها وارتشف منه وحطه جنبه

محمد : عمي كان مافيها ازعاج بنطول اقامتي معاكم شويه ماصارلي في موضوع الشقه

ابتسمتله مُنية

ابراهيم : عيب عليك ياولدي ماتقولش هك البيت بيتك و زي ماقتلك امس بيت عمك ديما مفتوحلك

ابتسمله

وكملو فطور

محمد : مُنية اني برا بعد تكملي اطلعليلي بيش انوصلك

هزت بـ راسها إيجابا

وطلعت وراه طول

ركبت في السيارة وابتسمتله

محمد : ههههههه خيرك تضحكي بروحك

اشرت بمعنى : مش ضحكه هذي اسمها إبــتــســامــة

محمد : اوك إبتسامة ها خيرك تبتسمي بروحك

اشرت بمعنى : شي فرحانه بس

ضحك وولع السيارة وانطلق

وصلو قدام المعهد

نزلو الزوز

شافتله مُنية بأستغراب

اشرت بمعنى : علاش انزلت معايا ؟

محمد : مفاجأة !

رفعت حاجبها

محمد : هيا خشي

وخشو

مشا قدامها بأتجاه الادارة

لين اختفى عن عيونها

مُنية :
” زعما شن جابه اهني احي عليا بالك درت مصيبه من غير مانعلم ”

قطعت تفكيرها صديقتها رتاج

وضربتها ع راسها

رتاج : شديري اهني

تلفتت مُنية عليها بإنزعاج

اشرت بمعنى : شي وانتي مش فالحه غير في الازعاج

رفعت كتفها بـ فخر

رتاج : اي هذي خدمتي ، هياا وقت بدت المحاضرة

ومشت بتجاه القاعة

ملاحظه :
(مُنية تقرا في معهد فنون لأنها من عشاق الرسم.)

خشو لقو القاعة فاضية استغربو

رتاج : اياه جينا بدري ولا متأخرين وين باقي الطلبه

اشرت بمعنى : حتى الدكتور مش موجود ، بالك اليوم عملي

رتاج : ماضنيت

فجأة يخشو عليهم عمال و رافعين ادواتهم وو

رتاج : شن هذاا

رفعت اكتافها بحيرة

نادت رتاج ع احد العمال

رتاج : شن في علاش جيتو اهني

العامل : بيبنو قسم جديد و قالولنا انحطو أدواتنا اهني

شكراته و شافت لـ مُنية

اشرت بمعنى : اممم باهي هي نطلعو نسألو

وطلعو من القاعة سألو احد الطلبة و دلهم ع مكان القاعة الجديد

مشو و لقوهم بادين في شرح الدرس اعتذرو للدكتور عن تأخيرهم و جلسو في مقاعدهم

بعد ساعات

عند محمد :

كان محمد في أحد مكاتب الادارة في معهد الفنون الي تدرس فيه مُنية ، ومعاه زميلته المهندسة مرام صاحبة الجسم الممشوق والطول و العيون الخضراء والشعر الطويل ، « طبعا مرام مش محجبه و ح يكون ليها دور في الرواية ح تعرفوه قريبا »

كانت واقفه امقابلته بكامل اناقتها وعطرها القوي

شاف لساعته
ورفع راسه موجه كلامه لـ مرام

محمد : تمام بما ان الآلات مازال ماوصلو خلاص نبدو من غدوة شن رايك باش مهندسة مرام

مرام : اي صح كلامك من غدوة انباشرو العمل

ابتسملها ومشا

استوقفاته مرام بصوتها الرقيق

مرام : محمد ، ياريت اتبلغ العمال بيش ايروحو حرام يقعدو يراجو هك

هز بـ راسه ايجابا ومشا

بلغ العمال بـ قرارهم وطلع للساحة استوقفه مدير المعهد

مدير المعهد : اهلا باش مهندس محمد كيف الحال

محمد : بخير الحمدالله

مدير المعهد : شن صار في العمل

وقعدو يتكلمو في موضوع بناء القسم

ملاحظه :
محمد مهندس معمار قاري ومتخرج من الخارج وبعد رجوعه لـ بلاده تم تعينه في مكتب للبناء والمعمار وبالصدفه هالمكتب استلم بناء قسم جديد في معهد الفنون و اوكلو هالمهمه لـ محمد و مرام

طلعو مُنية وصديقتها رتاج من اخر المحاضرات

رتاج : اوووف تعببت هذا شنوو درهولي كبدي محاضرة بعد محاضرة مافيش راحه بكل

هزت مُنية بـ راسها موافقة لـ كلام صديقتها

هزت رتاج مُنية بيش تلفت انتباها

رتاج : شوووووفي الطرف هذا ?

اشرت بمعنى : منو ، وينه ؟

اشرت بتجاهه

شافت مُنية في نفس الإتجاه

لقت ان هالطرف مــحــمــد

رتاج : ياحليلي محلااااه ?

مُنية ضحكت

شافتلها رتاج بإستغراب

رتاج : ايااه خيرك تضحكي ؟

اشرت بمعنى : هذا ولد عمي

انصدمت

رتاج : اتبصري ?

اشرت بمعنى : والله واسمه محمد بس شن جايبه اهني اسمعي نتلاقو غدوة باي

ومشت بتجاهه

شافلها محمد جايه بأتجاهه ختم حديثه مع المدير وابتسملها

قربت منه

اشرت بمعنى : شن ادير اهني ها ؟

محمد :بخير الحمدالله وانتي شن حالك

تحشمت

سلم عليها

محمد : نسيت انجاوبك ، اني المهندس المشرف ع بناء القسم الجديد

اشرت بمعنى : اها كويس والله صار منك

محمد : ههههههه اي

جت مرام بـ كعبها العالي في اتجاههم

مرام : مـحـمد قصدك مازال ماروحت

شافتلها مُنية بأستغراب

محمد : المدير كان معايا سألني ع شوية حاجات و كنت نستنى في بنت عمي

اشر ع مُنية

محمد : مُنية بنت عمي ، مرام زميلتي ومشتركه معايا في بناء القسم

سلمت عليها مُنية ببرود وابتسامة صفرة

مرام : ماكنتش نعرف ان عندك بنت عم تقرا اهني

ردت عليها بـ غضب

اشرت بمعنى : اها توا صار عندك علم

شافتلها مرام بأستغراب ، فهمت مُنية نظرتها

اشرت بمعنى : و اني بكماء بيش ماتستغربي شي يارمام

مرام : قصدك مرام

اشرت بمعنى : كله واحد مش فارقه يعني

وشافت لـ محمد

اشرت بمعنى : امال مابنروحو محمد

محمد : لو كملتي عادي انروحو

ردت عليه بسرعة و غضب

اشرت بمعنى : كملت اي هيا نمشو نبي انروح

استغربو من تصرفها

ابتسمت مرام لـ مُنية

وقاتلها بصوتها الرقييق

مرام : nice to meet you

ابتسمتلها مُنية ببرود وشدت يد محمد وطلعت بيه

ركبو في السيارة

محمد : علاش عاملتيها هك ؟

شافتله بـ غضب

اشرت بمعنى : وخيرها معاملتي هاا ؟

رفع حاجبه

محمد : هدي روحك !

شافت للروشن

محمد : مُنية

شافتله

اشرت بمعنى : هااا

شاف ليدها المشبكة في يده بقوة

محمد : يدي !

مُنية لقت روحها مازال شاده في يده

فكت يده

اشرت بمعنى : هاك يدك ياصاحب رمام ?

ضحك وولع السيارة وانطلق

وصلو للبيت

بعد العشاء دارت مُنية قهوة وطلعت للجنان تغير جو

جاها محمد وقعمز جنبها

تلفتت عليه

اشرت بمعنى : ماتقول سلام ولا احم خوفتني

محمد : مانحسابك بتخافي

وقف

محمد : السلام عليكم ورحمة الله وبركاته

ابتسمت

وقعمز

محمد : هك تمام

هزت بـ راسها إيجابا

محمد : شديري ؟

اشرت بمعنى : شي قاعده مكسده و خلاص ، انصبلك قهوة ؟

محمد : ياريت والله نبي حاجه اتروقني بنكتب شعر

سكبتله وحطت الفنجان قدامه

اشرت بمعنى : شعر شنو قصدك تكتب في اشعار انت ؟

محمد : يا سلام ، امالا ماعندك انستا

هزتْ بـ راسها نفيً

فتح تلفونه ومده ليها

محمد : هذا الاكاونت متاعي شوفيه وقوليلي رايك

بعد دقائق من الاطلاع ع مقاطع محمد

اشرت بمعنى : واو هلبا والله

ضحك وقاللها

محمد : كييف ؟

اشرت بمعنى : قصدي حلو هلبا كيف اتحاول توصل رسالتك وتساعد الناس واتجمل الواقع المر العايشينه وتعبر عن مشاعر الناس بطريقة راقية هلبا ، حبييت

محمد : ههههههه باه الحمدالله نال اعجابك

اشرت بمعنى : ههههههه باهي الي طلع عندك مواهب

محمد : اييي اكيد عندي غير كانت مدسوسه

اشرت بمعنى : حتى نا عندي مواهب اصبر انوريك

وناضت تجري

ضحك محمد ع براءتها

بعد ثواني جت ورافعه في يدها لوحة حطت اللوحه قدامه

اشرت بمعنى : شرايك ؟

محمد : روعة والله وطلعتي رسامة بارعة

رفعت كتفها بـ فخر وقعمزت

محمد : مافيش تواضع نهائيا ??

اشرت بمعنى : ههههههه مره هك ومره هك ، هذي رمام الي مره اتصلت بيها ؟

محمد ابتسم

محمد : اي هيا بس اسمها مرام راه

اشرت بمعنى : كله واحد ??‍♀

محمد : ههههههه لا رمام جايه من الترميم يعني شي يرمموه يصلحوه اما مرام معناه المقصد او المطلب والهدف

صفقتله بقوة

واشرت بمعنى : واو وعارف معنى اسمها

محمد : مش قصة اسمها عادي هذي ثقافة بس

شافتله ورفعت حاجبها وماعجبها الموضوع