حبيبتي بكماء
الحلقة الاولى
الكاتبةوعدالخضر
(( حبيبتي_بكماء ))
محمد وحيد امه وبوه وفقد اهله في حادث سير وانتقل للعيش عند جدته
مُنية بنت اهلها الكبيرة الي كانت حالتهم المادية ماتسمحلهم يشرو بيت بروحهم فـ عاشو في بيت جدتها وجابو مُنية غادي وبعد تحسنت احوالهم شرو بيت وقعدت مُنية مع جدتها لـ شدة تعلقها بيها
وفي اول يوم جات فيه مُنية ع الدنيا
محمد : خالتو سعاد عطيني نرفع البيبي
سعاد (ام مُنية ) : هههههههه تعال قعمز بجنبي بيش ماتطيحها
جاء يجري بـ فرح
وحطوله البيبي في حجره
وفرح هلبااا
رفع راسه
محمد : شن بتسموهااا
سعاد : مش عارفه مازال
محمد :عادي اتسموها مُنية
سعاد : حلووو هلبا الاسم شن رايك ابراهيم
ابراهيم (أب مُنية ) : تمام انسموها مُنية
محمد : بس بس بناديها اميرتي
سعاد : هههههه وعلاش
محمد : لأن بنربيها اني وبنعيشها زي الأميرة
كلهم قعدو يضحكو
ومن يومها كبرت مُنية ع حب واهتمام محمد وكان يعامل فيها كأنها بنته
مرت الايام وعاشوا محمد و مُنية في بيت جدتهم كأنهم شخص واحد
مرت الايام ووصل عمر مُنية 10 سنوات و محمد 18 سنة
كانوا محمد ومُنية قاعدين في الجنان
محمد حاط كتاباته و يقرأ لأنه ممتحن شهادة ثانوية ومٌنية مقعمزة جنبه وتلعب
قطعت مُنية هدوئهم بصوتها العالي
مُنية : محمممد نبي نبي
شافلها بأستغراب
محمد : شن تبي أميرتي ؟
اشرتله ع السلة
مُنية : نبي ندخل الكورة في السلة زيك هذاك اليوم
محمد : هههههههه بس انتي قصيرة
مُنية : خليني انجرب بندخلها متأكده
محمد شافلها بعدم اقتناع
دارت الوجه البريء
محمد : هههههه باه هي وريني شطارتك
مُنية : اوك تو تشوف
رفعت الكورة وحاولت تحطها في السلة طاحت عليها وقعدت تبكي
محمد جرالها بسرعة
ومسحلها دموعها
محمد : خلاااص معاش تبكي أميرتي
مُنية : اهئ اهئ ? ?
محمد : باه خلاص تو ني نساعدك اتدخليها
شافتله بفرح من بين دموعها
محمد : هيا
حط الكورة في يدها
محمد : أميرتي شديها كويس باهي
هزتله بـ راسها ايجابا
قامها لفوق ودخلتها وطارت من الفرحة وجرت عليه وحضناته
مُنية : انت احلى محمد في الدنيا
محمد : هههههههه وانتي احلى اميرة في الدنيا
وبعد ايام
امتحن محمد وجاب نسبة عالية واتحصل ع منحة بيش يقرأ برا الكل كانوا فرحانين بس ماخبرو مُنية خوفا من ردة فعلها
في يوم
كان محمد قاعد في داره ويتفرج ع التلفزيون فجأة سمع صوت تخبيط ع الباب اذن للطارق بالدخول وخشت مُنية وخلت الباب نصف مفتوح
مُنية : محمد عندي تمرين صعب ساعدني في حله
ابتسملها بـ هدوء
محمد : تعالي وريني
حطت الدفتر قدامه وقعدت تشوفله
محمد : وينه ؟ التمرين
ما ردت عليه وقعدت تشوفله وفي عيونها حزن غريب
اخيرا تكلمت
مُنية : حقا بتسافر بعييد ؟
اتفاجاء محمد من سؤالها لأنه ماتكلم معاها في هالموضوع لانه مازال ع السفر
قاللها ببصارة
محمد : اي بنسافر بعيييد بيش معاش اتقوليلي كل دقيقتين محمد قيمني محمد طلعني محمد قرييني
مافهمت بصارته وبدت عيونها تدمع
مُنية : بترفعني معاك ؟
تذكر انه مايقدر ع فراقها هذي اميرته الصغيرة وحزن بعد تذكر هالجزء الحزين من سفرته
محمد : من قالك إني بنسافر ؟
مُنية : سمعت جدتي تهدرز مع ماما بسفرك
مسح ع راسها
محمد : بنسافر لفترة مؤقتة بيش نقرا وبنرجع
مُنية : واني ؟
محمد : بتقعدي مع جدتي وبعد نكمل قرايتي بنروح وبعدها بنرفعك لأي مكان في العالم
مُنية : مانبييييش يامحمد من بيهتم بيا زيك من بيحبني هلبا زيك كان مشيت ؟
حس بخنجر انغرس في صدره
محمد :
” أميرتي الصغيرة الي نحبها اكتر من روحي كيف بنبعد عنها اه ماتعرفش هالكلمات الي قالتها شن دارت فيا ، مشش عارف كيف بنتحمل فراقها ”
بدت تبكي
مد يده ومسحلها دموعها وحاول يبتسم
محمد : مُنية يااميرتي معاش تبكي جدتي و امك وبوك و بِنان ( اخت مُنية الصغيرة ) وصحباتك كلهم بيكونوا معاك مابتكوني وحيدة اني بس الي بنكون وحيد
قالت بسرعة
مُنية : ارفعني معاك
ضغط ع قبضته اكتر
محمد : ياريت يااميرتي… لكن مانقدرش بس بعد انروح….
وقبل لا يكمل كلامه لوحت مُنية دفترها وقاطعاته بنهر من الدموع
مُنية : ماتمشيش ماتمشيش ماتمشيش
محمد : مُنية
مُنية : انت قلت انك بتهتم بيا يوميا ماتمشيش لا لا لا
وقعدت تبكي من كل قلبها
وكل ماحاول يمسح ع راسها بعداته عنها وغمت وجهها وكملت بكاء
سمعو الجدة وسعاد صوت بكائها
رفعت الجدة مُنية وطلعت من الدار
قعمزت سعاد جنب محمد
سعاد : خيرها ؟
تنهد
محمد : ماتبينيش نسافر
سعاد : متعلقة بيك هلبا
محمد : وحتى نا بس الله غالب
ابتسمت سعاد
سعاد : الله غالب
وطلعت
قعد محمد بروحه ويفكر في مُنية وكيف بيقدر ع فراقها