حبيبتي بكماء

الحلقة الخامسة

الكاتبةوعدالخضر

(( حبيبتي_بكماء ))

مرت اليلة صعبة ع الزوز مُنية و محمد كل واحد فيهم واخده التفكير ومش عارفه شن يدير

اشرقت شمس يوم جديد وكل واحد فيهم واخد قرار معين و ناوي يطبقه من هاليوم

ناضت مُنية كالمعتاد بدري توضت وصلت
لمت الصلاية وحطت راسها ع طرف سريرها وسالت منها دمعة بعد جات في بالها ذكريات الماضي مع محمد

قبل عدة سنوات :

مُنية قاعدة في السطح وتشوف لـ شروق الشمس

جاء محمد وقعمز جنبها و يتثاوب

تلفتت عليه

مُنية : شن نوضك بدري غريبه مش من عوايدك

حط يده ع فمه بـ نعاس

ضحكت عليه مُنية

مُنية : ههههههه شن الي جابرك تنوض وانت مازال نعسان

حط راسه ع كتفها

محمد : مالقيتك في دارك قلت اكيد في السطح جيت نقعد معاك

مسحت ع راسه

مُنية : مش لازم تكون معايا ديما

محمد : لا لازم

مُنية : باه تفرج ع شروق الشمس بما انك نضت وهك

محمد رفع راسه غطا الشمس بـ يد وشافلها واشر ع عيونها

محمد : اهيا شمسي مش محتاج شمس تانيه

و طاح راقد

ضحكت بـ مرح

مُنية : ههههههههههه غير أسند روحك بعدين نتفاهمو

محمد : نبي نررررقد

مُنية : ارقد لـ داخل باه

محمد : مانبيش بنرقد اهنيا

مُنية : اياه علينا نوض بلا عباطة

رفع راسه

محمد : منو الاكبر انا ولا انتي

مالت بـ راسها وقلبت عيونها من الدسكه الي ديما يعاود فيها

محمد : ماتقلبيلي عيونك هك جاوبي

ابتسمتله ببرود

مُنية : انــت اكبر

جبد يدها وطيحها جنبه وغمض عيونه

محمد : باه هي نني

ناضت ونفضت شعرها من التراب

مُنية : ياوخيتي كبير في العمر بس لكن العقل لا

فتح عيونه وشافلها

محمد : انتي الي عقلك كبير بزايده وتفهمي في كل شي

هزت كتفها بـ فخر

ضحك وغمض عيونه مره اخرى

محمد : مهم اكبر منك وخلاص

مُنية : العقل مني والعمر منك

اشر عليها بـ صبعه

محمد : بالزبط ?

ضرباته ع بطنه

ناض شد بطنه

محمد : اخخخ ، علاش هك يااميرتي بس

وقفت نفضت يديها

مُنية : انهض ايها الفارس

وقف بسرعة ودار التحية

محمد : تحت أمرك أميرتي

مُنية : ههههههه اذهب لغرفتك ونام هناك الآن

ضرب الارض بـ رجله وحياها ومشا قدامها مشية الجنود

انفقعت من الضحك

تلفت عليها ورفع حاجبه

وقاللها بكل جدية

محمد : مابك أميرتي ؟

كتمت ضحكتها

محمد : معاش تضحكي ??

مُنية : ههههههه هيا امشي دارك ساادنا هبال

محمد : ماشي باااي ?

---

قطع سيل ذكرياتها صوت تخبيط الباب

مسحت دموعها بسرعة

انفتح الباب

سعاد : تعالي افطري

هزت بـ راسها ايجابا

طلعت وسكرت الباب وراها

قعمزت ع الطاولة لقيتهم كلهم متجمعين ماعدا محمد

بدت تاكل ومتجاهله عدم وجوده

ابراهيم : وين محمد

سعاد : طلع من الصبح قال عنده موضوع بيكمله

مُنية :
غريبة ناض بدري مش من عوايده ! زعما وين مشا ، اووف مادخلني فيه يمشي وين مايبي ماناقصني غير انشيل همه ?? ”

عند محمد

ناض الصبح بدري صلى وبدل ملابسه وطلع طول
مش عارف وين بيمشي بس قرر انه لازم يطلع و يبعد عنها ع قد مايقدر ويتجنب يقرب منها لـانها هك طلبت وطلابتها عنده أوامر

قعد يمشي في الشوارع ومش عارف راسه من رجليه هايم وسارح وخلاص

فجأة سمع صوت كلاكس عالي

وصوت تخبيط ع الروشن

فاق ع روحه وتلفتت ع مصدر الصوت

لقاه راجل هايج والباين مش ناوي خير

فتح الروشن بشوية

وشاف للراجل

الراجل : افتح الباب

فتح الباب ونزله بـ عدم مبالاة

محمد : خير شن في ؟

الراجل : خييير والله ياخوي وخرت ع سيارتك وضربتها من غير مانقصد بس انت كنت واقف وماتردش ودنيا زحمه وحال البلاد صعب وتطلع من الصبح اتدور ع لقمة عيشك وو……

وقعد يحكي في معاناته لـ محمد ومحمد ولا ع باله بعد دقائق

الراجل : يااخ تسمع فيا

انتبه لـ روحه

محمد : اي اي معاك ، وسيارتك متكلف بـ تصليحها ولا يهمك

فرح الراجل

الراجل : بارك الله فييك والله مفروض اني الي نصلحهالك لكن زي ماقتلك وضع البلاد ومافيش سيولة و توقف في المصرف و…

وجاء يبدأ مرة أخرى

محمد : لالا عادي عادي انصلحها ليك تمام

الراجل : اي تمام نعرف ميكانيكي كويس هلبا و خدمته نظيفة واسعاره رخيصة وامراعي اوضاع الناس لأن مافيش

محمد رد عليه بسرعة

محمد : اي اي خلاص هي نمشوله

ابتسم الراجل وركب في سيارته

ومحمد نفس الشي

محمد :
” اياه عليك نفخ وخلاص الراجل تقول بالع راديو مايهفت بكل شكله بيكون يوم شاق ??‍♂ ”

وصلو للورشة ونزلو الزوز وبدأ الراجل يهدرز مره اخرى ومحمد يساير مره ويسكت مره لين طارتله

محمد : ياراجل انت ماعندكش خدمة ولا كيف قاعد تنفخ في راسي من الصبح مش ناقصني راه واصلة عندي للحد

الراجل : ???

تنهد محمد بـ تعب

محمد : معليش

الراجل : لالا عادي صار خير هي خل انكملك بعد حطينا الغداء يهرب هذا

الراجل : لالا عادي صار خير هي خل انكملك بعد حطينا الغداء وشمرت ع ايديا يهرب هذاك الضي علينا وينوضو العويله يتعايطو تقول الحرب العالمية الثانيه قلت والله ماصاير منه هالغذاء خيرلي انوض نتكى و خلاص ومع نوضتي تجي رجلي ع طرف السفرة ويتنقلب على وجهي هذيك المبكبكه الجارية ??

محمد انفقع بالضحك

وقعدو يهدرزو وحاول محمد يغير جوه بس كل شوية يتذكر مُنية وقلبه يوجعه

عند مُنية

روح بيها بوها من المعهد
استغربت ان بوها الي روح بيها مش محمد

خشت البيت ومالقت اي اثر لـ محمد جت بتسأل امها عليه بس منعها عقلها

ع الغداء
قعمزت مُنية و كرسي محمد جنبها فاضي بدت في الاكل واتجاهلت شعورها بالخوف عليه

بعد دقائق

تكلم بوها

ابراهيم : سعاد امال ماروح محمد

ردت بالنفي

ابراهيم : بِنان بنتي جيبي تلفيوني خل نشوف ولد عمك وينه

مشت تجري وسرعان مارجعت والتلفيون يتصل في يدها

ابراهيم : منو ؟

بِنان : مـحـــمـد

مُنية بعد سمعت اسم محمد ركزت في كل كلمة عسى ولعلا تعرف شن صاير معاه

رد ابراهيم : توا كنا في سيرتك والله…. اها اي ربي يعاونك… ان شاء الله …. في حفظ الرحمان …. مع سلامة

وسكر

سعاد : شن قالك

ابراهيم : ……

قطعت كلامه بِنان

بِنان : بااااارد

شافولها كلهم

بِنان : تبزع المشروب ع الطاااولة ??‍♀

سعاد : مُنية جيبي فوطة من المطبخ وتعالي

ناضت مُنية بشوووية

سعاد : ها شن قلت

شافت لـ مُنية

سعاد : فوطة يا مُنية سمعتيني ؟

اشرت بمعنى : اي اي ماشيه

مشت تجري و رجعت بسرعة لقيتهم ياكلو وساكتين

مدت الفوطة بـ كسل لـ بِنان وفقدت الأمل بإنها تعرف عنه اي شي

مُنية :
” اصلا عادي مش ضروري نعرف وينه ?? ”

مر اليوم وجاء الليل

التزمت مُنية دارها وماتعشت معاهم بيش ماتشوف محمد كان روح

بعد العشاء

خبطت بِنان باب الدار

اشرت بمعنى : خيرك ؟

بِنان : قتلك ماما خليتلك عشاك في الكوشة

اشرت بمعنى :باه اسمعي روح محمد ؟

بِنان : انلا مازال

اشرت بمعنى : باه سكري الباب وراك

سكرت الباب وطلعت

فتحت مُنية تلفيونها وكسدت عليه

مع الساعه 12 جاعت حطت تلفونها ع جنب وشافت من الروشن مالقت سيارة محمد تطمنت انه مش موجود

مُنية :
” احسن مازال ماروح خل نمشي ناكل بسرعة ونجي ع اساس ماطلعتش من الدار بكل ”

نزلت تجري للمطبخ

فتحت الباب لقت …