حبيبتي بكماء
الحلقة السادسة
الكاتبةوعدالخضر
(( حبيبتي_بكماء ))
لقت محمد مقعمز وياكل
انخلعت وشهقت
شافلها بعدم مبالاة ونزل راسه في الصحن
محمد :وخيرك انخلعتي هك شفتي شيطان ؟
قدمت بتجاه شيشة المياه
فتحت الشيشه وتناولت كوب وسكبت لـ روحها وقعمزت مقابلته
رفع راسه عليها
شافتله بتفحص
اشرت بمعنى : وانت شن تقل ع الشياطين ؟
شافلها بـ غضب
ضرب الطاولة بيده وقرب منها
انخلعت مُنية وبانو علامات التوتر ع وجهها
شافلها بتمعن
باعد عنها وطلع
مُنية تنفست الصعداء
مُنية :
” ووك للحظه حسيته بيقتلي بس علاش تراجع وبعد عني ”
جبدت السفرة وبدت تاكل من نفس صحنه
ثواني و رن تلفيون محمد ال كان محطوط في الطاولة مدت يدها بتشوف من المتصل في هالوقت
خش عليها محمد وكان اكثر هدوء
شافلها وهي تاكل من صحنه
رفعت راسها
وحطت الكاشيك بخوف
قرب منها
خافت اكتر
رفع تلفيونه وقاللها
محمد : كملي ماكلتك وانتي تقول فار كل من قرب منك ترعشي ?
اشرت بمعنى : وعلاش تقرب مني اصلا
رفع تلفيونه لـ فوق بيش اتشوفه
محمد : جيت بنرفع تلفيوني الي قريب تاكليه بعيونك
تحشمت ونزلت راسها
باعد شويه
رفعت راسها لقاته مازال واقف
رفعت حاجبها
قرب منها اكتر
رفع صحنه ومشا
محمد : معاش تاكلي من صحني
وطلع وسكر الباب وراه
مُنية :
” هذا شنوو تقول فيلم رعب خاش طالع وعيونه تخوف يمي حتى العشاء معاش نبيه ”
وطارت جري لـ دارها وهي طالعه سمعت صوته يتكلم قربت من الباب ال كان شبه مغلق وحطت اذنها بتسمع مع من يتكلم
محمد : أي تمام غدوة نكون عندك باش مهندسة… ههههههه تمام مرام …. اي عادي امتى ماتبي…واني اكثر…
اول ماسمعت مُنية كلمة واني اكثر قربت اكتر من الباب وتجي طايحه في نص الدار
شافلها محمد ورفع حاجبه ورجع لـ مكالمته
محمد : تمام مرام غدوة نتلاقو…مع سلامة
سكر التلفيون وحطه في السرير وتلفت عليها لقاها مازال طايحه
محمد : امطولة ع هالوضعية ؟
تحشمت وناضت
اشرت بمعنى : ها لا اصلا جيت بنقولك…
قاطعها وقال
محمد : مانبيش نعرف شن تبي تقولي
اشر ع الباب
محمد : بنرقد لو سمحتي ، و اي مره أخرى معاش تتدخلي في شي مايعنيك و معاش نبي نشوفك في داري تسمعي ولا
نزلت عيونها بـ حزن
طلعت و سكرت الباب وراها بشوية
ركبت دارها
وارتمت ع سريرها وقعدت تبكي من طريقة تعامل محمد الجافة اتجاهها
بكت لين خداها النوم
عند محمد :
اول ما طلعت مُنية
ارتمى ع سريره وغمض عيونه بـ حزن اكبر من حزنها
محمد :
” ااااخ كيف يهون عليا نعامل أميرتي بـ بالطريقة لكن هي الي طلبت مني ندير هك واني ماغلطتش في شي نفذت كلامها بس لا اكتر ولا اقل ، يارب صبرني ”
غمض عيونه وحاول يرقد بس ماقدرش و عدا اليل كله تفكير
في صباح يوم جديد :
خبطت سعاد ع باب دار مُنية ماردت خبطت مرتين وتلاته واربعه ونفس الشي
فتحت الباب بشوية لقت مُنية راقده
نوضتها بشوية
فتحت مُنية عيونها بتعب
سعاد : بنتي فيك شي ؟
هزت راسها نفيً
سعاد : باه نوضي افطري نستنو فيك من امبكري
ابتسمتلها
بعد دقائق
في طاولة الطعام
قعمزت مُنية بتعب ومااستغربت عدم وجود محمد
ابراهيم : بنتي وتي روحك بيش انوصلك
بِنان : مش ع اساس بيوصلها محمد
ابراهيم : محمد قال مش فاضي هاليومين
سمعت مُنية الكلام وعرفت ان محمد مايبيش يشوفها ولا يتكلم معاها
ناضت وبدلت ومشت للمعهد مع بوها
وطول الوقت كانت حزينة وسارحه
وقت المرواح
طلعت لقت سيارة محمد واقفه
شافتله وماعدلت عليه
ضغط ع الكلاكس عدة مرات بس ماتلفتت عليه
نزل من السيارة و النار شايطه فيه
محمد : امالا ماتسمعيش انتي
ماعدلت عليه
وقف قدامها
ماعدلت عليه
محمد : مُنية نكلم فيك
شافتله
اشرت بمعنى : خيرك ؟
محمد : لو تكرمتي و ركبتي في السيارة بيش نوصلك ورايا 1000 موضوع بنكمله
اشرت بمعنى : كمل مواضيعك مادخلنيش فيك ومانبيكش اتوصلني توا يجي بوي ويروح بيا
محمد : عمي مش فاضي قالي نروح بيك
اشرت بمعنى : خلاص بـ نستناه اهني لين يفضى ويروح بيا
محمد : بالله بطلي جو الزايد الي اتديري فيه
ماعدلت عليه
محمد : مُنية نكلم فيك
ولا عبراته
تلفت يمين ويسار لقى الشارع فاضي وهووب يرفعها ويحطها في السيارة وهي تضرب فيه
سكر عليها الباب وركب جنبها وولع السيارة وانطلق
اشرت بمعنى : نزززلني مانبيش نركب معااااااك
شافلها بعدم مبالاة وكمل طريقه
اشرت بمعنى : محممد قتلك نزلني ولا ننزل بروحي راه
محمد : انزلي من شادك
فتحت الباب وجت بتنزل
جبدها من يدها طاحت عليه وسكر الباب ووقف السيارة
محمد : شن الي اديري فيه هذا يامجنونه تبي تقتلي روحك يعني ولا كيف تعبت الزف معاش نقدر نتحمل اكثر
تابع الحلقة السادسة
اشرت بمعنى : مش تعبت مني خلاص اهرب زي ماهربت قبل اصلا في شنو فالح انت غير تهرب وقت نحتاجك اني الي مفروض نقول تعبت مش انت
ضرباته ع صدره
اشرت بمعنى : من شنو تعبت هااا قولي من شنو مش انت الي اتخلو الناس كلهم عنك مش انت الي فقدت النطق في يوم وليله مش انت الي قعدو يضحكو عليك ويقولو البكوشة جت والبكوشة مشت من شنو تعبت وانت الي تعرضت ليه اني ربعه ماصارلك
انصدم من كلامها وقعد يشوفلها وقلبه متقطع عليها
غمت وجهها وقعدت تبكي
حضنها بين يديه وقعد يهدي فيها
وفجأة …
تلفيونه رن
باعدت عنه شوية ومسحت دموعها
محمد : احسن ؟
هزت براسها ايجابا
فتح التلفيون و رد
محمد : ايوا مرام… اي اي جاي توا … لالا نص ساعة بالكتير ونكون عندك
سكر الهاتف وحطه جنبه
شاف لـ مُنية بـ حنان
محمد : تبي نشريلك مياه ولا حاجه اتهدي بيها روحك
اشرت بمعنى : لا مانبيش شي امشي لـ مرام تأخرت عليها
محمد : نعم !
اشرت بمعنى : الي سمعته
حط يده ع كتفها
محمد : القصه مش زي ماانتي فاهمتيها مرام هذي…
قاطعت كلامه
اشرت بمعنى : مانبيش نعرف شي هذي حياتك وانت حر فيها روح بيا بس
محمد : اخخخ ?
ولع السيارة وانطلق
وصلو قدام الباب
جت مُنية بتنزل استوقفها محمد
محمد : مُنية بنسألك سؤال واحد واجبي
هزت براسها ايجابا
محمد : تبيني نبعد عنك ؟
ترددت في الإجابة
رن تليفون محمد وكانت المتصله مرام
شافت مُنية للتيلفون
رفع محمد التلفيون وقلبه
اشرت بمعنى : شكلها استاحشاتك
محمد استغرب
محمد : مافهمتك ؟
اشرت بمعنى : اي نبيك تبعد عني وللابد و زي ماليك حياتك ليا حياتي
ونزلت بسرعة ودموعها في عيونها
مُنية :
” معقولة ارتبط معقولة حب غيري معقولة يدير هك بس هو عمره ماصرحلي بحبه حتى زمان عمره ماقالي نحبك معقولة كنت نتوهم وفهمت اهتمامه بيا غلط ااه”
ركبت لـ دارها بسرعة و رقدت
مرت الايام :
ومحمد بعيد عنها وهي بعيده عنه ومايتلاقو الا في القليل النادر
في يوم
كانو الكل مجتمعين في طاولة العشاء
محمد : عمي بناخد غدوة بننتقل
شافتله مُنية وهي مصدومة
ابراهيم : لـ وين ؟
محمد : شريت شقه وبننتقل ليها
سعاد : علاش ياوليدي بتنقتل قصرنا معاك في شي ؟
محمد : لالا ياخالتي غير المسافة بعيده من اهني و الشقه اقرب لخدمتي
سعاد : ماتلقى خدمة قريبه ياوليدي والله تعودنا عليك هلبا
محمد : الله غالب ياخالتي هذا هو
ابراهيم : الله غالب ، ربي يوفقكك ان شاء الله وامتى ماتبي شي كلمني وبيت عمك ديما مفتوح ليك
سعاد : تعال زورنا ديما ياوليدي ماتقطعنا
محمد : اي كل مانحصل فرصة بـ نجيكم
ناضت مُنية لـ دارها ودموعها امغرقتها
بعد العشاء
كان محمد في داره ويرتب في ملابسه في الشنطة
سمع صوت الباب يخبط
محمد : تــفــضــل !
انفتح الباب وخشت مُنية امنزله عيونها لـ تحت و امشبكه يديها في بعض
محمد استغرب من جيتها
محمد : في شي ؟
رفعت راسها بشوية
شافلها بتمعن
محمد : تكلمي عادي
اشرت بمعنى : ماتمشي
محمد : كيف ؟
اشرت بمعنى : ماتمشي لـلشقة
محمد : علاش ؟
مسحت دمعتها ببراءة ونزلت وراها عشرات الدموع
محمد رق قلبه عليها وقرب منها ومدلها منديل
شدت يده
اشرت بمعنى : مانبيش منديل ، نبيك ماتمشي بالله عليك محمد ماتمشي وتخليني مره اخرى مانقدر والله
وانهارت ع الارض
نزل ع الارض وقرب منها
محمد : خلاااص اششششش معاش تبكي مُنية خلاص بالله عليك ماتبكي ، خلاص مابنمشي لـ اي مكان قاعد معاك
رفعت راسها
اشرت بمعنى : احلف
محمد : والله خلاص بنقعد معاكم
فرحت ومسحت دموعها ببراءة وابتسمتله بـ فرح
ضحك معاها
اشرت بمعنى : اسفه كان غلطت معاك
ربت عليها
محمد : حتى نا اسف
ابتسمت
محمد : صافي يا لبن ?
اشرت بمعنى : حليب ياقشطة ?
وضحكو مع بعض
محمد : مُنية نفتحو صفحه جديده ؟
اشرت بمعنى : أميرتي !
ضحك
محمد : اوك أميرتي
هزت بـ راسها ايجابا