حبيبتي بكماء

الحلقة 14

الكاتبةوعدالخضر

(( حبيبتي_بكماء ))

عائشة : من وين بيجي الخير بس بتتزوج بكوشة يامحمد والله ماهي صايره !

محمد : كيف ؟

عائشة : الي سمعته ماهي صايره ومستحيل تتزوجها الزين كله عندنا
واشرت ع بناتها وبنات اختها
عائشة : وتاخد بكوشه

محمد : ومن قالك اندور في الزين انا وبعدين مُنية اصل الزين كله واحلى من بناتكم ، اني نبيها هي بكوشة مجنونه مشلوله نبيها

عائشة : حلم إبليس في الجنه ! توا بتعصي كلامي ع خاطرها

محمد : خالتي مع احترامي ليك بس انا ماناخدش في رايك اني نبيها وبناخدها ولو انطبقت السماء ع الأرض ، وعزمتكم لأن واجب عليا و لأنكم من ريحة امي رحمة الله عليها وهذا يعتبر ذوق مني لأنكم ماعمركم درتو واجبكم معايا ولا تندرو عليا ميت ولا حي

شافتله عائشة بـ حزن

محمد : مانبيش حزنكم ولا نبي منكم شي غير زواجي من مُنية ماحدش يتدخل فيه لأن شي محتوم حدوثه

وطلع

عند مُنية

نزلت ورى البنات ووقفت ورى الباب بصدمه بعد سمعت عائشة تقول
” عائشة : من وين بيجي الخير بس بتتزوج بكوشة يامحمد والله ماهي صايره ! ”
ونزلت دموعها

اشرت بمعنى : مابيخوله يتزوجني ياريان ?
ردت عليها ريان بصوت واطي وتحاول تهدئها
ريان : استهدي بالله ان شاء الله خير

وبعد كمل حديثهم طلع محمد ولقاها تبكي شافتله بـ حزن وركبت لـ غرفتها

سكرت باب الغرفة وانهارت بالبكاء

ريان : حبيبتي ماتبكي خلاااص سمعتي محمد كيف دافع عليك

اشرت بمعنى : هذا الي كنت خايفه منه من اولها قعدو يعايرو فيه بيا و اتسببتله بمشاكل مع أهله

ريان : وشن دخلك فيهم سمعتيهم كيف تكلمو عليك

اشرت بمعنى : الله غالب حتى لو كان تكلمو عليا مانرضى اتصير مشاكل بسببي ?

في ليل بعد رقدو الكل

كانت مُنية قاعده في سريرها وتبكي

سمعت صوت غريب في الروشن

رفعت راسها لقت محمد واقف تحت واشرلها بيش تنزل

نزلتله بهدوء ولقاته في الجنان الخلفي

اول ماوقفت قدامه حضنها بقوة

تمسكت فيه اكتر

مسح ع راسها

وباعد عنها شوي

محمد : ماعاش من يبكي عيون أميرتي الغاليه

نزلت عيونها لـ تحت

محمد : عارفتيني نحبك ولا

رفعت راسها وهزت إيجابا

محمد : خلاص امالا خليك واثقه فيا ونبيك تعرفي ان مافيش حد بيقدر يفرقنا مهما يكون

اشرت بمعنى : مانبيش قربك مني يبعد عنك هلبا ناس

ابتسملها
محمد : ومن قالك نبي الـ هلبا ناس هذوم اني نبيك انتي بسس قربك مني يغنيني عن الكل

حضناته اكتر

محمد : خلاص مافيش حد بيأثر علينا اوك ومهما مايقولو مايهمنا

هزت بـ راسها إيجابا
حط يده ع خدها
محمد : الي مايطول العنب حامضا عنه يقول صح

ضحكت
اشرت بمعنى : هههههههه صح

محمد : مانذوقوه هالعنب ?

قرب من وجهها

بعدت عنه

اشرت بمعنى : هههههههه مش توااا

محمد : هههههههه باهي باه امشي ارقدي

في صباح يوم جديد :

روحو خالات محمد من دون مايسلمو ع حد

وقعمزو الباقيين ع سفرة الفطور

ابراهيم : مبروك عليكم ياولادي ربي يتمملكم ع خير ، محمد خيرهم خالاتك طلعو بدري حتى فطور مافطرو ان شاء الله خير

محمد : مكانهم بعيد بس ، عمي بنقولك صاحبي و زوجته امدايريلنا لمه في حوشهم بمناسبة خطوبتنا بعد اذنك نبي مُنية تمشي معاي

ابراهيم : اني ماعندي مشكله عادي

محمد : مُنية شن رايك

اشرت بمعنى : باه عادي

محمد : تمام هي اني بنطلع تبو شي

سعاد : سلامتك ياوليدي

ريان بصوت واطي
ريان : نوضي بيش انوتيك

هزت مُنية بـ راسها ايجابا وناضو

ريان : امممم شن بتلبسي

اشرت بمعنى : حاجه مستوره لأن اصحاب محمد كلهم كانو برا و عندهم جو اللمات المختلطه

ريان : امممم صح كلامك تعالي نختارلك حاجه حلوه

وقعدو يختارو ويهدرزو

مع المغرب

خبطت بِنان الباب وخشت

بِنان : محمد يستنى فيك تحت

نزلته

قرب منها

محمد : طالعه تهبلي هلبا عليا هك راه

اشرت بمعنى : هههههه تحششم

وطلعو

بعد دقائق وصلو واستقبلوهم

وكانو الحاضرين
(حاتم وزوجته رانيا اصحاب البيت )
( عمر وزوجته أمل )

رانيا : تفضلو العشاء جاهز

قعمزو ع طاوله العشاء وبدو يهدرزو

ومنية ساكته

امل : مُنية شاركينا الحديث خيرك ساكته

شافت مُنية لـ محمد بإستنجاد

حط يده ع يد مُنية وضغط عليها محاولا يطمنها
محمد : #حبيبتي_بكماء

اتغيرت وجوه امل ورانيا بين الصدمه والشفقه

محمد : وهدرزتها حلوه هلبا ع فكرة لو كان عندكم ثقافة فهم لغة الإشارة كان نلتو شرف الهدرزه معاها ?

وابتسملهم بـ فخر

حاتم : بكل تأكيد هي تفضلو كملو أكلكم ?

بعد العشاء

بدت رانيا ترفع في الصحون

امل : نساعدك رانيا

رانيا : ياريت والله

رفعو الصحون واتجهو بيهم للمطبخ

رانيا : ريتيهاا طلعة بكوووشة

امل : يناري عليها سمحه لكن بكوشة وجعتني هلبا والله

رانيا : لكن محمد الي يوجع اكتر مسكين مايستاهل ياخد وحده بكوشة زيها

ع خشت مُنية وسمعت كلامهم

حطت الصحون الي كانت رافعتهم بقصد مساعدتهم وطلعت من المطبخ

شافو لبعض بإحراج

امل : ان شاء الله ما تكون سمعتنا بس

رانيا : ان شااء الله

وكملو السهرة و مُنية حزينه من الكلام الي سمعاته محمد حس بيها واستأذن منهم بيش يروحو

في السيارة :

كانت مُنية تشوف من الروشن وسارحه

فجأة حست السيارة وقفت تلفتت ع محمد

اشرت بمعنى : علاش وقفنا ؟

شد يدها
محمد : بيش نشوفو الأميرة خيرها زعلانه

اشرت بمعنى : لا مانيش زعلانه عادي

محمد : نعرفك بعد تكوني زعلانه ، في حد ضايقك زعلك في شي

اشرت بمعنى : لا

محمد : امال خيرك ؟

اشرت بمعنى : خلاص محمد

وشافت للروشن مره اخرى

اشرت بمعنى : كنت عارفه من الاول في كل مكان ح يتكلمو علينا في كل مره ح يقولو علاش واخد بكماء

جبدها من يدها بيش تلفت عليه

محمد : وفي كل مره ح نقولك خليك واثقه فيا وان مافيش حد بيأثر علينا ومهما مايقولو مايهمنا وان قربك مني يغنيني عن الكل ، مُنية ماتخليش كلام الناس يبعدنا عن بعض

اشرت بمعنى : نحبك اني والله بس مانبيش نظلمك معاي ومن الاول قتلك هك

محمد : ومن قالك تظلمي فيا بس اني نبيك هك وراضي بيك ونحبك مافيش حد دخله فينا و اي حد بيتكلم عليك ح نسكته

اشرت بمعنى : لأمتى بتقعد هك اكيد في يوم بتمل

محمد : مش ح نمل صدقيني في حد يمل من روحه

ابتسمتله

محمد : هههههه هي اوعديني ان كلام الناس معاش بيأثر فيك

اشرت بمعنى : وعد

محمد : و حتى ني نوعدك ونبيك تعرفي اني ح نقعد ديما متمسك بيك ، مُنية الساعه كم

شافت لـ ساعتها بإستغراب

اشرت بمعنى : 9 علاش ؟

محمد : مازال الوقت بدري ، تبي جيلاطي ؟

اشرت بمعنى : هههههه تحكي بجد ؟

محمد : yes ??

مشو شرو جيلاطي وهدرزو وروحو