رواية ضحايا للكاتبة زهور جمال الدين

#ضحايا

بقلم زهور جمال الدين ⚘
?الحلقه التاسعه ?

_

فى حوش عبدالسلام

-فاطمه تحكى فالتليفون/ ياوليدى هيا كلمتنى
-قيس/ ياعنجد نجيب دهب اختى ..هدا مامزال ..
-فاطمه / المراة بنتها تقرا .. وهيا مرات تمشى لى حياش ولادها .. ماتقدرش تتحمل مسؤليته الدهب يقعد فالحوش
-قيس/ يجيبولكم ولادها
-فاطمه / ياوليدى انت خوها واولى تمشى تجيب حاجتها
-قيس/ باهى تو نشبح كانا فضيت تو نمشى
-فاطمه / راجى شوى اهو بوك خش يبي يكلمك
-قيس/ يمى انا ..
-عبدالسلام / شن حالك ياقيس
-قيس/ اهلا يابوى
-عبدالسلام/ انت وين
-قيس/ انا بعيد هلبا راهو قريب نخش الزاويه
-عبدالسلام / اول ماتكمل الشغل اللى ماشيله برة لى حوش نسيبك جيب الحاجات اللى يعطوهملك
-قيس/ حاجات النساوين انا مانفهمش فيها ولا ليا علاقه بيها
-عبدالسلام/ انا قلتلك برة .. خلاص
-قيس/ منمشيش بروحى انا … قول لى امى توتى روحها تو نفوت عليها تمشى معاى
-عبدالسلام / كمل شغلك وبعتالى تعالالها
-قيس/ لا لا قوللها توتى روحها بنجيها .. انا عارفه اليوم خارب من اوله

_________________________________________

–

فى مصر …
-شاهين / رتبى حوايجك فالدولاب .. وحوايجى تو انساويهم انا
-يارا تحشمت / لا تو نحطهم فالدولاب .. الفردة الثانيه
-شاهين/لا عادى مفيش داعى .. نبيش نتبعك
-يارا/ لا مفيش تعب .. غير حطهملى الشناطى عالسرير مانقدرش نقيمهم
-شاهين / باهى
وقام الشناطى وحطهم عالسرير ..
تلفت للدولاب فتح الخزنه الصغيرة متع الفندق.. دخل التاكو ودارلها رقم سري … وقام شنطه صغيرة لونها اسودعالسرير وفتحها … طلع منها اوراق وحطهم فالخزنه … وطلع فلوس
..دولارات من فئة الميه …عد منهم الف دولار ومدهم لى يارا
-شاهين / هادو خليهم معاك … واصرفى منهم
-يارا تحشمت مامدتش ايدها / صرف شنو … اهو معاك انا وانت تصرف
-شاهين ماد الفلوس/ لا خليهم معاك ..وفى هلبا ماكينات صرافه ..صرفى منهم للمصري بالشوى
-يارا مبتش تمد يدها / باهى صرفهملى بالمصري
-شاهين / هاك خوديهم .. واعطينى قداش ماتبى نصرفلك .. بس ننصحك خليهم دولار وصرفى بالشوى
-مدت يدها خدتهم وطلعت ميتين دولار/ باهى صرفلى هادوما بس توة
-شاهين / باهى …
وحط يدها عالخزنه / الرقم السري 1993 مواليدك … امتى ماتبى فلوس افتحيها وخودى
يارا قعدت ساكته .. حست ان المعاملة مش بالمثل .. هوا غرقها بي كرمه .. وهيا تعامل فيه بي جفاف
-شاهين/ نستادنك توة مننزل

________________________________________

–

فى حوش الخامسه

قيس وصل هوا وامه …. نزلت فاطمه طقطقت عالباب ..
فتحت …فتحتلها الفى وهيا تعيط
-الفى/ امى ياعمتى فاطمه امى
-فاطمه انخلعت / خيرها امك يابنيتى
طلعت الفى وخشت فاطمه تجرى للحوش بتشوف الخامسه

طلعت الفى تجرى لابسه سروال امريكانى اسود وتيشرت احمر وماليا سودة ولامه شعرها فوق … وقيس يشبحلها حاير خيرها ..فتح السيارة ونزل بسرعه …
الفى اطق على حوش خوها جلال/ مجيدة .. يا مجيدة افتحى …
-فتح حمزة ولد خوها وجت مجيدة تجرى/ خيرك يالفى
-الفى تخبط فخدودها / امى طاحت عليا وين جلال
-مجيدة/ جلال طلع هوا وعزيز توة .. خيرها عمتى

-فاطمه تنادى من فم الحوش/ ياقيس تعالة بسرعه قيم معاى عمتك
-قيس معرفش يتصرف/ اهو جايك ياام
خش قيس يجرى للحوش… ومشو الفى ومجيدة والصغار يجرو .. ونزلت امنه مرت عزيز هيا وصغارها ولحقوهم

خشو للحوش … قيس يقيم فالخامسه …لانها رزنت عليهم وهوا راجل بصحته قدر يقيمها
-الفى تبكى / يااام ماتموتيش …يااام
-قيس شبحلها / غطى شعرك وبري جيبي جلابيتك امشى مع امك بسرعه
-امنه تسلب فى جلابيتها لابسه قفطان تحتها / اهى جلابيتى البسيها بسرعه …
مجيدة وفاطمه وقيس يطلعو فى الخامسه وهادوكا الصغار يتباكو دارو دوشه …
ركبو الخامسه فالكرسى الخلفى .. وركبت معاها الفى .. وفاطمه من قدام …
طلع قيس يجرى بالسيارة ماشى لى مستشفى الخضراء

_________________________________________

–

فى حوش وردة …

فاتحة الفيس…

متتفرج … لقت شاهين منزل انه فى المطار ماشى لى مصر …من 9 ساعات …
فى خاطرها / زعما ليش رافعها لى مصر … يارتها ماتت لما طاحو عليها الماعين وافتكيت منها
مشت واطت فى التلفزيون وقعمزت جنب امها
-وردة / يااام شن رايك نمشو لى مصر
-امها عمتك ساسيه/ والله يابنيتى تعبانه ماعندنا مارافعنا ليها
-وردة/ الدكتور اللى عاينتى عنده عالعظام الشهور اللى فاتو كلمنى قبل شوى
-ساسيه/ وشن يبي
-وردة/ قالى جيبي امك الايام هادى .. عنده جهاز جديد جايبينه متع هشاشه العظام
-ساسيه/ باهى نحضرو عرس منير ولد خالتك ونمشو
-وردة/ تى منو منير ياام .. الدكتور مسافر امريكا بعد اربعه ايام
-ساسيه/ باهى كان مشيناله … نلحقو نروحونحضرو العرس
-وردة / اكيدة … ونقدرو انروحو حتى فى نفس اليوم على نفس الطيارة
-ساسيه / مدامه هكى احجزيلنا امالا

-وردة/ باهى .. خلى نكلم صاحبتى اللى تشتغل فى شركه الطيران تحجزلنا ?

___________________________________________

_

فى مستشفى الخضراء

فى الممر مقعمزين الفى وقيس وامه .. والخامسه فى الغرفه يراجو فيها …
الفى مقعمزة تبكى بحرارة
-قيس يفنص/ سكتيها ياام .. الناس تتفرج علينا
-فاطمه / اميمتها واجعتها ياوليدى
قيس متكنطى .. والفى تمسح فى دموعها
-فاطمه / يابنيتى سامحينى ولدى قيس واعر شوى .. ماتزعليش منه
الفى تبكى وتخمم فى امها وخلاص …
-قيس يبيها تسكت / مش معقولة يمى
-فاطمه تساوى فالامور/ باهى ياوليدى اهى بتسكت
خشو جلال وعزيز مع بعضهم …
-جلال / خيرها امك يا الفى … شن كلت
-الفى تبكى/ والله ماندرى عليها كنت فى المطبح وطلعت نلقاها مغمى عليها
-عزيز مد يده يسلم/ اهلين قيس شنحالك
-جلال يسلم / بارك الله فيك يا قيس …جيت فالوقت المناسب … شنحالك عمتى فاطمه
-قيس/ كله بتصاخير الله .. وربي يحفظها الوالدة
-عزيز حضن الفى / ماتعييش مالبكى شورك
قيس تلفت للجهه الثانيه مش عاجبه الاحضان فالممر
طلع الدكتور وطمنهم ان الحالة هبوط فالسكر .. ويقدرو يروح بيها بعد مااقعد ساعه فى الملاحظه
-قيس / امالا نستادنكم انا .. وانشاءالله لاباس عليها
-عزيز / لا يوريك باس
والفى تشبحله من ورا خوتها …
-فاطمه / انشاءالله لاباس عليها …
-قيس/ ترا اعطينى رقمك ياعزيز .. بيش نطمنو عالحاجه
-عزيز / قصدك ماعندكش رقمى .. غريبه
-قيس/ ترا سميلى الارقام
اعطاه عزيز ارقام تليفونه … ضربهم قيس .. شرين عند عزيز .. طلع قيس يتصل بك
-قيس يشبح لى الفى / هدا رقمى
-عزيز/ رقمك عندى ومكتوب بالاسم .. شوف طلعلى قيس
الفى مبتسمه … وفهمت قصده
بيطلعو قيس وفاطمه وخلو عمتك الخامسه وصغارها
-فاطمه تسلم على الفى/ تو نجو بعتالى انا وعمك عبدالسلام نطمنو عليها
-الفى تشبح لى قيس/ مرحبتين بيكم تفضلو

___________________________________________

–

فالليل …

روح شاهين للغرفه … طقطق من برة قبل …وقعد شوى وفتح الباب وخش .. لقى يارا راقدة …لكن واضح انها مغمضه عيونها وخلاص بالكدب …
خش شاهين للحمام .. توضا .. وطلع صلى العشى … وحول تيشيرته … وهيا تشبحله بنص عين بيش مايزبطهاش فايقه انخلعت وتلفتت للجهه الثانيه .. وهوا قعد يضحك …
غير حوايجه .. وجى اتكى فى سريره … حول الغطى ورقد عالسرير.. وحط الغطاء .. فتح التلفزيون ونقص فى صوته
-شاهين/ يارا … يارا رقدتى
هيا ساكته تبيش تدوى ..
-شاهين / ياراااا.. عارفك فايقه راهو
-يارا من تحت الغطى/ نعم
-شاهين / امى رفعوها للعيادة اليوم
تلفتتله وقعمزت عالسرير لابسه تيشيرت وشعرها مفتوح .. ياودى هوا معش متحمل يشوفها وماياخدهاش فى حضنه ….
-يارا / خيرها عمتى .. شن صارلها
-شاهين / كلمنى جلال حكالى … وكان نقولك من رفعها للمستشفى
-يارا/ شكون
-شاهين/ خوك قيس وامك
-يارا/ معقولة
-شاهين/ كانو ماشيين عندنا …ولما وصلو لقوها مغمى عليها والاولاد مهناش …
-يارا / الحمدلله …ربك ستر …
تلفتتله/ كلمت حتى امك
-شاهين / كلمتهابكرى لما قالى جلال
– يارا/ باهى تكلمهالى
-شاهين/ امى ممكن رقدت توة .. لكن كلمى الفى عالماسنجر متعها تو ترد عليك اكيدة ساهرة
-يارا/ ماسنجر شنهوا
-تلفتلها مستغرب/ الفيس بوك
-يارا/ ماعنديش
-شاهين/ معقولةةةةةة
-يارا/ والله ماعندى
-شاهين / تو نتصلك من الماسنجر متاعى.. وبعد تكملى مكالمه نفتحلك فيس
-يارا/ عادى…
اتصل بي الفى .. وقاللها تبيك يارا …وعطاها السماعه حطتها فى ودنها والتليفون قدامها وتتكلم وتتشد عاالاحوال
وصلت رساله من Warda Sh ” غدوة بنوصل مصر ”
يارا ماتعرفش تمثل .. صوتها طول انخنق ..
-يارا/ باهى الف سلامه عليها عمتى .. سلمى عليها وغدوة الصبح تو نكلمها ثانى
وصكرت الخط … وجهها متغير …
-شاهين/ خيرك فى حاجه
-يارا / لا مافى شى
ومدتله التليفون … خداه حطه فى جنبه .. وفتح التلفزيون
حط على قناة ليبيه …يشبح لى يارا لقاها تلفتت للجهه الثانيه مغطيه نص جسمها ..
فتح تليفونه … يلاقى وردة باعتتله رسالة …فتحها لقى رسالة منها انها بتوصل غدوة … زبط ان يارا شافت الرسالة
واضايقت??
-شاهين/ وردة بنت عمى بعتتلى رسالة بتجى غدوة
-تافتتله وكأنها تراجى فيه يجيب السيرة/ طبعا .. لازم تكلم حبيب القلب هوا الاول وتقوله هانى جايه
-شاهين انصدمت فى عصبيتها / شن تحكى انتى
-يارا / قلت ادب
-شاهين عارفه غلط لكن يغطى / يعنى شن فيها كانا بعتتلى ..بالك تبى حجز فندق ولا حاجه
-يارا / اسمع … اقسم بدات الله كانا تجيبها معانا فالفندق مانى قاعدة فيها ولما نروح لى ليبيا
-شاهين/ انتى تحلفى عليا
-يارا حست انها امؤفرتها / هيا ليش تكلم فيك باهى
-شاهين قايم تليفونه يتصل/ اللى يشوف عياطك يقول الغيرة مقطعه بعضها …
تليفونها يشرين ..
-ردت وردة/ ايوووة

-شاهين فتح المايك / بتوصلى غدوة لى مصر
-وردة بدلع/ انشاءالله ..كلمتك نبيك تحجزلى فى الفندق اللى نازل فيه
يارا شبحتله متع اللى قلتلك عليه صار ?
-شاهين/ انا غدوة ماشى للمغرب .. خسارة كنهدا راهو تلاقينا
-وردة / وين بتقعد فالمغرب
-شاهين / فى مراكش
-وردة / اهاا ربي يهنيكم ..
-شاهين / انتو بتجو للقاهرة ولا اسكندريه
-وردة/ لا لا ماصارش من المشى .. امى جنبى قالتلى تبى تحضر عرس ولد اختها
-شاهين/ باهى مبروك عليه …
وصكر الخط …
-يارا/ شفت …لما قلتلها بتطلع بطلت من الجيان
-شاهين شبحلها بغضب/ وانا شن دخلى بيها …
-يارا بتتغطى/ لا لا مادخلكش .. غير عاجبك تتبيعها ليك
-شاهين / اليوم كنت عند صاحبي زوجته راقدة فالمستشفى
.. شن رايك تمشى معاى غدوة
-يارا / لا …. تصبح على خير
-شاهين زعل/ ليلتك سعيدة

___________________________________________

_

ثانى يوم الصبح

-شاهين مقعمز على حاشيه السري وعاطيها بالضهر / لا والله براحتك .. مانغصبش عليك .. لو تبى تمشى معاى باهى .. ماتبيش براحتك
-يارا متكيه على سريرها ومتغطيه/ باهى هيا شن عندها
-شاهين / كانسل
-يارا/ يارووووحى .. عندها صغار
-شاهين / عندهم ثلاث بنات
-يارا/ لا حول ولا قوة الا بالله …
شبحتله على جنب/ اسمع … منمشى معاك … مش على خاطرك .. لكن المراة سخفتنى
-شاهين/ باهى سقدى روحك نوضى غيري لان الزيارة قريب اتم

-يارا/ باهى نوض اطلع خلي نغير حوايجى بسرعه بيش منعطلكش
– رقد عالسرير ورجليه لوطا وقام يده فاتح تليفونه / والله مش بطليعنى من الدار بالسيف عليا.. انا مزال مش نازل
-قامت الغطا وحدفاته وماشيه للحمام / قلت ادب
-قام جسمه قعمز/ نعم شن قلتى ??
-شبحتله بخوف/ ماقلتش شى
-وقف وقرب وجهه منها / هادى ثانى مرة تقوليهالى
-يارا عاطياته بالضهر / انا ماقلتش شى
-شاهين/ الاولة نفوتها والثانيه نفوتها .. لكن الثالثه نحاسب عليها
-يارا / خلى نخش الحمام فيسع بيش مانعطلكش
ومشت تجرى للحمام وصكرت الباب
-شاهين واقف يضحك / سبحان الله ربي قداش عاطيك خفه دم
ورجع اتكى على سريره ايراجى فيها

_________________________________________

–

فالمستشفى …..

خشت يارا وشاهين … مشو لى قسم الاورام …
هوا لابس سروال وتيشرت … وهيا لابسه سروال اسود وبلوزة موف ووشاح موف فى الفضى

شاهين لقى صاحبه سلم عليه ….

-صلاح/ اهلين شاهين
-شاهين / اهلا بيك صلاح …
واشر على يارا/ زوجتى
-صلاح / اهلين وخيتى ….
-يارا مبتسمه / اهلا بيك
-شاهين / يارا جاية بتزور العيلة عندك
-صلاح / عندها الدكتورة …خلى تطلع ونخشو للغرفه
-شاهين/ كيف حالها العيلة اليوم
-صلاح / تعبانه … واختها روحت
شاهين ويارا قعمزو عالكراسى جنب صلاح
-شاهين / معقولة ..كيف تخلى اختها وتروح
-صلاح/ راجله انضرب بي رصاصه … وغدوة توصل اختها الثانيه
-شاهين / وكيف بدير …متقدرش تخليها بروحها
-يارا/ انا نقعد معاها …
تلفتلها شاهين بي فرح واعجاب انها تفدى
-صلاح/ اوخيتى ماتقديهاش…والحق مانبوش انتعبوك
-يارا / لا واللع انا زى اوخيتها …وهيا ليله وحدة .. مابدير شى
-شاهين / بارك الله فيك يابنت الاوصول
يارا شبحت لى شاهين وابتسمتله .. وكانت اول مرة تبتسمله
طلعت الدكتورة .. وخش صلاح لى مرته بيش يقوللها ان شاهين بيخش …. يارا وشاهين قعدو بروحهم …
قرب شاهين من يارا / انا فخور بيك
-يارا بدت ترعش لانه قرب منها هلبا / لو سمحت ابعد شوى

بعد عليها شاهين … وحس ان مزال عندها رهبه من وجوده جنبها ولاصق فيها … عقلها الباطن قاعد شاد لقطه اغتصابه ليها …والرهبه منه مازالت مستمرة عندها
ناداهم صلاح للغرفه .. وخشو زارو … وعرضت يارا على غادة مرت صلاح انها تبات معاها … ووافقت غادة على طول لانها ماعندهاش خيار ..وتبى حد يعاونها للدخول للحمام
نزل شاهين شرالها شفرة وركبهالها فى تليفونها وطلع هوا وصاحبه …فالغدى جابلها وجبه …وطلع
-غادة/ تعرفى …
-يارا/ اها
-غادة تتكلم بصعوبه / امك داعيتلك فى يوم مبارك اللى جابك ربي زوجه لى شاهين
-يارا/ ?
-غادة مغمضه عيونها / كان نحكيلك على شاهين للصبح ما نكملش .. لكن قوليلى وردة بنت عمه شن دارت
-يارا/ مانعرفهاش
-غادة/ جرت وراه لين قريب حفت … وهوا مش مدورها
-يارا/ قصدك من زمان اتبع فيه وهوا مايبيهاش
-غادة خدت طاسه الميه وشربت / من زماااان حتى قبل الثورة وياما دارتله مقالب لانها بليدة
-يارا / احكيلى
-غادة/ نحكيلك بالشوووية علياى… ولازم توعدينى انك ماتحكيش لى شاهين اللى حكيتهولك
-يارا / وعد

وقعدت تحكيلها على وردة … وعلى كيف كان يحارب زمان ايامات الثورة وغيرها من الحكايات

___________________________________________

–

ثانى يوم الصبح ….

قيس كالعادة يدير فى قهوته مع الساعه عشرة فى المطبخ
شرين تليفونه …. شاف لقاه رقم غريب …
-رد / الو
-المتصل / صباح الخير

-قيس ابتسم/ الفى
-الفى/ ايه .. الفى اخت شاهين
-قيس/ اهلين بيك
-الفى متحشمه / صباح الخير
-قيس ضحك / باهى تفكرتى … صباح النور
-الفى/ حبيت نكلمك …… ونشكرك
قيس خدى قهوته وماشى لى داره …
-صكر الباب وراه / على شنو بتشكرينى… انا مادرتش غير الواجب
-الفى/ لا……لازم نشكرك ..لولاك كانت امى لاقدر الله صارلها حاجه
-قيس/ بعيد الشر عنها … والف سلامه عليها مرة ثانيه
-الفى/ الله يسلمك …

وقعدو الزوز ساكتين
-الفى/ بالك معطلاتك على عملك
-قيس/ لا مش معطلتنى انا كيف درت قهوة وبنشربها على رواق
-الفى/ باهى صحتين
-قيس / بالك انتى وراك حاجه
-الفى / لا ماورايا شى ..ضميت من بكرى وامى فطرت ومشت لى حوش خوى
-قيس/ باهى صكرى خلى نعاودلك
-الفى ?/ باهى

وقعدو يهدرزو اكثر من ساعه
__________________________________________

–

العشيه ….

يارا تعبت من المستشفى … وفالاصل اسماء اخت غادة وصلت من ليبيا …سلمو على بعض وشكرتها اسماء هلبا انها قعدت مع اختهم ….
جاها شاهين روح بيها …
-شاهين / نمشو متغدو قبل
-يارا شكلها تعبانه/ لا لا وصلنى للفندق طول .. تعبانه ونبى نرقد
-شاهين / باهى
وصلها للفندق … وطلع هوا يجيب فى غدى …
ماقدرتش حتى ادوش … لوحت الوشاح واتكت عالسرير بحوايجها …..خداها النوم طول

بعد نص ساعه …

روح شاهين جايب غداهم …. لقى يارا ملوحه ع السرير منغير غطاء …
خدى الغطاء متع سريره وغطاها بيه …
يشبحلها كيف راقدة زى الملايكه … وقصتها نازلة على عيونها …. قرب وجهها منها وحط يدها على قصتها يبعد فيها على وجهها ….
فتحت عيونها لقاته قريب عليها هلباااااااااا … وتصكها عيطه
سورها تحسابه بيغتصبها ثانى …او رهبه الموقف المشابه
المهم عياطها بالقويه وفوق فوق ..فرفشت تحته ماقدرهاش
ايحط فى يده على فمها ولاكن من كثر ماتفرفش وتتحرك ماقدرش يغم صوتها
-شاهين / يارا خلاص … انا شاهين ….
دفتله جسمه تبى تباعده …. وبدى الباب يطق بالقوة ..سكان الغرف اللى جنبهم سمعو العياط ..
-شاهين / خلاص لميتى علينا الناس …
طق الباب مرة ثانيه بالقوة وخشو منه زوز لابسين بدالى رسميه واضح انهم امن الفندق
-شاهين/ لو سمحت اطلع شويا …بس مرتى تلبس حجابها
سكان الغرف فالممر يتفرجو ويراجو بيش يعرفو شن فى
-الراجل متع الامن/ يافندم احنا جانا بلاغ ان فى عياط وسويط هنا فى الغرفه
-شاهين شبحلها بغضب/ البسى وشاحك …
خدت يارا وشاحها ولبساته وهيا ترعش مع بعضها خايفه من شاهين ….
-شاهين / خوى هادى مرتى …
-رجل الامن / حتى لو كانت مراتك ….لازم تنزل معانا تحت انت وهيا
وتلفت لى يارا/ وحضرتك لو عاوزة تشتكى عليه او تفتحى محضر تقدرى فى مكتبنا تحت

___________________________________________

تمت …. ويتبع
الشكر الجزيا ميهاد التومى ع تصميم الصورة ?

ن ح ب ك م ❤❤