رواية ضحايا للكاتبة زهور جمال الدين

#ضحايا

بقلم زهور جمال الدين
الحلقه الثامنه

_

فى حوش عبدالسلام

فاطمه مقعمزة دايرة العالة لى راجلها وعزوزتها

شرين تليفونها شافت الرقم لقاته عمتك الخامسه
-فاطمه / انشاءالله خير
-عزيزة/ منو يكلم فيك
-فاطمه / الخامسه عزوزة يارا
-عبدالسلام/ ردى عليها المكالمه بتم
-فتحت الخط/ الوو
-الخامسه مقعمزة فالجنان وجنبها بنتها الفى تبكى/ اهلا فاطمه شن حالك وحال الحاجت وعبدالسلام
-فاطمه / الحمدلله .. شن حالك انتى والبنات
-الخامسه/ الحمدلله
-طلع قيس من داره ايأشر لى حناه/ شكووون
-عزيزة مدت يدها / الخامسه عزوز يارا
-قيس جى للعاله خدى طاسه شاهى / اهاا
-فاطمه قاعدة تتكلم / ويارا وشاهين شن حالهم
-الخامسه تنتحنح/ هدا علاش متصلة بيك انا
-فاطمه انخلت/ خيرها يارا
عبدالسلام وعزيزة انشغلو ايأشرولها/ خيرها يارا!!
وقيس قرب يبي ياخد التليفون بيش يفهم وامه مابتش تعطيهوله
-الخامسه/ شورا اضم فى المخزن هيا والبناويت
-فاطمه / ايه وشن صارلها
-الخامسه/ شكله ترا كيف واقفه ويجى الليان طايح عليها
-فاطمه / انضرت ولا ماصارلها شى
-الخامسه/ منكدبش عليك الحق صاخت .. ورفعها شاهين للمستشفى ..
-فاطمه /صااااخت … لى اما مستشفى رفعوها
-الخامسه/ والله مندرى الخضرا ولا الطبي .. اهيا الفى جنبى كانت تكلم فيهم تو تقوللكم .. غير منقولك
-فاطمه / شنو وخيتى
-الخامسه تبيش تكبر الشايده على بنتها الفى/ شاهين ولدى مايبيش يقول عليها الطيحة قدام حد .. انتى عارفه البنيه عروس جديدة ومن اولها بنقولو طاحت
-فاطمه/ منكدبش عليك يا خامسه …بالنسبه لى عزوزتى وسلافى والله ماعمرنا درقنا عليهم حاجه
قيس يبي ياخد التليفون ايأشر لى امه / خيرها
-فاطمه تبيش تعطيه / بالشويا خلى نفهم
-الخامسه تتنحنح/ لااات كيف عاد… سلاف نفس عويلتك .. انا نحكى على خالتها والناس الثانيه ..
تبى تقص الموضوع/ خلى نعطيك الفى بيش تفهمك يارا وين
تلفتت لى بنتها / هاك فهميهم خوك وين رفع عياله
-فاطمه مدت تليفونها لى قيس/ هاك افهم منهم اختك وين
-قيس/ مفهمتش خيرها يارا ..هاتى التليفون …
-عزيزة / خيرها البنت يابنت
وعبدالسلام مشغول
فاطمه بدت تبكى وتحكيلهم على بنتها
قيس بعد بعيد عالدوشه / الوو
-الفى تبكى / ايوووة
-قيس/ انا قيس خو يارا … وينها هيا وشن صارلها
-الفى تبكى/ نضمو فى المخزن شوى طاحو الليانات عليها صاخت
-قيس/ داخت بس ولا انضربت
-الفى مازالت تبكى/ والله مندرى عليها …طلعها شاهين طول ومشى بيها للمستشفى
-قيس/ وانتى خيرك تبكى
-الفى/ ماهو انا اللى طيحتهم عليها .. والله ماشفتها … . طاحو من يدى منغير ماننتبهلها
-قيس سخفاته/ باهى معش تبكى .. حصل خير .. توة انتى قصدك .. اكيدة لا
-الفى/ والله ماقصدى.. غير جت فيها يانارى
(هيا تبكى وهوا يجبر??)
-قيس/ باهى معش تبكى .. حصل خير ..قوليلى وين رفعوها

قعدت الفى تقوله عالمستشفى واما قسم ..وصكرو الخط
وطلع هوا وامه وبوه وحناه

__________________________________________

–

يارا راقدة فالمستفى … والدكتور نادى شاهين

-الدكتور/ زوجتك عندها اجهاض..وللعلم ماصارلهاش تنضيف
.. يعنى مادرتش رسكامينتو ..قعدت لين تكونلها الدم على هيئة نتوء داخل رحمها..ممكن صار رمى منغير ماتزبطوه
-شاهين / غير زيد اتاكد يادكتور
-الدكتور/ ياخوى انا متاكد ان هدا الرحم كان فيه جنين قبل شهور …زى مانشبح فيك قدامى ..
شاهين يشبح للدكتور ومصدوم …..الحكايه وسعت وكبرت هلبا من توقعاته…
-شاهين/ باهى كيف يصير توة .. تقدر اديرلها تنضيف
-الدكتور/ مانكدبش عليك .. النزيف دايرلها التهابات والدم متجمد … المشكلة لو صار تخمر ممكن تؤدى الى ازالة الرحم ..
-وقف شاهين/ انت شن تقول يا دكتور….كل شى الا ازالة رحمها …معقولة نضلمها مرتين
-الدكتور/ كيف مرتين !!
-شاهين قعمز/ بالله عليك يادكتور عطينى دبارة .. كيف نتصرف …
-الدكتور/ ماهو مانكدبش عليك .. توقع كل الاحتمالات مرات الدم يتحول حتى لى كانسل
-شاهين/ لا حول ولا قوة الا بالله .. باهى اعطيها تحليل ولا ديرلى حل
-الدكتور/ احنا عندنا دكاترة كويسين .. وعيادات .. لكن بعد الثورةالادويه والمواد مش مضمونه .. الناس ماعندهاش ضمير ادخل حتى فى الدواء منتهى الصلاحية
-شاهين / وبيش تنصحنى
-الدكتور/ لو حالتك كويسه اطلع بيها لى تونس ولا مصر …
-شاهين / وهوا هدا اللى بيصير .. لكن اسمع يادكتور بنقولك الحق … ونبيك تفهمنى
-الدكتور/ مفهمتكش شن قصدك
-شاهين/احنا توة متزوجين لينا اقل من شهر
-الدكتورانخلع/ ااه .. اقل من شهر!!!!
-شاهين/ انا نعرفها من قبل مانتزوجو .. وصار بيناتنا ماصار
-الدكتور/ انت متاكد ان الحكايه منك مش لاعبين عليك
-شاهين يمسح فالعرق/ ايه متاكد …مفيش تزلبيحة…لكن العيلة مايعرفوش ..وانت عارف …
-الدكتور مسمئز?/ لا لا ان الله ستار حليم

وقف بيطلع/ توة شوية تفيق زوجتك كويس وروح بيها …
-شاهين / نقدر نخشلها
-الدكتور/ هيا مازال مافاقتش عالمزبوط راهو
-شاهين / عادى خلى نشوفها
-تلفت الدكتور بيطلع/ برة للممرضات قوللهم زوجها تو يدخلوك
وطلع وخلاه فالغرفه بروحه ?

__________________________________________

–

خش شاهين لى غرفه يارا ….
لقاها شبه فايقه .. لكن مغمضه عيونها وساكته
سرح فيها / اكيدة فى سبب خلاك ادسى موضوع حملك…. وماتقوليليش… ليش … غريبه
بدت يارا تتحرك .. وتنادى منغير ماتحس بنفسها
-يارا/ بوووى … يابووى… قيس … امى
شاهين يشبحلها لقى اسمه مش موجود بين الاسماء اللى فى عقلها الباطن… قعد قريب ربع ساعه واسمه لم يتداول?
فتحت عيونها … لقت الغرفه واسعه .. والمكان كله ابيض
-يارا / قيس…. جعفر
-شاهين بصوت بارد / انا معاك هنايا
-تلفتتله/ خيرنى …. شن صار
-شاهين / طاحو عليك اماعين فالمخزن .. جو علي راسك ودوختى … انشاءالله لاباس عليك
-يارا عيونها دمعو وتشبح للسقف/ لايوريك باس … قلت لى امى
-شاهين/ كلمتنى امى قبل شوى .. قالتلى انها قالت لى امك
-يارا/ قعدت هلبا دايخه
-شاهين/ اكثر من ساعه
حركت راسها شوى / اااه راسى يوجع
-شاهين قعد فمكانه مقدرش يقرب منها / استريحى وخليك راقدة … اكيدة راسك بيوجع
-يارا/ خيرهم مادخلوش امى
-شاهين/ انا لما خشيت هيا ماجتش ..ممكن توة برة
-يارا/ باهى خليهم ايدخلوها
-شاهين / ممنوع مايدخلوش الا فى شخص واحد
-يارا / باهى خلاص خليهم ايدخلوها قيس مش لازم قوله يقعد حتى برة مابين ماسمحو
شاهين زى من ضربه كف على وجهه .. مع ان واضح انها تحكى بي عفويه مش بي خبث …
وفى خاطره / قيس وامك … امالا انا شنو …رجل كرسى
زبط انه مش فى بالها بكل …. ولااااا خاطر عليها حتى
طلع وخلى امها تخشلها…. وبعد ساعتين بدت كويسه .. دخلولها سلفاتها وحناها عزيزة وحماتها اصيلة …وعييو يحمدو بالسلامه …خش شاهين يشبحلها … وهيا مش منبهتله اصلا
شاهين قلبه عاصره من حكايه الحمل …مع انه زعلان ليش دستها عليه .. لكن قلبه بيتقطع عليها سخفاته .. لانها تغلبت على موقف عظيم بروحها
خشت الممرضه بتحول التغديه منها …طلعتهم كلهم ..ماعدا شاهين وامها قعدو واقفين
-فاطمه/ خلى نروح بيها عندى خير..عالاقل تستريح شوى
-شاهين/ لا كييف ياعمتى .. تروح حوشها افضل
يارا شبحتله لما قال حوشها …
-فاطمه/ غير قلت اكيدة راهى تعبانه وتبى من يعاونها
-شاهين/ هيا اكيدة تعبانه يا عمتى .. ولازم تجي الليله تباتى معاها
-فاطمه / والله مانقدر تشبح فيها عويلة نعانى فيها بروحى
-يارا مسكت يد امها / ايه تعالى باتى عندى يااام … حتى تشرفينى قدام شيابينى
-فاطمه / يابنيتى تعرفى بوك واعر ومايحبش حد فينا يبات برة الحوش …
-يارا بتبدا تدمع / كيف يعنى بتخلينى بروحى .. حتى يسألونى وين امك مانعرفش نرد
-فاطمه / باهى روحى انتى معاى غادى للحوش
-شاهين / لا لا تروح لى حوشها .. وانتى اميمتها تجى تباتى مع بنتك معززة مكرمه .. ولو تحبي نجيبك انا ونروح بيك انا عادى ماعندكش مشكله …

___________________________________________

_

طلعت فاطمه برة وكلمت عمك عبدالسلام وطمناته على بنته
وقعدت تترجى فيه يخليها تبات عند بنتها
-فاطمه / راجلها واعر وماباش يخليها تجى تقعد عندنا
-عبدالسلام / يعنى هيا راجلها واعر وانتى راجلك طرطور
-فاطمه / ياودى ماقلتش هكى
-عبدالسلام / امالا شن قلتى
-فاطمه / انا قلتلك …
-قص عليها / ايييييييه علينا عاد ..روحى معاهم وغدوة الصبح قولى لى نسيبك يحطك فالحوش …على من عابيه بيغدينا
-فاطمه فرحانه / حاضر
مشت لى عمتها عزيزة…
-فاطمه / كلمت عبدالسلام .. وقلتله بنبات عند يارا .. ماخلااانى لين قريب نبتلى الشيب فلسانى .. وانتى يا عمتى بالله عليك تمشى معاى مانقد نمشى بروحى
-عزيزة/ لاااا ياكبدى.. وشيبانيه لمن بنخليه بروحه
-فاطمه/ تو نقول لى عبدالسلام يمشى يبات عنده الليله .. ونكلم مفيدة مرت خالد تفطره غدوة الصبح
-عزيزة/ تو نكلمهم انا هيا وسلفتها ..اصلا بنقوللهم على بنت سلفهم
-فاطمه / بالله ياعمتى قوليلهم عزوزتها ماتبيش تقول عالحكايه
-عزيزة/ باهى تو تقوللهم
خش قيس لى اخته يشبح فيها ويحمدلها بالسلامه

___________________________________________

_

روحت يارا لى حوشهم… ركبت مع شاهين فى السيارة ومروحه .. وامها وحناها رفعهم قيس لى حوش اخته..

فالسيارة….
-شاهين / الحمدالله على سلامتك
-يارا متلفته للطريق/ الله يسلمك
-شاهين/ مافيش حاجه تبى تقوليهالى
-تلفتتله باستغراب/ زى شنو
-شاهين/ لا لا شى

وصلو للحوش … وخشو … وبعدهم امها وحناها وخشو للحوش من الدروج الخارجى
وجت عزوزتها والكناين والبنات …وجت الفى تبكى واستسمحت من يارا
-يارا/ بلا هبال عاااد
-الفى/ والله ماقصدى يطيحو عليك .. وماريتك
وكلهم يضحكو على الفى كيف ميته بالحشم

جاب شاهين لحم … ودارو حماواتها العشى رز بالبصلة .. وجو نساوين عمامها شدوهم للعشى …
فالليل روحو كلهم … وشدو عمتك الخامسه تبات معاهم وبالفعل باتت
وشاهين بايت تحت فى الورشه … عارفاته امه عندها فيها دار تحسابه اول مرة يبات فيها ?

_________________________________________

_

ثانى يوم الصبح

ناضو العزايز … وصلو الفجر وقعدو يهدرزو …
ومع الساعه 9 جتهم الفى ودارتلهم الفطور
فطرو ….هدا كله وشاهين راقد فى سابع نومه …
مع الساعه 11 … درس قيس من الجهه الخارجيه لى دروج حوش اخته …
ويتصل بي امه يبيها تنزل … بيروحو ….
ردت امه عالتليفون وقاللها انه يراجى تحت …
بدو النساوين يلبسو بيروحو ..والفى فالمطبخ ادير فى الشاهى ماتندريش عليهم
لقت كيسه الكناسه حاشاكم قاعدة فالسطل .. مش معبيه هلبا .. وهيا واخدها الحماس وتعول واضم ..خدت كيسه الكناسه بين ايديها وطلعت للصالة فيسع بيش ماتقطرش ومشت للباب ومنه للدروج تجرى ..
هيا نازلة من الدروج بسرعه .. وقيس واقف ع اخر درجه
…تجرى فيسع ماوصلت اخر درجه الا والشكارة تمزقت من تحت وتبزعت عالارض كلها .. ووقيس وخر فيسع بيش حوايجه مايتلزبزوش
-الفى ? حست انه ممكن يكون خو يارا / حييبه عليا … الكناسه كلها جت عالوطا .. انشالله غير ماجتش عليك
-قيس انخلع من طيحة الكناسه / حصل خير .. حصل خير
-الفى / لا لا عادى …غيرابعد شويا خوى خلى نلمها
-قيس/ حولى انتى.. تو انلمهالك انا .. ومشى عالجنب جاب الباله .. وساوى السطل .. وبدى يلم فى الكناسه بالباله ويحط فيها فى السطل
-شبحلها / ترا مديلى قدردل اميه
-الفى تشبحله بي اعجاب/ باهى
وادور فى خوها شاهين يمين ويسار كان يطلع ويلقاها تهدرز لما يقتلها?
جابت الميه من الشيشمه متع الجنان .. وعطتهاله ..صبها عالمكان
-شبحلها منغير مايبتسم / انتى اللى كلمتينى امس تبكى
-هزت بي راسها / ايه
-قيس/ انشاءالله معرفة خير

__________________________________________

–

روحو النساوين كلهم وقعدت يارا بروحها فالحوش .. لابسة سروال لاصق بنى وتيشرت ابيض وفاتحه شعرها
طق شاهين عالباب وخش / السلام عليكم
يارا وقفت من الصالون / عليكم السلام
ومشت لى دار نومها …خشت وصكرت الباب …..

مشى شاهين لى دار النوم .. طقطق وفتح الباب
-شاهين/ ممكن نخش شوى
-يارا منغير ماتتلفت..لمت شعرها بيدها/ تفضل
-خش شاهين لى دار النوم فتح الدولاب وطلع شنطه صغيرة
فتحها وطلع منها جوازاتهم … يارا شافاته من مراية الدولاب
تلفتتله وشعرها طاح / خيرك تاخد فى الجوازات
-شبحلها / منمشو لى مصر
-وقفت/ انت ومن ماشى قصدك ..
-خدى الجوازات وطلع / انا وياك منمشو
-طلعت وراه/ ومن قالك انى منمشى معاك .. هات جوازى
تلفتلها يشبحلها .. وهوا ساكت
-يارا مادا يدها / هات الجواز لو سمحت
-شاهين / ليش ماقلتيليش
-يارا / شن منقولك
-شاهين / انك كنتى حامل
-يارا / ?????

_________________________________________

_

فى حوش عبدالسلام

-فاطمه / وعلاش قاعد لتوة مافطرتش .. نساوين خوتك فى جنبك .. لو بعتت الصغار لى وحدة منهم راهو بعتتلك
-عبدالسلام / تو معقولة عارفينك انتى بايته برة وبيخلونى بلا فطور … بعتو من بكرى .. لكن مايعرفوش يديرو الشاهى
وانتى تعرفينى كان مانشم صنة الشاهى اللى نعرفه انا مانحط شى فى فمى
-قيس من المطبخ / نديرلك قهوة معاى يابوى
-عبدالسلام من الصالة/ تعرفنى مانشربش فيها القهوة ..
هات العالة لى امك هنايا خلى اديرلى طاسه راسى بيتفجر
-فاطمه تهمس لى راجلها / الحوش هدا خلاص بدى يبى كنه
قيس سمعهم من الكوجينه طول خطرت عليه الفى وضحك
-عبدالسلام / شوفى اختك ..بنتها بتموت علينا .. برى كلميهم عليها
قيس يسمع فيهم وساكت
-فاطمه / حاشانى نمشى نخطب لى واحد من صغارى من غير مايقولى يمى نبى هاديكه
-عبدالسلام/ باهى انشدى ولدك كانا عنده راى بري معاه .. وكنهدا حتى حوش اختك باهى
-فاطمه / نشوف حتى جعفر .. هما قراب فالعمر وبالك نلموهم مع بعض
-عبدالسلام / راجى الزيت لين يجيك من غريان .. جعفر مزال صغير عالزواج .. ومزال ماتخرجش
-فاطمه / اعمارهم مش بعيدة
-عبدالسلام / قيس عقله كبير ويقدر يدير اسرة .. لكن جعفر ماعنداش مسؤليه وفى كل شى عابي على خوه.. مزال شوى
-فاطمه / هوا الحق يبي بنيه قاريه معاه.. وقداش من مرة عاطينى التليفون مكلمتها
-عبدالسلام / باهى غير يتخرجو وبعتالى ساهل
-فاطمه / باهى على كيفك
-عبدالسلام/ولدك قوليله العرس مادخلكش فيه ..يقسم داره وداره اخته ويدير حيط .. لين يبدا فى البنى فى ارضه جنبنا
-فاطمه / وعلاش يدير حيط بينا وبينه … ومن هناك جعفر ديما مهناش
-عبدالسلام / انا نعرف شن ندير.. يدير حيط ويفتح باب بروحه من غادى ..
-فاطمه تكنطت /وشنو انا بناكلها .. ولا بنديرلها مشاكل
-عبدالسلام/ هيا ضمى فمك عاد.. وانا نعرف شن ندير

-فاطمه/ خلى انوض نجيب العالةة خيرلى .. ونمشى نحط غداى عالنار …. الحمدلله قاعدة بصحتى مامستحقه حد
عبدالسلام يضحك ..
خشت للمطبخ لقت ولدها مقعمز عالطاولة يشرب فالقهوة ..
فتحت الدولاب وطلعت العالة حطتها عالطاولة
قيس/ خيرك ياام
-فاطمه/ ماخيرنى شى
-وقف باس على راسها / والله ماتكونى الا راضيه يمى
-فاطمه/ سلم اوليدى اللى ديما مرضينى

________________________________________

–
فى حوش يارا

-يارا فمها يرعش/ منو حامل .. على شنو تتكلم انت
-شاهين قام يده / ماتخافيش … قدرالله وماشاء فعل
-انهارت وقعمزت عالصالون تبكى / من قالك
-شاهين / الدكتور .. عرف ان حالتك كانت مجهظه قبل شهور

يارا فات عليها شريط حياتها كله .. وجت بين عيونها اكثر مرحلة مؤلمه ..مرحلة حملها
-شاهين / ليش دسيتى عليا …ليش ماقلتيليش
-يارا/ وانت وين كنت وقتها …مهناش … درت عملتك وهربت .. شنو يهمك كانا خليت صغار وراك ولا لا
-مشى قعمز قدامها على ركابه/ لعلمك ليلتها تفجرت فينا زوز سيارات مفخخة .. ورفعونى ميت … ومن رحمه ربي الدكتور لقى فيا نفس …لو مش هكى كنت رجعت من ثانى يوم لى اهلك
-يارا تشبحله وبهدوء/ كداب
-شاهين / لو كنت كداب ماكنتش جيت وخطبتك وتزوجتك وسترت الموضوع كله
-يارا/ اللى يسمعك يقول انت الحمل الوديع فالقصه كلها
-شاهين/ كيف قدرتى ادسى فى قلبك موضوع كبير زى هدا .. كيف تحملتى
-يارا/اولا ماحسيتش انك مهتم شن صارلى بيش نحكيلك
ثانيا دسيته لان لو حكيتلك بالتاكيد بتسألنى كيف تخلصتى منه الحمل
-شاهين/ بالتاكيد منسئلك شن درتى وكيف تصرفتى ومن ساعدك
-يارا / حاولت ننتحر .. طاح منى
-شاهين / ااه … حولتى تنتحرى
-يارا/ مش احسن مالفضيحة ..على قد ماحولت نشرب حاجات ولا قال نطيح .. ولما يأست .. درت خبط فالشجرة وكرسى تحتى وبنشنق روحى .. لما حدفت الكرسى طاح بيا الخيط واجهضت
-شاهين / لا حول ولا قوة الا بالله …لو حاولت نتأسفلك بكل اللغات مستحيل تسامحينى … انا انسان نستاهل الموت عالشى اللى صارلك …
-يارا مغمضه عيونها / مستحيل نسامحك
-شاهين متكدر/ الاجهاض سببلك مشكله فالرحم
يارا تشبحله ومفجوعه …
-شاهين / الباين الطيحة دارتلك كدمه فى الرحم والدم تجمد
وضرورى من العلاج
-يارا صوتها مخنوق/ وكيف بيصير توة
-شاهين / منمشو لى مصر .. وبنقولو شهر عسل مش علاج

يارا وافقت انها تمشى معاه تعالج .. وبالفعل دارو تداكرهم
وخبرو اهلهم انهم ماشيين دهوارى …
ودارو شناطيهم وسافرو للقاهرة … خدو فندق … عطوهم غرفه غالدور السابع ..
خشو للغرفه ومعاهم البنت متع النظافه …سريرين منفصلات
وكوميدينو بينهم وتلفزيون وحمام
‘العاملة/ ح اقرب السراير من بعض يافندم .. وحيبقو سرير واحد
-يارا/ لا لا لا خليهم زى ماهما
العاملة قعدت تشبحلها مستغربه/ انتو زوجين .. مش كدة
-شاهين / زوجين.. لكن انا مريض ومرتى خايفه انى نعديها
-يارا/ ?

__________________________________________

تمت …. ويتبع

الحلقه الجايه نشوفو مع من بيتلاقو فى مصر.. وكيف بيصير فى علاج يارا … وهل بالفعل بيحدفولها الرحم والا لا ..
وقيس كيف بيصير فيه هوا والفى ..

نحبكككم ❤