رواية ضحايا للكاتبة زهور جمال الدين
#ضحايا
بقلم زهور جمال الدين⚘
?الحلقه الرابعه ?
–
فى الوفاة اللى مشولها …
بنيه واقفه فى الباب / عمتى فاطمه … عمتى فاطمه
عمتك عزيزة مقابلتها فالصالة /فاطمه تصلى فى العشى فى الدار الدخلانيه .. خيرك شن تبيها
-البنيه / ولدها قيس يبيها برة من الخيمه
-عزيزة / قوليله تو تكمل وتطلعله
-البنيه / باااهى
فاطمه كملت الصلاة ورفعت يديها تدعى / ياااربي هدى البلاد واستر العباد .. ياربي استر راجلى وولادى .. واسترلى بنتى واحفظها ياااارب العالمين
-عزيزة / فاطمه …يا فاطمه
-عمتك فاطمه فى الدار / نعم ياعمتى
-عزيزة / الرحيبي ينادى فيك برة..
-فاطمه وقفت/ اهو منطلعله هى
طلعت فاطمه من الدار … مشت للصالة .. طلعت خدت شبشبها ومشت لى ولدها
-فاطمه تنادى من ورا الخيمه/ قيس .. قييييس
-قرب منها وقام الستار/ شنحالك ياام
-فاطمه / الحمدلله كويسه ياوليدى
-قيس / شن حال حناى
-فاطمه / الحمدلله باهيه .. خيرك ياوليدى انشاءالله خير
-قيس/ كلمتى يارا
( سبحان الله .. الاخ ديما يخس بي اخته .. خاصة الاخ اللى يكون اكثر واحد مهتم بالحوش والعبي عليه )
-فاطمه انخلعت/ خيرها يارا
-قيس/ بالشويا يمى خيرك انخلعتى.. نسأل فيك كلمتيها ولا لا .. انا تليفونى تبزعت عليه الميه معش يبي ينفتح ..قلت نسألك اتصلتى ولا لا
-فاطمه اطلع فى تليفونها من جيبها / اتصلت بيها بكرى وكلمتنى حتى خالتك وعزت الناس..
فتحت لوحة المفاتيح/ اهو تو نتصل بيها مرة ثانيه
ضربت الرقم / خاااارج التغطيه …
-قيس/ هاتى تو نعاودلها انا …
وخدى التليفون وبدى يتصل
__________________________
–
يارا واقفه ع الكرسى …وحاطه الحبل فى رقبتها
وتمتم/ ياااااربي سامحنى رانى مظلومه .. اشهد ان لا اله الا الله واشهد ان محمد رسول الله… رجلها ماطاوعتهاش تحدف الكرسى ….
تبكى/ ياااربي خودلى حقى فى الدنيا .. ياربي كانك راضى عليا لما بيدفونى ماتخليهم يكتشفو انى حامل.. ياربي خليهم يقولو انى متخطيه او التبست بيش درت هكى .. واللى دارلى العملة هادى اقسم بالله مانى مسامحاته لا فى الدنيا ولا الاخرة
قامت رجلها اليمين … وحدفت الكرسى بى رجلها اليسار ..
طاحت بالحبل .. الحبل كيف خنقها ارتخى عليها وتجى مفشوخه طايحه ع الوطا ???… من رحمه ربي انها ماعرفتش تربط الحبل كويس زى مايربط فيه خوها قيس فالعيد
لما طاحت جت الطيحة على بطنها …حست بي الم قوى … وحست بي حاجه سخونه بين رجلها …. قامت راسها وهيا تتألم … حطت يدها ع الارض .. بدت تقيم فى نفسها بالشوى
مش قادرة تتحرك بدوخ .. لكن قاومت .. وبدى تليفونها يشرين … مش قادرة اطلعه من جيبها …بصعوبه شدت فى الشجرة وبدت توقف … شافت سروال التوته لقاته دم
بدت تكر فى نفسها وصلت للكرسى ساواته كان طايح وقعمزت عليه … بدى الدم ينزل اكثر .. والتليفون عاود ثانى
امها تتصل .. اضطرت انها ترد لان بالتاكيد امها حتكلم خالتها لو ماردتش
فتحت الخط تتكلم بصعوبه / الو
-قيس/ خيرك ماترديش
-يارا/ انا فى الدوش .. ناهد جابتلى التليفون
-قيس تحشم/ اهاا اهيا امك معاك ..
ومد التليفون لى امه ويهمس/ خيره صوتها
-خدت فاطمه التليفون /الو .. كيف حالك بنيتى
-يارا حاسه بي لويه فى بطنها معش قدرت تتحمل/ اهلين يااام
-فاطمه / خيرك ماترديش
-يارا / مريضه .. جايتنى الدورة ومش قادرة نتكلم .. غير ماتقوليش قدام قيس قلتله انا فالدوش
-فاطمه / انشالله لاباس عليك يابنيتى ..
قيس يشبح لى امه
-فاطمه / قولى لى خالتك تطبخلك قرفه .. واشربيها تو يخف عليك الالم
-فاطمه / وينها خالتك ترا اعطيهالى
-يارا/ انا فى دار ناهد ومش قادرة نتحرك .. تو غدوة نقوللها تكلمك
-فاطمه / باهى بنيتى غير اشربي القرفه
-يارا تتكلم بصعوبه / حاضر يام
-فاطمه / باهى تصبحى على خير
وصكرت الخط
-قيس/ خيرها
-فاطمه / قالت مريضه مرض نساوين …
-قيس فهم/ اهاا
-فاطمه / جعفر وين
-قيس/ مع جماعته مقعمزين بروحهم
-فاطمه / ربي يحفظكم ياوليدى
-القيس/ العمل كلمونى قالولى ضرورى غدوة تجى فى لجنه جايه
-فاطمه / وكيف بدير.. هادوحوش عمك… لازم نزيدو معاهم ليله ثانيه عالاقل…وبعد غدوة الفرق نروحو حتى فالليل
-قيس/ تعرفى كيف .. خلى نتسهل نروح الليله للحوش وغدوة نمشى العمل ومن العمل نجى هنايا طول
-فاطمه / كيف مايساعدك وليدى غير قول لى بوك
-قيس/ امالا مع السلامه .. خلى نقول لى بوى ونتوكل
???????
__________________________
–
فى المانيا
شاهين راقد فى غرفه ويكلم فيه الدكتور ومعاهم المترجم
وبعدها استادن الدكتور وطلع
-فايز المترجم/ قال بيحاولو معاها الرجل لى اخر لحظه .. ولو ماستاجبتش للعلاج بنبتروها
-شاهين / انا مش حاس بيها اصلا … امس قعدت نقرص فيها بي يدى وبردو ماحسيتش
-فايز / انشاءالله خير .. حالك احسن من حال هلبا ثانيين
..فى اللى بثروله رجله وفى اللى يده
-شاهين/ انا بعد صحابي اللى ماتو . مايهمنيش رجلى تنبثر ولا تقعد
-فايز/انتو قادة المعارك عندكم معاملة خاصه .. ولدلك دير حسابك مرات القعدة هنايا اطول شهور .. لو عندك خدمه او حاجه غادى وصى عليها من توة
-شاهين سرح/ عندى عمل مهم .. .لكن لازم انقوم بيه بنفسى
-فايز/ قالو بيديرو احتفاليه المدة الجايه عبدالجليل بيسلم القيادة من بنغازى للعاصمه طرابلس
-شاهين / بعد مامات عبدالفتاح يونس مش فارقه من يحطو ولا لمن يسلمو
-فايز/ الله يرحمه ويغفرله .. نلقانه راجل
-شاهين/ الله يرحمه
وتكى راسه كويس عالمخدة… وخطرت عليه يارا .. المشكلة ان شكلها معش يجيبه مزبوط بطول المدة .. لكن يتخايل فيها وفى جسمها .. ويحسب فى مية حساب بيديره
__________________________
–
فى حوش يارا …
شدت فالحيط وبدت بتخش بالشويا للمطبخ … والدم بدى يقطر ع الارض ….خشت للمطبخ فتحت دولاب البخش
(الفرش اللى يتفرش تحت السفرة فالاكل) ..
خدت بخشه وحطتها بين رجليها .. وزادت خدت وحدة ثانيه وحطتها فى نفس المكان .. بتصكر الباب وبتخش وبعتالى خممت فى الدم اللى عالدروج .. لازم يمتسح توة خير ما ييبس … خدت بخشه وبصعوبه حطتها عالدروج ومسحت الدم فى الدرجه الاولى برجلها .. وطيحتها للدرجه الثانيه ومسحت الدم برجلها ..ومدت يدها قامت البخشه وخشت للمطبخ وصكرت الباب … شادة البخش اللى بين رجليها بايديها وماشيه جهه الحمام بالشوية عليها وبصعوبه …
وصلت للحمام .. خشت وصكرت الباب وراها وهيا تبكى قعمزت عالبانيو .. وتشبح لى روحها فى المرايا وتبكى …
حولت حوايجها … ومسحت الدم ماقدرتش تغسل تحت الدوش … حطت الفوطه متع الدوش بين رجليها ومشت لى دارها .. غيرت حوايجها .. وحطت زوز فوط متع يدين على بعضهم .. وحطتهم بيش يشدو الدم .. وغيرت حوايجها بصعوبه .. وارتمت عالسرير … وهيا تبكى تبكى .. لكن فى قلبها راضيه ان ربي ساعدها ونزل هالتهمه منها ..وهالجريمه اللى بيحاسبها عليها المجتمع منغير دنب منها …
شرين تليفونها فى الحمام .. مش قادرة تتحرك .. لكن لازم ترد .. لان اللى مش حترد عليه ح ينشغل
طلعت بالشوى وهيا شادة بطنها … خشت للحمام ..قامت للسروال وطلعت التليفون شافت لقت ناهد متصلة بيها …
كيف بتعاودلها شوى ناهد عاودت
-ناهد / خيرك عطلتى
-يارا/منقعد هنايا شوى .. عندى مكالمه
-ناهد/ تعالى تكلمى فى دارى منو بيضايقك
-يارا/ شووويا منعطلش .. ساعة ثانيه او ساعتين ونجى
-ناهد/ باهى غير ردى بالك .. وتخافى الضى يهرب
-يارا/ كانا هرب تو نولع ضى هاتفى ونجيك طول
-ناهد/ تمام متفاهمين …
وصكرو الخط ….
طلعت ناهد من الحمام بصعوبه … اتكت عالصالون متع الصالة وقعدت داسه وجهها فالمخدة من شدة الالم .. ومش قادرة تنوض تتطبخ قرفه
__________________________
–
بعد ساعتين ….
يارا من شدة الالم خداها النوم …..
تليفونها شرين ….فيقها من النوم …لقت المتصل امها
-يارا بصوت ضعيف / الووو
-فاطمه / شنو رقدتى
وقعدت فاطمه تقول لى يارا فى وصفات تطبخهم وتشربهم
ويارا تقوللها باهى تو نقول لى خالتى
-فاطمه / باهى بالسلامه وسلميلى على خالتك
-يارا/ مع السلامه
-فاطمه / قتلك … نسيت
-يارا/ نعم يااام
-فاطمه / غدوة بيش تنزلى اطقى على خوك قيس .. تليفونه فسد وغدوة جاياته لجنه للعمل تخافى تريح عليه نومه
-يارا فتحت عيونها وتقاعدت / قيس!!!…. وينه قيس..ووين بنطق عليه
-فاطمه / روح من بكرى للحوش وتو راهو حتى وصل توة
-من الخلعه تنط يارا تجى واقفه / روح للحوش
-فاطمه / ايه روح .. وماتنسيش تنوضيه غدوة
-يارا / حاضر يام .. مع السلامه
-فاطمه / تصبحى على خير
حدفت يارا تليفونها عالصالون .. ونست اى الم كانت حاسه بيه .. مشت تجرى للمطبخ جابت منه شكارة كناسه .. ومشت للحمام .. قامت منه حوايجها وحطتهم فى الشكارة .. ربطتهم كوووويس ومشت لى دارها حشت الشكارة بين حوايجها …. وتسمع فى صوت القراج انفتح
ووين تلقيها عاااد .. تليفونها فى يدها .. ورجليها فى غمرها
ومشت تجرى للمطبخ فتحت الباب الخلفى وصكراته وراها
وطلعت للجنان جرى خشت من الباب اللى يفتح على حوش خالتها..باب مطبخهم مصكر ..لبدت فالظلام و قعدت تشرين على ناهد جت فتحتلها وركبو فوق للدور الثانى
باتت يارا ليله ماتتمنيهاش حتى لعدوك … واتسبلت لى ناهد انها انخلعت من مرواحة قيس هدا علاش الدورة وجعتها هلبا
ناهد فالحة… وعندها يبرة فولتارين داستها احتياط لانها تضرب فيها فى موعد الدورة… ضربتها لى يارا… ممكن قعدت نص ساعه واختفى الالم ….ورقدت يارا فى سابع نومه
ثانى يوم طبختلها ناهد القرفه وشربتها ……وروحت امها
قعد النزيف عليها هلبا …لكن هيا دكيه وقرت فى الغوغل عن الاجهاض وكم يقعد يوم وشن المفروض تشرب
__________________________
_
حال الطف من حال .. كونها مغتصبه بس .. الطف من انها تكون حامل …لان الاغتصاب يدرق ماينعرف الا فى حالة الزواج … اما الحمل ينزبط طول ….
صح مشكلة يارا تعتبر حكم انحلت لما نزل الجنين … لكن وينها يارا ..خلاص انكسرت … وبدى فى قلبها جرح مايندملش الا بموت الجانى …. لكن وينه ..وين اراضيه …
منهوا اصلا …..مش معروف ….
بعد شهرين
يارا ضعفت .. ونزلت النص … الكل ملاحظها … بوها رفعها عاينها ع الانيميا .. عطوه مقويات وحاجات … لكن من بياخدهم … يارا ماتحطش فى شى فى فمها غير الميه ..
وعلى قولت متأثرة عالبلاد وحالها … على فكرة ايامات الثورة هلبا بنات خممو عالبلاد واللى صاير فيها وضعفو
شهر 12 فتحت الجامعات وبدى التسجيل..اتاخر التسجيل عشان حالة الحرب اللى كانت
يارا متكيه فى سريرها وامها مقعمزه عالكوميدينو وقيس على كرسى
-قيس/ الناس سجلت … ونخاف معش يقبلوك كانا ضاعت عليك السنه
-فاطمه / يابنيتى خيرك كنتى نشاط وحيويه وقرايه..وتوة ملوحة على تركينه وخلاص
-قيس/ ترا خلينا بروحنا شوى يااام
يارا شبختله بخوف
طلعت فاطمه من الدار …وقف قيس سكر الباب وجى قعمز ثانى
-يشبحلها / يارا..انتىاختى الوحيدة .. انتى شرفى.. ومانرضاش حد يضحك عليك او يهينك
-تقاعدت / شن قصدك
-قيس/ شنو اللى صايرلك .. بالك حد وعدك بالزواج وفاتك ..او حد يهدد فيك.. او يضايق فيك فالطريق
-يارا/ انت شن قاعد تقول ياقيس
-قيس/ مش تحسابينى واعر وديما ساكت .. احكيلى وشوفى نوقف معاك راجل ولا لا
-قعمزت ع السرير / انت فكرك مشى لبعيد .. انا زى اى بنت ركبتنى حالة رعب من الطلوع للشارع .. وانت تشوف فاللى صاير فالبلاد
-قيس/ بس مش لى هالدرجه
-يارا/ وراس اوخى ماهناك حاجه …انا ..
-قيس وقف / على راحتك .. بس مايجيش يوم وتقولى لى روحك خوى ماوقفش معاى
-يارا مبتسمه بهدوء/ ربي يطول فى عمرك ويخليك ليا
-قيس/ يعنى شنو نحطلك اوراقك فى كليه الطب
-يارا?/ لا
-قيس شبحلها / باهى براحتك
__________________________
–
بعد ثلاثه شهور
شهر 3 سنه 2012…..
شاهين روح لى ليبيا … الحمدلله اموره كويسه ويمشى على رجليه … روح للحوش ..وهاديكا المربوعه تملى وتفرغ …
شاهين بشبح لى خوه جلال / وين الاصفر
-جلال/ هوينا مقعمز يلعب فى الكارطه
-شاهين/ ناديهولى
-جلال ينادى / يالصفر …لاصفر
-تلفت كمال قريبهم / اهو غاطس يبي يربح ?
-جلال / قوله يبيك شاهين
شوى ووقف واحد مسلوع وطويل…وجهه رايح اصفر .. هدا علاش ملقبينه الاصفر
-شاهين داير مخدة ومتكى/ اقرب جاى
-قرب منه لاصفر/ نسمع فيك يا عرفى
-شاهين يتنحنح / مش عارف كيف بنقولهالك
-لاصفر يضحك/ احدفها زى القنبله ياعرفى .. تتفجر ونفهمها
-شاهين/ تى اشحط دقنك ولم سنونك .. هدا امر ..غدوة تنفده
-لاصفر نقص ضحك ويشبحله/ اؤمرنى ياعرفى
-شاهين/ احم .. اح .. فى واحد يدور فى وحدة تسكن فى طريق المطار .. وكلمنى يبي يزبطها وين ساكنه
-لاصفر/ ندوروهاله هالواحد ..
ويغمزلها / علاش لا ..امالا نخلوه يدور بروحه ويدوخ وهوا مريض وتاعب
-شاهين فنص عيونه/ قلتلك اشحط دقنك ياحمار.. والبنت مش انا اللى ندور فيها
-لاصفر/ توة انا جبت سيرتك ولا قلت انت ها ها ها
-شاهين/ بتصكر فمك ولا كيف
-حط يده على فمه/ هه سكتت… شنو المعلومات اللى تبونى نجيبها
-شاهين / احنا نعرفو اسمها بس .. احفظه يارا… نبى نعرف بنت منو .. فيش تقرا …عنوات حوشها بالزبط
-لاصفر/ حاضر من عيونى.. غدوة تكون كل المعلومات عندك .. حتى كان تبى نجيبلك جدها كيف تعرف على جداها نجيبه عادى
-شاهين بحزم/ المطلوب منك واضح ولا
-لاصفر مبتسم/ خلاص اللى تبيه فهمته انا معش ادور غدوة تكوت كل المعلومات عندك
-شاهين/ ياسيدى خود يومين غير اطلعلى بي حاجه باهيه
-لاصفر/ لا …بنجيبهملك غدوة.. تى رانى الاصفر مش اى حد ثانى
-شاهين/ وانا هدا علاش ناديتك على بركه الله وربي يعاونك
__________________________
_
ثانى يوم ….
فى غرفه يارا ….
-ناهد/ نحس فى نفسيتك تحسنت ولا
-يارا/ الحمدلله.. نحس فى نفسى احسن بهلبا
-ناهد/ من يوم اللى رفعاتك امى ولودت عليك حالك تغير للافضل.. بيش تعرفى ان نفس كانت واخداتك
-يارا ضحكت بهزوة/ نفس!
صوت قيس ينادى من برة / يارا .. يارا
-ناهد/ بالله عليك ماتردى.. خليه يجى يفتح الباب
وحطت يديها على شعرها وبدت تساوى فيه
قرب قيس / ياااارا … وينك
وفتح الباب … يلاقى ناهد واقفه رايحه شقرا زى القمر وشعرها مفتوح… ويارا واقفه على دولابها
حطت ناهد يدها على شعرها / اهه.. اعطينى وشاحى يا يارا …..
-قيس طارتله / سامحينى مانحسابكش هنايا يا ناهد …
وطلع …
لحقاته يارا ….برة الباب
-قيس / شنو طرشتى
-يارا / ماسمعناكش .. كنا نهدرزو
-قيس/ وهيا الدراه بنت خالتك كيف تحول حجابها وعارفه الحوش فيه ولا… امالا حتى انتى اديري فيها فى حوشهم
-يارا/ حاشانى .. انا الحجاب قريب نلبسه حتى فى حوشنا
.. وبعدين ناهد مش دراه .. بنيه كويسه ومتادبه
-قيس مد اوراق لى يارا / كويسه لى روحها ربي يهنيها ..
خودى اوراق متع تحاليلك جابهملك عمى خالد
-خدتهم يارا وفتحتهم / وشن قالتله الدكتورة عالتحاليل
-قيس/ قالولك لازم تاكلى ..جسمك ناقص هلبا فيتامينات
-يارا/ انشاءالله …
خدت الاوراق وخشت للدار وصكرت الباب
-جتها ناهد تجرى/ شن قالك عليا …عجبتاه?
-يارا تضحك/ قالى كيف بنت خالتك الدراه تحول حجابها وعارفه الحوش فيه ولاد
-ناهد فرحانه / قصدك غار عليا
-يارا مبتسمه ابتسامه باردة / ياودى ماضنيتش غيرة .. بالعكس تكنطى لما لقاك هكى
-ناهد/ قوليله هدى روحك ..وراسك الحوش هدا ماقاعدة فيه الا فى روب .. وتحديدا فى داره هوا الهازى
-يارا تضحك / قولى ياااربي بالحلال
-ناهد/ بالحلال امالا شنو … خوك هدا وجهه حرام
-يارا/ لو كان ليكم خير فى بعضكم .. ياااارب توصلو بعض وتبدى كنتنا الدراه
-ناهد قامت يديها / حتى لو مالياش خير فيه …يااااربي خلينى من نصيبه
-يارا/ اااامين
__________________________
–
ثانى يوم فالليل
شاهين مقعمز عالفراش والاصفر مقعمز جنبه
-شاهين متعصب/ تلكلك فالدوة تلكليك.. تى ماهو احكى باختصار لقيتها ولا مالقيتهاش
-لاصفر/ باهى ماتخلعنيش بالعياط وخلى نحكيلك وحدة وحدة
-شاهين?/ باهى احكى
-لاصفر/ مقدرتش نسأل عليها بالاسم .. نشدت على واحد يقولوله محمد وعنده بنت يقولولها يارا .. جبت اسم الاب كدابي بيش مانحصلش فى بوها الحوقانى
-شاهين / باهى وبعدين
-لاصفر/ مهناش..لا السمى قالت ريتها ولا الوطى قالت ريتها
-شاهين عاض لسانه / يعنى لقيتها ولا مالقيتهاش
-لاصفر/ اهو جاياتك الدوة
-شاهين/ اللهم جيبك يا طولت البال.. كمل
-لاصفر/ مشيت للمحلات .. مشيت للمدارس… الا الاسم هدا مهناش
-شاهين/ يعنى مالقيتهاش
-لاصفر/ اهو جاياتك الدوة
-شاهين/ ياراجل عطينى الزبدة لقيتها ولا لا
-لاصفر/ مشيت لى معمل التحاليل ..قلتلهم نبى تحليل بنتى واسمها يارا
-شاهين/ باهى ..وشن قالتلك
-لاصفر/ قالتلى تحليلها طلع ….ورفعه عمها خالد
-شاهين / الله اكبر ولله الحمد .. زعما تطلع هيا
-لاصفر/ وانا وين نعرفها المدكورة .. احتمال تطلع هيا نفس البنت واحتمال لا
-شاهين/ ووين قالتلك البنت تسكن
-لاصفر/ شفت السجل .. اسمها يارا عبدالسلام صالح .. ومكتوب عالسكن طريق المطار.. معناها تسكن فى نفس الحومه
-شاهين/ تعرف كيف…دورو وانشدو …واى واحد اسمه خالد فى هاديكة الجهه قيموه … وتو نعرف انا كيف نطلعها
-لاصفر/ خيرها المستورة دايرة حاجه كبيرة
-شاهين / ربي يستر عليها…ونوض دير شن قتلك
-لاصفر/ انا ماعنديش الصلاحيه نقيم اى حد ..كلم باقيرا وهوا يتصرف ويبعت قوة متع تفتيش
-شاهين قام تليفونه / باهى انت صحيت ..والكلام يموت بيناتنا
-لاصفر/ تعرفنى عاد مش جديد عليك
شاهين يحكى فالتليفون / هاا باقيرا كيف الحال
وقعد يحكى معاه وتفاهمو شن بيديرو
يفعلو ياC??… ايديهم طايلة
__________________________
تمت ……. ويتبع
اللى بيسهر … بنزل الحلقه 5 بعد نص ساعه …والللى بيرقد
يلقاها غدوة
نحبكم ❤