رواية خيانه
رواية خيانه
جميع الحقوق محفوظة للكاتبة أروى الطاهر
الحلقه الاولى …مقدمه
رح نعرفكم ع الشخصيات بس في المقدمه لانهم هلبااا ❤️يمكن متكونش حلوه للبعض في بدايتها بس باقي الحلقات ناااار ?متخلوهاش تفوتكم
في منطقه في طرابلس فيه قطعة ارض كبييره وكانت كلها حياش جنب بعضها وسكان الارض هاذي كللللللها عائله وحده وكانت عيله معروفه وكبيره هلبا حماوات سلفات بنات كناين صغار شباب عمام خوال ومننسوش كبير العيله الحاج محمد وكبيرت العيله الحاجه فاطمه .
احترت مع قصة منو نبدا بس قررت نبدو من ابتهال ❤️
ابتهال:في وسط الزحمه والالعاب الناريه نفتح باب السياره ومدلي يده صح كان مش طايق الجو هاذا كله بس مسكت يده ونزلت صوت الاغاني والفرحه بين العيلتين ترن في وذني لاتوا ✨اي اليوم عرسي نزلت بي الڤيلو لي حوشي الجديد ونزلو معاي خواته دايرين بالهم عليا لين خشيت الحوش صح كان مفروض هوا يدخلني ويعرفني علي الحوش بس عادي ❤️طلعو خواته وقعدت مقعمزه في دار نومي ومش مصدقه روحي
ابتهال مواليد 90بنت طيوبه بكل وجمالها كان عادي بس حلاوة روحها غالبه❤️مواصفاتها بيضه جسمها متناسق ونقشها ع الاسود وشعرها كاري بعد مانخطبو يلي اصغر منها في العيله وتزوجو الكل قعد يعزر فيها ليش لاتوا مخطبك حد؟طيح سعدك ندادك بصغارهم ومن هاذا الكلام وهيا كانت تبين قدام الناس انها عادي بس من داخل يعلم ربي لهاذا السبب اول واحد جي خطبها وافقت طول تعالو نتعرفو علي راجلها ????
عصام مواليد87عصبي هلبا وعنده كلمته بس يلي تمشي مطلق وعنده بنت ويلي كان متزوجها علاقه مدة5سنين وبعد متزوجها بدت المشاكل بينهم بدات بعد مجابت البنت لان كانت مرته عايشه برا ولما رجعت وتزوجت عصام كانت غيررر بكل مش لابسه حجات وتبي تطلع وتخش ع كيفها من غير اللبس يلي يحشم حاول يربيها بطريقته ويخليها ترجع ع الشي يلي ادير فيه بس للاسف كانت عنيده هلبا وطلبت الطلاق وعصام رغم كان يحبها طلقها ?عنده كل شي ولا عزة نفسه وهيا مصدقت من اول مطلقت اتزوجت طول وخلتله البنت وطبعا خواته اصرو عليه يتزوج لان البنوته صغيره عمرها 3سنين واسمها شهد مواصفاته طويل شوي ابيض بس مايل للقمحي عيونه عسليات وشعره ولحيته ع الاسود الداااكن
نجو لي قصة بنات عم ابتهال ساره ونورس وهما خوات ❤️
كانت الخيمه معبيه بنات العيله والوقت متأخر مقعمزين يشربو في الشاهي ويهدرزو ع الحفله ويقرمو في الناس
ساجده:ااااه امتا بنتزوج ياترى توا ابتهال شنو ادير?
ملاك:احححح شن بتكون ادير يعني مصح وجهك
ساره:يا بنات انا بنرقد خلاااص
نورس:نفاخه اختي ديمه هكي حتا السهريه قاعده مبدتش فراااشك طول زي الدجاج
ساره:تصبحو يابنات
ابرار:والله شكلها اختك مكبده يانونو وخاشه بتكلمه??
ملاك:زعمااا
نورس:لالا معتقدش اختي مضحكه ونيه منو بيكلمها غير صديقها مؤيد المعفن
هبه:حرام عليكم البنت ياكلبات ?والله عاقله حتا في الكليه معمري شفتها مع حد
اميره:خشت للخيمه ….شنو بنات بتفرشو في الخيمه؟
ملاك:في مكان داخل اموره؟
اميره:لالا كلهم بايتين ره مفيش وين تحطي رجلك طلعو الفراشات ورقدو هنايا وخلاص تو نكلم بوي يكلم الاولاد محدش يخش الخيمه بكرا
ابرار:اي احسن مديري ونبي اموره شوفيلنا من الكيكه الفاضله
اميره:به تمام …نورس ترا شوي نبيك
نورس:شبحتلها من فوق لا لوطه…علاش?
اميره:شويه بس
نورس:ناضت معاها
مؤيد:ههههههه مجنونه
ساره:اي قولي شن درت اليوم
مؤيد:شي يا سرورتي كساد شنو امتا عرس اختك
ساره:مزال شكلهم مطولين
مؤيد:به ع خير يارب
نورس:شن فيه
اميره:نبي نكلمك بخصوص نزار
نورس:اففففف نزار نزار نزار تبيني نعاودلك القصه؟حبيبتي اي انا كنت علاقه معاه ولما جي يلي ارجل منه خطبني سيبته ونخطبت وانتي توا يابنت خالتي علاقه انتي وياه انا شنو دخلي بيكم ؟
اميره:تمام نورس?بس حبيت نقولك شي منبيكش تسمعيه من برا قلت نخبرك نزار الخميس بيجي يخطبني
نورس:تفاجأت ….تتهنو اصلا كل مقام لي مقامه ….ومشت
ت
القصه ومافيها❤️
قبل سنتين خشت ساره لي كلية الهندسه تعرفت ع مؤيد وحباته هلبا بس قعدت تتواصل معاه بي اسم الصداقه في يوم مشت نورس معاها للكليه وبصدفه جي نزار خو مؤيد عشان يروح بيه وشاف نورس وعجباته ودارو علاقه بس طلب من ساره ونورس انهم ميحكو شي لمؤيد استمرت نورس مع نزار سنه علاقه وحباته هلبا بس اول واحد خطبها وافقت وجبدت عليه وهوا بعد وووووقت تعرف ع بنت خالتها اميره وحبها ❤️
هديل:وقفت قدام الخيمه ….بنات نسخن في العشي الفاضل لي عماتي نحسبكم؟
ابرار:اي بالله عليك مكليناش مبكري لهينا
نورس:كتري سلايط وراس هدوله
هديل:تمام ….واشرت بس راسها لي ملاك بمعنى تعالي
ملاك؛نحط تالفوني في شحن ونجيكم
ابرار:ع طريقك هاتيلي اميه
ملاك:به
ملاك:ها خيرك؟
هديل:عارفاتك رح تعصبي وترفضي بس ع خاطري ملوكه بالله عليك
ملاك:تكلمي شغلتيني ?
هديل:مهند يبي يحكي معاك5دقايق بس
ملاك:لااا هديل لا
هديل:بالله عليك شويه بس وخلاص
ملاك:انتي عارفه ان خوك كسرني ?مجبوره نشوفه كل يوم لانه ولد عمي لا اكتر بعدين انا توا مخطوبه مفيش كلام بينا
هديل:قال انه بيعطيك شي ضروري
ملاك:تفاجأت ?
هديل:هيا بالله عليك كلهم راقدين توا يستنا فيك ورا الخوش انتي بري وانا تو نمشي جنب البنات نعطي عليك بالله عليك ملاك 5دقايق بس
ملاك:وافقت حطت وشاح ع راسها ومشت
ساره مواليد 97بنت هاديه هلبا وقنينه قمحيه طولها مناسب لي عمرها وشعرها طويل وعيونها كبار ومتحبش تغلط في حد وديما في حالها
نورس: مواليد96عكس اختها تمااااامااالسانها طووويل هلبا وحرفه ومتحبش تسكت لي حد ودير في العار لو حد غلط فيها بس في نفس الوقت قتينه كانو احلا بنات في العيله هيا واختها ساره
مواصفات نورس بيضه وطويله شعرها طويل ونقشها ع البني وحاليا مخطوبه
اميره مواليد97حبابه وكيوت بس جمالها عادي قمحيه ونقشها ع الاسود
ملاك مواليد 96بنت مرحه وحلوه ❤️حبت ولد عمها بجنووون وحتا هوا حبها بس الفتره الاخيره تعرف ع بنت تانيه وبدي يتغير عليها ومعش يرد عليه زي قبل لين كشفت خيانته ولما واجهاته بكل وقاحه اعترف وهيا ادمرت مسكينه بعد شهرين تقريبا اول واحد خطبها وافقت بحجة انها ممكن تنساه مراصفاتها بيضه حوابها عراض ونقشها ع الاسود وعندعا شامه قريبه لي فمها دبدوبه شويه وطولها مناسب
نزار مواليد93مواصفاته متوسط الطول معنداش لحيه عيونه كبار وشعره اسود شخصيته قويه وخبيث
مؤيد مواليد 94قمحي وشعره ولحيته ع البني الهااادي وعيونه خضر حتا هوا شبه ساره ميحبش يغلط في حد وحنون بكل وجوه حلوو …يتبع
في الحلقات الجايه رح يطلعو شخصيات جديده وحكايات جديده بس متخافوش مش رح نلخبطكم
جميع الحلقات
- خيانه الحلقة الثانيه
- خيانه الحلقه الثالثة
- خيانه الحلقة الرابعه
- خيانه الحلقه الخامسه
- خيانه الحلقه السادسه
- خيانه الحلقه السابعه
- خيانه الحلقه الثامنه
- خيانه الحلقه التاسعه
- خيانه الحلقه العاشرة
- خيانه الحلقه الحادية عشر
- خيانه الحلقه الثانية عشر
- خيانه الحلقه الثالثة عشر
- خيانه الحلقه الرابعة عشر
- خيانه الحلقة الخامسة عشر
- خيانه الحلقه السادسه عشر
- خيانه الحلقه السابعه عشر