حطيتك في عيوني

#حطيتك_فعيوني

??للكاتبه زهور جمال الدين ??

???الحلقه الثامنة ?? ?

جاها يجرى …

عيونه حمر وهوا يعيط : اركبى السيارة اهو جايك

-مباهر: باهى باهى اهو مشيت

ومشت تجرى لسيارتها

غسل منصور يديه وغير تيشيرته وسرواله ومشالها لسيارتها

هيا عارفاته بعيط عليها

اول ماوصل جنب الروشن

شبحتله مباهر

وقالته: نحبك

منصور قعد يشبحلها وسكت ..ونسى كل العياط اللى كان ناوى يعيطه عليها بسبب جيتها للورشه

-منصور: انا توة …

قصت عليه مباهر: وانت !!

-منصور: وانا شنو

-مباهر: انت تحبنى ولا لا

-منصور: انتى قاعدة تسألى

-مباهر: تحبنى ولا متحبنيش

-منصور: طبعا نحبك ونبيك على سُنه الله

-مباهر: امالا خلاص حبيبي بلاش زعل ..

ومسكت يده وشبحت لعيونه :انا جاية نطيبلك فى خاطرك

-منصور ابتسم: باهى امشى لنفس المطعم اهو لاحقك

فرحت مباهر: حاضر من عيونى.. نحبك

-منصور: نمووت فيك..

ولعت سيارتها ومشت…ومنصور ركب سيارته

_________________________
_________________________

-اميرة : يسلملى قلبك فيفي يالحب

-فيفي: الف خدمه من هالخدمه …محلاااااه سيرجيو مش عاااااادى

-اميرة : شنو شكلك حبيتيه ولا شنو يا بنت

-فيفي: صراحه اللى تجربه مرة معش تنساه

-هنادى: شهيتونى فيه ??

-اميره : ايه بيش راجلك يقتلك

-اميرة تتفرج عالفيديو: يعطيك الصحه يا هنادى مونتاج مش عادى للفيديو

-هنادى: ماهو حدفت اللقطات اللى طالعه فيها وجه فيفي

-اميرة : زى ماتفاهمنا فيفي تختفى تماما ..راهو سراج مش ساهل

-فيفي: انا اصلا طالعه من طرابلس الاسبوع هدا

-اميرة: توة سكرى الصفحه الوهمية اللى فتحتيها عالفيس..
وكسري الشفرة اللى كنتى تكلمى فيه بيها

-فيفي: تم

-اميرة : وعموما شكله عجبك يا فيفي..ردى بالك تتهورى وتكلميه

-فيفي: عيب عاد

-اميرة: هنادى جبتيلى الشفرة اللى شريتيها من المصري

-هنادى: جبتها ايه اهيا خوديها

وركبت الشفرة فى جهازها واتصلت

________________

مباهر وصلت للمطعم .. وركبت للدور الثانى

وركب وراها طول منصور

قعمزو عالطاولة

منصور قرّب كرسيه منها..ومسك يديها

.. ويشبحلها

-مباهر: هكى يديرو اللى يحبو

-منصور: هكى يديرو اللى ميبوش يجرحو

-مباهر: بعدك عنى هوا الجرح

-منصور: جرح بعدى عنك نقدر نداويه وساهل..

لكن لو قلتلك كلام وجرحك كيف مزال بطلعيه من قلبك

-مباهر: اهم شى انك متسيبنيش وماتبعدش علينا .. والكلام نطلعه وننساه لانى نحبك

-منصور: شن قلتى

-مباهر : نحبك

-منصور: زيدى عاودى منسمعش فيكو

-مباهر تضحك ومواطية راسها : ن ح ب ك .. سمعتنى توة

-منصور: وانا نمووووت فيك وفى انوثتك وحشمتك وجمالك

وربي اللى خلقنى لما نسعدك يا مباهر.. ونحطك فعيونى ونسكر عليك

-مباهر : ربي مايحرمنى من كلامك الحلو حبيبي

-منصور: الله ..محلاها كلمة حبيبي من فمك ..

ياريت تعاركنا من زمان بيش سمعت هالكلمة الحلوة

-مباهر: ايه حبيبي وروحى وعمرى وكل شى

-منصور: اسمعى انا معش نبى فترة تعارف ..خلاص ياسرنى من اللى صار الايام اللى فاتو حرقلى دمى

وشد يديها الزوز …

ولو انتى مقتنعه بيا كزوج .. اعطينى توة رقم خوك نورى

-مباهر تشبحله بحب ومبتسمه : نعطيك رقم نورى وسراج وماما وعماتى وخالاتى

وبدو يضحكو الزوز

-منصور: ربي يخليك ليا يا مرتى ويا ام صغارى

-مباهر: لكن متكلماش لين انا نمهد الموضوع ونكلمه ونقولك ..

-منصور: حاضر زى ماتبى حبيبتى

________________

-اميرة : اسسس اهو التليفون يشرين

-ايمان : الو

-اميرة : ايوة .. معاى ايمان

-ايمان: ايه تفضلى انا ايمان من معاى

-اميرة تبكى بالكدب: انا وحدة من ضحايا خطيبك يا ماما

-ايمان متفاجئة : انتى على منو تحكى

-اميرة: نحكى على سراج النصاب….

ايمان ساكته ومنصدمه ومتفاجئه

قبل مانحكيلك نحب نقولك بعتلك عالخاص فيديو وضرورى تشوفيه

-ايمان : فيديو شنو

-اميرة : فيديو لخطيبك يا ماما وهوا يمارس فالدعارة

ايمان بدت تبكى : انتى وحدة كدابة

-اميرة : انا منكدبش حبوبة ..وبعتلك الدليل شوفيه بعيونك..
واجهيه…وكانه فالح خلى ينكر

ايمان: صح سراج خفيف ونسونجى ..لكن مستحيل نصدق انه يدير الشى اللى قلتى عليه

-اميرة: امالا اسمعى يا ماما ..خطيبك داير شبكه دعارة فطرابلس..
يدير علاقه مع الفريسة .. يفقدها عدريتها ..وبعتالى يبدا يبيع فيها لصحابة

” وطبعا الكلام متع داير شبكه كله كدب يا نارى على سراج ”

ايمان تبكى بس

-اميرة: المهم نخليك تتفرجى عالفيديو براحتك
…
وسلميلى عليه وقوليله يدير تحليل قبل دخولكم

وسكرت …

-هنادى: صحه ليك قديتيلها

-اميرة: خليه بيش يعرف قيمه اميرة

-هنادى: بالرغم كنتى تقدرى تبعتيله وحدة فيها ايدز وتفكى روحك من هدا كله

-اميرة: فالح وحريص يا ماما .. يدير فى تحليل للبنت قبل

-فيفي: صح حتى انا فوتنى على معمل صاحبه قبل

-اميرة: كنهدا مسهلها فكرة الايدز ..وتبرد عالقلب اكثر

………

ايمان تبكى وصاحباتها يسكتو فيها مش فاهمين خيرها ولا منو كلمها

وهيا تقوللهم انها تبى نت توة ضرورى

مشت وحدة من صديقاتها جابتلها ماى فاى صاحبها …وفتحت بيه الفيس متعها

وتفرجت عالفيديو …

وطاحت اغمى عليها فالكلية …

والبنات مافاهمين شى..ولا شنو اللى صاير معاها

كلمو بوها جى روح بيها

_______________

فالمغرب نورى روح من العمل مرهق

وناوى يدير حل ويتواصل مع خولة ..لانه من يوم اللى عطتله رقمها متصلش بيها

ومباهر تراجى فيه تبى تقوله على موضوع منصور

حطو لنورى غداه وتغدا …

وجى بيركب لداره لانه تعبان …

-مباهر متلكمسه : نورى نبيك فى موضوع خاص

نورى شبحلها وحس انه موضوع زواج

حط ايده على شعرها بحنان

-نورى مبتسم : شنو بنتى كبرت وبدت تبينى فى موضوع خاص

-مباهر ميته بالحشمه ومواطيه راسها : تو انت عرفته موضوع شنو

انفتح باب الحوش ..وسراج مدخل معاه هلبا اكياس ..

-وردة: شنو هالاكياس هادى

-سراج: هادو حاجات ايمان

-مباهر حايرة : وليش جايبهم حاجات ايمان

-سراج : بو ايمان فسخ الخطوبه

-وردة: خيركم شن فى ..

وقعمزت عالصالون .. يانهاراتى ابسود ..ياحليلى على وليدي ..خيرهم دارو هكى

مشت مباهر تجرى قعمزت بحدتا امها ..

وسراج نفس الشى مشى يجرى لامه

-نورى : احكى خيرك ساكت يا سراج

-سراج وقف : الناس فسخو الخطوبة .. ومفيش نصيب ..وما حد يسألنى ..

مباهر مشت تجرى لخوها سراج وحضناته مع كتافه وقعمزاته عالصالون

-وعيونها مدمعات: هيا الخسرانه يا سراج

-سراج: انا والله ماواجعتنى هيا ..

ولاعندى اى مشاعر تجاهها ..

اللى واجعنى ان البنت متربيه وانا اللى ربيتها على يديا

-وردة: غير فهمنى علاش

-نورى : تبى الحق يااام ..الاوصول اننا نمشولهم توة

-وردة : نمشيلهم وهما محملين ولدى بالشكاير

-نورى : البسى عبايتك يااام هيا ..

-وردة: منمشيش “واجعها ولدها ” .. شنو تبينى انلقى ايديا

-مباهر: ماما هادو فى يوما ما كانو نساباتنا ..غير بري شوفيهم خيرهم

وكانا سراج عنده حق خوديهوله

وردة عجبتها الجملة ..و ناضت وردة لبست عبايتها

وطلعو هيا ونورى

“ولا صار من مكالمه خولة . ولا صار من الحكى على موضوع عريس مباهر”

________________

__________

وصلو نورى ووردة لحوش اهل ايمان

خشت وردة لام ايمان ..ونورى لبو ايمان

-ام ايمان وجهها اسود ومستغربة: والله يا وخيتى ماندرى على حاجه ..
فالحوش لا بيا ولا عليا خشت البنت صايخه وتبكى..

وقالى بوها وتى حاجات سراج انا كلمته وفسخت الخطوبة

-وردة : خيرها شن شافت ولا شن سمعت عليه

-ام ايمان : والله مابو يقولولى …الدوة بين ايمان وبوها وسراج

-وردة: متخلونيش هكى زى العميا..

حتى تنشدنى الناس خيره ولدك نلقى منقول

-ام ايمان: الله غالب يا وخيتى والله زى ماقلتلك ماندرى على حاجه …

بالك الحاج تو يقول لنورى عالسبب

……….

نورى مقعمز جنب بو ايمان ..

-بو ايمان: والله يا نورى يا ولدى ماكنت نبى يصير موقف زى هدا بينى وبينك

ونورى شاد تليفون بو ايمان فى يده ويتفرج …لين استوعب ان اللى فالفيديو خوه سراج ..

-نورى: الشباب كلها تغلط

قص عليه بو ايمان: اللى ماترضوشى انتو لبنتكم .. مستحيل نرضوه احنا لبنتنا

-نورى: هدا اخر قرار عندك..غير شاور ايمان

-بو ايمان: ايمان هيا صاحبة قرار الفسخ ..لان شكلها مش اول مرة تشد عليه حاجه

-نورى: الدنيا نصيبات واحنا اهل زى زمان زى توة

-بو ايمان: ربي يجيبهاله زينه

-نورى : امالا ناديلى الوالدة

-بو ايمان: قوله الحكاية والصور اللى وريتهملك ..من قدايا انا سره فى بير

لكن بنتى خلاص ..كل شى تم

ووقف نادى عمتك وردة…وطلعت

روحو للحوش

مباهر عندها علم بالموضوع لان سراج حكالها ان مصوريله مقطع وموريينه لايمان

وبعد ما وصلو للحوش

نورى : يااام تعالى لدارك شوى نبيك

وقرر انه يحطها فالصورة بيش تفهم

وكلمت مباهر منصور قالتله انها مكلمتش نورى ..

وان صارلهم ضرف يصبر شوى الاسبوع هدا

__________________

بعد مابكت امهم لين شبعت?

وقعد سراج يهدى فيها ..وانه كل شى نصيب

وقاللها انه مش متأثر لوماصارش

يانارى خايف عليها يجيها الضغط ولا السكر

لكن وردة متأثرة هلبا على ولدها ..

صح صعبة عالام يفسخو من ولدها ويردوه محمل بهداياه …هدا من جهه

ومن جهه ثانية ..عملة ولدها تحشم ولو انتشرت تجيب العار ودوة الناس

اتكت فى وردة فى سريرها ..

ومباهر تبى ترقد معاها ..

لكن امها مخلتهاش ..

وقالتلهم انها تمام وتبى ترقد

طلعو وسكرو عليها الباب

وردة دارها فالدور الاول وهما ديارهم فوق

راكب نورى مالدروج للدور الثانى ..

تلفت لسراج …

-نورى: تعالة يا سراج

قرب سراج من نورى

-نورى: نقولك حاجه ..مدامك تخون معناها انت عمرك ماحبيتها

-سراج: البنت انا مرباها على ايديا

-نورى: الربايه حاجه والحب حاجه ثانية…

الحب يعنى الاخلاص..

ومدامك ما اخلصتش معناها ماحبيتش

-سراج: نورى انا اسف كانا حطيتك فى اى موقف بايخ

-نورى: هوا من ناحية حطيتنى فى موقف بايخ اكيد لا ..
-سراج: باهى الحمدلله

-نورى : انت حطيتنى فى موقف زفت يا زفت ..

وقعدو يضحكو

-نورى خايف على سراج : اضحك ماحد واخد منها حاجه ..
وحاول المرة الجاية انك ترتبط بوحدة قلبك مقتنع بيها …مش عقلك بس

وركب من الدروج فوق لداره ..

ومباهر ركبت لدارها .. كلمت منصور …

وقعدو يهدرزو …

____________

الساعه 10 فالليل

نورى خش داره…

بدل حوايجه …

وقعمز عالكنبه اللى فى داره شاد التليفون ويتفرج عليه…

زعما يتصل ولا مش وقته

………

مباهر تهدرز على منصور

-منصور: دار النوم ضرورى انتى اللى تختاريها

-مباهر: حتى لو اخترتها انت حبيبي عادى

-منصور: لا نبى ناخد اللى انتى تعجبك وترتاحى فيها

-مباهر: اماعين المطبخ متشريش فيهم ولا حاجه ..

كلهم بنجيبهم معاى

-منصور: باهى معناها نشري غاز وثلاجه ودولاب

-مباهر: حبيبي نديروه الدولاب مطبخ دائرى احسن ..
حتى لو صغير حرف ال

-منصور : حاضر انتى بس اؤمرى وانا انفد

-مباهر: انت تاج راسى معنديش عليك امر

-منصور: وانتى حبي ونور عيونى

-مباهر: لكن انا منبيش نكلف عليك ..نشبح فالدنيا كيف غالية

-منصور: الغالى يرخصلك يا حبى.. ورشتى تخدم كويس ومعنديش مشكلة لانى ملمد مبلغ

المهم تكونى انتى راضيه

______________

نورى يشبح للتليفون ومكتوب قدامه رقم خولة

قاعد حاير زعما يكلمها زعما لا

قرر يتصل و ضرب زر اتصال ..

الرقم يضبح …

ردت خولة

-خولة : ايوة

-نورى: واخيرا

-خولة تضحك: واخيرا شنو

-نورى : واخيرا أدن ربي وتكلمنا

-خولة : رقمى عندك ليه قريب اسبوع

-نورى: حقة نسيت .. السلام عليكم

-خولة : وعليكم السلام

-نورى: عارف الوقت متأخر.. ومش حنعطل عليك ..

اكثر من عشرة دقايق من وقتك

-خولة فى خاطرها : وووه عالرزن

____________________

____________

-منصور: مدخليش قلتلك نبى نشوفك غدوة

-مباهر: وووك عالطماع ..الصبح شفنا بعض

-منصور: انا معش قادر نبعد عليك ولا يوم ..كان نلقى نخطفك اليوم قبل غدوة

-مباهر: باهى تمام ..وين نتلاقو

-منصور: خلى لقائاتنا كلها فى نفس المكان

-مباهر: حاضر ..نفس الوقت ونفس المكان

-منصور: غير امتى يجى الصبح بس

-مباهر: برة ارقد الساعه 3 ونص ..معش وقت عليك

-منصور: حتى انتى ارقدى وسكرى الفيس

-مباهر: ماهو بياكلونى

-منصور: هيا كلمه ..الفيس توة يتسكر.. وتحطى راسك وترقدى

-مباهر: ونحلم بلقاء غدوة

وقعدو يضحكو

-مباهر: تحبنى

-منصور : نعشقك

وسكرو الخط …

مباهر قبل ماترقد حبت تنزل تطمن على امها

_________________

سراج يخمم كيف يقدر يحصل فيفي.. حسابها فالفيس اللى تعرف عليها فيه مسكر…

وتليفونها مقفل .. وخوا حامق يبي يعرف منو اللى دايرله المقلب هدا

ومفكر انه اقرب حاجه تكون اميرة … بس لازم يلقى فيفي بيش يزبط

__________________

-نورى: تخصصك حلو

-خولة: من يومي نموووت فالنباتات وفى الورد وفى زراعته

-نورى: وتوة وين ناوية تشتغلى

-خولة : فالكلية طبعا.. بنبدا نعطى فى محاضرات

-نورى : حطيتى اوراقك ولا مزال

-خولة: غدوة بنمشى للجامعه نقدمهم

-نورى: عندى صاحبى يشتغل فالادارة غادى..ومركزه قوى ..لو تحبى نكلمه على اوراقك

-خولة : ياريت والله .. توفر عليا هلبا تعب

-نورى: خلاص امالا تلقينى غدوة قدامك فالكلية

-خولة : لا ولو منبيش نتعبك عارفتك مشغول ..حتى تتصل بيه بس عادى

-نورى: ولو تعبك راحه .. الا اداكنتى متبيش تشوفينى

-خولة: لا ليش تقول هكى ..وليا الشرف

نورى: خلاص معناها متفقين

-خولة : اوووف الساعه ثلاثه ونص.. تصدق اول مرة نقعد للوقت هدا

-نورى : تصدقى حتى انا عمرى ماقعدت للوقت هدا

وقعدو يضحكو ..

-نورى: عموما سامحينى سهرتك .. بناخد عشرة دقايق من وقتك ..شوى خديت وقتك كله

-خولة: تستاهل كل خير

-نورى: ياخوفى نتعود ومعش نقدر نرقد منغير منكلمك

-خولة: والله لو تحب عادى كلمنى

نورى فى خاطره ..من ناحية نحب..نحب وطايح ليا ايام

-نورى: خلاص متفقين

وانهو المكالمه

نورى حط راسه عالمخدة ويتخايل فى صوت خولة ..

لين يسمع فى صوت مباهر تعيط وتنادى:

نورى ..يانورى تعالة شوف ماما

فتح نورى باب الدار ونزل يجرى ..

وفتح سراج باب داره ونزل يجرى

____________________

وصل نورى لدار امه .. خش يجرى على سرير امه …لقى مباهر تبكى

-مباهر: ماما نوضى خيرك

-نورى يضرب فى امه على خدها: يااام ياااام

سراج واقف يبكى: انا السبب ..انا السبب

– مباهر تبكى: ماما ما ماتتش يا سراج اسكت

-نورى: ضمو افامكم الزوز ..وبري انتى بدلى حوايجك وخلى نرفعوها للعيادة بسرعه …قيم معاى يا سراج

طارت مباهر للدور الثانى..
لبست سروال وماليا..ومسكت فى يدها وشاح ونزلت تجرى ..

نورى وسراج قايمين امهم وصلو بيها للسيارة …

ركبوها فالكرسى الخلفى

ركبت مباهر تجرى جنب امها

وسراج سكر الحوش وفتح الكراج و طلع نورى السيارة …
وسكرو القراج وركب سراج جنب نورى وطلعو يجرو بالسيارة

______________________

وصلو للعيادة …

قاللهم الدكتور ارتفعلها السكر وهبطلها الضغط ..

وحالتها مش مستقرة

نورى فالممر يتكلم بالتليفون

-قلتلك ضرورى تحصلى اماكن على طيارة غدوة..

-حالتها تعبانه يا راجل استحالة نخاطر بيها للطيارة الجاية

-هوينا بعتلك الجوازات مع سراج ..وراس اوخى سقدنى

ومباهر واقفه قدام دار امها وتبكى

جاها نورى حضناته وقعدت تبكى …

وبالفعل حصلو حجز هما الاربعه …

والطيارة كان موعدها 7 صباحا اطير ..

فمن العيادة مشو طول للمطار …ورفعو امهم لروسيا

نورى يكلم فى خاله ..قاله ان امه تعبت وطلعوها طول من العيادة

وان مفيش وقت حتى انهم يشوفوها

وادكر خولة …

شبح لقاها 6 ونص …

لقى ان الاتصال عيب توة البنت راقدة

فبعت مسج

“صار معاى ضرف وسافرت روسيا ..حنكلمك فى اقرب فرصه ”

ومشى لخوته …وركبو فالطيارة وسافرو

الوقت كان شوى ..مباهر لا روحت للحوش

ولا رفعت حوايجها ولا رفعت تليفوناتها ولا رفعت شى .

تبكى على امها وخلاص ونست معاها الدنيا كلها

___________________

ثانى يوم منصور جهز نفسه ومشى لموعده مع مباهر

قعد يراجى ساعه واثنين وهيا ماجتش

يتصل التليفون ينادى مفيش رد …

منصور قلبه بدى يغلى ..انشالله خير …

مشى قدام حوش مباهر..قعد يشبح من فتحت الباب ..لقى سيارة مباهر فالجنان

اتصل برقم سرور بيسألها لقى رقمها مقفل

فتح الفيس لقى مباهر من امس فالليل مافتحتش

وهيا وصلت روسيا ودخلو امها طول للمستشفى رقدوها

اليوم الاول كله مباهر مارقدتش يعلم الله بحالها من البكى والخوف على امها

ومنصور مرقدش يعلم الله بحاله من الخوف على مباهر….

وفاتح الفيس يراجى فى اى رساله منها

وسرور بردو رقمها مقفل ..

ثانى يوم حالت ام مباهر سائت ..ومباهر وخوتها فى المستشفى

ومنصور يعلم الله بحاله ..

مشى قدام حوش سرور يبي يستفسر منها وين مباهر ..
شافوه جماعه واقف قالوله تفضل يا شاب..ولع السيارة ومشى

يتصل برقم مباهر خارج التغطيه..لان الشحن تم

يومين وهوا فى دوامه يراجى فى رسالة من مباهر..

ما داقش طعم النوم وهوا حاير

خيرها شن صاير معاها

وزعما موضوع تأجيل الحديث فى موضوعهم مع نورى ليه علاقه

حاير ..ومالقاش من يسأل ..شاد التليفون ويراجى فى مرسال منها وخلاص

وهيا عطلت عليه ولا بعتت مرسال ولا رساله

______________

ام مباهر تعبانه ..

وصغارها نسو الدنيا كلها وخايفيين عليها

زعما شن يصير فى حالتها

الحلقه الجاية نكملو …

الحلقه اللى بعدها انزلها بعد ساعه انشاء الله

نحبكم❤